Category انٹرنیشنل

اسلام آباد(میڈیا پاکستان) بھارت کی حکومت نے پاکستان میں ہائی کمشنرگوتم بمبانوالے کی جگہ اجے بساریہ کونیا ہائی کمشنر مقررکرنے کافیصلہ کیا ہے۔اجے بساریہ اس وقت پولینڈ میں سفیر ہیں، گوتم بمبانوالے کو چین میں بھارت کا سفیر مقرر کیا جائے گا اور وہ 9 نومبر کو موجودہ ذمے داریوں سے سبکدوش ہوجائیں گے۔
ممبئی اور دہلی میں تعلیم حاصل کرنیوالے اجے بساریہ نے 1987میں بھارتی سول سروس میں شمولیت اختیار کی۔ انھوں نے دہلی یونیورسٹی کے سینٹ اسٹیفنزکالج سے 1980-83 میں اکنامکس میں بیچلرڈگری حاصل کی اورانڈین انسٹی ٹیوٹ آف مینجمنٹ کولکتہ سے 85 میں ایم بی اے کیا جبکہ 2008-09ء میں امریکا کی پرنسٹن یونیورسٹی سے پبلک پالیسی میں ماسٹر ڈگری حاصل کی۔
فارن سروس انسٹی ٹیوٹ نئی دہلی سے تربیت مکمل کرنے کے بعد اجے بساریہ نے روسی زبان میں مہارت حاصل کرنیکا انتخاب کیا، انھیں 1988-1991 تک 3 سال کیلیے ماسکو کے سفارتخانے میں تعینات کیا گیا۔ انھوں نے 1995-1999 کے دوران برلن میں بطور فرسٹ سیکریٹری خدمات سرانجام دیں۔
جرمنی سے واپسی پر انھیں بھارتی وزیراعظم کے پرائیویٹ سیکریٹری کے طور پر تعینات کیاگیا اورانھوں نے 2004تک اس عہدے پر کام کیا۔جنوری 2015 میں انھیں پولینڈ میں بھارت کا سفیر مقرر کیا گیا۔اجے بساریہ ہندی، انگریزی اورروسی زبان میں مہارت کے علاوہ وہ جرمنی اور پولش زبان بھی جانتے ہیں اورانگریزی فکشن کے شوقین ہیں جب کہ ان کی اہلیہ ماہر ماحولیات اورلکھاری بھارتی چترویدی ہیں جوایک این جی اوچنتن کی بانی سربراہ ہیں۔

(میڈیا پاکستان)امریکی وزیرخارجہ ریکس ٹلرسن کا کہنا ہے کہ میانمارمیں روہنگیا مسلمانوں کےساتھ سلوک پرتشویش ہے جب کہ اقلیتوں پر ظلم کرنے والے عناصر کو سزا دینا ضروری ہے۔امریکی وزیرخارجہ ریکس ٹلرسن آج ایک روزہ دورے پرپاکستان پہنچیں گے۔ پاکستان آنے سے قبل اپنے بیان میں ان کا کہنا ہے کہ میانمارمیں روہنگیا مسلمانوں کے ساتھ سلوک پرتشویش ہے، عالمی قوانین کی روشنی میں اقلیتوں کےساتھ امتیازی سلوک کےخلاف میانمارپرمحدودپابندیاں بھی زیرغورہیں، امریکا کو راکھائن ریاست میں مسلمان اقلیتوں پر ہونے ظلم پر تشویش ہے جب کہ اقلیتوں پر ظلم کرنے والے عناصر کو سزا دینا ضروری ہے۔
امریکی محکمہ خارجہ کی جانب سے کہا گیا کہ غیر ریاستی عناصر بھی سزا کے مستحق ہیں جو اقلیتوں پر ظلم کررہے ہیں، امتیازی سلوک کے خلاف احتسابی طریقہ کاراپنانے پرغورکررہے ہیں۔
امریکی وزیر خارجہ ریکس ٹلرسن پاکستان پہنچنے پرڈونلڈ ٹرمپ کی افغانستان کے حوالے سے موقف اور پاکستان کے کردار پر بات کریں گے۔پاکستان کے دورے کے بعد امریکی وزیر خارجہ بھارت جائیں گے۔
ریکس ٹِلرسن افغانستان کا دورہ مکمل کرنے کے بعد عراقی دارالحکومت بغداد پہنچ گئے ہیں۔ افغانستان کی طرح عراق بھی وہ ایک غیر اعلانیہ دورے پر ہی گئے ہیں۔ اس سے قبل ریکس ٹلرسن ایک روزہ دورے پر کابل پہنچےتھے جہاں انہوں نے افغان صدراشرف غنی اور چیف ایگزیکٹو عبداللہ عبداللہ سے ملاقات کی۔
افغانستان میں میڈیا سے گفتگو میں ریکس ٹلرسن نے کہا کہ پاکستان سے دہشتگردوں کی سپورٹ ختم کرنے کیلئے اقدامات کرنے کی درخواست کی ہے۔ انہوں نے کہا کہ واشنگٹن کی اسلام آباد کیلئے پالیسی افغانستان میں امن و استحکام کیلئے اس کے کردارسے مشروط ہے اور امریکا، پاکستان کا مستحکم مستقبل یقینی بنانے کیلئے بھی کام کررہا ہے۔

