Category تازہ ترین

نیو یارک : امریکی اداکار اینگس کلاؤڈ 25 سال کی عمر میں چل بسے۔ میڈیا رپورٹ کے مطابق اداکار کی موت امریکا کی ریاست کیلیفورنیا میں واقع ان کے گھر پر ہوئی۔رپورٹس کے مطابق اہلخانہ کی جانب سے بھی اینگس کلاؤڈ کی موت کی تصدیق کردی گئی ہے تاہم موت کی وجہ کے بارے میں نہیں بتایا گیا ہے۔ میڈیا ک رپورٹ کے مطابق اہلخانہ کی جانب سے جاری ہونے والے بیان میں بتایا گیا ہے کہ اینگس کلاؤڈ نے کچھ ہفتے پہلے اپنے والد کی آخری رسومات ادا کی تھیں جس کے بعد سے اس کی دماغی صحت خراب تھی۔ میڈیا رپورٹ کے مطابق اداکار نے 2 فلموں اور کئی میوزک ویڈیوز میں کام کیا البتہ ان کو ایک ڈرامہ سیریز میں کام کرنے کی وجہ سے شہرت حاصل ہوئی تھی۔

ممبئی :بالی ووڈ کی حسینہ عالم سشمیتا سین نے موت کے منہ سے باہر آنے کے بعد زندگی کی قدر سیکھنے کا انکشاف کیا ہے۔ بھارتی میڈیا رپورٹس کے مطابق سشمیتا سین نے اپنے حالیہ انٹرویو میں انکشاف کیا ہے کہ حالیہ دنوں میں ان کی زندگی میں نمایاں تبدیلی رونما ہوئی ہے، اب وہ اپنی زندگی کی قدر پہلے سے زیادہ کرتی ہیں۔ انہوں نے کہا کہ خود کو خوش قسمت سمجھتی ہوں ۔ انہوں نے کہا ہارٹ اٹیک نے ان کی زندگی بدل کر رکھ دی اور اب وہ زندگی کو ایک نئے زاویے سے دیکھتی ہیں۔

ممبئی :بالی ووڈ اداکارہ کاجول نے انکشاف کیا ہے کہ شاہ رخ خان کو کسی بھی فلم کے سیٹ پر موجود تمام لوگوں کے ڈا ئیلاگ یاد ہوتے ہیں ۔ اور انکی یہ عادت مجھے بالکل پسند نہیں ہے ۔ اپنے ایک انٹرویو کے دوران کاجول نے انکشاف کیا کہ انہیں شاہ رخ خان کی ایک عادت بالکل نہیں پسند اور وہ یہ ہے کہ انہیں سیٹ پر موجود ہر فرد کے ڈائیلاگ یاد ہوتے ہیں۔انہوں نے مزید کہا کہ مجھے سمجھ نہیں آتا ایک 57 سالہ شخص کیسے سین میں موجود تمام افراد کے ڈائیلاگ یاد کرسکتا ہے، پھر چاہے وہ سین 3 صفحات پر مشتمل ہو، لیکن مجھے شاہ رخ کی یہ عادت اتنی ہی پسند بھی ہے۔انہوں نے اس بات کا اعتراف بھی کیا کہ وہ شارخ خان سے روزانہ کی بنیاد پر رابطے میں نہیں رہتیں، کیونکہ اگر وہ ایسا کرنے لگ جائیں تو یقیناً شاہ رخ خان بھی تنگ آجائیں گے لیکن مجھے یقین ہے کہ اگر کبھی صبح کے 3 بجے بھی انہیں فون کروں تو وہ میری کال کا جواب ضرور دیں گے۔

