Category انٹرنیشنل

بیجنگ :چین نے کورونا پابندیوں پر جنوبی کوریا کے لیے قلیل مدتی ویزوں کا اجراء معطل کر دیا۔ غیر ملکی خبر رساں ادارے کی مطابق چینی سفارتخانے کی جانب سے جاری ہونے والے بیان میں کہا گیا ہے کورین باشندوں کے لیے شارٹ ٹرم ویزا کا اجراء معطل کیا جا رہا ہے۔ بیان میں کہا گیا ہے کہ چین پر داخلے کی امتیازی پابندیاں ختم ہونے پر ویزا اجراء شروع کر دیا جائے گا۔واضح رہے کہ کچھ روز قبل چین نے 3 سال کی پابندی کے بعد بین الاقوامی مسافروں کے لیے سرحدیں کھولنے کا اعلان کیا تھا۔

لندن : برطانوی شاہی خاندان سے علیحدگی اختیار کرنے والے شہزادہ ہیری کی سوانح حیات’اسپیئر‘ کی مارکیٹ میں فروخت کا آغاز ہوگیا۔ غیر ملکی خبر رساں ادارے کے مطابق ، کئی مہینوں تک جاری رہنے والی تشہیری مہم کے بعد بالآخر شہزادہ ہیری کی سوانح حیات ’اسپیئر‘ ان کے آبائی ملک برطانیہ میں فروخت کے لیے پہنچ گئی ہے، جس سے شاہی خاندان کو مزید شرمندگی کا سامنا کرنا پڑسکتا ہے۔رپورٹ میں بتایا گیا ہے کہ 1992ء میں مصنف اینڈریو مورٹن کے اشتراک سے ہیری کی والدہ شہزادی ڈیانا کی زندگی پر لکھی گئی کتاب ’ڈیانا: ہر ٹرو اسٹوری‘ کے بعد اب شہزادہ ہیری کی زندگی پر لکھی گئی کتاب شاہی خاندان کے کسی بھی فرد کی جانب سے شائع کی جانے والی سب سے بڑی اور مشہور کتاب ہے، جسے فروخت کرنے کے لیے برطانیہ کے کچھ اسٹورز آدھی رات کو ہی کھل گئے۔اس کتاب کے ساتھ برطانیہ اور امریکا کے 4 ٹیلی ویڑنز کو دیے گئے انٹرویوز بھی شامل ہیں جبکہ اس کتاب کی 16 مختلف زبانوں میں آڈیو بْک بھی مارکیٹ میں دستیاب ہوگی۔اپنی یادداشت پر مبنی اس کتاب میں شہزادہ ہیری نے ان چیلنجز کا ذکر کیا ہے جو انہیں بطور رکن شاہی خاندان پیش آتی رہیں۔ان کے مطابق شاہی خاندان میں انہیں اور ان کی اہلیہ میگھن مارکل کو سخت مشکلات کا سامنا کرنا پڑا، جس کے بعد اس شاہی جوڑے نے جنوری 2020ء میں شاہی ذمے داریاں اور اعزازات ترک کر کے امریکا جا کر زندگی کا آغاز کیا۔

ریاض:سعودی عرب میں لیبر اور اقامہ قوانین کی خلاف ورزی پر مزید 14 ہزار 740 تارکین وطن کو گرفتار کرلیا گیا جب کہ مجموعی طور پر 34 ہزار 103 غیر ملکیوں کی ملک بدری کے احکامات جاری کردیے گئے۔ غیر ملکی خبر رساں ادارے کے مطابق وزارت داخلہ کی جانب سے جاری ہونے والے بیان میں کہا گیا ہے کہ سعودی عرب میں ایک ہفتے کے دوران ملک گیر مہم میں 14 ہزار 740 غیر قانونی تارکین وطن کو گرفتار کیا گیا ہے جو مملکت کے اقامتی، محنت اور سرحدی سلامتی کے قوانین کی خلاف ورزی کرنے والوں کے خلاف مسلسل کریک ڈاؤن کا ایک حصے ہے۔ بیان میں کہا گیا ہے کہ 29 دسمبر سے 4 جنوری تک کی گئی گرفتاریوں میں مملکت کے اقامتی نظام کی خلاف ورزی کرنے والے 8 ہزار 058، سرحدی حفاظتی قوانین کی خلاف ورزی کرنے والے 4 ہزار 283 اور دیگر خلاف ورزیوں میں ملوث 2 ہزار 399 افراد شامل ہیں جنہوں نے لیبر ضوابط کی خلاف ورزی کی، حکام نے اسی عرصے کے دوران رہائش، سرحد اور کام کے ضوابط کی خلاف ورزی کرنے والوں کو نقل و حمل، پناہ دینے اور ملازمت دینے میں ملوث 15 مقامی شہریوں کو بھی گرفتار کیا۔ بیان میں کہا گیا ہے کہ مجموعی طور پر 34 ہزار 103 غیر قانونی جن میں 1 ہزار 635 خواتین بھی شامل ہیں، اس وقت ملک بدری کے اقدامات کا شکار ہیں۔

