Tag imf

(ایمرا نیوزآن لائن) ایشیائی ترقیاتی بینک (اے ڈی بی) نے پاکستان کے لیے ایک ارب 30 کروڑ ڈالر قرض کی منظوری دے دی۔

ایشیائی ترقیاتی بینک کی جانب سے جاری اعلامیے کے مطابق پاکستان کے لیے قرض کی منظوری بورڈ آف ڈائریکٹرز کی جانب سے دی گئی، پاکستان کو خصوصی پالیسی کی بنیاد پر قرض کی رقم فوری طور پر ادا کی جائے گی۔ اعلامیے میں کہا گیا ہے کہ 2018 کے وسط سے پیدا ہونے والی مالی خرابیوں کو استحکام دینے کے لیے قرض جاری کر رہے ہیں۔

اے ڈی بی کے جاری اعلامیے میں کہا گیا ہے کہ پالیسی بیس قرض آئی ایم ایف کی سربراہی میں ملٹی ڈونر ریفارم پروگرام کا حصہ ہے اور پاکستان کو ایک ارب ڈالر فنانسنگ ضرورت اور سست معیشت کی بحالی کے لیے دیا گیا ہے جب کہ 30 کروڑ ڈالر توانائی کے شعبے میں گردشی قرضے کی ادائیگی کے لیے ہوں گے۔

ایشیائی ترقیاتی بینک نے پاکستان میں معاشی استحکام کے لیے سپورٹ جاری رکھنے کے عزم کا اظہار ہے۔ اے ڈی بی کے مطابق پاکستان اور ایشیائی ترقیاتی بینک کے حکام کے درمیان اس حوالے سے معاہدے پر پیر کو دستخط ہوں گے۔

(ایمرا نیوزآن لائن) ملکی معیشت میں تیزی لانے کے لیے حکومت نے اہم فیصلے کرلیے، نیا پاکستان ہاؤسنگ اسکیم کے لیے حکومت 30 ارب روپے اضافی دے گی، گردشی قرضے ختم کرنے کے لیے پاور سیکٹر کو 250 ارب دیے جائيں گے، ایکسپورٹرز کو 200 ارب روپے کی سبسڈی ملے گی۔

اقتصادی امور ڈویژن کے وفاقی وزیر حماد اظہر، وزیراعظم کے مشیر خزانہ و ریونیو ڈاکٹرعبدالحفیظ شیخ، وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان اور فیڈرل بورڈ آف ریوینیو (ایف بی آر) کے چیئرمین شبر زیدی نے مشترکہ پریس کانفرنس کی۔

قومی معیشت کے حوالے سے گفتگو کرتے ہوئے وزیراعظم کے مشیر برائے خزانہ و ریونیو ڈاکٹر عبدالحفیظ شیخ نے کہا کہ رواں مالی سال کے چار ماہ گزر چکے ہیں جو قومی معیشت کے حوالے سے انتہائی مثبت رہے ہیں۔ تجارتی خسارہ میں بدستور کمی ہو رہی ہے، ڈالر کے ذخائر بڑھ رہے ہیں اور مالیاتی خسارہ میں نمایاں کمی ہوئی ہے جس سے قومی معیشت کے حوالے سے عالمی برادری کو اچھا تاثر جا رہا ہے۔

انہوں نے کہا کہ گذشتہ پانچ سال کے دوران ملکی برآمدات میں صفر فیصد اضافہ ہوا لیکن ان چار ماہ میں برآمدات 4 فیصد بڑھی ہیں۔ ایف بی آر کی ٹیکس وصولیوں میں 16 فیصد اضافہ ہوا ہے جبکہ اندرون ملک ٹیکس محصولات 21 فیصد بڑھے ہیں، سیمنٹ کی پیداوار 4.5 فیصد اضافہ سے 16 ملین ٹن سے زائد رہی ہے جس سے ملک میں تعمیراتی سرگرمیوں کے فروغ کی عکاسی ہوتی ہے۔ حفیظ شیخ نے کہا کہ گذشتہ چند ہفتوں کے دوران اسٹاک مارکیٹ نے اچھی کارکردگی دکھائی ہے اور اس میں 6 فیصد اضافہ ہوا ہے۔ اس کے علاوہ حکومت نے تاجروں سے ایک اچھی ڈیل کرکے ان کو مراعات دیں اور طے پایا کہ کاروبار کو دستاویزی شکل دے کر ٹیکس ادائیگیوں کو بڑھا کر قومی ترقی میں کاروباری طبقہ بھی حصہ دار بنے گا۔

