Category تعلیم

اسلام آباد :اسلامیہ یونیورسٹی کے طلبہ اور فیکلٹی ممبران کو مبینہ ہراساں کرنے پر پیشرفت ہوئی ہے۔ تفصیلات کے مطابق اسلامیہ یونیورسٹی بہاولپور کے طلبہ اور فیکلٹی ممبران کو مبینہ ہراساں کرنے کے معاملے پر ہائیر ایجوکیشن کمیشن نے فیکٹ فائنڈنگ کمیٹی تشکیل دے دی ہے۔ کمیٹی میں پرو وائس چانسلرز بہاؤالدین زکریا یونیورسٹی ملتان اور ریکٹر نیشنل یونیورسٹی آف ٹیکنالوجی شامل ہیں۔ریکٹر امپیریل کالج آف بزنس اسٹڈیز کی پروفیسر ڈاکٹر طاہرہ عزیز مغل،مشیر پی اینڈ ڈی اینڈ فنانس،ایچ ای سی رکن ڈاکٹر ایم مظہر سعید بھی کمیٹی کا حصہ ہیں۔ کمیٹی میں شامل تمام افراد کے نوٹیفیکشن اور رکن کمیٹی کے ٹرمز کا ریفرنس بھی جاری کر دئیے گئے۔

لاہور :ایک سال سے تنخواہوں سے محروم انصاف سکولوں میں پڑھانے والے اساتذہ کی سنی گئی، محکمہ خزانہ پنجاب نے لاہور سمیت صوبے بھر کے انصاف سکولوں کے لیے 1ارب 68کروڑ روپے کے فنڈز جاری کر دیئے ہیں بتایا گیا ہے کہ مذکرہ فنڈز انصاف سکولوں کے اساتذہ کی تنخواہوں اور انتظامی اخراجات کی ادائیگی کے لیے جاری کیے گئے ہیں۔لاہور میں انصاف سکولوں کو تنخواہوں کی ادائیگی کیلئے ایک کروڑ نوے لاکھ روپے جاری کئے گئے ہیں۔ اس طرح ملتان کیلئے 4 کروڑ تیس لاکھ روپے ،فیصل آباد کیلئے 5 کروڑ چالیس لاکھ روپے ،ٹوبہ ٹیک سنگھ کیلئے 6 کروڑ ستر لاکھ ،راولپنڈی کیلئے 1 کروڑ بیس لاکھ روپے ،جھنگ کیلئے 9 کروڑ اور حافظ آباد کیلئے 3 کروڑ ساٹھ لاکھ روپے ،جہلم کیلئے 4 کروڑ اور چنیوٹ کیلئے 4 کروڑ چالیس لاکھ روپے جاری،اٹک کیلئے 40 کروڑ اوربہاولنگر کیلئے 7 کروڑ پچاس لاکھ روپے ،چکوال کیلئے 80 لاکھ اوربہاولپور کیلئے3 کروڑ ساٹھ لاکھ روپے ،سیالکوٹ کیلئے5 کروڑ اور وہاڑی کیلئے 6 کروڑ ستر لاکھ روپے جاری کر دیئے گئے ہیں۔ بتایا گیا ہے کہ مذکورہ فنڈز صرف انصاف سکولوں کے اساتذہ کی تنخواہوں کی ادائیگی پر خرچ ہوسکیں گے۔پنجاب بھر میں انصاف سکولوں کی تعداد 7 ہزار اور لاہور میں 108 ہے،مذکورہ سکولوں میں پڑھانے والے اساتذہ کی تعداد دس ہزار ہے۔

