Tag bol

کراچی (سپورٹس ڈیسک/ایمرا نیوز) پاکستانی ٹیم کے ہیڈ کوچ مکی آرتھر کا کہنا ہے کہ مسلسل کرکٹ اور تھکاوٹ کی وجہ سے ٹیسٹ سیریز میں بولروں کی کارکردگی متاثر ہوئی ہے۔ فہیم اشرف اس کلاس کا آل رائونڈر نہیں ہے کہ ساتویں نمبر پر بیٹنگ لائن کو سنبھا ل سکے۔ غیر ملکی ویب سائٹ کو انٹرویو میں مکی آرتھر نے کہا کہ جوہانسبرگ ٹیسٹ میں پانچ بولروں کے ساتھ میدان میں اترسکتے ہیں۔ اگر لیگ اسپنر شاداب خان انجری کا شکار نہ ہوتے تو پہلے پانچ بولروں کو کھلاتے ۔ مکی کا کہنا تھا کہ فہیم اچھے کھلاڑی ہیں لیکن وہ ایک مکمل آل راؤنڈر نہیں اور انہیں ساتویں نمبر پر کھلانے سے ہماری بیٹنگ مزید مشکلات کا شکار ہو جاتی۔ یاسر شاہ سمیت چار بولروں کو کھلانے کی حکمت عملی ناکام ہوئی ، یاسر شاہ کی ناکامی کے سبب فاسٹ بولروں پر انتہا سے زیادہ بوجھ پڑ گیا اور نتیجے میں ان کی رفتار میں کمی واقع ہونے سے افادیت ماند پڑ گئی ۔ اس صورتحال سے نمٹنے کے لیے کپتان سرفراز کو شان مسعود اور اسد شفیق سے بھی بولنگ کرانی پڑی۔ یاسر شاہ ایک بہترین بولر اورمیچ ونر ہیں اور اگر ہم میچ کو چوتھے یا پانچویں دن تک لے جانے میں کامیاب ہوتے تو لیگ اسپنر اہم کردار ادا کرتے لیکن ایسا نہیں کرپارہے، اس مسئلے کا حل ڈھونڈنا ہے۔ان کا کہنا تھا کہ جنوبی افریقا میں پہلی مرتبہ کھیلنے کی وجہ سے فخرزمان کو شارٹ گیندوں پر مشکلات کا سامنا ہے۔ فخر نے ڈیبیو ٹیسٹ اور اس کے بعد عمدہ کارکردگی کے ذریعے اپنا لوہا منواہا اور اسی بنیاد پر انہیں ٹیم کا حصہ بنایا گیا تھا۔ مکی آرتھر نے قومی ٹیم کے ڈریسنگ روم کے ماحول کو خوشگوار قرار دیتے ہوئے ٹیم میں کسی بھی قسم کے اختلافات کی تردید کی اور کہا کہ میچ کے تیسرے دن پاکستانی بیٹنگ اس بات کا ثبوت ہے۔ اگر ڈریسنگ روم کا ماحول خراب ہوتا تو یہی ٹیم تقریباً 170 رنز پر ڈھیر ہو جاتی لیکن ہم دن کے آخر تک کھیلے جس سے ہمیں دورے کے بقیہ میچوں کے لیے بہت حوصلہ ملا ہے۔

اسلام آباد(نیٹ نیوز/ایمرا نیوز) اسحاق ڈار کی وطن واپسی سے متعلق کیس کی سماعت کے دوران چیف جسٹس نے ریمارکس دیئے کہ نیب ابھی تک اسحاق ڈار کو واپس نہیں لاسکا، معلوم نہیں اسحاق ڈار کب تک وہاں بیٹھے رہیں گے۔سپریم کورٹ میں سابق وزیر خزانہ اسحاق ڈار کی وطن واپسی سے متعلق کیس کی سماعت چیف جسٹس پاکستان ثاقب نثار نے کی۔
دوران سماعت چیف جسٹس نے استفسار کیا کہ اسحاق ڈار ابھی تک واپس نہیں آئے؟
