Tag duniya

پاکستان نے ہمیشہ امن قائم رکھنے کی ہر ممکن کوشش کی ہے، اب بھارت پر منحصر ہے کہ وہ کیا جواب دیتا ہے،مستقل مندوب
نیویارک(ایمرا نیوز آن لائن)اقوام متحدہ میں پاکستان کی مستقل مندوب ملیحہ لودھی نے کہا ہے کہ وزیر اعظم عمران کی جانب سے بھارتی پائلٹ کی رہائی بھارت کو امن کی جانب بڑھنے کی پیشکش ہے۔اقوام متحدہ کے جنرل سیکرٹری انتونیو گوتریس کی چیف آف اسٹاف ماریا لوئیزا ریبیورو کو انٹرویو کے دوران ملیحہ لودھی نے خطے کی بدلتی صورتحال سے آگاہ کیا۔ملیحہ لودھی کا کہنا تھا کہ پاکستان نے ہمیشہ امن قائم رکھنے کی ہر ممکن کوشش کی ہے، اب بھارت پر منحصر ہے کہ وہ کیا جواب دیتا ہے۔انہوں نے کہا کہ عالمی برادری اور اقوام متحدہ حالیہ پاک بھارت کشیدگی میں کمی کے خواہاں ہیں اور اقوام عالم بھی پاکستان کی طرح برصغیر میں امن چاہتا ہے۔ ان کا کہنا تھا کہ وزیر اعظم کی جانب سے بھارتی پائلٹ کی رہائی امن کی جانب بڑھنے کی پیشکش ہے۔واضح رہے کہ امریکا، ترکی اور سعودی عرب نے وزیراعظم عمران خان کی امن کی پیشکش کو قابل ستائش قرار دیا ہے۔ 14 فروری 2019 کو مقبوضہ کشمیر کے ضلع پلوامہ میں بھارتی فوجی قافلے پر خود کش حملہ ہوا تھا جس میں 45 سے زائد اہلکار ہلاک ہوئے، اس کے بعد بھارت نے بغیر کسی ثبوت کے حملے کا ذمہ دار پاکستان کو ٹھہرانا شروع کردیا تھا۔اس کے بعد 26 فروری کو شب 3 بجے سے ساڑھے تین بجے کے قریب بھارت نے تین مختلف مقامات سے پاکستانی حدود کی خلاف ورزی کی کوشش کی، جن میں سے دو مقامات سیالکوٹ، بہاولپور پر پاک فضائیہ نے ان کی دراندازی کی کوشش ناکام بنائی تاہم آزاد کشمیر کی طرف سے بھارتی طیارے اندر کی طرف آئے جنہیں پاک فضائیہ کے طیاروں نے روکا جس پر بھارتی طیارے اپنے پے لوڈ (دھماکہ خیز مواد) گرا کر واپس بھاگ گئے۔پاکستان نے اس واقعے کی شدید مذمت کی اور بھارت کو واضح پیغام دیا کہ اس اشتعال انگیزی کا پاکستان اپنی مرضی کے وقت اور مقام پر جواب دے گا، اب بھارت پاکستان کے سرپرائز کا انتظار کرے۔بعد ازاں 27 فروری کی صبح پاک فضائیہ کے طیاروں نے لائن آف کنٹرول پر مقبوضہ کشمیر میں 6 ٹارگٹ کو انگیج کیا، فضائیہ نے اپنی حدود میں رہ کر ہدف مقرر کیے، پائلٹس نے ٹارگٹ کو لاک کیا لیکن ٹارگٹ پر نہیں بلکہ محفوظ فاصلے اور کھلی جگہ پر اسٹرائیک کی جس کا مقصد یہ بتانا تھا کہ پاکستان کے پاس جوابی صلاحیت موجود ہے لیکن پاکستان کو ایسا کام نہیں کرنا چاہتا جو اسے غیر ذمہ دار ثابت کرے۔جب پاک فضائیہ نے ہدف لے لیے تو اس کے بعد بھارتی فضائیہ کے 2 جہاز ایک بار پھر ایل او سی کی خلاف ورزی کرکے پاکستان کی طرف آئے لیکن اس بار پاک فضائیہ تیار تھی جس نے دونوں بھارتی طیاروں کو مار گرایا، ایک طیارہ آزاد کشمیر جبکہ دوسرا مقبوضہ کشمیر کی حدود میں گرا۔پاکستان حدود میں گرنے والے طیارے کے پائلٹ کو پاکستان نے حراست میں لیا جس کا نام ونگ کمانڈر ‘ابھی نندن’ ہے۔

