Tag NDTV

برن (ایمرا نیوز آن لائن)سوئٹزرلینڈ کے بین الاقوامی شہرت یافتہ ٹینس سٹار، سابق عالمی نمبر ایک اور 20 مرتبہ کے گرینڈ سلام چیمپئن راجر فیڈرر نے کہا ہے کہ وہ میڈرڈ اوپن ٹینس ٹورنامنٹ میں بھرپور شرکت کرینگے۔ میڈرڈ اوپن ٹینس ٹورنامنٹ رواں برس مئی میں شیڈول ہے جس میں راجر فیڈرر ایکشن میں دکھائی دیں گے۔ یہ ان کا گزشتہ تین برسوں بعد پہلا کلے کورٹ ٹورنامنٹ ہو گا۔ انہوں نے 2016میں اٹالین اوپن کے بعد کسی کلے کورٹ ٹورنامنٹ میں حصہ نہیں لیا جبکہ انہوں نے آخری مرتبہ 2015میں فرنچ اوپن میں شرکت کی تھی۔

رواں مالی سال کی دوسری سہ ماہی میں بیرونی قرضوں میں 2 ارب 37 کروڑ ڈالر کا اضافہ ہوا
کراچی (ایمرا نیوز آن لائن)پاکستان کے غیر ملکی قرضے تاریخ کی بلند ترین سطح پر پہنچ گئے جو اب بڑھ کر 99 ارب 11 کروڑ ڈالر ہو گئے ہیں۔سٹیٹ بینک آف پاکستان کے مطابق ملک کے واجب الادا غیر ملکی قرضوں کا حجم 99 ارب 11 کروڑ ڈالر ہو گیا۔ سٹیٹ بینک کے مطابق رواں مالی سال کی دوسری سہ ماہی میں بیرونی قرضوں میں 2 ارب 37 کروڑ ڈالر کا اضافہ ہوا ہے۔مرکزی بینک کے مطابق جون 2018 میں پاکستان کے ذمہ بیرون قرضے 95 ارب 34 کروڑ ڈالر تھے جو بڑھ کر 99 ارب 11 کروڑ ڈالر ہو گئے۔ ذرائع کے مطابق ان قرضوں کے حجم میں سعودی عرب سے ملنے والے 2 ارب ڈالر بھی شامل ہیں جبکہ یو اے ای اور سعودی عرب سے ملنے والے مزید 1،1 ارب ڈالر اس قرضوں کے حجم میں شامل نہیں۔

اسلام آباد (ایمرا نیوز آن لائن)واپڈا نے مختلف آبی ذخائر میں پانی کی آمد واخراج کے اعداد وشمار جاری کر دیئے ہیں۔ پیر کو جاری کردہ اعداد وشمار کے مطابق دریائے سندھ میں تربیلاکے مقام پر پانی کی آمد 16700کیوسک اور اخرج 35000کیوسک، دریائے کابل میں نوشہرہ کے مقام پر پانی کی آمد10100 کیوسک اور اخراج 10100 کیوسک، دریائے جہلم میں منگلاکے مقام پر پانی کی آمد25500کیوسک اور اخراج15000کیوسک، دریائے چناب میں مرالہ کے مقام پر پانی کی آمد19000کیوسک اور اخراج 9000 کیوسک ہے۔ تربیلا ڈیم میںکم از کم آپریٹنگ لیول 1392فٹ جبکہ ڈیم میں پانی کی موجودہ سطح1402.14 فٹ ہے۔ ڈیم میں پانی ذخیرہ کرنے کی انتہائی سطح 1550 فٹ اور قابلِ استعمال پانی کا ذخیرہ 0.118 ملین ایکڑ فٹ ہے۔ منگلا ڈیم میں کم از کم آپریٹنگ لیول 1050فٹ، ڈیم میں پانی کی موجودہ سطح 1123.70 فٹ، ڈیم میں پانی ذخیرہ کرنے کی انتہائی سطح 1242 فٹ اور قابلِ استعمال پانی کا ذخیرہ 0.887 ملین ایکڑ فٹ ہے۔ چشمہ بیراج میں کم از کم آپریٹنگ لیول 638.15 فٹ، بیراج میں پانی کی موجودہ سطح 642.60 فٹ، بیراج میں پانی ذخیرہ کرنے کی انتہائی سطح 649 فٹ اور قابلِ استعمال پانی کا ذخیرہ 0.070 ملین ایکڑ فٹ ہے۔

