Category کھیل

ممبئی :رواں سال بھارت میں ہونیوالے ورلڈ کپ کے شیڈول کا اعلان کردیا گیا ہے۔ایونٹ کا سب سے بڑا ٹاکر روایتی حریف پاکستان اور بھارت کے درمیان 15 اکتوبر کو بھارت کے سب سے بڑے احمد آباد اسٹیڈیم میں ہوگا ۔ کرکٹ ویب سائٹ کی رپورٹ کے مطابق ٹورنامنٹ کا پہلا میچ 2019 کی ورلڈ کپ فائنلسٹ ٹیموں دفاعی چیمپیئن انگلینڈ اور نیوزی لینڈ کے درمیان پانچ جون کو کھیلا جائے گا جبکہ ایونٹ کا میزبان بھارت اپنا پہلا میچ تین دن بعد آسٹریلیا کے خلاف کھیلے گا۔بورڈ آف کنٹرول فار کرکٹ ان انڈیا کی جانب سے ابتدائی طور پر ڈرافٹ کردہ اس شیڈول میں روایتی حریف پاکستان اور بھارت کے درمیان میچ 15 اکتوبر کو رکھا گیا ہے۔اس شیڈول کو انٹرنیشنل کرکٹ کونسل کو بھیجا گیا ہے اور حتمی شکل دینے سے قبل ایونٹ میں شرکت کرنے والے تمام رکن ممالک کو بھیجا جائے گا۔اس ڈرافٹ میں سیمی فائنل کے مقام کا فیصلہ ابھی نہیں کیا گیا جو ممکنہ طور پر 15 اور 16 نومبر کو کھیلا جائے گا جبکہ فائنل کی میزبانی 19 نومبر کو احمد آباد کا ایک لاکھ سے زائد گنجائش کا اسٹیڈیم کرے گا۔بھارت ایونٹ میں اپنے تمام راؤنڈ میچز 9 مقامات پر کھیلے گا جبکہ لیگ مرحلے میں پاکستان کے میچز پانچ مقامات پر کھیلے جائیں گے۔پاکستان کی ٹیم 6 اور 12 اکتوبر کو کوالیفائر ٹیموں کا احمد آباد میں سامنا کرے گی جس کے بعد 20 اکتوبر کو بنگلورو میں آسٹریلیا، چنئی میں 23 اکتوبر کو افغانستان اور 27 اکتوبر کو جنوبی افریقہ، بنگلہ دیش سے 21 اکتوبر کو کولکتہ، پانچ نومبر کو بنگلورو میں نیوزی لینڈ جبکہ 12 نومبر کو کولکتہ میں انگلینڈ کے مدمقابل ہو گی جو لیگ مرحلے کا آخری میچ بھی ہو گا۔ اس کے علاوہ ایونٹ میں کھیلے جانے والے دیگر اہم میچز میں نیوزی لینڈ اور آسٹریلیا کی ٹیمیں 29 اکتوبر کو دھرمشالا، آ سٹریلیا اور انگلینڈ 4 نومبر کو احمد آباد جبکہ نیوزی لینڈ اور جنوبی افریقہ یکم نومبر کو پونے میں آمنے سامنے ہوں گے۔ورلڈ کپ کے آغاز میں چار ماہ سے بھی کم کا عرصہ رہ گیا ہے لیکن اس کے باوجود حتمی شیڈول کا اعلان اب تک نہیں کیا گیا حالانکہ 2019 اور 2015 کے ورلڈ کپ شیڈول کا اعلان ایک سال قبل ہی کردیا گیا تھا۔

