Category لاھور نامہ

اسلام آباد (میڈیا 92 نیوز آن لائن ) پاکستان کے تجارتی خسارے میں رواں مالی سال (2018-19ئ) کے پہلے گیارہ ماہ کے دوران19.3 فیصد کمی ہوئی ہے۔

ادارہ برائے شماریات پاکستان(پی بی ایس) کے اعداد و شمارکے مطابق جاری مالی سال کے پہلے11 مہینوں ( جولائی تا مئی) کے دوران ملک کا تجارتی خسارہ کم ہوکر 3.64 ارب ڈالر رہا، گزشتہ مالی سال کے اسی عرصے کے دوران تجارتی تجارتی خسارے کا حجم 2.94 ارب ڈالر ریکارڈ کیا گیا تھا، اس طرح گزشتہ مالی سال کے مقابلے میں جاری مالی سال کے دوران ملک کے تجارتی خسارے میں0.7 ارب ڈالر (19 فیصد )سے زائد کمی ریکارڈ کی گئی۔

پی بی ایس کے مطابق مئی2019ءکے دوران ملکی برآمدات میں 1.72 فیصد کمی سے برآمدات کا حجم گزشتہ سال کے2.14 ارب ڈالر کے مقابلے میںکم ہوکر 2.10 ارب ڈالررہا، اسی طرح درآمدات میں بھی12.8 فیصد کی کمی سے درآمدی بل5.7 ارب ڈالر کے مقابلے میں کم ہوکر 5.04 ارب ڈالر پر آگیا۔اعداد و شمار کے مطابق جاری مالی سال میں (جولائی تا مئی) مجموعی قومی برآمدات میں0.30 فیصد کمی واقع ہوئی،

برآمدی حجم گزشتہ سال کے اسی عرصے کے مقابلے میں کم ہوکر 21.26 ارب ڈالرہا، گزشتہ مالی سال جولائی تا مئی21.33 ارب ڈالر کی برآمدات کی گئی تھیں۔ رپورٹ کے مطابق جاری مالی سال کے دوران مجموعی قومی درآمدات میں8.47 فیصد کمی سے درآمدی بل55.14 ارب ڈالر کے مقابلے میں50.14 ارب ڈالر تک کم ہوگیا۔ اس طرح درآمدات میں8 فیصد سے زائد کی کمی سے 5 ارب ڈالر کے زرمبادلہ کی بچت ہوئی ہے۔

لاہور(میڈیا 92 نیوز آن لائن)لاہور ہائیکورٹ نے پیراگون ہاﺅسنگ سکینڈل میں گرفتار خواجہ برادران کی ضمانت کی درخواستوں پر محفوظ فیصلہ سنا دیا، عدلت نے خواجہ برادران کی ضمانت کی درخواستیں مستردکردیں،خواجہ برادران نے فیصلے کوسپریم کورٹ میں چیلنج کرنے کااعلان کردیا۔

تفصیلات کے مطابق لاہورہائیکورٹ میں پیراگون ہاﺅسنگ سکینڈل میں خواجہ سعد رفیق اور سلمان رفیق کی درخواست ضمانت پر سماعت ہوئی، جسٹس علی باقر نجفی کی سربراہی میں دو رکنی بنچ نے سماعت کی ،خواجہ برادران کے وکلا اور نیب پراسیکیوٹر عدالت میں پیش ہوئے،نیب وکیل نے دلائل دیتے ہوئے کہا کہ خواجہ برادران نے ڈیبونیئر پرائیویٹ لمیٹڈ کمپنی بنا کر ہاؤسنگ سکیم بنائی ، 30 جون 2000 میں ڈیبیوئیر فرم بنائی گئی ،

نیب وکیل نے کہاکہ 2000میں خواجہ برادران کیخلاف آمدن سے زائد اثاثہ کیس کی انکوائری شروع ہوئی،گیارہ اگست 2003 کو ایئر ایوینیو کو پیراگون میں تبدیل کر دیا گیا ،نیب وکیل نے کہا کہ خواجہ برادران کے 49 ملین کے بانڈز نکلنے پر انکوائری بند کردی گئی،خواجہ سعد رفیق اور ان کی اہلیہ پیچھے رہ کر کاروبار کرتے رہے،خواجہ برادران ہی پیراگون ہاؤسنگ سوسائٹی کے کرتا دھرتا ہیں ۔

