Category کھیل

ڈھاکا،:بھارتی ٹیم کے کپتان روہت شرما بنگلادیش کیخلاف ون ڈے سیریز کے دوسرے میچ میں فیلڈنگ کرتے ہوئے زخمی ہو کر اسپتال پہنچ گئے۔ بھارتی کرکٹ بورڈ کے مطابق روہت شرما بنگلادیش کے اوپنر انعام الحق کا کیچ پکڑنے کے دوران زخمی ہوئے، گیند نے ان کے انگوٹھے کو ہٹ کیا جس کے بعد ان کے انگوٹھے سے خون بھی نکلنے لگا۔انگوٹھے پر چوٹ لگنے کے فوری بعد ان کی چوٹ کا معائنہ کیا گیا جس کے بعد انھیں فوری طور پر ایکسرے کے لیے ڈھاکا کے اسپتال منتقل کر دیا گیا۔روہت شرما کی غیر موجودگی میں بھارتی ٹیم کے نائب کپتان کے ایل راہول کپتانی کی ذمہ داری نبھا رہے ہیں۔یاد رہے کہ بنگلادیش نے بھارت کے خلاف تین ون ڈے میچز کی سیریز کا پہلا میچ سنسنی خیز مقابلیکے بعد جیت لیا تھا، آج بھارت اور بنگلادیش کے خلاف سیریز کا دوسرا ون ڈے میچ کھیلا جا رہا ہے۔

ایڈیلیڈ :آسڑیلیا اور ویسٹ انڈیز کے درمیان جاری ٹیسٹ سیریز کا دوسرا ٹیسٹ میچ آٹھ دسمبر سے ایڈیلیڈ میں کھیلا جائیگا جو ڈے اینڈ نائٹ ہوگا، آسڑیلوی ٹیم کو دوسرے ٹیسٹ میچ کیلئے اپنے کپتان فاسٹ بائولر پیٹ کمنز کی خدمات حاصل نہیں ہونگی جو فٹنس مسائل کا شکار ہیں، پیٹ کمنز کی جگہ فاسٹ بائولر سکاٹ بولینڈ کو ٹیم میں طلب کرلیا گیا ہے ، پیٹ کمنز نے بدھ کے روز کچھ رننگ کی تاہم انہوں نے نیٹ میں بائولنگ نہیں کرائی آسڑیلوی ٹیم کی میڈیکل ٹیم کے مطابق پیٹ کمنز اپنی بائولنگ کرانے کیلئے مکمل فٹ نہیں ہیں، امید کی جا رہی ہے کہ پیٹ کمنز جنوبی افریقہ کیخلاف ٹیسٹ سیریز کے پہلے ٹیسٹ میچ تک مکمل فٹ ہو کر ٹیم میں واپس آجائیں گے، پیٹ کمنز کی جگہ ٹیم کی قیادت سٹیون سمتھ کرینگے، یاد رہے کہ آسڑیلیا کی ٹیم نے پرتھ میں کھیلا جانے والا پہلا ٹیسٹ میچ جیت کر سیریز میں ایک صفر کی برتری حاصل کر رکھی ہے

