Tag neelumvaleey

مذاکرات کے خاتمے یا موخرکرنیکا اعلان نہیں ہوا،بھارت نے سکھوں کوروکنے کی مہم شروع کردی
اسلا م آباد(ایمرا نیوز آن لائن)پلوامہ حملے کے بعد کرتارپورکوریڈورکے حوالے سے پاکستان اور بھارت کے مابین ہونے والے پہلے باضابطہ مذاکرات کا انعقادخطرے میں پڑگیا ہے۔ میڈیا رپورٹ کے مطا بق پلوامہ حملے کے بعد بھارت کی پاکستان کے خلاف بے بنیاد الزام تراشی اور دھمکیوں کے بعد کرتارپورکوریڈورکے حوالے سے پاکستان اور بھارت کے مابین ہونے والے پہلے باضابطہ مذاکرات کا انعقادخطرے میں پڑگیا ہے، جبکہ بھارتی ایجنسیوں نے سکھوں کومذہبی رسومات کی ادائیگی کے لیے پاکستان آنے سے روکنے کی مہم بھی شروع کردی، بھارت پہلے دن سے ہی کرتارپورکوریڈورکی تعمیرکے حوالے سے زیادہ گرم جوشی نہیں دکھا رہا۔پاکستان کرتارپورکوریڈورکی تعمیرکا 40 فیصد سے زیادہ کام مکمل کرچکا ہے جبکہ بھارت نے ابھی تک صرف ڈیرہ بابانانک پرچیک پوسٹ کے لیے جگہ حاصل کی ہے۔بھارت یہ الزام تراشی کرتا رہا ہے کہ پاکستان کرتارپورکوریڈورکے ذریعے خالصتان تحریک کودوبارہ متحرک کررہا ہے تاہم پاکستان نے ہمیشہ ان الزامات کی تردیدکی ہے۔کرتارپورکوریڈورکے حوالے سے سب سے فعال کرداراداکرنے والے بھارتی وزیرنوجوت سنگھ سدھوکو بھی تنقیدکا نشانہ بنایا جارہاہے۔

بھارت نے اگر جنگ مسلط کی تو ہم جوابی اقدام کے لئے تیار ہیں،سیکریٹری جنرل خطے میں مشکل سمجھتے ہیں توحل بھی انہی کو نکالنا ہے،عالمی ادارہ خطے میں کشیدگی کم کرانے میں کردار ادا کرے،مستقل مندوب کی اقوام متحدہ کے سیکریٹری جنرل سے ملاقات
نیویارک(ایمرا نیوز آن لائن) اقوام متحدہ میں پاکستان کی مستقل مندوب ڈاکٹرملیحہ لودھی نے خطے میں بڑھتی کشیدگی پر کہا ہے کہ عالمی ادارہ بھارتی دھمکیوں کا نوٹس لیتے ہوئے خطے میں کشیدگی کم کرانے میں کردار ادا کرے۔اقوام متحدہ میں پاکستان کی مستقل مندوب ملیحہ لودھی نے اقوام متحدہ کے سیکریٹری جنرل سے ملاقات کی اورسیکریٹری جنرل انتونیوگوتریس کوخطے کی بگڑتی صورتحال سے آگاہ کرتے ہوئے کہا کہ عالمی ادارہ خطے میں کشیدگی کم کرانے میں کردار ادا کرے۔ڈاکٹرملیحہ لودھی نے کہا اقوام متحدہ بھارتی دھمکیوں اور جارحانہ بیانات کا نوٹس لے، سیکریٹری جنرل خطے میں مشکل سمجھتے ہیں توحل بھی انہی کو نکالنا ہے۔ ملیحہ لودھی نے مزید کہا کہ مقبوضہ کشمیرمیں مسلمانوں پربھارتی مظالم کانوٹس لیا جائے۔ملیحہ لودھی نے کہا مسئلہ کشمیر پر سکیورٹی کونسل کی قراردادیں موجود ہیں، پاک بھارت کشیدگی کم کرانے کیلئے اقوام متحدہ کی سکیورٹی کونسل کو آگے آنا چاہیے۔ انہوں نے بتایا کہ جنرل اسمبلی کے سیکرٹری جنرل اور صدر سے خطے کی صورتحال کے پیش نظر کردار ادا کرنے کی اپیل بھی کی ہے۔ملیحہ لودھی نے اقوام متحدہ کی توجہ مقبوضہ کشمیر میں جاری غاصبانہ کارروائیوں کی جانب بھی دلائی۔ انہوں نے کہا کہ ملاقات میں اس حقیقت کا ذکر کیا گیا ہے کہ پلوامہ واقعہ بھارتی قابض فوج کی کشمیر میں قائم کردہ شدت کی فضا کا نتیجہ ہے، اس واقعے کو پاکستان سے جوڑ کر بھارت خطے کو جنگ میں دھکیل رہا ہے جو افغان امن عمل پر بھی اثر انداز ہو سکتا ہے، پاکستان نہیں چاہتا کہ خطے میں صورت حال کشیدہ ہو تاہم بھارت نے اگر جنگ مسلط کی تو ہم جوابی اقدام کے لئے تیار ہیں۔واضح رہے کہ گزشتہ ہفتے مقبوضہ کشمیر کے ضلع پلوامہ میں خودکش حملے میں 46 بھارتی فوجی ہلاک اور متعدد زخمی ہوگئے تھے۔ بھارت نے اس حملے کا الزام پاکستان پر لگایا ہے تاہم پاکستان نے اس الزام کو یکسر مسترد کرتے ہوئے کہا ہے کہ پاکستان بھارت کی کسی بھی کارروائی کا بھرپور جواب دے گا۔

پاکستان اور بھارت کے درمیان بڑھتی کشیدگی پر گہرے تحفظات ہیں، دونوں ممالک کو زیادہ سے زیادہ تحمل کا مظاہرے کرنے اور کشیدگی کم کرنے کے فوری اقدامات اٹھا ئیں ،سیکریٹری جنرل انتونیو گیوتیرس
نیو یارک(ایمرا نیوز آن لائن)اقوام متحدہ کے سیکریٹری جنرل انتونیو گیوتیرس نے ’پاکستان اور بھارت کے درمیان بڑھتی کشیدگی‘ پر گہرے تحفظات کا اظہار کرتے ہوئے دونوں ممالک کو زیادہ سے زیادہ تحمل کا مظاہرہ کرنے کو کہا ہے۔رپورٹ کے مطابق اقوام متحدہ کے سیکریٹری جنرل نے دونوں ممالک کے درمیان اس کشیدگی کو کم کرنے کے لیے ’ثالثی‘ کی بھی پیش کش کی ہے۔اقوام متحدہ کے سیکریٹری جنرل کے ترجمان اسٹیفین ڈیوجارک نے میڈیا بریفنگ کے دوران ایک سوال کے جواب میں کہا کہ ’سیکریٹری جنرل نے دونوں ممالک کو زیادہ سے زیادہ تحمل کا مظاہرے کرنے اور کشیدگی کم کرنے کے فوری اقدامات اٹھانے کی ضرورت پر زور دیا‘۔انہوں نے بتایا کہ انتونیو گیوتیرس نے مزید کہا کہ اگر دونوں ممالک کو قبول ہو تو وہ ثالت کا کردار ادا کرنے کے لیے بھی تیار ہیں۔واضح رہے کہ ماضی میں پاکستان نے اقوام متحدہ کے سربراہ کی اس طرح کی پیش کش کو قبول کیا تھا لیکن بھارت اس میں شامل ہونے سے گریز کررہا تھا اور وہ اس مسئلے کو دوطرفہ تنازع قرار دیتا ہے۔خیال رہے کہ گزشتہ روز پاکستان نے بھارت کے زیر تسلط کشمیر کے علاقے پلوامہ میں حملے کے بعد بھارت کی جانب سے الزام تراشیوں اور دھمکیوں کے بعد اقوام متحدہ سے مداخلت کا مطالبہ کیا تھا۔وزیر خارجہ شاہ محمود قریشی کی جانب سے اقوام متحدہ کے سیکریٹری جنرل انتونیو گوتیرس کو لکھے گئے خط میں کہا گیا تھا کہ ’میں فوری طور پر ا?پ کی توجہ بھارت کی جانب سے پاکستان کو دی جانے والی دھمکیوں کے نتیجے میں خطے کی خراب ہوتی سیکیورٹی صورتحال کی جانب مبذول کروانا چاہتا ہوں‘۔انہوں نے لکھا تھا کہ پلوامہ میں بھارت کے مطابق بھارتی سینٹرل ریزرو پولیس فورس پر حملہ کشمیر کے رہائشی نے کیا جبکہ اسے بغیر کسی تصدیق اور تفتیش کے پاکستان سے منسوب کیا جارہا ہے، اپنے داخلی سیاسی مقاصد کے لیے بھارت جان بوجھ کر پاکستان کے خلاف دشمنی کا پیغام دے رہا اور ماحول کشیدہ کررہا۔