پشاور:خیبر پختونخوا کے تمام بورڈز کا آنے والے امتحانات کے حوالے سے جائزہ اجلاس جمعرات کے روز سول سیکرٹریٹ پشاور میں نگراںوزیر اعلی خیبر پختونخوا کے مشیر برائے ابتدائی و ثانوی تعلیم رحمت سلام خٹک کی زیر صدارت منعقد ہوا۔ اجلاس میں صوبے کے تمام تعلیمی بورڈز کے سربراہان کے ساتھ ساتھ محکمہ ابتدائی و ثانوی تعلیم کے آفسران نے بھی شرکت کی۔اجلاس میں آنے والے میٹرک اور انٹر کے امتحانات کے حوالے سے تیاریوں کا تفصیلی جائزہ لیا گیا۔ تمام تعلیمی بورڈز کے سربراہان نے اپنے اپنے متعلقہ اداروںکے امتحانات کے انعقاد کے حوالے سے جامع بریفنگ دی۔اجلاس سے خطاب کرتے ہوئے نگراں مشیر تعلیم رحمت سلام خٹک نے ہدایت کی کہ حالیہ آنے والے امتحانات میں نقل کی روک تھام کیلئے ٹھوس اقدامات اٹھائے جائیں تاکہ اس ناسور پر زیادہ سے زیادہ کنٹرول حاصل کروایا جائے اور قابل اور ہونہار طلبہ کی محنت ضائع نہ ہو اور انہیں اپنی محنت کا مکمل صلہ مل سکے۔رحمت سلام خٹک نے کہا کہ بورڈز کو درپیش مسائل خصوصاً دوردراز اور پرخطر امتحانی مراکز کی سیکورٹی کیلئے متعلقہ اضلاع کے کمشنر، ڈپٹی کمشنر اور ڈسٹرکٹ پولیس آفیسر سے رجوع کیا جائے گا تاکہ وہ امتحانی مراکز کے اندر اور آس پاس سیکورٹی کو مکمل طور پر یقینی بنائیں اور ہر طرح کے ناخوشگوار واقعات سے بچا جاسکے۔نگراں مشیر تعلیم نے ہدایت کی کہ امتحانات کے دوران میں طلبہ کی حاضری، امتحانی حالات میں غیر معمولی افراد کے داخلے، پرچے کے دوران ہالوں کے اندر بچوں کیلئے ضروری سہولیات کے ساتھ ساتھ دیگر اہم امور پربھی مکمل چیک اپ رکھا جائے تاکہ ایک خوشگوار اور بہترین ماحول میں امتحانات کا انعقاد ممکن بنایا جاسکے۔رحمت سلام خٹک نے کہا کہ امسال تمام تعلیمی بورڈز کے نتائج کا اعلان ایک ہی دن کروایا جائے گا۔ انہوں نے مزید کہا کہ اس حوالے سے تمام تعلیمی بورڈز اپنے اپنے انتظامات مکمل کرنے پر کام شروع کردیں۔

جڑانوالہ :بورڈ آف انٹرمیڈیٹ اینڈ سکینڈری ایجوکیشن کے زیراہتمام میٹرک سیکنڈایئر کے سالانہ امتحانات یکم اپریل سے شروع ہوں گے، فیصل آباد کے تعلیمی بورڈ نے امتحانات میں شرکت کرنے والے امیدواروں کو عارضی ڈیٹ شیٹ جاری کر دی ہے۔کلاس نہم کے سالانہ امتحانات 16 اپریل اور انٹرمیڈیٹ کے سالانہ امتحانات مئی میں شروع ہوں گے

جڑانوالہ:محکمہ تعلیم پنجاب نے فنڈز جاری کئے بغیر سرکاری سکولوں میں سکول بیس اسیسمنٹ کروانے کا حکم دے دیا۔جڑانوالہ کے سرکاری سکولوں میں زیرتعلیم 8 لاکھ بچوں سے پیپر لینا مشکل ہوگیا۔ سالانہ امتحانات لینے پر کم سے کم پانچ کروڑ روپے سوالیہ پرچوں کی پرنٹنگ یا فوٹو کاپی پر لگیں گے۔ سکول سربراہان اور اساتذہ تنظیموں نے پیپروں کے انعقاد کو یقینی بنانے کیلئے فنڈز کی فراہمی کا مطالبہ کردیا۔ پنجاب ٹیچر یونین کے صدر رانا لیاقت کہتے ہیں سکول بیس اسیسمنٹ کے لیے محکمہ تعلیم سرکاری سکول کو اضافی فنڈز فراہم کرے۔ اس وقت ایک فوٹو کاپی 6 سے 7 روپے میں ہو رہی ہے۔ سکول بیس اسیسمنٹ کا پیپر 5 سے 7 صفحات پر مشتمل ہوتا ہے۔ پچھلے سال بھی سکول بیس اسیسمنٹ کے امتحان پر کروڑوں روپے خرچ ہوئے۔ سکول بیس اسسمنٹ سالانہ امتحان کے لیے سکولوں کو کوئی اضافی فنڈز یا گرانٹ جاری نہیں کی گئی۔ مہنگائی کی وجہ سے نان سیلری بجٹ سے تو یوٹیلیٹی بلز کی ادائیگی بھی پوری طرح ممکن نہیں۔ سکول بیس اسسمنٹ کے لئے سرکاری سکولوں کو فی الفور اضافی فنڈز دیئے جائیں۔

