Tag pakistani

ممبئی (ایمرا نیوز آن لائن) ڈیوڈ وارنر اور ایرون فنچ نے بھارتی غرور اپنے پائوں تلے روند ڈالا، کینگروز نے گھر میں گھس کر کوہلی الیون کا شکار کرلیا۔اوپنرز کی ریکارڈ شراکت سے تقویت پاکر پہلے ون ڈے میں آسٹریلیا نے 10 وکٹ سے فتح سمیٹ لی،

ٹیم نے256 رنز کا ہدف 74 بالز قبل ہی حاصل کرلیا، وارنر 128 اور فنچ 110 رنز پر ناقابل شکست رہے، اس سے قبل میزبان ٹیم 255 رنز پر آئوٹ ہوگئی، شیکھر دھون 74 رنز کے ساتھ نمایاں رہے، مچل اسٹارک نے 3 وکٹیں لیں۔ممبئی کے وینکھیڈے اسٹیڈیم پر کینگروز نے 256 رنز کا ہدف 37.4 اوورز میں بغیر کسی نقصان کے حاصل کیا،

وارنر نے 112 بالز پر 3 چھکوں اور 17 چوکوں کی مدد سے ناقابل شکست 128 رنز بنائے، فنچ 110 رنز پر ناٹ آئوٹ رہے۔ انھوں نے 114 بالز میں سے 2 پر چھکے اور 13 پر چوکے جڑے۔ یہ بھارت کی مجموعی طور پر پانچویں جبکہ اپنے ملک میں ون ڈے میچ میں 10 وکٹ کی دوسری شکست ہے۔ آسٹریلیا نے اس مارجن سے پانچویں کامیابی حاصل کی ہے۔

لاہور(ایمرا نیوز آن لائن)راک اسٹار علی ظفر کے چند ماہ قبل ریلیز ہونے والے بلوچی گانے ’لیلیٰ او لیلیٰ‘ کو یوٹیوب پر اب تک ایک کروڑ سے زائد بار دیکھا جا چکا ہے۔ یہ کلاسیکل بلوچی گانا 11 اکتوبر 2019 کو ریلیز کیا گیا تھا جسے راک اسٹار علی ظفر اور بلوچستان کی 12 سالہ گلوکارہ عروج فاطمہ نے بتایا اور اس گانے کو یوٹیوب پر اب تک ایک کروڑ سے زائد بار دیکھا جا چکا ہے۔

’لیلیٰ او لیلیٰ‘ گانے کی میوزک ویڈیو میں عروج کی گلوکاری کےساتھ ساتھ بلوچستان کے خوبصورت مناظربھی دکھائے گئے ہیں۔اسی ضمن میں گلوکار علی ظفر نے ٹوئٹر پر اپنی خوشی کا اظہار کرتے ہوئے ایک ٹوئٹ پیغام جاری کیا۔

علی ظفر کا کہنا تھا کہ ’یہ دیکھ کر بہت حیرت اور خوشی ہوئی ہے کہ ’لیلیٰ او لیلیٰ‘ گانے کو یوٹیوب پر اب تک ایک کروڑ سے زائد بار دیکھا جا چُکا ہے‘۔

بھارت (ایمرا نیوز آن لائن)بھارتی سپریم کورٹ نے بابری مسجد کیس کا فیصلہ سناتے ہوئے مسجد کی زمین ہندوؤں کے حوالے کرتے ہوئے مرکزی حکومت کو مندر تعمیر کرنے کا حکم دیا ہے۔بھارتی سپریم کورٹ کے چیف جسٹس رانجن گنگوئی کی سربراہی میں 5 رکنی بینچ بابری مسجد کیس کا فیصلہ سنا رہا ہے، پانچ رکنی بنچ میں مسلمان جج ایس عبدالنذیر بھی شامل ہیں۔

