Category کھیل

سڈنی(میڈیا پاکستان) آسٹریلوی عدالت نے سابق متنازع امپائر ڈیرل ہیئر کی چوری کے مقدمے میں ضمانت منظور کرلی۔غیرملکی خبر رساں ادارے کے مطابق آسٹریلیا کے شہر اورنج میں پاکستان مخالف سابق کرکٹ امپائر ڈیرل ہیئر چوری کے مرتکب پائے گئے۔ ڈیرل ہیئر نے اس دکان میں چوری کی جہاں وہ ملازم تھے۔ ملزم کو عدالت میں پیش کیا گیا جہاں اس نے 9 ہزار ڈالر سے زیادہ رقم چرانے اور غبن کے الزامات میں اعتراف جرم کرلیا۔ ملزم نے اپنے بیان میں کہا کہ وہ جوئے کی لت کا شکار ہیں جس نے انہیں برباد کردیا ہے۔
ڈیرل ہیئر نے عدالت میں دکان کے مالک سے معافی مانگتے ہوئے چوری کی گئی رقم واپس کی۔ عدالت نے سابق امپائر کی 18 ماہ اچھے چال چلن کی ضمانت منظور کرلی اور انہیں سزا نہیں سنائی، تاہم جج نے اپنے ریمارکس میں کہا کہ سابق قومی امپائر نے اپنے ہاتھوں اپنی عزت ختم کرلی۔
یاد رہے کہ ڈیرل ہیئر نے انگلینڈ سے میچ کے دوران پاکستانی ٹیم پر 2006 میں بال ٹیمپرنگ کا جھوٹا الزام لگایا تھا جس پر پاکستان نے کھیلنے سے انکار کردیا تھا۔ متنازع امپائر کے خلاف نسلی امتیازی سلوک کے الزامات بھی عائد کیے گئے تھے۔ ڈیرل ہیئر 2008 میں ریٹائر ہوگئے تھے۔

سڈنی (میڈیا پاکستان) آسٹریلیا میں سجا اعصاب شکن موٹو جی پی ریس، 27 لیپس پر مشتمل ریس کا ہر لمحہ سنسنی خیز رہا، کبھی ایک رائیڈر فنش لائن پہلے عبور کرتا اور کبھی دوسرا رائیڈرز بازی مارتا۔ اسپینش رائیڈر مارک مارکوئیز نے فرانسیسی حریف جوہان زار کو پیچھے چھوڑتے ہوئے پہلے چیکرز فلیگ تھاما جبکہ موٹو جی پی ٹو ریس میں پرتگال کے میگوئل اولیورا نے مقررہ فاصلہ سب سے پہلے طے کر کے وکٹری اسٹینڈ پر قبضہ جمایا۔ موٹو جی پی تھری کے مقابلوں میں اسپین کے یوآن مائر نے فتح اپنے نام کی۔

لاہور(میڈیا پاکستان) قومی کرکٹ ٹیم کے نوجوان فاسٹ باؤلر رومان رئیس انجری کے باعث سری لنکا کے خلاف ٹی20 سیریز سے باہر ہو گئے ہیں اور جلد ان کے متبادل کا اعلان کردیا جائے گا۔زرائع کا کہنا ہے کہ رومان رئیس بائیں کہنی میں سوجن کے باعث سری لنکا کے خلاف 26 اکتوبر سے شروع ہونے والی ٹی ٹوئنٹی سیریز سے باہر ہو گئے۔پاکستان کرکٹ بورڈ کی جانب سے تین ٹی ٹوئنٹی میچز کے لئے رومان رئیس کے متبادل کھلاڑی کا اعلان جلد کر دیا جائے گا۔ادھر قومی ٹیم کے مڈل آرڈر بلے باز بابراعظم بھی فٹنس مسائل کا شکار ہیں تاہم ان کے فٹنس مسائل ٹیم منیجمنٹ کے لئے پریشانی کا باعث نہیں ہیں اور ممکنہ طور پر نوجوان بلے باز ٹیم ٹی20 سیریز میں ٹیم کو دستیاب ہوں گے۔یاد رہے کہ قوی ٹیم کے فاسٹ باؤلر محمد عامر بھی انجری مسائل سے دوچار ہیں اور ٹی20 سیریز میں ان کی شرکت بھی فٹنس سے مشروط ہے۔

