Category جرم وانصاف

راولپنڈی(ایمرا نیوز)وفاقی وزیرِ داخلہ رانا ثنا اللہ کے ناقابلِ ضمانت وارنٹ گرفتاری جاری ہو گئے۔
اسپیشل جوڈیشل مجسٹریٹ اینٹی کرپشن کی جانب سے رانا ثنا اللہ کے وارنٹس گرفتاری جاری کیے گئے ہیں۔
ترجمان اینٹی کرپشن اسٹیبلشمنٹ پنجاب کے مطابق اینٹی کرپشن نے راناثنا کے بلاضمانت وارنٹ گرفتاری جاری کیے ہیں، رانا ثنا اللہ کے وارنٹ گرفتاری اینٹی کرپشن انکوائری میں حاضر نہ ہونے پر جاری ہوئے ہیں۔
اینٹی کرپشن اسٹیبلشمنٹ پنجاب کا کہنا ہے کہ رانا ثنا اللہ کے ناقابل ضمانت وارنٹ گرفتاری مقدمہ نمبر 20/19 میں جاری ہوئے ہیں۔

اسلام آباد(ایمرا نیوز)عدالتی اوقات کار کے بعد سنے گئے ہائی پروفائل کیسز کی تفصیلات سامنے آگئیں ۔دستاویزات کے مطابق ارجنٹ کیسز کی دفتری اوقات کے بعد سماعت کے لیے 2019 اور 2022 میں نوٹیفکیشن جاری ہوئے۔
عدالتی ذرائع کے مطابق سال 2018 سے اب تک 759 کیس دفتری اوقات کے علاوہ سنے گئے، سال 2018 میں 137 کیس، 2019 میں 139جبکہ 2020 میں 138کیس سنے گئے، 2021 میں 180 مقدمات جبکہ 2022 میں 165 کیسز کی سماعت دفتری اوقات کے بعد کی گئی۔
ماضی میں نواز شریف اور عمران خان سمیت دیگر سیاسی کیس بھی دفتری اوقات کے بعد سنے گئے، اس کے علاوہ جھگی والوں سمیت دیگرعام سائلین کے کیسز کی سماعت بھی دفتری اوقات کے علاوہ ہوئی۔
نواز شریف کیس کی ہفتے کے روز سماعت پر ایک سیاسی جماعت اور مخصوص صحافیوں نے تنقید کی تھی جبکہ عمران خان نے تاخیر سے عدالت کھلنے پر بھی جلسوں میں اعتراض اٹھایا تھا۔
پی ٹی آئی رہنماؤں کے لیے عید کی چھٹی کے روز عدالت کھولی گئی، عمران خان کو جج دھمکی کیس میں اتوار کے روز حفاظتی ضمانت دی گئی۔

شیخوپورہ (ایمرا نیوز)شیخوپورہ میں 8 افراد کو سوتے ہوئے کلہاڑیوں کے وار سے قتل کر دیا گیا۔پولیس کے مطابق شیخوپورہ کے نواحی گاؤں ہیچڑ میں 8 افراد کو مختلف مقامات پر کلہاڑی کے وار کرکے اس وقت قتل کیا گیا جب وہ سو رہے تھے۔
پولیس کا کہنا ہے کہ ملزم کو آلہ قتل سمیت گرفتار کر لیا گیا ہے، گرفتار شخص بظاہر ذہنی معذور دکھائی دیتا ہے۔ڈی پی او فیصل مختار کا اس حوالے سے کہنا ہے کہ ملزم نے سارے قتل رات 3 بجےکے بعدکیے جب سارا گاؤں سو رہا تھا۔
وزیراعلیٰ پنجاب چوہدری پرویز الٰہی نے شیخوپورہ میں 8 افراد کے قتل کا نوٹس لیتے ہوئے پولیس حکام سے تحقیقاتی رپورٹ طلب کر لی ہے۔
چوہدری پرویز الٰہی کا کہنا ہے کہ لواحقین کو انصاف کی فراہمی ہر صورت یقینی بنائی جائے۔
قتل ہونے والوں میں اسد، فیصل، شیروز، دلاور اور اسد شامل ہیں، تمام افراد گلیوں یا ڈیروں پر سوئے ہوئے تھے، پولیس نے موقع پر پہنچ کر علاقے کا محاصرہ کر لیا ہے۔
ڈی پی او شیخوپورہ فیصل مختار نے کہا ہے کہ ملزم کو آلہ قتل سمیت گرفتار کر لیا گیا ہے، گرفتار شخص بظاہر ذہنی معذور دکھائی دیتا ہے۔

