Tag News

پشاور(ایمرا نیوزآن لائن رپورٹ اظہر محمود سے) پشاور کے علاقے حیات آباد میں نامعلوم افراد کی فائرنگ سے پشاور ہائیکورٹ کے جسٹس محمد ایوب اور اُن کا ڈرائیور زخمی ہو گئے جنہیں حیات آباد میڈیکل کمپلکس منتقل کر دیا گیا۔پولیس کا کہنا ہے موٹر سائیکل سوار حملہ آوروں نے گاڑی پرپستول اور کلاشنکوف سے فائرنگ کی ۔چیف جسٹس پشاور ہائیکورٹ جسٹس وقار احمد سیٹھ کا کہنا ہے کہ جسٹس ایوب کے بازو پر گولی لگی ،ان کی حالت خطرے سے باہر ہے۔ ان کا مزید کہنا ہے کہ چیف جسٹس پشاور ہائیکورٹ نے کہا کہ پولیس کو حملہ آوروں کی جلد گرفتاری کا کہا ہے، جلد تفتیش کر کے آگاہ کیا جائے۔خیبر پختونخوا بارکونسل نے صوبے بھر میں ہڑتال کااعلان کردیا۔ وکیل عدالتی کارروائی میں حصہ نہیں لیں گے۔

لاہور(ایمرا نیوزآن لائن رپورٹ عمر خالد سے) پاک بھارت کشیدگی کے باعث لاہور سے بھارت جانے والی سمجھوتہ ایکسپریس معطل کر دی گئی ہے۔ایڈیشنل جنرل منیجر ریلوے زبیر شفیع کے مطابق سمجھوتہ ایکسپریس کو پاک بھارت کشیدگی کے باعث تاحکم ثانی معطل کیا گیا ہے۔واضح رہے کہ شیڈول کے مطابق سمجھوتہ ایکسپریس ہفتہ میں 2 دن پیر اور جمعرات کی صبح 8 بجے لاہور سے بھارت کے لیے روانہ ہوتی تھی۔دوسری جانب لاہور سے دہلی جانے والی دوستی بس کے 3 مسافر واہگہ بارڈر پہنچ گئے ہیں جو کسٹم اور امیگریشن کلیئرنس کے بعد بھارت روانہ ہوں گے۔

پوری پاکستانی قوم پاک آرمی کے ساتھ ہے،میگھا،بھارت کا مکروہ چہرہ بے نقاب ہو چکا ہے ماہ نور،ہمارے جذبے بلند ہیں ہم پاک فوج کے سنگ ہیں،با اصغر وطن عزیز کی سلامتی کیلئے جان بھی قربان ہے ،بھارت کو پہلا سرپرائز مل گیا ہے ،ثنا نور ،اجمل ملک،بھارت کو ابھی اور کفارہ دا کرنا پڑے گا اسے اور سرپرائز بھی ملے گا،فرح ناز
لاہور (ایمرا نیوز آن لائن)پاکستان کی حدود میں بھارتی فضائیہ کی دراندازی پر پاکستان شوبز شخصیات کا ردوعمل۔تفصیلات کے مطابق امن کے ازلی دشمن بھارت کو منہ توڑ جواب دینے کیلئے شوبز شخصیات بھی پاک فوج کے شانہ بشانہ ہیں ،اداکارہ ماہ نو ر کا کہنا ہے کہ بھارت کا مکروہ چہرہ بے نقاب ہو چکا ہے،اداکار وگلو کارہ میگھا نے بھی ایک ویڈیو بیان میں کہا کہ مودی کا جب دل کرتا ہے بن ویزے کے پاکستان آتا ہے اور دعوت کھا کر واپس بھارت جاکے پاکستا ن سے بدلہ لینے کی باتیں کرتا ہے مودی سرکار یہ جان لے کہ پوری پاکستانی قوم پاک آرمی کے ساتھ ہے ،پروڈیوسر ورائٹر با اصغر علی نے کہا کہ مودی سرکار امن کا ازلی دشمن ہے اب بھی نریندر مودی انتخابات جیتنے کی دھن میں خطے کے امن کے درپے ہے اور ہماری پاک فوج نے بھارت کو پہلا سرپرائز دیدیا ہے،اسی طرح مصنف و ہدایتکار ڈاکٹر اجمل ملک نے اپنے جذبات کا اظہار کیا کہ وطن عزیز پیارے پاکستان کی سلامتی کیلئے جان بھی قربان ہے ،فلمسٹار فرح ناز کا کہنا ہے بھارت کو پاکستانی کی طرف سے پہلا سرپرائز مل گیا ہے مگر ابھی بھارت کو اورا کفارہ دا کرنا پڑے گااس کے علاوہ ،ایم اے تبسم،افشا زیبی،ثنا نور ،غزل شاہ،عابدہ بیگ ،ڈاکٹر اجمل ملک،شاہد خان،وفا چوہدری،افضل ماہی،بیدیا،انمول پرنس،چاندنی ملک امانت راہی ودیگرنے اپنے جذبات کہا کہ پاک فوج دشمن کا منہ توڑ جواب دینے کی بھر پور صلاحیت رکھتی ہے اورپوری پاکستانی قوم متحد اور اپنی پاک فوج کے جوشیلے نوجوانوں کے شانہ بشانہ کھڑی ہے ،پاکستان کا ہر فرد مرد مجاہد ہے اور وطن عزیز کے تحفظ و دفاع کیلئے اپنے خون ہر قطرہ بہانے کیلئے تیار ہے ۔

