Tag Indonesia

ایف بی آر کے چھاپوں کا نوٹس لیا جائے،جلد تاجروں کا کنونشن بلا کر اپنے مطالبات پیش کرینگے‘ آل پاکستان انجمن تاجران
لاہور(ایمرا نیوز آن لائن)آل پاکستان انجمن تاجران کے صدر اشرف بھٹی نے کہا ہے کہ معیشت کی ترقی کیلئے سرمایہ کاری اور کاروبار دوست ماحول سمیت سیاسی استحکام بھی نا گزیر ہے‘شہباز شریف نے بطور قائد حزب اختلاف قومی اسمبلی میں ہمیشہ ایشوز پر بات کی ہے جو خوش آئند ہے ،وزیر خزانہ اور وزیر مملکت ریو نیو کی یقین دہانی کے باوجود ایف بی آر کی جانب سے مارکیٹوں میں چھاپوں کا سلسلہ جاری ہے ۔جس کےخلا ف تاجر متفقہ لائحہ عمل مرتب کرینگے۔ان خیالات کا اظہار انہوںنے اپنے دفتر میں ملاقات کیلئے آنے والے تاجرنمائندوں سے گفتگو کرتے ہوئے کیا۔ اشرف بھٹی نے کہا کہ ہم احتساب کےخلاف نہیں لیکن بغیر ٹھوس شواہد کسی کو گرفتار نہیں کرنا چاہیے اور سیاسی شخصیات کی گرفتاریوںسے ہر طبقے میں خوف و ہراس پھیلتا ہے جس کے کاروبار پر بھی منفی اثرات مرتب ہوتے ہیں۔انہوں نے کہا کہ شہباز شریف سنجیدہ سیاسی رہنما ہیں اور انہوں نے قومی اسمبلی میں بھی ہمیشہ ایشوز پر بات کی ہے جس سے حکومت کو رہنمائی لینی چاہیے۔انہوں نے مزید کہا کہ ایف بی آر کے چھاپوں کی وجہ سے تاجروں میں خوف و ہراس پایا جاتا ہے۔ وزیر خزانہ اور وزیر مملکت ریو نیو اس کا نوٹس لیں اور چھاپوں کا سلسلہ فی الفور روکا جائے۔حکومت کی جانب سے خوف و ہراس کی پالیسی کسی طور پر سود مند نہیں اور اس سے ٹیکس نیٹ بڑھنے کی بجائے مزید سکڑ جائےگا۔ انہوں نے وفد کو یقین دہانی کرائی کہ انشااللہ بہت جلد تاجروں کا ملک گیر کنونشن بلا یا جائےگا جس میں اپنے مطالبات پیش کریں گے۔

لاہور(ایمرا نیوز آن لائن) پاکستان اکانومی واچ کے صدر ڈاکٹر مرتضی مغل نے کہا ہے کہ گیس بحران کے باعث ملک بھر میں سینکڑوں کارخانے بند ہوگئے ہیں ،جس کے باعث بیروزگاری میں اضافے کا بھی خطرہ ہے،گیس چوری پر قابو پانے یا اصلاحات کا عمل شروع کرنے کے بجائے گیس کی قیمت میں اضافہ کر کے ایماندار صارفین کو سزا دی جا رہی ہے۔اپنے بیان میں انہوں نے کہا کہ گیس کے بحران نے ملک کو پوری طرح اپنی لپیٹ میں لے لیا ہے، ملک میں روزانہ ایک ارب مکعب فٹ قدرتی گیس چوری ہو رہی ہے۔گیس چوری پر قابو پانے یا اصلاحات کا عمل شروع کرنے کے بجائے گیس کی قیمت میں اضافہ کر کے ایماندار صارفین کو سزا دی جا رہی ہے۔انہوںنے کہا کہ گیس کمپنیوں کے سربراہان کی برطرفی اور قیمت میں حالیہ اضافہ سے گیس سپلائی سمیت مجموعی صورتحال بہتر نہیں ہوئی مگر عوام کی کمر ٹوٹ گئی ہے جبکہ ملک بھر میں سینکڑوں کارخانے بند اور لاکھوں مزدور بے روزگار ہوگئے ہیں۔ انہوں نے کہا کہ گیس کی قیمت بڑھنے کے بعد جہاں معیشت کو نقصان پہنچا ہے وہاں عام شہری صرف توانائی کی مد میں اپنی آمدنی کا تیس فیصد تک خرچ کرنے پر مجبور ہو گیا ہے جس سے ان کا صحت، بچوں کی تعلیم ، کرایہ اور دیگر امور کا بجٹ متاثر ہوا ہے۔