نیب کے وکیل جہانزیب بھروانہنے عدلات کو بتایا کہ اسحاق ڈار کی واپسی کے ایکسٹرا ڈیشن کا عمل شروع ہے، ان کی جائیداد ضبط کرلی گئی ہے۔اس پر جسٹس اعجاز الاحسن نے ریمارکس دیئے کہ اسحاق ڈار کی جائیداد ضبط کرنے کے معاملے کو 2 ماہ گزرچکے ہیں،بظاہر لگتا ہے خط وکتابت ہورہی ہے۔جہانزیب بھروانہ نے کہا کہ برطانیہ کی حکومت کے خط کا جواب دے دیا ہے۔چیف جسٹس پاکستان نے کہا کہ اسحاق ڈار کی واپسی سے متعلق کوئی پیشرفت نہیں ہوئی،کیا پی ٹی وی کیس میں اسحاق ڈار،پرویزرشید اورعطاءالحق قاسمی سےریکوری ہوئی؟پرنسپل انفارمیشن آفیسر نے جواب میں کہا کہ ریکوری کی مدت2 ماہ ہوتی ہے،یہ مدت ابھی تک ختم نہیں ہوئی۔چیف جسٹس نے اسحاق ڈار کی وطن واپسی سے متعلق کیس کی سماعت ایک ماہ کیلئے ملتوی کرتے ہوئے کہا کہمعلوم نہیں اسحاق ڈار کب تک وہاں بیٹھے رہیں گے۔

کراچی(نیٹ نیوز/ایمرا نیوز) کراچی کے معروف اردو بازار کو آج رات تک دکانیں خالی کرنے کے نوٹس جاری ہوئے ہیں،اردو بازار کے دکانداروں نے بلدیہ عظمیٰ کراچی کے اس اقدام کے خلاف احتجاج کیا ہے۔مظاہرین کا کہنا ہے کہ تجاوزات کے خلاف آپریشن پر کے ایم سی کی جانب سے دکانیں خالی کرانے کے احکامات دیے گئے ہیں جو غیر قانونی ہے ۔کراچی میں اردو بازار مارکیٹ ایسوسی ایشن اور بک سیلرز ایسوسی ایشن نے بلدیہ عظمیٰ کراچی کے خلاف احتجاج کیا۔مظاہرین کا کہنا ہے کہ اردو بازار ایک کاروبار نہیں ثقافتی ورثہ ہے، جہاں برسوں سے کاروبار جاری ہے، دکانداروں کو غیر قانونی بے داخلی سے روکا جائے۔مظاہرین نے مزید کہا کہ یہ قانونی طریقے سے قائم بازار ہے یہاں پر کسی قسم کی تجاوزات نہیں ہیں۔دوسری جانب کے ایم سی حکام کے مطابق اردو بازار نالے پر قائم ہے، دکانداروں کو تین دن میں دکانیں خالی کرانے کے احکامات دئیے گئے ہیں۔

اسلام آباد(نیٹ نیوز/ایمرا نیوز)سپریم کورٹ نے جعلی بینک اکاؤنٹس کا کیس نیب کے حوالے کرتے ہوئے کیس کی ازسرنو تفتیش کا حکم جاری کردیا ہے اور نیب کو ہدایت کی ہے کہ دوماہ میں اس معاملے کی تحقیقات مکمل کرکے عدالت کورپورٹ پیش کی جائے جبکہ پیپلز پارٹی کے چیئرمین بلاول بھٹو اور وزیر اعلی سندھ مراد علی شاہ کا نام ای سی ایل اور جے آئی ٹی سے نکالنے کا حکم دیتے ہوئے قرار دیا ہے کہ جےآئی ٹی کاوہ حصہ حذف کردیں ، جس میں بلاول کانام ہے‘ نیب چاہے تو دونوں کو الگ الگ طلب کرکے ان سے آزادانہ طور پر تحقیقات کر سکتا ہے، عدالت نے کہاکہ بلاول اور مراد علی شاہ کا نام سیاسی پوائنٹ اسکورنگ کیلئے ڈالا گیا، کیا کسی کا دبائو تھا؟ بلاول تو اپنی ماں کا مشن آگے بڑھا رہاہے ‘کاروبارمیں امی اور پھپھو کا کردارہوسکتاہے اس کا نہیں‘عدالت نے قرار دیاہے کہ مزید تحقیقات کے دوران جے آئی ٹی اپنا بقیہ کام مکمل کرے اور اگر کسی کے خلاف کوئیریفرنس بنتا ہے تو بنائے‘دیکھناہے اومنی گروپ کا سیاستدانوں سے گٹھ جوڑہےیانہیں، عدالت نے فاروق ایچ نائیک اور اٹارنی جنرل کے بھائی عاصم منصور کا نام بھی ای سی ایل سے نکالنے کا حکم جاری کیا ہے ،چیف جسٹس میاں ثاقب نثار نے ریمارکس دیئے ہیں کہ بنکوں میں جعلی اکائونٹ آخر فرشتوں نے تو نہیں کھولے ہوں گے ؟