Category پاکستان

کراچی : سمندری طوفان ’بائے پر جوائے‘ پاکستان کی جانب  بڑھنے لگا،  محکمہ موسمیات نے 13 جون کی رات اور 14 جون کی صبح سے سندھ اور مکران کے ساحلی علاقوں میں گرج چمک کے ساتھ بارش کی پیش گوئی کردی ہے۔

تفصیلات کے مطابق بحیرہ عرب کےجنوب مشرق میں موجود سمندری طوفان ’بائے پر جوائے‘ پاکستان کی جانب مڑگیا، جس کے پیش نظر الرٹ جاری کردیا گیا۔

محکمہ موسمیات نے بتایا کہ اس وقت طوفان کراچی کے جنوب سے گیارہ سو بیس کلومیٹر دور ہے اور شمال اور شمال مشرق کی جانب بڑھ رہا ہے، اس ٹریک میں بھارت سمیت پاکستان کے ساحلی علاقے بھی آتے ہیں۔

محکمہ موسمیات کا کہنا ہے کہ کراچی سے سمندری طوفان کا فاصلہ کم ہونے کی صورت میں شہر میں گرمی کی شدت بڑھ سکتی ہے۔

محکمہ موسمیات نے تیرہ جون کی رات اور چودہ جون کی صبح سے سندھ اور مکران کے ساحلی علاقوں میں گرج چمک کے ساتھ بارش کا امکان ظاہر کردیا ہے۔

سمندری طوفان کے باعث احتیاطی تدابیر کے تحت ماہی گیروں کوگہرےسمندرمیں نہ جانے کی ہدایت کی گئی ہے۔

اسلام آباد: وفاقی وزیر برائے ترقی و منصوبہ بندی احسن اقبال کا کہنا ہے کہ ہائر ایجوکیشن کمیشن کا ترقیاتی بجٹ جو 26 ارب تھا، 131 فیصد اضافے کے ساتھ 60 ارب کر دیا گیا ہے۔

تفصیلات کے مطابق وفاقی وزیر برائے ترقی و منصوبہ بندی احسن اقبال نے سماجی رابطے کی ویب سائٹ ٹویٹر پر ٹویٹ کرتے ہوئے کہا ہے کہ سنہ 2022 میں ہمیں 550 ارب کا ترقیاتی بجٹ ورثے میں ملا تھا۔

احسن اقبال کا کہنا تھا کہ 550 ارب کے اس ترقیاتی بجٹ کو 24-2023 کے بجٹ میں 100 فیصد اضافے 1100 ارب تک پہنچا دیا ہے۔

انہوں نے کہا کہ اس سے ترقیاتی منصوبوں کو بروقت مکمل کرنے اور ترقی کا پہیہ چلانے میں مدد ملے گی۔

وفاقی وزیر کا مزید کہنا تھا کہ ہائر ایجوکیشن کمیشن کا ترقیاتی بجٹ 26 ارب ملا تھا جسے 131 فیصد اضافے کے ساتھ 60 ارب کر دیا گیا ہے، اس سے نوجوانوں کے مستقبل کو محفوظ بنانے میں مدد ملے گی۔

اسلام آباد : وفاقی وزیر دفاع خواجہ آصف کا کہنا ہے کہ جہانگیر ترین کی جماعت سے ن لیگ کو کوئی خطرہ نہیں ، سیٹ ایڈجسٹمنٹ ہوسکتی ہے۔

تفصیلات کے مطابق وفاقی وزیر دفاع خواجہ آصف نے پارلیمنٹ کے باہر میڈیا سے گفتگو کرتے ہوئے کہا کہ معاشی اہداف حاصل نہ ہونے کا مطلب حکومتی ناکامی نہیں ہے، ہم نے سیاست قربان کرکے ریاست بچائی اور معاشی تباہی کے سامنے بندھ باندھا ہے۔

