Category لاھور نامہ

وزیراعلیٰ پنجاب عثمان بزدار نے کہا ہے کہ سال نو پر ہوائی فائرنگ اور ہلڑ بازی کرنے والے افراد کے خلاف بلاامتیاز کارروائی کی جائے،
سال نو پر امن عامہ کی فضاء یقینی بنانے کیلئے عثمان بزدار نے انسپکٹر جنرل پولیس کو ضروری ہدایات کر دیں،عثمان بزدارکا کہنا ہےکہ سال نو پر ہلڑ بازی کرنے والے افراد کے خلاف کارروائی کی جائے، آر پی اوز، سی پی اوز اور ڈی پی اوز اس ضمن میں جامع حکمت عملی وضع کریں،وزیراعلیٰ نے ون ویِلنگ کرنے والوں کے خلاف بلاامتیاز کریک ڈاؤن کا حکم بھی دے دیا اور کہا ون ویِلنگ کسی صورت برداشت نہیں کروں گا، جس ضلع سے ون ویِلنگ کی شکایت سامنے آئی متعلقہ پولیس افسر کے خلاف کارروائی ہو گی، ون ویِلنگ روکنے کیلئے خصوصی ٹیمیں تشکیل دی جائیں، ون ویِلنگ کرنے والوں کو قانون کے تحت سزا ملے گی، کم عمر افراد کے خلاف گاڑی یا موٹر سائیکل چلانے پر کارروائی عمل میں لائی جائے۔

ٹانک میں سکیورٹی فورسز کے آپریشن کے دوران فائرنگ کے تبادلے میں 4 جوان جام شہادت نوش کر گئے، 2 دہشت گرد بھی مارے گئے۔
آئی ایس پی آر کے مطابق دہشت گردوں کی شاہ زیب عرف ذاکراور دانیال کے نام سے شناخت ہوئی ہے جبکہ ان کے قبضے سے اسلحہ اور گولہ بارود بھی برآمد ہوا۔
پولیس حکام کے مطابق دہشت گرد کمانڈر سی ٹی ڈی اور سکیورٹی فورسز کو متعدد مقدمات میں مطلوب تھا، ہلاک ہونے والے دہشت گرد بدامنی، اغواء برائے تاوان اور ٹارگٹ کلنگ میں ملوث تھے۔

مقبوضہ کشمیر میں بھارتی فوج کا ظلم و ستم جاری، مزید 3 کشمیری شہید

مقبوضہ کشمیرمیں بھارتی فورسز کا ظلم وستم جاری ہے، قابض فوج نے مزید تین کشمیریوں کو شہید کردیا،،
بھارتی فورسز نے اسلام آباد ڈسٹرکٹ میں مزید تین کشمیریوں کو شہید کر دیا، واقعے کے بعد علاقے میں فون اور انٹرنیٹ سروس معطل ہے،بھارتی فوج نے کلگام میں بھی گزشتہ روز 3 کشمیریوں کو شہید کیا، دو روز میں شہید کشمیریوں کی تعداد 6 ہو گئی۔

سابق بیوروکریٹ کی سیٹیزن پورٹل پر شکایت پر وزیراعظم نے فوری نوٹس لیتے ہوئے 10دہائیوں پرانا زمینی تنازع حل کر دیا،، شکایت کرنے والے شہری کو 100 سال بعد زمین کا قبضہ واپس مل گیا،،
سابق فیڈرل ایڈیشنل سیکرٹری نے دادی کی زمین نہ ملنے پر پورٹل پر شکایت درج کروائی تھی، ان کا کہنا تھا کہ میری دادی اور ان کی بہنوں کی زمین پر 100سال سے چچا زاد بھائی قابض تھے، بار بار منت سماجت کے باوجود زمین ہمیں واپس نہیں دی جا رہی تھی، سیٹیزن پورٹل پر شکایت درج کروائی تو فوری ایکشن لیا گیا۔