ادیس ابابا:ایتھوپیا کے ایک سینیر سرکاری ملازم نے بنجمن نیتن یاہو کی حکومت پر نسلی امتیاز کا الزام عاید کرتے ہوئے کہا ہے کہ انہیں نسل پرستی سے نمٹنے کے لیے حکومتی کمیٹی کے سربراہ کے عہدے سے ہٹا دیا گیا ہے۔ حکومت نسل پرستی کے خلاف جدوجہد کو کم کرنے اور معاشرے کے کمزور طبقات کے خلاف نسل پرستانہ طرز عمل کو برقرار رکھنا چاہتی ہے۔میڈیارپورٹس کے مطابق اٹارنی ایوکا زانا نے کہا کہ نسل پرستی اسرائیلی معاشرے میں سنجیدگی سے جڑی ہوئی ہے اور یہ صرف گئے وقتوں کا جرم نہیں ہے۔ اس لیے اس کے نقصانات سے چھٹکارا پانے کے لیے تندہی سے کام کرنے اور مستقل پالیسی کی ضرورت ہے۔پچھلے چھ سالوں کے دوران نسل پرستی کی روک تھام کرنے میں بہت کچھ حاصل کیا گیا ہے، لیکن یہ اب بھی معاشرے میں مضبوط ہے بہت سی بنیادی سہولیات کو کنٹرول کر رہی ہے۔اس کے شدید منفی اثرات ہیں۔ اس لیے مجھے اسے برطرف کرنے کے فیصلے سے حیرانی ہوئی۔زانا کی پیدائش ایتھوپیا میں ہوئی تھی۔ وہ پچھلی صدی کے نوے کی دہائی کے اوائل میں سوڈان کے راستے نقل مکانی کرکے ایک مہم میں اسرائیل آئے تھے۔ انہوں نے اسرائیلی فوج میں خدمات انجام دیں اور میجر کے عہدے تک پہنچے۔ ملٹری سروس کے دوران اس نے قانون کی تعلیم حاصل کی، پہلی اور دوسری یونیورسٹی کی ڈگریاں حاصل کیں اور ملٹری پراسیکیوشن میں تعینات ہوئے۔جب انہیں فوج سے فارغ کیا گیا تو وہ سول پراسیکیوشن میں چلے گئے۔ چھ سال قبل ایتھوپیا کے یہودیوں کی بغاوت کے نتیجے میں وزیر انصاف آیلیٹ شیکڈ نے انہیں حبشیوں کے مصائب کا ازالہ کرنے کے لیے داخلہ کمیٹی کا سربراہ مقرر کیا اور وہ اس نتیجے پر پہنچے کہ نسل پرستی کا مقابلہ کرنے کے لیے ایک سرکاری محکمہ تشکیل دینا ضروری ہے۔اس کا پہلا کام وزارت تک پہنچنے والی شکایات کے ذریعے نسل پرستی اور اس کے متاثرین کے حالات کا جائزہ لینا تھا اور اس نے دریافت کیا کہ اسرائیل میں نسل پرستی کا سب سے زیادہ شکار دو طبقے ایتھوپیا سے تعلق رکھنے والے یہودی اور عرب باشندے ہیں۔ایتھوپیائی یہودیوں کی طرف سے نسل پرستی کا شکار ہونے کی شکایات 37 فیصد تھیں اور عرب شہریوں کی طرف سے (فلسطینی 1948) 27 فیصد شکایات ملیں۔۔ اس کے بعد مذہبی یہودی (الٹرا آرتھوڈوکس) 5 فیصد، روسی یہودی 5 فیصد، سیفاردی یہودی 3 فیصد، ہم جنس پرست 3 فیصد ہیں۔زانا نے نسل پرستی کے رحجان کو جڑوں سے ختم کرنے کا فیصلہ کیا۔ خاص طور پر دو اہم طبقات میں ایتھوپیا اور عربوں کے خلاف ہونے والی نسل پرستی کی روک تھام میں انہیں کچھ کامیابیاں بھی ملیں۔

کابل: امریکی حکام نے طالبان پر زور دیا ہے کہ وہ افغانستان میں انسانی حقوق کی بگڑتی صورتحال کے خاتمے کے لیے اپنی پالیسیاں واپس لیں۔ غیر ملکی خبر رساں ادارے کے مطابق دوحہ میں امریکا اور افغان طالبان کے درمیان دو روزہ ملاقات کا اعلامیہ جاری کردیا گیا۔اعلامیہ کے مطابق امریکی حکام کا کہنا ہے کہ خواتین اور اقلیتوں پر پابندیوں کے حوالے سے شدید تشویش ہے۔ میڈیا رپور ٹ کے مطابق امریکی حکام نے افغان عوام کی حمایت میں اعتماد سازی کیلئے مختلف امور کی نشاندہی کی۔امریکی وفد نے انسانی ہمدردی کے تحت امداد فراہم کرنے والی تنظیموں کی ضرورت پر زور دیا۔