شہنشاہ نے30 سال کے دوران ریاست ، قومی یکجہتی کی علامت کے طور پر کام کیا ، جاپانی وزیراعظم
ٹوکیو (ایمرا نیوز آن لائن)جاپان کے شہنشاہ اکی ہیٹو کی تخت نشینی کے 30 سال مکمل ہونے کی خوشی میں ٹوکیو میں شاندار تقریب کا انعقاد کیا گیا جس میں شہنشاہ اور ملکہ نے شرکت کی۔جاپانی نشریاتی ادارے کے مطابق ٹوکیو میں منعقد کی جانے والی اس تقریب میں وزیرِ اعظم شنزو ایبے، پارلیمان کے دونوں ایوانوں کے سپیکر اور صدر، سپریم کورٹ کے چیف جسٹس، اراکینِ پارلیمنٹ، کاروباری اداروں کے نمائندوں اور جاپان میں تعینات غیر ملکی سفیروں نے بھی شرکت کی۔جاپانی وزیر اعظم شنزوایبے نے اپنے خطاب میں کہا کہ شہنشاہ نے گزشتہ 30 سال کے دوران ریاست اور قومی یکجہتی کی علامت کے طور پر کام کیا ہے اور اپنی ذمہ داریاں جذبے سے سر انجام دی ہیں۔انہوں نے کہا کہ عوام جاپان کو باوقار اور امیدوں سے بھر پور ملک بنانے اور اِس کے روشن مستقبل کے واسطے کام کرنے کے لیے پر عزم ہیں۔

اسلام آباد (ایمرا نیوز آن لائن)ایک ارب 25کروڑ سیاح سالانہ دنیا بھر کے مختلف ممالک کا سفر کرتے ہیں۔ ورلڈ ٹور آرگنائزیشن کی رپورٹ کے مطابق سیاحت کے شعبہ میں فرانس سب سے آگے ہے جبکہ دنیا کے 34مختلف ممالک کی معیشت کا انحصار ہی سیاحت پر ہے۔ سیاحت کے شعبہ کے ماہرین نے کہا ہے کہ وطن عزیز میں سیاحت کے فروغ سے سالانہ اربوں ڈالر کا قیمتی زرمبادلہ کمایا جا سکتا ہے۔ انہوں نے کہا کہ سالانہ 88لاکھ مقامی سیاح خیبر پختونخوا سیرو تفریح کیلئے آتے ہیں جس سے صوبے کو 12.26ارب روپے کی آمدن ہوتی ہے۔ انہوں نے کہا کہ پاکستان سیاحتی مقامات دنیا کے دیگر مقامات کے مقابلہ میں زیادہ پرکشش ہیں تاہم سیاحت کے فروغ کیلئے جامع حکمت عملی مرتب کر کے اقدامات کی ضرورت ہے۔ ماہرین نے کہا کہ وزیر اعظم عمران خان ملک میں سیاحت کے شعبہ پر خصوصی توجہ دے رہے ہیں جس کے خاطر خواہ نتائج سے قومی معیشت کی ترقی میں مدد ملے گی۔

اسلام آباد (ایمرا نیوز آن لائن)جنوری 2019کے دوران موبائل فونز کی ملکی درآمدات میں 25.06 فیصد کی کمی واقع ہوئی ہے۔ ادارہ برائے شماریات پاکستان (پی بی ایس) کی رپورٹ کے مطابق جنوری 2019کے دوران موبائل فونز کی درآمدات 5 کروڑ97 لاکھ 71ہزار ڈالر تک کم ہو گئیں جبکہ جنوری 2018کے دوران 7 کروڑ 97 لاکھ 59 ہزار ڈالر کی درآمدات کی گئی تھیں۔ اس طرح جنوری 2018کے مقابلہ میں جنووری 2019کے دوران موبائل فونز کی قومی درآمدات میں ایک کروڑ 99 لاکھ 88 ہزار ڈالر یعنی 25 فیصد سے زیادہ کی کمی ریکارڈ کی گئی ہے۔