نئی دہلی : او ڑیسہ ٹرین حادثے میں ہلاک ہونے والوں کے لواحقین کے لیے حکومت کی جانب سے 17 لاکھ امدادی رقم کا اعلان کیا گیا ہے جس کی لالچ میں ایک خاتون نے اپنے زندہ شوہر کو مردہ ظاہر کردیا۔ میڈیا رپورٹ کے مطابق او ڑیشہ میں ٹرینوں کے تصادم میں 280 سے زائد افراد ہلاک ہوچکے ہیں جن کے لواحقین کے لیے وزارت ریلوے نے 10 لاکھ، صوبائی حکومت نے 5 لاکھ اور وزیراعظم آفس کی جانب سے 2 لاکھ روپے امداد کا اعلان کیا گیا ہے۔جسے حاصل کرنے کے لیے ایک خاتون گیتانجلی دتا نے شوہر کے زندہ ہونے کے باوجود خود کو بیوہ ظاہر کیا اور درخواست جمع کرائی کہ میرے شوہر ٹرین حادثے میں ہلاک ہوگئے۔اس بات کی اطلاع جیسے ہی شوہر بیجے دتا کو ملی اس نے بیوی کے خلاف کارروائی کا مطالبہ کرتے ہوئے کہا کہ میری موت کا جھوٹا دعویٰ کرکے عوام کا پیسہ
ہتھیانے کی کوشش کرنے پر بیوی کے خلاف سخت کارروائی کی جائے۔

بیجنگ:پیرس میں قائم اقتصادی تعاون و ترقی کی تنظیم نے 7 جون کو اپنی تازہ ترین عالمی اقتصادی آؤٹ لک رپورٹ جاری کی، جس میں ایک بار پھر 2023 کے لئے چین کی اقتصادی ترقی کی پیش گوئی کو 5.4 فیصد تک بڑھا دیا گیا۔ اس سے ایک روز قبل عالمی بینک نے بھی اپنی تازہ ترین گلوبل اکنامک آؤٹ لک رپورٹ جاری کی ،جس میں رواں سال کے لیے چین کی اقتصادی ترقی کی پیش گوئی 5.6 فیصد تک بڑھا دی گئی۔جمعرات کے روز چینی میڈ یا کے مطا بق عالمی بینک کی رپورٹ میں کہا گیا ہے کہ مشرقی ایشیا اور بحرالکاہل کی اقتصادی شرح نمو 2022 میں 3.5 فیصد سے بڑھ کر 2023 میں 5.5 فیصد ہونے کی توقع ہے، کیونکہ چین کی بحالی خطے کی دیگر معیشتوں کی سست روی کو دور کر رہی ہے۔رواں سال چین کی معیشت مضبوطی سے ترقی کر رہی ہے ، ریٹیل سیلز میں تیزی سے اضافہ ہوا ہے ، صنعتی پیداوار بڑھی ہے اور چین کی معیشت میں مضبوط بحالی نے علاقائی ترقی کو فروغ دیا ہے۔او ای سی ڈی کی رپورٹ میں یہ اندازہ بھِی لگایا گیا ہے کہ 2023 میں امریکی معیشت میں 1.6 فیصد اضافہ ہو گا، جبکہ ورلڈ بینک کی رپورٹ کے مطابق رواں سال امریکی معیشت کی شرح نمو 1.1 فیصد رہنے کی توقع ہے۔

کولکتہ: بھارتی کرکٹ بورڈ کے سابق اینٹی کرپشن چیف نے بھارتی بورڈ کو دنیا کا کرپٹ ترین بورڈ قرار دیتے ہوئے تمام کچا چٹھا دنیا کے سامنے کھول کے رکھ دیا ۔نیرج کمار جو بی سی سی آئی کے سابق اینٹی کرپشن چیف ہیں ان کا کہنا ہے کہ بھارتی کرکٹ بورڈ دنیا کا کرپٹ ترین بورڈ ہے جس نے کرپشن کے کئی ریکارڈ قائم کیے ہیں۔نیرج کمار کا کہنا ہے کہ انہوں نے بطور اینٹی کرپشن چیف بی سی سی آئی میں تین سال ذمے داری نبھائی۔ اس دوران آئی سی سی میں کرپشن کے 50 کیسز میں سے 47 کیس بھارت سے نکلے۔سابق چیف اینٹی کرپشن نے کہا کہ انگلینڈ، آسٹریلیااور دیگر بورڈز بھارت کو پیسہ دینے میں محتاط رہیں ساتھ ہی انہوں نے انٹرنیشنل کرکٹ کونسل سے بھی مطالبہ کیا کہ وہ ایسے بورڈز کو زیادہ منافع نہ دے جہاں کوئی احتساب نہیں ہوتا۔

