Tag Autumn

فرانس میں صدر نیشنل اسمبلی کے گھر کو نذر آتش کر دیا گیا. اس طرح ڈرانے دھمکانے والے اقدامات کا کوئی جواز نہیں، رچرڈ، صدر کی مذمت، آگ جان بوجھ کر لگائی گئی، پولیس، تحقیقات شروع
پیرس: (ایمرا نیوزآن لائن) فرانس میں نامعلوم افراد نے نیشنل اسمبلی کے صدر رچرڈ فرانڈ کے گھر کو آگ لگا دی۔ صدر رچر ڈ نے جلے ہوئے گھر کی تصویر ٹوئٹر پر پوسٹ کرتے ہوئے لکھا کہ اس طرح ڈرانے دھمکانے والے اقدامات کا کوئی جواز نہیں۔ فرانسیسی صدر میکغوں نے اپنی ٹویٹ میں اس اقدام کی شدید مذمت کی ہے۔ فرانسیسی پولیس کے مطابق بظاہر لگتا ہے کہ آگ جان بوجھ کر لگائی گئی، واقعہ کی تحقیقات شروع کر دی گئی۔

قونصلر رسائی پانے والے قیدیوں میں 100 کراچی اور 2 قیدی راولپنڈی کی جیلوں میں ہیں
اسلام آباد(ایمرا نیوز آن لائن)پاکستان نے علاقائی اور خطے میں پرامن ہمسائیگی کے لیے ایک اور بڑا قدم اٹھانے کا فیصلہ کرلیا۔ذرائع کے مطابق پاکستانی جیلوں میں بھارتی قیدیوں کو قونصلر رسائی دینے کا فیصلہ کیا گیا جس کے تحت بھارتی ہائی کمیشن کے حکام کو 102 بھارتی قیدیوں تک قونصلر رسائی کی اجازت دی گئی ہے۔ذرائع نے بتایا کہ قونصلر رسائی پانے والے قیدیوں میں 100 کراچی اور 2 قیدی راولپنڈی کی جیلوں میں ہیں جن کو اس ماہ کے آخر تک رسائی دے دی جائے گی۔ذرائع کے مطابق پاکستانی جیلوں میں اس وقت 537 بھارتی قیدی موجود ہیں۔سفارتی ذرائع کا کہنا ہےکہ یہ اقدام دونوں ممالک کے درمیان اعتماد سازی کے لیے فائدہ مند ہوگا اور امید ہے کہ بھارتی جیلوں میں قید 347 پاکستانی قیدیوں کو بھی بھارت قونصلر رسائی دے گا۔

سیکیورٹی ٹیم نے اسلام آباد کے مختلف مقامات کا دورہ کر کے سیکیورٹی انتظامات کا جائزہ لیا
اسلام آباد(ایمرا نیوز آن لائن) سعودی ولی عہد محمد بن سلمان کے دورہ پاکستان سے قبل ان کی سیکیورٹی ٹیم پاکستان پہنچ گئی۔ذرائع کے مطابق محمد بن سلمان کی سیکیورٹی ٹیم نے اسلام آباد کے مختلف مقامات کا دورہ کیا اور سیکیورٹی انتظامات کا جائزہ لیا ہے۔ذرائع کا کہنا ہےکہ محمد بن سلمان کے ڈاکٹرز کی ٹیم اور ان کے دورے کی کوریج کے لیے سعودی میڈیا کا وفد بھی پاکستان پہنچ گیا ہے۔سعودی سفیر کے مطابق ولی عہد محمد بن سلمان 16 فروری کو بڑے وفد کے ہمراہ 2 روزہ دورے پر پاکستان آئیں گے۔ذرائع کاکہنا ہےکہ محمد بن سلمان کے وزیراعظم ہاو¿س میں قیام کا امکان ہے۔واضح رہے کہ اسلامی فوجی کے اتحاد کے سربراہ جنرل (ر) راحیل شریف کی سربراہی میں وفد بھی پاکستان کے 2 روزہ دورے پر ہے جو پاکستان کی سول و عسکری قیادت سے ملاقاتیں کرے گا۔

