Tag May

بھارتی فضائیہ کا حالیہ حملہ فوجی کارروائی نہیں دہشتگردوں کیخلاف حملہ تھا، اجلا س سے خطاب
بیجنگ(ایمرا نیوز آن لائن)بھارتی وزیر خارجہ ششما سوراج نے کہا ہے کہ بھارت کی فضائیہ کا پاکستان میں حالیہ حملہ کوئی فوجی کارروائی نہیں بلکہ دہشتگردوں کیخلاف حملہ تھا ۔ غیر ملکی خبررساں ادارے کے مطابق بیجنگ میں چین ، بھارت اور روس کے سہ فریقی وزرائے خارجہ اجلاس کے دوران ششما سوراج نے ایک بار پھر راگ الاپتے ہوئے کہا کہ پاکستان دہشتگردوں کی محفوظ پناہ گاہ ہے انہوں نے کہا کہ بھارتی فضائیہ پاکستان میں کارروائی کوئی فوجی حملہ نہیں تھا کیونکہ اس حملے کا نشانہ فوجی تنصیبات نہیں بلکہ دہشتگرد گروپ جیش محمد کا انفراسٹرکچر تھا انہوں نے کہا کہ بھارت پاکستان کے ساتھ مزید کشیدگی نہیں چاہتا بلکہ ایک ذمہ دارانہ انداز کے ساتھ آگے بڑھنا چاہتا ہے.

بھارت نے ہزاروں معصوم کشمیری مسلمانوں ، بزرگوں ، خواتین اور بچوں کو قتل کیا پیلٹ گن سے لوگوں کو معذور کردیا ، ایل او سی پر بھی جارحیت جاری ہے ، چیئرمین سینٹ کا او آئی سی ممبر ممالک ، پارلیمانی سربراہان ، سپیکرز ، پریذاڈنگ آفیسرز کو خط
اسلام آباد (ایمرا نیوز آن لائن)چیئرمین سینیٹ محمد صادق سنجرانی نے او آئی سی کے ممبر ممالک کے پارلیمانوں کے سربراہان،سپیکرز اور پریذائڈنگ آفسیرز کو بھارتی جارحیت کے خلاف خط تحریر کر دیئے ہیں۔ سینیٹ سیکرٹریٹ کے مطابق چیئرمین سینیٹ نے خط میں تحریر کیا ہے کہ ہزاروں معصوم کشمیری مسلمان بزرگوں، خواتین اور بچوں کو قتل کیاگیا ہے اور بے شمار لوگوں کو پیلٹ گن سے معذور کیا گیا ہے۔ انہوں نے خط میں مطالبہ کیا ہے کہ او آئی سی کے اجلاس میں شرکت کے لئے بھارت کو دیا گیا دعوت نامہ واپس لیا جائے ۔ بھارت کو دیئے گئے دعوت نامے سے پاکستانی عوام اور پارلیمان کے منتخب نمائندوں کی دل آزاری ہوئی ہے۔ خط میں تحریر کیا گیا کہ او آئی سی نے مقبوضہ کشمیر میں معصوم شہریوں پر ہونے والے مظالم پر ہمیشہ تاریخی موقف اختیار کیا ہے۔ دنیا کے کسی بھی خطے میں مسلمان تکلیف میں ہوں تو جغرافیائی حدود سے قطع نظر دیگر تمام مسلمان اس تکلیف کو محسوس کرتے ہیں۔ بھارتی مقبوضہ کشمیر میں مسلمانوں پر ڈھائے جانے والے مظالم کو ہم نظر انداز نہیں کرسکتے ہیں۔ صادق سنجرانی نے خط میں لکھا کہ بھارتی مقبوضہ کشمیر میں بھارتی افواج کے ہاتھوں 70 برسوں سے ریاستی دہشت گردی، ظلم اور تشدد کا نشانہ بننے والے کشمیریوں پر ہونے والی انسانی حقوق کی خلاف ورزیوں کو عالمی برادری کے سامنے پیش کریں۔