ہمیں بھارتی فلموں کی پاکستان میں نمائش کے بجائے اپنی خود کی فلمیں بنانی چاہئیں ،انہیں اپنے ملک میں ریلیز کرنا چاہیے پابندی کا فیصلہ پاکستانی سینما کے لیے اچھا اقدام ہے قوی خان ، مسعود اختر ،شان ، فیصل قریشی ،مصطفی قریشی ، ندیم سمیت دیگر کا ردعمل
لاہور (ایمرا نیوز آن لائن)پاکستان میں بھارتی فلموں کی نمائش پر مکمل طور پر پابندی عائد کردی گئیجس کا پاکستانی فنکاروں نے خیر مقدم کیا ہے ۔ تفصیلات کے مطابق سنیما ایگزیبیٹر ایسوسی ایشن نے بھارتی فلموں کا بائیکاٹ کردیا ہے جس کے بعد کوئی بھی بھارتی فلم پاکستان میں ریلیز نہیں کی جائے گی۔حکومت کی طرف سے فلموں کی پابندی کے ساتھ پیمرا کو بھی اس بات کی ہدایت کردی گئی ہے کہ وہ پاکستان میں چلنے والے بھارتی اشتہارات پر کارروائی کرے۔پاکستانی فنکاروں قوی خان ، مسعود اختر ،شان ، فیصل قریشی ،مصطفی قریشی ، ندیم ،شفقت چیمہ ،فہد مصطفی ، مہوش حیات ،ماورا حسین ،اسلم شیخ سمیت دیگر نے پاکستان میں بھارتی فلموں کی نمائش پر پابندی کا خیر مقدم کرتے ہوئے اسے پاکستانی سینما کے لیے ایک اچھا اقدام قرار دیا ہے۔انہوں نے کہا کہ اب آگے بڑھنے کا وقت ہے، دشمن پڑوسی ملک کی فلموں پرانحصار کرنا کبھی بھی ہماری منصوبہ بندی نہیں تھی، ہم نے کبھی بھی اس بات پرانحصار نہیں کیا کہ بھارتی یہاں آئیں اور ہمارے ملک میں سینما بنائیں۔ ہم نے اپنے ملک میں اپنے سینما ہاسز بنائے، بالکل اسی طرح ہمیں بھارتی فلموں کی پاکستان میں نمائش کے بجائے اپنی خود کی فلمیں بنانی چاہئیں اورانہیں اپنے ملک میں ریلیز کرنا چاہیے۔

