Tag Balochistan

اسلام آباد(نیٹ نیوز/ایمرا نیوز) چیف جسٹس پاکستان میاں ثاقب نثار کا کہنا ہے کہ خواہش تھی کہ میرے ہوتے ہوئے گج ڈیم کی تعمیر کا معاملہ حل ہو جاتا، مگر بعض خواہشیں خواہشیں ہی رہ جاتی ہیں۔گج ڈیم کی تعمیر سے متعلق کیس میں سپریم کورٹ نے وزیر توانائی، وزیر خزانہ اور سیکریٹری کابینہ کو منگل کے روز طلب کر لیا۔سپریم کورٹ آف پاکستان میں گج ڈیم کی تعمیر سے متعلق کیس کی سماعت چیف جسٹس پاکستان میاں ثاقب نثار اور جسٹس اعجاز الاحسن پر مشتمل 2 رکنی بنچ نے کی۔ایڈیشنل اٹارنی جنرل نے عدالت کو بتایا کہ سی ڈی ڈبلیو پی کی میٹنگ میں ڈیم کی تعمیرکی سفارش ایکنک کو کر دی گئی ہے۔چیف جسٹس نے کہا کہ اس طرح تو یہ معاملہ ایکنک میں جا کر پھنس جائے گا، خواہش تھی کہ میرے ہوتے ہوئے معاملہ حل ہو جاتا، مگر بعض خواہشیں خواہشیں ہی رہ جاتی ہیں۔جسٹس اعجازالاحسن نے کہا کہ ابھی ایک ہفتہ باقی ہے۔عدالت عظمیٰ نے حکم دیا کہ آئندہ پیر تک سی ڈی ڈبلیو پی کے اجلاس کے منٹس عدالت میں پیش کیے جائیں۔سپریم کورٹ نے وزیر توانائی، وزیر خزانہ اور سیکریٹری کابینہ کو منگل کے روز طلب کر لیا۔