اسلام آباد (ایمرا نیوز آن لائن)موسمیاتی تبدیلیوں کی وجہ سے ملک میں شہد کی پیداوار میں 50 فیصد کمی ہوئی ہے۔ پاکستان میں شہد کی پیداوار 40 ہزار ٹن سالانہ ہے۔ شہد کی فارمنگ و برآمدات کے شعبہ کے ماہرین نے کہا ہے کہ شہد کی صنعت سے 10 لاکھ افراد کو روزگار فراہم کیا جا رہا ہے تاہم اگر صنعت کے فروغ پر توجہ دی جائے تو 20 لاکھ افراد کو روزگار فراہم کیا جا سکتا ہے۔ انہوں نے کہاکہ شعبہ کی ترقی سے برآمدات کو 700 کنٹینرز سے 3 ہزار تک بڑھا یا جاسکتا ہے۔ ماحولیات کے شعبہ کے ماہرین نے کہا ہے کہ موسمیاتی تبدیلیوں کی وجہ سے شہد کی پیداوار کم ہو رہی ہے کیونکہ موسمیاتی تبدیلیاں اور درختوں کی کٹائی کا عمل شہد کی قدرتی پیداوار متاثر ہو رہی ہے۔

بھارتی حکمرانوں نے پلوامہ واقعہ کو اپنے اقتدار کے لئے سیڑھی کے طور پر استعمال کرنے کا ایک منظم اور مربوط پلان تیار کیا، بیان
سرینگر (ایمرا نیوز آن لائن) کل جماعتی حریت کانفرنس” گ“ گروپ کے چیئرمین سید علی گیلانی نے پوری کشمیری قوم کو اعصاب شکن اضطراب میں مبتلا کر کے جنگی ماحول بنانے کی بھارت کے مکارانہ حربوں کی سخت الفاظ میں مذمت کرتے ہوئے کہا کہ بھارت کے حکمرانوں نے پلوامہ واقعہ کو اپنے اقتدار کے لئے سیڑھی کے طور پر استعمال کرنے کا ایک منظم اور مربوط پلان تیار کیا ہوا ہے ایسا لگ رہا ہے کہ زعفران برگیڈ ایسے ہی کسی واقعہ کی تلاش میں تھی اور جونہی ایسا ہوا تو لاشوں پر سوگ منانے کے بجائے حکمرانوں نے اپنے آپ کو مسیحا کے طور پر پیش کر کے عوام سے انہیں اور زیادہ مضبوطی سے اعتماد دینے کی ڈرامائی اپیل کی ۔ اپنے ایک بیان میں حریت چیئرمین نے آزادی پسند قیادت اور خاص کر جماعت اسلامی کے اکابرین کو پابند سلاسل کرنے کی جابرانہ حربوں کو شدید تنقید کا نشانہ بناتے ہوئے کہا کہ ہماری قوم گزشتہ 7 دہائیوں سے اپنے غصب شدہ حقوق کی بازیابی کے لئے جدوجہد کر رہی ہے بھارت نے آہنی ہتھکنڈوں سے اس تحریک کو دبانے کی ہر ممکن کوشش کی ہے جس کے نتیجے میں ہلاکتوں اور تباہی و بربادی کے مناظر ہر چار سو نظر آ رہے ہیں انہوں نے کہا کہ آزادی پسندی تنظیموں اور ان کے افراد کے لئے قید و بند کی صعوبتیں کوئی نئی بات نہیں ہے اور ہم لوگ ایسی آزمائش کے مراحل سے کئی بار گزر چکے ہیں اور الﷲ کی مدد نصرت سے ہر بار مخلص افراد سروخرو ہو کر نکلے ہیں ۔ حریت چیئرمین نے کہا کہ دہلی کے حکمرانوں نے پلوامہ واقعہ کے بعد پورے ای ک ہفتے تک اپنے پالتوؤں کو کشمیریوں کے خون سے اپنی ہندوتا اور دیش بھگتی کی پیاس بجھانے کے لئے کھلی چھوٹ دی اور جب وہ اس طوفان بدتمیزی سے اچھی طرح خود کو سیر کر کے تسلی کر چکے تو حکمرانوں نے کشمیریوں کے درد کی محسوس کرنے کا ڈرامہ رچا کر یہ کہہ دیا کہ ہماری لڑائی کشمیریوں کے خلاف نہیں ہے ۔ حریت چیئرمین نے کہا کہ ایسا سفید جھوٹ اس فن میں مہارت رکھنے والا شخص ہی پوری ڈھٹائی سے بول سکتا ہے ۔ انہوں نے کہ اکہ پورے بھارت میں کشمیریوں کو ظلم و ستم کا نشانہ بنایا گیا ۔ پرنٹ میڈیا ، الیکٹرانک میڈیا اور سوشل میڈیا اس خونین اور اخلاقی بدحواسی کے شرمناک مناظر کا گواہ ہے ۔( جاوید)