لاہور (میڈیا پاکستان) امریکی وزیرخارجہ ریکس ٹیلرسن نے سعودی عرب اور عراق کے درمیان کورڈی نیشن کمیٹی کے افتتاحی اجلاس میں شرکت کر کے خطے میں ایران کے بڑھتے اثر رسوخ کو روکنے کے ٹرمپ انتظامیہ کے عزائم کا عملی آغاز کردیا۔ریکس ٹیلرسن سعودی عرب کے دورے پر گزشتہ روز ریاض پہنچے جہاں انھوں نے سعودی فرمانروا سلمان اور عراقی وزیراعظم حیدرالعبادی کے ساتھ سعودی عرب اور عراق کی کوآرڈی نیشن کمیٹی کے افتتاحی اجلاس میں شرکت کی۔انھوں نے اجلاس میں شامل رہنماؤں کو تعلقات کی اہمیت کو نمایاں کرتے ہوئے دونوں ممالک کو آپس میں تعاون بڑھانے پر زور دیا۔امریکی وزیرخارجہ کا کہنا تھا کہ ‘دونوں ممالک نے ہماری امیدوں کے مطابق رابطوں کا عملی طور پر آغاز کردیا ہے اور امید ہے کہ موجودہ مسائل کے حل کے لیے تعاون کو مزید بڑھائیں گے۔دونوں ممالک کے رہنماؤں کو مخاطب کرتے ہوئے انھوں نے کہا کہ ‘سعودی عرب اور عراق کے درمیان بہتر ہوتے تعلقات ہماری سیکیورٹی کو بہتر کرنے، استحکام اور وسیع مفاد کے حصول کے لیے اہم ہوں گے۔ان کا کہنا تھا کہ امریکا ان اقدامات پر خوش ہے اور آپ پر زور دیتا ہے کہ خطے کے استحکام کے لیے تعلقات کو وسیع کریں اور امریکا تعاون کے لیے ہمہ وقت تیار ہے۔اس موقع پر سعودی فرمانروا سلمان نے کہا کہ ‘ہمیں اپنے خطے میں دہشت گردی، انتہا پسندی اور ملکوں کو عدم استحکام کرنے جیسے چیلنجوں کا سامنا ہے جس کے لیے ہماری بھرپور توجہ کی ضرورت ہے اور ہم عراق کو اتحاد و اتفاق کے لیے تعاون کا یقین دلاتے ہیں۔عراق کے وزیراعظم حیدرالعبادی کا کہنا تھا کہ ‘ہم پرعزم ہیں اور ماضی کو چھوڑ کر آگے بڑھنا چاہتے ہیں اور خطہ مزید کسی قسم کی تقسیم کا متحمل نہیں ہوسکتا ہے جبکہ ریاست کے اندرونی معاملات پر مداخلت کو روکنا چاہیے۔

