All posts by News Editor

افغانستان میں طالبان کے قبضے کے بعد عالمی سطح پر تشویش اور خدشات کا اظہار کیا جارہا ہے اور عالمی رہنماؤں کی جانب سے امریکی فیصلے پر تنقید کی جارہی ہے تو وہی طالبان سے انسانی حقوق کے احترام کا مطالبہ کیا جا رہا ہے اور طویل عرصے سے جنگ زدہ ملک میں امن و استحکام کے لیے زور دیا جا رہا ہے۔

غیرملکی خبرایجنسیوں کی رپورٹس کے مطابق دنیا کے مختلف ممالک کے رہنما افغانستان میں طالبان کی واپسی پر اپنے ردعمل کا اظہار کر رہے ہیں اور اس صورت حال کو مختلف پہلووں سے دیکھ رہے ہیں۔

متعدد رہنما افغانستان میں مجموعی ناکامی جبکہ کئی طالبان سے انسانی حقوق کی بحالی کا مطالبہ کر رہے ہیں، اسی طرح چند رہنماؤں نے نئی حکومت سے تعلقات قائم کرنے کے لیے تیار دکھائی دے رہے ہیں۔

یہ دنیا کی ناکامی ہے، برطانیہ
برطانیہ کے سیکریٹر دفاع بین ویلیس نے کہا کہ طالبان کا افغانستان پر قبضہ ‘عالمی برادری کی ناکامی’ ہے اور مغربی مداخلت سے صرف ادھورا کام ہوا۔

بی بی سی سے بات کرتےہوئے انہوں نے کہا کہ ‘ہم سب جانتے ہیں کہ افغانستان کا مسئلہ ختم نہیں ہوا، یہ دنیا کے لیے ایک نامکمل مسئلہ ہے اور دنیا کو اس حوالے سے مدد کرنے کی ضرورت ہے’۔

انہوں نے کہا کہ افغانستان میں 20 برس تک امریکا کی سربراہی میں بیرونی فورسز کی مداخلت ‘بے سود نہیں تھی بلکہ یہ کسی چیز کے لیے نہیں تھی’ لیکن مغربی طاقتیں پالیسی کے معاملات میں دور رس نظر نہیں رکھتیں۔

خبرایجنسی رائٹرز نے ان کا حوالہ دیتے ہوئے کہا کہ ‘اگر یہ ناکامی ہے تو یہ عالمی برادری کی ناکامی ہے کہ آپ یہ سمجھ ہی نہیں پائے کہ ایک دن میں مسائل ختم نہیں ہوتے’۔

انہوں نے کہا کہ ‘مجھے خوف آتا ہے جب آپ افغانستان جیسے ملک سے معاملات طےکرتے ہیں، جس کی ہزار سالہ مؤثر تاریخ اور خانہ جنگی ہے، آپ اس کے مسائل کا انتظام کریں اور ہوسکتا ہے کہ آپ کو 100 سال کے لیے اس کا انتظام کرنا پڑے’۔

افغانستان میں امریکی شکست پائیدار امن کا ایک موقع ہے، ایران
ایران کے نئے صدر ابراہیم رئیسی نے اپنے ردعمل میں کہا کہ افغانستان میں امریکی شکست سے پڑوسی ملک میں پائیدار امن کا موقع پیدا ہوا ہے جو جنگ سے متاثرہ ملک ہے۔

صدر دفتر سےجاری بیان کے مطابق ابراہیم رئیسی نے کہا کہ ‘افغانستان میں فوجی شکست اور امریکی انخلا ملک میں شہریوں کی زندگی، سلامتی اور پائیدار کے لیے ایک موقعے کا باعث ہونا چاہیے’۔

ایران کے نئے صدر کا بیان افغانستان میں طالبان کے قبضے کے بعد سامنے آیا ہے تاہم اس میں نہ تو طالبان کی جانب اشارہ کیا گیا ہے اور نہ ہی افغان حکومت کی ناکامی کا بتایا گیا ہے۔

چین کا طالبان کے ساتھ تعلقات مضبوط کرنا عزم
چین کی وزارت خارجہ کی ترجمان ہووا چونینگ نے کہا کہ افغانستان کے ساتھ ‘دوستانہ اور تعاون’ کے تعلقات مضبوط کرنے کے لیے تیار ہے۔

انہوں نے کہا کہ ہم افغانستان کے ساتھ تعلقات مضبوط کرنے کے موقع کا ‘خیر مقدم’ کرتے ہیں، ایک ایسا ملک جو نسلوں سے بڑے سپر پاورز کے لیے جیو اسٹریٹجک اہمیت کا حامل رہا ہے۔

ان کا کہنا تھا کہ ‘طالبان مسلسل اپنی امیدوں کا اظہار کرتے رہے ہیں کہ چین کے ساتھ اچھے تعلقات قائم ہوں اور وہ افغانستان میں بحالی اور ترقی میں چین کی شراکت داری کے خواہاں ہیں’۔

چین کی وزارت خارجہ کی ترجمان نے کہا کہ ‘ہم اس کا خیر مقدم کرتے ہیں، چین افغانستان کے شہریوں کے حق کا احترام کرتا ہے کہ وہ اپنی منزل کا آزادانہ طور پر تعین کریں اور ہم چاہتے ہیں کہ افغانستان کے ساتھ دوستانہ اور تعاون کے تعلقات بدستور پنپتے رہیں’۔

انہوں نے طالبان سے مطالبہ کیا کہ ‘پرامن انتقال’ اقتدار یقینی بنائیں اور ایک ‘واضح اور اسلامی حکومت’ کی تشکیل کے وعدے کی پاسداری کریں، افغانستان اور غیرملکی شہریوں کی سلامتی یقینی بنائیں۔

طالبان انسانی حقوق بحال رکھیں، نیوزی لینڈ کی وزیراعظم
نیوزی لینڈ کی وزیراعظم جسینڈا آرڈن نے طالبان قیادت سے مطالبہ کیا کہ افغانستان میں انسانی حقوق بحال رکھیں اور خواتین کو کام کرنے اور تعلیم حاصل کرنے کی اجازت دیں۔

انہوں نے کہا کہ جو غیرملکی اور افغانستان کے شہری باہر جانا چاہتے ہیں انہیں اجازت ہونی چاہیے۔

جسینڈا آرڈن نے نیوز کانفرنس میں کہا کہ عالمی برادری نے حال ہی میں انسانی حقوق اور شہریوں کے تحٖفظ کے حوالے سے مطالبہ کیا تھا۔

طالبان کا قبضہ ‘غیرمتوقع’ تھا، روس
افغانستان کے لیے روس کے خصوصی نمائندے ضمیر کابولوف نے کہا کہ ہم کابل سے اپنے متعدد سفارت کاروں کو واپس بھیج دیں گے تاکہ یہاں پر تعداد اتنی زیادہ نہ ہو۔