پشاور (ایمرا نیوز) پشاور میں پولیس نے احتجاج کرنے والے پرائمری سکولوں کے اساتذہ کے خلاف ایف آئی آر درج کر دی۔
پشاور میں گزشتہ روز مطالبات کے حق میں احتجاج کرنے والے پرائمری سکولوں کے اساتذہ کے خلاف تھانہ شرقی میں ایف آئی آر درج کی گئی ہے، ایف آئی آر ایس ایچ او شرقی کی مدعیت میں درج کی گئی ہے۔
ایف آئی آر میں اساتذہ کے خلاف کارسرکار میں مداخلت، پولیس فورس، انتظامیہ پر فائرنگ، پتھراؤ، سرکاری املاک کو نقصان پہنچانے سمیت دیگر دفعات شامل ہیں، ایف آئی آر کے متن میں کہا گیا ہے کہ آل پرائمری ٹیچرزکے پتھراؤ سے ایس ایس پی آپریشنز، ڈی ایس پی سٹی ،ایس ایچ او اور پولیس اہلکار زخمی ہوئے۔
واضح رہے کہ گزشتہ روز آل پرائمری ٹیچرز نے اسمبلی چوک میں احتجاج کیا تھا، روڈ نہ کھولنے اور پولیس پر پتھراؤ کے بعد پولیس نے مظاہرین پر لاٹھی چارج اور گیس شیلنگ کی تھی۔

اسلام آباد (ایمرا نیوز) اثاثہ جات ریفرنس میں احتساب عدالت نے وزیر خزانہ اسحاق ڈار کے وارنٹ گرفتاری منسوخ کردیئے۔
وفاقی وزیر خزانہ اسحاق ڈار اثاثہ جات ریفرنس میں احتساب عدالت میں پیش ہوئے، اسحاق ڈار کے وکیل قاضی مصباح نے عدالت سے اسحاق ڈار کے وارنٹس مستقل طور پر منسوخ کرنے کی استدعا کی، وکیل نے کہا کہ اسحاق ڈار کی جائیداد ضبطگی کا آرڈر بھی ختم کیا جائے، اسحاق ڈار اب عدالت کے سامنے موجود ہیں۔
جج محمد بشیر نے کہا کہ کیا نیب نے خود بھی اسحاق ڈار کے کوئی وارنٹس جاری کیے تھے؟ تفتیشی افسر نادر عباس نے جواب دیا کہ ہم نے وارنٹس جاری کئے تھے لیکن وہ معطل ہو گئے تھے۔
عدالت نے صرف اسحاق ڈار کی حاضری کیلئے وارنٹس جاری کیے تھے، عدالت نے نیب سے سوال کیا کہ اب آپ کا کیا موقف ہے وارنٹس منسوخ کئے جائیں یا نہیں؟ نیب پراسیکیوٹر نے بھی وارنٹس منسوخی کی حمایت کی اور کہا عدالت کا وارنٹ صرف اسحاق ڈار کی حاضری کیلئے ہی تھا۔
اسحاق ڈار کے وکیل نے کہا کہ اسحاق ڈار نے ایک کانفرنس کیلئے بیرون ملک جانا ہے، جج محمد بشیر نے کہا کہ ضمنی ریفرنس بھی آیا ہوا اس کے تحت دوبارہ فرد جرم ہونی ہے، وکیل نے جواب دیا کہ اس پر ہم دلائل دیں گے ضمنی ریفرنس بنتا نہیں۔
اسحاق ڈار کی جانب سے جائیداد ضبطگی کیخلاف درخواست دائر کی گئی جس کے ساتھ ہی اسحاق ڈار نے حاضری سے مستقل استثنیٰ کی درخواست بھی دائر کر دی۔وزیر خزانہ کی دونوں درخواستوں پر نیب کو نوٹس جاری کر دیا گیا جس کے بعد اسحاق ڈار کیخلاف کیس کی سماعت آئندہ بدھ تک ملتوی کر دی گئی۔