اسلام آباد:علامہ اقبال اوپن یونیورسٹی کے سمسٹر بہار 2023ء کے پہلے مرحلے میں پیش کئے گئے بی ایس، ایم ایس/ایم فل اور پی ایچ ڈی پروگرامز کے داخلوں کی بدھ 15فروری آخری تاریخ ہے جبکہ میٹرک، ایف اے اور آئی کام کے داخلے 21فروری تک جاری رہیں گے۔ یونیورسٹی نے پی ایچ ڈی، ایم ایس اور ایم فل پروگراموں میں داخلے کے لئے انٹری ٹیسٹ کا شیڈول بھی جاری کیا ہے، اِن پروگراموں کے انٹری ٹیسٹ یونیورسٹی کے مین کیمپس کے اکیڈمک کمپلیکس میں 17تا22فروری منعقد ہونگے۔انٹری ٹیسٹ کا شیڈول یونیورسٹی کی ویب سائٹ پر دستیاب ہے۔علاوہ ازیں یونیورسٹی کے سمسٹر خزاں 2022ء کے میٹرک، ایف اے، ایف ایس سی اور آئی کام پروگراموں کے فائنل امتحانات ملک بھر میں ایک ساتھ یکم مارچ سے شروع ہوں گے جو 3۔اپریل تک جاری رہیں گے۔ کنٹرولر امتحانات کے مطابق یونیورسٹی نے تمام تر تیاریاں مکمل کرلی ہیں، ڈیٹ شیٹ یونیورسٹی کی ویب سائٹ پر جبکہ رول نمبر سلپس طلبہ کے سی ایم ایس اکاؤنٹ پراپ لوڈ کردی گئی ہیں۔ وائس چانسلر، پروفیسر ڈاکٹر ناصر محمودنے طلبہ کورہائش گاہوں کے قریب ترین مقامات پر امتحانی سہولت فراہم کی ہدایات دی تھی جس کی بنیاد پر ملک بھر میں امتحانی مراکز قائم کردئیے گئے ہیں جن میں طلبہ کے لئے بنیادی سہولتوں کا خیال رکھا جائے گا۔امتحانات میں نقل کے رجحان کے خاتمہ کے لئے بھی ہر ممکن کوشش کی جارہی ہے۔خصوصی ٹیمیں تشکیل دے دی گئی ہیں جو امتحانی مراکز کے سرپرائز وزٹ کریں گے

جڑانوالہ:فیصل آباد تعلیمی بورڈ میں طالبہ کے پیپر میں ٹمپرنگ کا معاملہ، دونوں فریقین کو طلب کرنے اور پیپر کا جائزہ لینے کے بعد ڈسپلن کمیٹی نے تعلیمی بورڈ انتظامیہ سے درخواست گزار طالبہ کے تمام پیپرز کا ریکارڈ طلب کرلیا۔ ری چیکنگ کے دوران انگلش کے پیپر میں ٹمپرنگ پائی گئی تھی۔ معروضی پیپر کے جوابات میں ایک سے زائد جگہوں پر دو دو آپشن پر جوابات سامنے آئے تھے۔ طالبہ شان زہرا نے درخواست میں ڈپٹی سپرنٹنڈنٹ فوزیہ ساجد پر پیپروں میں ٹمپرنگ کا الزام لگایا تھا۔ انگلش کے پیپر کی ری چیکنگ کروانے پر طالبہ کو پیپر میں ریموور سے خواب ختم کرنے اور معروضی حصہ میں ٹمپرنگ کئے جانے کی نشاندہی ہوئی تھی۔ باقی پیپروں میں بھی ٹمپرنگ سامنے آنے پر ذمہ داروں کا تعین کیا جائے گا۔