بھارتی انتہا پسند عدالت کے ذریعے آرٹیکل 35 اے کو ختم کرانا چاہتے ہیں تاکہ وادی کی مسلم اکثریت بدل جائے
نئی دہلی(ایمرا نیوز آن لائن)بھارتی سپریم کورٹ میں آرٹیکل 35 اے سے متعلق کیس کی سماعت آج منگل سے شروع کی جائے گی۔ آج صبح سے مقبوضہ کشمیر میں بھر پور احتجاج کی کال ہے۔ بھارتی انتہا پسند عدالت کے ذریعے آرٹیکل 35 اے کو ختم کرانا چاہتے ہیں تاکہ وادی کی مسلم اکثریت بدل جائے، ترجمان دفتر خارجہ نے بھارت کی جانب سے مقبوضہ کشمیر کی آئینی حیثیت میں تبدیلی کی کوششوں کی مذمت کی ہے۔ترجمان نے کہا کہ بھارتی سپریم کورٹ میں بھارتی آئین کے آرٹیکل 35اے پر بحث ہونے جا رہی ہے۔ بھارتی سپریم کورٹ میں آرٹیکل 35 اے سے متعلق کیس کی سماعت آج سے شروع کیے جانے کا فیصلہ ہوا ہے۔ آرٹیکل 35 اے کے تحت مقبوضہ کشمیر کو ایک خصوصی حیثیت حاصل ہے اور مقبوضہ کشمیر کی مستقل شہریت کا تعین کرنے کا اختیار مقبوضہ کشمیر اسمبلی کو حاصل ہے۔ مگر بھارتی انتہاپسند اب اس حق کو بھی چھین لینا چاہتے ہیں۔ایک طرف کشمیری عوام بھارتی تسلط سے تنگ ہیں تو دوسری طرف انتہاپسند بھارتی میڈیا اور سیاست دان کشمیریوں سے وہ چند حقوق بھی چھین لینا چاہتے ہیں جو شیخ عبداللہ کے ساتھ ایک معاہدے کے نتیجے میں بھارتی وزیراعظم جواہر لال نہرو نے بھارتی آئین میں درج کرائے تھے۔نہرو نے مقبوضہ کشمیر پر قبضے کے بدلے بھارتی آئین میں مقبوضہ کشمیر کو ایک خصوصی حیثیت دی تھی اور اس حیثیت کا ذکر بھارتی آئین کے آرٹیکل 35اے میں ہے۔ اس آرٹیکل کے تحت یہ اختیار مقبوضہ کشمیر کی اسمبلی کو ہے کہ وہ ریاست کے مستقل شہری کی تعریف متعین کرے۔ مقبوضہ کشمیر کا مستقل شہری ہی ریاست میں جائیداد خرید سکتا ہے۔بھارتی انتہا پسندوں نے عدالتوں میں اس آرٹیکل کے خلاف درخواستیں دائر کر رکھی ہیں اور وہ چاہتے ہیں کہ آرٹیکل 35اے کو ختم کر دیا جائے تاکہ مقبوضہ کشمیر میں مسلم اکثریت ختم کر کے مقبوضہ کشمیر پر بھارت کا غاصبانہ قبضہ مستحکم بنایا جا سکے۔