سابقہ حکومت کے 2.1 ارب ڈالر قرض واپس کیے، حفیظ شیخ: انہوں نے کہا کہ چار ماہ کے دوران حکومت نے 2.1 ارب ڈالر کے قرضے واپس کیے ہیں جو سابقہ حکومتوں نے لیے تھے، اسی طرح کریڈٹ ریٹنگ کی شرح برقرار ہے۔ قومی معیشت کے حوالہ سے انہوں نے کہا کہ حکومت نے رواں مالی سال کے دوران اسٹیٹ بینک سے ایک پیسہ بھی ادھار نہیں لیا جو قومی معیشت کی اچھی تصویر ہے۔ آئی ایم ایف کا وفد گذشتہ ہفتے پاکستان آیا ہے جس نے قومی معیشت کی کارکردگی کی رپورٹ تیار کی اور یہ رپورٹ معیشت کے تمام شراکت داروں کو پیش کریں گے جس سے عالمی برادری کے سامنے پاکستان کے اچھے تشخص کو مزید بہتر بنانے میں مدد ملے گی۔

حفیظ شیخ نے کہا کہ حکومت نے آئی ایم ایف سے کیے گئے وعدے اور اہداف کو کامیابی سے حاصل کیا ہے اور آئی ایم ایف کی ٹیم نے 45 کروڑ ڈالر کی دوسری قسط کی ادائیگی کی سفارش کی ہے جس سے دنیا بھر میں پاکستان کے حوالہ سے ایک اچھا پیغام گیا ہے کہ یہاں پر معاشی بحالی ہو رہی ہے۔ انہوں نے کہا کہ آئی ایم ایف کے علاوہ عالمی بینک کے صدر نے بھی چند دن پہلے پاکستان کا دورہ کیا اور انہوں نے بھی توانائی کے شعبہ، سرکاری اداروں، اسٹیٹ بینک آف پاکستان اور ایف بی آر کی کارکردگی کو بہتر بنانے کیلئے کئے گئے اقدامات اور اصلاحات کو سراہا۔

اہم فیصلوں کا اعلان: مشیر خزانہ نے کہا کہ حکومت نے اقتصادی سرگرمیوں کے فروغ کیلئے چند فیصلے کئے ہیں جن کے تحت وزیراعظم کے نیا پاکستان ہاﺅسنگ پروگرام کے تحت 30 ارب روپے اضافی مختص کیے جا رہے ہیں جس سے 300 ارب روپے کے گھر بنانے میں مدد ملے گی، حکومت 30 ارب روپے کی سبسڈی دے گی، تعمیرات کے شعبے سے منسلک دیگر صنعتوں کو ٹیکس میں خصوصی مراعات دی جائیں گی۔ انہوں نے بتایا کہ اقتصادی پالیسی کے تحت برآمدات کو بڑھانے پر خصوصی توجہ دی جا رہی ہے اور اس حوالے سے 200 ارب روپے اضافی مختص کیے گئے ہیں تاکہ حکومت برآمد کنندگان کو قرضوں کی فراہمی پر سبسڈی دے اور ان کو 200 ارب روپے کے سستے قرضے دیے جائیں گے۔