پاکستان اور اس کی عوام کا بہت احترام کرتے ہیں، ہم ہر حال میں تعاون اور پاکستانی عوام کو فائدہ پہنچانے کے جذبے سے سرشار ہو کر پاکستانی قوانین اور ضوابط کے عین مطابق اپنی تمام تر کاروباری سرگرمیاں انجام دے رہے ہیں،چینی کمپنی
بیجنگ(ایمرا نیوز آن لائن)پاک چین اقتصادی راہداری منصوبے کے سکھر۔ملتان موٹر وے بنانے کا کنٹریکٹ حاصل کرنے والی چینی کمپنی نے وزیر مواصلات مراد سعید کی جانب سے 70 ارب روپے کے کرپشن الزامات پر گہرے دکھ و افسوس کا اظہار کردیا۔کمپنی نے ایک جاری بیان میں کہا کہ چائنا اسٹیٹ کنسٹرکشن انجینئرنگ کارپوریشن لمیٹڈ، ان کی جانب سے بنائے گئے سکھر۔ملتان موٹر وے منصوبے پر میڈیا میں لگائے جانے والے بے بنیاد الزامات پر شدید صدمے سے دوچار ہے۔خیال رہے کہ مراد سعید نے حال ہی میں الزام عائد کیا تھا کہ مسلم لیگ (ن) کی حکومت نے موٹر وے کی تعمیر کے لیے 259 ارب روپے کی مفاہمتی یادداشت پر دستخط کیے تھے لیکن مالی بدانتظامی کے سبب یہ لاگت بڑھ کر 292 ارب روپے تک پہنچ گئی جس کی وجہ سے منصوبے کو بھاری نقصان اٹھانا پڑا۔انہوں نے شریف برادران، سابق وزیر برائے پلاننگ اور منصوبہ بندی احسن اقبال اور چینی کمپنی کے پاکستان میں ڈائریکٹر جاوید صدیق پر کرپشن الزامات عائد کرتے ہوئے کہا کہ احسن اقبال نے لاگت میں فرق کی رقم 70 ارب ڈالر بتائی تھی۔چائنا اسٹیٹ کنسٹرکشن انجینئرنگ کارپوریشن نے اپنے اعلامیے میں مزید کہا کہ ہم پاکستان اور اس کے لوگوں کا بہت احترام کرتے ہیں، ہم ہر حال میں تعاون اور پاکستانی عوام کو فائدہ پہنچانے کے جذبے سے سرشار ہو کر پاکستانی قوانین اور ضوابط کے عین مطابق اپنی تمام تر کاروباری سرگرمیاں انجام دے رہے ہیں۔چینی کمپنی نے مزید کہا کہ کارپوریشن نے لاہور کو کراچی سے ملانے والی موٹر وے کی تعمیر کے منصوبے پر جولائی 2013 میں حکومت پاکستان کے ساتھ ایک مفاہمتی یادداشت پر دستخط کیے تھے، اس معاہدے کے تحت کسی کو بھی پابند نہیں کیا گیا تھا اور یہ مدت ایک سال کے لیے تھی جسے 4 جولائی 2014 کو ختم ہونا تھا البتہ بولی کا عمل جون 2015 میں شروع ہوا اور اس مفاہمتی یادداشت کا بولی کے عمل پر کوئی اثرورسوخ نہیں تھا۔کمپنی نے مزید کہا کہ بولی کے شفاف عمل کے بعد چائنا اسٹیٹ کنسٹرکشن انجینئرنگ کارپوریشن کو سب سے کم بولی دینے والی کمپنی قرار دیا گیا اور ساتھ ساتھ یہ دعویٰ کیا گیا کہ عالمی تعمیرات کے شعبے میں فزیبلیٹی اسٹڈی رپورٹ میں دی گئی تقریباً لاگت اور بولی کی رقم میں فرق ایک عام سی بات ہے، مزید یہ بھی کہا گیا کہ منصوبہ بھرپور طریقے سے جاری ہے اور 400 کلومیٹر طویل موٹر وے کو 3 سال میں مکمل کر لیا جائے گا۔