Tag america

لیون:(نیٹ نیوز/ایمرا نیوز) فرانس کے شہر لیون میں یونیورسٹی کی عمارت میں دھماکے کے نتیجے میں 3 افراد زخمی ہوگئے۔خبر رساں ادارے رائٹرز کے مطابق دھماکا لیون شہر کے شمال میں واقع لا دووا کیمپس میں ہوا،جو ایک سائنس لائبریری ہے۔پولیس کے مطابق چھت پر تعمیراتی کام کے دوران ایک گیس کی بوتل میں دھماکا ہوا، جس کے نتیجے میں آگ لگ گئی۔سوشل میڈیا پر جاری ہونے والی دھماکے کی فوٹیج میں دیکھا جاسکتا ہے کہ آگ کا ایک گولہ آسمان کی جانب بلند ہوتا ہے، جس کے بعد عمارت کی چھت پر آگ لگ جاتی ہے۔

Now: Huge explosion and fire at one of the University of #Lyon's campuses. People are being urged to avoid the area. https://t.co/L5kNBrohjZ

— Benjamin Alvarez (@BenjAlvarez1) January 17, 2019

دھماکے کے بعد جائے وقوع کو خالی کروا دیا گیا جبکہ فائر فائٹرز موقع پر پہنچ گئے۔یونیورسٹی حکام نے خبر رساں ادارے ایسوسی ایٹڈ پریس (اے پی) سے بات کرتے ہوئے دھماکے کو ‘حادثاتی’ قرار دیا اور بتایا کہ یہ تعمیراتی کام کے دوران ہوا۔واضح رہے کہ چند دن قبل دارالحکومت پیرس کی ایک بیکری میں ہونے والے دھماکے کے نتیجے میں 4 افراد ہلاک اور متعدد زخمی ہوگئے تھے۔

اسلام آباد(نیٹ نیوز/ایمرا نیوز) وزیراعظم عمران خان نے پارلیمنٹ کے اجلاسوں میں شریک ہونے کا فیصلہ کر لیا۔ذرائع کے مطابق وزیراعظم کو پارلیمنٹ اجلاسوں میں باقاعدگی سے شرکت کے لئے قائمہ کمیٹیوں کی تکمیل کا انتظار تھا، وزیر اعظم عمران خان آئندہ ہفتے سے پارلیمنٹ کے اجلاس میں شریک ہوں گے۔ذرائع کا کہنا ہے کہ وزیر اعظم عمران خان بدھ کومنی بجٹ پیش کرنےکےموقع پر پارلیمنٹ آئیں گے، جبکہ وزیر خزانہ اسدعمر کی منی بجٹ پر تقریرکےموقع پروزیر اعظم پارلیمنٹ میں موجود ہوں گے۔دوسری جانب پارلیمانی و قومی اسمبلی کی قائمہ کمیٹیوں کی تشکیل کے لئے حکومت اور اپوزیشن کے مذاکرات مکمل ہوگئے ہیں اور قائمہ کمیٹیوں کی تشکیل کا فارمولا طے پا گیا ہے۔اگلے ہفتے کمیٹیوں کے قیام سے متعلق قومی اسمبلی میں تحریک پیش ہوگی۔تحریک منظور ہونے کے بعد کمیٹیوں کےچیئرمینوں کا انتخاب شروع ہوجائے گا۔مجموعی طور پر47 پارلیمانی و قائمہ کمیٹیاں قائم کی جائیں گی۔ پارلیمانی کمیٹیوں کی سربراہی حکومتی اراکین کے پاس رہے گی۔قومی اسمبلی کی 40 میں سے 19 کمیٹیاں اپوزیشن کو 21 حکومت کوملنے کاامکان ہے۔پیپلز پارٹی کے سینئر رہنما خورشید شاہ کہتے ہیں بلاول بھٹوزرداری قائمہ کمیٹی کاحصہ ضرور ہوں گے۔