عربی زبان پر بھی عبور حاصل ہے، وہ گلوکاری کے ساتھ عربی زبان میں وائس اوور کا فری لانس کام بھی کرتے ہیں
ریاض (ایمرا نیوز آن لائن) پاکستان اور سعودی عرب کے تاریخی ثقافت کو مزید ایک دوسرے کے قریب لانے کے لیے جہاں دونوں ممالک ریاستی سطح پر بھی کوشاں ہیں، وہیں سعودی عرب میں مقیم پاکستانی نژاد گلوکار نعیم سندھی بھی اس تعاون کو بڑھانے میں اپنا کردار ادا کر رہے ہیں۔نعیم سندھی گزشتہ کئی سال سے سعودی عرب میں گلوکاری کے ذریعے نہ صرف اپنے صوبہ سندھ بلکہ پاکستان کے چاروں صوبوں کی موسیقی کے ساتھ ساتھ عرب موسیقی کو بھی پیش کرکے ایک نمایاں مقام بنانے کے لیے کوشاں ہیں۔23 سالہ نعیم سندھی اس وقت سعودی عرب کے ساحلی اور پر رونق شہر جدہ میں رہتے ہیں اور وہیں ان کی پیدائش ہوئی تھی۔نعیم سندھی کے والدین کا تعلق صوبہ سندھ کے ضلع جامشورو کے شہر سن سے ہے اور وہ پچاس سال قبل روزگار کے سلسلے میں سعودی عرب منتقل ہوگئے تھے۔
شہریت نہ لینے کے حوالے سے پوچھے گئے سوال پر نعیم کا کہنا تھا کہ دراصل ان کے دادا نہیں چاہتے تھے کہ ان کی نسلیں اپنے وطن کو بھلا کر سعودی عرب کے ہوکر رہ جائیں، اس وجہ سے نہ تو ان کے والدین نے شہریت لی اور نہ ہی انہوں نے کبھی اس حوالے سے سوچا۔سعودی عرب میں تعلیم اور تربیت لینے والے نعیم سندھی نے اگرچہ باضابطہ طور پر نہ تو سندھی زبان کی تعلیم حاصل کی ہے اور نہ ہی انہوں نے اردو، پنجابی، سرائیکی اور بلوچی زبان کو باقاعدگی سے پڑھا ہے، لیکن پھر بھی وہ روانی سے یہ زبانیں بول لیتے ہیں۔پاکستان کی بڑی زبانوں کے ساتھ نعیم سندھی کو عربی زبان پر بھی عبور حاصل ہے، وہ گلوکاری کے ساتھ عربی زبان میں وائس اوور کا فری لانس کام بھی کرتے ہیں۔چوں کہ انہوں نے تعلیم و تربیت بھی سعودی عرب میں حاصل کی، اس وجہ سے ابتدائی طور پر ان کی دلچسپی بھی صرف عربی میوزک میں ہی تھی، تاہم انہیں بڑھتی عمر نے احساس دلایا کہ اپنی مادری زبان اور اپنے ملک کی ثقافت ہی انسان کو منفرد شناخت فراہم کرتی ہے۔نعیم سندھی نے بتایا کہ ابتدائی طور پر انہیں عربی ہپ ہاپ میوزک میں دلچسپی تھی اور انہوں نے اس پر کافی عبور بھی حاصل کرلیا تھا۔جیسے جیسے نعیم سندھی کی عمر بڑھتی گئی ان کی میوزک میں دلچسپی بھی بڑھتی گئی اور ان کی توجہ عربی ہپ ہاپ سے ہٹ کرپاکستانی موسیقی کی طرف ہوگئی اور انہوں نے کسی خاص استاد کے بغیر ہی پاکستان کی مختلف زبانوں میں گلوکاری کی شروعات کردی۔