ادارے کی کی گیس کی فی ایم ایم بی ٹی یو قیمت 317 روپے 35 پیسے یکارڈ کی گئی
اسلام آباد (ایمرا نیوز آن لائن)رواں مالی سال کے دوران آئل اینڈ گیس ڈویلپمنٹ کمپنی لمیٹڈ (او جی ڈی سی ایل )کے ریونیو میں 32 فیصد کا اضافہ ہوا ہے تاہم تیل کی پیداوارمیں 1.12 فیصد کی کمی واقع ہوئی ہے۔ کمپنی کے ذرائع کے مطابق مالی سال 2018-19 کے دوران او جی ڈی سی ایل کے ذخائر سے گیس کی پیداوار میں رواں مالی سال کی پہلی سہ ماہی میں تقریبا 6 فیصد کا اضافہ ہوا تھا تاہم مالی سال کی دوسری سہ ماہی میں اس میں 2 فیصد کی کمی دیکھنے میں آئی ہے جبکہ اس کے مقابلے میں رواں مالی سال کے پہلے 6 ماہ کے دوران کمپنی کی ایل پی جی کی پیداوار میں 24 فیصد کا اضافہ دیکھنے میں آیا ہے۔ رواں مالی سال کی پہلی سہ ماہی میں او جی ڈی سی ایل کی فیلڈز سے فروخت ہونے والے خام تیل کی قیمت میں گزشتہ مالی سال کے اس عرصے کے مقابلے میں 28 فیصد اضافہ ہوا ہے اور 62.22 ڈالر فی بیرل کی حساب سے تیل کی فروخت کی گئی ہے جبکہ قدرتی گیس کی فروخت کی قیمت میں 25 فیصد کا اضافہ دیکھنے میں آیا ہے اور او جی ڈی سی ایل کی فیلڈز کی گیس کی فی ایم ایم بی ٹی یو قیمت 317 روپے 35 پیسے یکارڈ کی گئی۔

کشیدگی نے عالمی اقتصادی شرح نمو کو سست اور منڈیوں کو متاثر کررکھا ہے، مذاکراتی عمل میں ٹھوس پیش رفت ہوئی ہے ، امریکی نمائندہ
واشنگٹن (ایمرا نیوز آن لائن)امریکا کی صدر ڈونلڈ ٹرمپ نے کہا ہے کہ رواں ہفتے چینی ہم منصب شی جن پنگ کے ساتھ ایک تجارتی معاہدے پر دستخط کرسکتے ہیں تاکہ تجارتی کشیدگی کا خاتمہ ہو جس نے عالمی اقتصادی شرح نمو کو سست اور منڈیوں کو متاثر کررکھا ہے۔ان خیالات کا اظہار انھوں نے چین کے نائب وزیراعظم لیوہی اور امریکی نمائندہ برائے تجارت رابرٹ لٹزر سے وائٹ ہاس میں گفتگو کے دوران کیا۔ انھوں نے کہا کہ دونوں ملکوں کے درمیان مذاکراتی عمل میں ٹھوس پیش رفت ہوئی ہے اور وہ 200 ارب ڈالر کی چینی درآمدات پر محصول کی شرح 10 فیصد سے بڑھا کر 25 فیصد کرنے کا عمل موخر کردیں گے۔ واضح رہے کہ امریکی صدر اور ان کے چینی ہم منصب شی جن پنگ کے درمیان ہونے والی ملاقات کے دوران صدر ڈونلڈ ٹرمپ نے چینی درآمدات پر اضافی محصول عائد کرنے کا عمل 90روز کے لیے مخر کردیا تھا جسے بعد میں یکم مارچ تک بڑھا دیا گیا ہے۔