لاہور(نیٹ نیوز/ایمرا نیوز) سابق وزیر ریلوے اور مسلم لیگ نون کے رکن قومی اسمبلی خواجہ سعد رفیق کہتے ہیں کہ پہلے مجھےعمران خان سے بڑی محبت تھی، اب میں ان سے بہت ناراض ہوں۔خواجہ سعدرفیق کا قومی اسمبلی میں اظہار خیال کرتے ہوئے کہنا ہے کہ حکومت اپوزیشن کے اتحاد کو اپنے لیے خطرہ نہ سمجھے، آپ کے مینڈیٹ کو نہیں مانتے لیکن آپ کو گرانا نہیں چاہتے،ہم نہیں چاہتےکہ آپ کو گرانے کے چکر میں نظام کو کچھ ہو جائے۔انہوں نے کہاکہ اسپیکر اور ایوان کا شکر گزار ہوں کہ جنہوں نے بے پناہ دباؤ کے باوجود عوامی نمائندگی کا حق ادا کرنے کا موقع فراہم کیا ہے۔سعد رفیق نے کہاکہ 12 سال بعد جیل کی صورت میں بریک ملا، اب کھانا وقت پر کھاتا ہوں، سونے کا بھی وقت ملتا ہے، نیب والوں سے کہا ہے کہ میرے خلاف ریفرنس ضرور بنائیں، جتنا کچھ میرے خلاف کہا جا رہا ہے اس کا فیصلہ عدالت میں ہونا چاہیے۔انہوں نے کہا کہ میں سمجھتا ہوں کہ نون لیگ اور پی پی کو میثاق جمہوریت پی ٹی آئی اور دوسری جماعتوں کے سامنے بھی پیش کرنا چاہیے، یہاں محب وطن افراد کو غدار قرار دیا گیا، مجھے بتائیے کہ یہ غدار بناتا کون ہے؟جو جمہوریت یا قانون کی عمل داری مانگتا ہے وہ غدار، چور قرار پاتا ہے۔سعد رفیق نے کہا کہ ایوان کو بالادست بنانا ہے تو الزامات سے آگے نکلنا ہو گا، آپ ایک صوبے میں 5سال حکومت کر کے آئے ہیں، اب سنجیدگی اختیار کریں، آصف زرداری کے خلاف گھسیٹنے کی بات نہیں کرنا چاہیے تھی۔انہوں نے سوال کیا کہ کوئی طریقہ ہے وزرائے اعظم کو نکالنے کا، عمران خان کو بھی ایسے نہیں نکالنا چاہیے، طعنے بازی بند کیجیے، ملک آپ کے ہاتھوں میں لرز رہا ہے۔سعد رفیق نے یہ بھی کہا کہ جو پہلے زرداری صاحب، پھر مشرف صاحب کے ترجمان رہے، اب آپ کے ترجمان ہیں، آپ کے یہ ترجمان ہماری آپ سے لڑائی کرا رہے ہیں، حالانکہ آپ کے پاس پرویز خٹک جیسے سینئر رہنما بھی ہیں۔

روس(نیٹ نیوز/ایمرا نیوز) روسی جوڑے نے آکسیجن کے بغیر پانی کے اندر طویل ترین وقت کے لیے رقص کرکے ایک نیا ریکارڈ قائم کردیا ہے۔روسی رقاص جوڑے ’ میرینا کازنکوفا ‘اور’ دمیتری مالاسینکو ‘نے اٹلی میں واقع دنیا کے سب سے بڑے سوئمنگ پول میں اپنے فن کا مظاہرہ کیا ہے جس کی تصدیق گنیز بک آف ورلڈ ریکارڈ نے بھی کردی ہے۔