چیف جسٹس رانجن گنگوئی کیس کا فیصلہ سنا رہے ہیں۔ ان کا کہنا ہے کہ بابری مسجد کیس کا فیصلہ متفقہ ہے۔’بابری مسجد کی جگہ مندر نہ بنایا تو مودی سرکار بھی نہیں رہے گی‘سپریم کورٹ کے فیصلے میں کہا گیا ہے کہ ہندو ایودھیا کو رام کی جنم بھومی جب کہ مسلمان اس جگہ کو بابری مسجد کہتے ہیں۔بھارتی سپریم کورٹ کا فیصلے میں کہنا ہے کہ عدالت کے لیے مناسب نہیں کہ وہ مذہب پر بات کرے، عبادت گاہوں کے مقام سے متعلق ایکٹ تمام مذہبی کمیونٹیز کے مفادات کا تحفظ کرتا ہے۔

فیصلے میں کہا گیا ہے کہ شواہد سے پتہ چلتا ہے کہ مسجد کی جگہ پر رام کی جنم بھومی تھی اور بابری مسجد کے نیچے اسلامی تعمیرات نہیں تھیں، بابری مسجد کو خالی پلاٹ پر تعمیر نہیں ہندو اسٹرکچر پر تعمیر کی گئی۔بھارتی سپریم کورٹ کے فیصلے کے مطابق مطابق ریونیو ریکارڈ کے مطابق زمین سرکاری تھی جب کہ بابری مسجد کی شہادت قانون کی خلاف ورزی ہے۔چیف جسٹس رانجن گنگوئی نے بابری مسجد کی زمین ہندوؤں کے حوالے کرتے ہوئے کہا کہ مسلمانوں کو ایودھیا میں متبادل جگہ دی جائے، سنی وقف بورڈ کو 5 ایکڑ متبادل زمین دی جائے۔

بھارتی سپریم کورٹ نے متنازع 2 اعشاریہ 77 ایکٹر زمین مرکزی حکومت کے حوالے کرتے ہوئے تین ماہ میں ٹرسٹ قائم کرنے کا حکم دیا ہے۔بھارتی میڈیا کے مطابق اتر پردیش میں تمام اسکول، کالج اور تعلیمی ادارے 11 نومبر تک بند کرنے کا اعلان کیا گیا ہے اور ایودھیا سمیت پورے بھارت میں سیکیورٹی انتہائی سخت کر دی گئی ہے۔

خیال رہے کہ سپریم کورٹ کے 5 رکنی بینچ نے الہ آباد ہائی کورٹ کے ستمبر 2010 کے فیصلے کے خلاف دائر 14 اپیلوں پر سماعت کی جس میں سنّی وقف بورڈ، نرموہی اکھاڑہ اور رام لالہ کے درمیان ایودھیا میں 2.77 ایکڑ متنازع زمین کو برابر تقسیم کرنے کا حکم دیا گیا تھا۔1528ء میں مغل دور حکومت میں بھارت کے موجودہ شہر ایودھیا میں بابری مسجد تعمیر کی گئی جس کے حوالے سے ہندو دعویٰ کرتے ہیں کہ اس مقام پر رام کا جنم ہوا تھا اور یہاں مسجد سے قبل مندر تھا۔

برصغیر کی تقسیم تک معاملہ یوں ہی رہا، اس دوران بابری مسجد کے مسئلے پر ہندو مسلم تنازعات ہوتے رہے اور تاج برطانیہ نے مسئلے کے حل کیلئے مسجد کے اندرونی حصے کو مسلمانوں اور بیرونی حصے کو ہندوؤں کے حوالے کرتے ہوئے معاملے کو دبا دیا۔1992 میں ہندو انتہا پسند پورے بھارت سے ایودھیا میں جمع ہوئے اور ہزاروں سیکیورٹی اہلکاروں کی موجودگی میں 6 دسمبر کو سولہویں صدی کی یادگار بابری مسجد کو شہید کر دیا۔حکومت نے مسلم ہندو فسادات کے باعث مسجد کو متنازع جگہ قرار دیتے ہوئے دروازوں کو تالے لگا دیے، جس کے بعد معاملے کے حل کیلئے کئی مذاکراتی دور ہوئے لیکن آج تک کوئی نتیجہ نہ نکل سکا۔