دوحہ :قطر میں جاری فیفا ورلڈ کپ فٹبال ٹورنامنٹ کے پری کوارٹر فائنل مقابلے میں پرتگال کی ٹیم نے ایک یکطرفہ مقابلے کے بعد سوئٹزرلینڈ کی ٹیم کو ایک کے مقابلے میں چھ گول سے شکست دیکر کوارٹر فائنل مرحلے میں جگہ بنا لی ہے جہاں اس کا مقابلہ مراکش کی ٹیم سے ہوگا جس نے سپین کی ٹیم کو پینلٹی شوٹ آئوٹ پر اپ سیٹ شکست دیکر کوارٹر فائنل مرحلے میں جگہ بنائی ہے، پرتگال کی ٹیم نے پری کوارٹر فائنل میچ کیلئے شہرہ آفاق کھلاڑی رونالڈو کو ڈراپ کرتے ہوئے گونکالو رومس کو ٹیم کا حصہ بنایا جنہوں نے میچ میں تین گول سکور کرتے ہوئے اپنی ٹیم کی جیت میں اہم کردار ادا کر ڈالا ، رومس سے میچ کے 17ویں منٹ میں گول سکور کرتے ہوئے اپنی ٹیم کو ایک صفر کی برتری دلائی جبکہ میچ کے 33 ویں منٹ میں پیپی نے گول سکور کرتے ہوئے برتری کو ڈبل کردیا پہلے ہاف کے اختتام تک پرتگال کی ٹیم کو دو صفر کی برتری حاصل تھی ، میچ کے 51 ویں منٹ میں رومس نے اپنی ٹیم کیلئے تیسرا گول داغ دیا جبکہ صرف چار منٹ کے وقفے کے بعد گویرو نے برتری کو گول سکور کرتے ہوئے چار صفر کر ڈالا اس کے تین منٹ کے بعد سوئٹزر لینڈ کی جانب سے اکنجی نے اپنی ٹیم کی جانب سے پہلا سکور کیا تاہم میچ کے 67 ویں منٹ میں رومس نے اپنا تیسرا اور ٹیم کیلئے پانچواں گول سکور کرتے ہوئے سوئس ٹیم کی جیت کے تمام چراغ گل کر ڈالے جبکہ آخری لمحات میں رافیل نے اپنی ٹیم کیلئے چھٹا گول سکور کرتے ہوئے مقابلہ چھ ایک کردیا جو فائنل وسل تک برقرار رہا۔قبل ازیں پری کوارٹر فائنل میں مراکش کی ٹیم نے بڑا اپ سیٹ کرتے ہوئے سپین کی ٹیم کو پینلٹی شوٹس آئوٹ پر صفر کے مقابلے میں تین گول سے شکست دیکر کوارٹر فائنل مرحلے میں جگہ بنا لی ہے، یہ پہلا موقع ہے کہ مراکش کی ٹیم کوارٹر فائنل مرحلے تک رسائی حاصل کرنے میں کامیاب ہوئی ہے، مراکش چوتھا افریقی ملک بن گیا ہے جس کی ٹیم نے کوارٹر فائنل مرحلے میں جگہ بنائیاس سے قبل کیمرون نے 1990 میں ، سینیگال نے 2002 اور گھانا نے 2010 میں یہ اعزاز حاصل کیا تھا تاہم یہ تینوں ٹیمیں کوارٹر فائنل مرحلے سے آگے نہ جاسکیں، مراکش اور سپین کے درمیان ہونے والے پری کوارٹر فائنل میچ کے دونوں ہاف بغیر کسی گول کے برابر رہے جس کے بعد میچ کو نتیجہ خیز بنانے کیلئے پینلٹی شوٹس آئوٹ دی گئیں جس میں مراکش نے تین جبکہ سپین کی ٹیم کوئی بھی گول سکور کرنے میں ناکام رہی ، سپین کے کھلاڑی سارابیا، سولیر اور بسکیوئسٹ تینوں نے پینلٹی شوٹس ضائع کردیں جبکہ مراکش کے گول کیپر یاسین بونو دو پینلٹی شوٹس کو روکنے کے بعد ہیرو بن کر سامنے آئے۔

لاہور : پاکستانی ٹینس اسٹار سارہ محبوب کا کہنا ہے کہ لڑکیاں چاہے وہ ڈاکٹر ہوں یا کھلاڑی، اگر ان کی مرضی ہو اور وہ چاہیں تو اپنا کیرئیر جاری رکھ سکتی ہیں، شادی رکاوٹ نہیں بن سکتی۔سارہ محبوب ان دنوں لاہور میں جاری حسن طارق رحیم نیشنل رینکنگ ٹینس چیمپئین شپ کی ٹاپ سیڈ پلئیر ہیں۔ نجی ٹی وی چینل سے گفتگو کرتے ہوئے انہوں نے کہا کہ ہو سکتا ہے کہ میں لڑکیوں کے لیے رول ماڈل بن سکوں۔ میری کوشش یہی ہے کہ میں جب تک فٹ ہوں میں ٹینس کو جاری رکھوں۔انہوں نے شادی کے بعد ٹینس جاری رکھنے کے حوالے سے کہا کہ شادی کے بعد کچھ عرصے کے لیے بریک ضرور لی تھی لیکن ٹینس چونکہ میری اولین ترجیحات میں شامل ہے تو میں اس کو چھوڑ نہیں سکتی۔ اب پھر میں ٹینس کی طرف اپنی ساری توجہ مبذول کیے ہوئے ہوں۔انہوں نے کہا کہ میں ٹینس کھیلتی رہوں گی، خود کو فٹ بھی رکھوں گی تاکہ جب فیڈ کپ آئے تو اس میں پاکستان کے لیے اچھی کارکردگی کا مظاہرہ کروں۔سارہ محبوب نے کہا کہ مجھے لگتا ہے کہ شادی کے بعد میں زیادہ میچور ہوگئی ہوں، کھیل کے حوالے سے آگاہی بڑھ گئی ہے اور میں پہلے سے زیادہ اچھا کھیل رہی ہوں اس لیے میں سمجھتی ہوں کہ شادی کے بعد کھیل پر کوئی منفی اثر نہیں پڑا۔سارہ محبوب کا ماننا ہے کہ شادی رکاوٹ نہیں بنتی، بس لڑکی کی اپنی مرضی ہونی چاہیے اگر لڑکی چاہتی ہے کہ اسے کیرئیر جاری رکھنا ہے تو وہ جاری رکھ سکتی ہے اور کیرئیر پر فرق بھی نہیں پڑنے دے گی۔انہوں نے مزید کہا کہ اگر لڑکی اپنا کیرئیر جاری رکھنا چاہتی ہے تو ظاہر سی بات ہے اسے فیملی کی سپورٹ کی ضرورت بھی ہوگی اور اسے سپورٹ ملنی چاہیے۔انہوں نے بتایا کہ میں ٹینس جاری رکھنا چاہتی تھی مجھے فیملی نے سپورٹ بھی کیا تو میں اب تک کھیل رہی ہوں۔سارہ محبوب نے کہا کہ نیشنل رینکنگ ٹینس چیمپئین شپ کی طرز پر پاکستان میں زیادہ سے زیادہ ٹورنامنٹس کرانے کی ضرورت ہے جن میں نیشنل رینکنگ ٹینس چیمپئین شپ کی طرح سب سے زیادہ پرائز منی ہو اور یکساں انعامی رقم ملے، رہائش اور کھانے پینے کا بھی انتظام ہو۔ اس سے کھیل کو فروغ ملے گا اور بہتری آئے گی.

