Tag pakistan

اسلام آباد(M92) سابق وزیراعظم نوازشریف اور مریم نواز نے احتساب عدالت میں حاضری سے استثنیٰ کی درخواست دائر کردی۔
ذرائع کے مطابق سابق وزیراعظم نوازشریف، مریم نوازاور کیپٹن (ر) صفدر احتساب عدالت میں پیش ہوگئے۔ شریف خاندان کے افراد کیخلاف نیب ریفرنسز میں باقاعدہ ٹرائل آج سے شروع ہوگیا ہے۔نوازشریف نے حاضری سے استثنیٰ کی درخواست دائر کرتے ہوئے کہا کہ اہلیہ بیگم کلثوم نواز کی کیموتھراپی ہورہی ہے اس لیے 20 نومبر سے ایک ہفتے کے لیے لندن جانے کی اجازت دی جائے، ظافرخان میری عدم موجودگی میں نمائندہ ہونگے۔ مریم نواز نے بھی عدالت میں حاضری سے استثنیٰ کی درخواست کرتے ہوئے جہانگیر جدون کو اپنا نمائندہ مقرر کرنے کی استدعا کی ہے۔
آج سماعت میں سیکورٹیز اینڈ ایکسچینج کمیشن آف پاکستان (ایس ای سی پی) کی خاتون افسر سدرہ منصور نے ایون فیلڈ ریفرنس میں اپنا بیان قلمبند کرادیا ہے۔ سدرہ منصور نے حدیبیہ پیپر ملز کا ریکارڈ اور 2000ء سے 2005ء کی آڈٹ رپورٹ بھی عدالت میں پیش کردی۔ استغاثہ کے دوسرے گواہ ایف بی آر ان لینڈ ریونیو کے جہانگیر احمد نے بھی بیان ریکارڈ کرادیا۔
وکلائے صفائی نے سدرہ منصور کی فراہم کردہ دستاویزات پر اعتراض کرتے ہوئے کہا کہ یہ فوٹو کاپیاں ہیں اصل نہیں۔ نیب پراسیکیوٹر نے کہا کہ نیب آرڈیننس کے مطابق فوٹو کاپیاں ہی ضروری ہوتی ہیں۔نوازشریف کی پیشی کے موقع پر سیکورٹی کے سخت انتظامات کئے گئے۔ مسلم لیگ (ن) کے رہنما طلال چوہدری، پرویز رشید، مریم اورنگزیب، طارق فاطمی، طارق فضل چوہدری بھی احتساب عدالت آئے۔
واضح رہے کہ نواز شریف پر 8 نومبر کو 3 نیب ریفرنسزمیں براہ راست فرد جرم عائد کی گئی جب کہ عدالت نے ریفرنسز کو یکجا کرنے کی درخواست بھی مسترد کردی تھی۔

اسلام آباد(M92) سابق وزیراعظم نواز شریف نے کہا ہے کہ احتساب کو کہیں اور سے کنٹرول کیا جارہا ہے جب کہ ہمیں سزا دی نہیں بلکہ دلوائی جارہی ہے۔احتساب عدالت میں سماعت کے لیے پیشی کے موقع پر کمرہ عدالت میں صحافیوں سے غیر رسمی گفتگو کرتے ہوئے سابق وزیراعظم نواز شریف کا کہنا تھا کہ عدالتوں کا دہرا معیار ہے جو جلد اپنے منطقی انجام کو پہنچے گا تاہم اس دہرے معیار کے خاتمے کے لیے جدوجہد جاری رکھیں گے۔ ان کا کہنا تھا کہ احتساب کو کہیں اور سے کنٹرول کیا جارہا ہے اور جو قصور ہم نے نہیں کیا اس کا بھی ہم سے انتقام لیا جارہا ہے۔
نواز شریف کا کہنا تھا کہ عدالت میں سیاسی مخالفین جیسے سوال پوچھے گئے، ہمیں سزا دی نہیں بلکہ دلوائی جارہی ہے، میرے مقدمے میں کچھ اور جب کہ دوسروں کے مقدموں میں اور ضابطے ہیں تاہم یہ احتساب نہیں انتقام ہے اور اس کے باوجود بھی ہم عدالتوں کا احترام کرتے ہیں۔