ضمیر کابولوف نے ریڈیو اسٹیشن ایخو موکسوی سے بات کرتےہوئے کہا کہ ایک انداز ے کے مطابق 100 روسی سفارت کاروں کو بھیج دیا جائے گا، جس کی وجہ تعداد کم کرنا ہے۔

رائٹرز کے مطابق روسی نمائندے نے کہا کہ افغانستان کے دارالحکومت کابل میں طالبان کا اس قدر جلدی قبضہ ایک طرح سے ‘غیر متوقع’ تھا۔

ان کا کہنا تھا کہ روس کو امریکا اور نیٹو کے تربیت یافتہ فوجیوں کےمعیار سے متعلق اچھے نتائج کی توقع تھی۔

انہوں نے کہا کہ افغانستان میں تعینات روس کے سفیر دیمتری زیرنوف منگل کو طالبان کے نمائندے سے ملاقات کریں گے تاکہ سفارتی مشن کی سیکیورٹی پر تبادلہ خیال کیا جائے جبکہ سفارتی حدود سے باہر طالبان نے پنجے گاڑھ دیے ہیں۔

ہمیں ریسکیو مشن پر توجہ دینی چاہیے، جرمن چانسلر
جرمن چانسلر انجیلا مرکل نے افغانستان سے شہریوں کی بحفاظت واپسی کے لیے آپریشن پر زور دیا۔ انہوں نے پارٹی رہنماؤں سے ملاقات کے بعد کہا کہ ہم مشکل وقت دیکھ رہے ہیں اور اب ہمیں لوگوں کو وہاں سے نکالنے پر توجہ دینی ہوگی۔

دنیا کو افغانستان کے بدلتے حالات پر تشویش ہے، قطر
قطر کے وزیر خارجہ محمد بن عبدالرحمٰن الثانی نے ایک بیان میں کہا کہ تیزی سے بدلتے ہوئے حالات پر دنیا کو تشویش ہے اور قطر پرامن انتقال اقتدار کے لیے خاص کر خلا پیدا ہونے کے بعد ممکنہ کوششیں کر رہا ہے۔

طالبان تشدد کی اجازت نہ دیں، آسٹریلیا
آسٹریلیا کے وزیراعظم اسکاٹ موریسن نے کہا کہ ہم اپنے 130 سے زائد شہریوں اور طالبان کے کنٹرول کے بعد انسانی بنیادوں پر افغانستان سے باہر جانے کے لیے ویزا کے امیدواروں کی واپسی کے لیے کام کر رہے ہیں۔

موریسن نے کہا کہ اتحادی کی حیثیت سے افغانستان کی تعمیر میں برسوں تک مدد کی اور اب جانی نقصان کے خدشات پر تشویش ہے۔

انہوں نے طالبان سے تشدد روکنے کا مطالبہ کیا اور کہا کہ شہریوں کے جرائم نہ ہوں، افغان حکومت عہدیداروں اور منتخب رہنماؤں کی عزت کا خیال رکھیں اور لوگوں کو بلارکاؤٹ ملک سے جانے کی اجازت دے دیں۔

وقت نکل چکا ہے، یورپی کمیشن
یورپی کمیشن کے نائب صدر مارگریٹیس شیناس کا کہنا تھا کہ وقت نکل چکا ہے اور ہم یورپ کے مائیگریشن اور سیاسی پناہ کے قواعد کی مکمل نظرثانی کرنے کا انتظار نہیں کرسکتے ہیں۔

افغانستان میں امریکیوں کی لامحدود موجودگی قبول نہیں، جوبائیڈن
امریکی صدر نے اپنے بیان میں کہا کہ ایک سال یا پانچ سال تک امریکی فوج کی موجودگی سے کوئی تبدیلی نہیں آتی اگر افغان فوج اپنے ملک کا دفاع نہیں کرسکتی یا نہیں کرے گی۔

انہوں نے کہا کہ میرے لیے ایک ملک میں خانہ جنگی کے درمیان امریکیوں کی لاتعداد موجودگی قبول نہیں ہے۔

تمام خلاف وزریاں بند ہوں، اقوام متحدہ
اقوام متحدہ کے سیکریٹری جنرل انتونیو گوتریس نے تشویش کا اظہار کرتے ہوئے کہا کہ افغانستان کے تنازع سے ہزاروں افراد ہجرت پر مجبور ہوں گے اور انسانی حقوق کی سنگین خلاف ورزیوں کی رپورٹس ہیں۔

ہم دلبرداشتہ ہیں، کینیڈا کے وزیراعظم ٹروڈو
کینیڈا کے وزیراعظم جسٹن ٹروڈو نے صحافیوں سے بات کرتے ہوئے کہا کہ کینیڈا بدلتے ہوئے حالات کا جائزہ لے رہا ہے اور افغانستان میں ہونے والی پیش رفت پر نظر رکھے ہوئے ہیں۔

انہوں نے کہا کہ ہمیں آج افغانستان کے شہریوں کو درپیش صورت حال سے دلبرداشتہ ہیں۔

ان کا کہنا تھا کہ افغانستان کے شہریوں کو کینیڈا کے نئے خصوصی امیگریشن پروگرام کے تحت تحفظ دینے کے لیے جاری کام ہماری اولین ترجیح ہے اور ہم اپنے اتحادیوں کے ساتھ مل کر کام کریں گے۔

امریکا کے اسٹیٹ ڈپارٹمنٹ کے بیان میں کہا گیا کہ 60 سے زائد ممالک نے مشترکہ بیان میں کہا کہ افغانستان کے شہری اور غیرملکی کو جو باہر جانا چاہتے ہیں انہیں اجازت ہونی چاہیے، ایئرپورٹس اور سرحدیں بدستور کھلی رہیں۔

رائٹرز کے مطابق امریکی حکومت، آسٹریلیا، کینیڈا، فرانس، جرمنی، اٹلی، جاپان، کوریا، قطر اور برطانیہ سمیت مختلف ممالک نے مشترکہ بیان میں کہا کہ افغانستان میں جن کے پاس اختیار ہے ان کی یہ ذمہ داری ہے کہ وہ انسانی جانوں اور املاک کا تحفظ کیا جائے اور فوری طور پر سیکیورٹی اور امن و عامہ بحال کیا جائے۔

انہوں نے کہا کہ افغانستان کے شہریوں کو تحفظ، سیکیورٹی اور عزت کا حق حاصل ہے اور ہم بحیثیت عالمی برادری ان کی مدد کے لیے تیار ہیں۔