جب اس سلسلے میں سابق وزیر احسن اقبال سے رابطہ کیا تو انہوں نے مراد سعید کے بیان کو پاک چین اقتصادی منصوبے کو متنازع بنانے کی خطرناک کوشش قرار دیا۔احسن اقبال نے کہا کہ تحریک انصاف کی حکومت یہ بات تک نہیں جانتی کہ پاک چین اقتصادی راہدری کے تمام منصوبوں کا جائزہ چین اور پاکستان کے اآزاد ماہرین نے لیا تھا، منصوبے کی لاگت میں اضافہ چین کی جانب سے معیار بہتر بنانے کی وجہ سے آیا تاکہ اس منصوبے کو قدرتی آفات سے بچانے کے قابل بنایا جا سکے۔ان کا کہنا تھا کہ اس منصوبے کو قومی اقتصادی کونسل کی ایگزیکٹو کمیٹی نے منظوری دی تھی جہاں تمام صوبائی وزرائے خزانہ موجود تھے۔

اسلام آباد(ایمرا نیوزآن لائن رپورٹ اظہر محمود سے) ٹوئٹر کی انتظامیہ نے پاکستانی دفتر خارجہ کے ترجمان ڈاکٹر فیصل کا ذاتی ٹوئٹر اکاؤنٹ معطل کر دیاہے۔ذرائع کا کہنا ہے کہ ٹوئٹر انتظامیہ کی جانب سے ترجمان دفتر خارجہ ڈاکٹر محمد فیصل کا ذاتی ٹوئٹر اکاؤنٹ بظاہر کشمیر میں بھارتی مظالم اجاگر کرنے پر بھارت کی شکایت پر معطل کیا گیا ہے۔ذرائع کا کہنا ہے کہ بھارتی حکومت نے ٹوئٹر انتظامیہ کو ڈاکٹر فیصل کے اکاؤنٹ سے متعلق شکایت کی تھی جس پر ٹوئٹر انتظامیہ نے ڈاکٹر فیصل کا ذاتی اکاؤنٹ معطل کردیا۔ڈاکٹر فیصل اپنے ذاتی ٹوئٹر اکاؤنٹ سے کلبھوشن کیس کے بارے میں پل پل کی خبر دے رہے تھے، 2 ہفتے قبل بھی ڈاکٹر محمد فیصل کے ٹوئٹر اکاؤنٹ پر حملہ کیا گیا تھا۔بھارتی ہیکرز نے دفتر خارجہ کی ویب سائٹ پر بھی سائبر حملہ کیا تھا جسے ناکام بنا دیا گیا تھا۔

پشاور(ایمرا نیوزآن لائن رپورٹ عمر خالد سے) پشاور میں فائرنگ کے واقعات میں 8سالہ بچی جاں بحق اور طالب علم زخمی ہوگیا۔پہلا واقعہ تھانہ یکہ توت کی حدود میں واقع دیر کالونی میں ہوا جہاں منشیات فروش کی لڑائی کے دوران فائرنگ کا تبادلہ ہوا جس میں 2 بچیاں زخمی ہوگئیں، جنہیں فوری طور پر اسپتال پہنچایا گیا جہاں ایک بچی دم توڑ گئی۔دوسرا واقعہ پخہ غلام میں ہوا جہاں اسکول میں ایک طالب علم سے پستول چل گیا، جس سے 2 طالب علم زخمی ہوگئے۔ ایک زخمی طالب علم کی حالت تشویشناک ہے۔پولیس کے مطابق پرنسپل ، طالب علم کے والد اور پستول دینےو الا دوست ایف آئی آر میں نامزد کیا گیا ہے۔

جنگ چھیڑنا آسان لیکن ختم کرنا مشکل ہوتی ہے ،پلوامہ واقعہ کی آزادانہ تحقیقات کی پیش کش کرتا ہوں ,کشمیری نوجوانوں میں موت کا خوف ختم ہو چکا ، بھارتی قیادت کو سمجھنا چاہئے کہ افغان مسئلہ کی طرح مسئلہ کشمیر بھی بات چیت کے ذریعے ہی حل ہو گا ،الزام تراشی کا سلسلہ بند کیا جائے ,وزیر اعظم کا پالیسی بیان