کراچی سائٹ سپرہائی وے پولیس نے کارروائی کے دوران کالعدم تنظیم کے دو دہشت گردوں کو گرفتار کر لیا جن کے قبضے سے ہینڈ گرنیڈ سمیت اسلحہ بھی برآمد کیا گیا، گرفتار دہشت گردوں نے تخریب کاری کی تربیت افغانستان سے حاصل کی، ملزمان کے خلاف دہشت گردی ایکٹ کے تحت مقدمہ درج کر لیا گیا۔

لاہور : نیشنل کالج آف آرٹس نے کرسمس کے حوالے سے اپنے مسیحی ملازمین کے لیے تقریب کا اہتمام کیا۔ تقریب میں سینئر فیکلٹی، سینئر سٹاف اور این سی اے کے مسیحی ملازمین کی بڑی تعداد نے شرکت کی۔ایک پیغام میں وائس چانسلر نیشنل کالج آف آرٹس پروفیسر ڈاکٹر مرتضیٰ جعفری نے مسیحی ملازمین کو کرسمس کی مبارکباد دی۔ انہوں نے نیشنل کالج آف آرٹس میں عیسائی ملازمین کے کردار اور ان کی شراکت کا اعتراف کیا۔ انہوں نے کہا کہ این سی اے میں ہر سال کرسمس کی تقریب منانا بہترین روایت ہے۔ انہوں نے NCA کے تمام ملازمین کے درمیان مساوات اور ہم آہنگی کو فروغ دینے پر زور دیا اور کہا کہ نیشنل کالج آف آرٹس اپنے تمام ملازمین کے لیے مساوی احترام اور حقوق کو یقینی بناتا ہے جو کسی بھی مذہب سے تعلق رکھتے ہوں۔