سابق وزیراعظم نے مزید کہا کہ 1999ء میں بھی کہا تھا کہ طیارہ ہائی جیک کے جھوٹے کیس میں سزا دلوائی جارہی ہے، اس وقت بھی مجھے پھنسایا گیا اور آج بھی وہی معاملہ دہرایا جارہا ہے، سپریم کورٹ نے پاناما کیس کے فیصلے میں ایسے ریمارکس دیے جیسے ہمارے سیاسی مخالفین دیتے ہیں، وہ سپریم کورٹ کا فیصلہ نہیں بلکہ نیب کو واضح پیغام تھا کہ نوازشریف کو ہر قیمت پر سزا دینی ہے۔

اسلام آباد(M92) وزارت تجارت حکام کی عدم توجہ کے باعث گزشتہ 2 سال سے ای کامرس پالیسی فریم ورک تیار نہ کیا جاسکا جب کہ پالیسی کی تیاری کے سلسلے میں ایف بی آر حکام کی جانب سے ٹیکسوں کے امور سے متعلقہ ڈرافٹ بھی پیش ہی نہیں کیا گیا۔گزشتہ 2 سال سے ای کامرس پالیسی کو حتمی شکل نہیں دی گئی اور ابھی تک تمام شراکت داروں کی جانب سے تجاویز بھی نہیں دیں۔ ذرائع نے بتایاکہ ا ی کامرس پالیسی کی تیاری کے لیے ایف بی آر کی جانب سے اس ضمن میں تاخیر کی جا رہی ہے اور ٹیکسوں کے امور وای ٹرانزیکشنز کے حوالے سے ایف بی آر کی جانب سے ابھی تک تجاویز فراہم نہیں کی گئیں۔
ذرائع کے مطابق سابق وزیر اعظم نواز شریف کی ہدایت پر دسمبر 2015 میں ای کامرس فریم ورک کے بارے میں وزارت تجارت اور انفارمیشن ٹیکنالوجی کے حکام پر مشتمل مشترکہ ورکنگ گروپ تشکیل دیا گیا تھا تاکہ ای کامرس کے حوالے سے اقدامات کیے جائیں۔
ای کامرس پالیسی کی تیاری کے سلسلے میں وزارت انفارمیشن ٹیکنالوجی کی جانب ریگولیٹری فریم ورک، اسٹیٹ بینک کی جانب سے ای پیمنٹ رپورٹ اور لاجسٹکس کے حوالے سے وزارت مواصلات کی جانب سے تجاویز فراہم کردی گئی ہیں جبکہ نجی شعبے کی جانب سے بھی ای کامرس کے حوالے سے تجاویز وزارت تجارت کو فراہم کر دی گئی ہیں۔ ذرائع کے مطابق اب تک موصول ہونے والی تجاویز میں انفارمیشن اینڈ کمیونی کیشن ٹیکنالوجی انفرااسٹرکچر کی شمولیت، ای سگنیچرزاور ای کنٹریکٹنگ شامل ہیں۔
ملک میں اس وقت ای ٹرانزیکشنز پر ٹیکسوں سے متعلق کوئی مخصوص قوانین موجود نہیں اوراس حوالے سے مختلف تجاویز موصول ہوئی ہیں۔ ذرائع کے مطابق سروس سیکٹر میں کام کرنے والی تمام کمپنیوں پر 6فیصد کی شرح سے جی ایس ٹی نافذ کیا جات اہے چاہے وہ آن لائن یا آف لائن کام کر رہی ہوں، ان کمپنیوں سے12فیصد انکم ٹیکس وصول کیاجاتاہے، اس کے ساتھ آن لائن ٹرانزیکشنز پر صوبائی حکومتیں بھی ٹیکس وصول کرتی ہیں، سندھ میں آن لائن ٹرانزیکشنز سے 13فیصد سندھ سیلز ٹیکس وصول کیا جا رہا ہے۔
