Category جرائم

میاں چنوں (ویب ڈیسک) میاں چنوں کے نواحی علاقے چھب کلاں میں 20 سالہ لڑکی خاوند کی وحشت کا شکار چڑھ گئی، شوہر نے بیوی کو زندہ در گور کر دیا۔ پولیس نے اطلاع ملنے پر تفتیش شروع کر دی ہے قاتل شوہر نے اپنا ڈیڑھ سال کا زندہ بچہ بھی قبرستان چھوڑ دیا، مقتولہ خورشید بانو کا کئی روز سے اپنے والدین سے رابطہ منقطع تھا۔

دنیا نیوز کے مطابق چھب کلاں کے نواحی گاؤں 59 پندرہ ایل میں شوہر نے بیوی کو تشدد کر کے زندہ درگور کر دیا۔ قاتل خاوند حبیب قمر نے فون کر کے لڑکی کے گھر والوں کو اطلاع دی کہ گھر کے صحن سے لاش نکال لو، مقتولہ کے اہل خانہ کی اطلاع پر پولیس نے گھر کو گھیرے میں لے لیا، پولیس نے کھدائی مکمل کرلی۔

پولیس ذرائع کے مطابق لاش فرانزک ٹیم کی موجودگی میں ہسپتال منتقل کی جائے گی، قاتل شوہر بھی کئی روز سے فرار ہے، بچہ پولیس تحویل میں ہے جبکہ پولیس کا کہنا ہے کہ پوسٹمارٹم کے بعد ہی مقدمہ درج کیا جائے گا۔

خانیوال (ایمرا نیوز لاہور)

غیرت کے نام پر بہنوئی نے سالی کو قتل کر دیا پنجاب کے شہر خانیوال میں غیرت کے نام پر ایک شخص نے تیز دھار آلے کے وار کر کے اپنی سالی کو موت کے گھاٹ اتار دیا۔

پولیس کے مطابق واقعہ خانیوال کے نواحی علاقے مخدوم پور میں پیش آیا جہاں غیرت کے نام پر بہنوئی نے تیز دھار آلے کے وار کر کے سالی کو قتل کر دیا۔

پولیس نےملزم کو گرفتار کر کے اس کے قبضے سے آلۂ قتل بھی برآمد کر لیا ہے، جبکہ ملزم سے تفتیش کی جا رہی ہے۔

راولپنڈی (میڈیا 92 نیئوز آن لائن ) انسداد دہشت گردی ایکٹ (اے ٹی سی) 1997 کے فورتھ شیڈول پر شامل افراد کی ’ہسٹری شیٹ‘ (مجرمانہ تاریخ کے ریکارڈ) میں خامیوں کے سامنے آنے کے بعد سٹی پولیس افسر نے متعلقہ حکام کو خبردار کیا ہے کہ اگر فورتھ شیڈولرز کے لیے اسٹینڈرڈ آپریٹنگ پراسیجر (ایس او پی) پر عمل نہیں کیا تھا تو انہیں محکمہ جاتی سزا کا سامنا کرنا پڑ سکتا ہے۔

ڈان اخبار کی رپورٹ کے مطابق پولیس کی غفلت اس وقت سامنے آئی جب سٹی پولیس افسر محمد فیصل رانا نے فورتھ شیڈول پر موجود تمام افراد کی ہسٹری شیٹس کا جائزہ لیا اور معلوم ہوا کہ انہیں مختلف پولیس تھانوں کی طرف سے نگرانی میں نہیں رکھا جارہا تھا۔

یہ بات بھی سامنے آئی کہ زیادہ تھ تھانوں میں ’افغان تربیت یافتہ لڑکوں، قبائلی علاقوں کے تربیت یافتہ لڑکوں‘ اور دیگر کے مجرمانہ تاریخ کا ریکارڈ پولیس نے نہیں تیار کیا تھا۔

یہاں تک کہ فٹ کانسٹیبل کو مجرمانہ تاریخ رکھنے والے افراد کے ریکارڈ سے متعلق معلومات کا علم کم تھا۔

فورتھ شیڈولرز کی ہسٹری شیٹس، جسے پولیس نے تیار کیا تھا، اس میں ایس ایچ او اور متعلقہ سینئر افسر کی رائے موجود نہیں تھی۔