مسقط : خلیجی سلطنت عمان کی سرکاری فضائی کمپنی کو خطے میں سب سے زیادہ وقت کی پابند ایئرلائن قرار دے دیا گیا۔غیر ملکی خبر رساں ادارے کے مطابق عمان کی قومی فضائی کمپنی عمان ایئر وقت کی پابندی کے حوالے سے مشرق وسطیٰ اور افریقہ میں سرفہرست ہے، عالمی ایوی ایشن اینالٹکس لیڈر سیریم کے 2022ء آن ٹائم پرفارمنس ریویو کے نتائج میں ایئر لائن کی بروقت آمد 91.38 فیصد رہی، جو خطے کی دوسری اعلیٰ ترین درجہ بندی والی ایئر لائن سے تقریباً 5 فیصد آگے ہے۔سالانہ سیریم آن ٹائم پرفارمنس ریویو کو ایئر لائن اور ہوائی اڈے کی کارکردگی کے لیے عالمی گولڈ اسٹینڈرڈ سمجھا جاتا ہے، اس کے نتائج حقیقی وقت کی پرواز کی معلومات کے 600 سے زیادہ ذرائع سے جمع کیے گئے ڈیٹا پر مبنی ہیں، یہ وقت پر آنے والی پروازوں کی تعریف کرتا ہے جو مقررہ گیٹ پر پہنچنے کے 15 منٹ کے اندر پہنچتی ہیں۔عمان ایئر کے چیف آپریٹنگ آفیسر کیپٹن ناصر بن احمد السلمی نے کہا کہ 2022ء کے دوران عالمی آپریشنل ماحول چیلنجنگ رہا، بہت سے ہوائی اڈے رکاوٹوں اور وسائل کے چیلنجوں کے ساتھ کورونا کے دیرپا اثرات سے متاثر ہوئے، اس طرح کے پس منظر کے باوجود ہم نے بہترین سروس ریکارڈ کو برقرار رکھا ہے۔انہوں نے کہا کہ دنیا کی سب سے مشہور ایئر لائنز کے خلاف بروقت کارکردگی کے لیے یہ اعزاز حاصل کرنا ہمارے عالمی نیٹ ورک پر عمان ایئر کے تمام عملے کی لگن اور محنت کا منہ بولتا ثبوت ہے، جیسے ہی ہم 2023ء میں داخل ہو رہے ہیں، ہم اپنے مہمانوں کے تجربے کے تمام عناصر وقت کی پابندی سے لے کر سہولت تک اپنی مصنوعات و خدمات اور یقیناً عمانی مہمان نوازی کے تمام عناصر میں عمدگی کو جاری رکھنے کے منتظر ہیں۔بتایا گیا ہے کہ اپنے آپ کو ایک بڑے بین الاقوامی کیریئر کے طور پر برقرار رکھتے ہوئے عمان ایئر نے گزشتہ سال معیار، آرام اور مہمان نوازی کے لیے کئی معیارات قائم کیے، جس نے خود کو ایئر لائن پیسنجر ایکسپریئنس ایسوسی ایشن کے ذریعے 2023ء کیلئے فائیو اسٹار میجر ایئر لائن کی درجہ بندی حاصل کی ہے، تیزی سے بدلتی ہوئی مارکیٹ کے تقاضوں کو پورا کرنے کے لیے ایئر لائن نے اپنی مصنوعات اور خدمات میں بڑھتی ہوئی سرمایہ کاری کی ہے، جس میں مہمانوں کو جدید کیبن ڈیزائن، غیر معمولی مہمان نوازی اور مسقط میں اپنے مرکز سے منزلوں کی بڑھتی ہوئی رینج کی پیشکش کی گئی ہے۔