وکیل خواجہ برادران نے دلائل دیتے ہوئے کہا کہ ندیم ضیااورقیصرامین بٹ دوست ہیں پارٹنرنہیں،قیصرامین بٹ کا2بارجوڈیشل مجسٹریٹ کےسامنے بیان دلوایاگیا،نیب نے قیصرامین کے بیان کوپہلے مستردکروایاپھرمرضی کابیان دلوایا،وکیل صفائی نے کہا کہ قیصرامین کومعافی دےکرواپس لی گئی اوردوبارہ بیان ریکارڈکرایاگیا،عدالت نے استفسار کیا کہ دوسری بارقیصرامین بٹ کابیان لینے کی وجہ کیاتھی؟

وکیل خواجہ برادران نے کہا کہ پہلا بیان چیئرمین نیب کی مرضی کانہیں تھا،3سال خواجہ برادران کےخلاف انکوائری چلی،انکوائری کسی پرائزبانڈکی وجہ سے بندنہیں ہوئی،انکوائری نیب نے بندکرتے ہوئے اس وقت معذرت بھی کی تھی،عدالت نے خواجہ برادران کی درخواست ضمانت پر محفوظ فیصلہ سنادیا،عدالت نے خواجہ برادران کی درخواست ضمانت مستردکردی،خواجہ برادران کے وکیل نے کہاہے کہ ہائیکورٹ کے فیصلے کو سپریم کورٹ میں چیلنج کیا جائےگا۔

اسلام آباد(میڈیا 92 نیوز آن لائن)سپریم کورٹ آف پاکستان نے قتل کیس میں ملزم کی سزائے موت کیخلاف نظرثانی درخواست مسترد کرتے ہوئے سزا کو برقرار رکھا ، چیف جسٹس پاکستان نے عمر قید سے متعلق ریمارکس دیتے ہوئے کہاکہ عمرقیدکایہ مطلب نکال لیاگیا 25 سال قیدہے، عمرقیدکامطلب ہوتا ہے تاحیات قید،کسی موقع پرعمرقید کی درست تشریح کریں گے،اگرایساہو گیا توپھردیکھیں گے کون قتل کرتاہے، ایساہواتواس کے بعدملزم عمرقیدکی جگہ سزائے موت مانگیں گے،

تفصیلات کے مطابق سپریم کورٹ میں قتل کیس کے مجرم عبدالقیوم کی سزائے موت کیخلاف نظرثانی درخواست کی سماعت ہوئی،چیف جسٹس آصف سعید کھوسہ کی سربراہی میں 3 رکنی بنچ نے درخواست کی سماعت کی،ٹرائل کورٹ اورہائیکورٹ نے ملزم کوسزائے موت دی تھی،

چیف جسٹس آصف سعیدکھوسہ کے عمرقید سے متعلق ریمارکس دیتے ہوئے کہا کہ عمرقیدکایہ مطلب نکال لیاگیا 25 سال قیدہے، عمرقیدکامطلب ہوتا ہے تاحیات قید،چیف جسٹس پاکستان نے کہا کہ کسی موقع پرعمرقید کی درست تشریح کریں گے،اگرایساہو گیا توپھر دیکھیں گے کون قتل کرتاہے،

ایساہوا تواس کے بعدملزم عمرقیدکی جگہ سزائے موت مانگیں گے،چیف جسٹس آصف سعید کھوسہ نے کہا کہ بھارت میں عمرقیدکیساتھ سال کاتعین بھی کیاجاتاہے، عمرقید کےساتھ لکھاجاتا کتنے سال سزاکاٹے گا۔سپریم کورٹ نے ملزم عبدالقیوم کی سزائے موت برقرار رکھتے ہوئے نظرثانی کی درخواست مستردکردی۔