اسلام آباد (نیٹ نیوز/ایمرا نیوز) وزیراعظم عمران خان کی ہمشیرہ علیمہ خان جنہیں پاکستان میں ٹیکس حکام سے متحدہ عرب امارات میں موجود پرتعیش فلیٹ چھپانے پر مقدمہ کا سامنا ہے۔ ان کی امریکا میں بھی جائیداد ہے۔ امریکی پراپرٹی ریکارڈ کے مطابق ریاست نیوجرسی میں تین فلیٹوں پر مشتمل چار منزلہ عمارت کی بھی وہ مالک ہیں۔ انہیں فروخت کرنے میں ناکامی کے بعد مالی سال 2018 میں انہیں ظاہرکیا گیا۔ تاہم انہوں نے اپنی فروخت شدہ جائیدادیں ظاہر نہیں کیں۔ امارات میں اپنا فلیٹ ظاہر نہ کرنے پر انہیں سپریم کورٹ میں مقدمےکا سامنا ہے۔ واضح رہے کہ لندن فلیٹ کی مالک آف شور کمپنی نیازی سروسز کی آفیشل دستاویزات میں علیمہ خان کو کمپنی کی واحد ڈائریکٹر دکھایا گیا ہے ۔ تاہم پاناما پیپرز افشا کے وقت جس کا سلسلہ 2010 سے جاری تھا نیو جرسی امریکا میں جائیداد کاروباری شراکت دار کے ساتھ مشترکہ ملکیت تھی۔ کاروباری شراکت دار نے پراپرٹی فروخت کرنے سے انکار کردیا تھا۔ علیمہ خان امریکا میں اپنی جائیداد فروخت کرنے میں ناکام رہیں جو ظاہر ہوکر اب سامنے آئی ہے۔ یہ پراپرٹی دریائے ہڈسن سے 400میٹرز، مین ہٹن سے 4کلومیٹرز اور وال اسٹریٹ سے 3کلومیٹرز کے فاصلے پر واقع ہے۔ یہ عمارت 2004میں امریکی شہریوں پریبولا ،کیتھ اینڈ سوزن اور ایٹلز سے خریدی گئی جسے 30جون 2017کو ختم ہونے والے مالی سال تک ظاہر نہیں کیا گیا تھا۔ علیمہ خان نے اپریل 2016 میں پاناما پیپرز کے حوالے سے انکشافات کے بعد دی نیوز کی درجنوں ای میلز اور پیغامات کا کوئی جواب نہیں دیا۔ جن میں ان کے امریکا، برطانیہ اور متحدہ عرب امارات میں اثاثوں کے بارے میں استفسار کیا گیا ا ور جواب دینے کے بجائے انہوں نے اپنے اثاثے اور جائیدادیں فروخت کرنے کی کوششیں شروع کردیں۔ تاکہ بظاہر یہ دعویٰ کرسکیں کہ جب میڈیا عدالت میں سوال اٹھایا گیا تو ان کی کوئی ان سے پاکستان میںکوئی جائیداد نہیں تھی۔ ٹیکس حکام کو 30 جون 2017 تک آگاہ نہیں کیا گیا تھا۔ ان کے ٹیکس گوشوارے بتاتے ہیں کہ وہ سالانہ معمولی ٹیکس ادا کرتی رہی ہیں۔ وزیراعظم دفتر کا کہنا ہے کہ یہ نیا پاکستان ہے جس میں وزیراعظم کے اعزاء اور اقرباء اپنے کئے کے خود ذمہ دار ہیں اور حکومت کا اس سے کوئی لینا دینا نہیں ہے۔ سرکاری دستاویزات میں علیمہ خان کو نیازی سروسز لمیٹڈ کا ڈائریکٹر دکھایا گیا جبکہ عمران خان کا کوئی ذکر نہیں ہے۔ امریکا میں علیمہ خان کی جائیداد کا پتہ 154، سکستھ اسٹریٹ، ہوبوکن سٹی، نیو جرسی (این جے 17030-) ہے۔ یہ جائیداد اپنے شراکت دار کے ساتھ علیمہ خان (علیمہ خانم) نے 5اگست 2004کو خریدی۔ دستاویزات میں اس کی قیمت 7لاکھ 58ہزار ڈالرز ظاہر کی گئی ہے جس کے مطابق مذکورہ جائیداد میں 75فیصد ملکیت علیمہ خان اور باقی 25فیصد کا حصہ دار ان کی شراکت دار ہے۔ اس کی موجودہ مارکیٹ قیمت 30لاکھ ڈالرز (تقریباً 45کروڑ روپے ) ہے ۔ بعدازاں اسے رہن رکھ کر علیمہ خان اور ان کے بیٹے شاہ ریز نے قرضے حاصل کئے۔ اس کے لئے شاہ ریز نے اپنی والدہ کے سابق کاروباری شراکت دار کا پاور آف اٹارنی بھی استعمال کیا۔ شاہ ریز علیمہ خان اور سہیل امیر خان کے بڑے بیٹے ہیں ۔ جنوری 2018کے ریکارڈ کے مطابق شاہ ریز نے پراپرٹی کے لئے رابطہ کار کا کردار ادا کیا۔ گوکہ علیمہ خان نے دنیا کے مختلف ممالک میں پرتعیش جائدادیں خریدیں لیکن پاکستان کے اندر اپنے ٹیکس گوشواروں میں کبھی ظاہر نہیں کیا۔ انہوں نے 2011تا 2016بالترتیب 107960، 188000، 140000، 158900، 186620 اور 130794 روپے ٹیکس کی مد میں ادا کئے۔ علیمہ خان نے شوکت خانم کینسر اسپتال اور نمل کے لئے عطیاتی مہم کے سلسلے میں گزشتہ 20 سال کے دوران مختلف ممالک کے دورے کئے ۔ انہوں نے ای میل، واٹس ایپ اور ایس ایم ایس کے ذریعے رابطوں کے لئے متواتر کوششوں کا کوئی جواب نہیں دیا، البتہ ان کے دو بیٹوں، وکیل اور چند قریبی ذرائع سے بات ہوئی۔ علیمہ خان کے چھوٹے بیٹے شیرشاہ خان نے استفسار پر کہا کہ پوچھے گئے سوالات کا صرف ان کی والدہ ہی جواب دے سکتی ہیں۔ تاہم بڑے بیٹے شاہ ریز خان نے بتایا کہ ہوبوکن میں املاک کی موجودہ ملکیت کے بارے میں انہیں کوئی علم نہیں ہے۔ وہ اس نمائدنے کا رابطہ نمبر والدہ کی سابق کاروباری شراکت کار کو دے دیں گے جو جائیداد کی موجودہ صورتحال کے بارے میں بتا سکتی ہیں۔ جب شاہ ریز سے کہا گیا کہ وہ امریکا میں تو اپنی والدہ کے رابطہ کار تھے۔ ان کا موقف تھا کہ علیمہ خان نے دستاویزات کے لئے اس وقت نام دیا ہوگا لیکن اب ان کے پاس بتانے کے لئے کوئی تفصیل نہیں ہے۔ انہوں نے کہا کہ وہ کچھ عرصہ امریکا میں رہے لیکن ایک سال ہوا پاکستان واپس آگئے ہیں۔ علیمہ خان کے وکیل سلمان اکرم راجا نے کہا کہ ان کے موکل کو 30لاکھ روپے جمع کرانے کے لئے کہا گیا جو جرمانہ نہیں بلکہ ریگولرائزیشن فیس ہے۔ استفسار پر وزیراعظم کے خصوصی معاون افتخار درانی نے کہا کہ وزیراعظم اپنے رشتہ داروں کے نجی امور کے ذمہ دار نہیں ہیں۔ علیمہ خان کا نام آف شور کمپنی نیازی سروسز کے رجسٹرڈ ڈائریکٹر کی حیثیت سے بھی دیا گیا ہے۔ یہ کمپنی لندن میں عمران خان کے فلیٹ کی مالک ہے۔ دستاویزات میں اس کا ذکر نہیں ہے۔ تاہم 2001میں سابق صدر جنرل (ر) پرویز مشرف کی جاری کردہ ٹیکس ایمنسٹی اسکیم اور سالانہ گوشواروں میں اس کو ظاہر کیا گیا۔