امریکہ(ایمرا نیوز آن لائن)عالمی دہشت گرد تنظیم داعش نے اپنے سربراہ ابوبکر البغدادی کی ہلاکت کی تصدیق کر دی۔امریکی میڈیا کے مطابق داعش نے ابوبکر البغدادی کی ہلاکت کی تصدیق آڈیو پیغام میں کی۔داعش نے ابو ابراہیم الہاشمی القریشی کو دہشت گرد تنظیم کا نیا سربراہ بھی مقرر کرنے کا اعلان کیا۔امریکا نے داعش سربراہ ابوبکر البغدادی کی ہلاکت کی ویڈیو جاری کردی خیال رہے کہ چند روز قبل امریکی فورسز نے شام کے علاقے ادلب میں خفیہ کارروائی کرتے ہوئے داعش کے سربراہ کو ہلاک کرنے کا دعویٰ کیا تھا جس کی امریکی صدر ڈونلڈ ٹرمپ نے بھی تصدیق کی تھی۔

بعدازاں امریکی حکام کا کہنا تھا کہ القاعدہ کے سربراہ اسامہ بن لادن کی طرح داعش کے سربراہ کی باقیات بھی سمندر برد کر دی گئی ہیں۔گزشتہ روز امریکی محکمہ دفاع پینٹاگون نے ابو بکر البغدادی پر حملے کی پہلی ویڈیو بھی جاری کی تھی جس میں امریکی ہیلی کاپٹرز کے حملے کے بعد فوجیوں کو اس کمپاؤنڈ کی طرف بھاگتے ہوئے دیکھا جاسکتا ہے جہاں سرنگ میں جانے سے پہلے ابوبکر البغدادی موجود تھا۔

لاہور:(ایمرا نیوزآن لائن) ورلڈکپ سے قبل گرین شرٹس کی کارکردگی میں عدم تسلسل کا خوف مکی آرتھرکو ستانے لگا۔برطانوی چینل ’’اسکائی اسپورٹس ‘‘ کو ایک انٹرویو میں پاکستان کرکٹ ٹیم کے ہیڈ کوچ مکی آرتھر نے کہاکہ2سال قبل انگلینڈ میں ہی چیمپئنز ٹرافی فتح کی یادیں آج بھی تازہ ہیں،گرین شرٹس نے شاندار انداز میں مشن مکمل کیا،وہ پاکستان کرکٹ کے حیران کن 3ہفتے تھے،توقعات کے برعکس ہم ایک مضبوط ٹیم بن کر ابھرے،اس کے بعد بھی مسلسل مزید استحکام کیلیے کام کیا ہے۔

ایک سوال پر انھوں نے کہا کہ میری سب سے بڑی تشویش کارکردگی میں تسلسل کے حوالے سے ہے۔ نوجوان ٹیموں میں اس طرح کے مسائل ہوتے ہیں،ہم چیمپئنز ٹرافی میں درست ٹریک کی جانب گامزن ہوئے،ٹی ٹوئنٹی میں کارکردگی غیر معمولی رہی،مضبوط حریفوں کیخلاف مشکل کرکٹ میں بھی تاثر چھوڑا،آسٹریلیا کیخلاف سیریز میں 8اہم کھلاڑیوں کو آرام دیا اور ’’بی‘‘ ٹیم کے ساتھ کھیلے جس کی سخت ضرورت بھی تھی۔انہوں نے کہا کہ مسلسل کرکٹ کی وجہ سے جنوبی افریقہ اور انگلینڈ کی ٹیموں کے بھی ورلڈکپ سے قبل فٹنس مسائل سامنے آئے ہیں،اس سے ظاہر ہوتا ہے کہ کینگروز کیخلاف ہوم سیریز میں کھلاڑیوں کو آرام دینے کا ہمارا فیصلہ غلط نہیں تھا،ہمارا مقصد تھا کہ ورلڈکپ میں تازہ دم،سپر فٹ، مضبوط اور مستعد کھلاڑیوں پر مشتمل اسکواڈ کے ساتھ میدان میں اتریں،ویسٹ انڈیز کیخلاف میچ سے اپنی مہم کا آغاز کریں تو کوئی مسائل نہ ہوں۔