ہسٹری شیٹس کی جانچ پڑتال کے بعد سی پی او نے یہ مشاہدہ کیا کہ ان شیٹس میں فورتھ شیڈولرز کی نہ تو مناسب نگرانی اور نہ ہی ان سے متعلق کسی رپورٹ کا ذکر ہے۔

واضح رہے کہ انسداد دہشت گردی ایکٹ 1997 کے سیکشن 4 کے تحت فورتھ شیڈول یا واچ لسٹ میں موجود کسی بھی شخص کو اپنا آبائی شہر چھوڑنے پر وہاں واپسی اور دیگر مقامات پر اپنی سرگرمیوں کے بارے میں متعلقہ تھانے کو آگاہ کرنا ہوتا ہے۔

اس کے علاوہ ایسے افراد اس بات کے پابند ہیں کہ جیل سے رہائی کے بعد وہ اچھے برتاؤ اور پرامن رویے کے لیے متعلقہ پولیس کو ضمانتی مچلکے جمع کروائیں گے۔

فورتھ شیڈول میں موجود شخص سرکاری عمارتوں، دفاتر یا تعلیمی اداروں کا دورہ اور ملازمت حاصل نہیں کرسکتا جبکہ خلاف ورزی کی صورت میں پولیس متعلقہ قانون کے تحت قانونی کارروائی کرسکتی ہے۔

واضح رہے کہ راوپنڈی ضلع میں فورتھ شیڈول میں شامل افراد کی تعداد بڑھ کر 38 ہوگئی ہے، جس میں حال ہی میں شامل ہونے والے وہ 5 افراد بھی ہیں جنہیں کالعدم تنظیموں سے رابطے پر اس فہرست میں شامل گیا تھا۔

اسلام آباد (میڈیا 92 نیوز آن لائن ) وزیر اعظم عمران خان کی جانب سے قرضوں کی تحقیقات کرنے کے لیے بنائے گئے کمیشن کا نوٹیفکیشن جاری کردیا گیا ہے۔

میڈیا رپورٹ کے مطابق وزیر اعظم عمران خان کی جانب سے ملکی قرضوں کی تحقیقات کرنے کے لیے بنائے گئے کمیشن کا نوٹیفکیشن جا ری کردیا ہے۔ نوٹی فکیشن کے مطابق کمیشن کے سربراہ حسین اصغر ہوں گے، اور کمیشن میں نیب ، ایف آئی اے ، ایف بی آر، آئی ایس آئی، اسٹیٹ بینک، ایس ای سی پی، ایف آئی اے اور آڈیٹر جنرل سمیت وزارت خزانہ کے اسپیشل سیکرٹری بھی کمیشن کے رکن ہوں گے۔

نوٹی فکیشن کے مطابق کمیشن 2008 سے 2018 تک قرضوں میں 25 ہزار ارب روپے کے اضافے کی تحقیقات کرے گا، اور ان ادوار میں میگا پراجیکٹس، ٹھیکوں کی تفصیلات جمع کی جائیں گی جب کہ کمیشن اعلی حکام اور ان کے خاندان کی جانب سے قومی خزانے کو ذاتی استعمال میں لانے کی بھی تحقیقات کرے گا۔ اور نوٹی فکیشن کے مطابق کمیشن کو فارنزک آڈیٹرز اور عالمی سطح کے ماہرین کو شامل کرنے کا اختیار ہوگا۔

کنیکٹکٹ: امریکا میں ایک دلچسپ واقعہ پیش آیا جس میں ایک مفرور مجرم نے فیس بک پراپنی تصویر کے 15000 لائیکس ملنے پر خود کو پولیس کے حوالے کرنے پر رضامندی ظاہر کی تھی۔ اب ایک ماہ سے زائد عرصہ گزرنے کے بعد اس کی تصویر پر 29 ہزار لائیکس ملے ہیں اور اس نے گرفتاری دیدی ہے۔

گزشتہ ماہ کنیکٹیکٹ کے ایک مفرور مجرم اور ٹورنگٹن پولیس ڈپارٹمنٹ کے درمیان ایک معاہدہ ہوا تھا جس میں مجرم جوزے سمنس نے وعدہ کیا تھا کہ اگر اس کی تصویر پر 15 ہزار لائیکس آگئے تو وہ گرفتاری دیدے گا۔