اسلام آباد (وقت نیوز آن لائن) سینئر صحافی و اینکر پرسن مطیع اللہ جان نے دعویٰ کیا ہے کہ سپریم جوڈیشل کونسل نے ریفرنس پر کوئی اعلامیہ جاری نہیں کیاگیا تاہم ابتدائی سماعت کے بعد سپریم کورٹ کے جسٹس قاضی فائز عیسیٰ سے رابطہ کیا ہے اور کونسل کی طرف سے گھر پر آدھی رات کو کچھ دستاویزات پہنچائی گئیں جو وصول کرلی گئیں،

یہ ریفرنس کی دستاویزات ہیں جو حکومت نے بھیجی ہیں، ابھی ابتدائی انکوائری ہے ، ابھی باقاعدہ کارروائی شروع نہیں ہوئی ، فاضل جج معلومات دے سکتے ہیں تو وہ اپنا موقف سپریم جوڈیشل کونسل میں پیش ہوکر دے سکتے ہیں تاکہ باقاعدہ قواعد کے مطابق باقاعدہ کارروائی ہوسکے، ابھی شوکاز نوٹس بھی جاری نہیں ہوا۔

اپنے یوٹیوب چینل ایک ویڈیو میں مطیع اللہ جان نے بتایا کہ سپریم جوڈیشل کونسل نے صدارتی ریفرنس پر جسٹس قاضی فائز عیسیٰ سے رابطہ کیا ہے۔ انہوں نے بتایا کہ جمعہ کے روز جسٹس قاضی فائز عیسیٰ کے خلاف ریفرنس کی اِن کیمرہ سماعت ہوئی جس کے بعد سپریم جوڈیشل کونسل کے سیکرٹری ارباب عارف کی جانب سے جسٹس قاضی فائز عیسیٰ کے ججز کالونی میں واقع گھر کے پتے پر سربمہر لفافہ بھجوایا گیا،

فاضل جسٹس اسلام آباد میں موجود بھی نہیں تھے اور شاید ان کی لیٹ نائٹ واپسی کی وجہ سے ہی رات کو ہی سربمہر لفافہ پہنچایا گیا۔ مطیع اللہ جان نے دعویٰ کیا کہ اس سربمہر لفافے میں ریفرنس اور متعلقہ مواد ہوسکتا ہے۔سینئر صحافی کا کہنا ہے کہ سپریم جوڈیشل کونسل کے قواعد کے مطابق کسی شکایت پر ابتدائی انکوائری کے مرحلے میں مدعا علیہ جج سے رابطہ کر کے ریفرنس کا بتایا جاتا ہے۔انہوں نے کہا کہ یہ قانونی کارروائی ہے تاکہ سپریم جوڈیشل یہ فیصلہ کرسکے کہ آیا حکومتی ریفرنس جسے صدر مملکت نے وزیراعظم کے مشورے اور وزیرقانون کی معاونت سے بھجوایا، یہ اٹارنی جنرل کی ذمہ داری ہے کہ وہ اس ریفرنس کو آگے بڑھائیں ۔

ریفرنس کی ابتدائی سماعت تقریباً سوا گھنٹی جاری رہی ،جس دوران صرف اٹارنی جنرل کو بلایاگیا اور ان سے ابتدائی معلومات کا تبادلہ ہوا، وہ جب باہر آئے تو زیادہ مطمئن نہیں تھے ، کافی ٹینس دکھائی دے رہے تھے ۔ سینئر صحافی وحید مراد نے بتایا کہ جب کوئی ریفرنس آتا ہے تو کسی ایک جج کے سپرد کیا جاتا ہے کہ وہ دیکھیں کہ اس ریفرنس میں کوئی قابل عمل چیز ہے یا نہیں؟ جس کے بعد اجلاس ہوتا ہے اور انکوائری شروع ہوتی ہے ، تاحال عدالت نے ریفرنس مسترد نہیں کیے تاہم اٹارنی جنرل کے رویے سے محسوس ہوتا ہے کہ عدالت نے مزید شواہد طلب کیے ہیں، یہ بھی ممکن ہے کہ ریفرنس بھیجنے والے شخص یا اس سے بیان حلفی لیا جائے ۔

میڈیا پر چلنے والی خبروں کے مطابق صدر پاکستان عارف علوی نے سپریم کورٹ کے جسٹس قاضی فائز عیسیٰ کے خلاف سپریم جوڈیشل کونسل کو ایک ریفرنس بھجوایا تھا جس میں ان کی اہلیہ کی بیرون ملک موجود جائیدادوں کو بنیاد بنایا گیا تھا۔ اس ریفرنس کی سماعت جمعہ 14 جون کو سپریم جوڈیشل کونسل میں 5 رکنی بینچ نے کی تھی۔