شعبہ اکاؤنٹس میں 500 جونیئر آڈیٹرز اور 200 سینئر آڈیٹرز جبکہ ریلوے پولیس میں 5سو کانسٹیبل اور 25 اے ایس آئی بھرتی کیے جائیں گے۔ بھرتی کا عمل آئندہ ماہ سے مرحلہ وار شروع کیا جائے گا
لاہور (ایمرا نیوز آن لائن)وزارت ریلوے نے ملک بھر کی تمام ڈویڑنز میں خالی آسامیوں پر بھرتیوں کا فیصلہ کیا ہے، اس حوالے سے 700 بھرتیاں اکاؤنٹس ڈپارٹمنٹ اور 500 بھرتیاں ریلوے پولیس میں ہوں گی،ریلوے کے شعبہ اکاؤنٹس میں 500 جونیئر آڈیٹرز اور 200 سینئر آڈیٹرز جبکہ ریلوے پولیس میں 5سو کانسٹیبل اور 25 اے ایس آئی بھرتی کیے جائیں گے۔ تمام اسامیوں پر بھرتی کا عمل آئندہ ماہ سے مرحلہ وار شروع کیا جائے گا ۔ وزارت ریلوے نے شعبہ اکاؤنٹس اور ریلوے پولیس میں عرصہ دراز سے خالی پوسٹوں پر بھرتی کا فیصلہ کیا ہے اس ضمن میں آئندہ ماہ سے بھرتی کے حوالے سے خواہش مند افراد سے درخواستیں طلب کیا جائیں گی اور بھرتی کا عمل باقاعدہ طور پر شروع ہوجائے گا۔ذرائع کا کہنا ہے سینئر آڈیٹرز کے لیے بی کام کی شرط رکھی گی ہے جب کہ سینئرز آڈیٹرز کی بھرتی کا عمل پبلک سروس کیمشن کے ذریعے پورا کیا جائے۔ جونیئر آڈیٹرز کا تقرر محکمانہ طور پر کیا جائے گا اور ریلوے کی جن ڈویڑنز میں عرصہ دراز سے اسامیاں خالی ہیں انہیں مکمل کیا جائے گا۔ریلوے کے مطابق ان بھرتیوں سے کام کی رفتار بہتر ہوگی کیونکہ اس وقت اسٹاف پر ایک سے زائد سیٹس کا اضافی بوجھ ہے جس سے کام کی رفتار بھی سست ہے۔ اسی طرح ریلوے پولیس میں اے ایس آئی کی بھرتی نجی ٹیسٹ لینے والی کمپنی کے ذریعے کی جائے گی۔ اے ایس آئی کی پوسٹ کے لیے ٹیسٹ نجی کمپنی لے گی اور فیزیکلی ٹیسٹ اور انٹرویو ریلوے پولیس کے افسران خود لیں گے ریلوے پولیس میں کانسٹیبل کی بھرتی کا عمل محکمانہ طور پر کیا جائے گا بھرتی کے دوران جن ڈویڑنز میں ریلوے پولیس سٹاف کی کمی ہے وہ بھی مکمل ہوجائیں گی اور ریلو ے پولیس میں بھی کام کی رفتار خاطرخواہ بہتر ہوگی۔ اس وقت ریلوے پولیس میں بھی اسٹاف کی کمی ہے بھرتی کے عمل کے بعد ریلوے پولیس کی کارکردگی بہتر ہوگی۔