حفیظ شیخ نے بتایا کہ اسٹیٹ بینک آف پاکستان سے قرضوں کے اجراء کیلئے 100 ارب روپے کا اضافہ کیا جا رہا ہے، ان اقدامات سے مجموعی قومی پیداوار کو بڑھانے کے ساتھ ساتھ روزگار کی فراہمی میں اضافہ ہوگا اور اقتصادی ماحول کی بہتری سے برآمدات بھی بڑھیں گی۔ ڈاکٹر عبدالحفیظ شیخ نے کہا کہ حکومت نے برآمدکنندگان کو ریفنڈ کی مد میں 30 ارب روپے کے پرامزری نوٹ اور بانڈ جاری کیے تھے جس پر کیش کا مطالبہ کیا گیا اس لیے حکومت نے فیصلہ کیا ہے کہ فوری طور پر 30 ارب روپے کیش کی صورت میں ادا کیے جائیں گے تاکہ برآمدی شعبہ کو سرمایہ کی دستیابی سے اس کی کارکردگی بڑھے۔

پاور سیکٹر کے حوالے سے انہوں نے کہا کہ حکومت آئی ایم ایف کے ساتھ کیے گئے معاہدہ کے تحت 1.6 کھرب روپے کی گارنٹی دے سکتی تھی جس میں 250 ارب روپے اضافہ کیا جا رہا ہے، حکومت اس شعبہ کو ادائیگی کرے گی تاکہ گردشی قرضہ کو کم کیا جا سکے، اس طرح بجلی کے پیداواری شعبہ کی کمپنیوں کو 250 ارب روپے اضافی دیے جا رہے ہیں۔

(وقت نیوزآن لائن) پاکستان اور عالمی مالیاتی فنڈ (آئی ایم ایف) کے درمیان پالیسی سطح کے مذاکرات اسلام آباد میں ہوئے۔

ذرائع کے مطابق آئی ایم ایف سے پالیسی سطح کے مذاکرات میں پاکستانی ٹیم کی قیادت سیکریٹری خزانہ نے کی جس میں گورنر اسٹیٹ بینک اور چیئرمین فیڈرل بورڈ آف ریوینیو (ایف بی آر) بھی شریک تھے۔

آئی ایم ایف وفد نے مشن ہیڈ کی قیادت میں پالیسی سطح کے مذاکرات میں شرکت کی۔ آئی ایم ایف مشن کے پاکستان کی معاشی ٹیم سے مذاکرات، ٹیکس اصلاحات پر پیشرفت کا جائزہ ذرائع نے بتایا کہ پاکستان کے ٹیکس وصولیوں کے ہدف پر نظر ثانی کی گئی جبکہ آئی ایم ایف کو نجکاری پروگرام میں پیشرفت پر آگاہی فراہم کی گئی۔

ذرائع کے مطابق مالی سال کی دوسری سہ ماہی کیلئے اہداف پر بھی بات چیت کی گئی۔ وزارت خزانہ کے حکام نے بریفنگ میں بتایا کہ مالی سال کے پہلے 4 ماہ میں ٹیکس وصولیوں کا ہدف 1447 ارب روپے تھا، اس عرصے میں 167 ارب روپے کم ٹیکس وصولیاں ہوئیں۔

ذرائع کا کہنا ہے کہ آئی ایم ایف کے ساتھ 45 کروڑ ڈالر کی قسط پر بات ہوئی اور اب تک آئی ایم ایف سے 6 ارب ڈالر کے پروگرام سے 99 کروڑ 10 لاکھ ڈالر مل چکے ہیں۔ ذرائع کے مطابق 7 نومبر کو مذاکرات کامیاب ہونے پر پاکستان کو قرضے کی نئی قسط جاری ہوگی جس سے پاکستان کو ایک ارب 44 کروڑ ڈالر مل جائیں گے۔

خیال رہے کہ گزشتہ دنوں عالمی مالیاتی فنڈ (آئی ایم ایف) کے جائزہ مشن نے پاکستان کا دورہ کیا تھا۔ پاکستان اور آئی ایم ایف کے درمیان 6 ارب ڈالر کا معاہدہ طے پایا ہے جس کے تحت عالمی مالیاتی فنڈ تین سالہ معاشی پیکج کے تحت پاکستان کو یہ رقم فراہم کرے گا۔ رواں سال جون میں پاکستان اور عالمی بینک کے درمیان 91 کروڑ 80 لاکھ ڈالر قرض کا معاہدہ بھی طے پایا تھا۔