کوئی توان کے پیچھے ہے؟ بینکوں کو ضم کرنے کا مقصد معاملے پر مٹی ڈالنا ہے ‘اومنی گروپ کے خلاف اتنا موادآچکاہے کہ کوئی آنکھیں بند نہیں کرسکتااس لئے عدالت معاملہ نیب کو بھیج رہی ہے تاکہ حقائق سامنے لائے جاسکیں‘ یہ امربالکل واضح ہے کہ ہم اس مقدمے کو اپنے منطقی انجام تک پہنچائیں گے، تاہم جے آئی ٹی کو وضاحت دینا پڑے گی کہ اس نے بلاول بھٹوزرداری کو اس معاملے میں کیوں ملوث کیا ؟چیف جسٹس کی سربراہی میں جسٹس فیصل عرب اور جسٹس اعجاز الاحسن پر مشتمل تین رکنی بنچ نے سوموار کے رورز کیس کی سماعت کی‘اٹارنی جنرل نے عدالت کو بتایا کہ ای سی ایل میں درج ناموں پرغور کیلئے جائزہ کمیٹی کا اجلاس 10 جنوری کو بلایا گیا ہے جس میں ہرکیس کا الگ الگ جائزہ لیا جائے گا، چیف جسٹس نے ان سے کہا کہ یہ اچھا ہوا ہے،چیف جسٹس نے کہاکہ اومنی گروپ کے خلاف اتنا مواد آ چکا ہے کہ کوئی آنکھیں بند نہیں کر سکتا، اوپر سے چینی کی بوریاں بھی اٹھالی گئیں، یہ بتائیں کہ معاملہ اب کس کورٹ کو بھیجیں؟چیف جسٹس نے جے آئی ٹی کے وکیل فیصل صدیقی سے استفسار کیا کہ جے آئی ٹی نے بلاول بھٹو کو اس معاملے میں کیوں ملوث کیا ہے ، اس معصوم نے پاکستان میں آکر ایسا کیا کردیا ہے‘ آپ کو ایک بات کا جواب تو ضرور دینا پڑے گا کہ بلاول بھٹو کا نام ای سی ایل میں کیوں شامل کیا گیا ہے؟ وہ تو معصوم بچہ تھا، کیا جے آئی ٹی نے بلاول زرداری کو بدنام کرنےکیلئے انہیں معاملے میں شامل کیا ہے یا کسی کے کہنے پر انہیں شامل کیا ہے؟جے آئی ٹی بلاول پر مطمئن کرے،جس پر جے آئے ٹی کے وکیل فیصل صدیقی نے بتایا کہ ʼجے آئی ٹی رپورٹ کے صفحہ 57 پر پارک لین کی ایک پراپرٹی کا ذکر ہے، جسے جعلی اکائونٹ سے خریدا گیا اور اس جائیداد میں بلاول بھٹو کے 25 فیصد شیئر ہیں، چیف جسٹس نے ریمارکس دیئے کہ ʼاگر شیئر ہیں تو کیسے ثابت ہوا کہ بلاول نے کوئی جرم کیا ہے؟ جائیداد کو منجمد کر دیتے ہیں لیکن اس بنیاد پر بلاول کا نام ای سی ایل میں نہیں ڈالا جا سکتا ، ایڈووکیٹ جنرل سندھ نے کہا کہ وزیراعلی سندھ مراد علی شاہ کو شامل تفتیش کیے بغیر ان کا نام ای سی ایل میں ڈال دیا گیاہے ،جس پر چیف جسٹس نے ریمارکس دیئے کہ مراد علی شاہ کی عزت نفس مجروح کی جا رہی ہے، دیکھ تو لیتے کہ وہ ایک صوبے کے وزیراعلیٰ ہیں، کس ملک میں ایسا ہوتا ہے کہ ملک کے دوسرے بڑے صوبے کے وزیراعلی کا نام ای سی ایل میں ڈالا جائے؟