لاہور:(نیٹ نیوز/ایمرا نیوز) مسلم لیگ (ن) کے تاحیات قائد اور سابق وزیراعظم نوازشریف نے کہا ہےکہ پنجاب کی اہل حکومت کی جگہ نااہل حکومت نے لے لی اور مسلم لیگ (ن) کے ترقیاتی کاموں پر اختلاف کرنے والے آج تعریف کررہے ہیں۔کوٹ لکھپت جیل میں ملاقات کے لیے آنے والے پارٹی رہنماؤں کے وفود سے گفتگو کرتے ہوئے میاں نوازشریف نے کہا کہ شہباز شریف کے ساتھ ناروا سلوک روا رکھا جارہا ہے، انہوں نے پنجاب میں دن رات کام کیا اور صلہ یہ ملا؟ پنجاب میں میٹرو 11 ماہ میں مکمل ہوئی اور کے پی کے میں اب بھی دھول اڑ رہی ہے۔انہوں نے کہا کہ مسلم لیگ (ن) کے ترقیاتی کاموں پر اختلاف کرنے والے آج تعریف کررہے ہیں، پنجاب کی اہل حکومت کی جگہ نااہل حکومت نے لے لی جب کہ کے پی کے کی نااہل حکومت کو دوبارہ اہل قرار دیا گیا۔ایک صحافی نے نوازشریف سے سوال کیا کہ آپ چپ کا روزہ کب توڑیں گے؟سابق وزیراعظم نے جواب دیا کہ کیسے سنے گا میری کہانی میری زبانی۔نوازشریف سے سوال کیا گیا کہ کیا آپ یا مریم نواز مارچ سے عوامی رابطہ مہم شروع کریں گے؟ اس پر انہوں نے کہا کہ یہ جیل سے باہر آنے کے بعد بتاؤں گا۔سابق وزیراعظم نے بتایا کہ جیل کے کمرے ٹھنڈے ہوتے ہیں، ہیٹر دیا گیا ہے وہ بھی اپنے مطابق چلتا ہے۔اس موقع پر جیل حکام نے کہا کہ جیل میں نواز شریف کو ہیٹر دے کر ہم نے مہربانی کی ہے، اس پر نوازشریف نے کہا کہ دیکھ لیں یہ ہیٹر دے کر میرے پر احسان کررہے ہیں۔اس دوران وفد میں شامل مسلم لیگ (ن) کے رہنما احسن اقبال نے اپنے قائد سے مکالمہ کیا کہ آپ کی گرفتاری کے بعد عوام کے پیغام آرہے ہیں، اس پر نوازشریف نے مسکراتے ہوئے تبصرہ کیا کہ کتنی دیر تک جیل میں پیغام آئیں گے۔گفتگو کے دوران ایک وکیل کی آمد ہوئی تو نوازشریف نے انہیں دیکھ کر کہا کہ تاریخوں پر تاریخیں ڈلوانے والے آگئے۔اس موقع پر خواجہ آصف نے سابق وزیراعظم سے سوال کیا کہ جیل میں بجلی نہیں جاتی؟نوازشریف نے جواب دیا کہ خواجہ صاحب، پتہ نہیں کس قسم کی بجلی آتی ہے، ہیٹر گرم نہیں ہوتا۔