بھارتی پائلٹ کو رہا کرنے کا اعلان قابل تعریف ہے، سیکرٹری جنرل اقوام متحدہ
روس کی جا نب سے بھی پاکستان اور بھارت کے مابین ثالثی کی پیش کش
نیویارک(ایمرا نیوز آن لائن)سیکرٹری جنرل اقوام متحدہ نے وزیراعظم عمران خان کی جانب سے بھارتی پائلٹ کو رہا کرنے کا اعلان کا خیر مقدم کیا ہے۔ سیکرٹری جنرل اقوام متحدہ نے وزیراعظم عمران خان کی جانب سے بھارتی پائلٹ کو رہا کرنے کا اعلان کا خیر مقدم کرتے ہوئے کہا کہ بھارتی پائلٹ کو رہا کرنے کا اعلان قابل تعریف ہے۔ترجمان اقوام متحدہ نے کہا کہ سیکرٹری جنرل اقوام متحدہ پاکستان اور بھارت کےساتھ کئی سطحوں پر رابطے میں رہے ہیں ، دونوں ممالک اور عالمی برادری کو کشیدگی کم کرنے کے اقدامات کرنے چاہئیں۔ ترجمان کے مطابق صدرجنرل ماریہ اسپنوزا نے بھی پاک بھارت کشیدگی پر تشویش کا اظہار کیا اور کہا کہ مسائل کا حل مذاکرات ہی ہیں۔واضح رہے کہ گزشتہ روزمشترکہ اجلاس کے خطاب کے دوران وزیراعظم عمران خان نے خیرسگالی کے طور پرگرفتارکئے گئے بھارتی پائلٹ ابھے نندن کورہا کرنے کا اعلان کیا ہے جس کودنیا بھر سراہا جارہا ہے۔دوسری جانب روس نے بھی پاکستان اور بھارت کے مابین ثالثی کی پیش کش کی ہے، بھارتی وزیراعظم سے ٹیلی فونک گفتگو میں صدر پیوٹن نے پاک بھارت کشیدگی کے جلد خاتمے کی امید کا اظہار کیا۔ادھراقوام متحدہ کے سیکرٹری جنرل انتونیوگٹرس نے بھارتی پائلٹ کی رہائی کےاعلان کا خیرمقدم کیا اور کہا کہ وہ پائلٹ کی رہائی کے اعلان کو کشیدگی کے خاتمے کے لیے پاکستانی کاوش کے طورپر دیکھ رہے ہیں۔

خدیجہ بتول کو زیادتی کے بعد گلے میں دوپٹہ ڈال کر قتل کیا گیا اور لاش ٹنکی میں ڈالی گئی، ایم ایل او رپورٹ
کراچی(ایمرا نیوز آن لائن)بن قاسم ٹاو¿ن میں 9 سالہ بچی کی لاش پانی کی ٹنکی سے ملی جسے زیادتی کے بعد قتل کیا گیا۔میڈیکو لیگل آفیسر ( ایم ایل او) کی رپورٹ کے مطابق 9 سالہ خدیجہ بتول کے ساتھ زیادتی کی گئی جب کہ بچی کی گردن پر تشدد کے نشانات موجود ہیں، جسے گلے میں دوپٹہ ڈال کر قتل کیا گیا ہے۔ایم ایل او ڈاکٹر ذکیہ کے مطابق بچی کے خون، کپڑوں اور دیگر چیزوں کے نمونے لیے گئے ہیں جسے مزید معلومات کے لیے لیبارٹری بھجوا دیا گیا ہے۔ دوسری جانب پولیس کا کہنا ہے کہ بچی کے اہل خانہ کا تعلق قمبر شہداد کوٹ سے ہے اور ضابطے کی کارروائی کے بعد بچی کی لاش ورثا کے حوالے کردی گئی ہے۔

27 حملہ آوروں نے صبح 4 بجے فوجی بیس کو نشانہ بنایا جب کہ حملہ آوروں میں 7 خودکش بمبار بھی شامل ہیں، افغان میڈیا
کابل(ایمرا نیوز آن لائن)طالبان نے افغان فوج کے ملٹری بیس پر حملہ کردیا جس کے بعد دو طرفہ فائرنگ کا تبادلہ جاری ہے۔غےر ملکی میڈیا کے مطابق طالبان نے جنوبی صوبہ ہلمند میں فوجی بیس کو نشانہ بنایا جس کی تصدیق گورنر آفس نے بھی کردی۔گورنر آفس کی جانب سے جاری بیان میں کہا گیا ہے کہ حملہ آوروں نے ہلمند میں 215 میوند کورپس کو نشانہ بنایا تاہم حملے میں ہونے والے نقصانات کے حوالے سے تفصیلات نہیں بتائی گئیں۔افغان میڈیا کا ذرائع کے حوالے سے کہنا ہے کہ 27 حملہ آوروں نے صبح 4 بجے فوجی بیس کو نشانہ بنایا جب کہ حملہ آوروں میں 7 خودکش بمبار بھی شامل ہیں۔