پشاور (میڈیا پاکستان) وفاق کے زیر انتظام قبائلی علاقے (فاٹا) کی باجوڑ ایجنسی میں دو مکانات کی چھت گرنے سے دو خواتین اور 4 بچوں سمیت 7 افراد جاں بحق اور 6 زخمی ہوگئے۔پولیٹیکل انتظامیہ کے مطابق حادثہ باجوڑ کے علاقے خار میں پیش آیا جہاں دو مکانات کی چھت گر گئی۔ان کا کہنا تھا کہ چھت گرنے کے نتیجے میں اس کے نیچے دب کر 2 خواتین اور 4 بچوں سمیت 7 افراد ہلاک ہوگئے۔پولیٹیکل انتظامیہ نے مزید کہا کہ واقعے میں 6 افراد زخمی بھی ہوئے ہیں.مقامی حکام کے مطابق لاشوں اور زخمیوں کو باجوڑ ایجسنی کے ڈسٹرکٹ ہسپتال منتقل کردیا گیا۔واقعے کی تفصیلات بتاتے ہوئے پولیٹیکل انتظامیہ کا کہنا تھا کہ نامعلوم وجوہات کی وجہ سے شمسو قائم کے مکان کی دیوار گل اور منیر نامی افراد کے مکانات پر جاگری، جس کے نتیجے میں ہلاکتیں ہوئیں۔

سیول (میڈیا پاکستان ) جنوبی کوریا کے دارالحکومت سیول میں ایرو سپیس اینڈ ڈیفنس ایگزی بیشن میں ہوا بازوں کی مہارت نے دیکھنے والوں کو ورطہ حیرت میں ڈال دیا ۔ طیاروں نے فضا میں رنگ اور روشنیاں بکھیر دیں ۔ ہیلی کاپٹر کی عمودی پرواز سے بھی دیکھنے والے دم بخود رہ گئے ۔ جنوبی کوریا میں 6 روز تک ایروسپیس اینڈ ڈیفنس نمائش میں ہوابازوں کی زبردست بازیاں ، انتہائی جدید طیاروں نے فضا میں شاندار فارمیشن بنائی اور ہواؤں کے سینے چیرتے ہوئے آسمان پر دلکش انداز رنگ بکھیر دئیے ۔
جدید طیاروں نے دلکش انداز میں فضا میں روشنیاں بکھیریں تو دیکھنے والے دم بخود رہ گئے ۔ منفرد ایئرشو میں ہیلی کاپٹر کی عمودی پرواز اور کرتب نے خوب رنگ جمایا ۔ کوریا میں یہ نمائش 1996 سے لگائی جا رہی ہے ۔

تبت(میڈیا پاکستان)اسرائیلی پولیس نے عربوں کو دھمکانے والے دائیں بازو کی انتہا پسند تنظیم کے رہنما سمیت 15 یہودیوں کو گرفتار کر لیا۔غیر ملکی خبر رساں ایجنسی کے مطابق اسرائیلی پولیس کی جانب سے جاری بیان میں کہا گیا ہے کہ عرب باشندوں کو ڈرانے اور دھمکانے میں ملوث افراد کی گرفتاریوں کے لئے یروشلم، شمالی و جنوبی اسرائیل اور مغربی کنارے کی یہودی بستیوں میں چھاپے مارے گئے۔
اسرائیلی فوج کی جانب سے مختلف اوقات کے دوران کی جانے والی کارروائیوں کے دوران 15 انتہا پسند یہودیوں کو گرفتار کیا گیا۔گرفتار افراد میں دائیں بازو کی انتہا پسند تنظیم لیہاوا کا ربی رہنما بینزی گوپسٹین بھی شامل ہے۔یاد رہے کہ پولیس نے 2015 میں بھی بینزی گوپسٹین کو حراست میں لے کر پوچھ گچھ کی تھی۔گوپسٹین نے کہا تھا کہ اسرائیل میں چرچوں کو آگ لگانا جائز ہے کیوں کہ قدیم اسرائیل میں یہودیوں کو حکم تھا کہ وہ بت پرستی کے مراکز کو تباہ کر دیں۔
غیر ملکی میڈیا کے لئے اسرائیلی خبررساں یونٹ کے ترجمان کے مطابق گرفتار افراد کے گھر پر چھاپوں اور ابتدائی تفتیش کے دوران یہ بات سامنے آئی کہ ملزمان یہودی لڑکیوں کے ساتھ تعلقات رکھنے والے عربوں کو ڈرانے میں ملوث ہیں۔رواں برس اپریل میں بھی عربوں پر تشدد کرنے والے اسرائیلی فوج کے دو اہلکاروں کو گرفتار کیا گیا تھا۔
ان اہلکاروں نے چھ عرب باشندوں کو چھریوں، ڈنڈوں اور سریوں سے تشدد کا نشانہ بنایا تھا۔