فیصل آباد (ویب ڈیسک) فواد چوہدری اور سینئر صحافی سمیع ابراہیم سمیت ملک کی اہم شخصیات فیصل آباد میں نجی ٹی وی چینل’’ 92 نیوز‘‘ کے مالک میاں حنیف کی صاحبزادی کی شادی کی تقریب میں شریک تھے جہاں دونوں میں تلخ کلامی ہوئی اور بات اس حد تک بڑھ گئی کہ وفاقی وزیر نے سینئر صحافی کو تھپڑ مار دیا۔

واقعہ پیش آنے پر فواد چوہدری تقریب سے چلے گئے تاہم شادی کی تقریب میں موجود لوگ اکٹھے ہوگئے، اس موقع پر وزیر اعظم کی معاون خصوصی برائے اطلاعات فردوس عاشق اعوان نے سینئر صحافی سے معذرت بھی کی۔

سمیع ابراہیم کا موقف بھی سامنے آ گیا ہے ۔ انکے مطابق تقریب میں موجود لوگوں نے سمیع ابراہیم سے دریافت کیا کہ ایسا کیوں ہوا تو انہوں نے بتایا کہ میں نے اپنے پروگراموں میں ان پر تنقید کی تھی جب کہ سماجی رابطوں کی ویب سائٹ ٹوئٹر پر بھی ایک ایسا ٹوئٹ کیا تھا جس میں میں نے انکشاف کیا تھا کہ فواد چوہدری تحریک انصاف کے اندر ایک گروپ بنا رہے ہیں جس کو وہ پیپلز پارٹی سے ملوانا چاہتے ہیں جس پر فواد چوہدری نے مجھے دھمکیاں بھی دی تھی اور اب تقریب میں انہوں نے ایسے طرز عمل کا مظاہرہ کیا ہے۔

یادرہے کہ فیصل آباد کے تھانہ منصورآباد میں اندراج مقدمہ کیلئے سینئر صحافی نے درخواست بھی دیدی جس میں سمیع ابراہیم نے موقف اپنایا کہ شادی کی تقریب میں شرکت کے لیے وہ اپنے دوستوں ارشد شریف، رئووف کلاسرا، ڈی جی ایف آئی اے بشیر میمن اور پی ٹی آئی کے رکن اسمبلی فرخ حبیب کے ہمراہ آئے تھے ، اس دوران وفاقی وزیر سائنس و ٹیکنالوجی فواد چوہدری نے ان پر حملہ کردیا، انہیں تھپڑمار ا اور گالیاں دیں، سنگین نتائج کی دھمکیاں بھی دیں لہٰذا مقدمہ درج کیاجائے ۔

اسلام آباد (میڈیا 92 نیوز آن لائن ) اسلام آباد ہائی کورٹ نے مشتاق سکھیرا کی بطور وفاقی ٹیکس محتسب برطرفی کا حکومتی نوٹفکیشن معطل کرتے ہوئے صدر مملکت، وزیر اعظم اور سیکریٹری قانون سے اس معاملے کی رپورٹ طللب کرلی۔

تاہم اسلام آباد ہائی کورٹ کے جسٹس اطہرمن اللہ نے مشتاق سکھیرا کو آئندہ سماعت تک اپنے عہدے پر کام کرنے سے روک دیا ہے۔

رپورٹ کے مطابق وزارت قانون نے ایک نوٹیفکیشن کے ذریعے مشتاق سکھیرا کی وفاقی ٹیکس محتسب کے عہدے پر تقرری ختم کردی تھی۔

جس پر انہوں نے اپنی وکیل زینب جنجوعہ کے ذریعے اس حکومت اقدام کو عدالت میں چیلنج کردیا تھا جنہوں نے عدالت میں درخواست جمع کروائی کہ وفاقی ٹیک محتسب کی تقرری اور برطرفی ایف ٹی او آرڈیننس 2000 اور وفاقی محتسب ادارہ اصلاحاتی قوانین 2013 کے تحت کی گئی۔

