Tag islamabad

اٹلی(نیٹ نیوز/ایمرا نیوز) مہنگائی صرف پاکستان میں نہیں ہے بلکہ اس کا راج دیگر ممالک میں بھی ہے لیکن اس کے باوجود بھی اٹلی کے ایک علاقے میں 1 یورو میں گھر فروخت کرنے کا اعلان کردیا گیا۔حال ہی میں اٹلی کے علاقے ’سمبوکا‘ کے ڈپٹی میئر جیوسپ کیسیوپو (Giuseppe Cacioppo) نے 1 یورو میں گھر فروخت کرنے کا اعلان کیا جو خبروں کی زینت بن گیا ہے۔ سمبوکا کے ڈپٹی میئر نے یہ اعلان تیزی سے کم ہوتی ہوئی آبادی کے پیش نظر کیا کیونکہ اچھی خاصی تعداد میں مقامی افراد بڑے شہروں کی طرف ہجرت کرچکے ہیں۔

ڈپٹی میئر نے گھروں کی فروخت 1 یورو میں کرنے کے ساتھ یہ بھی اعلان کیا کہ گھر خریدنے والے مالک کو 3 سال میں 15 ہزار یورو تزئین و آرائش پر خرچ کرنا پڑیں گے۔واضح رہے کی اٹلی کا 1 یورو، 155 پاکستانی روپے سے زائد کچھ بنتا ہے، یعنی اٹلی کے علاقے سمبوکا میں گھر اتنے سستے ہیں جن کا پاکستان میں تصور کرنا بھی ناممکن ہے۔سمبوکا اٹلی کا ایک پہاڑی علاقہ ہے جہاں سے بحیرہ روم کے جزائر کا نظارہ کیا جاسکتا ہے۔

لاہور:(نیٹ نیوز/ایمرا نیوز) احتساب عدالت نے خواجہ سعد رفیق اور سلمان رفیق کے جسمانی ریمانڈ میں مزید 7 روز کی توسیع کردی۔قومی احتساب بیورو (نیب) کی ٹیم پیراگون ہاؤسنگ سوسائٹی اسکینڈل میں گرفتار مسلم لیگ (ن) کے رہنما خواجہ سعد اور ان کے بھائی سلمان رفیق کو سخت سیکیورٹی میں عدالت لائی۔اس موقع پر عدالت کے باہر مسلم لیگ (ن) کے کارکنان کی بڑی تعداد موجود تھی جنہوں نے پارٹی رہنماؤں کے حق میں نعرے بازی کی۔احتساب عدالت کے جج سید نجم الحسن نے کیس کی سماعت کی تو نیب کے وکیل نے عدالت سے استدعا کی کہ بینک اکاؤنٹس سے متعلق تفتیش مکمل کرنے کے لیے مزید جسمانی ریمانڈ دیا جائے۔خواجہ برادران کے وکیل نے نیب کے مؤقف کی مخالفت کرتے ہوئے کہا کہ ابھی تک تفتتیش میں کوئی پیش رفت نہیں ہوئی، پیراگون سے خواجہ برادران کا کوئی تعلق نہیں لہٰذا جسمانی ریمانڈ کی ضرورت نہیں۔خواجہ برادران کے وکیل نے مؤقف اپنایا کہ نیب کے پاس خواجہ سعد کا کوئی اکاؤنٹ نہیں جس کی تفتیش کرنی ہو، پیراگون سمیت جو بھی لین دین ہوئی اس کا ریکارڈ موجود ہے۔عدالت نے وکلا کے دلائل سننے کے بعد نیب کی جسمانی ریمانڈ کی درخواست پر فیصلہ محفوظ کیا جو تھوڑی دیر بعد سناتے ہوئے نیب کی استدعا منظور کرلی۔عدالت نے خواجہ برادران کا مزید 7 روز کا جسمانی ریمانڈ منظور کرلیا اور نیب کو دونوں ملزمان کو 26 جنوری کو پیش کرنے کا حکم دیا ہے۔خواجہ برادران کی آج جسمانی ریمانڈ کے حصول کے لیے چوتھی پیشی تھی، گرفتاری کے بعد سے اب تک دونوں بھائی 38 دن کا جسمانی ریمانڈ کاٹ چکے ہیں۔واضح رہےکہ نیب نے 11 دسمبر کو لاہور ہائیکورٹ سے عبوری ضمانت میں توسیع کی درخواست مسترد ہونے کے بعد خواجہ سعد رفیق اور ان کے بھائی سلمان رفیق کو پیراگون ہاؤسنگ سوسائٹی کیس میں گرفتار کیا۔