اس سوئمنگ پول کا نام وائے 40 ہے اور اس مظاہرے کو دیکھنے کے لیے وہاں کئی افراد بھی موجود تھے۔دونوں نے ایک تنے ہوئے رسے پر انتہائی مہارت سے اپنا فن دکھایا اور انہوں نے کسی قسم کا آکسیجن استعمال نہیں کیا تھا۔اس ریکارڈ کے بعد جوڑے نے بتایا کہ انہوں نے اس مظاہرے کے لیے نفسیاتی اور جسمانی مشق کی تھی ۔اس رقص کا اسکرپٹ بھی لکھا گیا تھا اور خاص موسیقی بھی ترتیب دی گئی تھیں۔2016 میں مرینا نے کسی بیرونی مدد کے بغیر پانی کی 154 میٹر گہرائی تک پہنچ کر اپنا ایک اور ریکارڈ قائم کیا تھا اور اب تک وہ 15 فلموں میں بھی کام کرچکی ہیں۔

لاہور(نیٹ نیوز/ایمرا نیوز) متحدہ عرب امارات کی فضائی کمپنی ایمیریٹس نے پاکستان میں فضائی آپریشنز میں واضح کمی کرنے کا اعلان کر دیا۔کمپنی کی جانب سے ایک ای میل کے ذریعے باخبر کیا گیا ہے کہ مسافروں کی عالمی ضروریات کو پورا کرنے کے لئےکچھ اہم تبدیلیاں کی گئی ہیں جس کے سبب پاکستان کے کئی اہم شہروں کے لیے پروازوں میں کمی کرنی پڑے گی۔کمپنی کی جانب سے اس تبدیلی کا اطلاق جون سے کیا جائے گا۔پاکستان بھر میں تبدیل کئے جانے والے شیڈول کے مطابق ایمیریٹس نے دبئی سے سیالکوٹ جانے والی پروازیں ختم کر دیں جبکہ دبئی سے پشاور جانے والی پروازیں اسی طرح فضائی آپریشن جاری رکھیں گی۔ایک ہفتے میں دبئی سے لاہور جانے والی10 پروازیں گھٹا کر 9 کر دی گئیں ہیں ۔ایک ہفتے میں دبئی سے کراچی جانے والی 35 پروازوں کو گھٹا کر 23 کر دیا گیا ہے جبکہ ہفتے بھر میں دبئی سے اسلام آباد جانے والی 11 پروازوں میں کمی کر کے 7 کر دی گئی ہیں۔

واشنگٹن:(نیٹ نیوز/ایمرا نیوز) ماہرین نے برسوں کی کوشش کے بعد چار کائناتی قوتوں میں سے ایک ’کمزور نیوکلیائی قوت‘ یا ویک نیوکلیئر فورس کی پیمائش میں کامیابی حاصل کی ہے۔ اس ضمن میں ماہرین دہائیوں سے کوشش کررہے تھے۔یہ نتائج اوک رِج نیشنل لیبارٹریز میں این ڈی پی گیما تجربات کے ذریعے انجام دیئے گئے ہیں جن کی نگراں پروفیسر ڈبلیو مائیکل سنو نے کی ہے جو انڈیانا یونیورسٹی بلومنگٹن کالج آف سائنسس میں پروفیسر بھی ہیں۔ وہ کہتے ہیں، ’ایٹموں کے اندر مرکزے (نیوکلیئس) میں موجود پروٹون اور نیوٹرون کے درمیان کمزور قوت کو ناپنا بہت اہم کام ہے۔ اس سے کائنات پر راج کرنے والی چار بنیادی قوتوں کو جاننے میں بہت مدد ملے گی۔‘‘فزکس کی رو سے مضبوط (اسٹرونگ) قوت، برقناطیسی (الیکٹرومیگنیٹک) قوت، کمزور (ویک نیوکلیئر) قوت، اور ثقل (گریوٹی) کی چاروں قوتوں سے ہی کائنات کا نظم و نسق چل رہا ہے۔ ان میں سے ایک بھی ختم ہوجائے تو زندگی اور کائنات دونوں کا وجود ختم ہوجائے گا۔ ہم جانتے ہیں کہ پروٹون اور نیوٹرون دیگر چھوٹے ذرات یعنی کوارکس سے مل کر بنتے ہیں اور اسٹرونگ فورس کوارکس کو مضبوطی سے باندھے رکھتی ہے جبکہ کمزور نیوکلیائی قوت، ایٹمی مرکزے میں نیوٹرون کو پروٹون میں بدلنے کی وجہ بنتی ہے جس کے نتیجے میں تابکاری (ریڈیو ایکٹیویٹی) کا عمل واقع ہوتا ہے۔اس تجربے میں کمزور نیوکلیائی قوت کو الگ کرکے اس کی پیمائش کی گئی تھی۔ اس کےلیے ایک پیچیدہ تجربہ کیا گیا جس میں این پی ڈی گیما نامی ایک خصوصی آلہ استعمال کیا گیا۔ اس میں انتہائی سرد نیوٹرونوں کے گھماؤ (اسپن) کو قابو کیا گیا۔ جب تمام نیوٹرونوں کا اسپن یا اینگیولر مومینٹم ایک سمت میں آگیا تو ان نیوٹرونوں کو مائع ہائیڈروجن میں موجود پروٹونوں سے ٹکرادیا گیا جس سے طاقتور گیما شعاعیں پیدا ہوئیں۔ اب ان گیما شعاعوں کی عددی قیمت کی بنیاد پر کمزور قوت کی پیمائش کی گئی ۔یعنی ماہرین نے نیوٹرون اور پروٹون کے گھماؤ کی بنیاد پر گیما شعاعوں اور ان کے تشاکلات (سمٹری) کی پیمائش کی۔اس تحقیق کی تفصیلات ہفت روزہ تحقیقی جریدے ’’نیچر‘‘ کے تازہ شمارے میں شائع ہوئی ہیں۔