بیجنگ:(نیٹ نیوز/ایمرا نیوز) نت نئے آلات اور فون خریدنے کا جنون ایک نوجوان کو عمربھر کے لیے گردے کا مریض بنا کر معذور کرگیا۔ چین سے آنے والی خبر کے مطابق ایک نوجوان نے آئی فون خریدنے کے لیے اپنا گردہ بیچا جس کے کچھ عرصے بعد وہ گردوں کی بیماری میں مبتلا ہوکر ڈائلیسِس کا محتاج ہوکر رہ گیا ہے۔آٹھ سال قبل چینی نوجوان ژیاؤ وینگ کی عمر 17 برس تھی جب آئی فون فور ریلیز ہوا اور اس غریب نوجوان نے اسے خریدنے کے لیے بلیک مارکیٹ میں اپنا گردہ فروخت کیا تھا۔ اس کے بعد سے وہ آٹھ برس سے گردے کے مریض ہوچکے ہیں اور ڈائلیسِس مشین سے اپنا خون صاف کروارہے ہیں۔

2011 میں آئی فون فور کا شہرہ تھا جو اسٹیٹس کی علامت بن چکا تھا۔ تاہم یہ فون اسکول کے ایک غریب طالب علم ژیاؤ وینگ کی پہنچ سے باہر تھا جس کے بعد اس نے گردہ بیچ کر فون خریدنے کا فیصلہ کیا۔ انسانی اعضا کے ایک اسمگلر کے ہاتھوں اس نے 3200 ڈالر میں اپنا صحت مند عضو فروخت کردیا لیکن اس کے بعد اس کی زندگی تباہ ہوکر رہ گئی ۔اسے کہا گیا کہ تھا کہ وہ ایک گردے پر زندہ رہ سکتا ہے لیکن گردہ فروش اسمگلر اسےجہاں لے گئے وہاں کے غیرقانونی آپریشن تھیئٹر میں صفائی کا انتظام نہ تھا اور اس کے زخم میں انفیکشن ہوگیا ۔ وینگ نے یہ خبر گھر والوں کو نہیں دی تھی اور یہ ہوا کہ آخر کار اس کی خراب صحت سب کے سامنے عیاں ہوگئی۔انفیکشن پھیل کر اس کے دوسرے گردے کو متاثر کرگیا اور وہ مستقل ڈائلائسِس کا محتاج ہوچکا ہے۔ لیکن کمزوری کی وجہ سے وہ بستر سے اٹھ بھی نہیں سکتا اور بہت مشکل سے دوچار ہے۔ تاہم اس کے والدین نے گردے فروخت کرنے میں معاون مڈل مین کو تلاش کرکے اس پر مقدمہ کردیا جس نے 3 لاکھ 20 ہزار ڈالر ہرجانے کے طور پر دیئے جو اب اس نوجوان کے علاج پر خرچ ہورہے ہیں۔چینی سوشل میڈیا پر یہ خبر آنے کے بعد لوگوں نے زیادہ تر اس نوجوان کو قصور وار ٹھہرایا ہے ۔ ان کا کہنا ہے کہ انسانی اعضا برقی مصنوعات سے زیادہ اہم ہوتے ہیں جن کی قدر کی جانی چاہیے۔