ذرائع نے بتایاکہ نجی شعبے کی جانب سے یہ تجویز دی گئی ہے کہ آن لائن ٹرانزیکشنز پر ٹیکس مراعات دی جائیں کیونکہ یہ ابھرتی ہوئی مارکیٹ ہے اس لیے ای کامرس بزنس کے لیے ایس او پی بنائے جائیں۔ ذرائع نے بتایا کہ نجی شعبے کی جانب سے خریداری کے جعلی آرڈرزکے تدارک کے لیے ایف آئی اے کا کردار بڑھانے اور اس حوالے سے قانون سازی کی بھی تجویز ہے جبکہ ای کامرس فریم ورک کی تیاری کے سلسلے میں تجارتی قوانین میں بھی بعض تبدیلیاں تجویز کی گئی ہیں تاکہ ای کامرس پالیسی پر عمل درآمد کو سہل بنایاجا سکے۔
ذرائع کے مطابق سابق وزیراعظم نواز شریف نے وزارت تجارت کو ہدایت کی تھی کہ وہ ستمبر تک ای کامرس پالیسی کا اعلان کرے تاہم ایف بی آر کی جانب سے عدم تعاون کی وجہ سے اس ڈیڈ لائن میں دسمبر تک کی توسیع کر دی گئی۔
اس سلسلے میں رابطہ کرنے پر وزیر تجارت محمد پرویز ملک نے گفتگو کرتے ہوئے بتایاکہ ای کامرس پالیسی پرکام جاری ہے اور جلد ہی اس کو حتمی شکل دی جائے گی۔ وزیر تجارت نے بتایاکہ ای کامرس پالیسی کی تیاری کے سلسلے میں علی بابا سے ایم او یو پر دستخط ہو چکے ہیں اور اس سلسلے میں مزید پیش رفت تیز کی جائے گی۔

اسلام آباد(M92) وزارت ہاؤسنگ اینڈ ورکس نے ملک بھر میں کم آمدن والے افراد کے لیے وزیراعظم پروگرام کے تحت پبلک پرائیویٹ پارٹنر شپ کے ذریعے رہائشی منصوبہ شروع کرنے کا فیصلہ کیا ہے۔وفاقی وزارت ہاؤسنگ اینڈ ورکس نے ملک بھر میں کم آمدن افراد کے لیے رہائشی منصوبہ شروع کرنے کا فیصلہ کیا ہے اس رہائشی منصوبے پر وزارت ہاؤسنگ اینڈ ورکس کے ماتحت ادارے پی ایچ اے فاؤنڈیشن عملدرآمد کرائے گی جس کے لیے پی ایچ اے فاؤنڈ یشن نے ملک بھر سے اپارٹمنٹس اور ہاؤسنگ سکیم منصوبے کو جوائنٹ وینچر کے طور پر شروع کرنے کے لیے نجی فرموں سے درخواستیں بھی طلب کر لی ہیں۔
اس جوائنٹ وینچر ہاؤسنگ سکیم کے لیے پی ایچ اے فاؤنڈ یشن کی جانب سے پہلے مرحلے میں راولپنڈی اور اسلام آباد میں ہاؤسنگ پراجیکٹ کا آغاز کیا جائے گاپی ایچ اے فاؤنڈ یشن نے کثیر المنزلہ اپارٹمنٹس کے لیے100کنال اور ہاؤسنگ سکیم کے لیے 700کنال اراضی اپنے نام رکھنے والی کمپنیوں کے تعاون سے جوائنٹ وینچر قائم کرنے والے ڈویلپرز اور کنٹریکٹرز سے درخواستیں بھی طلب کر لی ہیں۔