موجودہ بینچ شہباز شریف کی درخواست ضمانت پر سماعت نہیں کرسکتا، معاملہ جسٹس علی باقر نجفی پر مشتمل بینچ کو بھجوایا جائے، نیب
لاہور(ایمرا نیوز آن لائن) ہائیکورٹ نے مسلم لیگ (ن) کے صدر شہباز شریف کی ضمانت کی درخواستوں پر بینچ کی تبدیلی کی نیب کی درخواست مسترد کردی۔چیف جسٹس لاہور ہائیکورٹ سردار محمد شمیم خان نے نیب کی درخواست پر سماعت کی اور فیصلہ محفوظ کیا۔عدالت نے مختصر فیصلہ سناتے ہوئے نیب کی جانب سے شہباز شریف کی ضمانت کی درخواستوں کی سماعت کرنے والے بینچ کی تبدیلی کی درخواست مسترد کردی۔نیب نے موقف اختیار کیا تھا کہ شہباز شریف کی درخواست ضمانت پر جسٹس ملک شہزاد کی سربراہی میں 2 رکنی بینچ سماعت کررہا ہے اور موجودہ بینچ درخواست ضمانت پر سماعت نہیں کرسکتا۔نیب کا موقف تھا کہ جسٹس علی باقر نجفی کی سربراہی میں بینچ کیس میں شریک ملزمان کی ضمانت کی درخواستیں مسترد کرچکا ہے اس لیے شہباز شریف کی درخواست ضمانت جسٹس علی باقر نجفی پر مشتمل بینچ کو بھجوائی جائے۔یاد رہے کہ نیب نے قومی اسمبلی میں قائد حزب اختلاف اور مسلم لیگ (ن) کے صدر شہباز شریف کو آشیانہ اقبال ہاؤسنگ اسکینڈل میں اختیارات کے ناجائز استعمال کے جرم میں گرفتار کیا تھا اور وہ عدالتی ریمانڈ پر جیل میں ہیں۔

انکوائری مکمل ہونے کے بعد معاملہ آگے چلے گا، فراڈ ہو یا قومی خزانے کو نقصان پہنچے تو کسی بھی وقت کورٹ مارشل ہوسکتا ہے، اٹارنی جنرل
اسلام آباد(ایمرا نیوز آن لائن) سپریم کورٹ نے اصغر خان کیس میں پاک فوج کے ملوث افسران کے خلاف 4 ہفتے میں انکوائری مکمل کرنے کا حکم دے دیا۔جسٹس گلزار احمد کی سربراہی میں 3 رکنی بنچ نے اصغر خان عملدرآمد کیس کی سماعت کی اور عدالت نے 4 ہفتے کے اندر پاک فوج کے ملوث افسران کے خلاف انکوائری مکمل کرتے ہوئے رپورٹ پیش کرنے کا حکم دیا۔عدالت نے قرار دیا کہ ایف آئی اے رپورٹ کا جائزہ وزارت دفاع کے جواب کے ساتھ لیا جائے گا اور جائزہ لیں گے کہ عدالتی حکم پر عمل ہوا یا نہیں۔سماعت کے دوران جسٹس گلزار نے استفسار کیا کہ فوجی افسران کے خلاف وزارت دفاع نے کورٹ ماشل کے لیے کارروائی کیوں شروع نہیں کی؟ جس پر اٹارنی جنرل نے عدالت کو بتایا کہ انکوائری مکمل ہونے کے بعد معاملہ آگے چلے گا، فراڈ ہو یا قومی خزانے کو نقصان پہنچے تو کسی بھی وقت کورٹ مارشل ہوسکتا ہے۔جسٹس اعجاز الاحسن نے اس موقع پر کہا کہ اصغر خان کیس میں 28 سال پہلے 184 کروڑ روپے کی رقم استعمال ہوئی۔بینچ کے سربراہ جسٹس گلزار احمد نے استفسار کیا بانی ایم کیو ایم اور ایم کیو ایم کو بھی پیسے ملے تھے، کیس میں ان کا نام سامنے آیا نا ہی ایف آئی اے رپورٹ میں۔