کراچی (ایمرا نیوز)سندھ ہائی کورٹ نے داعش سے متاثرہ تعلیم یافتہ نوجوان اور سانحہ صفورا کے مرکزی مجرم سعد عزیز کو ایک اور مقدمے میں بری کردیا ہے۔
سندھ ہائی کورٹ نے ریمارکس دیے کہ پولیس اور پراسیکیوشن سعد عزیز عرف ٹک ٹک کے خلاف شواہد پیش کرنے میں ناکام رہی۔
بعد ازاں عدالت نے سعد عزیز کو پولیس اہلکار وقار ہاشمی کے قتل کے مقدمے میں دی گئی سزا عدم شواہد کی بنا پر کالعدم قرار دے دی۔
عدالت کی جانب سے سزا کالعدم قرار دیتے ہوئے کہا گیا کہ سعد عزیز پر اگر کسی اور جرم کا الزام نہیں ہے تو انہیں جیل سے رہا کیا جائے۔
خیال رہے کہ ملزم سعد عزیز اور دیگر ساتھیوں پر 3 جون 2015 کو نیو کراچی پاور ہاؤس کے قریب پولیس اہلکار کو قتل کرنے کا الزام تھا۔
ریپڈ رسپانس فورس میں تعینات کانسٹیبل وقار ہاشمی کو نیو کراچی کے سیکٹر کے 11 میں پاور ہاؤس چورنگی پر اس وقت حملہ کر کے قتل کیا گیا جب وہ ڈیوٹی سے گھر واپس جارہے تھے، بعد ازاں ماتحت عدالت نے ملزم سعد عزیز کو عمر قید اور 50 ہزار جرمانے کی سزا سنائی تھی۔
قبل ازیں رواں سال اگست میں سندھ ہائی کورٹ نے سعد عزیز اور طاہر حسین منہاس عرف سائیں کو دسمبر 2020 میں کارساز کے قریب ستمبر 2013 میں مسلح حملے میں پاک بحریہ کے کیپٹن ندیم احمد کو قتل کرنے اور ان کی غیر ملکی اہلیہ کو زخمی کرنے کے جرم میں انسداد دہشت گردی کی عدالت کی جانب سے سنائی گئی عمر قید کی سزا کو بھی کالعدم قرار دے دیا تھا۔
واضح رہے کہ سعد عزیز انسٹیٹیوٹ آف بزنس ایڈمنسٹریشن کا طالبعلم تھا جسے اپنے دیگر ساتھیوں کے ہمراہ جنوری 2016 میں فوجی حکام کے حوالے کیا گیا تھا تاکہ ملزمان کے خلاف صفورا گوٹھ بس حملہ کیس، سبین محمود قتل کیس، پولیس اہلکاروں کے قتل سے متعلق کیس، اقدام قتل اور بارودی مواد اور غیر قانونی اسلحہ رکھنے سے متعلق 18 مقدمات فوجی عدالتوں میں چلائے جاسکیں۔