شارجہ(میڈیا پاکستان) پاکستان اور سری لنکا کے درمیان پانچواں اور آخری ون ڈے پیر کو شارجہ میں کھیلا جائے گا۔سری لنکا کے خلاف ون ڈے سیریز میں 4-0 کی برتری کے بعد اب پاکستان ٹیم کی نگاہیں کلین سوئپ پر مرکوز ہوچکی ہیں، کھلاڑی چیمپئنز ٹرافی سے شروع ہونے والا سفر برقرار رکھنے کے خواہاں ہیں، اگرچہ گرین شرٹس کو ایک روزہ سیریز میں فرنٹ لائن بولرمحمد عامرکی خدمات میسر نہیں تھیں، اس کے باوجود کپتان سرفرازاحمد نے بولنگ کو دنیا کا بہترین اٹیک قرار دیا۔شاداب خان اورحسن علی نے اس سیریزمیں مہمان سائیڈ پر خوب حملے کیے ہیں، بیٹنگ میں بابر اعظم اور امام الحق کے ساتھ مڈل آرڈر میں شعیب ملک کی موجودگی نے استحکام بخشا ہے جبکہ لوئرآرڈرمیں بھی شاداب نے مشکل وقت پر اپنی بیٹنگ کا جلوہ دکھایا ہے، سیریزمیں واضح برتری کی وجہ سے ٹیم مینجمنٹ عثمان خان کو ایک موقع اور دے سکتی ہے جنھوں نے جمعے کو ڈیبیو پر38 رنزکے عوض ایک وکٹ لی تھی،کپتان سرفراز احمد بھی کامیابیوں کا سلسلہ برقرار رکھنے کے خواہاں ہیں۔
دوسری جانب سری لنکا کوسال میں تیسری وائٹ واش کی خفت کا سامنا ہے، وہ فروری میں جنوبی افریقہ کے خلاف اور ستمبر میں بھارت سے پانچواں میچ بھی جیتنے میں ناکام رہا تھا، اب تک پاکستان کے خلاف سیریز میں سری لنکن بولرز پاکستانی بیٹسمینوں کیلیے معاون ثابت ہوئے ہیں جبکہ بیٹسمین بیٹنگ کا بھولا بسرا سبق یاد کرنے کیلیے کو شاں رہے، رواں سیریز میں آئی لینڈرز نے اپنے سارے ہتھیار آزما لیے ہیں، اس لیے آخری میچ میںگذشتہ میچ کی ناکام الیون کے زیادہ تر کھلاڑیوں کو برقرار رکھا جاسکتا ہے۔
شارجہ کی وکٹ پر کبھی کبھارہی300 سے زائد کے مجموعے سامنے آتے ہیں مگر یہاں پر بولرز کو بھی بہت زیادہ مدد نہیں ملتی، اس لیے دونوں کو اپنے اپنے شعبے میں محنت کرنا پڑے گی، دوپہر کے بعد درجہ حرارت 30 ڈگری سینٹی گریڈ کی رینج کے وسط میں رہنے کا امکان ہے۔
واضح رہے کہ جب سے سرفراز احمد نے ون ڈے فارمیٹ میں قیادت سنبھالی ہے تب سے اس طرز میں گرین شرٹس کی پرفارمنس میں نمایاں بہتری آئی ہے، اب تک ان کی کپتانی میں کھیلے گئے 13 ون ڈے میچز میں سے پاکستان کو 11 میں کامیابی حاصل ہوئی ہے۔
دلچسپ بات یہ ہے کہ سری لنکا کے نئے کپتان اپل تھارنگا اس معاملے میں ناکام ثابت ہوئے ہیں، انھوں نے مجموعی طور پر 15 میچز میں سری لنکا کی قیادت کی ہے جن میں سے صرف 4 میں ہی فتح کا منہ دیکھنا نصیب ہوا۔ اس کے ساتھ آئی لینڈرز کے لیے ایک اور مایوس کن بات یہ ہے کہ انھیں اس طرز میں مسلسل گیارہ ناکامیوں کا سامنا کرنا پڑا ہے، اگر وہ شارجہ میں آخری میچ میں بھی ہارجاتے ہیں تو ان کی ون ڈے کرکٹ میں مسلسل ناکامیوں کا سلسلہ ایک درجن تک دراز ہوجائے گا، 2015 سے سری لنکا صرف پاکستان سے 10 میں سے 8 میچز میں ناکامی سے دوچار ہوچکا ہے۔