ماسکو: کئی سالوں سے کچی سبزیاں اور پھل کھا کر زندہ رہنے والی روسی انفلوئنسر 40 سال کی عمر میں چل بسی۔غیرملکی میڈیا کے مطابق روس سے تعلق رکھنے والی ڑانا سمسونوا جنوب مشرقی ایشیا میں رہ رہی تھی اور ان کی موت مبینہ طور پر غذائی قلت اور تھکن کے باعث ہوئی۔رپورٹس کے مطابق وہ گزشتہ 5 سال سے کچی سبزیاں، پھل اور ان کا جوس غذا کے طور پر استعمال کر رہی تھیں۔ میڈیا رپورٹ کے مطابق خاتون کے کھانے کی عادات ان کی زندگی کے آخری چند مہینوں میں تشویشناک حد تک محدود ہوگئی تھیں۔ڑانا سمسونوا کی والدہ نے میڈیا کو بتایا کہ ان کی بیٹی کی موت 21 جولائی کو مبینہ طور پر ہیضے کی طرح کے ایک انفیکشن کی وجہ سے ہوئی جو کہ ویگن غذا کے باعث ہوتا ہے۔ میڈیا رپورٹ کے مطابق ڑانا سمسونوا 10 سال سے صرف سبزیاں کھا رہی تھیں اور وہ کبھی کبھار ہی صرف مچھلی اور دودھ کا استعمال کرتی تھیں۔میڈیا رپورٹ کے مطابق خاتون کی موت کی باقاعدہ وجہ کا ابھی تک پتا نہیں چل سکا ہے کیونکہ ان کے اہلخانہ لاش کو روس واپس لانے کی کوشش کر رہے ہیں۔رپورٹس کے مطابق ڑانا سمسونوا کے سوشل میڈیا اکاؤنٹ پر بھی زیادہ تر سبزیوں اور پھلوں کی تصاویر موجود ہیں۔

نئی دہلی: بھارت میں ہندوانتہاپسندوں نے مسجد کو آگ لگانے کے بعد امام مسجد کو شہید کردیا۔بھارتی میڈیا کے مطابق ہندو انتہا پسند ہجوم نے ریاست ہریانہ کے شہر گرو گرام کی مسجد پر آدھی رات کو دھاوا بول دیا۔ بلوائیوں نے مسجد میں توڑ پھوڑ کی اور مسجد کو آگ لگا دی۔ہندو انتہا پسندوں نے مسجد کو بچانے کی کوشش کرنے والے امام مسجد سمیت دو افراد پر فائرنگ کردی جس کے نتیجے میں امام مسجد شہید ہوگئے۔ گروگرام کے مختلف علاقوں میں انٹرنیٹ سروس بند کردی گئی ہے۔ امام مسجد کو شہید کرنے والے کسی شخص کو گرفتار نہیں کیا گیا ہے۔