افغان دارالحکومت کابل میں روس کے سفارت خانے نے کہا ہے کہ افغان صدر اشرف غنی نے پیسوں سے بھری 4 گاڑیوں اور ایک ہیلی کاپٹر سمیت ملک چھوڑا اور وہ کچھ رقم اس لیے پیچھے چھوڑ گئے کیونکہ ان کے پاس سے رکھنے کی جگہ نہیں بچی تھی۔

برطانوی خبر رساں ادارے ‘رائٹرز’ کی رپورٹ کے مطابق روسی سفارت خانے کا یہ بیان روس کی سرکاری خبر ایجنسی آر آئی اے نے رپورٹ کیا۔

رپورٹ کے مطابق کابل میں روسی سفارت خانے کے ترجمان نکیتا ایشینکو نے کہا کہ ‘جہاں تک افغانستان کی (جانے والی) حکومت کے خاتمے کی بات ہے تو یہ اشرف غنی کے افغانستان چھوڑ کر جانے کے طریقے سے بہت زیادہ واضح ہے’۔

ترجمان نے کہا کہ ‘4 گاڑیاں پیسوں سے بھری ہوئی تھیں، انہوں نے رقم کا ایک حصہ ہیلی کاپٹر میں رکھا لیکن وہاں جگہ نہیں بچی تھی اور وہ باقی رقم وہیں چھوڑ گئے’۔

روسی سفارت خانے کے ترجمان نکیتا ایشینکو نے رائٹرز کو اس بیان کی تصدیق کی اور کہا کہ انہیں یہ اطلاع ’عینی شاہدین‘ نے دی۔

تاہم برطانوی خبررساں ادارہ رائٹرز، فوری طور پر اور آزادانہ اس دعوے کی تصدیق نہیں کرسکا۔

قبل ازیں روس کے صدر ولادیمیر پیوٹن کے نمائندہ خصوصی برائے افغانستان زمیر کابولو نے کہا تھا کہ ‘یہ واضح نہیں ہے کہ ملک چھوڑ کر جانے والی افغان حکومت پیچھے کتنی رقم چھوڑ کر گئی ہوگی’۔

انہوں نے ماسکو کے ایکو موسکوری ریڈیو اسٹیشن کو بتایا کہ ‘مجھے امید ہے کہ افغان حکومت بجٹ، ریاستی بجٹ کا سارا پیسہ لے کر نہیں گئی ہوگی، اگر کچھ چھوڑ گئے ہوں گے تو وہ بجٹ کی بنیاد بنے گا’۔

افغانستان کے صدر اشرف غنی، جن سے متعلق کچھ معلوم نہیں کہ وہ کہاں ہیں، انہوں نے طالبان سے شکست تسلیم کرتے ہوئے کہا تھا کہ وہ ‘خون ریزی سے بچنے’ کے لیے ملک چھوڑ گئے کیونکہ طالبان دارالحکومت کابل میں داخل ہوگئے تھے۔

خیال رہے کہ روس نے کہا کہ وہ کابل میں سفارتی موجودگی برقرار رکھے گا اور طالبان کے ساتھ تعلقات استوار کرنے کی امید رکھتا ہے.

روس کا کہنا تھا کہ انہیں طالبان کو ملک کے حکمرانوں کے طور پر تسلیم کرنے میں کوئی جلدی نہیں ہے اور وہ ان کے رویے کا باریک بینی سے مشاہدہ کریں گے۔

تاجکستان نے افغان صدر اشرف غنی کے طیارے کے ملکی فضائی حدود میں آنے اور اترنے کی تردید کردی۔

گزشتہ روز طالبان کی جانب سے دارالحکومت کابل کے گھیراؤ پر افغان صدر اشرف غنی ملک سے فرار ہوگئے تھے اور رپورٹس میں دعویٰ کیا گیا تھاکہ وہ تاجکستان کے دارالحکومت دوشنبے چلے گئے ہیں۔

تاہم اب تاجکستان کی وزرات خارجہ کا کہنا ہے کہ اشرف غنی کا طیارہ تاجکستان نہیں آیا۔

تاجک وزارت خارجہ کا تردید کرتے ہوئے کہنا تھا کہ اشرف غنی کا طیارہ تاجک فضائی حدود میں آیا نہ تاجکستان میں اترا اور نہ ہی دوشنبے کو اشرف غنی کے معاملے پر کوئی درخواست ملی ہے۔

دوسری جانب میڈیا رپورٹس میں دعویٰ کیا گیا ہے کہ افغان صدر کے طیارے کو تاجکستان میں اترنے کی اجازت نہیں ملی جس کے بعد وہ خلیجی ریاست عمان چلے گئے ہیں جہاں سے ان کے امریکا جانے کا امکان ہے۔

تاہم اب تک اس بات کی تصدیق نہیں ہوسکی ہے کہ افغان صدر اس وقت کس ملک میں موجود ہیں۔

ملائیشیا کے وزیراعظم اور ان کی حکومت نے صرف 17 ماہ اقتدار میں رہنے کے بعد استعفیٰ دے دیا جس کی وجہ سے ملک میں تازہ سیاسی انتشار دیکھا جارہا ہے، جو سنگین کورونا وائرس کے پھیلاؤ سے پہلے ہی لڑ رہا ہے۔

غیر ملکی خبر رساں ادارے اے ایف پی کی رپورٹ کے مطابق محی الدین یٰسین کی انتظامیہ کا ہنگامہ خیز دور اس وقت ختم ہوا جب اتحادیوں نے حمایت واپس لے لی اور ان کے اقتدار میں رہنے کی آخری کوشش ناکام ہو گئی اور وہ ملائیشیا کی تاریخ میں سب سے کم مدت کے لیے بننے والے پہلے وزیر اعظم بن گئے۔

کابینہ کے اجلاس کے بعد 74 سالہ محی الدین یٰسین ملائیشیا کے بادشاہ کو اپنا استعفیٰ پیش کرنے کے لیے ان کے محل کی طرف روانہ ہوئے۔

وزیر سائنس خیری جمال الدین نے انسٹاگرام پر تصدیق کی کہ پوری کابینہ نے استعفیٰ دے دیا ہے۔

انہوں نے لکھا کہ ‘ایک مرتبہ پھر قوم کی خدمت کرنے کا موقع دینے کے لیے آپ سب کا بہت شکریہ’۔

وزیراعظم کے دفتر کے ایک وزیر محمد ردزوان یوسف نے اے ایف پی کو تصدیق کی کہ محی الدین یٰسین مستعفی ہوگئے اور ان کا استعفیٰ منظور کر لیا گیا ہے۔

محی الدین کے بعد کوئی دوسرا وزیر اعظم نہیں ہے تاہم انتخابات کا امکان نظر نہیں آرہا ہے کیونکہ ملک کو کووڈ 19 کی بدترین لہر اور معاشی بدحالی کا سامنا ہے۔