اسلام آباد (ایمرا نیوز آن لائن)وزیر اعظم عمران خان نے کہا ہے کہ جنگ کسی مسئلے کا حل نہیں ۔ لیکن بھارت نے اگر حملہ کیا تو ہم سوچیں گے نہیں بلکہ بھرپور جواب دیا جائے گا ۔جنگ شروع کرنا تو آسان لیکن اس کا اختتام انسان کے بس کی بات نہیں اس کے کیا نتائج نکلیں گے ۔یہ اﷲ ہی بہتر جانتا ہے ۔ پاکستان بھارت کے ساتھ دہشتگردی کے معاملے پر بات چیت کے لئے تیار ہے پلوامہ واقعہ کا بغیر ثبوت پاکستان پر الزام لگایا گیا ۔ ہمیں ایسے واقعات کا کیا فائدہ پہنچتا ۔ اس کے باوجود ثبوت دیئے جائیں ہم کارروائی کے لئے تیار ہیں ۔ منگل کے روز وزیر اعظم نے پا لیسی بیا ن دیتے ہوئے کہا کہ مقبوضہ کشمیر میں پلوامہ واقعہ کا الزام پاکستان پر لگایا گیا ہم سعودی ولی عہد کے دورے کی تیاری میں تھے جس کی وجہ سے خاموش رہا ۔ بھارت نے بغیر شواہد پاکستان پر الزام لگایا ۔ہم نے پندرہ بر س دہشتگر دی کی جنگ سے مقابلہ کیا ، بھا رت نے الزام تو لگا یا لیکن یہ نہ سو چا اور سمجھا گیا کہ اسمیں پاکستان کا کیا فائدہ ہے۔ پاکستان امن کی طرف جا رہا ہے ایسے الزامات سے فائدہ نہیں اٹھایا جا سکتا ۔ میں بھارت سے پوچھنا چاہتا ہوں کہ کیا وہ ماضی میں ہی پھنسا رہنا چاہتا ہے ہم خطے میں استحکام چاہتے ہیں ۔اگر ثبوت دیئے جائیں تو ہم اس پر کارروائی کرنے کے لئے تیار ہیں ۔ اگر یہی صورتحا ل رہی تو آگے بڑھنا مشکل ہے ہم بھارت کے ساتھ دہشتگردی پر بات چیت کے لئے تیار ہیں ۔ کوئی بھی مسئلہ بات چیت کے ذریعے ہی حل کیا جا سکتا ہے جس طرح افغانستان کا مسئلہ حل ہو رہا ہے ۔ہم بھارت کو پلوامہ واقعہ کی آزادانہ تحقیقات کی پیش کش کرتے ہیں انہوں نے کہا کہ بھارت میں نئی سوچ آنی چاہئے ایسی کیا بات ہے کہ کشمیری نوجوانوں میں موت کا خوف ختم ہو چکا ہے ۔وزیر اعظم کا کہنا تھا کہ بھارتی سیاستدانوں کی آوازیں آ رہی ہیں کہ پاکستان سے بدلہ لینا چاہئے ۔ میں بھارت پر واضح کر دینا چاہتا ہوں کہ اگر پاکستان پر کسی قسم کی مہم جوئی کی گئی تو ہم سوچیں گے نہیں بلکہ بھرپور جواب دیں گے ۔جنگ کسی مسئلے کا حل نہیں ہے۔وزیر اعظم نے کہا کہ جنگ شروع کرنا انسان کے ہاتھ میں ہوتا ہے لیکن ختم کرنا انسان کے ہاتھ میں نہیں رہتا۔ دہشتگردی اس خطے کا بڑا ایشو ہے ہم اسے ختم کرنا چاہتے ہیں فوج کے ذریعے مسئلہ حل کرنا ہے تو اس میں کامیابی نہیں ہو گی اس لئے افغان مسئلے کی طرح مسئلہ کشمیر بھی بات چیت کے ذریعے حل کرنا ہو گا ۔

اسلام آباد (ایمرا نیوز آن لائن) وزیر خارجہ شاہ محمود قریشی 24 سے 27 فروری تک جاپان کا دورہ کریں گے جہاں پر وہ جاپانی ہم منصب سے دوطرفہ تعلقات سمیت عالمی امور پر تبادلہ خیال کریں گے ۔ تفصیلات کے مطابق وزیر خارجہ شاہ محمود قریشی 24 فروری بروز اتوار سے 27 فروری تک جاپان کا دورہ کریں گے جہاں پر وہ جاپانی ہم منصب سمیت وہاں پر دیگر اعلی عہدیداروں سے ملاقاتیں کریں گے اور انہیں سرمایہ کاری کے حوالے سے اعتماد میں لیں گے اس کے علاوہ دوطرفہ تعلقات سمیت عالمی امور پر بھی تبادلہ خیال کیا جائے گا ۔( جاوید/ اشفاق)