کراچی:(سپورٹس ڈیسک/ایمرا نیوز) پاکستان کرکٹ بورڈ کے چیئرمین احسان مانی نے کرکٹ کمیٹی کے سربراہ محسن خان کو لاہور طلب کرلیا ہے۔پاکستان کرکٹ بورڈ کے چیئرمین احسان مانی اور کرکٹ کمیٹی کے سربراہ محسن خان کے درمیان جمعے کو لاہور میں ہونے والی ملاقات میں پاکستان ٹیم کی دورہ جنوبی افریقا میں کارکردگی،ڈومیسٹک کرکٹ اور دیگر اہم معاملات پر تبادلہ خیال کیا جائے گا۔واضح رہے کہ قومی ٹیم کی ناقص کارکردگی کے سبب ان دنوں بورڈ پر خاصا دباؤ ہے،البتہ فوری طور پر کسی بڑے فیصلے کا امکان نہیں ہے، محسن خان نے تصدیق کی کہ جمعے کو چیئرمین بورڈ سے ملاقات ہو گی البتہ یہ بتانے سے گریز کیا کہ اس دوران کیا بات ہونی ہے۔

لاہور(نیٹ نیوز/ایمرا نیوز) بلڈ پریشر ایک ایسا مرض بن چکا ہےجس کا آج کل ہر شخص شکار نظر آتا ہے، اس کی وجہ کھانے پینے میں بے اعتدالی، ورزش کی کمی اور ذہنی تناؤ ہے۔

اکثر لوگ اپنی تیز رفتار زندگی میں ان باتوں کا خیال نہیں رکھتے اور بلڈ پریشر کا شکار ہوجاتے ہیں پھر اس کو کنٹرول میں کرنے کے لیےمختلف ادویات کا استعمال کرتے ہیں جس سے مزید امراض لاحق ہونے کا خدشہ ہوتا ہے۔ماہرین طبی نے بلڈ پریشر کو کنٹرول میں رکھنے کا انتہائی آسان اور گھریلو نسخہ بتایا ہے۔ ان کا کہنا ہے کہ بلڈ پریشر کے مرض میں مبتلا افراد ’لہسن‘ کا باقاعدگی سے استعمال کریں کیونکہ لہسن کولیسٹرول اور خون کو گاڑھا کر نے والے چکنے مادے کو کم کرتا ہے اور خون کو پتلا بھی کرتا ہے۔ماہرین کا یہ بھی کہنا ہے کہ لہسن میں شامل اجزاء ہائی کولیسٹرول اور ہائی بلڈپریشر کا علاج کرتے ہیں اور شریانوں میں پلیٹلیٹس کو جمع ہونے سےروکتے ہیں۔ اس کے علاوہ لہسن کا کام دل پر زیادہ خون کے پریشر سے بڑھنے والے اثرات کو روکنا بھی ہے، صرف یہی نہیں بلکہ لہسن کا استعمال اور بھی دیگر بیماریوں سے محفوظ رکھتاہے۔بلڈ پریشر میں کمی کے لیے مختلف طریقوں سے لہسن کا استعمال کیا جاسکتا ہےجیسے کہ:
ثابت لہسن:

تازہ اور ثابت لہسن کا ایک جوا روزانہ صبح نہار منہ یا دن میں کسی بھی وقت چبالینے سے بلڈ پریشر کنٹرول میں رہتا ہے۔ ماہرین کا کہنا ہے کہ نہار منہ لہسن کا استعمال زیادہ فائدہ مند ثابت ہوسکتا ہے۔
لہسن پائوڈر:

روزانہ کی بنیاد پر 600 سے 900 ملی گرام لہسن کے پائوڈر کا استعمال بلڈ پریشر کو 9 سے 12 فیصد تک کم کرسکتا ہے۔
سلاد:

اس کے علاوہ ماہرین کا کہنا ہے کہ سلاد کے طور پر بھی لہسن کا استعمال کیا جاسکتا ہے یہ بھی بلڈ پریشر کو کم یا کنٹرول کرنے میں مددگار ثابت ہوسکتا ہے۔
لہسن کا دودھ:

ماہرین طبی نےبلڈ پریشر کے علاوہ دیگر بیماریوں سے خود کو محفوظ رکھنے کے لیے لہسن کا دودھ پینے کا مشورہ دیا ہے جبکہ اس کے بنانے کا طریقہ یہ ہے کہ 10 سے 12 لہسن کی پھانکیں لیں اور ان کو پیس لیں پھر تیز گرم دودھ میں وہ شامل کردیں اور پی لیں۔

ممبئی(شوبز ڈیسک/ایمرا نیوز) بھارتی اداکارہ ملائیکہ اروڑا اور ارجن کپورکی دوستی محبت میں بدل گئی ہے جبکہ ان کے درمیان بڑھتی قربتیں ارجن کپورکے اہل خانہ اور خصوصاً اُن کے والد بونی کپور اور سلمان خان کا رشتہ متاثر کر رہی ہیں۔بالی ووڈ اداکار ارباز خان کی سابقہ اہلیہ اور سلمان خان کی سابقہ بھابھی ملائیکہ اروڑا اور ارجن کپور گزشتہ کئی سالوں سے ایک ساتھ نظر آرہے تھے لیکن دونوں کا یہی کہنا تھاکہ اُن کے درمیان صرف دوستی ہے۔ البتہ دونوں اداکاروں کی جانب سے اب اس بات کا اعتراف کرلیا گیا ہے کہ وہ ایک دوسرے سے محبت کرتے ہیں۔

ملائیکہ اروڑا اور ارجن کپور کی محبت بونی کپور اور اُن کے قریبی ساتھی سلمان خان کے درمیان اختلافات پیدا کررہی ہے اور اسی لیے سلمان خان نے بونی کپور کے اپنے گھر آنے پر پابندی بھی عائد کردی ہے۔ دبنگ اداکار سلمان خان کے قریبی ذرائع نے میڈیا کو بتایا کہ فلم غنڈےکے اداکار ارجن کپور ملائیکہ اروڑا سے قبل سلمان خان کی بہن ارپیتا خان سے محبت کرتے تھے لیکن پھر کچھ عرصے میں وہ دونوں الگ ہوگئے جس کے بعد ارجن نے ملائیکہ کی جانب دوستی کا ہاتھ بڑھایا اور بعداز یہ دوستی محبت میں تبدیل ہوگئی۔

ذرائع کا یہ بھی کہنا ہے کہ ملائیکہ اور ارباز خان کی طلاق کی وجہ بھی ان دونوں کی بے حد دوستی تھی۔ ان تمام وجوہات کے سبب ہی سلمان خان نے پہلے ارجن کپور کے اپنے گھر آنے پر پابندی عائد کی اور اب انہوں نے بونی کپور پر بھی اپنے گھر کے دروازے بند کرلیے ہیں۔ اس کے علاوہ میڈیا رپورٹس کا یہ بھی کہنا ہے کہ سلمان خان نے ارجن کپور کے رویے اور ان کی حرکتوں کو دیکھتے ہوئے نا صرف ان کو اپنے گھر آنے جانے سے منع کیا بلکہ تمام فلم سازوں سے بھی یہ کہہ دیا کہ وہ ارجن کو اپنی کسی بھی فلم میں کاسٹ نہ کریں سلمان خان کے اس اقدام کے بعد ارجن کپور نے انہیں یقین دلایا کہ وہ اُن کے گھر والوں کو کسی قسم کا نقصان نہیں پہنچائیں گے اور ان پر سے یہ پابندی ختم کی جائے۔