اسلام آباد (ایمرا نیوز آن لائن)رواں مالی سال (2018-19ئ) کے پہلے 7 مہینوں (جولائی تا جنوری) کے دوران پھلوں کی ملکی برآمدات میں 48.67 فیصد جبکہ سبزیوں کی برآمدات میں 34.92 فیصد اضافہ ہوا۔ ادارہ برائے شماریات پاکستان (پی بی ایس) کے اعداد وشمار کے مطابق جاری مالی سال میں جولائی تا جنوری پھلوں کی برآمدات 38 ہزار 940 ملین روپے تک بڑھ گئیں جبکہ سبزیوں کی برآمدات 15 ہزار 316 ملین تک پہنچ گئیں۔گزشتہ مالی سال میں جولائی تا جنوری پھلوں کی برآمدات 26 ہزار 193 ملین روپے اور سبزیوں کی برآمدات 11 ہزار 352 ملین روپے رہی تھیں۔ اس طرح گزشتہ مالی سال کے پہلے 7 مہینوں کے مقابلے میں رواں مالی سال کے اسی عرصے کے دوران پھلوں اور سبزیوں کی قومی برآمدات میں بالترتیب 12 ہزار 747 ملین روپے اور 3 ہزار 964 ملین روپے (48.67 فیصد اور 34.92 فیصد) کا نمایاں اضافہ ریکارڈ کیا گیا۔

اسلام آباد (ایمرا نیوز آن لائن)جنوری 2019کے دوران کھاد کی مجموعی فروخت میں 2 فیصد کا اضافہ ہوا ہے اور ایک ماہ میں 8 لاکھ ٹن کھادیں فروخت کی گئی ہیں۔ ٹارس سکیورٹیز کی تجزیاتی رپورٹ کے مطابق یوریا کھاد کی فروخت میں 5 فیصد کے اضافہ سے فروخت 5 لاکھ 64 ہزار ٹن تک پہنچ گئی جبکہ ڈی اے پی کھاد کی فروخت میں 19 فیصد کی کمی سے فروخت کا حجم 75 ہزار ٹن تک کم ہو گیا۔

بھارتی کارروائی کے بعد سشما سوراج اور شاہ محمود قریشی سے بات کی، دونوں ممالک کشیدگی سے گریز کریں، مائیک پومپیو
واشنگٹن(ایمرا نیوز آن لائن)امریکی وزیر خارجہ مائیک پومپیو نے پاکستان اور بھارت پر زور دیا ہے کہ موجودہ صورتحال میں مزید فوجی کارروائی سے گریز کیا جائے۔بدھ کے روز بھارت کی پاکستانی حدود میں دراندازی کے معاملے پر امریکی وزیر خارجہ نے اپنے بیان میں کہا کہ بھارتی کارروائی کے بعد میں نے بھارتی وزیر خارجہ سشما سوراج اور پاکستانی وزیر خارجہ شاہ محمود قریشی سے بات کی۔انہوں نے کہا کہ پاکستان اور بھارت کے وزراءخارجہ ترجیحی بنیادوں پر باہمی رابطے کریں اور دونوں ممالک مزید فوجی کارروائی سےگریز کریں۔مائیک پومپیو نے کہا کہ بھارتی ہم منصب سشما سوراج سے بات چیت میں سیکیورٹی پارٹنر شپ اور خطے میں امن کے معاملے پر بات ہوئی جبکہ شاہ محمود قریشی سے فوجی کارروائی سےگریز کے ذریعے کشیدگی میں کمی پر بات ہوئی۔امریکی وزیر خارجہ کا کہنا تھا کہ دونوں ممالک تحمل کا مظاہرہ اور کشیدگی سے گریز کریں.