بھارتی تاجروں نے تمام آرڈرز منسوخ کردیئے،بھارتی تاجروں نے 16 فروری کو جانے والا کروڑوں کا مال واپس پاکستان بھیجنے کا فیصلہ کرلیا ۔ ذرائع وزارت تجارت
اسلام آباد (ایمرا نیوز آن لائن)پلوامہ میں ہونے والے حملے کے بعد پاکستان اور بھارت کے تعلقات مزید کشیدہ ہوتے جا رہے ہیں۔میڈیا رپورٹس میں بتایا گیا ہے کہ پاکستان اور بھارت کے درمیان تجارت کا سلسلہ بند ہو چکا ہے۔ذرائع وزارت تجارت کے مطابق بھارتی تاجروں نے تمام آرڈرز منسوخ کردیئے ہیں۔جبکہ پچھلے دو روز سے پاکستان سے کوئی بھی مال بھارت نہیں جاسکا۔سیمنٹ کے 350 بڑے ٹرک واہگہ بارڈر پر کھڑے ہیں۔سوڈا،چمڑا،سالٹ اور کیمیکل کے سیکڑوں ٹرک واہگہ بارڈر پر موجود ہیں۔وزارت تجارت کے ذرائع نے مزید بتایا کہ بھارتی تاجروں نے 16 فروری کو جانے والا کروڑوں کا مال واپس پاکستان بھیجنے کا فیصلہ کرلیا ہے۔بھارت میں پاکستانی اشیا پر دو سو فیصد ریگولیٹری ڈیوٹی عائد کردی گئی ہے۔بھارتی تاجروں نے ایڈوانس میں دیے گئے کروڑوں روپے واپس مانگ لیے ہیں۔جبکہ دوسری جانب وزیر خارجہ شام محمود قریشی سے بھارت میں تعینات پاکستانی ہائی کمشنر سہیل محمود کی ملاقات ہوئی ہے۔پلوامہ معاملے پر ہندوستان کی طرف سے پاکستان پر لگائے جانے والے الزامات پر تبادلہ خیال ہوا۔جب کہ ملاقات میں خطے کی مجموعی صورتحال کے حوالے سے بھی تبادلہ خیال ہوا۔

مودی سرکار کو پاکستان اور چین پر الزام عائد کرنے کے بجائے اپنی پالیسیوں اور سیکیورٹی اقدامات پر نظر ثانی کرنا چاہیے
بیجنگ (ایمرا نیوز آن لائن)چین کے سرکاری میڈیا نے بھارت کی جانب سے پلوامہ حملے کا ذمہ دار پاکستان کو ٹھہرانے اور مسعود اظہر کو اقوام متحدہ میں دہشت گرد قرار دینے کی کوششوں میں رکاوٹ ڈالنے کا الزام چین پرعائد کرنے کی سخت الفاظ میں مذمت کی ہے۔چینی سرکاری میڈیا نے بھارت کو بغیر تصدیق کے الزام تراشیاں کرنے سے گریز کرنے کا مشورہ دیتے ہوئے کہا کہ مودی سرکار کو پاکستان اور چین پر الزام عائد کرنے کے بجائے اپنی پالیسیوں اور سیکیورٹی اقدامات پر نظر ثانی کرنا چاہیے۔چین نے مسعود اظہر کا نام اقوام متحدہ کی دہشت گردوں کی فہرست میں شامل کرنے کی کوششوں میں رکاوٹ بننے کے بھارتی الزام کو مسترد کرتے ہوئے کہا کہ بھارت اقوام متحدہ میں مسعود اظہر کے خلاف ٹھوس شواہد پیش کرنے میں ناکام رہا اور اب ملبہ چین پر ڈال رہا ہے۔اسی طرح بھارت نے بغیر تصدیق کے ایک بار پھر پلوامہ حملے کا الزام پاکستان پرعائد کرکے ثابت کردیا ہے کہ وہ اپنی پالیسی اور سیکیورٹی کی کمزوریوں کو درست کرنے کا ارادہ نہیں رکھتا، بہتر ہوگا بھارت مسعود اظہر کے خلاف ٹھوس شواہد جمع کرنے میں اپنی توانائی صرف کرے۔واضح رہے کہ 14 فروری کو مقبوضہ کشمیر کے ضلع پلوامہ میں سیکیورٹی فورسز پر خودکش حملے میں بھارتی فوج کے 44 اہلکار ہلاک ہوگئے تھے جس کا الزام پاکستان پر دھرنے کی روایتی کوشش کی۔