29 سالہ جوزے پر سات مقدمات عائد کئے گئے تھے اور وہ بار بار بلاوے کے باوجود نہ گرفتاری دے رہا تھا اور نہ ہی عدالت پہنچا تھا۔ پھر پولیس نے اس کی تصویر فیس بک پر جاری کی اس پر خود مجرم نے لکھا کہ اگر اس کی تصویر پر 20 ہزار لائیکس آجاتے ہیں تو وہ گرفتاری دیدے گا۔ اس پر پولیس نے بھاؤ تاؤ کرتے ہوئے کہا کہ وہ 10 ہزار لائکس پر گرفتاری دیدے۔ لیکن پھر دوبارہ مجرم نے کمنٹس میں لکھا کہ اگر 15 ہزار لائیکس ہوئے تو وہ خود تھانے آجائے گا اور اس طرح 15 ہزار لائیکس پر اتفاق ہوگیا۔
اس کے بعد پولیس نے کئی مرتبہ جوزے کی تصاویر سوشل میڈیا پر پوسٹ کیں جس کے بعد مزید لوگوں نے اسے شیئر کیا اور پسند کیا۔ وائرل ہونے کے بعد ایک ماہ میں اس کی تصویر پر 29 ہزار لائیکس مل چکے تھے۔

اپنے وعدے کا پاس کرتے ہوئے 19 جون کو جوزے نے اینفیلڈ پولیس ڈپارٹمنٹ فون کرکے کہا کہ وہ فلاں جگہ موجود ہے اور اسے گرفتار کرلیا جائے۔ اس پر عدالت اور پولیس سے بھاگنے کی دفعات بھی لگائی گئی ہیں۔ اس کی ضمانت کی رقم 30 ہزار ڈالر رکھی گئی ہے اور اسے جج کے سامنے بھی پیش ہونا ہے۔

آخری وقت تک اس کی تصویر پر 1700 لوگوں نے اپنے خیالات کا اظہار بھی کیا تھا۔

لاہور (میڈیا 92 نیوز آن لائن ) سوشل میڈیا پر عدلیہ مخالف بیانات دینے والے ملزم کی درخواست ضمانت پر سماعت کرتے ہوئے لاہور ہائی کورٹ نے فیڈرل انویسٹی گیشن ایجنسی (ایف آئی اے) کے سائبر کرائم سرکل کو نوٹس جاری کرتے ہوئے 3 جولائی کو جواب طلب کرلیا۔

لاہور ہائیکورٹ کے جج جسٹس شہرام سرور چودھری نے سوشل میڈیا پر عدلیہ کے خلاف بیان بازی کرنے والے ملزم عظیم عطاری کی درخواست ضمانت پر سماعت کی۔

دوران سماعت ملزم کے وکیل عزیز الحسن وسیر ایڈووکیٹ عدالت عالیہ میں پیش ہوئے، درخواست ضمانت میں وفاقی حکومت اور ایف آئی اے سائبر کرائم سرکل کو فریق بنایا گیا ہے۔

وکیل نے عدالت میں موقف اختیار کیا کہ ایف آئی اے نے عدلیہ کے خلاف بیان دینے کے بے بنیاد الزام میں ملزم کو گرفتار کر رکھا ہے اور ایف آئی اے مقدمے کی تفتیش مکمل کر چکا ہے۔

ان کا مزید کہنا تھا کہ ملزم کو جرم ثابت ہونے تک غیر معینہ مدت تک کے لیے جیل میں نہیں رکھا جا سکتا۔

ملزم کے وکیل نے استدعا کی کہ ان کے موکل کو ضمانت پر رہا کرنے کا حکم دیا جائے۔

عدالت عالیہ نے ایف آئی اے سائبر کرائم سرکل کو نوٹس جاری کر کے 3 جولائی کو جواب طلب کر لیا۔

یہ بھی پڑھیں: ایف آئی اے کو سائبر کرائم کے 15 نئے شکایتی مراکز قائم کرنے کی اجازت

خیال رہے کہ ملزم نجی ٹی وی کے صحافی بھی رہ چکے ہیں۔

واضح رہے کہ ملزم پر الزام ہے کہ انہوں نے یوٹیوب پر اپنے چینل کے ذریعے متعدد متنازع چیزیں شیئر کیں اور عدالتوں کے فیصلوں پر تنقیدی بیانات دیئے۔

