Tag showbiz news

لاہور(وقت آن لائن)اداکارہ سعدیہ امام نے فیملی کو وقت دینے کیلئے شوبز سے کنارہ کشی اختیار کر لی، ان کا کہنا تھا کہ شوہر کی اجازت ہو گی تو پھر انڈسٹری میں کام شروع کر دوں گی۔
میڈیا رپورٹ کے مطابق اداکارہ نے اپنے شوہر کے کہنے پر شوبز کی دنیا کو خیرباد کہہ دیا ہے۔ سعدیہ امام کا موقف ہے ازدواجی زندگی اور بچے میری ترجیح ہیں، شادی کے بعد شوہر نے اجازت دی تھی تو میں نے اداکاری کی، اب بھی خاوند کی اجازت ہو گی تو شوبز میں پھر کام کروں گی۔
سعدیہ امام نے کہا کہ شوبز کی دنیا میں اچھا وقت گزارا ہے لیکن میں سمجھتی ہوں کہ اس وقت میرے گھر اور میرے بچوں کو میری ضرورت ہے تو پھر اس فیلڈ کو چھوڑنے میں کوئی ہچکچاہٹ نہیں ہونی چاہئے۔

کراچی(ایمرا نیوز آن لائن) پاکستان شوبزانڈسٹری کی نامورفنکارہ بشریٰ انصاری نے بچوں کے ساتھ بڑھتے ہوئے جنسی زیادتی کے واقعات پرکہا ہے کہ ان واقعات کی روک تھام کے لیے دینی مدارس اور مولویوں کے کمروں میں کیمرے لگائے جائیں۔اداکارہ بشریٰ انصاری کی ایک ویڈیوسوشل میڈیا پر وائرل ہورہی ہے جس میں وہ مدرسوں میں پڑھنے والے معصوم بچوں کے ساتھ ہونے والے جنسی زیادتی کے واقعات اوراسکولوں میں طالبعلموں کے ساتھ اساتذہ کے بہیمانہ سلوک پرنہ صرف بات کرتی ہوئی نظر آرہی ہیں بلکہ انہوں نے ان واقعات کی روک تھام کے لیے مسئلے کا حل بھی پیش کیا ہے۔

بشریٰ انصاری نے کہا دینی مدارس میں تنہائی کا ماحول زیادہ ہوتا ہے، مسجد اور مدرسہ ہونے کے باعث تعظیم کی وجہ سے وہاں شورنہیں ہوتا، زیادہ لوگ نہیں ہوتے اورمخصوص ماحول ہوتا ہے لہذٰا وہاں ان لوگوں کوموقع مل جاتا ہے۔ اسلیے ہرمدرسے اورہر مولوی کے کمرے میں کیمرے لگائیں۔ اس کے علاوہ اسکول میں موجود اساتذہ جو طالبعلموں پرتشدد کرتے ہیں، انہیں مختلف طرح سے اذیتیں دیتے ہیں انہیں تھپڑوں سے، لکڑی سے مارتے ہیں الٹا ٹانگ دیتے ہیں ان اسکولوں میں بھی کیمرے لگائے جانے چاہیئں تاکہ اس طرح کے لوگوں پرنظر رکھی جاسکے۔
یہ بھی پڑھیں: پنوعاقل میں طالبہ سے زیادتی کے الزام میں مدرس گرفتار

بشریٰ انصاری نے کہا کمزوراورجابرکا رشتہ بہت پرانا ہے جہاں کسی کے پاس کوئی اختیارآجاتا ہے وہ اپنی ساری فرسٹریشن بیچارے مظلوم پرنکالتا ہے پھر چاہے وہ کوئی عورت ہو، اس کی بیوی ہویا پھر کوئی طالبعلم ہو۔