تاہم ایک نیا اتحاد بننے سے قبل پارلیمنٹ میں اکثریت حاصل کرنے کے لیے سیاسی ہارس ٹریڈنگ متوقع ہے۔

سنگاپور انسٹی ٹیوٹ آف انٹرنیشنل افیئرز کے تجزیہ کار اوہ ای سن نے کہا کہ ‘ان کی جگہ کوئی بھی ہوسکتا ہے’۔

ملائیشیا کا آئینی بادشاہ باضابطہ طور پر وزیر اعظم کا تقرر کرتا ہے اور یہ اس پر منحصر ہوگا کہ وہ اس بات کا اندازہ کرے کہ ارکان پارلیمنٹ کی طرف سے کس کو زیادہ حمایت حاصل ہے۔

واضح رہے کہ محی الدین گزشتہ سال مارچ میں انتخابات کے بغیر ایک اسکینڈل میں مبتلا اتحاد کے سربراہ کے طور پر اقتدار میں آئے تھے، ان سے قبل ملک میں اصلاح پسند حکومت کا خاتمہ ہوا تھا جو دو سال سے اقتدار سنبھالے ہوئے تھی۔

تاہم ان کی حکومت کو پہلے دن سے ہی ہنگامہ آرائی کا سامنا کرنا پڑا تھا، پارلیمنٹ میں ان کی اکثریت شکوک و شبہات میں تھی اور اس کی قانونی حیثیت پر مسلسل سوالات اٹھ رہے تھے اور انہیں اپوزیشن کے سربراہ انور ابراہیم کی جانب سے مسلسل چیلنجز کا سامنا تھا۔

ہیٹی میں 7.2 شدت کے زلزلے کے نتیجے میں ہلاکتوں کی تعداد بڑھ کر ایک ہزار 297 ہوگئی۔

غیر ملکی خبر رساں ادارے ایسوسی ایٹڈ پریس (اے پی) کی رپورٹ کے مطابق زلزلے کا مرکز دارالحکومت سے تقریباً 150 کلومیٹر مغرب میں 10 کلومیٹر کی گہرائی میں تھا۔

یہ زلزلہ اس قدر شدید تھا کہ اس کے جھٹکے کیوبا اور جمائکا میں بھی محسوس کیے گئے۔

ہیٹی کے سول پروٹیکشن ادارے نے کہا کہ زلزلے سے 5700 افراد زخمی بھی ہوئے ہیں جن کا علاج جاری ہے۔

یہ تباہی مزید بڑھ سکتی ہے کیونکہ ٹراپیکل ڈپریشن گریس کے پیر کی رات کو ہیٹی سے ٹکرانے کی پیش گوئی کی گئی ہے۔

امریکی نیشنل ہریکین سینٹر نے خبردار کیا کہ جہاں اتوار کے روز ٹراپیکل طوفان کی قوت میں کمی آئی ہے وہیں اس کے باوجود تیز بارش، سیلاب اور لینڈ سلائیڈنگ کا خطرہ ہے۔

جنوبی شہروں لیس کیز اور جیرمی کو آپس میں ملانے والی قومی شاہراہ سیون میں لینڈ سلائیڈنگ کے باعث بند ہوگئی جس کی بحالی کے لیے امدادی کارروائیاں جاری ہیں۔

زلزلے سے متاثرہ علاقے میں پھیلے مناظر میں خاندانوں نے اپنے چند سامان کے ساتھ رات کھلی فضا میں فٹبال کے میدان میں گزاری۔

اتوار کے روز لوگ کیلے، ایووکاڈو اور پانی سمیت جو کچھ دستیاب تھا اسے خریدنے کے لیے قطار میں کھڑے تھے۔

شہر میں چند لوگوں نے زلزلے سے بچنے پر خدا کا شکر ادا کیا اور بہت سے لوگوں نے عبادت گاہوں کا رخ کیا۔

جوہانے ڈورسلی، جن کا گھر مکمل تباہ ہوگیا تھا، کا کہنا تھا کہ ‘ہمارے پاس اب صرف خدا ہے، اگر یہ بھی نہ ہوتا تو میں آج یہاں نہیں ہوتا’۔

واضح رہے کہ ہیٹی کے وزیراعظم ایریل ہینری نے پورے ملک میں ایمرجنسی نافذ کرتے ہوئے متاثرہ علاقوں اور ہسپتالوں کا دورہ کیا۔

صحافیوں سے گفتگو کرتے ہوئے ان کا کہنا تھا کہ ‘نیشنل ایمرجنسی سینٹر کی سطح پر وزرا نے ہم آہنگی کے ساتھ کام کا آغاز کردیا ہے، ہم متاثرین کے دوبارہ شروع کرنے کی ان کی صلاحیت کو سلام پیش کرتے ہیں، اپنے مشاہدات سے میں یہ نتیجہ اخذ کرتا ہوں کہ ہیٹی کی عوام جینا اور ترقی کرنا چاہتے ہیں’۔

ان کا کہنا تھا کہ ‘ہمیں متحد ہوکر ان لوگوں کو ترقی کے لیے سازگار ماحول فراہم کرنا چاہیے’۔

یونیسیف کے ایگزیکٹو ڈائریکٹر ہینریٹا فور نے کہا کہ انسانی ضروریات بہت زیادہ ہیں، ہیٹی کی عوام کو فوری طور پر صحت کی دیکھ بھال، صاف پانی اور پناہ گاہ کی ضرورت ہے۔

انہوں نے کہا کہ جو بچے والدین سے الگ ہو چکے ہیں انہیں تحفظ کی ضرورت ہے۔

خطے بھر سے صحت ورکرز مدد کے لیے پریشان ہیں کیونکہ لیس کیز کے ہسپتالوں میں سرجری کرنے کے لیے جگہ ختم ہونے لگی ہے۔

نان پرافٹ بین الاقوامی صحت ادارے کے ایک ماہر امراض اطفال ڈاکٹر انوبرٹ پیئر نے کہا کہ ‘بنیادی طور پر انہیں ہر چیز کی ضرورت ہے’۔

انہوں نے مزید کہا کہ ‘بہت سے مریضوں کے کھلے زخم ہیں اور وہ صاف ستھرے بھی نہیں جس کی وجہ سے ہمیں طرح طرح کے انفیکشنز کا سامنا ہوسکتا ہے’۔

امریکی صدر جو بائیڈن نے ہیٹی کی مدد کے لیے امریکی اقدامات کی نگرانی کے لیے امریکی امداد کی ایڈمنسٹریٹر سمنتھا پاور کو تعینات کردیا۔

انہوں نے اعلان کیا کہ یو ایس ایڈ، ہیٹی کی حکومت کی درخواست پر ورجینیا سے سرچ اینڈ ریسکیو ٹیم بھیج رہی ہے، 65 افراد کی ٹیم خصوصی آلات اور طبی سامان سے لیس ہوگی۔