ایف ٹو او آرڈیننس 2000 کی دفعہ5، 6(2) کا حوالہ دیتے ہوئے انہوں نے موقف اختیار کیا کہ ایک مرتبہ جب وفاقی محتسب اپنے عہدے کا حلف اٹھالے تو اسے صرف سپریم جوڈیشل کونسل کے ذریعے ہی برطرف کیا جاسکتا ہے۔

تاہم وزارت قانون نے اس معاملے کو سپریم جوڈیشل کونسل کے پاس نہیں بھجوایا اور ایک نوٹیفکیشن کے ذریعے ان کی تقرری کو غلط قرار دے دیا۔

جس پر جسٹس اطہر من اللہ نے صدر، وزیراعظم اور سیکریٹری قانون سے 15 یوم میں جواب طلب کرلیا اس کے علاوہ اٹارنی جنرل پاکستان کو بھی نوٹس بھیجتے ہوئے سماعت 24 جون تک ملتوی کردی۔

اسن تمام معاملات پر گہری نظر رکھنے والے افراد کا کہنا ہےکہ مشتاق سکھیرا پاکستان مسلم لیگ (ن) کے قریبی افسر تھے جنہیں ماڈل ٹاؤن سانحے کے الزامات کا بھی سامنا ہے اور فیڈرل بورڈ آف ریونیو (ایف بی آر)ٰ کے سینئر افسران کے ساتھ ان کے اختلافات بھی ہیں۔

ذرائع کا کہنا ہے کہ چھ ایف بی آر افسران نے صدر مملکت عارف علوی کے سامنے وفاقی ٹیک محتسب کے خلاف رپورٹ پیش کی تھی۔

قبل ازیں سیکریٹری ان لینڈ ریونیو وفاقی ٹیک محتسب کو ایک خط ارسال کیا تھا جس کے بارے میں کہا گیا تھا کہ وہ خط ان کے اختیارات نے متجاوز تھا۔

مذکورہ خط جو ڈان کو دستیاب ہے، میں کہا گیا تھا کہ ’وفاقی ٹیکس محتسب کے پاس ایسے معاملات کی تحقیقات کرنے کا اختیار نہیں جس میں کی گئی درخواست پر نظرِ ثانی ہوچکی ہو

اسلام آباد ( میڈیا 92 نیوز آن لائن ) مسلم لیگ ن کے تاحیات قائد اور سابق وزیراعظم نواز شریف کی سزا معطلی کی درخواست پرقومی احتساب بیورو( نیب )نے اسلام آباد ہائیکورٹ میں اپنا جواب جمع کرادیاہے۔ نیب نے نواز شریف کی سزا معطلی کی مخالفت کر دی ہے۔

قومی احتساب بیورو(نیب) کے ڈپٹی پراسیکیوٹر جنرل سردار مظفر عباسی نے 12 صفحات پر مشتمل تحریری جواب داخل کرایاہے۔

نیب کی طرف سے جمع کرائے گئے جواب میں کہا گیاہے کہ نواز شریف کی صحت ایسی تشویشناک نہیں ہے،میڈیکل رپورٹس کے مطابق نواز شریف کی جان کو کوئی خطرہ نہیں ہے۔

میڈیکل رپورٹس میں نواز شریف کی فوری سرجری کی سفارش نہیں کی گئی۔

نیب کے جواب میں کہا گیاہے کہ نواز شریف کی سزا معطلی کی درخواست ناقابل سماعت ہے اسے خارج کیا جائے۔

نیب کا کہنا ہے کہ احتساب عدالت نے تمام شواہد کے جائزے کے بعد نواز شریف کو سات سال قید کی سزا سنائی تھی۔ نواز شریف سزا یافتہ مجرم ہیں، سزا معطل کر کے ضمانت پر رہا نہیں کیا جا سکتا۔

نیب نے موقف اختیار کیا ہے کہ العزیزیہ ریفرنس میں سزا کے خلاف اپیل بھی زیر سماعت ہے،سزا کے خلاف اپیل سماعت کے لیے مقرر ہو تو سزا معطلی کی درخواست قابل سماعت نہیں ہوتی۔