اٹارنی جنرل نے جواب میں کہا کہ ایف آئی اے رپورٹ میں بانی ایم کیو ایم کا نام تھا، وہ بانی پاکستان میں نہیں ہیں اس حوالے سے برطانوی حکومت کے ساتھ بات چیت جاری ہے۔اٹارنی جنرل نے عدالت کو بتایا کہ بانی ایم کیو ایم اور چند دیگر ملزمان کی حوالگی کے لیے بات چیت جاری ہے، بہت جلد اہم پیش رفت متوقع ہے۔1990ء کی انتخابی مہم کے حوالے سے یہ الزام عائد کیا جاتا ہے کہ اس انتخابی مہم کے دوران اسلامی جمہوری اتحاد میں شامل جماعتوں اور سیاسی رہنماؤں میں پیسے تقسیم کیے گئے۔خفیہ ایجنسی انٹرسروسز انٹیلی جنس (آئی ایس آئی) کے سابق سربراہ لیفٹیننٹ جنرل (ر) اسد درانی نے اپنے ایک بیان حلفی میں دعویٰ کیا تھا کہ سیاسی رہنماؤں میں یہ پیسے مہران بینک کے سابق سربراہ یونس حبیب سے لے کر بانٹے گئے تھے۔پیسے لینے والوں میں غلام مصطفیٰ کھر، حفیظ پیرزادہ، سرور چیمہ، معراج خالد اور دیگر رہنماؤں کے ساتھ ساتھ میاں نواز شریف کا نام بھی سامنے آیا تھا۔اس معاملے پر ایئر فورس کے سابق سربراہ اصغر خان مرحوم نے سپریم کورٹ سے رجوع کیا تھا، یہ کیس پاکستان کی عدالتی تاریخ میں اصغر خان کیس کے نام سے مشہور ہے۔اصغر خان کیس میں یہ بات بھی سامنے آئی تھی کہ پیسے بانٹنے کا یہ سارا عمل اس وقت کے صدر غلام اسحاق خان اور دیگر قیادت کے بھی علم میں تھا۔سپریم کورٹ نے 2012 میں اس کیس کا فیصلہ سناتے ہوئے اسلامی جمہوری اتحاد کی تشکیل کے لیے مسلم لیگ (ن) کے قائد میاں نواز شریف سمیت دیگر سیاست دانوں میں رقوم کی تقسیم اور 1990 کے انتخابات میں دھاندلی کی ذمہ داری مرزا اسلم بیگ اور آئی ایس آئی کے سابق سربراہ لیفٹیننٹ جنرل ریٹائرڈ اسد درنی پر عائد کی تھی۔سپریم کورٹ نے اپنے فیصلے میں مرزا اسلم بیگ اور اسد درانی کے خلاف کارروائی کا بھی حکم دیا تھا۔مرزا اسلم بیگ اور اسد درانی نے سپریم کورٹ کے فیصلے کے خلاف سپریم کورٹ میں ہی نظرثانی اپیل دائر کر رکھی تھی جسے عدالت مسترد کرچکی ہے۔سپریم کورٹ نے رواں برس مئی میں وفاقی حکومت کو اصغر خان کیس سے متعلق عدالتی فیصلے پر عملدرآمد کا حکم دیتے ہوئے کہا تھا کہ وفاقی حکومت اور ایف آئی اے اصغر خان کیس کے فیصلے کی روشنی میں قانون کے مطابق کارروائی کریں۔

نجی اسکولوں کی انتظامیہ کی آنکھ میں شرم کا ایک قطرہ بھی نہیں، نجی سکو لو ں کے پاس کالا دھن ہے یا سفید، ہم آڈٹ کرالیتے ہیں، جس اسکول کی فیس زیادہ ہو وہی مشہور ہوجاتا ہے، جسٹس گلزار احمد کے ریما رکس