یو ایس ایڈ کے ساتھ کام کرنے والے یو ایس کوسٹ گارڈ نے کہا کہ ایک ہیلی کاپٹر طبی عملے کو ہیٹی کے دارالحکومت سے زلزلے سے متاثرہ علاقے میں لے کر جا رہا ہے اور واپسی پر زخمیوں کو پورٹ او پرنس لے کر آرہا ہے۔

ترجمان لیفٹیننٹ کمانڈر جیسن نیمن نے کہا کہ ایک اور ہیلی کاپٹر بہاماس سے بھیجا جا رہا ہے جس کے ساتھ ساتھ دیگر طیارے اور کشتیاں بھی بھیجی جارہی ہیں۔

خیال رہے کہ یہ زلزلہ ایک ایسے موقع پر آیا ہے جب ایک ماہ قبل ہی ملک کے صدر جووینل موئز کو قتل کردیا گیا تھا جبکہ غربت کا شکار ملک کو معاشی مسائل کے ساتھ ساتھ کووڈ-19 کے بحران سے نمٹنے کا چیلنج بھی درپیش ہے۔

اس سے قبل ملک میں 2018 میں 5.9 شدت کا زلزلہ آیا تھا جس میں ایک درجن سے زائد افراد ہلاک ہو گئے تھے لیکن 2010 میں ملک میں آنے والے تباہ کن زلزلے کے نتیجے میں 2 لاکھ افراد لقمہ اجل بن گئے تھے۔

اس زلزلے کے بعد ملک کا انفرا اسٹرکچر بری طرح متاثر ہوا تھا اور وہ اب تک اس زلزلے کے اثرات سے نہیں نکل سکا جبکہ لاکھوں افراد بے گھر بھی ہو گئے تھے۔

افغان حکومتی عہدیداروں کے فرار کے بعد صدارتی محل کا کنٹرول طالبان نے سنبھال لیا اور اعلان کیا ہے کہ افغانستان میں جنگ ختم ہوچکی ہے۔

خبر رساں اداروں کی رپورٹ کے مطابق اتوار کے روز کابل میں تیز ترین پیش رفت، خوف اور افراتفری کا ماحول رہا، جس کے بعد بالآخر رات گئے بھاری ہتھیاروں سے مسلح جنگجوؤں نے خالی صدارتی محل کا کنٹرول سنبھال لیا۔

اس دوران مغربی ممالک اپنے شہریوں کو افغانستان سے نکالنے میں مصروف رہے جبکہ سیکڑوں افغان شہری بھی ملک چھوڑنے کے لیے کابل ایئر پورٹ پہنچے۔

ایک آن لائن ویڈیو طالبان کے شریک بانی ملا عبدالغنی برادر نے بھی فتح کا اعلان کیا۔

ان کا کہنا تھا کہ ‘اب یہ امتحان اور ثابت کرنے کا وقت ہے، اب ہمیں یہ دکھانا ہے کہ ہم اپنی قوم کی خدمت کرسکتے ہیں اور آرام دہ زندگی اور تحفظ یقینی بناسکتے ہیں’۔

طالبان کے سیاسی دفتر کے ترجمان محمد نعیم نے قطری نشریاتی ادارے الجزیرہ سے بات کرتے ہوئے بتایا کہ گروہ تنہائی میں نہیں رہنا چاہتا اور افغانستان کی نئی حکومت کی شکل جلد واضح ہوگی۔

ساتھ ہی محمد نعیم نے پر امن بین الاقوامی تعلقات رکھنے پر بھی زور دیا اور کہا کہ ’خدا کا شکر ہے کہ ملک میں جنگ ختم ہوچکی ہے‘۔

طالبان رہنما کا کہنا تھا کہ ’ہم جو حاصل کرنا چاہ رہے تھے اس تک پہنچ گئے جو ہمارے ملک اور عوام کی آزادی ہے’۔

انہوں نے اس بات کا اعادہ کیا کہ ہم اپنی سرزمین کو کسی کے خلاف استعمال نہیں ہونے دیں گے اور نہ ہی دوسروں کو نقصان پہنچائیں گے۔

خیال رہے کہ عسکریت پسند مزاحمت کے بغیر جلال آباد فتح کرنے کے بعد افغانستان کے دارالحکومت کابل میں داخل ہوگئے تھے جہاں ان کے اقتدار کی پر امن منتقلی کے لیے افغان رہنما سے بات چیت بھی ہوئی۔

ایک طالبان رہنما نے خبر رساں ادارے رائٹرز سے بات کرتے ہوئے بتایا کہ مختلف صوبوں سے جنگجو دوبارہ منظم ہورہے ہیں اور نیا حکومتی ڈھانچہ تشکیل دینے سے قبل غیر ملکی افواج کے ملک سے جانے کا انتظار کیا جائے گا۔

شناخت نہ ظاہر کرنے کی شرط پر طالبان رہنما کا کہنا تھا کہ جنگجوؤں کو ہدایت کی گئی ہے کہ افغان عوام کو روزمرہ کے امور انجام دینے کی اجازت دی جائے اور ایسا کچھ نہ کیا جائے جس سے شہری خوفزدہ ہوں۔

ان کا مزید کہنا تھا کہ ’میں فی الحال یہی کہہ سکتا ہوں کہ معمول کی زندگی کہیں بہتر طریقے سے جاری رہے گی‘۔

طالبان نے شہریوں سے ہتھیار اکٹھے کرنا شروع کردیے
طالبان جنگجووں نے افغان دارالحکومت میں شہریوں سے ہتھیار اکٹھے کرنے شروع کردیے کیوں کہ طالبان عہدیدار کے مطابق اب انہیں اپنے حفاظت کے لیے ان کی ضرورت نہیں۔

عہدیدار نے رائٹرز سے گفتگو کرتے ہوئے بتایا کہ ‘ہم سمجھ سکتے ہیں کہ لوگ اپنی حفاظت کے لیے ہتھیار رکھتے ہی لیکن انہیں محفوظ تصور کرنا چاہیے، ہم یہاں شہریوں کو نقصان پہنچانے نے لیے نہیں ہیں۔

ایک میڈیا کمپنی کے عہدیدار نے ٹوئٹ میں بتایا کہ طالبان جنگجو ان کی کمپنی میں آئے اور سیکیورٹی ٹیم کے پاس موجود ہتھیاروں کے بارے میں پوچھ گچھ کی۔

مغربی ممالک کی اپنے شہریوں، افغانوں کے انخلا کیلئے کوششیں تیز
نیٹو اتحادی جو امریکی صدر کی جانب سے اپنی افواج کے 31 اگست تک انخلا کے اعلان کے بعد اپنی افواج وطن واپس بلا چکے تھے اب شہریوں کو نکالنے کے لیے فوجی اہلکاروں کو واپس بھیج رہے ہیں۔