جہانگیر ترین کی نئی پارٹی کے سوال پر خواجہ آصف کا کہنا تھا کہ جہانگیر ترین کی جماعت سے ن لیگ کو کوئی خطرہ نہیں، جہانگیر ترین کی جماعت سے سیٹ ایڈجسٹمنٹ ہوسکتی ہے۔

وفاقی وزیر دفاع نے کہا کہ عام انتخابات اپنے وقت پر ہوں گے اور ملکر مشکلات کو حل کریں گے ، اگرہم سیاست کو بچاتے تو ملکی حالات اور بھی خراب ہوجاتے، سیاست گنوائی لیکن حالات کو مزید خراب ہونے سے بچایا۔

ان کا کہنا تھا کہ دفاع بجٹ کے حساب سے دفاعی صلاحیت کو نہ تولا جائے ، عام آدمی کو ریلیف ضرور ملے گا لیکن حالات کے مطابق ہوسکتا ہے کہ ریلیف نہ دے سکیں۔

اسلام آباد کی سیشن عدالت نے سینیئر سیاستدان شیخ رشید کے گھر پولیس چھاپے پر ایس ایچ او تھانہ کوہسار کیخلاف مقدمے کی درخواست مسترد کر دی ہے۔

پاکستان مسلم لیگ عوامی کے سربراہ اور سینیئر سیاستدان شیخ رشید احمد کے گھر پر پولیس چھاپے پر تھانہ کوہسار کے ایس ایچ او کے خلاف اندراج مقدمہ کی اسلام آباد سیشن جج کی عدالت میں سماعت ہوئی۔ عدالت نے وکیل کے دلائل سننے کے بعد درخواست پر فیصلہ محفوظ کرلیا تھا جو بعد ازاں سناتے ہوئے درخواست کو مسترد کر دیا گیا ہے۔

ڈسٹرکٹ اینڈ سیشن عدالت کے جج طاہر عباس سپرا کی عدالت کے جاری فیصلے میں کہا گیا ہے کہ پولیس کا شیخ رشید کی رہائشگاہ پر چھاپہ قانون کے مطابق ہے، اس چھاپے میں شیخ رشید کی دو گاڑیاں اور ایک کلاشنکوف قبضے میں لی گئی۔ جس ملازم پر پولیس تشدد کا الزام لگایا گیا اس ملازم کا نہ طبی معائنہ ہوا اور نہ ہی وہ شامل تفتیش ہوا جب کہ اس نے عدالت سے بھی رجوع نہیں کیا۔

عدالت نے اپنے فیصلے میں کہا کہ عدالت صرف دلائل کو مدنظر رکھ کر ہی اندراج مقدمہ کا حکم نہیں دے سکتی بلکہ وہ ریکارڈ پر موجود ثبوت اور اپنے ذہن کو بھی استعمال کرتی ہے اور اس نتیجے پر پہنچی ہے کہ پولیس نے کوئی جرم نہیں کیا اس لیے شیخ رشید کی تھانیدار کے خلاف اندراج مقدمہ کی درخواست مسترد کی جاتی ہے۔

اس سے قبل درخواست کی سماعت شروع ہوئی تو شیخ رشید کے وکیل سردار عبدالرزاق نے دلائل دیتے ہوئے کہا کہ پولیس نے اسلام آباد کے گھر پر چھاپہ مارا اور ملازمین پر تشدد کیا۔ اس چھاپے کے دوران پولیس شیخ رشید کی گاڑیاں بھی ساتھ لے گئی اور اب ان کی سیاسی گرفتاری کی کوشش کی جا رہی ہے۔

جج طاہر عباس سپرا نے استفسار کیا کہ شیخ رشید اس وقت کہاں ہیں؟ وکیل نے عدالت کو بتایا کہ شیخ رشید نامعلوم مقام پر موجود ہیں۔ جس پر ایڈیشنل سیشن جج نے کہا کہ وہ اگر نامعلوم مقام پر ہیں تو پھر گاڑیوں کی کیا ضرورت ہے؟