واضح رہے کہ پی ایچ اے فاؤنڈیشن کا پبلک پرائیویٹ پارٹنر شپ کے تحت اس نوعیت کا یہ پہلا منصوبہ ہے، ذرائع کے مطابق پی ایچ اے فاؤنڈ یشن نے سی ڈی اے کی جانب سے زمین کی عدم دستیابی پر پبلک پرائیویٹ پارٹنر شپ کے تحت یہ منصوبہ شروع کرنے کا فیصلہ کیا ہے تاکہ وزیر اعظم پروگرام کے تحت کم آمدن والے لوگوں کے لیے شروع کی جانے والی یہ ہاؤسنگ سکیم زمین کے حصول میں رکاوٹ یا کسی اور وجہ سے تاخیر کا شکار نہ ہو۔پی ایچ اے فاؤنڈ یشن ذرائع کے مطابق یہ منصوبہ وفاقی حکومت کی جانب سے نو پرافٹ نو لاس کی بنیاد پر شروع کیا جائے گا جس میں 50فیصد اپاڑٹمنٹس سرکا ری ملا زمین اور 50فیصد پرائیویٹ کوٹہ رکھا جائے گا جب کہ پی ایچ اے فاؤنڈ یشن کو وزیر اعظم پروگرام کے تحت کم آمدن رہائشی سکیم کے لیے فرموں کی جا نب سے تجا ویز دی جائیں گی جس کے بعد اس منصوبے کے لیے موزوں پر پوزل کو فائنل کر کے منصوبے کو ختمی شکل دی جائے گی۔

لاہور(M92) نجم سیٹھی پی ایس ایل فائنل کراچی اور سیمی فائنلزلاہور میں کرانے کے خواہاں ہیں۔پی ایس ایل 3 ڈرافٹنگ کی تقریب سے خطاب کرتے ہوئے چیئرمین پی سی بی نجم سیٹھی کا کہناتھا کہ پی ایس ایل تھری کی ڈرافٹنگ ایک اعزازہے، چھٹی ٹیم پی ایس ایل تھری میں شامل ہورہی ہے، ملتان سلطانزکو پی ایس ایل تھری میں شرکت پر مبارکباد دیتا ہوں۔ انہوں نے پی ایس ایل کی تمام ٹیموں کے مالکان کو ایونٹ کا حصہ بننے پر مبارک باد پیش کی اور پاکستان میں بین الاقوامی کرکٹ کی واپسی کے لیے کوششیں کرنے پر شکریہ ادا کیا۔
چیئرمین پی سی بی نے کہا کہ کوئٹہ گلیڈی ایٹرز میری پسندیدہ ٹیم تھی، پوری کوشش ہے کہ کراچی میں پی ایس ایل کے میچز ہوں۔ نجم سیٹھی کا کہنا تھا کہ غیر ملکی کھلاڑیوں کی لائن اپ پہلے سے بہتر ہے، پی ایس ایل کی تمام ٹیموں کیلیے نیک خواہشات کااظہار کرتا ہوں۔
اس موقع پر نجم سیٹھی نے اعلان کیا کہ پی ایس ایل 2018 کے سیمی فائنل مقابلے لاہور میں منعقد کرائے جائیں گے جبکہ انھوں نے پی ایس ایل کا فائنل کراچی میں منعقد کرانے کے حوالے سے کہا کہ وہ پی ایس ایل تھری کا فائنل نیشنل اسٹیڈیم میں کرانے کی بھرپور کوشش کریں گے۔

کراچی(M92) نامور پاکستانی اداکارہ نور بخاری نے شوبز کی چکاچوند چھوڑ کر اچانک مذہب کی راہ اپنانے اور حجاب لینے کی وجہ بتادی ہے۔شوبزانڈسٹری سے تعلق رکھنے والے اداکاراوراداکارائیں اپنی پرکشش شخصیت اورخوبصورتی کے باعث جانے جاتے ہیں۔ دیگر اداکاراؤں سے منفرد اور خوبصورت لگنے کی چاہ میں اکثر اداکارائیں مہنگے اور ڈیزائنرملبوسات زیب تن کرتی ہیں تاہم بہت کم ایسی اداکارائیں ہیں جو مہنگے لباس اور شوخ میک اپ کی وجہ سے نہیں بلکہ سادگی کی وجہ سے خبروں کی زینت بنتی ہیں۔ اداکارہ نوربخاری کا شمار بھی ان اداکاراؤں میں ہوتا ہے جو گزشتہ کافی عرصے سے حجاب لینے کے باعث خبروں کی زد میں ہیں۔