لندن : برطانوی وزیر اعظم رشی سنک اور ان کی کابینہ کے 15 وزراء کو 2024 میں ہونے والے عام انتخابات وائپ آؤٹ میں اپنی نشستیں کھونے کا خطرہ ہے۔ غیر ملکی خبر رساں ادارے کے مطابق فوکل ڈیٹا پولنگ برائے بیسٹ فار برطانیہ کی جانب سے جاری کی گئی سروے رپورٹ میں کہا گیا ہے کہ سینئر ٹوری شخصیات بشمول وزیر اعظم رشی سنک، نائب وزیر اعظم ڈومینک راب اور ہیلتھ سیکریٹری سٹیو بارکلے سبھی کو 2024 میں متوقع انتخابات میں شکست کا خطرہ ہے۔ رپورٹ کے مطابق سیکریٹری خارجہ جیمز کلیورلی، سیکریٹری دفاع بین والیس، بزنس سیکریٹری گرانٹ شیپس، کامنز لیڈر پینی مورڈانٹ اور سیکرٹری ماحولیات تھریس کوفی بھی اپنی نشستوں سے محروم ہو سکتے ہیں۔پول کے مطابق کابینہ کے صرف پانچ وزراء جیریمی ہنٹ، ہندوستانی نڑاد سویلا بریورمین، مائیکل گو، ندیم زواوی اور کیمی بیڈینوک 2024 کے انتخابات میں اپنی نشستیں بچاپائیں گے

لاگوس: نائیجیریا میں ایک مسلع شخص نے گاڑی کا انتظار کرتے 32 مسافروں کو اسلحے کے زور پر یرغمال بنا کر اغوا کر لیا۔ غیر ملکی خبر رساں ادارے کے مطابق ریاستی گورنر کی ویب سائیٹ کے مطابق ریاست ایڈو کے ٹام ایکیمی ریلوے اسٹیشن پر اے کے 47 سے لیس مسلح شخص نے ریلوے اسیشن پر موجود 32 افراد کو یرغمال بنانے کے بعد اغوا کر لیا ہے۔پولیس کا کہنا ہے کہ چرواہوں کے قبیلے کے ایک شخص نے اسلحے کے زور پر تیل کی پیداوار میں مرکزی حیثیت کے حامل شہر ’واری‘ جانے کیلئے ٹرین کا انتظار کرنے والے 32 مسافروں کو اسلحے کے زور پر اغوا کر لیا ہے جبکہ اسٹیشن پر موجود کچھ لوگوں کو گولیاں لگنے کی بھی اطلاعات ہیں۔ میڈیا رپورٹ کے مطابق واقعہ افریقہ کے سب سے زیادہ آبادی رکھنے والے ملک کے طول اور عرض میں پھیلتے ہوئے عدم تحفظ کے احساس کی ایک تازہ مثال ہے اور اس صورتحال کو ملک میں آئندہ ماہ ہونے والے صدارتی انتخابات کیلئے ایک چیلنج سمجھا جا رہا ہے۔مقامی انتظامیہ کے مطابق مغویوں کی تلاش کیلئے پولیس، فوج اور مقامی باشندوں پر مشتمل ٹیمیں تشکیل دے دی گئی ہیں، امید ہے چند گھنٹوں میں مغویوں کو تلاش کرکے اغواکار کے چنگل سے بازیاب کرالیا جائے گا