بشریٰ انصاری نے مزید کہا کہ آبادی میں اضافے کی وجہ بھی ان واقعات میں اضافے کا ایک سبب ہے ۔ زیادہ بچے لوگوں سے سنبھالے نہیں جاتے اور والدین اپنے بچوں پر پوری طرح نظرنہیں رکھ پاتے، کچھ لوگ تو صرف اس لیے اپنے بچوں کو مدرسے میں ڈال دیتے ہیں کہ وہاں انہیں کھانا بھی ملے گا، قرآنی تعلیم بھی ملے گی اوریہ بچے ہمیں جنت میں بھی لے جائیں گے لیکن دراصل قرآنی تعلیم کی ضرورت ان والدین کو ہے آپ خود قرآن پڑھیے اورترجمے سے سمجھئے اورپھر اپنے بچوں کو خود قرآن پڑھائیں لیکن جن کے 12، 14 بچے ہوں گے وہ کہاں پڑھائیں گے ان کے لیے تو صبح سے شام اتنے بچوں کے ساتھ کام مشکل ہوجاتا ہے

اداکارہ بشریٰ انصاری نے بچوں کے ساتھ زیادتی کرنے والے درندوں کو سزائے موت دینے کی بات پرکہا کہ ایسے درندوں کو فوراً سزائے موت نہیں دینی چاہیئے بلکہ رفتہ رفتہ دینی چاہیئے۔ سزائے موت دینے سے پہلے ان لوگوں کواتنی تکلیف اور ذہنی اذیت دیں جتنی انہوں نے بچوں کوتکلیف اورذہنی اذیت دی ہے۔ تو شاید اس طرح لوگوں میں خوف پیدا ہوگا اوروہ بچوں کے ساتھ زیادتی کرنے سے پہلے سوچیں گے کہ اگر ہم نے یہ مکروح فعل کیا تو ہمارے ساتھ بھی یہی سب ہوگا۔ مجھے یہ نہیں معلوم کہ ہمارے قانون میں یہ سزا قابل قبول ہے یا نہیں لیکن اصولاً تو یہی ہونا چاہیئے۔

بشریٰ انصاری نے زیادتی جیسے قبیح فعل کے لیے ملک میں رائج قوانین میں ترامیم کرنے کا بھی مطالبہ کرتے ہوئے کہا کہ ان قوانین میں حالات کے حساب سے تبدیلی ہونی چاہیئے۔

کراچی(وقت آن لائن) اداکارہ میرا کا کہنا ہے کہ اداکاراؤں کو وزیراعظم اور دیگر وزرا کی طرح عزت اور پروٹوکول ملنا چاہیےکیونکہ اداکارائیں بین الاقوامی سطح پر ملکی ثقافت کی نمائندگی کرتی ہیں۔

پاکستانی اسکینڈل کوئین کے نام سے جانے جانی والی اداکارہ میرا نے کسی نامعلوم شخص کے ساتھ سوشل میڈیا پر ہونے والی بات چیت کے اسکرین شاٹس شیئر کیے ہیں جنہیں دیکھ کر اندازہ ہورہا ہے کہ میرا سے کسی شخص نے فلم کے بدلے نازیبا مطالبات کیے ہیں تاہم میرا نے اس شخص کو اداکاراؤں کی عزت کرنے کا سبق پڑھاتے ہوئے کھری کھری باتیں سنائی ہیں۔

اداکارہ میرا کی جانب سے شیئر کیے جانے والے اسکرین شاٹس کے مطابق وہ لوگ جو فلم اسٹارز کے پروجیکٹ میں سرمایہ کاری کرنا چاہتے ہیں انہیں یہ بات معلوم ہونی چاہیے کہ یہ لوگ فنکار ہیں اور ہمارے معاشرے کی نایاب شخصیات ہیں۔انہیں اداکاراؤں کی عزت کرنی چاہیے کیونکہ اداکارائیں فاحشائیں نہیں ہوتیں یاپھر ان کی کوئی پارٹ ٹائم سرگرمیاں نہیں ہوتیں۔

میرا کا کہنا تھا کہ اداکاراؤں کا ہماری انڈسٹری میں بہت بڑا کردار ہوتا ہے اور یہ بین الاقوامی سطح پر ملکی ثقافت کی نمائندگی کرتی ہیں۔ اداکارائیں نہ صرف محنت سے کام کرتی ہیں بلکہ اپنے ملک کے وقار کے لیے اپنی پوری زندگی وقف کردیتی ہیں۔ لہذٰا انہیں وزیراعظم اوردیگر وزرا سے زیادہ عزت اور پروٹوکول دیا جانا چاہیے تاکہ انہیں اپنے کام پر اور پاکستان فلم انڈسٹری میں خدمات انجام دینے پرفخر محسوس ہو۔