ہمیں مجبور کیا تو ہر صورتحال کیلئے تیار ہیں، چاہتے ہیں بھارت امن کو موقع دے، بھارت بالغ جمہوریت کی طرح مسائل حل کرے، ترجمان دفتر خارجہ کا بیان
اسلام آباد (ایمرا نیوز آن لائن)ترجمان دفتر خارجہ نے کہا ہے کہ ہم نے واضح وارننگ کے ساتھ دن کی روشنی میں کارروائی کی ہے اور پاکستان کو مجبور کیا گیا تو ہر صورتحال کیلئے تیار ہیں، چاہتے ہیں کہ بھارت امن کو موقع دے، بھارت بالغ جمہوریت کی طرح مسائل حل کرے۔ بدھ کو ترجمان دفتر خارجہ کی جانب سے جاری بیان میں پاک فضائیہ کی کارروائی کی تصدیق کرتے ہوئے کہا گیا کہ پاک فضائیہ نیپاکستانی حدود میں رہتے ہوئے ایل او سی کے پار کارروائی کی، پاک فضائیہ کا یہ اقدام بھارت کے جاری جنگی جنون کے جواب میں نہیں تھا، کارروائی کا مطلب اپنے دفاع کا حق ہے۔ترجمان دفتر خارجہ کے مطابق پاکستان نے شہری آبادی کو نشانہ نہیں بنایا، پاک فضائیہ کی کارروائی میں انسانی جانوں کے تحفظ کا خیال رکھا گیا، کارروائی کا مقصد دفاع کے حق کی صلاحیت اور عزم کا اظہار تھا، پاکستان صورتحال کو بگاڑنا نہیں چاہتا، اگر پاکستان کو مجبور کیا گیا تو پاکستان ہر صورتحال کیلئے تیار ہے۔ترجمان نے بتایا کہ ہم دفاع کا نہ صرف حق رکھتے ہیں بلکہ بھرپور جوابی صلاحیت بھی رکھتے ہیں، کارروائی کا واحد مقصد ہمارے اس حق کا مظاہرہ تھا جو اپنے دفاع کیلئے حاصل ہے، ہمارا کشیدگی میں اضافے کا کوئی ارادہ نہیں تاہم کچھ کیا گیا تو ہم تیار ہیں۔ترجمان نے کہاکہ اس ہی لیے ہم نے واضح وارننگ کے ساتھ دن کی روشنی میں کارروائی کی، ہم اس راستے پر نہیں چلنا چاہتے اور چاہتے ہیں کہ بھارت امن کو موقع دے، بھارت بالغ جمہوریت کی طرح مسائل حل کرے۔

حکومت ملکی ترقی کیلئے کوشاں ہے،جلد ہی پاکستان دنیا کے نقشے پر ترقی یافتہ ملک کی صورت میں ظاہر ہوگا،نمائش کے دورے میں گفتگو
نمائش کے ذریعہ دنیا بھر میں مثبت پیغام پہنچ رہا ہے ، ہم غیرملکی بزنس مینوں کو دگجرات نمائش میں آنے کی عوت دے رہے ہیں ،عرفان یوسف
اسلام آباد(ایمرا نیوز آن لائن)سارک چیمبر آف کامرس اینڈ انڈسٹری کے سینئرنائب صدر اور یونائٹیڈبزنس گروپ(یوبی جی)کے چیئرمین افتخار علی ملک نے کہا ہے کہ پاکستان میں تجارتی نمائشوں کے زیادہ سے زیادہ انعقاد سے نہ صرف پاکستانی مصنوعات کی تشہیر کے وسیع مواقع میسر آئیں گے بلکہ کاروبار میں اضافہ اور برآمدات بھی بڑھیں گی،،گجرات نمائش ملکی صنعتی ترقی میں اہم کردار ادا کررہی ہے،انہوں نے یہ بات گجرات صنعتی نمائش کے دورے کے موقع پر گفتگو کے دوران کہی۔اس موقع پر گجرات صنعتی نمائش کمیٹی کے چیئرمین حاجی عرفان یوسف،صدر گجرات چیمبر عامرنعمان اور دیگر بھی موجود تھے۔افتخار علی ملک نے کہا کہ پاکستان کی معاشی ترقی میں نمایاں کردار صنعتی شعبے کا ہے جو ملکی برآمدات کو بھی فروغ دے رہا ہے اور اگر صنعتی سیکٹڑ کو مزید سہولیات ملیں تو وہ معیاری ا ور سستی اشیاء سے عالمی مارکیٹ میں مزید جگہ بناسکتے ہیں۔ انہوں نے کہا کہ موجودہ حکومت ملکی ترقی کیلئے کوشاں ہے اور جلد ہی پاکستان دنیا کے نقشے پر ترقی یافتہ ملک کی صورت میں ظاہر ہوگا۔انہوں نے کہا کہ بھارت جنگی جنون میں پاگل ہورہا ہے حالانکہ بھارت کے تاجروں نے خود یہ تسلیم کیا ہے کہ بھارت کا پاکستان کے خلاف کاروائیاں خود انکے ہی نقصان میں ہیں۔انہوں نے کہا کہ بھارت کی ہزارمنفی کوششوں کے باوجودآئندہ ماہ نیپال میں سارک چیمبر آف کامرس ضرور ہوگی۔حاجی عرفان یوسف نے اس موقع پر کہا کہ گجرات چیمبر گجرات صنعتی نمائش کے ذریعہ دنیا بھر میں مثبت پیغام پہنچا رہا ہے اور ہم بیرون ممالک بزنس مینوں کو بھی یہ دعوت دے رہے ہیں کہ وہ گجرات نمائش میں آئیں۔انہوں نے بتایا کہ نمائش میں نہ صرف پنجاب بلکہ دیگر صوبوں سے بھی تاجرنمائندے دورے کررہے ہیں۔