ویت نام:(نیٹ نیوز/ایمرا نیوز) ہم جانتے ہیں کہ جونک (لیچ) دوسروں کے خون پر زندہ رہتی ہیں۔ لیکن ایک انوکھا واقعہ اس وقت پیش آیا جب ڈاکٹروں نے ایک خاتون کے حلق سے زندہ جونک برآمد کی ۔63 سالہ ویت نامی خاتون اپنے حلق میں بے آرامی اور کسی پھوڑے کی شکایت لے کر ہسپتال آئیں تو ڈاکٹروں نے ان کا معائنہ کیا تو وہ حیران رہ گئے کہ ان کے حلق کے ایک جانب 6 انچ لمبی جونک چپکی ہوئی ہے جو ان کا خون پی کر زندہ تھی۔

آنکھ، ناک اور حلق کے ڈاکٹروں نے ان کے حلق میں گوشت کا غیرمعمولی ٹکڑا دیکھا اور اسے فوری طور پر نکالا جو حقیقت میں ایک جونک تھی۔ہا گیانگ شہر کے ایک ڈاکٹر نگوین تان کا خیال ہے کہ خاتون نے کسی تالاب کا کنویں کا پانی پیا تھا جس میں بچہ جونک تھی اور وہ خاتون کے حلق میں جاکر چپک گئی۔ اس کے بعد خاتون نے سانس لینے میں دقت اور ناک بند ہونے کی شکایت کی اور جب یہ کیفیت مزید خراب ہوگئی تو وہ ہنگامی حالت میں ہسپتال پہنچیں۔ڈاکٹروں کے مطابق یہ ایک عجیب طبی واقعہ ہے۔ اگر خون پینے والی اس جونک کو بروقت نہ نکالا جاتا تو یہ یہ دردِ سر، حلق کی بندش اور یہاں تک کہ جان لیوا کیفیات کی شکار بھی ہوسکتی تھیں۔ تاہم اس سے قبل چین میں ایک شخص کے ناک میں تین ماہ سے چپکی جونک کو نکالا گیا تھا اور ایک خاتون کے جسم سے جونک برآمد کی گئی تھی۔