لاہور:(نیٹ نیوز/ایمرا نیوز) وزیرریلوے شیخ رشید نے کہا ہےکہ انہیں آئین اور قانون کے تحت کوئی شخص پی اے سی کا رکن بننے سے نہیں روک سکتا اور ان کا پبلک اکاونٹس کمیٹی میں جانا لازمی ہے۔لاہور میں ریلوے ہیڈ کوارٹر میں پریس کانفرنس کرتے ہوئے شیخ رشید نے کہا کہ سعودی عرب کے فرمانروا جب پاکستان آئیں گے تو آپ کو پتا چلے گا سرمایہ کاری ہوتی کیا ہے لیکن سعودی عرب سے اتنی سرمایہ کاری دیکھ رہا کہ لوگ حیران رہ جائیں گے۔وزیرریلوے نے پیشگوئی کی کہ عمران خان کی حکومت میں امریکی صدر ٹرمپ کو بھی پاکستان آتا دیکھ رہا ہوں۔انہوں نے کہا کہ ق لیگ والے کہیں نہیں جارہے ، عمران خان ہی امید کے لیے آخری آپشن ہیں، کرپشن کے خلاف عمران خان کے نعرے پر قوم اعتبار کرتی ہے ، اس وقت ملک میں جو صورت حال ہے اس کے ذمہ دار نواز شریف اور زرداری ہیں، شیخ رشید نے مزید کہا کہ اعتزاز احسن اور لطیف کھوسہ سوچیں کہ کیا کیا گیا ملک کے ساتھ، اعتزاز احسن ، لطیف کھوسہ اور مولابخش چانڈیو کو بلاول کے ساتھ کھڑا ہونا چاہیے، مجھے بلاول کی فکر ہے کہ اس کے ساتھ کیا ہوگا، اگر بلاول نے سیاست کرنی ہے تو اس کو بھٹو بننا ہوگا۔عوامی مسلم لیگ کے سربراہ کا کہنا تھا کہ میں نے ایک ہی آدمی کو این آر او مانگتے دیکھا اور سنا ہے اور اس کا نام شہبازشریف ہے لیکن وہ مرضی کوشش کرلیں این آر او نہیں ملے گا۔انہوں نے مزید کہا کہ مجھے آئین اور قانون کے تحت کوئی شخص پی اے سی کا رکن بننے سے نہیں روک سکتا، میرا پبلک اکاونٹس کمیٹی میں جانا لازمی ہے ، تحریک انصاف اپنے کس رکن کا نام واپس لیتی ہے یہ ان کا مسئلہ ہے، میں اس وقت پارلیمنٹ میں سب سے زیادہ سینئر اور تجربہ کار ہوں۔شیخ رشید نے کہا کہ شہبازشریف نے خود کہا تھا کہ وہ ن لیگ کے کیسز میں سربراہی نہیں کریں گے، (ن) لیگ کے کیسز میں پی اے سی کی سربراہی میں کروں گا، یہ کیسے ہوسکتا ہے کہ جو نیب کو مطلوب ہو وہ کہے نیب اس کے پاس پیش ہو۔

لاہور:(نیٹ نیوز/ایمرا نیوز) وزیراطلاعات پنجاب فیاض چوہان نے دعویٰ کیا ہےکہ چوہدری برادران کے ساتھ معاملات حل ہوگئے ہیں۔لاہور میں میڈیا سے گفتگو کرتے ہوئے فیض الحسن چوہان نے کہا کہ چوہدری پرویز الٰہی اور عثمان بزدار کی ملاقات ہوئی ہے اور مسئلہ حل ہوچکا ہے، چوہدری برادران کو علم ہےکہ کون ان کا دوست اور کون دشمن ہے۔انہوں نے کہا کہ چوہدری برادران سب سے زیادہ ذہین اور زیرک سیاستدان ہیں، مخالفین کی خواہش پوری نہیں ہوگی، چوہدری برادران اس نظام کے اہم پلرز ہیں۔صوبائی وزیر اطلاعات کا کہنا تھاکہ عمار یاسر کا معاملہ وزیراعلیٰ پنجاب سے متعلق نہیں، وہ وزیراعلیٰ پنجاب سے خود بات کرلیتے تو مسئلہ حل ہوجاتا ، عمار یاسر ہمارے ساتھی ہیں اور ہمارے ساتھ ہی رہیں گے۔واضح رہےکہ تحریک انصاف کی اتحادی جماعت مسلم لیگ (ق) کے رہنما اور پنجاب کے وزیر معدنیات عمار یاسر نے اپنے کام میں مداخلت کا شکوہ کرکے وزارت سے استعفیٰ دیا تھا جب کہ چوہدری برادران کی جانب سے بھی حکومتی رویے اور معاہدے پر تحفظات کی اطلاعات تھیں۔