کچھ نے شکایت کی کہ امریکا ان افغان شہریوں کو تیزی سے واپس لانے میں ناکام ہورہا ہے جو ماضی میں امریکیوں اور نیٹو افواج کے ساتھ کام کرنے کی وجہ سے طالبان کی جانب سے انتقامی کارروائی کے خطرے میں گھرے ہیں۔

امریکی ایئرفورس کے ایک سابق اہلکار سیم لیرمین کا کہنا تھا کہ ’یہ نااہلی سے ہونے والا قتل ہے‘ وہ افغانستان کی بگرام ایئربیس پر ایک دہائی تک نیٹو اور امریکی فورسز کی حفاظت کرنے والے ایک افغان کانٹریٹکٹر کو وہاں سے نکالنے کے لیے سخت کوشش کررہے ہیں۔

ادھر امریکی انتظامیہ کو ملک میں انخلا کے انتظامات پر سخت تنقید کا سامنا ہے۔

امریکی محکمہ دفاع اور اسٹیٹ ڈپارٹمنٹ کی جانب سے جاری ایک مشترکہ بیان میں ہزاروں امریکیوں، سفارتخانے کے مقامی عملے اور دیگر باالخصوص ’خطرے کا شکار افغان شہریوں‘ کو ملک سے نکالنے کا وعدہ کیا گیا۔

بیان میں مزید تفصیلات نہیں بتائی گئیں تاہم اہم عہدوں پر فائز افغان خواتین، صحافی اور مغربی حکومتوں، این جی اوز کے ساتھ کام کرنے والے افغان شہری ان میں شامل ہیں جنہیں طالبان کی جانب سے نشانہ بنائے جانے کا خدشہ ہے۔

بیان میں اعتراف کیا کہ امریکا کو ان افغان شہریوں کو ملک سے نکالنے میں مشکلات کا سامنا ہے اور صرف یقین دہانی کروائی گئی ہم دیگر ممالک ڈھونڈیں گے کہ ان میں سے کچھ افغانوں کو وہاں پہنچایا جائے۔

دوسری جانب امریکی ڈپارٹمنٹ آف اسٹیٹ کے ترجمان کا کہنا تھا کہ کابل کے سفارتخانے سے عملے کا انخلا مکمل کرلیا گیا ہے۔

نیڈ پرائس نے ایک بیان میں کہا تھا کہ ’ہم تصدیق کرسکتے ہیں کہ تمام سفارتی اہلکاروں کا محفوظ انخلا مکمل ہوچکا ہے، سفارت خانے کے تمام اہلکار حامد کرزئی بین الاقوامی ہوائی اڈے کے احاطے میں ہیں جسے امریکی فوج نے محفوظ بنایا ہوا ہے۔

طالبان کی پیش قدمی
واضح رہے کہ افغانستان میں امریکا نے 2001 میں پہلی مرتبہ طالبان حکومت کے خلاف حملے شروع کیے تھے، جو نائن الیون حملوں کا نتیجہ تھا۔

تاہم 2 دہائیوں سے جاری جنگ کے خاتمے کے لیے امریکا نے طالبان کے ساتھ مذاکرات کے بعد گزشتہ برس فروری کو امن معاہدہ کیا تھا جس کی رو سے غیر ملکی افواج کے انخلا اور افغان حکومت کی طالبان کے ساتھ بات چیت پر اتفاق ہوا تھا۔

افغانستان میں جاری لڑائی میں رواں برس مئی سے ڈرامائی تبدیلی آئی جب امریکا کی سربراہی میں افغانستان میں موجود غیر ملکی افواج کے انخلا کی تاریخ کا اعلان کیا گیا تھا اور رواں مہینے کے اختتام سے قبل انخلا مکمل ہوجائے گا۔

جس کے پیشِ نظر طالبان کی جانب سے پہلے اہم سرحدی علاقوں پر قبضہ کیا گیا اور پھر برق رفتاری سے صوبائی دارالحکومتوں پر قبضہ کرتے چلے گئے۔

چند روز قبل ایک امریکی رپورٹ میں پیش گوئی کی گئی تھی کہ طالبان 90 روز میں کابل پر قبضہ کرسکتے ہیں تاہم طالبان کے برق رفتار پیش قدمی کے ساتھ کابل پر قبضے نے تمام اندازے غلط ثابت کردیے۔

اسلام آباد: افغانستان کی بدلتی ہوئی صورتحال سے متعلق قومی سلامتی کمیٹی کا اجلاس منعقد ہوا جس میں کہا گیا کہ افغان گروہ یقینی بنائیں کہ افغانستان کی سرزمین پاکستان سمیت کسی بھی ملک کے خلاف استعمال نہ ہو۔

سرکاری اعلامیے کے مطابق وزیراعظم عمران خان کی سربراہی میں قومی سلامتی کمیٹی کا اجلاس منعقد ہوا جس میں وزیر خارجہ شاہ محمود قریشی، آرمی چیف جنرل قمر جاوید باجوہ، وزیر داخلہ شیخ رشید، وزیر دفاع پرویز خٹک، وزیر خزانہ شوکت ترین سمیت دیگر اہم وزرا اور اعلیٰ عسکری حکام نے شرکت کی۔

اجلاس کے حوالے سے سرکاری اعلامیہ جاری کردیا گیا جس کے مطابق اجلاس میں افغانستان کی صورت حال اور اس کے تناظر میں پاکستان پر پڑنے والے اثرات کا جائزہ لیا گیا اور آئندہ کی حکمت عملی پر غور کیا گیا۔
کمیٹی نے کہا کہ پاکستان تمام افغان گروہوں کی نمائندگی کے ساتھ ایک جامع سیاسی تصفیے کے لیے پرعزم ہے، افغانستان میں تمام فریقوں سے مطالبہ کرتے ہیں کہ وہ قانون کی حکمرانی کا احترام کریں، تمام پارٹیز افغانوں کے بنیادی انسانی حقوق کا تحفظ کریں۔

اعلامیے کے مطابق شرکا نے کہا کہ تمام جماعتیں اس بات کو یقینی بنائیں کہ افغان سرزمین کسی دہشت گرد تنظیم یا گروہ کسی ملک کے خلاف استعمال نہ ہو، سابق امریکی انتظامیہ کی فوجوں کے انخلا کے فیصلے کی بائیڈن انتظامیہ کی توثیق درحقیقت تنازع کا منطقی نتیجہ ہے۔

اعلامیے میں کہا گیا کہ پاکستان اپنے ہمسائے ملک سے امن چاہتا ہے، پاکستان کئی دہائیوں سے افغانستان میں جاری تنازعات سے متاثر رہا ہے، پاکستان افغان مسئلے کے جامع سیاسی حل کے لیے پرعزم ہے۔