درخواست کی سماعت کے موقع پر پولیس کی جانب سے تحریری جواب عدالت میں جمع کرا دیا گیا جس میں شیخ رشید کی جانب سے ایس ایچ او کوہسار پر لگائے گئے الزامات کو بے بنیاد قرار دیا اور کہا کہ تفتیش کو مدنظر رکھتے ہوئے شیک رشید کی گرفتاری کے لیے کارروائی کی گئی ہے۔ سرچ وارنٹ کے بعد ان کے گھر پر چھاپہ مارا گیا مگر وہ وہاں موجود نہیں تھے۔

پولیس نے عدالت میں جمع کرائے گئے اپنے موقف میں دعویٰ کیا ہے کہ چھاپے کے دوران شیخ رشید کی گاڑی سے کلاشنکوف برآمد ہوئی ہے جب کہ ان کے گھر سے برآمد ہونے والی گاڑیوں کی ملکیت تاحال معلوم نہیں ہوسکی ہے۔

اسلام آباد : نئے مالی سال میں دِفاعی بجٹ 1530 ارب روپے سے بڑھا کرایک ہزار آٹھ سو ارب کیے جانے کا امکان ہے۔

تفصیلات کے مطابق خطرے کے اِدراک، متفرق چینلجز اور پاکستان آرمی کی صف آرائی کو مدِ نظر رکھتے ہوئے پاکستان کے دفاعی بجٹ کا تنقیدی اور تقابلی جائزہ غور طلب ہے۔

دشمن کا بڑھتا ہوا دفاعی بجٹ افواجِ پاکستان کیلئے ہمیشہ سے چیلنج رہا ہے لیکن اس کے باوجودہمیشہ فواجِ پاکستان کو تنقید کا نشانہ بنایا جاتا ہے، ہندوستان کا دفاعی بجٹ 76 ارب ڈالر ہے ، بھارت پاکستان کی نسبت اپنے ایک فوجی پر سالانہ 4 گنا زیادہ خرچ کر تا ہے۔

پاکستانی فوجی پر سالانہ 13400 ڈالر، انڈیا 42000 ڈالر،امریکہ 392,000 ڈالر، ایران 23000 ڈالرجبکہ سعودی عرب371,000 ڈالر خرچ کرتا ہے۔

سالانہ دِفاعی اخراجات کے حوالے سے بھارت دْنیا کا تیسرا بڑا ملک بن چکا ہے اور بھارت کا دِفاعی بجٹ پاکستان کی نسبت 7 گْنا زیادہ ہے، جبکہ بھارت پانچ سال کے دوران سالانہ 19ارب ڈالر خرچ کرکے دْنیا کا دوسرا بڑا اسلحہ درآمد کرنے والا ملک بھی بن چکا ہے، یہ اخراجات پاکستان کے دفاع بجٹ سے دگنا ہیں۔

سعودی عرب کا ڈیفنس بجٹ 55.6 بلین ڈالر، چائنہ کا ڈیفنس بجٹ 293 بلین ڈالر، ایران کا ڈیفنس بجٹ 24.6 بلین ڈالر، یو اے ای کا ڈیفنس بجٹ 22.5 بلین ڈالر اور ترکی کا ڈیفنس بجٹ 20.7 بلین ڈالر ہے۔

اعداد وشمار کی روشنی میں دیکھا جائے تو 2018ء میں دفاعی بجٹ مجموعی قومی بجٹ کا 18فیصد تھا ، جو 2023ء میں کم ہوکر 16 فیصد سے بھی کم ہوچکا ہے ، جس میں سے 7 فیصد پاکستان آرمی جبکہ باقی نیوی اور ائیر فورس کے حصے میں آتا ہے۔

افراط زر کے دفاعی بجٹ پر اثرات اس کے علاوہ ہیں ، 2020ء کے بعد پاک فوج کے بجٹ میں کوئی اضافہ نہیں کیا گیا ، نہ ہی افواج کی تنخواہوں میں کوئی اضافہ ہوا ہے۔