اداکارہ میرا نے مزید لکھا اگر آپ پیشہ وارانہ طریقے سے پراجیکٹس میں سرمایہ کاری کرنا چاہتے ہیں تو مکمل قانونی کاغذات، پیشگی معاوضہ اور معاہدے کے ساتھ آئیں۔ اگر آپ سوچتے ہیں کہ آپ کی تفریح کے لیے کوئی آپ کو ڈرنکس (شراب)، ڈرگز یا لڑکیاں پیش کرے گا تو کوئی یہاں آپ کو تفریح فراہم کرنے نہیں بیٹھا۔ اداکارہ میرا نے ان اسکرین شاٹس کو شیئر کرتے ہوئے اسے’’خصوصی پیغام‘‘ قرار دیا۔

ایک اور ٹوئٹ میں میرا نے لکھا ہیروئن کا مطلب حقیقی زندگی میں بھی ہیروئن ہوتا ہے لہذٰا وہ غلط کام کرنے والی خواتین نہیں ہوتیں، وہ کلبس میں کام نہیں کرتیں۔ پاکستان فلم انڈسٹری کا مطلب پاکستان فلم انڈسٹری ہے نہ کہ کلب انڈسٹری۔ فلم انڈسٹری کی کالی بھیڑیں اور مکروح چہرے بہت جلد بے نقاب ہوجانے ہیں۔

کراچی(ایمرا نیوز آن لائن) اداکار عمران عباس نے اداکارہ عائزہ خان کی تعریفوں کے پل باندھ دیئے اور کہا کہ وہ ان کی سب سے پسندیدہ اداکارہ ہیں۔عمران عباس نے انسٹا گرام پر اپنی اور مقبول ترین اداکارہ عائزہ خان کی تصویر مداح سے شیئر کی جس میں دونوں اداکار سیڑھیوں پر بیٹھے پوز دیتے نظر آرہے ہیں۔

عمران عباس نے تصویر کے ساتھ کیپشن میں ڈراموں کے نام بتاتے ہوئے کہا کہ تم کون پیا، محبت تم سے نفرت ہے، کوئی چاند رکھ اور تھوڑا سا حق اور پھر کہا کہ آپ میری سب سے پسندیدہ شریک فنکارہ ہیں اور اب ہمارا ایک اور ڈرامہ آنے والا ہے۔

عمران عباس نے عائزہ کی تعریفیں کرتے ہوئے کہا کہ آج بھی میرے الفاظ آپ کے لیے یکساں ہیں کہ آپ واقعی نہ صرف ایک خالص اداکارہ ہیں بلکہ میری بہترین دوست بھی ہیں، اللہ پاک آپ کو بہت نعمتوں سے نوازے۔

کراچی(ایمرا نیوز آن لائن)اداکارہ و میزبان حنا الطاف کا کہنا ہے کہ اداکار فیصل رحمان کے ساتھ رومانوی سین کرنا سب سے مشکل رہا کیونکہ وہ کچھ زیادہ ہی رومانوی ہو جاتے ہیں۔اداکارہ نے ناشپاتی پرائم کے شو ’ٹو بی اونسٹ‘ میں کچھ ماہ قبل ایک انٹرویو دیا تھا جس کی مکمل قسط اب یوٹیوب پر ریلیز کی گئی ہے۔اس ویب شو کی ایک کلپ سوشل میڈیا پر خوب وائرل ہو رہی ہے جس میں اداکارہ حنا الطاف فیصل رحمان کے ساتھ رومانوی سین کے حوالے سے گفتگو کر رہی ہیں۔

انٹرویو میں اداکارہ سے فواد خان کے ساتھ رومانوی سین کرنے کے حوالے سے ایک سوال پوچھا گیا جس پر وہ کہتی ہیں کہ ’میں نے عماد عرفانی کے ساتھ بھی رومانوی سین کیے ہیں لیکن اداکار فیصل رحمان کے ساتھ رومانوی سین کرنا سب سے مشکل رہا‘۔