اسلام آباد (ایمرا نیوز)گزشتہ ماہ اپنے شوہر کے ہاتھوں بے دردی سے قتل ہونے والی کینیڈین شہری سارہ انعام کے خاندان نے مبینہ قاتل کے خلاف عدالتی ٹرائل مکمل ہونے تک دارالحکومت میں ہی رہنے کا فیصلہ کرلیا۔ایک رپورٹ کے مطابق اس بات اور فیصلے کی تصدیق مقتولہ سارہ کے والد انعام الرحمٰن نے گزشتہ روز کی۔
سارہ انعام کے والد اور دو بھائیوں نے قریبی رشتہ داروں کے ہمراہ بدھ کے روز اسلام آباد میں ایک نیوز کانفرنس کی، اس پریس کانفرنس میں ان کے ساتھ امریکا میں رجسٹرڈ این جی او ہیلپنگ ہارٹ کیئرنگ سول کے بانی بھی موجود تھے۔
پریس کانفرنس سے خطاب کرتے ہوئے انعام الرحمٰن نے کہا کہ سارہ کا شوہر ایک شکاری اور بھتہ خور ہے جس نے اپنے مذموم مقاصد کے لیے میری بیٹی کو پھنسایا۔انہوں نے مزید کہا کہ معروف صحافی ایاز امیر کے صاحبزادے شاہنواز امیر نے سارہ انعام کو شادی کے لیے راضی کیا اور بعد میں اس سے پیسے بٹورنے لگا۔
ان کا کہنا تھا کہ شاہنواز امیر اس سے رقم کا مطالبہ کرتا رہا، اسے ذہنی تشدد کا نشانہ بنایا اور بعد میں اسے بے دردی کے ساتھ وحشیانہ طریقے سے قتل کر دیا۔انہوں نے بتایا کہ سارہ انعام کینیڈا میں کام کرتی تھی اور یو ایس ایڈ سے بھی منسلک تھی۔
انعام الرحمٰن نے بتایا کہ وہ ابوظبی کی وزارت خزانہ میں بطور کنسلٹنٹ کام کر رہی تھی، تقریباً 8 سے 10 ہفتے قبل سارہ نے انہیں بتایا کہ وہ کسی کے ساتھ رابطے میں ہے اور اس سے شادی کرنا چاہتی ہے، انہوں نے بتایا کہ جولائی کے آخری ہفتے میں اس کی شادی کی خبر سن کر اہل خانہ دنگ رہ گئے۔
والد نے بتایا کہ جب اہل خانہ کو پتا چلا کہ سارہ جس شخص سے شادی کرنا چاہتی ہے وہ ایاز امیر کا بیٹا ہے تو اس بات پر اہل خانہ نے اطمینان محسوس کیا جب کہ بعد میں شاہنواز امیر کی والدہ نے فیملی سے فون پر بات بھی کی اور سارہ انعام کی تعریف کی۔
انہوں نے بتایا کہ سارہ انعام ابوظبی میں قیام پذیر تھی اور شاہنواز امیر پاکستان میں رہتا تھا، انہوں نے شاہنواز امیر سے کئی مرتبہ فون پر بات چیت کی تو اس دوران وہ کافی اچھا شخص محسوس ہوا۔
مقتولہ کے والد نے کہا کہ بعد ازاں شاہنواز امیر نے سارہ سے رقم کا مطالبہ کرنا شروع کیا اور ہمارا خاندان بتدریج اس نتیجے پر پہنچا کہ وہ ایک بھتہ خور ہے، انہوں نے کہا کہ ہمیں نہیں معلوم کہ ملزم نے سارہ سے کتنی رقم بٹوری کیونکہ سارہ کے اکاؤنٹس ابوظبی میں تھے۔
ان کا کہنا تھا کہ سارہ ایک یا 2 مرتبہ پاکستان آئی لیکن اہل خانہ کو اس کا علم نہیں تھا، شاہنواز امیر نے اسے پھنسایا اور بعد میں اسے قتل کر دیا اور یہ سب منصوبہ بندی کے تحت کیا گیا۔

انہوں نے کہا کہ انعام الرحمٰن نے مزید کہا کہ فارم ہاؤس میں صرف 3 لوگ تھے اور آئندہ روز اس کی لاش وہاں سے ملی۔

اسلام آباد(ایمرا نیوز)ڈسٹرکٹ اینڈ سیشن کورٹ اسلام آباد نے پی ٹی آئی رہنما شہباز گل کی جانب سے دائر کی گئی سپر داری کی درخواست منظور کر لی۔شہباز گل کی سپرداری کی درخواست پر سماعت ایڈیشنل سیشن جج طاہر عباس سپرا نے کی۔ شہباز گل کی جانب سے علی بخاری عدالت کے روبرو پیش ہوئے۔
عدالت نے شہباز گل کا شناختی کارڈ، عینک، اے ٹی ایم کارڈ اور روزمرہ کی اشیا واپس کرنے کا حکم دے دیا۔
عدالت نے 31 اشیا کی فہرست سے جزوی ضروری اشیا شہباز گل کو واپس کرنے کا حکم دیتے ہوئے کہا کہ اسلام آباد پولیس کو متنازع اشیا کو تفتیش کے لیے رکھنے تک اختیار دیا جاتا ہے۔
سیشن عدالت نے شہباز گل سپرداری کیس کی مزید سماعت 11 اکتوبر تک ملتوی کر دی۔