اجلاس میں خطے کی مجموعی صورتحال کا بھی جائزہ لیا گیا اور شرکا نے کہا کہ عالمی برادری کو چار دہائیوں سے دی جانے والی قربانیوں کا بھی اعتراف کرنا چاہیے، امریکا اور نیٹو کی موجودگی میں افغان مسئلے کا بہترین حل نکالا جا سکتا تھا، پاکستان عالمی برادری کے ساتھ تعاون اور کام جاری رکھے گا۔ وزیراعظم نے پاکستانی سفارت خانے اور ریاستی مشینری کی جاری کوششوں کو سراہا۔

کمیٹی نے کہا کہ افغانستان کے تنازعے کا کبھی فوجی حل نہیں رہا، مذاکرات کے ذریعے مسئلے کا حل اس وقت ممکن تھا جب امریکی اور نیٹو افواج زیادہ تعداد میں افغانستان میں موجود تھیں، غیرملکی فوجی موجودگی کو طویل عرصے تک جاری رکھنے سے کوئی مختلف نتیجہ برآمد نہیں ہوتا، وقت آ گیا ہے کہ عالمی برادری خطے کے طویل مدتی امن، سلامتی اور ترقی کے لیے جامع سیاسی تصفیے کو یقینی بنانے کے لیے مل کر کام کرے۔

قومی سلامتی کمیٹی نے کہا کہ پاکستان عالمی برادری اور افغان اسٹیک ہولڈرز کے ساتھ مل کر ایک جامع سیاسی تصفیے کے لیے کام جاری رکھے گا، افغانستان میں عدم مداخلت کے اصول پر قائم رہنا چاہیے۔

اجلاس کے دوران وزیراعظم نے ہدایات جاری کیں کہ افغانستان چھوڑنے والے تمام سفارت کاروں، صحافیوں اور عالمی اداروں کے عملے کو تمام ممکنہ سہولیات فراہم کی جائیں۔

چین نے طالبان کی جانب سے کابل پر قبضے کے بعد اپنے بیان میں کہا ہے کہ وہ افغانستان کے ساتھ ‘دوستانہ اور تعاون’ کے تعلقات مضبوط کرنے کے لیے تیار ہے۔

خبر ایجنسی اے ایف پی کی رپورٹ کے مطابق چین کی حکومت کے ترجمان نے اپنے بیان میں کہا کہ افغانستان کے ساتھ جاری تعلقات کو مضبوط کرنے کے لیے تیار ہیں۔

رپورٹ میں کہا گیا ہے کہ افغانستان سے امریکی فوج کے انخلا کے دوران چین نے طالبان کے ساتھ غیر سرکاری طور پر تعلقات استوار کر لیے تھے اور اب طالبان، کابل پر قبضہ کر چکے ہیں۔

چین اور افغانستان کے درمیان 76 کلومیٹر طویل سرحد بھی ملتی ہے اور چین کو سرحدی خطے سنکیانگ میں ایغور مسلم اقلیت کے حوالے سے افغانستان کے خطرہ بننے کا خدشہ بھی رہا ہے۔

طالبان کے وفد نے گزشتہ ماہ چین کا دورہ کیا تھا اور وزیر خارجہ وانگ یی سے ملاقات کی تھی اور واضح کیا تھا کہ افغانستان کی سرزمین انتہاپسندوں کے استعمال کے لیے مرکز نہیں ہوگی۔

چین نے جواب میں معاشی اور افغانستان میں ترقی کے لیے سرمایہ کاری کی پیش کش کی تھی۔

چین نے طالبان کے کابل کا کنٹرول حاصل کرنے کے بعد آج اپنے بیان میں کہا کہ ہم افغانستان کے ساتھ تعلقات مضبوط کرنے کے موقع کا ‘خیر مقدم’ کرتے ہیں، ایک ایسا ملک جو نسلوں سے بڑے سپر پاورز کے لیے جیو اسٹریٹجک اہمیت کا حامل رہا ہے۔

چین کی وزارت خارجہ کی ترجمان ہووا چونینگ نے صحافیوں سے کہا کہ ‘طالبان مسلسل اپنی اُمیدوں کا اظہار کرتے رہے ہیں کہ چین کے ساتھ اچھے تعلقات قائم ہوں اور وہ افغانستان میں بحالی اور ترقی میں چین کی شراکت داری کے خواہاں ہیں’۔

انہوں نے کہا کہ ‘ہم اس کا خیرمقدم کرتے ہیں، چین افغانستان کے شہریوں کے حق کا احترام کرتا ہے کہ وہ اپنی منزل کا آزادانہ طور پر تعین کریں اور ہم چاہتے ہیں کہ افغانستان کے ساتھ دوستانہ اور تعاون کے تعلقات بدستور پنپتے رہیں’۔

چینی ترجمان نے طالبان سے مطالبہ کیا کہ ‘پرامن انتقال’ اقتدار یقینی بنائیں اور ایک ‘واضح اور اسلامی حکومت’ کی تشکیل کے وعدے کی پاسداری کریں، افغانستان اور غیر ملکی شہریوں کی سلامتی یقینی بنائیں۔

انہوں نے کہا کہ کابل میں چین کا سفارت خارنہ بدستور فعال ہے تاہم بیجنگ نے ایک ماہ قبل ہی خراب ہوتے حالات کے پیش نظر اپنے شہریوں کو وہاں سے نکالنا شروع کر دیا تھا۔

چین کے سفارت خانے سے جاری ایک بیان میں کہا گیا کہ افغانستان میں موجود چین کے شہری سیکیورٹی کے حالات پر توجہ مرکوز رکھیں اور گھروں کے اندر ہی رہیں۔

یاد رہے کہ امریکی صدر جوبائیڈن نے رواں برس کے اوائل میں کہا تھا کہ افغانستان سے 11 ستمبر تک مکمل فوجی انخلا ہوگا، جس کو دو دہائیوں سے جاری جنگ کے خاتمے کا پیش خیمہ قرار دیا گیا تھا۔

امریکا کو اس وقت حیرانی کا سامنا کرنا پڑا جب افغان حکومت کا اثر و رسوخ ملک بھر میں کم ہونے لگا اور طالبان پے در پے فتوحات حاصل کرنے لگے۔

چین اس فیصلے پر مسلسل تنقید کرتا رہا کہ جلد بازی میں کیا گیا امریکی انخلا کا فیصلہ قیادت کی ناکامی کا ثبوت ہے۔

افغان طالبان کے سیاسی ونگ کے سربراہ ملا عبدالغنی برادر اخوند نے کہا ہے طالبان کو جس طرح کامیابی ملی اس کا گمان بھی نہ تھا۔

