Category جرم وانصاف

اسلام آباد(ایمرا نیوز) چیف جسٹس پاکستان جسٹس عمر عطا بندیال نے تاحیات نااہلی کیس میں ریمارکس دیے کہ فیصل واوڈا نے امریکی شہریت کاغذات نامزدگی جمع کرانے کے بعد چھوڑی تاہم کسی کو تاحیات نااہل کرنا اتنا آسان نہیں ہے۔
پی ٹی آئی رہنما فیصل واوڈا کی تاحیات نااہلی سے متعلق کیس کی سماعت چیف جسٹس عمر عطا بندیال کی سربراہی میں ہوئی۔
درخواست گزار کے وکیل فاروق ایچ نائیک نے کہا کہ فیصل واوڈا کا سارا جھگڑا سینیٹ کی نشست کا ہے جبکہ فیصل واوڈا کے وکیل وسیم سجاد نے کہا کہ ان کے موکل نے نہ حقائق چھپائے نہ بددیانتی کی۔
جسٹس منصور علی شاہ نے استفسار کیا کہ فیصل واوڈا نے کاغذات نامزدگی کب جمع کرائے؟ وکیل وسیم سجاد نے بتایا کہ فیصل واوڈا نے کاغذات نامزدگی 7جون 2018کو جمع کرائے اور ان کے کاغذات نامزدگی کی اسکروٹنی 18جون کو ہوئی۔
جسٹس منصور علی شاہ نے پوچھا کہ فیصل واوڈا نے بیان حلفی کب جمع کرایا تھا؟ جس پر وسیم سجاد نے کہا کہ فیصل واوڈا نے بیان حلفی 11 جون 2018 کو جمع کرایا، ریٹرننگ افسر کو بتا دیا تھا کہ امریکی شہریت چھوڑ دی ہے، امریکن قونصلیٹ جا کر نائیکاپ منسوخ کرایا۔
جسٹس عائشہ ملک نے استفسار کیا کہ آپ نے کس تاریخ کو امریکی سفارتخانے جاکر نیشنیلٹی منسوخ کرائی؟
وکیل فیصل واوڈا نے کہا کہ امریکی سفارت خانے جاکر کہہ دیا تھا کہ نیشنیلٹی چھوڑ رہا ہوں، جس پر جسٹس منصور علی شاہ نے استفسار کیا کہ کیا آپ نے ایمبیسی جاکر زبانی بتا دیا کہ میرا پاسپورٹ کینسل کر دو؟
وسیم سجاد کا کہنا تھا کہ امریکی شہریت چھوڑنے کا ثبوت میں نے تو نہیں دینا تھا، جس پر جسٹس منصور علی شاہ نے کہا کہ بیان حلفی 11 جون کو جمع کرانے سے پہلے آپ نے زحمت ہی نہیں کی کہ دہری شہریت کا معاملہ ختم کریں؟
فیصل واوڈا کے وکیل نے کہا کہ نادرا نے 29 مئی 2018 کو امریکی شہریت کینسل ہونے کا سرٹیفکیٹ دیا تھا، جس پر جسٹس عائشہ ملک نے پوچھا کہ جب آپ نے امریکی سفارتخانے جاکر شہریت کینسل نہیں کرائی تو نادرا نے سرٹیفکیٹ کیسے جاری کر دیا؟ بیان حلفی جمع کراتے وقت فیصل واوڈا کی امریکی شہریت کینسل نہیں ہوئی تھی۔
وکیل وسیم سجاد نے کہا کہ اصل سوال تاحیات نااہلی کی ڈیکلیئریشن کا ہے جو کمیشن نہیں دے سکتا۔
چیف جسٹس پاکستان عمر عطا بندیال نے ریمارکس دیے کہ آرٹیکل 62 ون ایف کا ڈیکلیئریشن عدالت ہی دے سکتی ہے، شواہد کا جائزہ لیے بغیر کسی کو بددیانت یا بے ایمان نہیں کہا جا سکتا۔
جسٹس عمر عطا بندیال نے کہا کہ زندگی بھر کے لیے کسی کو نااہل کرنا اتنا آسان نہیں، عدالتی ڈیکلیئریشن کا مطلب ہے کہ شواہد ریکارڈ کیے جائیں۔
چیف جسٹس پاکستان نے کہا کہ سپریم کورٹ اپنے فیصلوں میں آرٹیکل 62 ون ایف کے اطلاق کا معیار مقرر کر چکی ہے، فیصل واوڈا نے امریکی شہریت کاغذات نامزدگی جمع کرانے کے بعد چھوڑی ہے۔
پی ٹی آئی رہنما کے وکیل وسیم سجاد نے کہا کہ دہری شہریت پر آرٹیکل 63 ون سی کا اطلاق ہوتا ہے، دہری شہریت پر رکن صرف ڈی سیٹ ہوتا ہے تاحیات نااہل نہیں ہوتا۔
سپریم کورٹ نے فیصل واوڈا کی تاحیات نااہلی سے متعلق کیس کی سماعت آئندہ بدھ تک ملتوی کر دی۔