ملزم کو ایف آئی اے نے 12 مئی کو لاہور میں قائم ان کے گھر سے گرفتار کیا تھا۔

گذشتہ برس مارچ میں سائبر کرائم ایکٹ کے تحت عدالت نے پہلا فیصلہ سناتے ہوئے لڑکیوں کو سوشل میڈیا پر تنگ کرنے والے مجرم کو 6 سال قید اور 7 لاکھ روپے جرمانے کی سزا سنائی تھی۔

سائبر کرائم ایکٹ کے تحت پہلا فیصلہ ایف آئی اے کے خصوصی مجسٹریٹ امتیاز احمد نے سنایا تھا۔

لاہور (میڈیا 92 نیوز آن لائن ) پولیس کے محکمہ انسداد دہشت گردی (سی ٹی ڈی) نے ملتان میں کارروائی کرتے ہوئے 2 دہشت گردوں کو ہلاک کردیا جب کہ 3 ساتھی فرار ہوگئے۔

ترجمان سی ٹی ڈی کے مطابق کالعدم تنظیم داعش خراسان کی ملتان میں دہشتگردی کی سازش کو ناکام بنایا گیا جس کے نتیجے میں 2 دہشت گرد ہلاک جب کہ 3 ساتھی فرار ہوگئے۔

ترجمان کے مطابق دہشت گردوں کی شناخت رضوان اور عمران کے نام سے ہوئی جن کا تعلق کالعدم تنظیم سے تھا جو لاہور میں امریکی شہری وارن وئنسٹائن کےاغوا سمیت کئی وارداتوں میں ملوث تھے۔

ترجمان سی ٹی ڈی کے مطابق مارےگئے دہشت گرد سمندری فیصل آباد میں کیش وین لوٹنے میں بھی ملوث تھے جنہوں نے لوٹ مار کے دوران تمام سیکیورٹی گارڈز کو قتل کردیا تھا۔

ترجمان سی ٹی ڈی نے بتایا کہ مارے گئے دہشت گرد دیگر کئی افراد کے اغواء اور قتل میں بھی ملوث تھے۔

ہلاک دہشتگردوں کے قبضے سے دھماکاخیز مواد، اسلحہ، نقشے اور رقم برآمد ہوئی۔

اسلام آباد: سپریم کورٹ کے سینئر جج نے ریمارکس دیے ہیں کہ زیادہ تر پولیس اہلکار رات کو ڈکیتیاں کرتے ہیں، پورے ملک میں پولیس کا نظام فلاپ ہوُچکا ہے، پولیس نام کی کوئی چیز نہیں، ملک میں ڈکیتیاں ہو رہی ہیں، لوگ گلے کاٹ رہے ہیں پولیس کہاں ہے۔

سپریم کورٹ میں پنجاب کے ٹریفک وارڈنز کی تنخواہوں سے متعلق کیس کی سماعت ہوئی تو جسٹس گلزاراحمد نے پنجاب کے سیکرٹری خزانہ اور آئی جی پر اظہار برہمی کیا۔

جسٹس گلزار احمد نے کہا کہ پورے ملک میں پولیس کا نظام فلاپ ہوُچکا ہے، ملک میں پولیس نام کی کوئی چیز نہیں، پولیس آخر ایسا کیا کر رہی ہے جو تنخواہ بڑھائی جائے؟، سرکاری افسران دفاتر میں بیٹھ کر حرام کھا رہے ہیں، بھاری تنخواہیں لیکر بھی دو نمبریاں کی جاتی ہیں، صرف اس بات کی فکر ہے کہ اپنے الاؤنس کیسے بڑھانا ہیں،

ملک میں ڈکیتیاں ہو رہی ہیں، لوگ گلے کاٹ رہے ہیں پولیس کہاں ہے؟ سب نہیں زیادہ تر پولیس اہلکار رات کو ڈکیتیاں کرتے ہیں، پولیس اور سرکاری افسران تنخواہ الگ لیتے ہیں اور عوام سے الگ لیتے ہیں۔

