Category کھیل

لاہور:گورنر پنجاب محمد بلیغ الرحمن سے چیئرمین پاکستان کرکٹ بورڈ مینجمنٹ کمیٹی چوہدری محمد ذکاء اشرف نے ملاقات کی ۔ اس موقع پر کرکٹ کی بہتری کے حوالے سے بات چیت کی گئی ۔ گورنر پنجاب نے ذکاء اشرف کو چیئرمین پی سی بی مینجمنٹ کمیٹی کا عہدہ سنبھالنے پر مبارکباد دی اور نیک خواہشات کا اظہار کرتے ہوئے کہا کہ امید ہے آپ کرکٹ کے فروغ کے لیے اپنی بہترین صلاحتیں بروئے کار لائیں گے۔ چوہدری محمد ِذکا اشرف نے کرکٹ بورڈ کے معاملات بہتر طریقے سے چلانے کے عزم کا اظہار کیا ۔ چیئرمین پی سی بی مینجمنٹ کمیٹی نے گورنر پنجاب کو ایشیا کپ کے بارے میں بھی بریف کیا۔ انہوں نے کہا کہ 2008ء کے بعد 15 سال بعد ایشیا کپ دوبارہ پاکستان میں منعقد ہونے جا رہا ہے۔ایشیا کپ کے چار میچز پاکستان میں منعقد ہوں گے۔گورنر پنجاب نے کہا کہ پاکستان میں کرکٹ کے انٹرنیشنل ایونٹس کا انعقاد خوش آئند ہے۔

باجوڑ:باجوڑ میں تین روزہ بین الاضلاعی سپیشل پرسنزامن وہیل چیئر کرکٹ کپ ٹورنامنٹ کا انعقاد، دیر، باجوڑ، مردان، بنوں، سوات اور تخت بھائی کے خصوصی کرکٹرز کی ٹیموں کی شرکت ، فائنل مقابلے کے بعد رنگا رنگ اختتامی تقریب ، خصوصی افراد کیلئے میوزیکل نائٹ کا بھی اہتمام کیا گیا ، علاقائی فنکاروں نے فن کا مظاہرہ کیا۔تین روزہ بین الاضلاعی سپیشل پرسنزامن وہیل چیئر کرکٹ کپ ٹورنامنٹ کا فائنل میچ اور اختتامی تقریب باجوڑ سپورٹس کمپلیکس میں منعقد ہوئی، اختتامی تقریب میں ضلعی انتظامیہ اور سیکیورٹی فورسز کے اعلی حکام، خصوصی افراد، آفیشلز اور سپورٹس ایسوسی ایشن کے عہدیداران اور بڑی تعداد میں علاقہ کے نوجوانوں نے شرکت کی، تین روزہ ٹورنامنٹ میں دیر، باجوڑ، مردان، بنوں، سوات اور تخت بھائی کی خصوصی پرسنز کی ٹیموں نے حصہ لیا، ٹیموں کے مابین وہیل چیئر ریس اور ہینڈ ریسلنگ کے مقابلے بھی منعقد ہوئے، مہمان خصوصی نے اعلی کارکردگی دکھانے والے کھلاڑیوں اور رنراپ اور فاتح ٹیموں میں ٹرافیاں اور نقد انعامات تقسیم کیے، خصوصی افراد کیلئے میوزیکل نائٹ کا بھی اہتمام کیا گیا ، جس میں علاقائی فنکاروں نے فن کا مظاہرہ کیا، خصوصی افراد نے ٹورنامنٹ کے انعقاد پر فرنٹیئر کور نارتھ کا شکریہ ادا کرتے ہوئے کہا کہ اس طرح کے ٹورنامنٹ مستقبل میں بھی منعقد کئے جائیں تاکہ خصوصی افراد کی حوصلہ افزائی کی جا سکے۔

ریاض:انگلش فٹبال کلب لیور پول کے کھلاڑی جورڈن ہینڈرسن نے سعودی عرب کے فٹبال کلب الاتفاق میں شامل ہوگئے۔عرب میڈیا کے مطابق سعودی فٹبال کلب الاتفاق کی جانب سے انگلش فٹ بالر جورڈن ہینڈرسن کو کلب میں شمولیت کی پیشکش کی گئی جسے انہوں نے قبول کرلیا جس کے بعد وہ سعودی فٹبال کلب میں شامل ہونے والے ایک اور بڑے اسٹار ہیں۔ میڈیا رپورٹس کے مطابق جورڈن ہینڈرسن نے الاتفاق میں شمولیت کے لیے فی الحال ’زبانی معاہدہ‘ کیا ہے تاہم بتایا جارہا ہے کہ جورڈن کے معاوضے کے حوالے سے بات چیت جاری ہے اور انہیں ہر ہفتے 80 ہزار ڈالر ادا کیے جائیں گے۔اس سے قبل الاتفاق کلب نے انگلینڈ اور لیورپول کے سابق مڈل فیلڈر اسٹیون جیرارڈ کو کوچ مقرر کیا ہے جس کا اعلان کلب کی جانب سے ٹوئٹر پر کیا گیا تھا۔