بھارتی وزیرخارجہ کو او آئی سی اجلاس میں مدعو کیا گیا تو پاکستان شرکت نہیں کرے گا،نریندرمودی بھارت میں پوزیشن کمزورہونے کے ڈرسے کترارہے ہیں،
شاہ محمود قریشی کا امریکی ٹی وی کوانٹرویو
اسلام آباد(ایمرا نیوز آن لائن) وزیر خارجہ شاہ محمود قریشی کا کہنا ہے کہ بھارت کو او آئی سی پلیٹ فارم استعمال کرنے کی اجازت نہیں دیں گے اور بھارتی وزیرخارجہ کو او آئی سی اجلاس میں مدعو کیا گیا تو پاکستان شرکت نہیں کرے گا۔وزیرخارجہ شاہ محمود قریشی نے امریکی ٹی وی کوانٹرویودیتے ہوئے کہا کہ پاک بھارت جنگ باہمی خودکشی ہوگی، بھارت نے نہ صرف پاکستان کی فضائی حدود کے خلاف ورزی کرکے بم گرائے، بلکہ دراندازی سے یواین چارٹراورعالمی قوانین کے خلاف ورزی بھی کی، جب بھارت نے پاکستان پرحملہ کیا توصورتحال کافی سنجیدہ تھی، تاہم بھارتی پائلٹ کورہا کرنے سے کشیدگی میں کمی آئے گی۔شاہ محمود قریشی نے کہا کہ پاکستان نہ صورتحال بگاڑنا چاہتا ہے نہ جنگی کیفیت پیدا کرنا، ہم نے بھارت کوامن کیلیے متوازن پیش کش کی ہے، وزیراعظم نے پلوامہ واقعے کی تحقیقات کیلیے بھی تعاون کی پیش کش کی، افغانستان میں 17 سالہ جنگ کاخاتمہ اورامن چاہتے ہیں، پاکستانی سرزمین کسی کے خلاف دہشتگردی کیلیےاستعمال نہیں کرنے دیں گے، بھارت شواہد دے مل کر مسئلے کا حل نکالیں گے۔شاہ محمود قریشی کا کہنا تھا کہ نریندرمودی بھارت میں پوزیشن کمزورہونے کے ڈرسے کترارہے ہیں، پاکستان کی سیاسی اورعسکری قیادت کافی عرصے بعد ایک پیج پرہے، پومپیواورزلمے خلیل زاد نے کہا پاکستان افغان امن عمل میں مثبت کرداراداکررہا ہے جو خوش آئند ہے۔ انہوں نے مزید کہا کہ بھارت کواوآئی سی پلیٹ فارم استعمال کرنے کی اجازت نہیں دیں گے، اوآئی سی میں بھارتی وزیرخارجہ ہوئی تونہیں جائیں گے، بھارت جب اورجہاں کہے پاکستان مذاکرات کے لیے تیارہے جب کہ روس نے بھی پاک بھارت مذاکرات کیلیے ثالثی اورمیزبانی کی پیش کش کی ہے۔