اسلام آباد:جمعیت علمائے اسلام (ف) کے سربراہ اور پاکستان ڈیموکریٹک موومنٹ (پی ڈی ایم) کے صدر مولانا فضل الرحمٰن نے کہا ہے کہ کیا مجھے اعتماد دلا سکتے ہیں کہ ریاست میری جان کی حفاظت کرسکتی ہے یا نہیں، ہماری پارٹی امن کی جماعت ہے، کارکنوں کو کہوں گا کہ صبر و تحمل کا دامن نہ چھوڑیں، موجودہ صورتحال کے پیش نظر جے یو آئی کی مرکزی مجلس شوری کا اجلاس طلب کرلیا ہے لیکن اس سے پہلے قبائلی زعما کا جرگہ بلانے کی تجویز آئی ، کچھ عرصہ پہلے کورم ایجنسی میں فرقہ وارانہ فسادات بھڑکائے گئے، پورا پشتون بیلٹ آج جل رہا ہے، پوری قوم ریاستی اداروں کی طرف دیکھ رہی ہے وہ کس چیز کی تنخواہ لیتے ہیں ،ملک بھر میں انٹیلیجنس کے 26 ادارے ہیں وہ کہاں غائب ہیں؟ورکرز کنونشن پر ہونے والے حملے پراپنے شدید ردعمل میں مولانا فضل الرحمن نے کہا کہ موجودہ صورتحال کے پیش نظر جے یو آئی کی مرکزی مجلس شوری کا اجلاس طلب کرلیا ہے لیکن اس سے پہلے قبائلی زعما کا جرگہ بلانے کی تجویز آئی ہے۔ان کا کہنا تھا کہ یہ تجویز سامنے آئی ہے کہ زعما اور پختون قیادت بیٹھے اور اس خطے کے بارے میں سوچیں کہ حال میں خیبر ایجنسی میں دو واقعات ہوئے جس میں مسلمانوں کا خون بہا ہے۔مولانا فضل الرحمٰن نے کہا کہ کچھ عرصہ پہلے کورم ایجنسی میں فرقہ وارانہ فسادات بھڑکائے گئے، پورا پشتون بیلٹ آج جل رہا ہے، بلوچ بیلٹ جل رہا ہے، کراچی تک فسادات کی لہر تھم نہیں رہی۔سربراہ جے یو آئی (ف) نے سوال اٹھایا کہ کیا ہمارے ریاستی ادارے صرف اس بات کے لیے رہ گئے ہیں کہ وہ کسی غریب مولوی صاحب کو تھانے میں لے آئیں اور ان پر الزمات لگائیں کہ تمہارے پاس کسی نے کھانا کھایا یا چائے پی ؟ یہی ان کی صلاحیتیں ہیں ؟ ملک بھر میں انٹیلیجنس کے 26 ادارے ہیں وہ کہاں غائب ہیں؟انہوں نے کہا کہ کیا مجھے اعتماد دلا سکتے ہیں کہ ریاست میری جان کی حفاظت کرسکتی ہے یا نہیں یا صرف مجھ سے ٹیکس وصول کریں گے اور میری جان ومال کی حفاظت نہیں کریں گے ؟ان کا کہنا تھا کہ مجھے شکایت ہے، مجھے کرب ہے، میں نے ریاست کو بچانے کے لیے قربانیاں دی ہیں، میں نے اس ریاست کے بقا اور استحکام کے لیے جد وجہد کی ہے، میں ریاست کے شانہ بشانہ کھڑا رہا ہوں لیکن اکیلے ایک جماعت کیا کرسکتی ہے۔مولانا فضل الرحمٰن نے کہا کہ پوری قوم ریاستی اداروں کی طرف دیکھ رہی ہے جو ریاست کی حفاظت کے ذمہ دار اور مسؤول ہیں، اسی کے لیے وہ تنخواہیں لے رہے ہیں وہ کہاں ہیں آج ؟سربراہ پی ڈی ایم نے کہا کہ ریاستی ادارے کب ہمارے شکوں کا ازالہ کریں گے، کب وہ ہمارے زخموں کا مرہم بنیں گے، کب وہ ہمارے مستقبل اور آنے والی نسلوں کی حفاظت کا نظام بنائیں گے؟انہوں نے کہا کہ ان ساری چیزوں پر قومی سطح پر غور کرنا ہے، عنقریب اس حوالے سے ہمہ جہت رابطے کریں گے، سیاسی اور مذہبی ذمہ داروں کے ساتھ گفتگو بھی کریں گے۔ان کا کہنا تھا کہ ساری صورتحال کو سامنے رکھیں گے کہ ہم سالہا سال سے جس کرب میں ہیں اور جس کرب کا اظہار کر رہے ہیں،کرب کا اظہار جرم ہوجاتا ہے لیکن ہمیں کرب میں مبتلا کرنے والے دندناتے پھر رہے ہیں۔جے یو آئی (ف) کے سربراہ نے کہا کہ ہم بری طرح دہشت گردی کا شکار ہیں لیکن دہشت گردی کا خاتمہ مقصود ہونا چاہیے، اس پر تجارت کی اجازت نہیں دی جا سکتی، جرم کا خاتمہ چاہیے، اس کو اپنے مقاصد کے لیے استعمال کرنا خود بہت بڑا جرم ہے۔انہوں نے کہا کہ ہماری پارٹی امن کی جماعت ہے، کارکنوں کو کہوں گا کہ صبر و تحمل کا دامن نہ چھوڑیں، ملک میں سب نظم و ضبط کا مظاہرہ کرنے والے کارکن جے یو آئی (ف) کے ہیں۔