ٹرمپ کابل میں موجود امریکی فوجیوں کی واپسی چاہتے ہیں
واشنگٹن(ایمرا نیوز آن لائن) پینٹاگون کے چیف نے کہا ہے کہ امریکا، افغانستان سے اپنے فوجیوں کی یکطرفہ واپسی نہیں کرے گا-غیر ملکی خبر رساں ادارے کے مطابق پینٹاگون چیف نے ساتھ ہی یہ مطالبہ بھی کیا کہ افغان امن مذاکرات میں کابل حکومت کو لازمی حصہ بنایا جائے‘افغان حکومت کے بغیر پائیدار امن ممکن نہیں۔امریکا کی جانب سے طالبان کےساتھ امن مذاکرات جاری ہیں تاہم نیٹو کے سیکریٹری جنرل جینفر سٹولٹنبرگ نے اشرف غنی کی افغان حکومت کی امن مذاکرات میں شمولیت میں تاخیر پر خبردار کیا۔دوسری جانب قائم مقام امریکی سیکریٹری دفاع پیٹریک شنہان نے کہا کہ افغانستان سے امریکی فوجیوں کی تعداد میں کمی کا فیصلہ نیٹو سے مشاورت کے بعد ممکن ہوگا۔

ایرانی نظام ہمارے خطے کے استحکام کیلئے سب سے بڑا خطرہ ہے‘وہ ابھی تک توسیع پسندانہ خوابوں کا حامل ہے‘شہزاد خالد بن سلمان کا ایرانی صدر کو جواب
واشنگٹن (ایمرا نیوز آن لائن) امریکا میں متعیّن سعودی سفیر شہزادہ خالد بن سلمان نے کہا ہے کہ عرب سرزمین صرف عربوں کی ملکیت ہے۔جمعہ کو سماجی رابطے کی ویب سائٹ ٹوئٹر پر ایرانی صدر حسن روحانی کو خلیجی ممالک پر تاریخی دعووں کا جواب دیتے ہوئے واشنگٹن میں تعینات سعودی سفیر شہزادہ خالد بن سلمان نے کہا کہ ایرانی نظام ہمارے خطے کے استحکام کے لیے سب سے بڑا خطرہ ہے،وہ ابھی تک توسیع پسندانہ خوابوں کا حامل ہے۔ایران میں انقلاب کی چالیسویں سالگرہ کے موقع پر اس نظام کے صدر نے اپنی تقریر میں اپنے توسیع پسندانہ ارادوں کا اظہار کیا ہے اور یہ دعویٰ کیا ہے کہ ماضی میں خلیجِ عرب میں عرب سرزمین ان کے ملک کا حصہ رہی ہے۔انھوں نے اس علاقے کو ’جنوبی ایران‘ کا نام دیا ہے مگر عرب سرزمین تو عربوں کی ہے اور عربوں کے لیے ہے۔یمن اور وہاں عرب اتحاد کی فوجی کارروائی ایسی التباسی تقریروں سے کہیں زیادہ واضح اور کھل کر کہانی بیان کررہی ہے۔شہزادہ خالد نے ایک اور ٹویٹ میں ایرانی صدر حسن روحانی کے بیانیے کو خطرناک اور توسیع پسندانہ قرار دیا ہے اور کہا ہے کہ ”یہ اس بات کا بھی مظہر ہے کہ یہ نظام ابھی تک اعتدال پسند نہیں ہوا ہے۔وہ لکھتے ہیںکہ افسوس ناک امر یہ ہے اور بظاہر یہ لگتا ہے کہ یہ نظام دہشت گردی اور سخت گیر ملیشیاؤں کی مالی معاونت کے لیے ایرانی قوم کی دولت لٹاتا رہے گا۔شہزادہ خالد بن سلمان نے ٹویٹر پر ” ناکامی کے 40 سال“ کے عنوان سے ہیش ٹیگ کے تحت ایران کی موجودہ مجموعی صورتحال کو بھی بیان کیا ہے۔ انہوں نے کہا کہ 40 سال قبل آیت اللہ ( روح اللہ خمینی) ایران میں اترے تھے اور اس کے بعد دہشتگردی اور تباہی کے ایک نئے دور کا آغاز ہوا تھا۔انھوں نے کہا کہ 1979ءمیں دونوں معیشتوں کا حجم ایک ایسا ہی یعنی برابر برابر تھا لیکن آج سعودی عرب کی مجموعی قومی پیداوار ( جی ڈی پی) ایران سے دگنا ہوچکی ہے۔اس عرصے کے دوران میں سعودی عرب کی فی کس آمدن دس گنا سے بھی بڑھ چکی ہے جبکہ ایران کی فی کس آمدن نصف سے زیادہ کم ہوچکی ہے۔