بھارتی فورسز نے سرچ آپریشن کے دوران نوجوانوں کو شہید کیا
سری نگر(ایمرا نیوز آن لائن) بھارت کے زیر تسلط کشمیر کے ضلع شوپیان میں قابض انڈین فورسز نے تازہ ریاستی دہشت گردی میں کارروائی کے دوران 2 کشمیری نوجوانوں کو شہید کردیا۔میڈیا رپورٹ کے مطابق بھارتی فورسز نے ضلع شوپیاں کے علاقے ممندر میں ناکے لگا کے سرچ آپریشن کرتے ہوئے 2 نوجوانوں کو شہید کیا۔اس رپورٹ کے شائع ہونے تک بھارتی فورسز کی جانب سے آپریشن جاری تھا۔واضح رہے کہ چند روز قبل بھارت کے زیر تسلط کشمیر کے علاقے پلوامہ میں سینٹرل ریزرو پولیس فورس کی بس پر حملے میں 44 پیراملٹری اہلکار ہلاک ہوگئے تھے، جس کے بعد بھارتی فورسز کی جانب سے مقبوضہ کشمیر کے مختلف علاقوں میں کارروائیوں کا سلسلہ تیز کردیا گیا۔بھارت کی جانب سے پلوامہ حملے کا الزام پاکستان پر عائد کیا گیا تھا۔واقعے کے بعد بھارت کی مختلف ریاستوں میں موجود کشمیریوں پر تشدد کے واقعات سامنے آے تھے، جس کے بعد بھارت میں موجود تاجر، طلبا، مزدور اور دیگر افراد سمیت 700 سے زائد افراد واپس مقبوضہ کشمیر آنے پر مجبور ہوئے تھے۔بھارت کے دارالحکومت نئی دہلی میں 2 روز قبل 3 کشمیری نوجوانوں پر تشدد کیا گیا تھا اسی طرح دوسرے شہر پونے میں نوجوان صحافی کو بھی نشانہ بنایا گیا تھا۔کشمیری صحافی جبران نذیر پر حملہ کرنے والے افراد نے کہا تھا کہ وہ انہیں واپس کشمیر بھیج دیں گے۔بھارت میں کشمیریوں کے خلاف بدترین تشدد پر سپریم کورٹ نے بھی پولیس سربراہ اور ریاستی حکومتوں کو ان کے تحفظ کو یقینی بنانے کا حکم دیا تھا۔دوسری جانب پاکستان نے بھی اقوام متحدہ کے سیکریٹری جنرل انتونیو گوتریس اور انسانی حقوق کے سربراہ کو بھی کشمیریوں کے خلاف تشدد پر نوٹس لے کر بھارت کو ان مظالم سے روکنے کے لیے اقدامات کرنے کا مطالبہ کیا تھا۔وزیر خارجہ شاہ محمود قریشی نے اقوام متحدہ کی سلامتی کونسل کے صدر انتونیو ندونگ مبا کو اپنے خط پلوامہ واقعے کے بعد درپیش صورت حال سے آگاہ کرتے ہوئے کہا تھا کہ بھارت کے پیدا کردہ ہیجان کے نتیجے میں مقبوضہ کشمیر کے عوام پر تشدد کی نئی لہر مسلط کردی گئی ہے اور کشمیری عوام کو خودارادیت کے ناقابل تنسیخ حق کا مطالبہ کرنے پر ظلم وتشدد کا نشانہ بنایا جارہا ہے۔سلامتی کونسل کو کردار ادا کرنے کی درخواست کرتے ہوئے ان کا کہنا تھا کہ مقبوضہ جموں وکشمیر کے عوام بین الاقوامی برادری کی جانب دیکھ رہے ہیں کہ وہ ان کی حالت زار پر توجہ دیں اور علاقے میں بہیمانہ بھارتی مظالم رکوانے کے لیے فوری اقدامات کیے جائیں۔خیال رہے کہ گزشتہ روز بھارت کی جانب سے دعویٰ کیا گیا تھا کہ بھارتی فضائیہ کے طیاروں نے پاکستان کی حدود میں در اندازی کرتے ہوئے دہشت گردوں کا کیمپ تباہ کردیا ہے۔دوسری جانب پاک فوج کے شعبہ تعلقات عامہ (آئی ایس پی آر) نے بھارتی دعوے کو مسترد کرتے ہوئے کہا تھا کہ دشمن کے جہازوں نے لائن آف کنٹرول کی خلاف ورزی کی جس پر پاک فضائیہ کے جوابی رد عمل پر وہ اپنا پے لوڈ گراتے ہوئے واپس بھاگ گئے.