لاہور(ایمرا نیوز)لاہور ہائیکورٹ نے مریم نواز کی پاسپورٹ واپسی کی درخواست منظور کر لی۔مریم نواز کی پاسپورٹ واپسی کے لیے درخواست پر سماعت چیف جسٹس لاہور ہائیکورٹ امیر بھٹی کی سربراہی میں 3 رکنی فل بینچ نے کی۔
چیف جسٹس امیر بھٹی نے وکیل امجد پرویز ایڈووکیٹ سے استفسار کیا کہ کیا مریم نوازنے پہلے بھی پاسپورٹ واپسی کی درخواستیں دائر کی تھیں، جس پر مریم کے وکیل نے بتایا کہ موجودہ درخواست کی روشنی میں پرانی درخواستیں غیر مؤثر ہو چکیں۔
امجد پرویز ایڈووکیٹ نے کہا کہ مریم نواز کو پاسپورٹ جمع کرانے پر ضمانت ملی، 4 سال ہو گئے لیکن ابھی تک چوہدری شوگر ملز کا کوئی ریفرنس نہیں آیا، اگر یہ کیس فائل کرتے اور مریم اس کا دفاع کرتیں تو صورتحال مختلف ہوتی، کسی کی نقل و حرکت کو روکنا بنیادی حقوق کا معاملہ بھی ہے۔
انہوں نے مزید کہا کہ مریم چاہتی تھیں کہ یہ کیس فائل ہوتا تاکہ وہ اس کے دفاع میں آتیں، لمبی تاخیر کرنا قانون کے غلط استعمال کے مترادف ہے، لمبی تاخیر پر عدالتیں بغیر میرٹ دیکھےکیس ختم کرا دیتی ہیں۔
مریم نواز کے وکیل نے جواب دیا کہ مریم نے 4 سال تک انتظار کیا ہے،کوئی ریفرنس دائر یا تفتیش نہیں کی گئی۔
جسٹس امیر بھٹی نے پھر پوچھا کہ کیا ہم ضمانت کے فیصلے میں شرط والے حصےکی ترمیم کریں گے یا اس حصے کو واپس لیں گے؟ جس پر امجد پرویز ایڈووکیٹ نے کہا کہ عدالت مریم نواز کی ضمانت کے حکم میں ترمیم کر سکتی ہے۔
جسٹس امیر بھٹی نے پوچھا کہ وفاقی حکومت کا اس پر کیا جواب ہے؟ڈپٹی اٹارنی جنرل نے کہا کہ ہمیں پاسپورٹ واپس دینے پر کوئی اعتراض نہیں ہے۔جسٹس امیر بھٹی نے پوچھا کہ کیا مریم کی ضمانت کے خلاف اپیل دائر کی گئی تھی؟ جس پر ڈپٹی اٹارنی جنرل نے کہا کہ مجھے اس بارے میں معلوم نہیں ہے، چیف جسٹس محمد امیر بھٹی نے کہا کہ تو وہ کون بتائے گا؟ یا آپ نے صرف ایک فقرہ سن لیا کہ کچھ نہیں کرنا، مخالفین آجائیں تو زمین آسمان ایک کر دیتے ہیں اپنے ہوں تو زمین پر بچھ جاتے ہیں۔
لاہور ہائیکورٹ نے مسلم لیگ ن کی نائب صدر کی درخواست منظور کرتے ہوئے مریم نواز کا پاسپورٹ انہیں واپس کرنے کی ہدایت کر دی۔