میداگوری(میڈیا پاکستان) نائجیریا کے شہر میداگوری میں یکے بعد دیگر خودکش حملوں میں خواتین سمیت 13افراد ہلاک اور متعدد زخمی ہوگئے۔بین الاقوامی میڈیا رپورٹس کے مطابق شمال مشرقی میداگوری کے گنجان آباد اور مصروف علاقے میں عوامی مقام کو خود کش حملہ آوروں نے نشانہ بنایا۔ خواتین خودکش بمباروں نے بس اسٹاپ کے قریب ریسٹورنٹ پر تین حملے کیے۔ پولیس کمشنر کا کہنا ہے کہ پہلی خاتون بمبار نے دھماکا کیا جس میں متعدد افراد زخمی ہوئے اور امدادی کارروائیوں کے لیے لوگ جمع ہوئے تو مزید 2 خواتین بمباروں نے خود کو ہجوم میں پہنچ کر اڑا دیا۔
یکے بعد دیگر ے بم حملوں کے نتیجے میں اب تک کی اطلاعات کے مطابق 13افراد ہلاک اور 16زخمی ہوگئے۔لاشوں اور زخمیوں کو اسپتال منتقل کردیا گیا ہے جہاں شدید زخمیوں کی جان بچانے کی کوشش کی جارہی ہے۔ فوری طور پر کسی گروپ یا تنظیم نے واقعے کی ذمہ داری قبول نہیں کی تاہم نائجیریا میں شدت پسند تنظیم بوکوحرام اس طرح کے حملوں کی ذمہ داری قبول کرتی رہی ہے۔

جاپان کے وزیراعظم شینزو آبے نے ملک میں ہونے والے قبل ازانتخابات میں کامیابی حاصل کرکے شمالی کوریا کے خلاف سخت موقف اور دنیا کی تیسری بڑی معیشت کو مزید مضبوط کرنے کے لیے مینڈیٹ حاصل کرلیا۔جاپان کے ایک نجی چینل ٹی بی ایس کے مطابق شینزو آبے کے اعتدال پسند اتحاد نے 465 اراکین پر مشتمل پارلیمان میں 311 نشستیں حاصل کرلی ہیں۔طویل عرصے تک حکمرانی کا اعزاز حاصل کرنے والے وزیراعظم کی کامیابی سے جوہری طاقت شمالی کوریا کی دھمکیوں کے خلاف خطے میں امریکا کے اہم تحادی کے طور پر اپنے عزائم کو پورے کرنے کا موقع مل گیا ہے۔یاد رہے کہ شمالی کوریا کی جانب سے جاپان کوختم کرنے کا اعلان کرتے ہوئے ایک ماہ کے فرق سے دو مرتبہ میزائل داغے گئے تھے جس کے بعد شینزو آبے نے سخت ردعمل کا اظہار کرتے ہوئے اپنے دفاع کو مضبوط بنانے کا عزم ظاہر کیا تھا۔جاپانی اخبار یومیوری نے اپنی ویب سائٹ میں لکھا ہے کہ شینزو آبے نے ناقابل یقین جیت حاصل کر لی ہے۔جاپان میں شدید بارشوں اور لینڈ سلائیڈنگ کے باوجود عوام کی بڑی تعداد ووٹ ڈالنے کے لیے اسٹیشنوں میں موجود تھی جہاں پولنگ کا آغاز صبح 7 بجے شروع ہوا اور یہ سلسلہ رات 8 بجے تک جاری رہا۔جبکہ حکمران اتحاد نے اپوزیشن کے آپس میں اختلاف کا بھی بھرپور فائدہ اٹھایا۔یاد رہے کہ شینزو آبے نے جاپان میں ایک سال قبل ہی انتخابات کا اعلان کرکے سب کو حیرت زدہ کردیا تھا جہاں ان کا موقف تھا کہ شمالی کوریا کے تنازع اور دیگر معاملات پر عوام کا فیصلہ لیا جائے۔