بنکاک :ایشین چیمپئن شپ بنکاک میں قومی ایتھلیٹ شجرعباس نے سومیٹرریس کے سیمی فائنلزکے لئے کوالیفائی کرلیا۔شجرعباس نے سومیٹر ریس کا دورانیہ 10.37 سیکنڈز میں طے کیا،قومی ایتھلیٹ نے اپنے قومی ریکارڈ کو بھی بہتر کرلیا۔ اس سے قبل شجرعباس کا قومی ریکارڈ 10.38 تھا،ایشین چیمپئن شپ 2023 کے مقابلے بنکاک میں جاری ہیں۔

لاہور:پاکستان کرکٹ بورڈ (پی سی بی) نے مالی سال 24-2023 کی پہلی سہ ماہی کیبجٹ کی منظوری دے دی۔پی سی بی ذرائع کے مطابق باقاعدہ بورڈ الیکشنز نہ ہونے پر سال کے بجٹ کی منظوری نہیں دی گئی جب کہ معاملات چلانے کے لیے سہ ماہی بجٹ کی منظوری دی گئی ہے۔ذرائع کا بتانا ہے کہ تمام ڈپارٹمنٹس کو 3 ماہ کے بجٹ کے حساب سے منصوبہ بندی کی ہدایت کی گئی ہے، تاہم قومی کرکٹرزکے سینٹرل کنٹریکٹ میں بھی ایک ماہ کی توسیع کی گئی ہے۔

اسلام آباد:چیئر مین پی سی بی برائے مینجمنٹ کمیٹی ذکاء اشرف نے پاکستان نے بورڈ اف کرکٹ کنٹرول ان انڈیا (بی سی سی ائی) کے سیکرٹری جے شاہ کو ایشیا کپ میں پاکستان آنے کی دعوت دی جسے انہوں نے قبول کر لیا۔پاکستان کرکٹ بورڈ کے چیئر مین برائے مینجمنٹ کمیٹی اور بی سی سی ا?ی کے سیکرٹری جے شاہ کے درمیان جنوبی افریقا کے شہر ڈربن میں اہم ملاقات ہوئی۔ ملاقات میں دوطرفہ سیریز سے متعلق امور پر بھی گفتگو کی گئی۔دونوں رہنماؤں کے درمیان ملاقات ڈربن میں ایک گھنٹہ تک جاری رہی، اس ملاقات کے دوران پاکستان اور سری لنکا میں ہونے والے ایشیا کپ اور بھارت میں ہونے والے ورلڈکپ سے متعلق اہم امور پر تبادلہ خیال کیا گیا۔

اسلام آباد:پاکستان کرکٹ بورڈ مینجمنٹ کمیٹی کے سربراہ ذکا اشرف کا قومی ٹیم کے کپتان بابر اعظم کو ٹیلیفون،، قومی ٹیم کے لیے نیک خواہشات کا اظہار کرتے ہوے توقع ظاہر کی کہ ٹیم دورہ سری لنکا اور ایشیا کپ میں پاکستان کے لئے کامیابیاں سمیٹے گی۔تفصیلات کے مطابق پاکستان کرکٹ ٹیم کی سری لنکا روانگی سے قبل چیئر مینجمنٹ کمیٹی ذکاء اشرف نے کپتان بابر اعظم کو ٹیلی فون کیا،ٹیلیفونک رابطہ میں کپتان بابر اعظم سے گفتگو کرتے ہوے ذکا اشرف نے کہا کہ پوری ٹیم کو میری طرف سے نیک خواہشات کا پیغام دیں،توقع ہے کہ ٹیم دورہ سری لنکا اور ایشیا کپ میں پاکستان کے لئے کامیابیاں سمیٹے گی۔ ذکاء اشرف نے ایشیا کپ سے متعلق بھی کپتان بابر اعظم سے گفتگو کی۔ کپتان بابر اعظم کی ذکاء اشرف کا چیئرمین مینجمنٹ کمیٹی کا عہدہ سنبھالنے پر مبارکباد دی اور کہا کہ آپ کے پچھلے دور میں بھی پاکستان نے ایشیا کپ جیتا تھا، انشاء اس بار بھی ایشیا کپ جیت کر پاکستان لائیں گے۔پاکستان ٹیم کو مزید اوپر لے جانے کے لیے کوئی کسر نہیں چھوڑیں گے۔پاکستان کی خاطر بھرپور توانائی کے ساتھ میدان میں اتریں گے۔