حنا الطاف نے کہا کہ فیصل رحمان بہت زیادہ ہی رومانوی ہو جاتے ہیں، یعنی اگر کسی سین میں انگلی پکڑنی ہو گی نا تو وہ بندہ ہاتھ پکڑ لیتا ہے، مجھے اپنا الارم آن رکھنا پڑتا ہے کہ بس ابھی کچھ ہو جائے گا جس پر شو کے میزبان مزاحیہ انداز میں کہتے ہیں کہ یہ رومانٹک نہیں ہے اسے کیس کہتے ہیں کیونکہ آپ ان کو انگلی دیتی ہیں تو وہ ہاتھ پکڑ لیتے ہیں۔

جس پر اداکارہ حنا الطاف نے کہا کہ میں نے تو فیصل رحمان کو ’می ٹو‘ کہہ کر ڈرانا شروع کر دیا تھا۔حنا الطاف کی منیب پر تنقید نے اہلیہ ایمن خان کو طیش دلادیا دوسری جانب انٹرویو کے دوران اداکارہ سے سیاست کے حوالے سے بھی سوال پوچھا گیا جس پر حنا الطاف کا کہنا تھا انہیں سیاست میں صفر دلچسپی ہے۔

واضح رہے کہ چند ماہ قبل حنا الطاف کی اسی شو کی کلپ وائرل ہوئی تھی جس میں انہوں نے منیب بٹ کی اداکاری اور ایمن کی شادی کے حوالے سے بھی تنقید کی تھی جو سوشل میڈیا پر خوب وائرل ہوئی تھی۔

لاہور(ایمرا نیوز آن لائن)اسٹیج اور ٹی وی کے معروف اداکار اشرف راہی انتقال کر گئے اسٹیج، ٹی وی اور فلم کے معروف اداکار اشرف راہی دل کا دورہ پڑنے سے انتقال کر گئے۔اداکار اشرف راہی کو دل کا دورہ پڑنے پر خاندانی ذرائع کے مطابق اشرف راہی دل کا دورہ پڑنے کے لاہور کے پنجاب انسٹی ٹیوٹ آف کارڈیالوجی (پی آئی سی) منتقل کیا گیا تاہم وہ جانبر نہ ہو سکے۔

خاندانی ذرائع کے مطابق اداکار اشرف راہی کی نماز جنازہ لال پل پنج پیر کے قریبی گراؤنڈ میں نماز ظہر کے بعد ادا کی جائے گی۔ مرحوم نے سوگواران میں تین بیٹے اور ایک بیٹی چھوڑی ہے۔اسٹیج، ٹی وی اور فلم اداکار اشرف راہی نے درجنوں اسٹیج ڈراموں، ٹی وی اور فلموٕں میں کام کیا اور وہ مزاح میں اپنا منفرد مقام رکھتے تھے۔

اشرف راہی نے اسٹیج ڈراموں شرطیہ مٹھے، مس رانگ کال، منڈے نا سمجھو، ماہی مینوں چھلا پوا دے کے علاوہ پنڈ دی کڑی اور مجاجن جیسی فلموں میں سائیڈ رول ادا کیے۔