اسلام آباد(ایمرا نیوز)اسلام آباد کی مقامی عدالت نے سارہ انعام قتل کیس میں مرکزی ملزم شاہنواز کی والدہ کی عبوری ضمانت میں 3 اکتوبر تک توسیع کردی۔کینیڈاسے آنے والا مقتولہ سارہ انعام کاخاندان بھی آج پولیس کوبیان ریکارڈ کروائےگا۔
دوسری جانب کچہری میں میڈیا سے گفتگو کرتے ہوئے مرکزی ملزم شاہنواز کی والدہ ثمینہ شاہ نے کہا کہ مجھے ایاز امیر فون کرتے رہے لیکن میرا فون کمرے میں تھا، ایاز امیر نے شاہنواز کے فون پر مجھ سے بات کی، ایاز امیر نے کہا کہ شاہنواز کو پکڑ کر رکھو، میں نے پولیس کو اطلاع کردی ہے۔
انہوں نے کہا کہ میری حالت بری تھی، صدمے میں تھی، میں نے شاہنواز کو دوسرے کمرے میں بٹھایا اور پولیس کا انتظارکیا، پولیس آئی تو میں نےشاہنوازکو پولیس کے حوالےکیا، ماں کے لیے اس سے بڑھ کر کیا امتحان ہوسکتاہے، میں چاہتی توبھگاسکتی تھی، باپ نےکہا شاہنوازکو رسیوں سےباندھ دو، میں نے ایاز امیر کو کہا کہ میں گھر میں اکیلی ہوں، گھر پر کوئی نہیں ہے، شاہنواز نے مجھے کچھ نہیں کہا، بس دروازہ بند کردیا۔
ثمینہ شاہ نے مزید بتایا کہ گھر میں میرا کمرہ آخر میں ہے اور شاہنواز کا شروع میں ہے، میرے کمرے تک آواز آنے کا سوال نہیں ہوتا، اگر آواز آئی ہوتی تو کیا میں کچھ نہ کرتی۔
انہوں نے کہا کہ رات کو شاہنواز نے مجھے میسج کیا کہ سارہ کے والدین سے وقت طے کرلیں، میری سارہ کے والدین سے اچھی طرح بات ہوئی، تین چار بار ہوئی، مجھے یہ بھی معلوم نہیں کہ کب دونوں کی لڑائی ہوئی۔
ثمینہ شاہ کا کہنا تھا کہ شاہنواز نے جو کیا اس کی مذمت کرتی ہوں اسے سزا ضرور ملے گی۔

اسلام آباد(ایمرا نیوز)خاتون جج زیبا چوہدری کو دھمکیوں سے متعلق توہین عدالت کیس میں چیئرمین تحریک انصاف عمران خان پر فرد جرم عائد کرنے کے لیے اسلام آباد ہائیکورٹ نے سرکلر جاری کر دیا۔
اسلام آباد ہائیکورٹ نے چیئرمین پی ٹی آئی عمران خان کی توہین عدالت کیس میں اسلام آباد ہائیکورٹ پیشی کے معاملے پر سرکلر جاری کر دیا ہے۔
جاری سرکلر کے مطابق لارجر بینچ کل 22 ستمبر دن ڈھائی بجے کیس کی سماعت کرے گا اور کمرہ عدالت نمبر ایک میں انٹری رجسٹرار آفس کے جاری کردہ پاس سے مشروط ہو گی۔
سرکلر کے مطابق عمران خان کی لیگل ٹیم کے 15 وکلا کمرہ عدالت میں موجود ہوں گے اور اٹارنی جنرل آفس اور ایڈووکیٹ جنرل آفس سے 15 لاء افسران کو بھی کمرہ عدالت میں آنے کی اجازت ہو گی۔
اسلام آباد ہائیکورٹ سرکلر میں کہا گیا ہے کہ کورٹ ڈیکورم برقرار رکھنے کے لیے اسلام آباد انتظامیہ اور پولیس سکیورٹی انتظامات کرے، اسلام آباد ہائیکورٹ کل توہین عدالت کیس میں عمران خان پر فرد جرم عائد کرے گی۔
یاد رہے کہ خاتون جج کو دھکیوں سے متعلق توہین عدالت کیس میں اسلام آباد ہائیکورٹ نے چیئر مین پی ٹی آئی کو غیر مشروط معافی مانگنے کے لیے دو مواقع فراہم کیے تھے تاہم عمران خان نے غیر مشروط معافی مانگنے کے بجائے اپنے الفاظ واپس لینے اور آئندہ محتاط رویہ اختیار کرنے کا جواب عدالت میں جمع کرایا