اسلام آباد : پاکستان منرل سمٹ کا افتتاحی سیشن ہوا جس میں وزیراعظم شہباز شریف اور آرمی چیف جنرل سید عاصم منیر نے شرکت کی۔ آرمی چیف جنرل عاصم منیر نے قرآن پاک کی آیات اور علامہ اقبال کے شعر کے ساتھ تقریر کا اآغاز کیا۔آرمی چیف جنرل عاصم منیر نے منرل سمٹ سے خطاب کرتے ہوئے کہا ہے کہ فوج بطور ادارہ خوشحالی ترقی کے سفر میں ریاست کیساتھ کھڑا ہے۔یہ منصوبہ لوکل کمیونٹی کا اوپر اٹھائے گا۔مائننگ منصوبہ میں سرمایہ کاری کرنے کو والوں کو مکمل سیکورٹی فراہم کی جائے گی۔ یہ سمٹ بہت اہم ہے،ہم مقام ریڈ ٹیپ ازم سے نکلنا چاہتے ہیں۔بیوروکریٹ رکاوٹوں سے نکلنا چاہتے ہیں۔ہم نے ملٹری ، سول بیوروکریسی،وفاق، صوبائی حکومتوں کے ساتھ مل کر ایک ادارہ بنایا ہے۔آرمی چیف نے مزید کہا کہ اللہ مہربان ہے، پاکستان کی ترقی کے لیے آگے آئیں اور کامیابیاں سمیٹیں، ہمارے پاس جو وسائل ہیں ہم نے انہیں دریافت کرنا ہے،پاکستان کی ترقی کے لئے تمام افسران مل کر کام کریں، ہاتھ سے ہاتھ اور کندھے سے کندھا ملا کر ہم نے پاکستان کو ترقی کی جانب لے کر جانا ہے۔خدا بھی ان کی مدد کرتا ہے جو اپنی حالت بدلنے کی کوشش کرتے ہیں،اللہ نے کہا میں تمہیں آزماؤں گا، کبھی بھوک سے، کبھی خوف سے،کبھی جان سے لیکن جو لوگ صبر دکھاتے ہیں کامیابی انہی کی ہوتی ہے۔ رب نے جو زندگی دی ہے پھر لوٹ کر اسی کی جانب جانا ہے۔اللہ فرماتے ہیں کہ امن اور خوشحالی کے راستے پر مشکلات کے باوجود ڈٹے رہو، فوج بطور ادارہ خوشحالی و ترقی کے سفر میں ریاست کیساتھ کھڑا ہے،آرمی چیف نے کہا کہ ہم پاکستان کو اوپر لے جانا چاہتے ہیں، ہم مل کر محنت کرکے ملک کو درپیش مشکلات سے نکالیں گے۔ ہم نے گرین انشی یٹو بھی اسی لیے لیا ہے۔بطور قوم ہم سب آگے نکلیں گے،محنت کریں گے اور انشاءاللہ ، اللہ کامیابی بھی دے گا

اسلام آباد:وزیراعظم شہباز شریف سے چیف آف نیول سٹاف امجد خان نیازی نے ملاقات کی ہے جس میں پاک بحریہ سے متعلق پیشہ ورانہ امور پر تفصیلی تبادلہ خیا ل کیا گیا،ملاقات میں چیف آف نیول سٹاف نے وزیراعظم کو پاک بحریہ کو مقامی سطح پر ہتھیاروں و جنگی جہازوں کی تیاری کی حکمت عملی سے آگاہ کیا، نیول چیف نے اس حکمت عملی کے تحت پاکستان کو دفاعی اعتبار سے خودکفیل بنانے اور جدید ٹیکنالوجی کے حصول کے حوالے سے جاری اقدامات سے بھی آگاہ کیا۔