مکی آرتھر نے کہا کہ گرین شرٹس کی بیٹنگ اور بولنگ میں مہارت بہترین لیکن فیلڈنگ اور فٹنس پر کام کرنے اوربہتری لانے کی ضرورت تھی، فیلڈرز نے کئی بار جہاں ایک رن بنتا تھا2دیے، یا2کے بجائے3رنز بن گئے،مجموعی طور پر ہر اننگز میں 20سے 30رنز زیادہ بنے جس کا نتائج پر بھی اثر پڑا، ہم نے فٹنس میں بہتری کیلیے کام کیا، اس وقت ہمارے ڈریسنگ روم میں چند کھلاڑی جونٹی رہوڈز تو نہیں لیکن سپر فٹ اور اچھے فیلڈرز ضرور ہیں، 2 سال کی محنت کے ثمرات نظر آنے لگے ہیں۔انھوں نے کہا کہ امید ہے کہ محمد عامر اپنی اصل فارم میں واپس آجائیں گے،چیمپئنز ٹرافی کے بعد پیسر نے رنز تو زیادہ نہیں دیے، اکانومی ریٹ 4.7بُرا نہیں،وہ حیران کن مہارت رکھنے والے بولر ہیں،ہم چاہتے ہیں کہ محمد عامر تسلسل کے ساتھ وکٹیں حاصل کریں،کسی بھی حریف کو محدود رکھنے کیلیے وکٹوں کا حصول ضروری ہے،دوسری جانب ہمیں حیران کن ٹیلنٹ میسر آیا ہے، 19سال عمر کے شاہین شاہ آفریدی اور محمد حسنین کو عالمی معیار کی بولنگ کرتے دیکھنا بڑا ہی خوشگوار تجربہ ہوتا ہے،دونوں طویل عرصے تک پاکستان کرکٹ کی خدمت کریں گے۔مکی آرتھر نے کہا کہ پی ایس ایل نوجوان کرکٹرز کو سخت مقابلوں اور مشکل صورتحال میں ڈٹ کر مقابلہ کرنے کا ہنر سکھاتی اور ڈومیسٹک کرکٹ سے ایک قدم آگے بڑھتے ہوئے عالمی معیار کی کرکٹ کھیلنے کا موقع ملتا ہے،قومی ٹیموں کیلیے اسٹارز دباؤ سے بھرپور میچز میں ہی تیار کیے جا سکتے ہیں۔

لاہور (آن لائن)اوورسیز پاکستانیوں کیلئے قومی اور صوبائی اسمبلی کی نشستوں کا کوٹہ نہ رکھنے کیخلاف درخواست پر فل بنچ کی تشکیل کیلئے لاہور ہائیکورٹ سے رجوع کر لیا گیا ہے ۔ مقامی شہری انجینئر سید محمد الیاس نے لاہور ہائیکورٹ میں ایک متفرق درخواست دائر کی جس میں نشاندہی کی گئی کہ اوورسیز پاکستانیوں کے لیے قومی اور صوبائی اسمبلی کی نشستوں کا کوٹہ نہ رکھنے کے خلاف درخواست ہائیکورٹ میں زیر سماعت ہے. درخواست میں اعتراض اٹھایا گیا کہ اوورسیز پاکستانیوں کو قومی اور صوبائی اسمبلی کی نشستوں کا کوٹہ نہیں رکھا گیا حالانکہ 15 ملین اوورسیز پاکستانیوں کا پاکستان کی تقری میں اہم کردار رہا ہے۔ درخواست میں نکتہ اٹھایا گیا کہ قومی اور صوبائی اسمبلی کیلئے اقلیتوں کا کوٹہ ہے لیکن اوورسیز کو یہ حق نہیں دیا گیا۔ درخواست میں استدعا کی گئی ہے قومی اور صوبائی اسمبلی کی نشستوں کے لیے اوورسیز پاکستانیوں کا کوٹہ مختص کرنے کا معاملہ اہم نوعیت کا ہے اس لیے درخواست پر سماعت کیلئے پر فل بنچ تشکیل دیا جائے۔(ایم خالد)