بھارتی فضائیہ کی دراندازی مودی سرکار کی سیاسی ضرورت اور سیاسی کارروائی ہے‘وزیر خارجہ
اسلام آباد(ایمرا نیوز آن لائن)اقوام متحدہ کے سیکرٹری جنرل انتونیو گوتریس اور ترک وزیر خارجہ میولود چاوش اولو نے وزیر خارجہ شاہ محمود قریشی سے بذریعہ ٹیلی فونک رابطہ کرکے بھارتی جارحیت کے معاملے پر مکمل تعاون کی یقین دہانی کرائی ہے ۔بدھ کے روز شاہ محمود قریشی نے بتایا کہ اقوام متحدہ کے سیکرٹری جنرل انتونیو گوتریس نے انہیں فون کیا جس کے دوران انہوں نے سیکرٹری جنرل کو ساری صورتحال سے آگاہ کیا اور اپنے پہلے اور دوسرے خط کا ذکر کیا۔شاہ محمود قریشی کے مطابق انہوں نے اقوام متحدہ کے چارٹر اور عالمی قوانین کی خلاف ورزی پر سیکرٹری جنرل کی توجہ دلائی اور کہا کہ اقوام متحدہ کو موجودہ صورتحال میں کردار ادا کرنا چاہیے۔شاہ محمود قریشی نے کہا کہ یو این سیکرٹری جنرل نے مکمل تعاون کا یقین دلایا اور صورتحال پر تشویش ظاہر کی اور انہوں نے کہا کہ جو کردار ادا کرسکتا ہوں وہ کروں گا۔شاہ محمود قریشی نے کہا کہ ترک ہم منصب میولود چاوش اولو نے انہیں فون کیا اور موجودہ صورتحال سے آگہی حاصل کی۔شاہ محمود قریشی نے اس موقع پر کہا کہ بھارتی فضائیہ کی دراندازی مودی سرکار کی سیاسی ضرورت اور سیاسی کارروائی ہے اور مودی سرکار اپنی سیاسی شکست کو مٹانے کے لیے بھارتی قوم اور اپوزیشن کو بیوقوف بنا رہی ہے اور پورے خطے کے امن سے کھیل رہی ہے۔وزیر خارجہ کے مطابق ‘ترکی نے واضح کیا کہ وہ مکمل طور پر پاکستان کے عوام اور حکومت کے ساتھ کھڑا ہے اور ترکی سمجھتا ہے کہ او آئی سی میں بھارتی وزیر خارجہ سشما سوراج کے آنے کا جواز نہیں رہا’۔شاہ محمود قریشی کے مطابق میولود چاوش اولو نے کہا کہ بھارت نے او آئی سی کے بانی رکن پر حملہ کیا ہے، سشما سوراج کو او آئی سی میں بلانے اور خطاب کا موقع دینے کی ترکی کھل کر مخالفت کرے گا۔شاہ محمود قریشی کے مطابق ترک وزیر خارجہ نے کہا کہ ترک بھائی بہنوں کی دعائیں اور تعاون پاکستان کے ساتھ ہے۔انہوں نے کہا کہ بھارت پاکستان پر حملہ آور ہوا ہے جو عالمی سطح پر بہت بڑا واقعہ ہے، کنٹرول لائن اور پاکستانی حدود میں بھارت نے دراندازی کی۔شاہ محمود قریشی نے کہا کہ بھارتی طیاروں نے 4 بم برسائے، اللہ کا شکر ہے جانی نقصان نہیں ہوا، بھارت نے دعوی کیا تھا کہ وہاں دہشتگردوں کے کیمپ کو نشانہ بنایا اور دہشت گردوں کو لقمہ اجل بنا دیا ،تاہم بھارتی دعووں کی قلعی کھل گئی جہاں بم گرائے گئے، وہاں کوئی لاش ملی اور نہ زخمی۔وزیر خارجہ نے کہا کہ پاکستان ائر فورس بروقت حرکت میں نہ آتی تو بڑے نقصان کا خدشہ تھا، بالاکوٹ میں معمول کی زندگی رہی اور ضمنی انتخاب میں لوگوں نے ووٹ ڈالے.