سال2017/18 کا دفاعی بجٹ مجموعی قومی بجٹ کا 18 فیصد تھا جبکہ 2018/19میں دفاعی بجٹ 19فیصد 2019/20میں دفاعی بجٹ 14 فیصد 2020/21کا دِفاعی بجٹ 17.7فیصد 2021/22کا دفاعی بجٹ 16 فیصد اور 2022/23کا دفاعی بجٹ 16 فیصد رہا۔

2018ء کے بعد کولیشن سپورٹ فنڈ کی بندش کے باوجود دِفاعی اور سیکورٹی کی ضروریات کو ملکی وسائل سے ہی پورا کیا گیا، متفرق آپریشنز کے اہداف اور دائرہ کار سمیت دیگر سیکورٹی اْمور میں کوئی کمی نہیں آنے دی گئی۔

بلاشبہ تمام تر مشکلات کے باوجود مسلح افواج نے ملکی دفاع کو ناقابلِ تسخیر بناتے ہوئے اپنے فرائض سرانجام دیئے ہیں ، اور شب و روز ملکی بقاء کیلئے افواج پاکستان اپنی جانوں کا نذرانہ پیش کر رہی ہے۔

حکومت نے آئندہ مالی سال کے بجٹ کے ساتھ اہم قوانین متعارف کرانے کا بھی فیصلہ کیا ہے۔ذرائع کے مطابق ڈالر اور دیگر کرنسی کی ذخیرہ اندوزی پر سزا دینے کیلئے قانون سازی کا فیصلہ کیا گیا ہے جس کے تحت غیر ملکی کرنسی کی ذخیرہ اندوزی پرقید اور جرمانے کی سزا کے لیے قانون سازی ہوگی، نئے قانون کا اطلاق غیر ملکی کرنسی کی ذخیرہ اندوزی کرنے والے اداروں اور افراد پر ہوگا۔ذرائع کا کہنا ہے کہ ملک میں غیر ملکی کرنسی لانے کی حد بڑھانے کے لیے بھی قوانین متعارف کرائے جارہے ہیں جس کے تحت بیرون ملک سے آنے والے ایک سال کے دوران ایک لاکھ ڈالر تک ساتھ لاسکیں گے، ملک میں ایک لاکھ ڈالر تک لانے والوں سے آمدن کا ذریعہ نہیں پوچھا جائے گا۔اس وقت ذریعہ آمدن ظاہر کیے بغیر 50 لاکھ روپے مالیت کی کرنسی پاکستان لانے کی اجازت ہے

اسٹیٹ بینک نے زرمبادلہ ذخائر کے ہفتہ وار اعداد و شمار جاری کردیئےایس بی پی کی رپورٹ کے مطابق زرمبادلہ کے ذخائر 2 جون کو ختم ہونے والے ہفتے میں 17.82 کروڑ ڈالر کم ہوئے اور مجموعی ذخائر 2 جون تک 9 ارب 33 کروڑ ڈالر رہے۔اسٹیٹ بینک کے ذخائر 17.85 کروڑ ڈالر کمی سے 3.91 ارب ڈالر ہوگئے جب کہ کمرشل بینکوں کے ذخائر 3 لاکھ ڈالر اضافے سے 5.42 ارب ڈالر رہے۔

کاروباری ہفتے کے آخری روز کا آغاز میں ہی ڈالر کی قیمت میں معمولی اضافہ ہوا ہےملکی تبادلہ منڈیوں میں 10 پیسے اضافے کے بعد ڈالر کی خرید و فروخت 286 روپے 91 پیسے میں جاری ہے۔گزشتہ روز انٹر بینک میں ڈالر کا ملا جلا رجحان رہا جب کہ اوپن مارکیٹ میں امریکی کرنسی کے بھاؤ میں 5 روپے کا اضافہ ہوا۔انٹر بینک میں 7 پیسے اضافے سے ڈالر کی قیمت 286 روپے 81 پیسے جب کہ اوپن مارکیٹ میں 5 مہنگا ہو کر ڈالر 305 روپے پر آگیا تھا۔دوسری جانب پاکستان اسٹاک ایکس چینج میں کل کے مقابلے آج مثبت رجحان دیکھا رہا ہے، 100 انڈیکس 200 پوائنٹس اضافے سے 41 ہزار 900 ہوگیا ہے۔