واشنگٹن:پاکستانی سفیر مسعود خان نے کہاہے کہ امریکا ،اقوام متحدہ اورعالمی برادری سیلاب کے بعد تعمیر نو کیلئے تعاون کریں ،پاکستان ماحولیاتی تبدیلی کے نتیجے میں بدترین تباہی کے نتائج بھگت رہا ہے۔امریکی میڈیا کو انٹرویو دیتے ہوئے پاکستانی سفیر کا کہنا تھا کہ پاکستان کو عالمی برادری کی فوری مدد کی ضرورت ہے ، ہماری ضرورتیں سنگین ہیں ،غلط فہمی ہے امداد، بحالی کے مراحل ختم ہو چکے وہ ختم نہیں ہوئے۔ مسعود خان نے کہاکہ امریکا کی مدد سے پاکستان جنیوا کانفرنس کے دوران مطلوبہ مالی معاونت حاصل کرلے گا،امید ہے ہم تعمیر نو سے متعلق مالی امداد کے عہد حاصل کرنے میں کامیاب ہونگے ،ان کاکہناتھا کہ اہمیں اگلے 3 سال میں امداد کی ضرورت ہے، ماحولیاتی تبدیلی کا مقابلہ کرنے کا حامل بنیادی ڈھانچہ تعمیر کیا جائے۔ پاکستانی سفیر نے امداد، بحالی کے ابتدائی مرحلے میں فوری ردعمل پر امریکا کا شکریہ اداکرتے ہوئے کہاکہ امریکا سے 3 ضمن میں کردار ادا کرنے کی توقع رکھتے ہیں ،اولاً بحالی اور تعمیر نو کے ضمن امریکا کا براہ راست عطیہ ہے، امید ہے امریکا جنیوا میں ہماری کوششوں میں خاطر خواہ تعاون کا اعلان کریگا

لندن : برطانوی شہزادہ ہیری نے انکشاف کیا ہے کہ ان کی اہلیہ میگھن مارکل سے متعلق ہونے والی بات چیت کے دوران ہوئے جھگڑے میں بڑے بھائی شہزادہ ولیم نے ان کا گریبان پکڑا اور مار پیٹ کی۔غیرملکی خبر رساں ادارے کے مطابق اپنی کتاب میں شہزادہ ہیری نے اس حوالے سے تفصیلات لکھی ہیں جو 10 جنوری کو شائع ہوگی۔ کتاب میں واقعے کا ذکر کرتے ہوئے انہوں نے لکھا کہ شہزادہ ولیم نے میگھن مارکل سے متعلق ہونے والی بحث کے دوران مجھ پر حملہ کیا۔شہزادہ ہیری نے شہزاد ہ ولیم نے میگھن مارکل کو مشکل اور بدتمیز کہتے ہوے کہا ہے کہ جھگڑا اس وقت بڑھ گیا جب ولیم نے ہیری کا گریبان پکڑا۔شہزادہ ہیری نے دعویٰ کیا ہے کہ اس جھگڑے کی چوٹ کے نشان ان کی کمر پر آئے۔