کراچی(میڈیا پاکستان) آئی سی سی سیکیورٹی کنسلٹنٹ رگ ڈاکسن نے کراچی کے نیشنل اسٹیڈیم پہنچ کر سیکیورٹی انتظامات کا جائزہ لیا۔ذرائع کے مطابق رگ ڈاکسن نےکراچی نیشنل اسٹیڈیم کا دورہ کرنے کے ساتھ پی ایس ایل کے 3 میچز کے حوالے سے سیکیورٹی انتظامات کا جائزہ لیا۔ ڈاکسن کی آمد کے موقعے پر نیشنل اسٹیڈیم کے اندر اور باہر سیکیورٹی کے سخت انتظامات کیے گئے تھے جب کہ پولیس کی بھاری نفری نیشنل اسٹیڈیم میں تعینات تھی۔
رگ ڈاکسن نےنیشنل اسٹیڈیم کے دورے کے بعد وزیراعلیٰ سندھ سید مراد علی شاہ اور آئی جی سندھ سلطان خواجہ سے بھی ملاقات کی۔ آئی جی سندھ نے رگ ڈاکسن کو میچز کے حوالے سے سیکیورٹی انتظامات سے آگاہ کیا جب کہ مراد علی شاہ انہیں تفصیلی بریفنگ دی۔
واضح رہے کہ رگ ڈاکسن اتوار کی شام دبئی سے کراچی پہنچے تھے۔

متحدہ عرب امارات میں بکیز کے قومی ٹیم کے کپتان سرفراز احمد سے رابطوں کے بعد پاکستان کرکٹ بورڈ الرٹ ہو گیا ہے اور انتظامیہ نے پی ایس ایل تھری کو شفاف بنانے کے لئے کھلاڑیوں اور ٹیم مینجمنٹ کے لئے سخت ہدایت نامہ تیار کرنے کا فیصلہ کر لیا ہے۔سری لنکا کے خلاف ون ڈے سیریز میں سخت ترین انتظامات اور کرفیو کے باوجود بکی قومی ٹیم کے کپتان سرفراز احمد تک پہنچنے اور انہیں فکسنگ کی پیشکش کرنے میں کامیاب رہے۔سرفراز نے اس حوالے سے فوری طور پر پی سی بی کے اینٹی کرپشن حکام کو آگاہ کرتے ہوئے اپنی ذمے داریاں پوری کیں تاہم سرفراز کو فکسنگ کی پیشکش کے بعد پی سی بی نے پاکستان سپر لیگ کے تیسرے ایڈیشن کیلئے مزید سخت اقدامات کا فیصلہ کرتے ہوئے لیگ کیلئے ہدایت نامہ تیار کر لیا ہے۔پی ایس تھری کیلئے تیار ہدایت نامے کے مطابق کھلاڑیوں اور فرنچائز مالکان کے ہوٹل الگ الگ ہوں گے اور ٹیم مالکان کو کھلاڑیوں سے ملنے کے لیے بھی منیجر سے اجازت لینا ہو گی۔فرنچائز انتظامیہ کھلاڑیوں اور سپورٹنگ اسٹاف کے علاوہ ٹیموں کے ساتھ کام کرنے والے دیگر افراد کا ڈیٹا فراہم کرنے کی بھی پابند ہو گی۔اس نئے ہدایت نامے کا مقصد پاکستان سپر لیگ کے دوسرے ایڈیشن میں سامنے آنے والے اسپاٹ فکسنگ اسکینڈل جیسے واقعات سے بچنے اور بکیز کو کھلاڑیوں سے دور رکھنا ہے۔ذرائع کے مطابق پی ایس ایل تھری کی ڈرافٹنگ سے قبل نیا ضابطہ اخلاق فرنچائز انتظامیہ کے حوالے کردیا جائے گا۔