راولپنڈی :چیئرمین پاکستان کرکٹ بورڈ رمیز راجا کا کہنا ہے کہ انگلینڈ والے ٹیسٹ کے لیے ٹی ٹوئنٹی کے کھلاڑی لیکر آئے ہیں، پاکستان کو بھی سوچنا پڑے گا۔چیئرمین پی سی بی رمیز راجا نے پنڈی سٹیڈیم کی بے جان وکٹ پر تبصرہ کرتے ہوئے کہا کہ ہم پچز بنانے میں بہت پیچھے رہ گئے ہیں، پنڈی سٹیڈیم کی پچ بہتر ہونی چاہیے تھی کیونکہ پچ شہ رگ ہوتی ہے۔ان کا کہنا تھا کہ بغیر گھاس والی پچوں پربھی بائونس ہوتا ہے، سیزن میں اچھی پچز بنیں گی اور کھلاڑیوں کو نیوزی لینڈ میں بھی یہی پچز ملیں گی۔رمیز راجا نے کہا کہ ڈراپ ان پچز مسئلے کا حل ہو سکتا ہے، ڈراپ ان پچز مہنگی ہوتی ہیں لیکن امید کرتا ہوں کہ پچیں اچھی بنیں گی، ڈراپ ان پچ بحری جہاز میں آنی ہے، پاکستان خود ڈراپ ان پچیں بنائے گا۔پاکستان کے خلاف پہلی اننگز میں انگلینڈ کی بیٹنگ کے حوالے سے چیئرمین پی سی بی نے کہا کہ انگلینڈ نے جیسی بیٹنگ کی وہ آج تک نہیں دیکھی، انگلینڈ والے ٹی ٹوئنٹی کے پلیئر لیکر آئے ہیں، پاکستان کو بھی سوچنا پڑے گا۔ایشیا کپ کی میزبانی کے حوالے سے چیئرمین پاکستان کرکٹ بورڈ نے کہا کہ ایشیا کپ کی میزبانی پاکستان کو ملی ہے، بھارت نے کہا ہے کہ پاکستان نہیں جانا لیکن ایشیا کپ نیوٹرل وینیو پر نہیں جا سکتا، ایشیا کپ ہمارا ہے، ایشیا کپ پاکستان سے باہر نہیں جا سکتا۔

سڈنی :آسٹریلوی کرکٹر مچل مارش انجری کے باعث 3 ماہ کے لیے کرکٹ سے باہر ہوگئے۔رپورٹس کے مطابق مچل مارش کافی وقت سے ٹخنے کی انجری کا شکار ہیں اور اب وہ آپریشن کرا رہے ہیں۔مچل مارش اب بگ بیش لیگ نہیں کھیل سکیں گے جبکہ وہ دورہ بھارت کے لیے بھی ٹیم کو دستیاب نہیں ہوں گے۔مچل مارش بگ بیش لیگ میں پرتھ سکارچرز کی نمائندگی کرتے ہیں۔رپورٹس کے مطابق پرتھ سکارچرز نے بھی مچل مارش کی عدم دستیابی کا اعلان کردیا ہے۔میڈیا رپورٹس کے مطابق مچل مارش اب آئندہ برس ورلڈ کپ سے قبل ہی مکمل فٹ ہوکر ٹیم کو دستیاب ہوں گے۔چیف سلیکٹر جارج بیلی کے مطابق مچل مارش اہم کرکٹر ہیں، ریکوری میں مکمل معاونت کریں گے۔غیرملکی میڈیا کے مطابق انگلینڈ کے فل سالٹ بھی کندھے کی انجری کے باعث پرتھ سکارچرز کو دستیاب نہیں ہوں گے۔