بجٹ میں شفافیت وقت کی ضرورت ہے اور حکومت اس میں بہتری کیلئے اقدامات کر رہی ہے ان خیالات کا اظہار پارلیمانی سیکرٹری برائے بہبود خواتین،رکن پنجاب اسمبلی ثانیہ کامران نے سی پی ڈی آئی کے زیر اہتمام مقامی ہوٹل میں منعقدہ تقریب بعنوان ”شفاف اور اوپن بجٹ اور معلومات تک رسائی“ سے گفتگو کرتے ہوئے کیا انہوں نے کہا کہ پنجاب حکومت نے اس سال ہر ضلع کا الگ الگ بجٹ تیار کیا ہے جس سے شہریوں کو اپنے اپنے ضلع کی معلومات مل سکتی ہیں۔سی پی ڈی آئی کی جانب سے  جاری رپورٹ”پاکستان میں بجٹ شفافیت کی صورتحال“ بلاشبہ ایک بہترین کاوش ہے جس میں بجٹ سازی میں پائی جانیوالی خامیوں کی نہ صرف نشاندہی کی گئی ہے بلکہ اس میں بہتری کیلئے تجاویز بھی موجود ہیں۔ثانیہ کامران نے سی پی ڈی آئی سے کہا کہ وہ نوجوان اراکین اسمبلی کیلئے تربیتی سیشنز کا اہتمام کریں تاکہ بجٹ سازی میں انکی شمولیت بہتر ہو سکے۔تقریب سے گفتگو کرتے ہوئے سی پی ڈی آئی کے ایگزیکٹو ڈائریکٹر مختار احمد علی نے کہا کہ سی پی ڈی آئی نے ہمیشہ عوامی نوعیت کے مسائل کو اجاگر کیا ہے اورہمیشہ بجٹ میں شفافیت کے لئے کوشاں رہی ہے۔ یہ رپورٹ بھی اسی سلسلے کی ایک کڑی ہے۔عوام کو یہ حق حاصل ہے کہ وہ یہ جان سکیں کہ ان کا پیسہ کہاں کہاں استعمال ہو رہا ہے اور ان کی فلاح کی خاطر کونسے منصوبے رکھے گئے ہیں۔پاکستان میں مختلف محکموں میں اب بھی کسی خفیہ دستاویز کی طرح بجٹ کو عوام سے دور کھا جا رہاہے۔انہوں نے بجٹ دستاویزات کوڈیجیٹلائزکرنے کی ضرورت پر زور دیتے ہوئے اسے پیپر فری بنانے کا بھی مطالبہ کیا۔اس موقع پر گفتگو کرتے ہوئے چیف انفارمیشن کمشنر پنجاب محبوب قادر شاہ نے کہا کہ پنجاب انفارمیشن کمیشن ہر سطح پر معلومات تک رسائی کے قوانین کے بہتر نفاذ کیلئے  سرگرم عمل ہے اس سلسلہ میں مختلف سرکاری و غیر سرکاری اداروں کیساتھ آگاہی سیشنز کا انعقاد کیا جارہا ہے۔سرکاری ادارے بلاشبہ عوام بلاشبہ معلومات فرام کرنے میں لیت و لعل سے کام لیتے ہیں جو کہ ایک المیہ ہے تاہم میں امید کرتا ہوں کہ اس حوالہ سے آنیوالا وقت بہتر ہوگا لیکن اس میں سرکاری اداروں کی یہ ذمہ داری بنتی ہے کہ وہ معلومات کی از خود فراہمی یقینی بنائیں۔ڈپٹی سیکرٹری(فنانس)محمد عارف خان نے اپنی گفتگو میں سی پی ڈی آئی کی جانب سے بجٹ شفافیت پر جاری رپورٹ کو ایک بہترین کاوش قرار دیا اور کہا کہ محکمہ فنانس اپنے محدود وسائل میں رہتے ہوئے ہر ممکن کوشش میں ہے کہ زیادہ سے زیادہ معلومات ویب سائٹس کے ذریعے لوگوں تک پہنچائی جائیں۔ یہ سچ ہے کہ بیوروکریسی بجٹ سازی میں کلیدی کردار ادا کرتی ہے تاہم عوامی نمائندوں کو بھی اس میں اپنا کردار نبھانا چاہیے تاکہ اس عمل میں تمام شراکت داروں کی شمولیت بہتر بنائی جاسکے۔سینئر چیف(ایجوکیشن)پلاننگ اینڈ ڈویلپمنٹ بورڈ پنجاب بابر رزاق نے اپنی گفتگو میں شرکا کی جانب سے اٹھائے گئے مختلف سوالات کا جواب دیتے ہوئے بتایا کہ سرکاری ادارے تو احکامات کے پابند ہوتے ہیں اور مالی سال کے دوران بجٹ میں ہونیوالی مختلف تبدیلیاں کابینہ کی منظوری کے بعد کی جاتی ہیں جنہیں بعدازاں اسمبلی میں پیش کیا جاتا ہے ہم اتنے بااختیار نہیں ہیں کہ از خود بجٹ کو تبدیل کر سکیں۔قبل ازیں ڈائریکٹر بجٹ سٹڈی سنٹر(سی پی ڈی آئی) عامر اعجاز نے ”پاکستان میں بجٹ شفافیت کی صورتحال“ پر مبنی رپورٹ پیش کرتے ہوئے بجٹ سازی میں پائی جانیوالی خامیوں کی نشاندہی کی او ربتایا کہ بجٹ سازی میں شہریوں کی شمولیت،مقننہ کی نگرانی،پارلیمنٹ میں بحث کا دورانیہ اورمساوی بجٹ سمیت دیگر اہم ترین اقدامات توجہ طلب ہیں اور اس سلسلہ میں حکومت کو فوری اور دوررس اقدامات کرنا ہوں گے۔علاوہ ازیں کسی بھی حکومت کی جانب سے سہ ماہی،ششماہی یا سالانہ رپورٹس کے اجراء کا کوئی طریقہ کار رائج نہیں ہے جبکہ آڈٹ رپورٹس بھی آڈیٹر جنرل کی ویب سائٹس پر باقاعدگی سے اپ لوڈ نہیں کی جاتیں۔ حکومتیں نظر ثانی شدہ تخمینہ جات کے اعدادوشمار بروقت فرام نہیں کرتیں بلکہ بجٹ کی منظوری کے دوران ہی پیش کردیے جاتے ہیں۔انہوں نے مطالبہ کیا کہ صوبائی اور وفاقی حکومتیں معلومات تک رسائی کے قوانین پرعملدرآمد کو یقینی بنائیں، بجٹ پر بحث اور منظوری کے دورانیہ کو بڑھا یا جائے متعلقہ سٹیک ہولڈرز خصوصاً شہریوں سے مشاورت کو قانونی تحفظ دیا جائے اور زیادہ سے زیادہ معلومات کی فراہمی پر مبنی ایک شفاف اور اوپن بجٹ پالیسی وضع کی جانی چاہیے۔تقریب سے پنجاب بھر سے سی این بی اے کی ممبر تنظیموں کے نمائندوں سمیت مختلف شعبہ ہائے زندگی سے تعلق رکھنے والے افراد سمیت صحافیوں نے بھی شرکت کی۔