اپوزیشن لیڈر سندھ حلیم عادل شیخ نے آئی جی سندھ اور ایڈیشنل آئی جی کراچی کو خط لکھا ہے جس میں انہیں دھمکی آمیز پیغامات ملنے کی تحقیقات اور مناسب سکیورٹی دینے کا مطالبہ کیا ہے۔
اپوزیشن لیڈر سندھ اسمبلی حلیم عادل شیخ نے دھمکی آمیز ویڈیو کے خلاف ارسال خط کی کاپیاں مختلف اداروں کو بھی بھیج دیں جن میں کہا گیا کہ کچھ روز قبل سوشل میڈیا گروپس پر دھمکی آمیز ویڈیو اپ لوڈ کی گئی تھی۔ پولیس بلٹ پروف جیکٹ، رائفل، پستول اور ہتھکڑیاں دکھائی گئی تھیں۔
ویڈیو میں پس پردہ شخص خود کو پولیس اہلکار ظاہر کر رہا ہے، حلیم عادل شیخ نے کہا کہ ظاہر کیا گیا کہ سندھ پولیس اہلکار مجھ سے ناراض ہیں۔ میں عوام پر پولیس کی زیادتیوں کو نمایاں کرتا ہوں اس لئے طنزیہ دھمکیاں دی گئیں۔ تاثر دیا گیا کہ جانی حملے کی کوشش کو پولیس اہلکار کی انتقامی کارروائی سمجھا جائے۔
خط میں مزید کہا کہ معاملے کی جلد از جلد تحقیقات کی جائیں تا کہ حقائق سامنے آئیں۔ گزشتہ ماہ واٹس ایپ پر غیرملکی نمبر سے دھمکی آمیز پیغامات بھی مل چکے۔ ایف آئی اے سائبر کرائم ونگ دھمکی آمیز پیغامات کے معاملے کی تحقیقات کر رہا ہے۔ خطرات کے باعث مناسب سکیورٹی فراہم کی جائے۔

ناظم جوکھیو قتل کیس میں ملیر کورٹ نے ملزموں کی عبوری ضمانت منسوخ کر دی
ناظم جوکھیو قتل کیس میں نامزد پانچ ملزمان کی عبوری ضمانت کی درخواست پر سماعت ہوئی، عبوری ضمانت منسوخ ہونے پر ملزمان احاطہ عدالت سے فرار ہو گئے، پولیس ملزموں کو گرفتار کرنے میں ناکام ہو گئی،ناظم جوکھیو کیس کے تفتیشی افسر سراج لاشاری کی جانب سے فون پر اہم انکشاف سامنے آ گئے جس میں ان کا کہنا ہے ملزم فرار نہیں ہوئے بلکہ میری اور وکلاء کی آنکھوں کے سامنے سے گئے، عدالت کے ضمانت خارج سے قبل ہم ان کو فارغ التفتیش کرچکے ہیں،، ناظم جوکھیو کیس میں مذکورہ پانچ ملزموں کے خلاف کوئی شہادت نہیں، سلیم سالار محمد سومار ، محمد اسحاق ، دودو خان محمد خان جوکھیو شامل ہیں،، ان پانچ ملزمان کا کوئی کردار سامنے نہیں آیا،، عدالت کی جانب سے ضمانت منسوخ ہونے سے فرق نہیں پڑتا،، ورنہ عدالت ضمانت خارج کا حکم سناتے ہی گرفتار کرنے کا حکم دیتی،، تفتیش سے خارج ہونے کے بعد اب یہ آزاد ہیں،، ان کے خلاف کوئی کیس نہیں،،ناظم جوکھیو کو چند ماہ پہلے غیرملکی شہریوں کو تلور کا شکار سے روکنے اور ان کی ویڈیو بنانے پر قتل کیا گیا تھا۔

لاہور میں کاہنہ پولیس سٹیشن کے قریب فائرنگ کے نتیجے میں میاں بیوی جاں بحق جبکہ بیٹازخمی ہوگیا،
سلامت علی نامی شخص بیوی زبیدہ اور بیٹے کے ہمراہ کار پر سوار جا رہا تھا کہ نامعلوم موٹر سائیکل سواروں نے فائرنگ کردی جس کے تنیجے میں سلامت اور اس کی بیوی موقع پر جاں بحق جبکہ بیٹا عاطف زخمی ہوگیا،،پولیس کے مطابق فائرنگ کے بعد ملزم موقع سے فرار ہوگئے، زخمی اور جاں بحق افراد کی لاشیں ہسپتال منتقل کردی گئی ہیں،،،آئی جی پنجاب پولیس راؤ سردار علی خان نے واقعہ کا فوری نوٹس لیتے ہوئے ملزموں کی فوری گرفتاری کا حکم دیدیا،،وزیراعلیٰ پنجاب عثمان بزدار نے واقعہ کا نوٹس لیتے ہوئے رپورٹ طلب کرلی اور ملزموں کی جلد گرفتاری کے احکامات صادر کردیئے۔