عالمی میڈیا کے مطابق رونالڈو کو فٹ بال کی تاریخ کا سب سے بڑا معاوضہ ملے گا، رونالڈو سے سعودی کلب النصر116 ارب روپے کا معاہدہ کرے گا، جس کے بعد رونالڈو کو سالانہ 17 ارب روپے معاوضہ ملے گا، سعودی کلب النصر اور رونالڈو کے درمیان اڑھائی سال کا معاہدہ ہوگا۔

قطر ورلڈ کپ کے بعد کرسٹیانو رونالڈو سعودی کلب میں شمولیت اختیار کرلیں گے۔

واضح رہے گزشتہ ہفتے پرتگال کے معروف فٹ بالر کرسٹیانو رونالڈو نے مانچسٹر یونائیٹڈ کلب چھوڑ دیا تھا۔

راولپنڈی :پاکستان کے خلاف پنڈی ٹیسٹ شروع ہونے سے ایک دن قبل انگلینڈ کے کپتان بین اسٹوکس کی طبیعت ناساز ہو گئی۔پاکستان اور انگلینڈ کے درمیان تین میچوں کی سیریز کا پہلا ٹیسٹ آج سے راولپنڈی کرکٹ اسٹیڈیم میں شروع ہو گا۔ اس حوالے سے ذرائع کا بتانا ہے کہ انگلش کرکٹ اسکواڈ کے 14افراد بدہضمی کا شکار ہوئے جس میں کپتان بین اسٹوکس بھی شامل ہیں، بدہضمی کا شکار ہونے والوں میں انگلینڈ کے سات کھلاڑی بھی ہیں۔انگلش کرکٹ بورڈ کے مطابق بین اسٹوکس کی طبعیت کی ناسازی کی وجہ سے دیگر کھلاڑی اور آفیشلز پنڈی اسٹیڈیم نہیں آئے۔ای سی بی کے مطابق انگلینڈ ٹیسٹ اسکواڈ کے متعدد کھلاڑی اور آفیشلزہوٹل میں ہی ٹھہر ے ،کھلاڑیوں اور آفیشلز کو ہوٹل میں مکمل آرام کرنے کی ہدایت کی گئی ہے۔انگلش کرکٹ بورڈ کے مطابق ہیری بروک، زیک کرالے، کیٹن جیننگز، اولی پاپ اور جوائے روٹ پریکٹس کریں گے۔

میگا ایونٹ کے تیسرے رائونڈ میں ایکواڈور اور سینیگال، ایران اور امریکا کے ساتھ ساتھ ویلز اور انگلینڈ اگلے مرحلے میں رسائی کی جنگ لڑیں گے۔

آج گروپ اے کے سلسلے میں میچ ایکواڈور اور سینیگال کے درمیان ہوگا، یہ مقابلہ سینیگال کیلئے اہمیت کا حامل ہے جسے اگلے مرحلے تک رسائی کیلئے یہ میچ لازمی جیتنا ہوگا۔ڈرا کی صورت میں ایکواڈور آخری سولہ ٹیموں میں پہنچ جائے گا، گروپ اے کا دوسرا میچ نیدرلینڈز اور میزبان قطر کے درمیان ہوگا ۔یہ دونوں میچز پاکستانی وقت کے مطابق رات 8 بجے ہوں گے۔

گروپ بی کے سلسلے میں ایران اور امریکا جبکہ ویلز اور انگلینڈ کی ٹیمیں مدمقابل ہوں گی ، دونوں میچز رات 12 کھیلے جائیں گے ۔
 

دوحہ : فیفا ورلڈکپ 2022 کے اہم میچ میں پرتگال نے یوراگوئے کو دو صفر سے شکست دے کر ناک آؤٹ مرحلے میں رسائی حاصل کرلی ۔

نویں روز کے آخری میچ میں پرتگال نے یوراگوئے کو دو صفر سے شکست دی، اس میچ کے ہیرو پرتگال کے برونو فرنانڈس رہے جنہوں نے 54 منٹ میں پہلا گول اسکور کیا ۔

فاتح ٹیم کی جانب سے دوسرا گول برونو فرنانڈس نے فاؤل کے نتیجے میں پرتگال کو ملنے والی پنالٹی پر بنایا جبکہ میچ کے آخری لمحات میں اُن کی جانب سے کی گئیں ٹرائیاں گول میں نہ جاسکیں جس کے سبب وہ اس ورلڈ کپ میں پہلی ہیٹ ٹرک کرنے کے اعزاز سے محروم ہو گئے ۔

پرتگال نے میچ میں کامیابی کے بعد 6 پوائنٹس کے ساتھ ناک آؤٹ مرحلے میں جگہ بنالی ہے۔