اسلام آباد(ایمرا نیوز آن لائن)سپریم کورٹ میں نجی اسکولوں کے خلاف توہین عدالت کیس کی سماعت کے دوران جسٹس گلزار نے برہمی کا اظہار کرتے ہوئے ریمارکس دیے کہ نجی اسکولوں کی انتظامیہ کی آنکھ میں شرم کا ایک قطرہ بھی نہیں ہم اسکولوں کو بند اور نیشنلائیز بھی کرسکتے ہیں۔سپریم کورٹ میں جسٹس گلزار احمد کی سربراہی میں 3 رکنی بینچ نے 2 نجی اسکولوں کے خلاف توہین عدالت کیس کی سماعت کی۔دورانِ سماعت جسٹس اعجاز الاحسن نے نجی اسکول کے حکام پر برہمی کا اظہار کرتے ہوئے کہا کہ آپ کی جرات کیسے ہوئی کہ اسکول فیس کے عدالتی فیصلے کو ڈریکونیئن فیصلہ کہا، والدین کو لکھے گئے توہین آمیز ہیں۔جسٹس گلزار احمد نے ریمارکس دیے کہ آپ کس قسم کی باتیں لکھتے ہیں، ہم آپ کے اسکولوں کو بند کر دیتے ہیں، نیشنلائز بھی کرسکتے ہیں، سرکار کو کہہ دیتے ہیں کہ آپ کے اسکولوں کا انتظام سنبھال لے۔عدالت کے اظہارِ برہمی پر نجی اسکول کے وکیل نے کہا کہ ہم عدالت سے معافی کے طلب گار ہیں، دوبارہ ایسا نہیں ہوگا۔اس پر جسٹس گلزار نے کہاکہ ٹھیک ہے آپ تحریری معافی نامہ جمع کرادیں ہم دیکھ لیں گے، آپ کے پاس کالا دھن ہے یا سفید، ہم آڈٹ کرالیتے ہیں، تعلیم کو کاروبار بنالیا ہے، اسکول پیسے بنانے کی کوئی صنعت نہیں، نجی اسکولوں کی انتظامیہ کی آنکھ میں شرم کا ایک قطرہ بھی نہیں، نجی اسکولوں سے بچے کتنی بیماریاں لے کر نکلتے ہیں۔نجی اسکول کے وکیل نے عدالت کو بتایا کہ عدالت کی تضحیک کا کوئی ارادہ نہیں تھا، عدالتی فیصلے پر عمل کرکے فیس کم کردی ہے۔جسٹس گلزار احمد نے مزید ریمارکس دیے کہ عدالتی فیصلے کے بعد کس قسم کی باتیں کی گئیں،نجی اسکولوں سے کیوں نہ نمٹ لیں، حکومت کو نجی اسکول تحویل میں لینے کا حکم دے دیتے ہیں، اسکول انڈسٹری یا پیسہ بنانے کا شعبہ نہیں، نجی اسکول والے بچوں کے گھروں میں گھس گئے ہیں اور زہرگھول دیا ہے، نجی اسکول والے بچوں کے والدین سے ایسے سوال پوچھتے ہیں جن کا تصور نہیں کرسکتے، والدین بچوں کو سیر کرانے کہاں جاتے ہیں، نجی اسکول یہ پوچھنے والے کون ہوتے ہیں، جس اسکول کی فیس زیادہ ہو وہی مشہور ہوجاتا ہے۔بعد ازاں عدالت نے کیس کی مزید سماعت 2 ہفتوں کے لیے ملتوی کردی۔

آزادی کے مقدس مشن کے لئے اپنی جان کی بازی لگائی ، بیان
سرینگر(ایمرا نیوز آن لائن) شہید بابائے قوم محمد مقبولؒ بٹ کو جدوجہد اور قربانیوں کا مجسم اور تحریک آزادی آزادی جموں و کشمیر کا بنیادی ستون قرار دیتے ہوئے محبوس محمد یاسین ملک نے کہا کہ ناجائز تسلط کے خلاف مقبولؒ بٹ شہید نہ صرف کشمیریوں کے لئے بلکہ دنیا کی ہر اس قوم و ملت کے لئے کہ جو اپنی آزادی کی جنگ میں مصروف ہے کس لئے بھی ایک تابناک علامت بنے رہیں گے کیونکہ مقبول ؒ ہی تھے کہ جنہوں نے باطل کے سامنے سرنگوں نہ ہونے اور تازیست لڑتے رہنے کا درس دیا ۔ اپنے ایک بیان میں یاسین ملک نے کہاکہ شہید بابائے قوم کوئی عام انسان نہیں تھے بلکہ انسانوں کی اس قبیل سے تعلق رکھتے تھے کہ جن کے نزدیک اعلٰی مقاصد کے لئے لڑنا اور جان دینا ہی سب کچھ ہوا کرتا ہے ۔ مقبولؒ بٹ ایک نظریہ ساز ، ایک مجاہد ، ایک سیاسی قائد ، ایک دانشور ، ایک عظیم قلم کار اور ایک بے لوث سفارتکار بھی تھے جنہوں نے ان سارے شعبوں میں صف اول میں رہ کر متاثرین کے لئے ان مٹ نقوش چھوڑے تاکہ عزیمت کی راہ میں جدوجہد کرتے ہوئے ان کے پا¶ں کسی ظلم و جبر سے نہ ڈگمگائیں ۔ انہوں نے کہا کہ مقبولؒ نے اپنے لوگوں کی آزادی کا خواب دیکھا اور اسی خواب کو شرمندہ تعبیر کرنے کے لئے میدان عمل کا راستہ اختیار کیا اور بالآخر اسی راہ میں اپنی جان کی بازی لگا کر ابدی حیات کا مقام حاصل کر لیا ۔ انہوں نے کہا کہ شہید مقبولؒ کی زندگی ، جدوجہد اور قربانیاں ہمارے لئے مشعل راہ ہیں اور یہی چیزیں ہمیں جدوجہد کی راہ میں راستہ دکھاتے رہیں گے ۔ شہید بابائے قوم ؒ کی جدوجہد و قربانیوں کو یاد کرتے ہوئے یاسین ملک نے کہا کہ مقبول بٹ نے بچین میں اپنی جدوجہد شروع کی اور ایک جوان کی حیثیت سے بھی صف اول میں رہے ۔ جدوجہد کرتے ہوئے مہاجرت کی سنت پر بھی عمل پیرا ہوئے اور بعد ازان میدان کارزار میں واپس آ کر جہاں تختہ دار ان کا منتظر تھا جدوجہد جاری رکھی اور جب قربانی پیش کرنے کا وقت آیا تو اس میں بھی مقبول نے صف اول کا راہی بن کر دہلی کی تہاڑ جیل میں تختہ دار کو بغیر کسی غم ، افسوس یا معذرت چوم لیا ۔ انہوں نے کہا کہ ہمارا فریضہ ہے کہ اپنے ان محسنوں کو یاد رکھیں اور انہیں شایان شان طریقے پر خراج عقیدت ادا کرنے کے لئے قومی اتحاد و اتفاق کا مظاہرہ کرتے رہیں ۔ (جاوید)

اسد قیصر کو اسپیکر شپ سے ہٹانے کا سوال ہی پیدا نہیں ہوتا، پی ایم ایل این قانون سازی کے دوران شور شرابہ نہ کرنے کی یقین دہانی کرائے تو پی اے سی وپروڈکشن آرڈر پر فیصلہ کریں گے ، وزیر اعظم کے مشیر برائے سیاسی امور کی نجی ٹی وی سے گفتگو
اسلام آباد (ایمرا نیوز آن لائن) وزیر اعظم کے مشیر برائے سیاسی امور نعیم الحق نے کہا ہے کہ مسلم لیگ(ن) قومی اسمبلی میں ضابطہ سے ہٹ کر نعرے بازیاں اور قانون سازی کے دوران رکاوٹیں حائل نہ کرنے کی یقین دہانی کرا دے تو پھر پبلک اکاؤنٹس کمیٹی اور پروڈکشن آرڈرز سے متعلق اقدامات پر فیصلہ کریں گے ۔ ان خیالات کا اظہار نعیم الحق نے پیر کے روز نجی ٹی وی چینل سے گفتگو کے دوران کیا انہوں نے کہا کہ حکومت چاہتی ہے کہ قومی اسمبلی اور پبلک اکاؤنٹس کمیٹی کی کارروائی قانون اور قواعد کے مطابق ہونی چاہئے اور ہماری اس حوالے سے مسلم لیگ(ن) سمیت اپوزیشن پارٹیوں سے بات چیت جاری ہے لیکن پی ایم ایل این کی نیت صاف نظر نہیں آتی ہے تو حکومت بھی ان کو بتانا چاہتی ہے کہ اب وہ دن گئے جب میاں صاحب فاختہ اڑایا کرتے تھے جیسا کہ پچھلی حکومت میں ہر غلط کام ہوتا تھا اور ہمارے اراکین اسمبلی کو بولنے کا موقع بھی نہیں دیا جاتا تھا انہوں نے کہا کہ حکومت قانون سازی کے دوران قومی اسمبلی میں ضابطے سے ہٹ کر شور شرابہ اور حائل رکاوٹیں ہمیشہ کے لئے ختم کرنا چاہتی ہے اور مسلم لیگ(ن) اگر ہمیں یقین دہانی کرا دے تو ہم پبلک اکاؤنٹس کمیٹی پر پروڈکشن آرڈر سے متعلق اقدامات پر فیصلہ کریں گے ۔ اسد قیصر اور شیخ رشید کے درمیان کشیدگی کے سوال کے جواب میں نعیم الحق نے کہا کہ اسپیکر قومی اسمبلی اسد قیصر کو ہٹانے کا سوال ہی پیدا نہیں ہوتا کیونکہ وہ ہماری پارٹی کے رکن اور منجھے ہوئے سیاستدان ہیں وہ اپنا کام قوانین کے اندر کرتے ہیں ۔( جاوید/ اشفاق)

خلیجی ممالک کے شاہی خاندانوں کے افراد کو مزید 12 خصوصی اجازت نامے جاری کردیے گئے
اسلام آباد(ایمرا نیوز آن لائن) وفاقی حکومت نے نایاب پرندے تلور کے شکار کے لیے اجازت نامے دینے کا سلسلہ جاری رکھتے ہوئے خلیجی ممالک کے شاہی خاندانوں کے افراد کو مزید 12 خصوصی اجازت نامے جاری کردیے۔ مےڈےا رپورٹس کے مطابق وزارت خارجہ کی جانب سے جن افراد کو اجازت نامے دیے گئے ان میں سعودی عرب کے خطے تبوک کے گورنر، شہزادہ فہد بن سلطان عبدالعزیز السعود کو بلوچستان کے ضلع آوران، نوشکی(نوشکی شہر کے علاوہ)، چاغی (شمال مغربی حصے کے علاوہ)، اور شہزادہ منصور بن محمد عبدالحمٰن السعود کو ڈیرہ بگٹی اور سوئی کے علاقوں میں شکار کی اجازت دی گئی۔ متحدہ عرب امارات(یو اے ای) کے صدر اور ابوظہبی کے حکمران شیخ خلیفہ بن زیدالنہیان اور ولی عہدشیخ محمد بن زید النہیان کو پنجگور، خاران اور ڑوب میں( قمر دین کاریز کے علاوہ) شکار کا اجازت نامہ دیا گیا۔ اسی طرح یو اے ای کے صدر کے بیٹے اور سابق نائب وزیراعظم شیخ محمد بن خلیفہ بن زیدالنہیان کو لورالئی(دکی کے علاوہ)، ابوظہبی کے حکمران کے ترجمان شیخ ہمدان بن زید النہیان کو سبی کی تحصیل لہری اور یو اے ای کے نائب صدر اور وزیراعظم اور دبئی کے حکمران شیخ محمد بن راشد المکتوم اور دبئی کے ولی عہد شیخ محمد بن ہمدان بن محمد بن راشدالمکتوم کو ضلع خضدار، لسبیلہ اور چاغی میں بلوچستان کے شمال مغربی علاقوں میں شکار کی اجازت دی گئی۔علاوہ ازیں قطر کے شیخ تمیم بن حماد بن خلیفہ کو ضلع واہشک، ان کے انکل شیخ جاسم حماد بن خلیفہ کو موسیٰ خیل، تحصیل درگ اور ضلع کچھی کی تحصیل میں شکار کرنے کا اجازت نامہ جاری کیا گیا۔