بارسلونا:ارجنٹینا کے اسٹار فٹ بالر لیونل میسی نے سعودی فٹ بال کلب کی پرکشش آفر ٹھکرا کر امریکی کلب انٹر میامی میں شمولیت کا اعلان کیا ہے۔سٹار فٹ بالر لیونل میسی نے اعلان کیا ہے کہ وہ فٹ بال کلب پیرس سینٹ جرمین (پی ایس جی) چھوڑنے کے بعد میجر لیگ سوکر (ایم ایل ایس) کی ٹیم انٹر میامی کے ساتھ معاہدہ کر رہے ہیں۔میسی کے اعلان سے ان کی بارسلونا میں دوبارہ شمولیت یا سعودی عرب میں کھیلنے کے لیے بلاک بسٹر معاہدوں کی افواہوں نے دم توڑ دیا ہے اور میسی نے امریکہ کو اپنی اگلی منزل کے طور پر منتخب کیا ہے۔ارجنٹائن کے فارورڈ 35 سالہ میسی نے 2021 میں بارسلونا سے راہیں جدا کر لی تھیں جہاں انہوں نے اپنے کیریئر کا بیشتر حصہ گزارا تھا۔ اس کے بعد انہوں نے گذشتہ دو سیزن پیرس سینٹ جرمین کے لیے کھیلے اور ہفتے کو فرانسیسی کلب کے لیے اپنا آخری میچ
کھیل کر اسے بھی الوداع کہہ دیا۔ایم ایل ایس اور انٹر میامی نے سوشل میڈیا پر اس خبر کی تصدیق کی حالانکہ امریکن لیگ کے مطابق ’باقاعدہ معاہدے کو حتمی شکل دینے کے لیے ابھی بھی کافی کام باقی ہے۔‘

اسلام آباد : پاکستان فٹبال فیڈریشن کی نارملائزیشن کمیٹی کا انوکھا کارنامہ، ایشین گیمز کے میگا ایونٹ کیلئے ناملائزیشن کمیٹی قومی فٹبال ٹیم کی ایکریڈیشن کرانے میں ناکام ، پاکستان فٹبال ٹیم چین میں منعقد ہونیوالی ایشین گیمز کا حصہ نہیں ہوگی۔ تفصیلات کے مطابق رواں سا ستمبر میں چین میں کھیلی جانیوالی ایشین گیمز میں قومی فٹبال ٹیم کے26رکنی اسکواڈ نے شرکت کرنا تھی لیکن حیران کن طور پر پاکستان اولمپک ایسوسی ایشن کی یاد دھانی کے باوجود فٹبال فیڈریشن کی نارملائزیشن کمیٹی نے قومی فٹبال ٹیم کی ایشین گیمز کیلئے ایکریڈیشن کروانے میں دلچسپی ہی نہیں لی اور ڈیڈ لائن گزرنے پر مخدوش مالی مشکلات کا بہانہ بنا دیاگیا جس کے باعث قومی فٹبال ٹیم اب ایشین گیمز جیسے میگا ایونٹ میں شرکت سے محروم رہے گی۔