ایشیا کپ کے فائنل میں بھارت نے ملائیشیا کو 2-1 سے شکست دے کر ایشین چیمپیئن بننے کا اعزاز حاصل کر لیا جبکہ پاکستان تیسری پوزیشن حاصل کرنے میں کامیاب رہا۔ڈھاکا میں جاری ایونٹ میں اتوار کو مولانا بھاشانی ہاکی اسٹیڈیم میں کھیلے گئے فائنل میں میچ کے تیسرے ہی منٹ میں بھارتی کھلاڑی رمن دیپ سنگھ سنگھ نے گول اسکور کر کے اپنی ٹیم کو برتری دلا دی۔بھارت نے مستقل جارحانہ کھیل کا سلسلہ جاری رکھا اور میچ کا دوسرا کوارٹر ختم ہونے سے قبل للت اپاڈھے نے گول کر کے اپنی ٹیم کی برتری کو دگنا کردیا۔میچ کے ابتدائی حصے میں کوئی تاثر چھوڑنے میں ناکام رہنے والی ملائیشین ٹیم نے بعد میں شاندار انداز میں واپسی کی اور میچ کے 50ویں منٹ میں شاہرل صبا نے گول کر کے بھارت کی برتری کو کم کردیا البتہ شاندار دفاع کی بدولت بھارتی ٹیم نے ملائیشیا کو دوسرا گول کرنے سے باز رکھا اور میچ میں 2-1 سے فتح حاصل کر کے ایشین چیمپیئن بننے کا اعزاز حاصل کر لیا۔بھارت نے دس سال کے طویل عرصے کے بعد ایشیا کپ جیتنے کا اعزاز حاصل کیا ہے۔ادھر تیسری پوزیشن کے میچ میں پاکستان نے اعجاز احمد کی ہیٹ ٹرک کی بدولت جنوبی کوریا کو 6-3 سے شکست دے کر برونز میڈل جیت لیا۔

لاہور(میڈیا پاکستان) سابق فاسٹ بولر شعیب اختر کا کہنا ہے کہ اگر سرفراز احمد پی سی بی کو نہ بتاتے اور بات چیت کے حوالے سے کوئی ویڈیو سامنے آجاتی تو ان کیلیے بھی مسئلہ ہوتا اورخلاف کارروائی بھی ہوسکتی تھی۔
شعیب اختر کا کہنا ہے کہ سرفراز احمد نے پی سی بی کو فکسر کے بارے میں بروقت بتاکر بہت اچھا کیا، آج کل ہر چیز ریکارڈ ہوتی ہے، اگر سرفرازاحمد پی سی بی کو نہ بتاتے اور بات چیت کے حوالے سے کوئی ویڈیو سامنے آجاتی تو ان کیلیے بھی مسئلہ ہوتا اورخلاف کارروائی بھی ہوسکتی تھی۔
سابق فاسٹ بولر نے کہاکہ اگرایسی پیشکش مذاق میں بھی ہوتو اسے رپورٹ کرنا بہت ضروری ہے، انہوں نے کہاکہ پاکستانی کھلاڑیوں کے اردگرد ایسے لوگ کیوں گھومتے ہیں اورانھیں قریب آنے کی اجازت کیوں دی جاتی ہے؟ اس کا جواب حکام سے لینا چاہیے۔

شارجہ(میڈیا پاکستان) پاکستانی کپتان سرفراز احمد نے بابر اعظم کو نیا جاوید میانداد قرار دینے کے سوال کا خوبصورتی سے جواب دیدیا۔چوتھے ون ڈے کے بعد ایک سری لنکن صحافی نے ان سے سوال کیا کہ کیا بابر اعظم پاکستان کیلیے نئے جاوید میانداد ہیں؟ اس پر سرفراز نے کہا کہ ہم ڈریسنگ روم میں ایسی باتیں نہیں کرتے، میانداد ایک لیجنڈ ہیں، پاکستان میں اور بھی بہت سے عظیم کرکٹرز آئے ہیں، بابر اعظم بھی ہمارے لیے ایک خاص پلیئر اور بیٹ کے ساتھ عمدہ پرفارم کررہے ہیں، مجھے امید ہے کہ وہ اسی طرح پرفارم کرتے رہیں گے اور مستقبل میں ان کا شمار بھی لیجنڈ پلیئرز میں ہوگا۔