قطر کے شاہی خاندان کی سپریم کونسل کے ایک رکن شیخ علی بن عبداللہ ثانی کو ضلع کیچ، شاہی خاندان کے ایک اور فرد شیخ فیصل بن نصیربن ہمدان کو قلعہ سیف اللہ، کاکڑ خراسان اور قمر دین کاریز میں، بحرین کی مسلح افواج کے کمانڈر ان چیف شیخ خلیفہ بن احمد الخلیفہ کو موسیٰ خیل میں تحصیل توائسر میں شکار کی اجازت دی گئی۔اس کے ساتھ بحرین کے وزیر داخلہ لیفٹیننٹ جنرل شیخ راشد بن عبداللہ الخلیفہ کو ضلع جعفرآباد کے علاقوں میں بین الاقوامی سطح پر نایاب تصور کیے جانے والے پرندے تلور کا شکار کرنے کی اجازت دی گئی۔یاد رہے کہ پاکستان تحریک انصاف (پی ٹی ائی) نے گزشتہ دورِ حکومت میں وفاقی حکومت کی جانب سے عرب شاہی خاندانوں کو تلور کے شکار کے لیے اجازت نامے جاری کرنے پر سخت تنقید کا نشانہ بنایا تھا اور انہیں خیبرپختونخوا میں شکار کی اجازت دینے سے انکار کردیا تھا جہاں پی ٹی آئی کی صوبائی حکومت تھی۔اس سے قبل گزشتہ 10 دنوں میں خلیجی ممالک کے 13 شاہی افراد کو سندھ کے علاقوں میں تلور کے شکار کے اجازت نامے دیے گئے تھے جبکہ دسمبر سے پاکستان میں عرب شاہی افراد کے تلور کے شکار کا سلسلہ جاری ہے۔ ان اجازت ناموں کے اجرا سے پاکستان کو یورپی یونین کی جانب سے دیا گیا جنرلائزڈ اسکیم آٓف پریفرینس (جی ایس پی –پلس) کا اسٹیٹس چھن جانے کا خطرہ پیدا ہوگیا ہے۔واضح رہے کہ جی ایس پی پلس اسٹیٹس سے فائدہ اٹھانے والے ملک کی حیثیت سے پاکستان پر متعدد بین الاقوامی معاہدوں کی پاسداری کی ذمہ داری عائد ہوتی ہے، خاص کر ماحولیاتی تحفظ کے معاہدوں کی بین الاقوامی معاہدوں کی پاسداری کررہے ہیں یا نہیں۔

بچی کی حالت خون زیادہ بہنے کی وجہ سے خطرے میں ہے، اسپتال ذرائع
لاہور(ایمرا نیوز آن لائن)لاہور کے علاقے گارڈن ٹاﺅن میں ایک نامعلوم شخص نے 7 سالہ بچی کو مبینہ طور پر زیادتی کا نشانہ بناڈالا اور فرار ہو گیا۔ تفصےلات کے مطابق لاہور کے علاقہ گارڈن ٹاؤن میں ایک درندہ صفت شخص نے 7 سالہ بچی کو مبینہ طور پر زیادتی کا نشانہ بنا ڈالا اور لرزہ خیز واردات کے بعد فرار ہونے میں کامیاب ہوگیا تاہم متاثرہ بچی کو تشویشناک حالت میں جناح اسپتال منتقل کردیاگیا ہے۔اسپتال ذرائع کے مطابق بچی کی حالت خون زیادہ بہنے کی وجہ سے خطرے میں ہے جب کہ گارڈن ٹاؤن تھانے کی پولیس کارروائی کیلیے اسپتال پہنچ گئی۔پولیس کا کہنا ہے کہ بچی سے زیادتی کرنے کے بعد ملزم فرار ہوگیا تاہم متاثرہ بچی کو تشویشناک حالت میں جناح اسپتال منتقل کردیاگیا ہے اور بچی کا میڈیکل کروانے کے بعد قانونی کارروائی کی جائے گی ۔