جسٹس اعجاز الاحسن نے ریمارکس دیے کہ جے آئی ٹی کی سفارشات کو منظور کرنے کا فیصلہ عدالت نے کرنا ہے،جبکہ چیف جسٹس نے ریمارکس دیے کہ عدالت جے آئی ٹی رپورٹ کی پابند نہیں، جرم بنتا ہے یا نہیں؟ یہ فیصلہ عدالت کرے گی،دوران سماعت بحریہ ٹائون کی جانب سے وکلاء کی ایک بڑی ٹیم پیش ہوئی تو چیف جسٹس نے ریمارکس دیے کہ کیا یہ طریقہ کار ہے کہ ایک بڑے آدمی کو بچانے کے لیے ساری ٹیم ہی آجاتی ہے،مجبورنہ کریں کہ عملدرآمدبنچ بنادیں۔ جسٹس اعجازالاحسن نے کہا کہ اومنی گروپ نے کاغذوں میں ٹریکٹر خریدے، کاغذوں میں خرید کر اربوں روپے سبسڈی کے حاصل کیے ہیں، چیف جسٹس نے ریمارکس دیے کہ کہا جا رہا تھا الیکشن نہیں ہوں گے، ہم نے پہلے ہی کہہ دیا تھا ایک منٹ کی تاخیر نہیں ہو گی، ہم نے پہلے ہی کہہ دیا تھا جمہوریت نہ رہی تو ہم نہیں رہیں گے‘ شہریوں کے بنیادی حقوق بھی اسی جمہوریت کے مرہون منت ہیں‘ہم کسی صورت بھی جمہوریت کو ڈی ریل نہیں ہونے دیں گے ۔دریں اثناءجسٹس شیخ عظمت سعید کی سربراہی میں جسٹس فیصل عرب اور جسٹس منیب اختر پر مشتمل تین رکنی عملدرآمد بنچ نے کیس کی سماعت کے دوران آئندہ سماعت پر ڈی جی نیب کراچی ،پراسکیوٹر جنرل نیب ،اور سپارکو کے ڈی جی کو عدالت میں ذاتی طور پر پیش ہونے کا حکم جاری کرتے ہوئے قرار دیا ہے کہ نیب آئندہ سماعت پر تفتیش میں اب تک ہونے والی پیشرفت رپورٹ جبکہ ڈی جی سپارکو بحریہ ٹائون کراچی کی اراضی سے متعلق سیٹلائٹ نقشے پیش کرے جبکہ جسٹس شیخ عظمت سعید نے ریمارکس دیے ہیں کہ عدالتی حکم پر عدم عملدرآمد پر کیوں نہ ڈی جی نیب کراچی ،پراسکیوٹر جنرل نیب ،اور ڈی جی سپارکو کو توہین عدالت میں شوکاز کے نوٹسز جاری کردیئے جائیں ،عدالت نے تخت پڑی کے جنگلات کی اراضی کی واپسی سے متعلق کیس میں کمشنر راولپنڈی ڈویژن کو بھی آئندہ سماعت پر پیش ہوکر رپورٹ پیش کرنے کا حکم جاری کردیا ان مقدمات کی سماعت بدھ 9جنوری تک ملتوی کردی ۔

اسلام آباد مہتاب (نیٹ نیوز/ایمرا نیوز) ملک کے ٹیکس نظام کو آسان بنانے کادعویٰ کرکے متوقع منی بجٹ میں بڑی گاڑیو ں، مہنگے فون اور سگریٹ کے سلیب اگلے سلیب میں منتقل کرکے سینکڑوں اشیاءپر ٹیکس بڑھایا جارہا ہے جس کا مقصد ملک کی بڑھتی ہو ئے برآمدات کے دباؤ کا مقابلہ کرنا ہے۔فائنانس ڈوژن کے اعلیٰ افسر کے مطابق وزارت کامرس اور ایف بی آر کو کہا گیا ہے کہ بغیر اشیاء کا نام لئے ایسی اشیاء کی فہرست بنا کر منصوبہ پیش کیا جائے جس سے مہنگی اشیاء کے سلیپ تبدیل کرکے برآمداتی دباؤ کے شکار ٹیکس نظام کو بہتر بنایا جائے، زرارئع کے مطابق گزشتہ ہفتے وفاقی وزیرخزانہ اسد عمر کی صدارت میں وزارت کے کیو(Q) بلاک میں افسران سے ٹیکسیشن نظام میں آسانیاں لانے کے لئے سفارشات طلب کی تھیں، اس سلسلے میں سفارشات میں کہا گیا ہے کہ 1600CCاور اس سے بڑی گاڑیوں کے برآمدگی ٹیکس میں دس سے بیس فیصد بڑھایا جائے، اس کے علاوہ مہنگے فون (آئی فون) کے ٹیکس میں بھی اضافہ کیا جائے اس کے علاوہ ورلڈ ہیلتھ آرگنائزیشن کی شرائط کے تحت سیگریٹ کے نرخوں میں اضافہ کیا جائے گا۔