لاہور(ایمرا نیوز آن لائن)کرتار پور راہداری کے افتتاح کے موقع پر پاکستانی فلم و ڈرامہ انڈسٹری کی معروف شخصیات نے حکومت پاکستان کی جانب سے امن کے اس مثبت قدم کو خوب سراہا ہے حکومتِ پاکستان نے کرتار پور راہداری کا افتتاح کرکے دنیا میں امن، محبت اور رواداری کی ایک اعلیٰ مثال قائم کردی۔اس موقع پر پاکستانی شوبز انڈسٹری کی معروف شخصیات بھی حکومت کے اس اقدام کے حوالے سے اپنے جذبات کو ظاہر کرنے میں کسی سے پیچھے نہیں ہیں۔پاکستانی فلم و ڈرامہ انڈسٹری کی معروف شخصیات نے حکومت پاکستان کی جانب سے امن کے اس مثبت قدم کو خوب سراہا۔اس تاریخی موقع پر معروف اداکارہ ماہرہ خان، ارمینا خان، علی ظفر اور متعدد مشہور شخصیات نے اپنے جذبات کا اظہار کیا۔
ماہرہ خان
سپر اسٹار ماہرہ خان نے کرتار پور راہداری کے افتتاح کے موقع پر اپنے ٹوئٹر پیغام میں لکھا کہ ’مجھے پاکستان پر بہت فخر ہے، یہ قدم سب کے لیے محبت، امن اور رواداری کا پیغام ہے، یہ اقبال کا پاکستان ہے۔‘
ماورا حسین
اداکارہ ماورا حسین نے اپنے ٹوئٹر پیغام میں کہا کہ ’مجھے اپنے ملک اور وزیر اعظم پاکستان عمران خان پر ہمیشہ فخر ہے‘۔انہوں نے امید ظاہر کی کہ مستقبل میں امن و ترقی کی مزید راہداریاں کھلیں گی۔
مومنہ مستحسن
گلوکارہ مومنہ مستحسن نے کرتار پور راہداری کے افتتاح کے موقع پر وزیر اعظم عمران خان کا شکریہ ادا کرتے ہوئے کہا کہ ہمیں بحیثیت ایک قوم اپنے لیڈر پر فخر ہے۔انہوں نے کہا کہ ’جب ہم دیکھتے ہیں کہ ہمارا لیڈر خطے میں امن کی کرن ہے تو ہمیں ان پر فخر ہوتا ہے‘۔
ارمینہ خان
اداکارہ ارمینہ رانا خان نے کرتار پور راہداری کے افتتاح کے موقع پر اپنے جذبات کا اظہار کرتے ہوئے امن کے اس اقدام کو خوب سراہا۔ ارمینہ خان نے اپنی ٹوئٹ میں پاکستان کے کرتار پور راہداری کے افتتاح کے احسن قدم اور بھارت کی جانب سے بابری مسجد کے متعصبانہ فیصلے کا موازنہ بھی کیا۔
بلال اشرف
اداکار بلال اشرف نے اپنے ٹوئٹر پیغام میں سکھوں کو خوش آمدید کہتے ہوئے پاکستان زندہ باد کہا۔
احد رضا میر
معروف اداکار احد رضا میر نے پاکستان کی جانب سے امن اور بین المذاہب ہم آہنگی کے اس قدم کو تاریخی کہتے ہوئے وزیر اعظم پاکستان عمران خان کا شکریہ بھی ادا کیا۔
وزیر اعظم عمران خان نے کرتار پور راہداری کا افتتاح کیا
خیال رہے کہ وزیراعظم عمران خان نے گزشتہ برس 28 نومبر کو کرتارپور راہداری کا سنگ بنیاد رکھا تھا اور اس تقریب میں وزیراعظم کی دعوت پر کانگریس رہنما اور سابق بھارتی کرکٹر نوجوت سنگھ سدھو نے شرکت کی تھی جب کہ بھارتی حکومت کی طرف سے وزیر خوراک ہرسمرت کور اور وزیر تعمیرات ہردیپ سنگھ بھی شریک ہوئے تھے۔ وزیراعظم عمران خان نے کرتارپور راہداری کا افتتاح کردیا 11 ماہ میں راہداری کی تکمیل حکومتِ پاکستان نے 11 ماہ کی ریکارڈ مدت میں کرتارپور راہداری مکمل کی اورگوردوارہ دربار صاحب کودنیا کا سب سے بڑا گوردوارہ بنادیا۔گزشتہ روز 9 نومبر کو وزیراعظم عمران خان نے کرتارپور راہداری کا افتتاح کرکے تاریخ رقم کی۔سکھ یاتری اسے بابا گورونانک کے 550 ویں جنم دن پر حکومتِ پاکستان کی طرف سے تحفہ قرار دے رہے ہیں۔

لاہور (ایمرا نیوز آن لائن) اداکار وگلوکار علی ظفر کی جانب سے میشا شفیع کے خلاف 100 کروڑ روپے کے ہتک عزت کے دعویٰ کی سماعت کے موقع پر گلوکارہ میشا شفیع کی والدہ صباحمید بیان قلمبند کرانے سیشن کورٹ پہنچ گئیں تاہم جج کے رخصت پر ہونے کی وجہ سے سماعت 29 اکتوبر تک ملتوی کردی گئی۔