اسلام آباد: پاکستان اولمپک ایسوسی ایشن کے صدر لیفٹیننٹ جنرل (ر) سید عارف حسن اولمپک کونسل آف ایشیا کے دوبارہ نائب صدر منتخب ہوگئے۔تفصیلات کے مطابق اولمپک کونسل آف ایشیا کی جنرل کونسل کا اجلاس تھائی لینڈ کے شہر بینکاک میں منعقد ہواجس میں او سی اے سے منسلک 45 ممالک کے ممبران نے شرکت کی۔اجلاس میں شیخ طلال آل احمد آل جبر کو آئندہ چار سال کی مدت کیلئے اولمپک کونسل آف ایشیا کا صدر جبکہ پاکستان اولمپک ایسوسی ایشن کے صدر لیفٹیننٹ جنرل ر عارف حسن کو نائب صدر منتخب کیا گیا ہے۔جنرل کونسل اجلاس میں پاکستان اولمپک ایسوسی ایشن کے سیکرٹری خالد محمود نے بھی شرکت کی۔ دریں اثنا اولمپک فیملی، مختلف سپورٹس فیڈریشنز ، آرگنائزرز ، کھلاڑیوں اور آفیشلز نے لیفٹیننٹ جنرل (ر) سید عارف حسن کو اولمپک کونسل آف ایشیا کا دوبارہ نائب صدر منتخب ہونے پر مبارکباد دی ہے۔

لاہور : وزیراعظم شہباز شریف نے پاکستان کرکٹ ٹیم کے ورلڈ کپ میں شرکت کرنے سے متعلق فیصلے کیلئے ہائی پروفائل کمیٹی تشکیل دے دی، کمیٹی کی سربراہی وزیر خارجہ بلاول بھٹو کریں گے۔پاکستان آئی سی سی ورلڈ کپ میں شرکت کرے گا یا نہیں، کمیٹی اس حوالے سے بھارت میں ورلڈ کپ سے متعلق تمام امور پر سفارشارت مرتب کر کے وزیراعظم کو بھجوائے گی جو پی سی بی کے پیٹرن ان چیف ہیں۔کمیٹی کے سربراہ وزیر خارجہ بلاول بھٹو زرداری ہیں جبکہ اس کے دیگر ارکان میں وفاقی وزراء رانا ثناء اللہ، اعظم نذیر تارڑ، مریم اورنگزیب، احسان مزاری، اسعد محمود اورامین الحق شامل ہیں۔اس کے علاوہ قمرزمان کائرہ اور طارق فاطمی بھی کمیٹی کا حصہ ہوں گے، قومی سلامتی اداروں کے سربراہان اور سیکرٹری خارجہ کو بھی اس ہائی پروفائل کمیٹی میں شامل کیا گیا ہے۔ذرائع کا کہنا ہے کہ پاکستانی ٹیم کی شرکت سے متعلق سفارشارت مرتب کیے جانے کے بعد حتمی فیصلہ کیا جائے گا کہ اس بڑے ایونٹ میں کھیلا جائے گا یا نہیں۔واضح رہے کہ کرکٹ ورلڈ کپ کا آغاز 5 اکتوبر سے بھارت میں ہو رہا ہے، بڑے ایونٹ میں پاک بھارت کے درمیان ٹاکرا 15 اکتوبر کو احمد آباد میں شیڈول ہے ۔

اسلام آباد:قومی کرکٹر حارث رئوف کی شادی ،فاسٹ بائولر شادی کے بندھن میں بندھ گئے،بارات کی روانگی سے قبل بکروں کا صدقہ دیا گیا ۔حارث رئوف نے کالی شیروانی زیب تن کر رکھی ہے قومی کرکٹر کے ولیمے کی تقریب آج ہوگی حارث رؤف اسلام آباد پولیس کی سیکیورٹی میں بارات لے کر پہنچے۔حارث رؤف کو چند ماہ قبل اسلام آباد پولیس نے اعزازی ڈی ایس پی کا عہدہ بھی دیاتھا ۔حارث کا نکاح گزشتہ سال دسمبر میں ہوا تھا۔