نیوزی لینڈ(ایمرا نیوزآن لائن) سانحہ نیوزی لینڈ میں جہاں ایبٹ آباد کے نعیم رشید نے جان کی بازی لگا کر دہشت گرد کو روکنے کی کوشش کی وہیں ایک اور پاکستانی خاندان کے سبب ایک درجن سے زائد قیمتی جانیں محفوظ رہیں۔پاکستانی شہری حناگاڑی ڈرائیور کر کے اپنے شوہر عامر کو نماز جمعہ کے لیے النور مسجد چھوڑنے پہنچی ہی تھیں کہ دہشت گرد مسجد سے باہر نکلا اور سامنے سے آنے والی گاڑیوں پر فائرنگ کردی۔حناعامر کا کہنا ہے کہ جدید ترین ہتھیار سے دہشت گرد جس طرح اندھا دھند فائرنگ کررہا تھا اور لوگ جان بچانے کی کوشش میں باہر نکل رہے تھے۔حنا کے شوہر نے بتایا کہ فائرنگ کی آواز سن کر حنا نے کار ریسورس کرنے کی کوشش کی مگر پیچھے کئی گاڑیاں موجود ہونے کے سبب وہ ناکام رہیں جبکہ ایک گاڑی کے سامنے آنے کے سبب وہ اتر بھی نہ سکیں۔اس دوران جان بچانے کے لیے 10 سے افراد نے ان کی سیاہ گاڑی کے پیچھے پناہ لےلی جبکہ دہشت گرد نے گاڑی کی دوسری طرف سے ان پر فائرنگ شروع کر دی۔حنا ،عامر اور موجود تمام افراد کار میں جتنا نیچے ہو سکتے تھے، چھپ گئے۔ان کی کار کو 26 گولیاں لگیں مگر معجزانہ طور پر نہ صرف یہ جوڑا بلکہ گاڑی کے پیچھے چھپے افراد بھی محفوظ رہے تاہم ایک کمسن محمد حاذق پناہ کے لیے گاڑی کی جانب بڑھ ہی رہا تھا کہ دہشت گرد نے اسے گولیوں کا نشانہ بنادیا.سوفٹ ویئرٹیسٹنگ کے شعبے سے وابستہ حنا عامر اپنے شوہر اور دو بچوں کے ساتھ تین برس پہلے ہی نیوزی لینڈمنتقل ہوئی ہیں ، دکھی ہیں کہ وہ اپنے بچوں کے ہم جماعت کی زندگی نہ بچا سکیں۔

لاہور(ایمرا نیوزآن لائن) پاک بھارت کشیدگی کے باعث بھارتی لڑکا اور پاکستانی لڑکی کی شادی ملتوی ہوگئی۔میڈیا رپورٹس کےمطابق پاک بھارت کشیدگی کے باعث بھارتی ریاست راجستھان کے ایک شخص کی پاکستانی دلہن سے شادی ملتوی ہوگئی ہے۔راجستھان کی سندھ سے ملنے والی سرحد کے قریب ضلع برمیر کے مکین ’مہندر سنگھ‘ کی شادی ضلع عمرکوٹ کی ’چھگن کنور‘ سے ہونا طے پائی تھی۔ مہندر سنگھ نےاپنے 4ساتھیوں کے ہمراہ ہفتے کے روز تھر ایکسپریس کے ذریعےعمرکوٹ جاکر اپنی دلہن کو بھارت لانا تھا۔مگرپاک بھارت کشیدگی کے باعث تھر ایکسپریس کو بھارت سے پاکستان جانے کی اجازت نہیں ملی۔مہندر سنگھ نے کہا کہ انہوں نے شادی کی تمام تیاریاں مکمل کرلی تھیں اور تمام رشتے داروں کو دعوت نامے بھی تقسیم کر دیے تھے لیکن پاکستان اور بھارت کے درمیان ہونے والی کشیدگی کے باعث وہ اب تک اپنی دلہن نہیں لاسکےہیں۔