نئی دہلی(میڈیا پاکستان) بھارتی ریاست اتر پردیش میں تین مسلح افراد نے ایک ہندی اخبار کے صحافی کو گولی مار کر ہلاک کردیا۔ایڈیشنل ڈائریکٹر جنرل (آئی جی) آنند کمار کے مطابق بھارت کے ہندی زبان کے بڑے اخبارات میں سے ایک اخبار روزنامہ دائنیک جاگراں کے رپوٹر راجیش مشرا کو تین نامعلوم موٹر سائیکل سواروں نے فائرنگ کرکے ہلاک کیا۔خیال رہے کہ بھارت صحافیوں کے لیے ایشیا کے خطرناک ترین ممالک میں سے ایک ہے۔ایڈیشنل آئی جی نے صحافیوں سے بات چیت کرتے ہوئے بتایا کہ تینوں نامعلوم افراد نے رپورٹر پر فائرنگ کی تاہم ان میں دو افراد کی شناخت کر لی گئی ہے۔ان کا مزید کہنا تھا کہ قاتلوں کو بہت جلد گرفتار کرلیا جائے گا کیونکہ پولیس کو ان کی شناخت معلوم ہوچکی ہے اور اس معاملے میں تفتیش بھی جاری ہے تاہم اب تک قتل کی وجوہات معلوم نہیں ہو سکیں۔مقتول صحافی بھارت میں دائیں بازو کی بااثر تنظیم راشٹریہ سوائم سیوک سنگھ (آر ایس ایس) کے رکن تھے، جو کہ حکمراں جماعت بھارتی جنتا پارٹی (بی جے پی) کی ذیلی نظریاتی تنظیم کہلاتی ہے۔خیال رہے کہ اس سے قبل ایک رپورٹر کو بھارت کے شمالی علاقے میں سیاسی بد امنی کے دوران اپنے صحافتی فرائض انجام دینے کے پاداش میں بے دردی سے قتل کر دیا گیا تھا۔

قائرہ (میڈیا پاکستان) مصر کے سیکیورٹی اداروں کی جانب سے ملک کے جنوب مغربی علاقے میں مبینہ دہشت گردوں کے ٹھکانے پر کیے جانے والے آپریشن میں مسلح مقابلے کے نتیجے میں 20 پولیس افسران سمیت 54 اہلکار ہلاک ہوگئے۔غیر ملکی خبر رساں ادارے ایسوسی ایٹڈ پریس (اے پی) کے مطابق مصری حکام کا کہنا تھا کہ فائرنگ کا تبادلہ قائرہ شہر کے مغرب میں 135 کلومیٹر دور صوبہ غزہ میں الواحات البحریہ کے علاقے میں جمعہ کی رات کو شروع ہوا۔مصری حکام کے مطابق سیکیورٹی اہلکاروں نے خفیہ معلومات پر انسداد دہشت گردی کے سینیئر افسر کی کمان میں پولیس اہلکاروں نے دہشت گردوں کے ٹھکانے پر چھاپہ مارا۔ انہوں نے مزید بتایا پولیس کی اس کارروائی کے بعد کیا ہوا معلوم نہیں کیا جاسکا لیکن ابتدائی معلومات کے مطابق پولیس اہلکاروں کے پاس اسلحہ ختم ہوجانے کے باعث دہشت گردوں نے ان کو اپنے گھیرے میں لے کر قتل کردیا جبکہ ایک پولیس افسر موقع سے فرار ہونے میں کامیاب ہو گیا۔ایک افسر نے نام نہ ظاہر کرنے کی درخواست پر بتایا کہ ہلاکتوں کی تعداد میں اضافے کا خدشہ ہے جبکہ انہوں نے یہ بھی بتایا کہ دہشت گرد پہلے سے پولیس اہلکاروں پر حملے کے لیے تیار تھے اور یہ ایک سوچی سمجھی سازش کا نتیجہ واقعہ ہے۔مصر کے وزیر داخلہ نے سرکاری ٹی وی پر اپنے جاری بیان میں ہلاکتوں کی تعداد انتہائی کم بتاتے ہوئے کہا کہ فائرنگ کے تبادلے میں 16 پولیس اہلکار جبکہ 15 دہشت گرد ہلاک یا زخمی ہوئے۔گذشتہ روز جاری ہونے والے سرکاری اعلامیے کے مطابق اس واقعے میں پولیس اہلکار کی بڑی تعداد میں ہلاکت کی تحقیقات کی جائیں گی، جو بظاہر خفیہ معلومات کے تبادلے اور تعاون کی ناکامی ہے۔واضح رہے کہ کسی بھی تنظیم یا گروپ نے پولیس پر ہونے والے اس حملے کی ذمہ داری قبول نہیں کی جبکہ کہا جارہا ہے کہ اس حملے میں داعش کے ملوث ہونے کے امکانات ہیں۔امریکا کے اسٹیٹ ڈپارٹمنٹ نے واقعے کی مذمت کرتے ہوئے حملے میں ہلاک ہونے والے افراد کے ورثا سے اظہار تعزیت کی۔