(ایمرا نیوزآن ئن) نئے ٹیکسوں اور شناختی کارڈ کی شرط سے متعلق حکومتی پالیسی کے خلاف ملک بھر میں تاجر برادری سراپا احتجاج ہے جب کہ مشیر خزانہ نے تاجر برادری کو مذاکرات کی دعوت دے دی ہے۔

آل پاکستان انجمن تاجران اور فیڈرل بورڈ آف ریونیو (ایف بی آر) کے درمیان ڈیڈ لاک برقرار ہونے کی وجہ سے تاجر برداری آج اور کل ملک بھر میں شٹر ڈاؤن ہڑتال کررہی ہے۔

دو روز قبل صدر آل پاکستان انجمن تاجران اجمل بلوچ نے اعلان کیا تھا کہ آئی ایم ایف سے سخت شرائط کے تحت معاہدے نے کاروبار کو تباہ کردیا ہے جس کے خلاف ملک بھر کی تاجر برادری پرزور احتجاج کرے گی۔

تاجر برادری کی ہڑتال کے باعث وہاڑی، گوجرانوالہ، حافظ آباد اور مظفر گڑھ سمیت چھوٹے بڑے شہروں میں مارکیٹیں اور کاروباری مراکز بند کرکے سڑکوں پر نعرے بازی کی جارہی ہے جس کے باعث شہریوں کو مشکلات کا سامنا ہے۔

ادھر صدر چیمبر آف کامرس میاں عمر سلیم نے بھی تاجر برادری کے احتجاج کی حمایت کی ہے۔ مشیر خزانہ متحرک: دوسری جانب تاجروں کی ملک گیر ہڑتال کے بعد مشیر خزانہ عبدالحفیظ شیخ متحرک ہوگئے ہیں اور انہوں نے تاجرو‍ں کو مذاکرات کیلئے وزارت خزانہ مدعو کیا۔ ذرائع کا کہنا ہے کہ مذاکرات میں تاجروں کو مسائل حل کرنے کی یقین دہانی کرائی جائے گی جب کہ آئی ایم ایف وفد سے بھی تاجر رہنماوں کی ملاقات کرائے جانے کا امکان ہے۔

مشیر خزانہ کے طلب کیے جانے پر تاجروں کے رہنما، خواجہ محمد شفیق، کاشف چودھری اورنعیم میرمذاکرات کیلئے وزارت خزانہ پہنچے ہیں۔ اس سے قبل رواں ماہ 9 اکتوبر کو اسلام آباد میں ملک بھر کے تاجروں نے حکومتی پالیسیوں کے خلاف احتجاج کیا تھا جس کے دوران تاجروں کے ریڈ زون میں داخل ہونے کی کوشش پر پولیس کی جانب سے لاٹھی چارج بھی کیا گیا تھا۔

یاد رہے کہ حکومت کی جانب سے ٹیکسٹائل، چمڑے، کارپٹ، اسپورٹس اور سرجیکل آلات کیلئے زیرو ریٹنگ سہولت ختم کرکے واپس 17 فیصد سیلز ٹیکس عائد کرنے اور 50 ہزار سے زائد کسی بھی قسم کی خرید و فروخت میں شناختی کارڈ کا ریکارڈ رکھنے کی شرط کے خلاف تاجر برادری نے 13 جولائی کو بھی ملک گیر شٹر ڈاؤن ہڑتال کی تھی۔

دوسری جانب دو روز قبل قومی اسمبلی کی قائمہ کمیٹی کے اجلاس میں چیئرمین ایف بی آر شبر زیدی نے اعتراف کیا کہ شناختی کارڈ کی شرط کی وجہ سے کاروبار متاثر ہو رہے ہیں، اس پر ہمارے پاس دو راستے ہیں، شناختی کارڈ کی شرط ختم کردیں یا کوئی درمیانی راستہ نکالیں۔

تاہم بعد ازاں چیئرمین ایف بی آر شبر زیدی کا کہنا تھا کہ شناختی کارڈ کی شرط ختم کرنے کی کوئی تجویز زیر غور نہیں اور ایف بی آر اپنی پوزیشن پر قائم ہے لہٰذا 50 ہزار کی خریداری پر شناختی کارڈ کی شرط پر نرمی نہیں برتی جائے گی۔