سیکرٹری خزانہ کے اپنے بیان سے مکرنے پر عدالت نے برہمی کا اظہار کرتے ہوئے ریمارکس دیے کہ سیکرٹری خزانہ پنجاب کو شاید پتا ہی نہیں انکا کام کیا ہے، آپ کی سنجیدگی کا یہ عالم ہے کہ کھڑے کھڑے ہی بات سے مُکر گئے، پورا صوبہ پنجاب کا خزانہ آپ کے ہاتھ میں ہے اور آپ کو کچھ کام کا پتا ہی نہیں، ایسا نہیں ہو سکتا کہ جس کو دل کرے جتنا دل کرے آپ دیدیں، آپ صرف دفتر میں بیٹھ کر اپنے پیسے بنانے کی سوچتے ہیں۔

صوبائی سیکرٹری خزانہ نے جواب جمع کرایا کہ ٹریفک وارڈنز کی منجمد ہونے والی اضافی بنیادی تنخواہ بحال کر رہے ہیں، اضافی بنیادی تنخواہ نہیں صرف منجمد ڈیلی الاؤنس بحال ہوگا۔ ٹریفک وارڈنز کے وکیل نے کہا کہ تنخواہ بحال ہوجائے تو مسئلہ ہی ختم ہوجائے گا۔

عدالت نے سماعت دو ہفتے کیلئے ملتوی کرتے ہوئے سرکاری وکیل کو مزید تیاری کیساتھ پیش ہونے کی ہدایت کردی۔

لاہور(میڈیا 92 نیوز آن لائن ) قلعہ گجر سنگھ کوارٹرز میں ماں نے مبینہ طور پر کالا جادو کرتے ہوئے اپنے دو بچوں کو جلادیا۔

لاہور کے علاقے قلعہ گجر سنگھ کوارٹرز میں افسوسناک واقعہ پیش آیا ہے جہاں ماں نے مبینہ طور پر کالا جادو کرتے ہوئے اپنے ہی دو بچوں کو جلادیا جنہیں جھلسی ہوئی حالت میں میو اسپتال منتقل کردیا گیا۔

بچوں کے والد سائمن سلیم کا کہنا ہے کہ میری بیوی انیتا بی بی کالا جادو سیکھ رہی تھی جس نے اس دوران بچوں کو جلایا۔ انیتا نے اپنی 3 سالہ بیٹی مریم اور 2 سالہ جارج کو گلے میں رسی ڈال کر جلایا، ملزمہ انیتا اپنے بچوں کو تین روز قبل پھوپھی کے گھر لے کرگئی تھی اور گزشتہ تین روز سے انہیں رسیوں سے باندھ کر رکھا ہواتھا،

جب کہ بچوں کے جسم کو موم بتیوں اور آہنی راڈ سے داغا گیا تھا۔ واقعے کی اطلاع پولیس کو دے دی گئی ہے۔

دوسری جانب ڈاکٹرز کا کہنا ہے کہ دونوں بچوں کا جسم مختلف حصوں سے جلا ہوا ہے اور ان کے گلے پر رسیوں کے نشان موجود ہیں۔

حیدرآباد میں پٹھان گوٹھ کے قریب دو ٹرینوں میں تصادم کے نتیجے میں 5 افراد جاں بحق ہوگئے ہیں جب کہ مزید ہلاکتوں کا خدشہ ظاہر کیا جارہا ہے۔

میڈیا رپورٹس کے مطابق کراچی سے راولپنڈی جانے والی جناح ایکسپریس حیدر آباد میں پٹھان گوٹھ کے قریب پنجاب سے آنے والی مال بردار ٹرین سے ٹکراگئی، حادثے میں متعدد افراد زخمی ہوئے ہیں جنہیں فوری طور پر اسپتال منتقل کیا جارہا ہے، ریسکیو ٹیمیں جائے حادثہ پر پہنچ گئی ہیں اور امدادی کارروائیاں جاری ہیں۔

تصادم کے باعث بعض بوگیاں پٹری سے اتر گئی ہیں جس میں مسافر پھنسے ہوئے ہیں۔ حادثے میں دونوں ٹرینوں کے انجن تباہ ہوگئے ہیں۔ریلوے حکام کا کہنا ہے کہ حادثے کے بعد ٹرینوں کی آمد ورفت معطل کردی گئی۔