پی ایس ایل سیزن فورکرکٹ میچز کی سیکیورٹی اورٹریفک کے مجموعی امور کا تفصیلی جائزہ لیا گیا
کراچی(ایمرا نیوز آن لائن)آئی جی سندھ ڈاکٹر سیدکلیم امام کی زیر صدارت اعلیٰ سطحی اجلاس میں پی ایس ایل سیزن فورکرکٹ میچز کی سیکیورٹی اورٹریفک کے مجموعی امور کا تفصیلی جائزہ لیا گیا اور مزید ضروری ہدایات دی گئیں۔آئی جی سندھ نے اجلاس میں شریک اسپیشل برانچ،سی ٹی ڈی اور کراچی کے ایڈیشنل آئی جیز سمیت ڈی آئی جی ہیڈ کوارٹرز سندھ،زونل ڈی آئی جیز اور ڈی آئی جی ٹریفک کراچی کے علاوہ اے آئی جی آپریشنز سندھ کو ہدایات دیں کہ تفویض کردہ فرائض اور ذمہ داریوں کو انتہائی مستعداورمتحرک رہتے ہوئے انجام دیکر اس میگا ایونٹ کو پرامن اور کامیاب بنایا جائے ۔س موقع پر ڈی آئی جی ایسٹ،ڈی آئی جی ساؤتھ اور ڈی آئی جی ٹریفک نے باالترتیب ائیرپورٹ تا ہوٹل،ہوٹل تا اسٹیڈیم سیکیورٹی سمیت ٹریفک بشمول متبادل روٹس،پارکنگ ایریاز پر مجموعی اقدامات پر تفصیلی بریفنگ دی۔آئی جی سندھ نے کہا کہ اس میگا ایونٹ میں شرکت کرنیوالے کھلاڑیوں،غیرملکی مندوبین/مہمانوں/اسٹاف کو بین الاقوامی معیار کے مطابق سیکیورٹی پروٹوکول کو یقینی بنایا جائے جبکہ ہوٹلز میں انتظامیہ کے تعاون پولیس لائژن ڈیسک کا قیام بھی عمل میں لایا جائے ۔انہوں نے کہا کہ ائیر پورٹ تاہوٹلز اور ہوٹلز تا اسٹیڈیم جملہ گزرگاہوں،اسٹیڈیم کے اندرونی اور اطراف میں نصب سی سی ٹی وی کیمروں کا جائزہ لیکر کمانڈ اینڈ کنٹرول سینٹر سی پی او سے مانیٹرنگ اور دیگر ضروری اقدامات کو عین کنٹی جینسی پلان کے مطابق موثراور مربوط بنایا جائے ۔آئی جی سندھ نے مذید کہا کہ ڈیزاسٹر مینجمنٹ سسٹم پر خصوصی فوکس رکھتے ہوئے ناصرف مجموعی امور کو ٹھوس بنایا جائے بلکہ پولیس ریزرو پلاٹونز کو تیار حالت میں رکھنے کے لیئے بھی عملی اقدامات اٹھائے جائیں۔آئی جی سندھ کا کہنا تھا کہ پی ایس ایل کرکٹ سیزن فور کے مجموعی سیکیورٹی/ ٹریفک اقدامات کو پولیس اپنے تجربے اور پیشہ ورانہ صلاحیتوں کی بدولت نا صرف کامیاب بنائے بلکہ بین الاقوامی سطح پر پاکستان اورکراچی کے عوام کیجانب سے امن اور محبت کے پیغام کو بھی عام کرے ۔اجلاس کو بتایا گیا کہ پی ایس ایل کرکٹ سیکیورٹی/ٹریفک ودیگر ضروری اقدامات کے تحت ایسٹ کے 7720، ساوتھ کے 2260،ایس ایس یو کے565،ٹریفک کے 1780جبکہ اسپیشل برانچ کے 788سمیت مجموعی طور پر13112 پولیس افسران اور جوانوں کو ذمہ داریاں تفویض کی گئیں ہیں۔