اسلام آباد:پاکستان نے کہا ہے کہ بھارت پاکستان اور مقبوضہ کشمیر میں دہشتگردی میں ملوث ہے ،عالمی برادری مقبوضہ جموں و کشمیر میں بھارتی ریاستی مظالم، انسانی حقوق کی خلاف ورزیوں کا نوٹس لے ، امید ہے کہ عالمی برادری جنیوا کانفرنس میں پاکستان کی مدد کرے گی۔ ہفتہ وار میڈیا بریفنگ دیتے ہوئے ترجمان دفتر خارجہ ممتاز زہرا بلوچ نے کہا کہ موسمیاتی تبدیلی پر عالمی کانفرس جنیوا میں 9 جنوری کو ہوگی جس کی صدارت وزیراعظم شہباز شریف اور اقوام متحدہ کے سیکرٹری جنرل انتویوگریس کریںگے،دونوں رہنما مشترکہ پریس کانفرنس سے بھی خطاب کریں گے ،کانفرس میں موسمیاتی تبدیلی اور پاکستان میں سیلاب کی صورتحال پر بحث ہوگی علاوہ ازیں کانفرنس میں عالمی رہنما، عالمی اقتصادی ادارے اور غیرسرکاری تنظیموں کے نمائندے بھی شریک ہوں گے۔ اس موقع پر امید ہے کہ عالمی برادری پاکستان کی مدد کرے گی۔بھارتی وزیر خارجہ کے پاکستان کے خلاف اشتعال انگیز بیانات پر ترجمان نے کہا کہ بھارتی قیادت کے پاکستان مخالف بیانات اور ہرزہ سرائی کی مذمت کرتے ہیں ،بھارت مقبوضہ جموں و کشمیر اور پاکستان میں دہشتگردی میں ملوث ہے،پاکستان اور بھارت نے یکم جنوری کو جوہری ہتھیاروں اور قیدیوں کی فہرستوں کا تبادلہ کیا ۔عالمی برادری مقبوضہ جموں و کشمیر میں بھارتی ریاستی مظالم، انسانی حقوق کی خلاف ورزیوں کا نوٹس لے ،گزشتہ ہفتے چار معصوم کشمیریوں کا بہیمانہ قتل کیا گیابھارت نے گزشتہ برس 57 زیر حراست قتل سمیت 214 کشمیریوں کو شہید کیا،دستیاب معلومات کے مطابق 4 ہزار سے زیادہ کشمیری بھارت، مقبوضہ کشمیر کی جیلوں میں موجود ہیںمسرت عالم بھاٹ، یاسین ملک،آسیہ اندرابی، شبیر شاہ، خرم شاہ جیسے رہنما جعلی مقدمات میں پابند سلاسل ہیںکل جماعتی حریت کانفرنس کے رہنما الطاف احمد شاہ کا دوران حراست بدنام زمانہ تہاڑ جیل میں انتقال ہوا۔گزشتہ سال 2022ء میں بھارت نے کشمیریوں کو مذہبی آزادی سے بھی محروم کر دیا۔ انہوں نے کہا کہپاکستان مقبوضہ کشمیر کے عوام کی حق خود ارادیت کے حصول کی جدوجہد کی اخلاقی و سفارتی حمایت جاری رکھے گاسیلاب زدگان کے تعاون پر پاکستان عالمی برادری کا شکر گزار ہے ،مختلف ممالک نے پاکستان کی دل کھول کر مدد کی نقد آور اشیاء کی شکل میں عالمی برادری نے کلیدی تعاون فراہم کیا پاکستان کے سیلاب زدہ علاقوں کی تعمیرنو کے لئے جنیوا کانفرس منعقد ہوگی امید ہے عالمی برادری پاکستان کی بھرپور مدد کرے گی تعمیر نو پروگرام کئی سالوں پر محیط ہوگا۔ پاک امریکہ تعلقات پر ترجمان محکمہ خارجہ کا کہنا تھا کہ امریکہ کے ساتھ اقتصادی معاملات سمیت اہم امور پر بات چیت جاری رہتی ہے جبکہمعاشی معاملات پر دوست ممالک اور عالمی مالیاتی اداروں سے بھی رابطوں میں ہیںآرمی چیف کا دورہ سعودیہ عرب دوطرفہ تعلقات کو فروغ دینے کی کڑی ہے جب کہ پاکستان اقوام متحدہ کا ذمے دار ملک اور آزاد افغانستان کا حامی ہے، جو ہمسایوں کے ساتھ پرامن تعلقات رکھے۔

واشنگٹن :امریکہ نے کہا ہے کہ پاکستان وہی کرے گا جو اس کے ذاتی مفاد میں ہو گا۔ پاکستانی عوام نے دہشتگرد حملوں سے بھاری نقصان اٹھایا۔ غیر ملکی خبر رساں ادارے کے مطابق واشنگٹن میں پریس کانفرنس سے خطاب کرتے ہوے انہوں نے کہا کہ اپنا دفاع کرنا پاکستان کا حق ہے، پاک افغان سرحد اور افغانستان میں موجود دہشتگرد گروپوں نے پاکستانیوں کی جانیں لیں، پاکستانی عوام نے دہشتگرد حملوں سے بھاری نقصان اٹھایا۔انہوں نے کہا کہ پاکستان اور امریکا کا مشترکہ مفاد ہے کہ طالبان اپنے وعدوں کو پورا کریں۔ انہوں نے کہا طالبان یقینی بنائیں کہ داعش، تحریک طالبان پاکستان اور القاعدہ سے خطے کی سیکورٹی کو خطرہ نہیں۔نیڈ پرائس نے کہا کہ ایمن الظواہری افغانستان میں تھا ہم نے اس کے خلاف کارروائی کی۔ انہوں نے کہا خطرے سے نمٹنے کیلئے یک طرفہ کارروائی کی ضرورت پڑی تو کریں گے۔ پاکستان کس قسم کا ایکشن لے سکتا ہے اس بارے میں رائے نہیں دے سکتے۔ انہوں نے کہا کراس بارڈر تشدد سے بہت جانی نقصان ہوا۔ انہوں نے کہا دہشت گرد گروہ بشمول ٹی ٹی پی کی طرف سے تشددکی مذمت کرتے ہیں