نئی دہلی(ایمرا نیوز آن لائن)سفارتی محاذ پر پاکستان کو ایک اور بڑی کامیابی حاصل ہوئی ہے ۔ اربوں ڈالرز کی سرمایہ کاری کے باوجود بھارت افغان امن عمل سے مکمل طور پر باہر ہوگیا، وزیر اعظم کے دورہ امریکہ سے بھارت میں تشویش کی لہر دوڑ گئی۔تفصیلات کے مطابق بھارتی اخبار ٹائمز آف انڈیا نے افغان امن عمل سے بھارت کے مکمل طور پر باہر ہونے کو پاکستان کی سفارتی کامیابی تسلیم کرتے ہوئے وزیراعظم عمران خان کے دورہ امریکہ کو بھارت کے لئے پریشان کن قرار دے دیا۔بھارتی اخبار نے تسلیم کیا کہ افغان امن عمل کے نتیجے میں پاکستان امریکہ، روس اور چین کے ساتھ مل کر طالبان کے ساتھ امن معاہدے کو حتمی شکل دینے جا رہا ہے ۔
دوسری جانب اربوں ڈالر کی سرمایہ کاری اور گہرے مفادات وابستہ ہونے کے باوجود بھارت کے وجود کو مکمل طور پر نظر انداز کردیا گیا ہے ۔ٹائمز آف انڈیا نے یہ بھی لکھا ہے کہ پورے افغان امن عمل میں ہندوستان دکھائی دیتا ہے نہ ہی اس کے تحفظات کا کوئی نشان ملتا ہے ، تازہ صورت حال سے واضح ہے کہ پاکستان خطے میں مرکزی حیثیت اختیار کر گیا ہے اور بھارت کو افغانستان کے مستقبل سے متعلق فیصلہ سازی کے عمل سے باہر کر دیا گیا ہے ۔اخبار نے دعویٰ کیا کہ پاکستان اس خطے کی جیوپولیٹکس میں سینٹر سٹیج کی حیثیت اختیار کر چکا ہے اور اس حوالے سے بھارتی تشویش پر کسی بھی سطح پر سنجیدگی کا اظہار نہیں کیا جا رہا ہے ۔
بھارتی سرکار نے امریکہ کے نمائندہ خصوصی برائے افغان مذاکراتی عمل زلمے خلیل زاد اور روسی حکام کے سامنے بھی اپنا نکتہ نظر رکھا ، تاہم دال گلتی دکھائی نہ دی۔ امریکی وزیرخارجہ مائیک پومپیو کی نئی دہلی آمد کے موقع پر بھی بھارت نے اپنے تحفظات کا اظہار کیا تھا۔ بھارت کا موقف ہے کہ گزشتہ 18 برس کے دوران بھارت نے افغانستان میں بھاری سرمایہ کاری کی ہے جو افغان امن معاہدے کے بعد خطرے کی زد میں ہوگی۔
ٹائمز آف انڈیا کا کہنا ہے کہ پاکستان صورتحال سے مکمل مطمئن اور پوری طرح خوش دکھائی دے رہا ہے ، امریکہ اور اس کے اتحادی سعودی عرب، امارات اور قطر پاکستان کی بھرپور امداد کررہے ہیں، آئی ایم ایف نے بھی پاکستان کیلئے امدادی پیکج جاری کردیا ہے ،چین اور پاکستان بھی ایک دوسرے کی جانب دیکھ رہے ہیں مگر بھارت منظر سے غائب ہے ۔ پاکستان نے اپنے آپ کو خطے کے لئے اہم اور ناگزیر ملک ثابت کیا ہے ۔بھارتی اخبار نے لکھا کہ امریکی صدر دونلڈ ٹرمپ کے پاکستان کے خلاف متعدد ٹویٹس کے باوجود وہ واشنگٹن میں پاکستانی وزیر اعظم عمران خان کے استقبال کے لئے تیار ہیں۔
بھارت میں تعینا ت پاکستان کے سابق سفیر عبد الباسط کا کہنا ہے کہ افغانستان میں بھارت کی موجودگی کا مقصد انویسٹمنٹ سے زیادہ پاکستان کے صوبے بلوچستان اور سی پیک منصوبے کو ڈی سٹیبلائز کرنا تھا،
ان اہداف کو حاصل کرنے میں بھارت بری طرح ناکام رہا ہے ۔ان کا کہنا تھا کہ اس کامیابی کے باوجود ہمیں احتیاط کرنی چاہیے کہ اب بھی بھارت کی بھاری انویسٹمنٹ ہے اور افغان انٹیلی جنس نیٹ ورک میں اسکا بے پناہ اثر و رسوخ ہے جس کے ذریعے وہ مستقبل میں ہمیں پریشان کرنے کی کوشش کرسکتا ہے ۔انہوں نے کہا بھارت نے شروع سے اینٹی طالبان بیانیہ اپنایا جس کی بنا پر وہ اس معاہدے سے باہر ہے ،امریکہ سمجھتا ہے کہ مذاکرات میں بھارت کی موجودگی افغان امن عمل کیلئے نقصان دہ ہوسکتی ہے ۔