ساہیوال:(نیٹ نیوز/ایمرا نیوز) پولیس کے محکمہ انسداد دہشت گردی (سی ٹی ڈی) نے ساہیوال میں جی ٹی روڈ پر اڈا قادر کے قریب کار میں سوار 2 خواتین سمیت 4 افراد کے جاں بحق اور 3 دہشت گردوں کے فرار ہونے جبکہ 3 بچوں کو بازیاب کرانے کا دعویٰ کیا ہے۔ترجمان سی ٹی ڈی کی جانب سے جاری ہونے والے بیان کے مطابق ٹول پلازہ کے پاس سی ٹی ڈی ٹیم نے ایک کار اور موٹرسائیکل کو روکنے کی کوشش کی، جس پر کار میں سوار افراد نے پولیس ٹیم پر فائرنگ شروع کردی۔ترجمان سی ٹی ڈی کے مطابق فائرنگ سے دو خواتین سمیت 4 افراد ہلاک جبکہ 3 دہشت گرد فرار ہوگئے۔ترجمان کے مطابق ہلاک ہونے والے ایک دہشت گرد کی شناخت ذیشان کے نام سے ہوئی، جو کالعدم تنظیم داعش کا مقامی سرغنہ تھا۔سی ٹی ڈی ترجمان کے مطابق فرار دہشت گردوں میں شاہد جبار، عبدالرحمان اور اس کا ایک ساتھی شامل ہے جبکہ یہ کارروائی فیصل آباد میں 16 جنوری کو ہونے والے سی ٹی ڈی آپریشن کا حصہ تھی۔ترجمان نے مزید بتایا کہ جائے وقوع سے خودکش جیکٹس، دستی بم اور اسلحہ بھی برآمد ہوا۔اس سے قبل ذرائع کے مطابق سی ٹی ڈی پولیس کی جانب سے دعویٰ کیا گیا تھا کہ کار میں اغوا کار سوار تھے جبکہ 3 بچوں کو بھی بازیاب کرالیا گیا۔

لندن:(نیٹ نیوز/ایمرا نیوز) ہم ایک عرصے سے الٹرا ساؤنڈ کو کئی کاموں میں استعمال کررہے جن میں طبی تشخیص اور سمندروں کے اندر آبدوزوں کی رہنمائی قابلِ ذکر ہے لیکن اب اتنا حساس الٹرا ساؤنڈ نظام بنایا گیا ہے جو ایک بیکٹیریا کی آواز یا ہوا میں سالمات (مالیکیول) کی سرسراہٹ بھی سن سکتا ہے۔عام الٹراساؤنڈ میں شعاع خارج اور وصول کرنے والے دونوں آلات میں پیزو الیکٹرک (داب برق) کرسٹل ہوتے ہیں اور جب ان میں کرنٹ آتا ہے تو یہ ہائی فریکوئنسی آواز کی لہریں خارج کرتے ہیں جو انسان نہیں سن سکتا۔غیرصوتی آواز ہوا، پانی اور نرم ٹشو سے گزرتی ہے اور پھر ٹکرا کر مختلف سطحوں سے واپس لوٹتی ہے۔ جب یہ لہریں کرسٹل سے ٹکراتی ہیں تو اس کی تھرتھراہٹ سے ہلکی بجلی پیدا ہوتی ہے اور کمپیوٹر پر ایک تصویر نظر آتی ہے جو کسی بیماری یا حمل کی تفصیل بتاتی ہے۔لیکن اب یونیورسٹی آف کوئنزلینڈ کے سائنس دانوں نے سلیکا سے بنی ٹکیہ سے دنیا کا سب سے چھوٹا الٹرا ساؤنڈ سینسر تیار کیا ہے۔ یہ صرف 148 مائیکرون چوڑا اور 1.8 مائیکرون موٹا ہے جس کی پشت پر لیزر ہے۔ اس پر ہلکی سی تھرتھراہٹ بھی ہو تو لیزر اسے نوٹ کرتی ہے اور اسے ایک درست تصویر کی صورت میں دکھاتی ہے۔اس کے موجد پروفیسر واروِک بوون ہیں جن کے مطابق یہ انتہائی ہلکے ارتعاشات کو نوٹ کرسکتا ہے۔ اس طرح یہ کسی وائرس پر ثقل کا اثر، ہوا میں اڑتے مالیکیول اور خلیات کی آواز بھی سن سکتا ہے۔ماہرین کے مطابق یہ کوئی نمائشی شے نہیں جو ریکارڈ کے لیے بنائی گئی ہو بلکہ اس سے خلوی (سیلولر) سطح پر آوازیں اور تھرتھراہٹ سنی جاسکتی ہیں۔ ہم جانتے ہیں کہ جان دار خلیات (سیلز) تھرتھراتے رہتے ہیں اور ان کے یہ سگنل بہت کارآمد ہوتےہیں۔اس طرح صحت مند یا بیمار خلیات کے درمیان فرق کیا جاسکتا ہے اور اسی طرح کینسر والے خلیات کو بھی الگ کرکے دیکھا اور سنا جاسکتا ہے۔