عالمی تحقیقاتی ادارے نے کراچی کو دنیا کا سستا ترین شہر قراردے دیا، سروے کے مطابق کراچی میں خوراک اور رہائش کافی سستی ہے۔

تفصیلات کے مطابق سافٹ ویئر بنانے والی کمپنی انٹرنیشنل کی کاسٹ آف لونگ رینکنگ کی رپورٹ نے سروے رپورٹ جاری کردی۔

سروے میں ایک سو تینتس ممالک کےشہروں کی درجہ بندی کی گئی، سروے میں،رہائشی،خوراک، تعلیم ، صحت اور دیگر عوامل کو مدنظر رکھا گیا ہے۔

سالانہ رپورٹ میں دنیا کے دوسو سات شہروں میں غیر ملکیوں کو درپیش اخراجات کا موازنہ کیا گیا۔

رپورٹ میں دنیا کا سب سے سستا ترین شہر وینزویلا کا شہر کا راکس ہے جبکہ سستے شہروں میں شام،بھارت اورازبکستان کے شہر شامل ہیں۔

ای سی اے کی رپورٹ کے مطابق دنیا کے غریب پرور شہروں میں کراچی شہر کا نمبر سب سے آخری ہے، شہروں کی درجہ بند تارکین وطن کے اخراجات کو مدِ نظر رکھ کر کی گئی ہے۔

عالمی تحقیقاتی ادارے کا کہنا تھا کہ کراچی کا شمار دنیا کے سستےترین شہروں میں ہوتا ہے، سروےکے مطابق کراچی میں خوراک اور رہائش کافی سستی ہے۔

سروے میں بتایا گیا کراچی میں ایک کلو ڈبل روٹی کی قیمت ایک ڈالر چھیالیس سینٹ ہے، یہ ہی ڈبل روٹی پیرس میں پانچ ڈالر چھیاسٹھ سینٹ کی پڑتی ہے۔

مہنگائی کے حوالے سے پہلے نمبر پرسنگاپور ہے، جو گزشتہ سال بھی ایسی پوزیشن پر تھا جبکہ مہنگے ترین شہروں میں پیرس،ہانگ کانگ ، نیو یارک ، لاس اینجلس اور وساکا شامل ہیں۔

نیویارک کو دنیا کا سب سے مہنگا ترین شہر قرار دیا گیا اور ہانگ کانگ چار سال بعد پہلے سے دوسرے نمبر پر آگیا جبکہ جینیوا تیسرے اور لندن کا چوتھا نمبر ہے۔

کراچی : شارع فیصل پر ایمبیسی ہوٹل کے قریب فائرنگ کے نتیجے میں 4 افراد زخمی ہوگئے ، پولیس کا کہنا ہے کہ ابتدائی طور پر واقعہ ڈکیتی مزاحمت کا لگتا ہے۔

تفصیلات کے مطابق کراچی کے علاقے شارع فیصل پر ایمبیسی ہوٹل کے قریب فائرنگ کا واقعہ پیش آیا ، جس کے نتیجے میں 4 افراد زخمی ہوگئے۔

پولیس نے بتایا کہ فائرنگ وین پر کی گئی، وین پر گولیوں کے نشانات دیکھے جا سکتے ہیں تاہم زخمیوں کو اسپتال منتقل کردیا گیا ہے۔

پولیس کا کہنا تھا کہ ابتدائی طور پر واقعہ ڈکیتی مزاحمت کا لگتا ہے، کیش وین پر فائرنگ کی گئی، جس میں 2 سیکیورٹی گارڈ زخمی ہوئے۔

حکام کے مطابق واردات میں ملزمان نے کیش وین سے رقم لوٹی تاہم واقعے کی مزید تحقیقات جاری ہے۔