لاہور(ایمرا نیوزآن لائن رپورٹ اظہر محمود سے) پاکستان کی طرف سے ایک بار پھر امن پسندی اور بڑے پن کا مظاہرہ کرتے ہوئےبھارتی پائلٹ ابھے نندن کو آج سہ پہر واہگہ بارڈر پر بھارت کے حوالے کیا جائے گا۔ترجمان دفترخارجہ کے مطابق بھارتی پائلٹ کوآج پاکستان میں بھارتی ہائی کمیشن کےذریعے واہگہ بارڈر لاہور سے بھارتی ہائی کمیشن کےحکام کےحوالےکردیاجائےگا۔ذرائع کے مطابق بھارتی ہائی کمیشن نے بھارتی پائلٹ کے سفری دستاویزات مکمل کرلیے ہیں۔وزیراعظم عمران خان نے گزشتہ روز پارلیمنٹ کے مشترکہ اجلاس میں ابھے نندن کی رہائی کا اعلان کرتے ہوئے کہا تھا کہ بھارتی پائلٹ کو جذبہ خیر سگالی کے تحت رہا کیا جارہا ہے۔ پاکستان کی امن کے لیے کی جانے والی کوششوں کو اس کی کمزوری نہ سمجھا جائے۔افواج پاکستان اور قوم،وطن کا دفاع کرنا جانتی ہیں۔بدھ کے روز پاک فضائیہ نے ایل او سی پار کرنے والے بھارتی مگ 21بائسن کو مار گرایا تھا اور اس کے پائلٹ،ونگ کمانڈر ابھی نندن کو پاکستانی فورس نے گرفتار کرلیا تھا۔پائلٹ کی رہائی کااعلان کرتےہوئے وزیراعظم نے بھارت کویہ پیغام بھی دیا کہ پاکستان کی جانب بڑھنے والا ہر ہاتھ کاٹ دیا جائے گا۔عمران خان نے بھارتی وزیراعظم کو پھرخبردارکیاکہ معاملےکو انتہا پر نہ پہنچایا جائے۔دوسری جانب پاک بھارت کشیدگی کے بعد بھارتی پائلٹ کی رہائی کو عالمی سطح پر سراہا جارہا ہے، اقوام متحدہ کے سیکریٹری جنرل اور امریکا نے وزیراعظم کے اعلان کا خیرمقدم کیا ہے ۔آج سعودی وزیر مملکت برائے خارجہ عادل الجبیر ولی عہد محمد بن سلمان کا خصوصی پیغام لیے پاکستان آرہےہیں۔امریکی وزیر خارجہ مائیک پومپیو نے کہا کہ امریکا بھرپور کوششیں کررہا ہے اور امید ہے کہ کم از کم فی الوقت کشیدگی ختم کرالیں گے، امریکی صدر نے بھی کہا تھا کہ شروں سے جاری پاک بھارت کشیدگی ختم ہونے جارہی ہے۔

اسلام آباد(ایمرا نیوزآن لائن رپورٹ عمر خالد سے) سول ایوی ایشن نے اعلان کیا ہے کہ پاکستان کی فضائی حدود آج دوپہر ایک بجے کھولی جائیں گی۔کشیدہ صورتحال کے باعث بند کی گئی پاکستانی فضائی حدود کوجزوی بحال کردیا گیا ہے جبکہ بیرون ملک پھنسے ہوئے پی آئی اے کے تین طیارے وطن واپس پہنچ گئے۔پی آئی اے کی پروازیں جدہ ، مسقط اور دبئی سے کراچی پہنچی ہیں جبکہ اچانک بندش کے اعلان سے غیرملکی ایئرلائنوں کے پھنسے طیاروں کو بھی فیری فلائٹ کرکے جانے کی اجازت دے دی گئی ہے ۔پشاور سےعمان ائیرلائن ، قطر ائیرلائن اور ائیرعربیہ کے طیاروں کو جانے کی اجازت دی گئی جبکہ سعودیہ ائیرلائن کے طیارے کو کراچی سے بغیر مسافروں کے واپس جانے کی اجازت دی گئی ۔

برطانوی اور اٹلی کوہ پیماﺅں کی تلاش کیلئے نانگا پربت کے دامن میں پولیس کی ہائی آلٹیچوڈ فورس کو حفاظتی انتظامات کے لیے تعینات کر دیا گیا ہے، ترجمان گلگت بلتستان حکومت
پاک بھارت سرحدی کشیدگی کی وجہ سے فضائی سروس معطل ہے جس کے باعث نانگاپربت میں ہیلی کاپٹر کے ذریعے ریسکیو آپریشن شروع نہیں ہو سکا، مقامی پولیس افسر
گلگت (ایمرا نیوز آن لائن)گلگت بلتستان حکومت کے ترجمان فیض اللہ فراق نے بتایا ہے کہ کہ نانگا پربت سر کرنے کے دوران لاپتہ ہونے والے برطانوی اور اٹلی کے کوہ پیماں کی تلاش کے لیے زمینی سرچ آپریشن شروع کر دیا گیا ہے۔ترجمان نے مزید کہا کہ اس سلسلے میں 8 رکنی ٹیم خدمات انجام دے رہی ہے اور وزیر اعلی گلگت بلتستان حافظ حفیظ نے فضائی اور زمینی ریسکیو آپریشن کرنے کی ہدایات دی ہیں۔فیض اللہ فراق کے مطابق نانگا پربت کے دامن میں پولیس کی ہائی آلٹیچوڈ فورس کو حفاظتی انتظامات کے لیے تعینات کر دیا گیا ہے۔
اس سلسلے میں ایک مقامی پولیس افسر کا کہنا تھا کہ پاک بھارت سرحدی کشیدگی کی وجہ سے فضائی سروس معطل ہے جس کے باعث نانگاپربت میں ہیلی کاپٹر کے ذریعے ریسکیو آپریشن شروع نہیں ہو سکا،انہوں نے مزید بتایا کہ نانگا پربت سر کرنے جانے والے کوہ پیماں سے گزشتہ 4 دنوں سے کوئی رابطہ نہی ہوسکا۔ اٹلی سے تعلق رکھنے والے ڈینیئل نردی اور برطانیہ کے ٹام بلارڈ نامی دونوں کوہ پیما نئے راستے سے نانگا پربت سر کرنے روانہ ہوئے تھے۔تاہم کیمپ نمبر 4 سے دونوں غیر ملکی کوہ پیما 24 فروری سے لاپتہ ہیں، جن کے بارے میں خدشہ ہے کہ مرچکے ہیں۔واضح رہے کہ ڈینیئل نردی اور ٹام بلارڈ نے جنوری میں پاکستانی کوہ پیماں رحمتہ اللہ بیگ اور کریم حیات کے ہمراہ نانگا پربت پر چڑھائی شروع کی تھی لیکن 29 جنوری کو برف کے طوفان میں کیمپ 2 کے خیمے دفن ہونے کی وجہ سے پاکستانی کوہ پیماں نے چڑھائی ترک کردی تھی۔حکام کے مطابق دونوں غیر ملکی کوہ پیما 6300 میٹرز کی بلندی پر واقع کیمپ 4 میں پہنچنے کے بعد سے لاپتہ ہیں۔