جڑانوالہ :بورڈ آف انٹرمیڈیٹ اینڈ سیکنڈری ایجوکیشن فیصل آباد نے میٹرک کے سالانہ امتحان یکم اپریل 2023ء کو کروانے کا اعلان کردیا میٹرک کے سالانہ امتحان میں شمولیت کرنیوالے امیدواروں کی داخلہ فیس کے شیڈول کے مطابق کلاس نہم کے پارٹ ون سائنس گروپ کے ریگولرطلبہ وطالبات کی فیس 1230اور پرائیویٹ امیدواروں کی فیس 1440روپے جبکہ آرٹس گروپ سے ریگولرامیدوار کی فیس 1180روپے اور پرائیویٹ امیدواروں کیلئے فیس 1380روپے مقرر کی گئی ہے جو کہ 18جنوری تک جمع کروائی جا سکتی ہے جبکہ فیس 30جنوری تک ڈبل اور7فروری تک تین گنا فیس کیساتھ داخلہ جمع کروایا جا سکے گا۔اس طرح پارٹ دوئم دہم کلاس کے سائنس گروپ میں ریگولرطلبہ وطالبات کی فیس 2080روپے اورپرائیویٹ امیدوارکی فیس 2130روپے‘آرٹس گروپ کے ریگولرامیدوار2030روپے اورپرائیویٹ امیدوارکی فیس 2080روپے ہوگی۔کمپوزٹ نہم اوردہم کے امتحان دینے والے سائنس گروپ کے ریگولرامیدوار اورپرائیویٹ امیدواروں کیلئے فیس 2730روپے اور آرٹس گروپ کے امیدواروں کی فیس 2630روپے ہوگی۔علاوہ ازیں تعلیمی بورڈ سے الحاق شدہ ادارہ جات جن کی سنگل فیس گورنمنٹ آف پنجاب کی طرف سے معاف کی گئی ہے ان کے ریگولرامیدواران سے سنگل فیس کلاس نہم کیلئے 530روپے نہم ری ایڈمشن 1230روپے‘کلاس دہم کیلئے 1380روپے اور کمپوزٹ نہم اوردہم کے امیدواروں کی فیس 2180روپے ہوگی۔

فیصل آباد: زرعی یونیورسٹی فیصل آباد میں انگلش ورک پروگرام میں داخلے کیلئے انٹری ٹیسٹ کا انعقاد کیا گیا۔ امریکی ڈیپارٹمنٹ آف سٹیٹ کے ریجنل انگلش لینگویج آفس کے اشتراک سے منعقد ہونے والے اس چھ ماہ کے کورس کے انٹری ٹیسٹ میں سینکڑوں طلبہ نے حصہ لیا ،اس کورس کے تحت طلبہ میں انگلش زبان کی مہارت اور ان کی کاروبار ی صلاحیتیں نکھاری جائیں گی۔ انگلش ورک پروگرام کو پسماندہ علاقوں سے تعلق رکھنے والے 17 سے25 سال کی عمر کے طلبہ کیلئے ترتیب دیا گیا۔ زرعی یونیورسٹی کے وائس پروفیسر ڈاکٹر اقرار احمد خاں نے متعلقہ عملے کو ہدایت کی ہے کہ انٹری ٹیسٹ کیلئے فل پروف انتظامات کو یقینی بنایا جائے جس میں داخلے کیلئے 3000 طلبہ نے اپنی درخواستیں جمع کروائیں تھیں ۔ مینجر انگلش ورک اور لائبریرین زرعی یونیورسٹی عمر فاروق نے کہا ہے کہ اس کورس میں داخلے کیلئے کامیاب ہونے والے طلبہ کو اس چھ ماہ کے کورس میں مفت تعلیم دی جائے گی۔ کمیونٹی کالج کے پرنسپل ڈاکٹر انجم ضیا ء نے بتایا کہ کامیاب ہونے والے طلبہ کیلئے وظیفے کا بھی اہتمام کیا گیا۔ اس موقع پر کوآرڈینیٹر کاشف شہباز بھی موجود تھے

کراچی: محکمہ تعلیم سندھ نے گھوسٹ اساتذہ کے خلاف اہم قدم اٹھاتے ہوئے 22 اساتذہ کو نوکری سے فارغ کردیا
سیکریٹری تعلیم نے 22 اساتذہ کو نوکری سے فارغ کرنے کا نوٹیفکیشن بھی جاری کر دیا ہے، محکمہ نے گھوسٹ اساتذہ کو اپنی صفائی میں بیان ریکارڈ کرنے کے لئے طلب کیا تھا۔رپورٹ کے مطابق اساتذہ مسلسل 8 ماہ سے اسکول سے غیر حاضر تھے، نوکری سے نکالے جانے والوں میں 10جونیئر اسکول ٹیچر،5 ہائیر اسکول ٹیچر اور دیگر شامل ہیں