کولمبو(میڈیا پاکستان) سری لنکا نے پاکستان سے 3 ٹوئنٹی 20 میچز کی سیریز کیلیے اسکواڈ کا اعلان کردیا جب کہ اسٹارز نے لاہور کے افق پر جگمانے سے انکار کردیا۔سری لنکن چیف سلیکٹر گریم لبروئے نے چند روز پہلے واضح کیا تھا کہ پاکستان سے ٹوئنٹی 20سیریز کیلیے صرف ان پلیئرز کو ہی منتخب کیا جائے گا جو لاہور میں شیڈول تیسرا اور آخری ٹی 20 میچ کھیلنے کو بھی راضی ہوں گے، اس کا نتیجہ یہ نکلا کہ زیادہ تر اہم کھلاڑیوں نے لاہور میں کھیلنے کے حوالے سے عدم دستیابی ظاہر کردی، جس پر سلیکٹرز کو اس اہم سیریز کیلیے زیادہ تر غیرمعروف کرکٹرز پر انحصار کرنا پڑا.
کپتان اپل تھارنگا بھی پاکستان کا دورہ کرنے پر راضی نہیں تھے جس کی وجہ سے سیریز کیلیے قیادت کی ذمہ داری تھشارا پریرا کو سونپی گئی، سری لنکا نے ستمبر میں جو آخری ٹوئنٹی 20 میچ بھارت سے کھیلا تھا اس کے اسکواڈ میں مجموعی طور پر 9 تبدیلیاں ہوئی ہیں۔
تھارنگا کے ہمراہ اکیلا دھنن جایا، نروشن ڈیکویلا، لسیتھ مالنگا، سورنگا لکمل، انجیلو میتھیوز، ملندا سری وردانا،لاہیرو تھریمانے اور وانندو ہاسارنگا کو بھی منتخب نہیں کیا گیا، چمیرا کاپو گدیرا نے بھی عدم دستیابی ظاہر کی۔ میتھیوز پنڈلی کی انجری کے باعث پاکستان سے ٹیسٹ اور ون ڈے سیریز بھی نہیں کھیل سکے تھے۔
اسکواڈ میں اوپننگ بیٹسمین دنوشکا گوناتھلاکا کی واپسی ہوئی، ان پر ڈسپلنری خلاف ورزی کی وجہ سے 6 محدود اوورز کے میچز کی پابندی عائد ہوئی تھی، اس وجہ سے وہ پاکستان کے خلاف ایک روزہ سیریز نہیں کھیل پائے تھے تاہم سزاکو بعد میں 3 میچز تک محدود کردیا گیا تھا۔
اسکواڈ میں 22 سالہ سادیرا سمارا وکرما بھی موجود ہیں، جنھوں نے پاکستان کے خلاف جاری سیریز میں ہی ٹیسٹ اور ون ڈے کیپ حاصل کی ہے، اسی طرح ایک اور نئے کھلاڑی منود بھنوکا کو بھی منتخب کیا گیا جنھوں نے ابھی تک انٹرنیشنل کرکٹ کا مزہ نہیں چکھا۔ سری لنکا نے آف اسپنر مہیلا اداوتے کو بھی طلب کیا جنھوں نے 8 برس سے کوئی انٹرنیشنل میچ نہیں کھیلا۔
آل راؤنڈر ڈاسن شناکا پاکستان سے سیریز کیلیے ویسٹ انڈیزسے آئیں گے وہاں وہ اے ٹیم کے ساتھ موجود تھے، انھوں نے جاری چار روزہ میچ میں 102 اور 60 رنز اسکور کرکے فارم کی جھلک دکھائی ہے۔ ہیڈ کوچ نک پوتھاس اور فزیو بالا سنگھم بھی ٹوئنٹی 20 سیریز سے دستبردار ہوگئے ہیں۔
اسکواڈ میں کپتان تھشارا پریرا، دلشان موناویرا، دنوشکا گوناتھلاکا، سادیرا سماراوکرما، ایشان پریانجان، مہیلا ادا وتے، ڈاسن شناکا، منود بھنوکا (وکٹ کیپر)، ساچیتھ پاتھیرانا، وکوم سنجایا، لاہیرو گامگے، سیکوگے پرسنا، وشوا فرنانڈو، اسورو ادانا، جیفری وینڈرسے اور چھاتورنگا ڈی سلوا شامل ہیں۔
واضح رہے کہ پاکستان اور سری لنکاکے درمیان 3 ٹی ٹوئنٹی میچز پر مشتمل سیریز کا تیسرا اور آخری میچ 29 اکتوبر کو لاہور میں شیڈول ہے، یہ 8سال بعد پاکستانی سرزمین پر آئی لینڈرز کا پہلا انٹرنیشنل میچ ہوگا۔ مارچ 2009 میں سری لنکن ٹیم پر لاہور میں دہشت گرد حملے کے بعد پاکستان پر انٹرنیشنل کرکٹ کے دروازے بند ہو گئے تھے،اب سری لنکا پاکستان کا دورہ کرنے والی پہلی صف اول کی ٹیم ہو گی، اس سے قبل زمبابوین سائیڈ2015 میں لاہور میں محددو اوورز کے میچز کھیل چکی ہے۔