شام معاملے پر رجب طیب اردوان نے فرانسیسی صدر کو ملاقات کیلئے انتظار کرنے کا کہہ دیا
انقرہ (ایمرا نیوز آن لائن)ترک صدر رجب طیب اردوان نے کہا ہے کہ فرانس کے صدر ماکروں نے ان سے بات کرنے کی خواہش ظاہر کی تھی مگر میں نے انہیں مناسب وقت کا انتظار کرنے کا کہہ دیاکیونکہ اس وقت ہم بلدیاتی انتخابات کی تیاریوں میں مصروف ہیں۔ ترک نشریاتی ادارے کے مطابق فرانسیسی صدر ایمانویل ماکروں کی ترک صدر سے ملنے کی خواہش پر صدر اردوان نے انہیں مناسب وقت تک کا انتظار کرنے کا کہہ دیا ہے۔ انہوں نے کہا کہ شام میںکسی محفوظ علاقے کے قیام کے کنٹرول کےلئے جرمنی، فرانس یا امریکا سے رجوع نہیں کیا جائے گا۔ اس حوالے سے فرانس کے صدر ماکروں نے ان سے بات کرنے کی خواہش ظاہر کی تھی مگر میں نے انہیں مناسب وقت کا انتظار کرنے کا کہا تھا کیونکہ اس وقت ہم بلدیاتی انتخابات کی تیاریوں میں مصروف ہیں۔

ہم امن سے محبت کرنے والی قوم ہیں اورحالیہ کشیدگی کا واحد حل دونوں ملکوں کے مذاکرات ہیں، ہم دشمنوں کے ساتھ بھی ایسا سلوک کرتے ہیں، بھارتی پائلٹ کی تصویر بھی شیئر کردی
دبئی(ایمرا نیوز آن لائن)سابق کپتان شاہد آفریدی نے ٹوئٹر پر بھارتی پائلٹ ونگ کمانڈر ابھی نندن کی ویڈیو شیئر کرتے ہوئے کہا کہ ہمیں اپنی مسلح افواج پر فخر ہے۔ ہم دشمنوں کے ساتھ بھی ایسا سلوک کرتے ہیں، بھارت کی جانب سے شروع کیا جانے والا جنگ کا فتور ختم ہونا چاہیے۔شاہد آفریدی نے مزید کہا کہ ہم امن سے محبت کرنے والی قوم ہیں اورحالیہ کشیدگی کا واحد حل دونوں ملکوں کے مذاکرات ہیں جس کا وزیر اعظم عمران خان اپنی تقریر میں بھی ذکر کرچکے ہیں۔خیال رہے کہ شاہد آفریدی نے بھارتی پائلٹ ونگ کمانڈر ابھی نندن کی وہ ویڈیو شیئر کی ہے جس میں اسے چائے پیتے ہوئے دیکھا جاسکتا ہے۔ اس ویڈیو میں بھارتی پائلٹ نے مشتعل ہجوم سے اپنی جان بچانے والے پاک فوج کے افسران کا شکریہ بھی ادا کیا ہے۔