کچھ عرصہ قبل اداکارہ نورکی جانب سے حجاب لینے کے فیصلے نے سوشل میڈیا پر ہنگامہ مچادیا تھا۔ میڈیا اور ان کے مداح یہ جاننے کے لیے بے چین تھے کہ آخر نور نے اچانک یہ قدم کیوں اٹھایا تاہم اب نورنے شوبز چھوڑ کر اچانک حجاب لینے اور مذہب کی جانب مائل ہونے کی وجہ بتادی ہے۔
14 سال کی عمر میں فلم’’مجھے چاند چاہئے‘‘سےفنی کیرئیر کا آغاز کرنے والی پاکستان کی خوبرو اداکارہ نور بخاری نے حال ہی میں دئیے گئے انٹرویو کے دوران حجاب لینے کی وجہ بتاتے ہوئے کہا کہ ’’ہر کام خدا کی خواہش کے مطابق ہوتا ہے‘‘۔ میں اپنی شادی ٹوٹنے پر بے حد اداس تھی، وہ بہت مشکل وقت تھا مجھے سمجھ نہیں آرہا تھا کیاکروں جب چیزیں مزید خراب ہونا شروع ہوگئیں تو میں مذہب کی جانب مائل ہوگئی۔ تاہم ایسا نہیں ہے کہ مجھے ’’نئی نور‘‘ میں تبدیل ہونے کے لیے مجبور کیا گیا بس یہ سب ہونا تھا اور ہوگیا۔
نور نے اپنی علیحدگی کے بارے میں بتاتے ہوئے کہا کہ طلاق کے بعد میں مکمل طور پر ٹوٹ گئی تھی، شوہر سے علیحدگی کا وقت میری زندگی کا سب سے دردناک دور تھاجس سے میں اکیلی گزررہی تھی بدقسمتی سے کوئی بھی نہیں جانتا تھا کہ میں کس کیفیت سے گزررہی ہوں۔ اس وقت میں ایک خاتون مرشد سے ملی اور عبادت کرنا شروع کی جس کے بعد میری مشکلات کم ہونا شروع ہوگئیں اور مجھے ناکام شادی کے غم سے باہر نکلنے میں بھی بہت مدد ملی۔
مجھے حجاب لینے کے لیے کسی نے بھی مجبور نہیں کیا تھا۔ میں نے ماہ رمضان میں اپنا سر ڈھانپنا شروع کیا اور اس کے بعد سے کبھی نہیں اتارا میں نے اپنے خاندان والوں کو بھی حجاب لینے اورشوبز چھوڑنے کے فیصے کے بارے میں بتادیا تھا۔
اداکارہ نور نے مزید کہا کہ میں ایک ایسی فیملی سے تعلق رکھتی ہوں جہاں بہت ساری خواتین حجاب لیتی اور عبایا پہنتی ہیں لہٰذا یہ تبدیلی میرے لیے نئی نہیں ہے۔ حجاب لینے سے قبل مجھے اپنی زندگی میں کچھ ادھورا محسوس ہوتا تھا لیکن جب سے میں نے حجاب لینا اور خود کو ڈھانپنا شروع کیا ہے میری زندگی میں سکون آگیا ہے اور مجھے معلوم ہے کہ خوشی اور سکون کا راستہ یہی ہے جب کہ مذہب کی جانب مائل ہوکر میں نے زندگی کے اصل معنی سمجھ لیے ہیں۔
نور نے اپنے ایکٹنگ کیرئیر کے بارے میں بات کرتے ہوئے کہا کہ اداکاری دراصل اس چیز کانام ہے جس میں آپ کو اپنی شناخت بھول کرایک نئے شخص کے کردار میں ڈھلنا ہوتا ہے۔ ایک اداکار ہرروز اپنی شناخت تبدیل کرتا ہے تاہم مجھے یہ سب ایک جھوٹ لگتا ہےاوراسلام میں جھوٹ کی کوئی گنجائش نہیں ہے۔ ہمارے مذہب کی بنیاد سچ اور حق پر ہے لہٰذا میں کیسے ایسا کام کرسکتی ہوں جس میں مجھے ہر روز جھوٹ بولنا پڑے۔