کیریج فیکٹری 21 مارچ تک کوچز تیار کرکے ریلوے کے حوالے کرے گی
راولپنڈی(ایمرا نیوز آن لائن) وزیر اعظم عمران خان 23 اور 30 مارچ کو 2 نئی لگژری ٹرینوں کا افتتاح کریں گے۔عمران خان 23 اور 30 مارچ کو 2 نئی لگژری ٹرینوں سر سید ایکسپریس اور جناح ایکسپریس کا افتتاح کریں گے، ریلوے کیریج فیکٹری 21 مارچ تک دونوں ٹرینوں کی30 کوچز تیار کر کے پاکستان ریلوے کے حوالے کرے گی جس کا ورک آرڈر جاری ہوگیا ہے۔واضح رہے کہ کیریج فیکٹری ملازمین کو وفاقی وزیر شیخ رشید کی طرف سے 3,3 ہزار روپے مارچ کی تنخواہ کیساتھ جاری ہوں گے۔سر سید ایکسپریس 30 مارچ سے راولپنڈی سے کراچی جائیگی، یہ نان اسٹاپ ٹرین ریکارڈ 18 گھنٹوں میں کراچی پہنچے گی یہ مکمل ایئرکنڈیشنڈ ہوگی اس میں صوفہ سیٹ، ہر کوچ میں الگ ای ای ڈی، وائی فائی، ایئرکنڈیشنڈ، منرل واٹر دستیاب ہوگا، اس کا کرایہ11 ہزار روپے تجویز کیا گیا ہے۔جناح ایکسپریس لاہور سے کراچی چلے گی یہ دونوں پاکستان کی انتہائی لگژری ریل گاڑیاں ہوں گی، جدید ترین واش روم بھی ہوں گے، لگژری برتھ اور سیٹ ہوگی ان گاڑیوں کی 3 ماہ قبل تک سیٹوں کی بکنگ کرائی جاسکے گی۔

لاہور(ایمرا نیوزآن لائن) وطن سے دوری ہر کسی کو بہت تنگ کرتی ہے، اور اگر آپ اپنے دشمن ملک میں پھنسے ہوئے ہوں اور وہ آپ کو واپس نہ جانے دے رہا ہو تو اس سے بُری بات کیا ہوگی کچھ یہی کہانی کبریٰ گیلانی کی ہے جو اس وقت جموں و کشمیر میں ہے اس کی اپنے شوہر سے علیحدگی کے بعد پاکستان واپس آنا چاہتی ہے لیکن بھارت اپنی حرکتوں سے باز نہیں آیا ہے اور ایک بار پھر دنیا کو اپنا اصل چہرہ دیکھا رہا ہے، بھارت کبریٰ گیلانی کو کلیئرنس نہیں دیا جارہا ہے .
https://emra.tv/2019/01/26/کراچی-15سال-میں-…مرشل-کئے-گئے-ایک/
کبریٰ گیلانی کا پاکستان میں ضلع مظفر گڑھ سے تعلق ہے اور یہ مظفر گڑھ میں تحصیل ڈومیل کی رہائشی ہے. اس کی آٹھ سال پہلے مقبوضہ کشمیر میں شادی ہوئی تھی جس شخص سے اس کی شادی ہوئی تھی اس کا نام محمد الطاف ہے. ان کے درمیان علیحدگی کی بڑی وجہ اولاد کا نہ ہونا ہے جس کی وجہ سے ان کی طلاق ہوگئی ہے. طلاق کے بعد کبریٰ گیلانی اپنے ملک پاکستان واپس آنا چاہتی ہیں اس کے لیے انہوں تمام سفری دستاویزات بھارتی حکام کو فراہم بھی کیے ہیں لیکن بھارت ان کو پاکستان جانے نہیں دے رہا جس کی وجہ سے وہ بھارت میں پھنس گئی ہیں. کبریٰ گیلانی نے بتایا ہے کہ ان کی طرح بہت سی خواتین بھارت میں پھنسی ہوئی ہیں اور ان میں سے کچھ خودکشی بھی کر چکی ہیں. کبریٰ گیلانی نے وزیراعظم عمران خان سے اپیل کی ہے کہ وہ ان کو وطن واپس لانے کے لیے مدد کریں.