کراچی:(شوبز ڈیسک/ایمرا نیوز) سوشل میڈیا پر ایک ویڈیو وائرل ہورہی ہے جس میں بالی ووڈ کے دبنگ اداکارسلمان خان کو کراچی کی مشہور بولٹن مارکیٹ میں بائیک سیدھا کرتے ہوئے دیکھا جاسکتا ہے۔سوشل میڈیا پر وائرل ہونے والی ویڈیو پاکستان کے شہرکراچی کی مشہور بولٹن مارکیٹ کی ہے، جس میں بالی ووڈ کے سلطان سلمان خان حیرت انگیز طورپربائیک سیدھی کرتے ہوئے نظرآرہے ہیں تاہم یہ سلمان خان نہیں بلکہ ان کی طرح دکھنے والا کوئی اورشخص ہے جو مارکیٹ میں موٹرسائیکلوں کو سیدھا کررہا ہے۔

لاہور(سپورٹس ڈیسک/ایمرا نیوز) قومی ٹیم کے ان فٹ بلے باز حارث سہیل کی پاکستان سپرلیگ فور میں شرکت بھی مشکوک ہوگئی ہے۔قومی ٹیم کے مڈل آرڈر بلے باز حارث سہیل گھٹنے کی انجری کے باعث جنوبی افریقہ میں ٹیسٹ سیریز کھیلے بغیرواپس لوٹے تھے، ان کا نیشنل کرکٹ اکیڈمی میں اسکین کرایا گیا جس کی رپورٹ پی سی بی کو موصول ہوگئی ہیں، ذرائع کےمطابق انہیں چار ہفتے مزید ری ہیب کے عمل سے گزرنے کا مشور ہ دیا گیا ہے۔ڈاکٹرز نے انہیں صرف فزیو کے تجویزہ کردہ طریقہ کار کے مطابق جسمانی مشق کرنے کے ساتھ پی ایس ایل میچز میں شرکت نہ کرنے کی ہدایت کی ہے۔ مڈل آرڈر بلے باز جلد سے جلد فٹ ہوکر پی ایس ایل کا حصہ بننے کے خواہشمند ہیں، حارث سہیل لاہور قلندر ٹیم کا حصہ ہیں، پی سی بی کے میڈیکل پینل کے سربراہ ڈاکر سہیل سلیم کو ان کےری ہیب کی ذمہ داری سونپی گئی ہے۔