اسلام آباد(M92) وزیرخزانہ اسحاق ڈار کو مسلسل غیرحاضری کی وجہ سے مشترکہ مفادات کونسل کی رکنیت سے فارغ کردیا گیا ہے۔
میڈیا کے مطابق مشترکہ مفادات کونسل کی تشکیل نو کی گئی ہے اور وزیرخزانہ اسحاق ڈار کی رکنیت ختم کردی گئی ہے۔ صدر مملکت ممنون حسین نے وزیراعظم کی تجویز پر وزیرخزانہ کو رکنیت سے ہٹانے کی منظوری دے دی ہے۔ اسحاق ڈار کو ہٹانے کا اطلاق فوری طور پر ہوگا جب کہ ان کی جگہ اب وزیرداخلہ احسن اقبال مشترکہ مفادات کونسل میں وفاق کی نمائندگی کریں گے۔
واضح رہے کہ مشترکہ مفادات کونسل کا اجلاس آج شام 4 بجے ہوگا۔ اسحاق ڈار علاج کی غرض سے بیرون ملک مقیم ہیں اور انہیں مسلسل غیر حاضری کی وجہ سے مشترکہ مفادات کونسل کی رکنیت سے ہٹایا گیا ہے۔

اسلام آباد(M92)سپریم کورٹ کے جسٹس آصف سعید کھوسہ نے حدیبیہ پیپرز ملز کیس کھولنے کی اپیل سننے سے معذرت کر لی۔ ذرائع کے مطابق سپریم کورٹ کے جسٹس آصف سعید کھوسہ نے حدیبیہ پیپرز کیس کھولنے کی اپیل سننے سے معذرت کر لی، جس کے نتیجے میں کیس کی سماعت کرنے والا بینچ ٹوٹ گیا اور سماعت غیر معینہ مدت تک ملتوی ہوگئی ہے۔حدیبیہ ریفرنس کھولنے کی اپیل کی سماعت کے لیے نیا بینچ تشکیل دینے کی درخواست چیف جسٹس کو بھجوا دی گئی ہے جبکہ نیب نے کیس کو آئندہ ہفتے سماعت کیلئے مقرر کرنے کی استدعا کردی۔
جسٹس آصف سعید کھوسہ نے کہا کہ رجسٹرار آفس نے کیس غلطی سے بینچ کے سامنے لگا دیا گیا اور شائد رجسٹرار آفس نے پاناما کیس پر میرا فیصلہ نہیں پڑھا، اپنے فیصلے میں حدیبیہ کیس کھولنے کے حوالے سے ایک حد تک فیصلہ دے چکا ہوں، رجسٹرار آفس کو کیس ہمارے بینچ کے سامنے نہیں لگانا چاہیے تھا۔
جسٹس آصف سعید کھوسہ نے کہا کہ پاناما کیس میں چیئرمین نیب کو بھی بلایا گیا تھا، اقی ججزکے فیصلوں کے متعلق میں کچھ نہیں کہوں گا تاہم میں نے اپنے فیصلے میں حدیبیہ کیس سے متعلق 14 پیراگراف لکھے ہیں، اسحاق ڈار کی حد تک بھی میں فیصلہ دے چکا ہوں، اسحاق ڈار پہلے ملزم تھے پھر وعدہ معاف گواہ بن گئے، میں نے پاناما کیس کے اپنے فیصلے میں اسحاق ڈار کے خلاف نیب کو کارروائی کا بھی کہا تھا۔
قومی احتساب بیورو (نیب) نے شریف فیملی کے خلاف حدیبیہ پیپرز ملز مقدمے کو دوبارہ کھولنے کے لیے سپریم کورٹ میں اپیل دائر کی تھی۔ سپریم کورٹ نے حدیبیہ پیپر ملز کیس دوبارہ کھولنے کی اپیل کے لیے جسٹس آصف سعید کھوسہ کی سربراہی میں بنچ تشکیل دیا تھا جس کی آج پہلی سماعت تھی۔ واضح رہے کہ پاناما بنچ کے سربراہ بھی جسٹس آصف سعید کھوسہ تھے۔