اسلام آباد : پاکستان کرکٹ ٹیم سلیکشن کمیٹی کے سابق چیئرمین محمد وسیم نے کہا ہے کہ شاداب خان ، محمد عامر سمیت کئی ایسے کرکٹرز ہیں جو چھوٹے چھوٹے علاقے سے محنت کرکے اوپر آئے اور دنیا میں ملک کا نام روشن کیا ، کرکٹ کی طرح تائیکوانڈو بھی نوجوانوں میں تیزی سے سے مقبول ہو رہا ہے ، کہوٹہ سے بہت سے کھلاڑیوں نے محنت کرکے بتایا کہ وہ کسی سے کم نہیں۔ ان خیالات کا اظہار انہوں نے پاکستان تائیکوانڈو فیڈریشن کے صدر اور کہوٹہ سے صوبائی اسمبلی کے امیدوار کرنل ر وسیم احمد جنجوعہ کے ہمراہ ارم پبلک سکول و کالج کہوٹہ میں منعقدہ تائیکوانڈو تقریب سے خطاب کرتے ہوئے کیا۔ سابق چیف سلیکٹر محمد وسیم نے کہاکہ پاکستان میں ٹیلنٹ کی کوئی کمی نہیں ہے ، بچوں کے تائیکوانڈو مقابلے دیکھ کر خوشی ہوئی اور یہ حوصلہ بھی ملا کہ کرکٹ کے ساتھ ساتھ دوسری کھیلوں میں بھی پاکستان کا نوجوان ٹیلنٹ اوپر آرہا ہے، اس طرح کی کھیل کو مقبول بنانے میں نوجوان کھلاڑیوں کا کردار اہم ہے ، سابق ٹیسٹ کرکٹ محمد وسیم کا مزید کہنا تھا کہ شاداب خان ، محمد عامر اور مجھ سمیت کئی ایسے کرکٹرز ہیں جو چھوٹے چھوٹے علاقے سے محنت کرکے اوپر آئے اور بین الاقوامی سطح پر ملک کا نام روشن کیا ، نوجوان کھلاڑی دل بھی محنت کریں اپنے کھیل میں ملک کو قوم کا نام روشن کریں۔ اس موقع پر کرنل ر وسیم جنجوعہ کا کہنا تھا کہ بچے کسی بھی ملک کا مستقبل ہوتے ہیں، ان بچوں نے جس شاندار انداز میں تائیکوانڈو کا مظاہرہ کیا ہے انہی بچوں میں سے کچھ بچے آگے چل کر اس کھیل میں پاکستان کا نام روشن کرینگے پاکستان تائیکوانڈو فیڈریشن باصلاحیت بچوں کو ہر ممکن سپورٹ فراہم کرے گی۔

اسلام آباد: ایشین گیمز کی تیاریوں اور شرکت کیلئے پاکستان سپورٹس بورڈ کے ڈائریکٹر جنرل شعیب کھوسو کی صدارت میں اعلی سطح کا اجلاس ہوا جس میں پاکستان دستے کو حتمی شکل دینے کیلئے سپورٹس فیڈریشنز کی تجاویز لی گئیں۔ تفصیلات کے مطابق اجلاس میں پاکستان اولمپک ایسوسی ایشن کے سیکرٹری جنرل خالد محمود، متعدد سپورٹس فیڈریشنز اور پاکستان سپورٹس بورڈ کے حکام نے شرکت کی۔ اجلاس میں19ستمبر سے چین میں کھیلی جانیوالی 19ویں ایشین گیمز میں شرکت کیلئے پاکستانی دستے کی تعداد کا جائزہ لیاگیاجبکہ پاکستان اولمپک ایسوسی ایشن کے سیکرٹری جنرل خالد محمود اور سپورٹس فیڈریشنز کے حکام نے گیمز سے متعلق اپنی ترجیحات سے پاکستان سپورٹس بورڈ کو آگاہ کیا۔ ذرائع کے مطابق مالی مشکلات کے باعث پاکستان سپورٹس بورڈ ایشین گیمز میں پاکستان کا دستہ 180افراد تک رکھنے پر غور کر رہا ہے جبکہ اجلاس کے شرکا نے تجویز دی ہے کہ پاکستان سپورٹس بورڈ ایشین گیمز میں ان کھیلوں کو بھرپور سپورٹ کریں
جن میں میڈلز آنے کی توقع ہے۔ اس ضمن میں ڈائریکٹر جنرل پاکستان سپورٹس بورڈ شعیب کھوسو کا کہنا تھا کہ پی ایس بی ایشین گیمز کے حوالے پی او اے اور سپورٹس فیڈریشنز کی تجاویز کا جائزہ لیگا اور ہماری کوشش ہوگی کہ گیمز میں میڈلز جتنے والی فیڈریشن کی ہر ممکن سپورٹ کی جاے۔ پاکستان سپورٹس بورڈ باصلاحیت کھلاڑیوں کو بھی بھرپورسپورٹ کرے گا تاکہ ایشین گیمز میں وہ ملک کا نام روشن کریں ۔