کابل (ایمرا نیوز آن لائن)طالبان نے کہا ہے کہ پاک بھارت کشیدگی کے باعث افغان امن عمل متا ثر ہو گا جبکہ دونوں ممالک کے درمیان صورتحال مزید خراب نہ ہونے کے خواہاں ہیں ۔غیر ملکی خبر رساں ادارے کے مطابق افغان طالبان کے ترجمان ذبیع اللہ مجائد نے اپنے بیان میں کہا کہ پاک بھارت کشیدگی میں تسلسل افغان امن عمل پر برا اثر ڈالے گا ۔ انہوں نے کہا کہ دونوں ممالک کو اس کشیدگی کے خاتمے کے لئے اقدامات کرنے چاہیے ۔

بھارت(نیٹ نیوز ایمرا نیوز)

بھارت نے اپنے ونگ کمانڈر ابھی نندن کی مگ 21 اڑانے اور ابھی تک نہ لوٹنے کی تصدیق کر دی ہے۔

بھارتی میڈیا کے مطابق ونگ کمانڈر ابھی نندن نے مگ21پر اڑان بھری لیکن وہ ابھی تک نہیں لوٹا۔ ابھی نندن بھارت کے ایک ریٹائرڈ ائیرمارشل کا بیٹا ہے۔

یاد رہے کہ بھارتی ائیرفورس نے طیاروں نے آج صبح لائن آف کنٹرول کی خلاف ورزی کی جس پر پاک فضائیہ نے بروقت ایکشن لیتے ہوئے دو بھارتی جنگی طیارے مارے گرائے اور دو پائلٹوں کو گرفتار کر لیا۔

ڈائریکٹر جنرل آئی ایس پی آر میجر جنرل آصف غفو ر نے اس حوالے سے اپنی پریس کانفرنس میں بتایا کہ پاک فوج نے دو بھارتی پائلٹوں کو گرفتار کیا ہے جن میں ایک زخمی حالت میں سی ایم ایچ میں زیرعلاج ہے جب کہ دوسرا حراست میں ہے۔

ایک گرفتار بھارتی پائلٹ کی ویڈیو بھی سامنے آئی ہے جس میں وہ اپنا نام ابھی نندن اور سروس نمبر 27981 بتاتا ہے۔

پاکستان میں گرفتارکیے گئے بھارتی پائلٹ سے متعلق بھارتی صحافی شیواروڈ نے بھی تصدیق کردی ہے اور بتایا ہے کہ بھارتی پائلٹ MIG 21 کا پائلٹ تھا اور ونگ کمانڈر ابھی نندن سے متعلق بھارتی حکومت جلد بیان جاری کرے گی۔