بتایا گیا ہے کہ گلوکارہ کی والدہ صبا حمید اپنی بیٹی کے حق میں گواہی کیلئے سیشن کورٹ آئیں لیکن ایڈیشنل سیشن جج امجد علی شاہ کے رخصت پر ہونے کے باعث کوئی کارروائی نہ ہو سکی، عدالت نے گواہوں کو آئندہ سماعت پر دوبارہ پیش ہونے کا حکم دے دیا۔

کراچی (ایمرا نیوز آن لائن)90 کی دہائی میں ابرار الحق کے شہرہ آفاق گانے’بلو دے گھر‘ نے شہرت کی بلندیوں کو چھوا اور آج 24 برس بعد بھی یہ گانا اپنی مقبولیت برقرار رکھنے میں کامیاب ہوگیا۔’بلو دے گھر‘ گیت 1995 میں پاکستانی پاپ اور بھنگڑا موسیقی کے معروف گلوکار ابرار الحق نے گایا تھا جسے خوب پزیرائی ملی تھی جس کا اب ریمیک کر کے کوک اسٹوڈیو سیزن 12 کی دوسری قسط میں پیش کیا گیا ہے۔

کوک اسٹوڈیو میں ’بلو‘ کے ریمیک نے جہاں 90 کی دہائی کے افراد کی 24 برس بعد یادیں تازہ کیں وہیں اس نے نئی نوجوان نسل کی دلچسپی بھی اپنی جانب مبذول کروالی ہے۔اس گیت کا ریمیک پیش کرنے سے قبل ابرار الحق کا کہنا تھا کہ یہ گانا ان کے لیے ’گیم چینجر‘ تھا اور اب اس کو پیش کرنے کا انداز پرانا روایتی نہیں بلکہ پہلے سے مختلف ہے یعنی اسے آج کی ’بلو’ سمجھیں۔

1995 میں ’بلو دے گھر جانے‘ کی کہانی بتاتے ہوئے ابرارالحق کا کہنا تھا کہ ’میری عادت تھی کہ ہر شام کو واک کرنے جاتا تھا، میں ایک مقام پر پہنچا تو وہاں بہت ساری وینز تھیں جہاں وین والا بول رہا تھا کہ ’کنے کنے جاناں‘ تو اس وقت میرے ذہن میں آیا کہ ’اساں تے جانا بلو دے گھر‘ تو اس پر میں خود ہی ہنسنا شروع ہوگیا تھا‘۔

گفتگو جاری رکھتے ہوئے ابرارالحق نے کہا کہ ’پھر جب میں واپس آرہا تھا تو سنا ’ٹکٹ کٹاؤ لین بناؤ جنے جنے جانا‘ تو جب یہ بنچ لائن مکمل ہوئی تو میں نے اسے سنجیدہ لیا پھر سوچا کہ یہ تو ایک گانا بن سکتا ہے اور اس طرح سے یہ گانا بنانے کا خیال میرے ذہن میں آیا‘۔

ابرار الحق کا کہنا تھا کہ یہ زندگی کا پہلا گانا تھاجب بنا تو میں بہت ہنسا۔ اسے سب سے پہلے میں نے اپنے بڑے بھائی کو سنایا جس کے بعد میں نے پوچھا اچھا ہے؟ تو انہوں نے کہا ہاں واقعی اچھا ہے جس پر میں نے بتایا یہ میرا ہے انہوں نے کہا کہ آگے سناؤ تو میں نے کہا بس اتنا ہی اس وقت میرے بھائی نے کہا اسے مکمل بناؤ۔گلوکار نے مزید بتایا کہ بھائی کے کہنے پر ہی گانے میں بھنگڑا شامل کیا اور اس طرح یہ گانا ٹکڑوں میں بنتے ہوئے دوسال میں مکمل ہوا جسے 1995 ستمبر میں ریلیز کیا گیا۔