اسلام آباد(ایمرا نیوز) صدر مملکت نے سزائے موت پانے والے 5 مجرموں کی رحم کی اپیلیں مسترد کردیں۔صدر مملکت کی جانب سے جن پانچ مجرموں کی رحم کی اپیلیں مسترد کی گئی ہیں ان میں محمد شعبان، محمد عمران، محمد افضل، محمد اکبر اور محمد اصغر شامل ہیں، ان تمام مجرموں کے خلاف سفاکانہ جرائم کے الزامات ثابت ہوئے۔
ایوان صدر کے مطابق محمد شعبان کو 3 سالہ بچی سے زیادتی اور قتل کےجرم میں سزائے موت سنائی گئی تھی اور محمد عمران نے گھریلو جھگڑے کے بعد بیوی اور دو بیٹیوں کو ٹوکے سے قتل کیا تھا جب کہ محمد افضل کو والدین اور 6 بہن بھائیوں کو قتل کرنے پر سزائے موت سنائی گئی تھی۔
ایوان صدر کے مطابق محمد اکبر اور محمد اصغر نے 2 افراد کو معمولی جھگڑے پر قتل کیا تھا۔
ایوان صدر کا کہنا ہےکہ صدر مملکت نے آئین کے آرٹیکل 45 کے تحت ان اپیلوں کو مسترد کیا، صدر کسی بھی عدالت، ٹریبونل یا دیگر اتھارٹی کی دی گئی سزائیں معاف، معطل یا کم کرنے کا اختیار رکھتے ہیں۔

کراچی (ایمرا نیوز)سندھ ہائی کورٹ نے منی لانڈرنگ کے الزامات کی انکوائری میں ٹک ٹاکر حریم شاہ کی 7 روز کی حفاظتی ضمانت منظور کرلی۔
رپورٹ کے مطابق جسٹس محمد کریم خان آغا کی سربراہی میں دو رکنی بینچ نے درخواست گزار کو 25 ہزار روپے کے ضمانتی مچلکے جمع کرانے کی ہدایت کی اور واضح کیا کہ اگر وہ مقررہ وقت میں انکوائری افسر کے سامنے پیش نہ ہوئیں تو ضمانت ضبط کر لی جائے گی۔
حریم شاہ کے نام سے معروف فضا حسین نے اپنے وکیل کے ذریعے درخواست ضمانت دائر کی تھی.
درخواست میں کہا گیا کہ وفاقی تحقیقاتی ایجنسی نے جنوری میں انہیں نوٹس بھیجا تھا اور فروری میں سندھ ہائی کورٹ نے ایف آئی اے کو ان کے خلاف کوئی جبری کارروائی نہ کرنے جبکہ درخواست گزار کو انکوائری میں شامل ہونے کی ہدایت کی تھی لیکن وہ پاکستان پہنچ کر انکوائری میں شامل نہیں ہو سکیں۔
وکیل نے مزید کہا کہ حریم شاہ نے اپنے وکیل کے ذریعے اسی طرح کے ریلیف کے لیے گزشتہ ہفتے دوبارہ سندھ ہائی کورٹ سے رجوع کیا تھا لیکن ان کی درخواست خارج کردی گئی۔
وکیل نے دلائل دیتے ہوئے کہا کہ اب درخواست گزار ملک واپس آچکی ہیں، کمرہ عدالت میں بھی حاضر ہیں اور انکوائری میں شامل ہونے کو تیار ہیں، انہوں نے انکوائری میں شامل ہونے کے لیے محدود مدت کے لیے قانونی تحفظ کی استدعا کی۔
چنانچہ کیس کی تفصیلات میں جائے بغیر بینچ نے ان کی ایک ہفتے کے لیے حفاظتی ضمانت منظور کرلی۔