عدالت نے جواب داخل نہ ہونے پر گزشتہ سماعت پر نیب حکام کی سخت سرزنش کی تھی۔

لاہور (میڈیا 92 نیوز آن لائن ) ایک، دو یا تین نہیں بلکہ پنجاب میں چھ نئی جامعات کے قیام کا اعلان کر دیا گیاہے۔ صوبائی حکومت نے مالی سال 2019-2020کے بجٹ میں محکمہ تعلیم کے لئے تین سو تراسی ارب روپے مختص کئے ہیں۔

تعلیم سے تبدیلی کا نعرہ لگانے والی تحریک انصاف نے بجٹ میں تعلیم کو بڑا حصہ دے دیا ہے۔ دو ہزار انیس بیس کے دوران تین سو تراسی ارب روپے کی خطیر رقم سے محکمہ تعلیم کے مختلف شعبے مستفید ہوں گے۔

ہائر ایجوکیشن کے لیے مختص تہتر سو ملین روپے سے کالجز کو کمیونٹی کالج کا درجہ دیا جائے گا۔

مری، چکوال، میانوالی سمیت چھ شہروں میں نئی جامعات کی تعمیر، یوتھ کاؤنسلنگ سنٹرز اور تریسٹھ ڈگری کالجز قائم ہوںگے۔

سابق حکومت کے آخری بجٹ میں ترقیاتی کاموں کی مد میں محکمہ ہائر ایجوکیشن کمیشن کو اٹھارہ ہزار چونتیس ملین روپے ملے تھے۔

اسکول ایجوکیشن ڈیپارٹ٘منٹ کے حصے میں بتیس ارب روپے آئے ہیں۔

اسکول ایجوکیشن ڈیپارٹمنٹ کےنئے منصوبوں میں اساتذہ کی ٹریننگ کے لیے سمارٹ کلاسرومز، جدید آئی ٹی لیبز اور اضافی کلاس رومز تعمیر ہوں گے۔ کتب بینی کے فروغ اور طلبہ کی نشوونما کے پروگرامز بھی شروع کئے جائیں گے۔

اسپیشل ایجوکیشن کے بجٹ سے لاہور سمیت دس اضلاع میں معذور طلبہ کے لیے تعلیمی مراکز بنیں گے، نو اسپیشل ایجوکیشن سنٹرز کی اپ گریڈیشن اور نئی بسیں بھی خریدی جائیں گی۔

سابق حکومت کے آخری بجٹ میں تعلیم کے لیے تین سو پینتالیس ارب مختص ہوئے، پی ٹی آئی نے اڑتیس ارب روپے کا اضافہ کیا ہے۔

اسلام آباد (میڈیا 92 نیوز آن لائن ) مبینہ جعلی بینک اکاؤنٹس کیس میں گرفتار پیپلز پارٹی کی رہنما فریال تالپور کو آج وفاقی دار الحکومت اسلام آباد میں قائم احتساب عدالت میں پیش کیا جائے گا۔

نیب کی جانب سے سندھ اسمبلی کی ممبر صوبائی اسمبلی فریال تالپور کا14روزہ جسمانی ریمانڈ حاصل کرنے کی استدعا کی جائے گی۔

فریال تالپور کی گرفتاری کے بعد چیئرمین نیب جسٹس ریٹائرڈ جاوید اقبال کی طرف سے اسلام آباد کے سیکٹر ایف ایٹ میں واقع انکی رہائش گاہ کو سب جیل قرار دیا گیا ہے۔

نیب راولپنڈی کی طرف سے سابق صدرآصف علی زرداری کی بہن فریال تالپور کو اسلام آباد میں ان کی رہائش گاہ سے گزشتہ روز گرفتارکیا گیا۔

نیب کی جانب سے گزشتہ روز جاری اعلامیے میں کہا گیا ہے کہ فریال تالپور تاحکم ثانی اپنے گھر میں قید رہیں گی، ان کی عزت نفس کا پہلے بھی احترام رکھا گیا اور آئندہ بھی مکمل خیال رکھا جائے گا۔

نیب کے مطابق فریالپور کو ان کی رہائش گاہ میں ہی رکھا جائے گا اور نیب کی ٹیم ان کی رہائشگاہ پر ہی ان سےتفتیش کرے گی۔