لندن:(نیٹ نیوز/ایمرا نیوز) برطانوی پارلیمان میں وزیراعظم ٹریزامے کے خلاف اپوزیشن کی جانب سے پیش کی گئی تحریک عدم اعتماد ناکام ہوگئی۔پارلیمان سے بریگزٹ معاہدہ منظور کرانے میں ناکامی کے بعد اپوزیشن لیبر پارٹی کے سربراہ جیریمی کوربن نے وزیراعظم ٹریزامے کے خلاف تحریک عدم اعتماد پیش کی جس پر ایوان میں رائے شماری کرائی گئی۔تحریک عدم اعتماد میں برطانوی وزیراعظم ٹریزامے کی حمایت میں 325 اور مخالفت میں 306 ووٹ آئے اور اس طرح ان کے خلاف تحریک عدم اعتماد 19 ووٹوں کے فرق سے ناکام ہوگئی۔اس سے قبل برطانوی دارالعوام میں بریگزٹ معاہدے پر ووٹنگ ہوئی جس کے دوران 202 اراکین نے حق میں جب کہ 432 نے مخالفت میں ووٹ دیا، یہاں تک کہ کنزرویٹو پارٹی کے تقریباً 118 ارکان نے حزب مخالف کے ساتھ مل کر اس معاہدے کے خلاف ووٹ دیا۔بریگزٹ معاہدے کی پارلیمان سے منظوری نہ ہونے کو وزیراعظم کے لیے بڑا دھچکا قرار دیا جارہا ہے، اس معاہدے پر ووٹنگ ابتدائی طور پر دسمبر میں ہونا تھی تاہم وزیراعظم ٹریزامے نے اس وقت بھی شکست کو بھانپتے ہوئے اسے ملتوی کر دیا تھا۔یاد رہے کہ برطانیہ کی یورپی یونین سے علیحدگی کی حتمی تاریخ 29 مارچ مقرر ہے اور اس معاہدے میں برطانیہ کے یورپی یونین سے انخلا کی شرائط متعین کی گئی تھیں۔برطانیہ میں یورپی یونین میں رہنے یا اس سے نکل جانے کے حوالے سے 23 جون 2017 کو ریفرنڈم ہوا تھا جس میں بریگزٹ کے حق میں 52 جبکہ مخالفت میں 48 فیصد ووٹ پڑے جس کے بعد اس وقت کے وزیراعظم ڈیوڈ کیمرون کو عہدے سے استعفیٰ دینا پڑا، کیوں کہ وہ بریگزٹ کے مخالف تھے۔واضح رہے کہ برطانیہ نے 1973 میں یورپین اکنامک کمیونٹی میں شمولیت اختیار کی تھی تاہم برطانیہ میں بعض حلقے مسلسل اس بات کی شکایات کرتے رہے ہیں کہ آزادانہ تجارت کے لیے قائم ہونے والی کمیونٹی کو سیاسی مقاصد کے لیے استعمال کیا جارہا ہے جس کی وجہ سے رکن ممالک کی ملکی خودمختاری کو نقصان پہنچتا ہے۔