وزیراعلیٰ سندھ مراد علی شاہ نے کہا ہے کہ سندھ حکومت پر تنقید سے خوشی ہوتی ہے، شاہ رخ جتوئی کے معاملے پر یہ نہیں کہیں گے پچھلے راستے سے نکل گیا، شاہ رخ جتوئی کے معاملے پر جو بھی ذمہ دار ہوگا اس کے خلاف کارروائی ہوگی
وزیراعلیٰ سندھ مراد علی شاہ نے اسلام آباد میں میڈیا سے گفتگو کرتے ہوئے کہا کہ سانحہ مری پر ہر انسان کا دل دہل گیا، حکومت کہہ رہی ہے لوگ وہاں کیوں گئے، ایسے بے حس حکمران پہلے کبھی نہیں دیکھے، حکومت کہہ رہی ہے لوگ خود ذمہ دار ہیں کہ وہ مری کیوں گئے اور گاڑی میں کیوں بیٹھے، پہلے حکومت خود ہی تعریفیں کر رہی تھی کہ اتنے لوگ مری پہنچ گئے، یہ پاکستان میں مہنگائی نہ ہونے کا بیان دیکر غریبوں کا دل دُکھاتے ہیں،،مراد علی شاہ کا کہنا تھا کہ وزراء کام کریں نہ کریں، ٹویٹ ضرور کرتے ہیں، انہیں صرف ٹویٹ کا شوق ہے، اگر تمام مسائل سندھ حکومت پیدا کر رہی ہے تو ہٹ جائیں ہمیں ملک چلانے دیں، پی ایس ایل میچجز کو ویلکم کرتے ہیں، اومی کرون کا ویرینٹ تیزی سے پھیل رہا ہے، عوام ماسک پہنیں، احتیاطی تدابیر اختیار کریں۔

لاہور میں نیوایئر نائٹ پر ہوائی فائرنگ کرنے والوں کےخلاف مختلف کارروائیوں میں 36 افراد کو گرفتار کیا گیا
ایس پی کینٹ کے مطابق باغبانپورہ، ہربنس پورہ، غازی آباد، فیکٹری ایریا اور ہیر میں کریک ڈاؤن ہوا، مناواں، باٹاپور، مصطفی آباد اور برکی میں بھی فائرنگ کرنیوالوں کے خلاف پولیس نے ایکشن کیا ، گرفتار ملزموں سے اسلحہ برآمد کر کے مقدمات درج کر لیئے گئے،،

وزیراعلیٰ پنجاب عثمان بزدار نے کہا ہے کہ سال نو پر ہوائی فائرنگ اور ہلڑ بازی کرنے والے افراد کے خلاف بلاامتیاز کارروائی کی جائے،
سال نو پر امن عامہ کی فضاء یقینی بنانے کیلئے عثمان بزدار نے انسپکٹر جنرل پولیس کو ضروری ہدایات کر دیں،عثمان بزدارکا کہنا ہےکہ سال نو پر ہلڑ بازی کرنے والے افراد کے خلاف کارروائی کی جائے، آر پی اوز، سی پی اوز اور ڈی پی اوز اس ضمن میں جامع حکمت عملی وضع کریں،وزیراعلیٰ نے ون ویِلنگ کرنے والوں کے خلاف بلاامتیاز کریک ڈاؤن کا حکم بھی دے دیا اور کہا ون ویِلنگ کسی صورت برداشت نہیں کروں گا، جس ضلع سے ون ویِلنگ کی شکایت سامنے آئی متعلقہ پولیس افسر کے خلاف کارروائی ہو گی، ون ویِلنگ روکنے کیلئے خصوصی ٹیمیں تشکیل دی جائیں، ون ویِلنگ کرنے والوں کو قانون کے تحت سزا ملے گی، کم عمر افراد کے خلاف گاڑی یا موٹر سائیکل چلانے پر کارروائی عمل میں لائی جائے۔