نیب کی جانب سے فریالپور کی گرفتاری سے متعلق خبر پہلے ہی اپنے ناظرین کودے دی تھی۔

فریال تالپورکی گرفتاری کے بعد پیپلزپارٹی کارکن زرداری ہاؤس کے باہرجمع ہوئے ۔ خواتین کارکنان نے حکومت مخالف نعرے لگائے ۔ پولیس نے زرداری ہاوس کے گردونواح کی سیکیورٹی سخت کر دی ہے ۔

گرفتاری کے بعد مشیر اطلاعات سندھ مرتضیٰ وہاب نے اپنے ردعمل میں کہا تھا کہ فریال تالپور، آصف زرداری کی بہن ہیں اور وہ بھی بہادری کے ساتھ صورت حال کاسامنا کریں گی۔

انہوں نے کہا کہ پیپلز پارٹی کی قیادت قانونی تقاضوں کو پورا کرتی رہی ہے اور آصف زرداری اور فریال تالپور عدالتوں میں پیش ہوتے رہے۔

واضح رہے کہ آصف علی زرداری کی 10 جون کو عبوری ضمانت منسوخ کر دی گئی تھی جس کے بعد نیب نے انہیں زرداری ہاؤس سے گرفتار کیا تھا۔

ان کو نیب راولپنڈی کے دفتر میں علیحدہ سیل میں رکھا گیا ہے۔ میڈیکل بورڈ نے آصف زرداری کی ابتدائی طبی رپورٹ کو تسلی بخش قرار دیا تھا۔

سابق صدر اس وقت 10 روزہ ریمانڈ پر20جون تک نیب راولپنڈی کی حراست میں ہیں۔

لاہور (میڈیا 92 نیوز آن لائن ) پاکستان تحریک انصاف کے رہنما اوروزیر جنگلات پنجاب سبطین خان کو آج احتساب عدالت پیش کیا جائے گا۔

قومی احتساب بیورو(نیب )نے گزشتہ روز سبطین خان کوگرفتار کیا تھا آج جسمانی ریمانڈ کے حصول کیلئے احتساب عدالت کے جج جواد الحسن کی عدالت میں پیش کریگا۔

نیب کی طرف سے الزام عائد کیا گیاہے کہ سبطین خان نے چنیوٹ اور رجوعہ میں اربوں روپے مالیت کے 500 میٹرک ٹن آئرن کا غیر قانونی ٹھیکہ من پسند کمپنی کو دیا۔

سبطین خان نے جولائی 2007 میں میسرز ارتھ ریسورس پرائیویٹ لمیٹڈ نامی کمپنی کو ٹھیکہ فراہم کرنے کے غیر قانونی احکامات دئیے۔

نیب کے مطابق ملزم نے دیگر شریک ملزمان کی ملی بھگت سے ٹھیکہ ای آر پی ایل کو مروجہ قوانین سے انحراف کرتے ہوئے فراہم کیا۔ ای آر پی ایل نامی کمپنی ماضی میں کان کنی کے تجربہ کی حامل نہ تھی ۔

صوبائی وزیر جنگلات سبطین خان پر یہ الزام بھی ہے کہ انہوں نے معلوم ہونے کے باوجود ملی بھگت سے کمپنی کو کنٹریکٹ فراہم کیا۔

نیب کی طرف سے یہ بھی کہا گیاہے کہ ملزم سبطین خان نے اربوں روپے مالیت کے معدنی وسائل غیر قانونی طور پر25 لاکھ مالیت کی کمپنی کو فراہم کیے ۔

سبطین خان 1990 سے 93 تک صوبائی وزیر جیل خانہ جات، 2002 سے 2007 تک صوبائی وزیر مائنز اینڈ منرل اور 2013 سے 2018 تک رکن صوبائی اسمبلی رہے۔

2018 کے عام انتخابات میں سبطین خان چوتھی بار رکن صوبائی اسمبلی منتخب ہوئے ہیں۔ سبطین خان گزشتہ عام انتخابات میں پی پی 88 میانوالی 4 سے منتخب ہوئے تھے اوران کا تعلق میانوالی کی تحصیل پپلاں سے ہے۔