اس وقت ایف بی آر کو 160سے170ارب روپئے ٹیکس وصولی میں خسارے کا سامنا رہا ہے اور اسی طرز کے ٹیکس نظام میں یہ مشکل نہیں بلکہ ناممکن ہے کہ موجودہ مالی سال کے بارے میں 4398ارب روپئے کا حدف حاصل کیا جاسکے،اس کے علاوہ سینکڑوں اشیاء کے سلیب کو اگلے سلیب میں ڈال کر ٹیکس میں اضافہ کیا جاسکے۔اورسیز انٹرنیشنل چیمبر آف کامرس اینڈ انڈسٹریز (OICCI)نے بھی منی بجٹ او ر اگلے مالی سال کے بجٹ کےلئے سفارشات بھیجی ہیںجس میں وزیر مملکت ریوینیو حماد اظہر سے مطابلہ کیا ہے کہ ٹیکس وصولی کے نظام میں موجود پیچیدگیا ختم کرکے آسان بنایا جائے سپر ٹیکس کا خاتمہ کیا جائے۔

اسلام آباد(نیٹ نیوز/ایمرا نیوز) منشیات کے خلاف مہم چلانے والے وزیر مملکت داخلہ شہر یار آفریدی کے بھتیجےکی گزشتہ ماہ منشیات سمیت گرفتاری کا انکشاف سامنے آیا ہے، پولیس نے ملزم طلال نادر آفریدی اور اس کے دو ساتھیوں کے خلاف دسمبر میں ایف آئی آر درج کر کے انہیں جیل بھیج دیا تھا۔طلال نادر آفریدی پر 11 دسمبر 2018 کو تھانہ جنڈ اٹک میں مقدمہ درج کیا گیا ،جس کی تفصیلات اب سامنے آئی ہیں، مقدمہ کی درج شدہ ایف آئی آر کے مطابق ایک مشکوک گاڑی کو روکنے کی کوشش کی گئی تو ملزمان نے گاڑی بھگا دی ۔پولیس نے گاڑی کا تعاقب کیا اور روک کر تلاشی لی تو اس میں سے آدھا کلو گرام سے زائد چرس برآمد ہوئی ، ملزمان میں سے ایک طلال نادر آفریدی نے اپنا حالیہ پتہ منسٹر کالونی اسلام آباد لکھوایا۔ذرائع کا کہنا ہے کہ طلال نادر آفریدی وزیر مملکت داخلہ شہر یار آفریدی کا بھتیجا ہے ، تھانہ جنڈ کے تفتیشی افسر محمد رمضان نے بتایا کہ ملزمان کو گرفتار کرکے جیل بھیج دیا گیا تھا ۔ذرائع کا کہنا ہے کہ طلال نادر آفریدی کو ضمانت پر جیل سے رہا کر دیا گیا ہے ، منشیات کے الزام میں طلال نادر آفریدی کی گرفتاری پر رد عمل میں وزارت داخلہ نے میڈیا سے بات کرتے ہوئے بتایا کہ وزیر اعظم کرپشن، دہشت گردی، قبضہ مافیا اور ڈرگ مافیا کے خلاف جنگ لڑ رہے ہیں ۔وزارت داخلہ کاکہنا تھا کہ وزیر مملکت داخلہ شہریار آفریدی اس جنگ میں صف اول کا کردار ادا کررہے ہیں ، قانون کے سامنے کوئی وزیر، مشیر یا تحریک انصاف کے کارکن سب برابر ہیں ، کوئی وزیر ہو یا اس کا رشتہ دار، قانون اپنا راستہ خود بنائے گا ۔