پشاور میں پولیس اور سی ٹی ڈی کے مشترکہ آپریشن کے دوران تین دہشت گرد ہلاک ہوگئے۔
پولیس کے مطابق پشاور کے علاقے فقیر آباد میں پولیس اور محکمہ انسداد دہشتگردی ( سی ٹی ڈی) نے مشترکہ آپریشن کیا جس دوران علاقے میں چھپے دہشتگردوں نے اہلکاروں پر فائرنگ کردی جس کے بعد اہلکاروں کی جوابی فائرنگ سے تین دہشت گرد ہلاک ہوگئے۔
پولیس کا کہنا ہے کہ تینوں دہشت گرد فقیر آباد میں رنگ روڈ قبرستان میں واردات کے لیے موجود تھے، ہلاک دہشت گرد ٹارگٹ کلنگ سمیت سنگین مقدمات میں مطلوب تھے جب کہ تینوں دہشتگردسکھ قتل کیس اورپولیس اہلکاروں کی ٹارگٹ کلنگ میں بھی ملوث تھے۔
پولیس کے مطابق دہشت گردوں سے 3کلاشنکوف، پستول، کارتوس اور مختلف دستاویزات برآمد کی گئی ہیں۔

اسلام آباد ہائی کورٹ نے ڈاکٹر عمران فاروق قتل کیس میں ملزمان کی سزا کے خلاف اپیلوں پر فریقین کے دلائل مکمل ہونے کے بعد فیصلہ محفوظ کرلیا۔
چیف جسٹس اطہر من اللہ اور جسٹس عامر فاروق نے فیصلہ محفوظ کیا۔ وفاق کی جانب سے ڈپٹی اٹارنی جنرل کے دلائل اور تحریری جواب گراف کے ساتھ پیش کیا گیا۔ ڈپٹی اٹارنی جنرل نے ملزمان کی اپیلیں خارج کرنے کی استدعا کرتے ہوئے کہا کہ ملزمان کے خلاف ٹھوس شواہد اور دستاویزات موجود ہیں، عدالت انسداد دہشت گردی عدالت کا فیصلہ برقرار رکھے۔
ملزمان خالد شمیم، معظم علی اور محسن علی کے وکلاء کے دلائل اور تحریری جواب بھی عدلات میں جمع کرا دیئے گئے۔ اسلام آباد ہائی کورٹ نے تینوں ملزمان کی سزا کے خلاف اپیلوں پر فیصلہ محفوظ کرلیا۔

ایف آئی اے نے شہباز شریف ،حمزہ شہباز اور دیگر کے خلاف 16 ارب روپے کی منی لانڈرنگ کا چالان عدالت میں جمع کرا دیا،
ایف آئی اے نے چالان بینکنگ جرائم کورٹ میں جمع کرایا جس میں شہباز شریف اور حمزہ شہبازکو مرکزی ملزم نامزد کیا گیا ہے، ایف آئی اے کا چالان سات والیمز پر مشتمل ہے جس میں 100گواہوں کی لسٹ بھی جمع کروائی گئی ہے،شہباز شریف اور حمزہ کے خلاف 100 گواہ عدالت میں گواہی دیں گے ،چالان میں شہباز شریف فیملی کے بے نامی داروں اور سہولت کاروں کو بھی ملزم نامزد کیا گیا ہے، سلمان شہباز سمیت تین ملزمان اس مقدمے میں اشتہاری ہو چکے ہیں۔