تاہم اب کوک اسٹوڈیو سیزن 12 میں بھی نئی بلو نے ٹکٹ بھی کٹادی اور لائن بھی بنا ڈالی۔مداحوں کی جانب سے ’ ’بلو دے گھر‘ کو قابل ستائش ریمیک قرار دیا جارہا ہے جس پر دلچسپ تبصروں کا سلسہ جاری ہے۔مجادلہ نامی صارف لکھتی ہیں کہ ’1995 سے 2019 وقت گزرگیا لیکن کل بھی بلو زندہ تھی آج بھی بلو زندہ ہے‘۔ گانے سے لطف اندوز ہوتے ہوئے محمد حارث لکھتے ہیں کہ ’بہت خوب اور بہت اچھا ہمیں بھی بلو کے گھر جانا ہے‘۔گانے کی تعریف کرتے ہوئے رزین احمد مداح نے لکھا کہ ’زبردست گانا تھا لیکن میں گانے میں پیچھے آواز ملانے والوں کو بھی سراہانا چاہوں گا ان کی وجہ سے مزید مزہ آگیا ۔

عدنان نامی مداح نے گانے کو ٹریٹ کہتے ہوئے کوک اسٹوڈیو ٹیم کا شکریہ ادا کیا۔واضح رہے کہ کوک اسٹوڈیو سیزن 12 کو معروف بینڈ وائٹل سائنز کے سابق رکن روحیل حیات پروڈیوس کررہے ہیں جو اس سے قبل کوک اسٹوڈیو کے ابتدائی 6 سیزن پروڈیوس کرچکے ہیں۔کوک اسٹوڈیو سیزن 12 کا آغاز 11 اکتوبر سے کیا گیا ہے جس کی پہلی قسط میں اب تک حمد باری تعالی ’وہی خدا ہے‘، ’دم مستم‘، ’ماہی دیا جھونکا‘ اور ’رم پم‘ پیش کیا جاچکا ہے۔

لاہور(ایمرا نیوز آن لائن)اداکار حمزہ علی عباسی اپنی اہلیہ نیمل خاور کے ساتھ پیرس کے دورے پر ہیں جن کی تصاویر سوشل میڈیا پر وائرل ہیں۔حمزہ علی عباسی نے نیمل خاور سے رواں برس اگست میں شادی کی تھی جس کے بعد دونوں نے پاکستان کے خوبصورت مقامات کی سیر کی اور پھر اسپین چلے گئے۔حمزہ اور نیمل اب پیرس میں موجود ہیں جہاں ان کے سیر سپاٹے جاری ہیں۔نیمل خاور نے گزشتہ دنوں اسپین کے خوبصورت مناظر کی تصاویر انسٹاگرام پر شیئر کیں جسے مداحوں نے پسند کیا اور اب انہوں نے پیرس کے سیر سپاٹوں کی تصویریں بھی پوسٹ کی ہیں۔

نیمل خاور نے فرانس کے شہر پیرس کے تاریخی مقام ایفل ٹاور کے سامنے لی گئی ایک خوبصورت تصویر شیئر کی جس میں دیکھا جاسکتا ہے کہ نیمل ہاتھ میں تالا پکڑی ہوئی ہیں جس پر حمزہ اور ان کا نام لکھا ہوا جب کہ تالے پر دل بھی بنا ہوا ہے جو دونوں کی محبت کا اظہار کرتا ہے۔

اس کے علاوہ انہوں نے اپنی اور حمزہ کی دو تصویریں بھی شیئر کیں جس پر مداحوں نے دونوں کی جوڑی کو بہت پسند کیا۔خیال رہے کہ نیمل خاور نے شادی سے قبل فلم ’ورنہ‘ میں کام کیا تھا جس کے بعد انہوں نے ڈرامہ سیریل ’انا‘ میں اداکاری کے جوہر دکھائے لیکن شادی کے بعد انہوں نے شوبز انڈسٹری کو خیرباد کہہ دیا اور اب وہ اپنے مصوری کے شوق پر متوجہ ہیں۔دوسری جانب جیو ٹی وی پر حمزہ علی عباسی کا ڈرامہ سیریل ’الف‘ قسط وار جاری ہے جسے پرستاروں کی جانب سے خوب پذیرائی موصول ہورہی ہے۔