اسلام آباد(نیٹ نیوز/ایمرا نیوز) وفاقی وزیراطلاعات فواد چوہدری کا کہنا ہے کہ سپریم کورٹ کے حکم پر پیپلز پارٹی کے چیئرمین بلاول بھٹو زرداری اور وزیراعلیٰ سندھ مراد علی شاہ کا نام ای سی ایل اور جے آئی ٹی سے نکال دیا جائے گا لیکن دونوں کو تفتیش میں کوئی استثنا نہیں ملے گا۔وفاقی وزیراطلاعات فواد چوہدری نے وزیراعظم کے معاون خصوصی شہزاد اکبر کے ہمراہ پریس کانفرنس کرتے ہوئے بتایا کہ سپریم کورٹ نے حکم دیا ہے کہ جے آئی ٹی نیب کی معاونت کرے گی۔فواد چوہدری کا کہنا تھا کہ ای سی ایل میں نام عہدوں پر نہیں کردار کی بنیاد پر ڈالے جاتے ہیں، وہ مراد علی شاہ کے استعفے سے متعلق اپنے مطالبے پر قائم ہیں۔انہوں نے کہا کہ ٹھگز آف پاکستان میں ان کا اہم کردار ہے، اومنی گروپ کے مالک و مختار آصف علی زرداری ہیں، ان کا مزید کہنا تھا کہ وعدہ کیا تھا کہ بڑے چور جیل میں ملیں گے، اس ٹاسک میں 90 فیصد کامیابی ملی ہے، باقی 10 فیصد بھی جلد ملے گی۔شہزاد اکبر کا کہنا تھا کہ جے آئی ٹی نے اپنی رپورٹ میں جتنے بھی الزامات لگائے ہیں اور جن پر لگائے ہیں اُن سب کا جواب دینا ہو گا، اب نیب ایکٹ کے تحت براہ راست تفتیش شروع ہوگئی ہے،جے آئی ٹی نیب کی معاونت کرے گی۔

لاہور(نیٹ نیوز/ایمرا نیوز) پنجاب حکومت نے شدید دھند اور سردی کے باعث نجی اور سرکاری تعلیمی اداروں میں چھٹیاں 15جنوری تک بڑھانے کا اعلان کیا ہے۔حکومت پنجاب کی جانب سے جاری اعلامیہ کے مطابق موسم سرما کی چھٹیوں میں توسیع کا فیصلہ موسمی حالات کے پیش نظر کیا گیا ہے۔اعلامیہ میں بتایا گیا ہے کہ تعلیمی اداروں میں موسم سرما کی چھٹیاں شدید دھند اور سردی کے باعث 6جنوری سے 15جنوری تک بڑھائی جارہی ہیں۔چھٹیوں میں توسیع کا نوٹیفکیشن سیکریٹری اسکول ایجوکیشن کی طرف سے جاری کیا گیا ہے ۔

کوالا لمپور (نیٹ نیوز/ایمرا نیوز) روسی حسینہ سے عشق یا شادی؟ ملائیشین بادشاہ تخت سے دستبردارہوگئے، 1957 میں برطانیہ سے آزادی کے بعد پہلی مرتبہ مسلم اکثریتی ملک ملائیشیا کےبادشاہ سلطان محمد اپنے عہدے سے دستبردار ہوئے ہیں۔ فرانسیسی خبررساں ادارے اے ایف پی کی رپورٹ کے مطابق سلطان محمد پنجم کا اقدام نومبر کے آغاز میں 2 ماہ کی طبی رخصت کے بعد سامنے آیا، اس دوران ماسکو کی سابقہ حسینہ سے ان کی شادی کی غیر مصدقہ خبریں بھی گردش میں تھیں۔ قومی محل کی جانب سے جاری کیے گئے بیان میں ان کے استعفیٰ کی تصدیق کی گئی ہے۔ سلطان محمد پنجم دسمبر 2016 میں تخت نشین ہوئے تھے اور نومبر 2018 میں انہوں نے علاج کی غرض سے عارضی رخصت لی تھی۔بعد ازاں آن لائن ان سے متعلق روس میں سابقہ مس ماسکو سے شادی کی رپورٹس بھی گردش میں تھیں تاہم ملائیشیا میں شاہی حکام کی جانب سے بادشاہ کی شادی کی افواہوں پر کوئی تبصرہ نہیں کیا گیا اور نا ہی ان کی صحت سے متعلق کوئی تفصیلات جاری کی گئیں۔ ملائیشیا کے یہ جوان دل بادشاہ گاڑی چلانے اور دیگر کھیلوں کےشوقین ہونے کی وجہ سے کافی مقبول ہیں۔ بیان میں کہا گیا ہے کہ ملائیشیا کے معزز بادشاہ نے عوام کو اتحاد، رواداری اور مل جل کر کام کرنے کی تلقین کی ہے ، بیان پر شاہی محل کے نگران وان احمد داہلان عبدالعزیز کے دستخط تھےتاہم شاہی حکام کی جانب سے استعفیٰ کی کوئی وجوہات بیان نہیں کی گئی جس کی وجہ سےسلطان پنجم کے استعفیٰ پر سوال اٹھایا جارہا ہے۔ ملائیشیا میں مسلم بادشاہت کا بہت احترام کیا جاتا ہے اور ان پر تنقید کرنا منع ہے۔ رواں ہفتے ملک میں شاہی حکام کی خصوصی ملاقات کی اطلاعات کے بعد بادشاہ کے مستقبل سے متعلق شکوک و شبہات میں شدت آئی تھی۔ ملائیشیا میں آئینی طور پر شاہی نظام رائج ہےجس کے تحت ہر 5 سال بعد ملائیشیا کی 9 مختلف ریاستوں کے حکمرانوں میں سے ایک تخت نشین ہوتا ہے۔تخت نشینی کا یہ نظام 1957 میں برطانیہ سے آزادی حاصل کرنے کے بعد عمل میں آیا تھا اور سلطان محمد پنجم تخت سے دستبردار ہونے والے پہلے بادشاہ ہیں۔سرکاری میڈیا کے مطابق سلطان محمد پنجم نے آکسفورڈ کے سینٹ کراس کالج اور آکسفورڈ سینٹر فار اسلامک اسٹڈیز سے تعلیم حاصل کی تھی۔ملائشیا کے سلطانوں کی تاریخ 15ویں صدی کے ملائی سلطان سے جاملتی ہے اور بادشاہ کو یانگ دی پیرتن آگونگ یعنی عظیم حکمران کہا جاتا ہے۔

ممبئی(شوبز ڈیسک/ایمرا نیوز) بالی ووڈ اداکار شاہد کپور نے بھارتی اداکارہ پریانکا چوپڑا کے شوہر اور امریکی گلوکار نک جونس کو خاص مشورہ دیتے ہوئے کہا کہ ’وہ کبھی بھی پیچھے نہ ہٹیں، کیونکہ ایک خالص دیسی لڑکی ان کے ساتھ ہے۔‘اداکار شاہد کپور نے کچھ روز قبل اپنے سوتیلے بھائی ایشان کھتر کے ہمراہ بھارت کے مقبول ترین شو ’کافی ود کرن‘ کے سیزن 6 میں شرکت کی۔ شو کے دوران دونوں بھائیوں نے اپنےتعلق اور دیگر معاملات پر کھل کر بات کی۔بالی ووڈ ہدایت کار اور پروڈیوسر کرن جوہر کے شو میں اداکار شاہد کپور اپنے بھائی ایشان کھتر کواُن کی ڈیبیو فلم ’دھڑک‘ کی ہیروئن جھانوی کپور کے نام سے چھیڑتے ہوئے بھی نظر آئے۔ دوسری جانب کرن جوہر نےشو کے دوران ایک موقع پر شاہد کپور سے سوال کیا کہ ’اگر اُنہیں پریانکا چوپڑا کے شوہر نک جونس کو کوئی مشورہ دینا ہوتو وہ کیا ہوگا؟ جس پر شاہدکپور نے نک جونس کو مخاطب کرتے ہوئےکہا کہ ’دوست کبھی پیچھے مت ہٹنا، تم ایک اصل دیسی لڑکی کے ساتھ ہو۔‘واضح رہے سال 2009 میں فلم ’کمینے‘ کی شوٹنگ کے دوران شاہد کپور اور پریانکا چوپڑا کے تعلق سے متعلق مختلف خبریں گردش کرنے لگی تھیں،تاہم دونوں نے اس تعلق کی کبھی تصدیق نہیں کی اور اب دونوں اداکار اپنی اپنی شادی شدہ زندگیوں میں مگن ہیں۔