وائٹ ہاؤس(نیٹ نیوز/ایمرا نیوز) میکسیکو کی سرحد پر دیوار کے لیے فنڈنگ سے انکار پر صدر ٹرمپ برہم ہوگئے اور ۔ ڈیموکریٹس کے ساتھ بات چیت چھوڑ کر اچانک اٹھ کر چلے گئے۔ڈیموکریٹ قائد چک شومر نے صدر ٹرمپ سے وائٹ ہاؤس میں ملاقات کی مگر وہ رقم نہ دینے کے فیصلے کو تبدیل کرنے پر راضی نہیں ہوئے۔اس ملاقات کے بعد صدر ٹرمپ نے ٹوئٹر پر اپنے پیغامات میں کہا کہ انہوں نے اہم ڈیموکریٹ رہنماؤں کوخدا حافظ کہہ آیا، کوئی اور بات کرنے کا فائدہ نہیں تھا۔ یہ ملاقات مکمل طور پر ان کا وقت ضائع کرنے کے مترادف ثابت ہوئی۔انیس روز گزرنے کے باوجود حکومتی شٹ ڈاؤن کا خاتمے کے آثار نہیں،دیوار بنانے کی حمایت میں ٹرمپ کے بڑے بیٹے نے تارکین وطن کو جانوروں سے تشبیہ دے دی۔اس سےقبل امریکی صدربھی تارکین وطن کوجانوروں سے تشبیہ دے چکے ہیں ، ٹرمپ کے دور حکومت کے دوران یہ تیسرا شٹ ڈاؤن ہے ،اگر کل تک شٹ ڈاؤن برقرار رہا تو آٹھ لاکھ ملازمین اپنی تنخواہ سے محروم ہوجائیں گے۔

ممبئی(شوبز ڈیسک/ایمرا نیوز) بالی ووڈ کے ‘منا بھائی ایک بار پھر مداحوں میں ہنسی اور قہقہے بانٹنے آرہے ہیں۔بھارتی میڈیا رپورٹس کے مطابق ارشد وارثی نے منا بھائی 3 کی تیسری فلم کے اسکرپٹ مکمل ہونے کی تصدیق کردی ہے۔ایک انٹرویو میں ارشد وارثی کا کہنا تھا کہ ’فلم کا اسکرپٹ بہت حد تک مکمل ہوچکا ہے، راج کمار ہیرانی نے مجھے بتایا تھا کہ فلم کی شوٹنگ کا آغاز رواں سال ہی ہوگا۔اداکار نے فلم میں کرداروں سے متعلق کہا کہ فلم میں ابھی اپنے اور سنجے دت کے حتمی طور شامل ہونے کا علم ہے۔

2003 اور پھر 2006 میں ریلیز ہونے والی منا بھائی سیریز کی تیسری فلم سے متعلق کافی عرصے سے قیاس آرائیاں جاری تھیں لیکن کسی نہ کسی وجہ سے معاملہ ٹلتا رہا۔ پہلے فلم کے ہدایتکار راجکمار ہیرانی ’’تھری ایڈیٹس‘‘ اور پھر’ ’پی کے‘‘ جیسی فلموں میں مصروف ہو گئے جس کے بعد فلم کے اہم اداکار سنجے دت کو 1993 ممبئی بم دھماکے سے متعلق ایک معاملے میں جیل جانا پڑا جس سے فلم سازی میں تاخیر ہوتی چلی گئی۔یاد رہے کہ منا بھائی ایم بی بی ایس 2003 میں ریلیز ہوئی تھی جس کے بعد اس کا سیکوئل ’لگے رہو منا بھائی‘ 2006 میں ریلیز کی گئی تھی۔

اسلام آباد(نیٹ نیوز/ایمرا نیوز) مشیر اطلاعات مرتضیٰ وہاب نے کہا ہے کہ اسٹیٹ بینک کی رپورٹ کے مطابق پی ٹی آئی کے 18خفیہ اکاؤنٹ ہیں، یہ اکاؤنٹ اپنے پارٹی اثاثوں میں ظاہر نہیں کیے گئے مگر اکاونٹس پر دستخط کرنے والے اعلیٰ حکومتی عہدوں پر ہیں۔مشیر اطلاعات مرتضیٰ وہاب نےسندھ اسمبلی میں میڈیاسے گفتگو کرتے ہوئے کہا کہ گزشتہ چند ماہ میں آف شور کمپنی کا شور مچا، جب تحریک انصاف کی آف شور کمپنیاں نکلیں تو یہ خاموش ہوگئے۔انہوں نے کہا کہ یہ ہماری لیڈرشپ پر الزامات لگاتے تھے،تحریک انصاف فارن فنڈنگ کیس کو دبانے کی کوشش کرتی رہی ہے۔