افغان طالبان کے سیاسی دفتر کے ترجمان محمد نعیم کے ٹوئٹر اکاؤنٹ پر ملا عبدالغنی برادر کا ویڈیو پیغام جاری کیا گیا ہے۔

ملا عبدالغنی برادر نے کہا کہ اصل امتحان اب شروع ہوا ہے، افغان عوام کی زندگی کی بہتری کے لیےہر ممکن حدتک کام کریں گے۔

انہوں نے کہا کہ طالبان کو اب افغان قوم کی خدمت کرنی ہے، تحفظ فراہم کرنا ہے اور یقینی بنانا ہے، افغانوں کی زندگی اور مستقبل بہتر بنایا جاسکے۔

ملاعبدالغنی برادر نے افغان قوم بالخصوص کابل کےعوام، مجاہدین کو فتح کی مبارکباد پیش کی اور کہا اللہ تعالیٰ کی مدد سے یہ فتح ملی، ایسا دنیا کی تاریخ میں کبھی نہیں ہوا۔

افغانستان کے دارالحکومت کابل پر طالبان کے کنٹرول حاصل کرنے کے بعد حامد کرزئی ایئرپورٹ پر ملک سے باہر جانے کے خواہشمند افغان شہریوں کا جم غفیر لگ گیا جبکہ اس موقع پر افراتفری اور زبردستی طیارے پر سوار ہونے کی کوشش میں 5 افراد ہلاک بھی ہوگئے۔

خبر رساں ادارے رائٹرز کی رپورٹ کے مطابق سیکڑوں افراد نے زبردستی طیاروں میں سوار ہونے کی کوشش کی جس کے بعد کم از کم 5 افراد ہلاک ہوگئے۔

واقعے کے حوالے سے ابتدائی میڈیا رپورٹس میں بتایا گیا تھا کہ مذکورہ ہلاکتیں مبینہ طور پر کابل ایئر پورٹ پر موجود امریکی فورسز کی جانب سے کی جانے والی ہوائی فائرنگ کے نتیجے میں ہوئیں، جو ہجوم کو پُرسکون کرنا چاہتے تھے جو افرا تفری کا شکار تھا۔

ایک امریکی عہدیدار کا کہنا تھا کہ البتہ امریکی سفارتی اہلکاروں اور عملے کو لے جانے کے لیے آنے والی فوجی پرواز میں زبردستی داخل ہونے کی کوشش کرنے والے افغان شہریوں کو منتشر کرنے کے لیے فوجیوں نے ہوائی فائر کیے تھے۔

20 گھنٹوں سے پرواز کے منتظر ایک عینی شاہد کا کہنا تھا کہ یہ واضح نہیں کہ ان افراد کی ہلاکت گولی لگنے سے ہوئی یا بھگدڑ سے اور ایئرپورٹ پر موجود امریکی عہدیدار بھی اس پر بیان دینے کے لیے دستیاب نہیں ہوئے۔

سوشل میڈیا پر وائرل ہونے والی ویڈیو میں 3 لاشوں کو ایئرپرٹ کے احاطے میں دیکھا جاسکتا ہے جبکہ ایک عینی شاہد کا کہنا تھا کہ انہوں نے 5 لاشیں دیکھی ہیں۔

بعد ازاں برطانوی نشریاتی ادارے بی بی سی کی رپورٹ میں افغان خبر رساں ادارے آسواکا کے حوالے سے بتایا گیا کہ کابل ایئر پورٹ پر ہلاک ہونے والوں میں 3 ایسے افراد بھی شامل ہیں جو طیارے پر لٹک کر بیرون ملک سفر کے خواہشمند تھے۔

رپورٹ میں افغان میڈیا کے حوالے سے بتایا گیا کہ ہلاک ہونے والے 3 افغان باشندے طیارے کے ٹائروں کے ساتھ لٹکے ہوئے تھے اور طیارے کے فضا میں بلند ہونے کے ساتھ ہی وہ زمین پر آگرے اور ہلاک ہوگئے۔

یاد رہے کہ اس سے قبل مقامی میڈیا پر نشر ہونے والی ایک ویڈیو میں دیکھا جاسکتا ہے کہ سیکڑوں لوگ کابل ایئر پورٹ سے پرواز کے منتظر امریکی سی 17 طیارے کے ساتھ ساتھ بھاگ رہے ہیں اور اس سے لٹکنے کی کوشش کر رہے ہیں۔

اتوار کی رات سے ہی سیکڑوں افغان شہریوں نے ایئرپورٹ کے رن وے پر قبضہ کرلیا تھا اور اپنے سامان سمیت آخری کمرشل پروازوں میں سوار ہونے کی کوششیں کرتے رہے۔

پاکستان جانے کی ایک خواہشمند انسانی حقوق کی رضاکار رخشندہ جلالی نے خبررساں ادارے رائٹرز سے بات کرتے ہوئے کہا کہ ’یہ ہمارا ایئرپورٹ ہے لیکن ہم غیر یقینی میں انتظار کررہے اور سفارتکاروں کو انخلا کرتے ہوئے دیکھ رہے ہیں‘۔

ایئرپورٹ کا انتظام تاحال امریکی فورسز کے پاس ہے جنہوں نے فوجی پرواز میں سوار ہونے کی کوشش کرنے والے افغانوں کو ٹرمک پر جانے سے روکنے کے لیے ہوائی فائر بھی کیے۔

سوشل میڈیا پر وائرل ہونے والی ویڈیو میں دیکھا جاسکتا ہے کہ درجنوں افراد نے طیارے میں سوار ہونے کے لیے اوور ہیڈ روانگی گینگ وے پر چڑھنے کی کوشش کی۔

کمرشل پروازیں معطل
دوسری جانب ایک بیان میں ایئرپورٹ حکام نے کہا کہ حامد کرزئی ایئرپورٹ پر تمام کمرشل پروازوں کا آپریشن معطل کردیا گیا ہے، ساتھ ہی عوام پر زور دیا گیا کہ ایئرپورٹ پر ہجوم نہ لگائیں۔

افغان نشریاتی ادارے طلوع نیوز کی رپورٹ کے مطابق کابل ایئرپورٹ اتوار کی رات سے ہی لوگوں کے جم غفیر کا سامنا کررہا ہے اور ملک سے باہر جانے کی امید میں تقریباً 2 ہزار افراد ایئرپورٹ پر موجود تھے۔

اسی دوران امریکی فورسز کی سہولت کے ساتھ انخلا کی کارروائیاں جاری ہیں۔

خبررساں ادارے اے ایف پی رپورٹ کے مطابق امریکی اسٹیٹ ڈپارٹمنٹ نے اعلان کیا ہے کہ وہ اس صورتحال کو قابو کرنے کے لیے پیر کو اقدامات اٹھائے گا۔