ٓئی سی سی اجلاس کے دوران پاکستان کرکٹ بورڈ بھارت میں کرکٹ کے امور چلانے والے بورڈ آف کنٹرول کرکٹ ان انڈیا میں حکومتی مداخلت کا معاملہ اٹھائے گا،ذرائع
کراچی(ایمرا نیوز آن لائن) پاکستان کرکٹ بورڈ (پی سی بی) کا انٹرنیشنل کرکٹ کونسل (آئی سی سی) کے آئندہ اجلاس میں بھارتی کرکٹ بورڈ میں حکومتی مداخلت کا معاملے اٹھانے اور اس آئینی طریقے سے جواب دینے کا فیصلہ کرلیا۔ذرائع کے مطابق 27 اور 28 فروری کو چیف ایگزیکٹو اجلاس جبکہ 2 مارچ کو بورڈ میٹنگ میں بھارتی معاملے پر بات چیت ہونے کا امکان ہے۔پی سی بی ذرائع نے بتایا کہ آئی سی سی اجلاس کے دوران پاکستان کرکٹ بورڈ بھارت میں کرکٹ کے امور چلانے والے بورڈ آف کنٹرول کرکٹ ان انڈیا (بی سی سی آئی) میں حکومتی مداخلت کا معاملہ اٹھائے گا۔پی سی بی پاکستانی سیکیورٹی اداروں کے ہاتھوں گرفتاری بھارتی جاسوس کلبھوشن یادیو کے معاملے کا بھی حوالہ دے گا جسے پاکستان کی فوجی عدالت ملک دہشت گردی پھیلانے کے جرم میں سزائے موت سناچکی ہے۔خیال رہے کہ آئی سی سی کے آئین کے مطابق کسی بھی ملک کے کرکٹ بورڈ میں حکومتی مداخلت کی سختی سے ممانعت ہے، تاہم پاکستان آئینی طریقے سے ہی بھارتی بورڈ کے خط کا جواب دے گا۔واضح رہے کہ آئی سی سی کے آئین میں ورلڈ کپ کوالیفائی کرنے والی ٹیم کو ایونٹ سے ہی باہر کر دینے کا کوئی طریقہ کار ہی موجود نہیں ہے۔خیال رہے مقبوضہ کشمیر کے علاقے پلوامہ میں ہونے والے ریموٹ کنڑول بم دھماکے بعد پاکستان اور بھارت کے درمیان حالات کشیدگی کی جانب چلے گئے تھے جس کا براہِ راست اثر دونوں ممالک کے درمیان کرکٹ کے کھیل پر بھی پڑا۔کچھ سابق بھارتی کرکٹرز نے مطالبہ کیا تھا ان کی ٹیم ورلڈکپ میں پاکستان کے خلاف میچ نہ کھیلے اور اس کا بائیکاٹ کردے، جبکہ کچھ سابق کرکٹرز کی جانب سے اسے ایک احمقانہ اقدام قرار دیا جارہا تھا۔حکومتی دباو¿ کے بعد بی سی سی آئی کی جانب سے آئی سی سی کو ایک خط لکھا گیا اور اس میں پلوامہ حملے کا حوالے دیتے ہوئے کہا گیا کہ ’حملہ آوروں نے پاکستانی سرزمین استعمال کی تھی‘، جبکہ یہ مطالبہ کیا تھا کہ ممبر ممالک ایسے ممالک کے ساتھ کرکٹ روابط نہ رکھیں جن کی سرزمین ’دہشت گردوں‘ کے لیے استعمال ہوتی ہے۔تاہم اس خط میں بھارت کی جانب سے پاکستان کے خلاف ورلڈ کپ میں میچز کھیلنے یا نہ کھیلنے سے متعلق کوئی بات نہیں کی گئی، البتہ اپنی کرکٹر، اسٹاف اور شائقین کی سیکیورٹی کے حوالے سے خدشات کا اظہار کیا گیا تھا۔ادھر پی سی بی ذرائع کا کہنا ہے کہ آئی سی سی اجلاس کے دوران پی سی بی ممبر بورڈز کو اعتماد میں لے گا اور اس کے ساتھ ساتھ دیگر ممبر بورڈز کے ساتھ علیحدہ ملاقاتوں میں انہیں بھارت کے متعلق اپنا موقف بھی پیش کرے گا۔اس کے علاوہ پی سی بی انٹرنیشنل اولپمک کمیٹی (آئی او سی) کی بھارت پر پابندی اور اسنوکر ایونٹ کی بھارت سے منتقلی کا بھی حوالہ دے گا.