اسلام آباد:(نیٹ نیوز/ایمرا نیوز) چیف جسٹس پاکستان کے منصب سے سبکدوش ہونے والے جسٹس میاں ثاقب نثار نے کہا ہےکہ انہوں نے آئین میں تعین کردہ حق زندگی، تعلیم اور صحت کے مسائل حل کرنے کی کوشش کی اور ججز کے ضابطہ اخلاق کے اندر رہتے ہوئے کام کیا۔چیف جسٹس پاکستان جسٹس میاں ثاقب نثار کی مدت ملازمت پوری ہونے پر سپریم کورٹ میں ان کے اعزاز میں فل کورٹ ریفرنس کا انعقاد کیا گیا جس میں عدالتِ عظمیٰ کے 17 میں سے 16 جج صاحبان نے شرکت کی۔فل کورٹ ریفرنس سے چیف جسٹس پاکستان کے منصب پر بیٹھنے والے جسٹس آصف سعید کھوسہ اور سبکدوش ہونے والے چیف جسٹس ثاقب نثار نے بھی خطاب کیا۔جسٹس میاں ثاقب نثار نے بطور چیف جسٹس پاکستان فل کورٹ ریفرنس سے اپنے آخری خطاب میں عدالتِ عظمیٰ کے اہم فیصلوں پر روشنی ڈالی۔انہوں نے کہا کہ اس عدالت نے کئی معرکتہ الآراء فیصلے دیے، سب سے پہلے گلگت بلتستان کا فیصلہ ہے، دوسرا مسئلہ عدالت نے آبادی میں اضافے کا اٹھایا، بیرون ملک مقیم پاکستانیوں کو ووٹ کا حق دیا۔جسٹس میاں ثاقب نثار کا کہنا تھاکہ عدالت نے ملک میں پانی کی کمی کا نوٹس لیا اور پوری قوم نے پانی کے لیےعطیات دیے، پسے ہوئے لوگوں کے حقوق کے لیے کام کیا اور ہر شخص کو عزت سے زندگی گزارنے کا حق دیا، نجی اسپتالوں کی فیسوں پر نوٹس لیا، خواجہ سراؤں کو شناختی کارڈ جاری کرنےکے معاملے کا نوٹس لیا، عدالت نے طیبہ سمیت گھروں میں کام کرنے والے بچوں کا بھی نوٹس لیا۔انہوں نے مزید کہا کہ آئین میں تعین کردہ حق زندگی، تعلیم اور صحت کے مسائل حل کرنے کی کوشش کی اور ججز کے ضابطہ اخلاق کے اندر رہتے ہوئے کام کیا۔جسٹس میاں ثاقب نثار کا کہنا تھا کہ ججوں کا کام انتہائی مشکل ہے، عدلیہ میں کرپشن انصاف کا قتل ہے، میرے لیے اعزاز کی بات ہے کہ میں نے ملک کے لیے کام کیا۔سبکدوش ہونے والے چیف جسٹس نے کہا کہ لوگوں نے جو عزت دی اس کو لوٹانے کی کوشش کی۔واضح رہےکہ جسٹس میاں ثاقب نثار 31 دسمبر 2016 کو چیف جسٹس پاکستان کے منصب پر فائز ہوئے، ان کے دور میں عدالتِ عظمیٰ نے انتہائی اہم نوعیت کے فیصلے دیے جن کے ملک کی سیاست پر بھی گہرے اثرات پڑے۔

ممبئی(شوبز ڈیسک/ایمرا نیوز) بالی وڈ کنگ شاہ رخ خان کی فلموں کو گزشتہ دو برس سے مسلسل ناکامی کا سامنا ہے، ایسے میں انہوں نے اپنے ڈوبتے ہوئے کیریئر کو بچانے کے لیے فلم ’ڈان 3‘ کو قبول کرلیا ہے۔شاہ رخ خان نے 2017 میں ریلیز ہونے والی فلم ’جب ہیری میٹ سیجل‘ میں ایک ٹور گائیڈ کا کردار نبھایا تھا جبکہ گزشتہ برس کے آخر میں ریلیز ہونے والی فلم ’زیرو‘ میں انہوں نے ایک بونے کا کردار نبھایا، تاہم یہ دونوں ہی کردار مداحوں کو متاثر کرنے میں ناکام رہے۔

اب وہ دوبارہ سے فلم ’ڈان‘ کے تیسرے سیکوئل میں کام کرنے جارہے ہیں، جس کے لیے امید کی جارہی ہے کہ وہ ’ڈان 2‘ کی طرح ان کے لیے کامیاب ثابت ہوگی۔ بھارتی میڈیا کے مطابق شاہ رخ خان نے فلم ساز سدھارتھ رائے کپور کی فلم ’سارے جہاں سے اچھا‘ کے لیے انکار کردیا ہے جس میں انہیں ایک سائنسدان کا کردار نبھانا تھا تاہم انہوں نے ہدایت کار فرحان اختر کی ’ڈان 3‘ میں جلوہ گر ہونے کی تصدیق کردی ہے۔فلم کی مکمل کاسٹ کے حوالے سے فی الحال کوئی تفصیلات سامنے نہیں آئیں۔واضح رہے کہ قیاس آرائیاں تھیں کہ ’ڈان 3‘ میں مرکزی کردار دپیکا پڈوکون نبھائیں گی، جس کی تردید کردی گئی تھی۔