لاہور(ایمرا نیوزآن لائن) پاکستانی فلم اندسٹری کی متنازع اداکارہ واینکر پرسن وینا ملک نے پاکستان اور بین الاقوامی مالیاتی فنڈ (آئی ایم ایف) کے معاہدے پر تنقید کرنے والوں کو کرارا جواب دیا ہے ۔وینا ملک جو آج کل سیاسی معاملات میں کھل کر اپنی رائے کا اظہار کر رہی ہیں وہیں اُنہوں نے سماجی رابطے کی ویب سائٹ ٹو ئٹر پر ٹوئٹ کرتے ہوئے ا ٓئی ایم ایف کے معاہدے پر تنقید کرنے والوں کو آڑے ہاتھوں لیا ہے اور معاہدے کی حمایت کی ہے ۔

ڈرامہ کوئین نے تنقید کرنے والوں کو جواب دیتے ہوئے اپنی ٹوئٹ میں لکھا کہ ’ آئی ایم ایف نے پاکستان کی 70 سالہ تاریخ میں کبھی بھی پاکستان پر حکم نہیں چلایا ہے لیکن پہلی مرتبہ پاکستان کی معیشت پر حکم چلا رہا ہے، ہے نہ ؟ کیونکہ پہلے پی پی پی اور پی ایم ایل این نے آئی ایم ایف کو قرضہ دیا تھا کیوں کہ دودھ کی نہریں بہہ رہی تھیں ، اور پہلی بار پاکستان آئی ایم ایف سے قرضہ لے رہا ہے۔‘واضح رہے کہ پاکستان اور آئی ایم ایف کے درمیان 6 ارب کا مالیاتی پیکیج طے پایاہے ، جس کے تحت پاکستان کو 39 مہینے تک 6 ارب ڈالر ملیں گے۔

لاہور(ایمرا نیوزآن لائن) وزیراعظم عمران خان نے آئی ایم ایف اور وزارت خزانہ کے درمیان ہونے والے اسٹاف لیول معاہدے کے مسودے کو مسترد کردیا ہے۔ذرائع کے مطابق وزیراعظم نے ہدایت کی ہے کہ ٹیکس استثنیٰ سے متعلق آئی ایم ایف سے مزید رعایت لی جائے جبکہ ٹیکس وصولی ہدف کم کرنے کے لیے بھی آئی ایم ایف کو راضی کرنے کی ہدایت کی گئی۔وزیراعظم افراط زر کے معاملے پر آئی ایم ایف کی شرائط میں نرمی چاہتے ہیں۔ذرائع وزارت خزانہ کے مطابق وزارت خزانہ اور آئی ایم ایف اسٹاف لیول معاہدے مکمل کرچکے تھے۔وزارت خزانہ کے ذرائع کا مزید کہنا ہے کہ مذاکرات میں پیش رفت ہوئی ہے تاہم بات چیف آئندہ دو روز تک جاری رہے گی۔