پشاور:ورلڈ کراٹے آرگنائزیشن ڈبلیو کے او جاپان کے زیراہتمام ورلڈ فل کنٹکٹ کراٹے ارگنائزیشن کے تعاون سے جاپان کے شہر ٹوکیو میں 13 ویں ورلڈ کراٹے ٹورنامنٹ کا انعقاد ہورہا ہے جس میں دنیا کے 103 ممالک سے ٹیمیں شرکت کریں گے پاکستان سے بہترین ٹیم کے انتخاب کی غرض سے پاکستان ہیڈ کوارٹر چاجون کو لاہور میں ٹرائلز لئے جارہے ہیں جس میں چاروں صوبوں سے اور ازاد کشمیر گلگت بلستان سے بہترین کھلاڑی شرکت کریں گے ،میڈیا باتیں کرتے ہوئے انٹر نیشنل ریفریی وسیکرٹری جنرل پاکستان فل کنٹکٹ کراٹے فیڈریشن ( شیھان ) صاحبزادہ الھادی نے بتایا کہ ٹرائلز میں پاکستان تمام علاقوں سے بہترین کھلاڑیوں کوموقع دیاجارہا ہے تاکہ ورلڈ سطح کے مقابلوں میں پاکستانی کھلاڑی بہتر کارکردگی کا مظاہرہ پیش کرسکیں ، پاکستان ٹیم کی قیادت ورلڈ کلاس ریفری محمد ارشد جان ، انٹر نیشنل ریفری ( سنسی) صاحبزادہ الھادی اور فرہاد شنواری کریں گے یہ تینوں ورلڈ کراٹے آرگنائزیشن جاپان کے پاکستان میں نمائندے ہیں ٹیم گیار ہ اکتوبر کو پاکستان سے جاپان کے لئے روانہ ہوگیْ

اسلام آباد:آسٹریا کی جوڈو اولمپیئن ایتھلیٹ سبرینا فلزموزر نے کہا ہے کہ پاکستان خوبصورت ملک ہے جہاں جوڈو کا بے پناہ ٹیلنٹ ہے، جوڈو اولمپیئن ایتھلیٹ کی حیثیت سے آج اسلام آباد سے کے ٹو کا سفر شروع کروں گی، پاکستان میں خواتین بھی جوڈو کھیل کی طرف راغب ہو رہی ہیں۔ گزشتہ روز یہاں پریس کانفرنس سے خطاب کرتے ہوئے سبرینا فلزموزر نے کہا پاکستان میں جوڈو کھیل کو مزید فروغ دینے کی ضرورت ہے۔میں پاکستان میں جوڈو سے منسلک خواتین ایتھلیٹس کی ہر طرح سے معاونت کروں گی۔جوڈو کھیل خواتین کو جسمانی طور پر مضبوط بھی بناتاہے،سبرینافلزموزر نے کہا یوکرین اور روس کے درمیان جنگ کے دوران جوڈو فار پیس مشن کامیاب رہا۔پاکستان میں قراقرم تک سائکلنگ کروں گی۔ٹورزم کوئی آسان شوق نہیں، متعدد انجریز کا سامنا کرنا پڑتاہے،سبرینافلزموزر کاکہناتھا پاکستان کے پسماندہ علاقوں پر جا کر جوڈو کھلاڑیوں کی تلاش کرنا خواب ہے۔جوڈو کھیل انسان کو نظم و ضبط سے ز ندگی بسرکرناسکھاتاہے۔ قراقرم جاتے ہوئے ر استوں میں جوڈو کھیل بھی بچوں کوسکھاناچاہتی ہوں۔پاکستان پہلی بار آئی ہوں، قراقرم کے بارے میں بچپن سے سنتی آئی ہوں۔ انہوں نے کہا پاکستان اور بھارت کا موسم، ٹریفک اور لوگ ایک طرح کے ہیں۔پاکستان آکر مجھے بہت اچھا لگا ، آسٹرین پلیئر سبرینا فلزموزر نے کہا یہ لمحات میرے لئے یاد گار ہے۔سائیکل پر کے ٹو کے سفر کا آغاز اتوار سے کروں گی۔امید ہے کے ٹوکیلئے میرا سفر یادگار ہوگا ۔پاکستان میں جوڈو کھیل کی ترقی کیلئے ہر ممکن تعاون کروں گی ۔دنیا میں امن کیلئے جوڈو فار پیس مشن شروع کیا ہے ۔ سبرینا فلزموزر نے کہا کے ٹو کے سفر کے آغاز کیلئے بہت پرجوش ہوں۔جولائی کے آخر تک کے ٹو مشن پورا کرنے کیلئے پرامید ہوں ۔