واشنگٹن:(نیٹ نیوز/ایمرا نیوز) امریکی صدر ڈونلڈ ٹرمپ آئندہ ماہ شمالی کوریا کے رہنما کِم جانگ ان سے آئندہ ماہ دوسری ملاقات کریں گے۔ڈونلڈ ٹرمپ سے شمالی کوریا کے اعلیٰ مذاکرات کار کِم یانگ نے ملاقات کی جس کے بعد یہ اعلان سامنے آیا۔ دونوں ممالک عشروں سے جاری محاذ آرائی ختم کرنے کے لئے جزیرہ نما کوریا سے ایٹمی ہتھیاروں کے خاتمے کامعاہدہ کرنا چاہتے ہیں۔وائٹ ہاؤس کی ترجمان سارہ سینڈرز نے صحافیوں کو بتایا کہ امریکا ایٹمی ہتھیاروں کے خاتمے کی تصدیق تک شمالی کوریا پر دباؤ اور پابندیاں برقرار رکھے گا۔واضح رہے کہ دونوں رہنماؤں کے درمیان جون 2018 میں سنگاپور کے تفریحی جزیرے سینٹوسا میں ملاقات ہوئی تھی جو 38 منٹ تک جاری رہی جس میں مترجمین کے علاوہ کوئی شریک نہ تھا۔
اس موقع پر کم جونگ نے کہا تھا کہ ‘ہم نے ماضی کو پیچھے چھوڑنے کا فیصلہ کیا ہے جبکہ صدر ٹرمپ نے کہا تھا کہ ہر کوئی جنگ کر سکتا ہے لیکن صرف بہادر ہی امن لا سکتے ہیں۔

لاہور:(نیٹ نیوز/ایمرا نیوز) وزیراعلیٰ پنجاب عثمان بزدار مسلم لیگ ق کے تحفظات دور کرنے میں ناکام ہوگئے اور اب انہوں نے اپنی اتحادی جماعت کے تحفظات اور مطالبات کو وزیراعظم عمران خان کے پاس لے جانے کا فیصلہ کیا ہے۔وزیراعلیٰ پنجاب عثمان بزدار اور اسپیکر پنجاب اسمبلی چوہدری پرویز الہی کی گزشتہ شب ملاقات کی اندرونی کہانی سامنے آگئی۔ چوہدری پرویز الہی نے عثمان بزدار سے شکوہ کیا کہ آپ اور آپ کی قیادت سے اتحاد کے جو معاملات طے ہوئے تھے ان پر تاحال عمل درآمد نہیں ہوا، یہ بھی طے ہوا تھا کہ مرکز اور پنجاب میں ق لیگ کو دو دو وزارتیں ملیں گی لیکن ایسا نہ ہوا۔وزیراعلی پنجاب سردار عثمان بزدار نے اس بات سے لاعلمی کا اظہار کرتے ہوئے کہا کہ وہ معاملے پر وزیراعظم عمران خان سے بات کریں گے۔ چوہدری پرویز الہی نے عثمان بزدار سے کہا کہ آپ کے والد سے میرے ذاتی تعلقات تھے لیکن پھر بھی معاملات صحیح طرح نہیں چل رہے۔وزیراعلی پنجاب نے پرویز الہی کو یقین دہانی کرائی کہ ق لیگ کے مطابق جو بھی پوسٹنگ ٹرانسفر اور دوسرے انتظامی کام ہیں وہ فوری ہوں گے۔ تاہم چوہدری پرویز الہی نے کہا کہ پوسٹنگ ٹرانسفر کوئی مسئلہ نہیں بلکہ اتحادیوں کے درمیان جو معاہدے ہوتے ہیں ان پر عمل ہونا چاہیے۔ذرائع کے مطابق چوہدری پرویز الہی کی شدید خفگی دور نہ ہوئی اور وزیر اعلی انہیں منانے میں ناکام رہے۔ ق لیگ سے تعلق رکھنے والے وزیر معدنیات پنجاب عمار یاسر کے استعفے کا معاملہ بھی حل نہ ہوسکا۔چوہدری پرویز الہی نے مزید کہا کہ ملکی معاملات جس طرف جارہے ہیں وہ صحیح نہیں اور صورتحال کو ٹھیک کرنا ہوگا، مہنگائی میں کمی اور معاشی معاملات ٹھیک نہ ہوئے تو پھر اتحاد اور حکومت کی دوسری چیزیں ثانوی حیثیت اختیار کر جائیں گی۔گزشتہ روز مسلم لیگ ق سے تعلق رکھنے والے وزیر معدنیات پنجاب عمار یاسر نے عہدے سے یہ کہہ کر استعفیٰ دے دیا کہ ان کے کام میں مداخلت کی جارہی ہے۔پھر چند روز قبل وفاقی وزیر اطلاعات فواد چوہدری کے مسلم لیگ (ق) میں فارورڈ بلاک بنانے کے بیان پر ق لیگ کے رہنما چوہدری مونس الٰہی نے شدید ردعمل ظاہر کرتے ہوئے کہا تھا کہ پی ٹی آئی سے اتحاد ختم بھی ہوسکتا ہے۔