عمران خان نے خود کو ویڑنری لیڈر ثابت کردیا‘چیئرمین آبا حسن بخشی
کراچی(ایمرا نیوز آن لائن) ایسوسی ایشن آف بلڈرز اینڈ ڈیولپرز (آباد) نے کہا ہے کہ وزیراعظم کی جانب سے کیپٹل ڈیولپمنٹ اتھارٹی کو کثیرالمنزلہ عمارتوں کی تعمیرات کی حوصلہ افزائی کی ہدایات نے تعمیراتی صنعت کے حوصلے بلند کردیے ہیں۔جمعہ کو ایسوسی ایشن آف بلڈرز اینڈ ڈیولپرز (آباد) نے وزیراعظم عمران خان کی دارالحکومت کی ہریالی محفوظ اور تعمیراتی صنعت کو فروغ دینے کیلیے جاری کردہ نئے حکام کاخیرمقدم کرتے ہوئے کہا ہے کہ وزیراعظم کی جانب سے کیپٹل ڈیولپمنٹ اتھارٹی کو کثیرالمنزلہ عمارتوں کی تعمیرات کی حوصلہ افزائی کی ہدایات نے تعمیراتی صنعت کے حوصلے بلند کردیے ہیں۔چیئرمین آباد حسن بخشی نے کہا کہ وزیراعظم نے خود کوایک ویڑنری لیڈر ثابت کردیاہے۔ سی ڈی اے اور سی اے اے کو چاہیے کہ وہ مل کر ایک ہم آہنگ اور کاروبار دوست پالیسی تشکیل دیں اور بلڈرز اور ڈیولپرز کو آسان اور کاروبار دوست ماحول فراہم کریں تاکہ وہ کثیرالمنزلہ عمارتوں کی تعمیرات کرسکیں۔

حکومت کی فنکشنل اسٹریٹجی تیار ، سیکریٹری خزانہ عارف خان کی سربراہی میں اعلیٰ سطحی وفد آج پیرس روانہ ہوگا
اسلام آباد(ایمرا نیوز آن لائن) پاکستان نے فنانشل ایکشن ٹاسک فورس (ایف اے ٹی ایف )ایکشن پلان کے تحت وفاق کے لئے مقرر کردہ تمام اہداف حاصل کرلیے ہیں ،تاہم صوبوں سے متعلق کچھ اہداف حاصل نہیں ہوسکے۔تفصیلات کے مطابق حکومت نے ایف اے ٹی ایف کیلئے فنکشنل اسٹریٹجی تیار کرلی ہے جو (کل)بروز اتوار 17فروری سے فرانسیسی دارالحکومت پیرس میں شروع ہونیوالے مذاکرات میں پیش کی جائےگی۔پاکستان اور فنانشل ایکشن ٹاسک فورس (ایف اے ٹی ایف)کےساتھ مذاکرات کے لئے وفاقی سیکریٹری خزانہ عارف احمد خان کی سربراہی میں اعلی سطحی وفد (آج)ہفتہ کو پیرس روانہ ہوگا۔وفد میں ایف آئی اے ،نیکٹا اور ایف بی آر سمیت دیگر متعلقہ اداروں کے حکام شریک ہیں ،البتہ وفد میں صوبوں کا کوئی نمائندہ شامل نہیں۔ مذاکرات میں پاکستانی ٹیم منی لاڈرنگ کے خاتمے کیلیے اٹھائے جانیوالے اقدامات بارے بریفنگ دے گی۔پہلے مرحلے میں 15فروری سے ملک بھر میں 40 ہزار روپے مالیت کے نئے انعامی بونڈز کا اجرا روک دیا ہے ،دوسرے مرحلے میں 40ہزار اور 25ہزار روپے مالیت والے انعامی بونڈز ختم کرکے صارفین سے واپس لیے جائیں گے اور انکی جگہ رجسٹرڈ سرٹیفکیٹس و بونڈز جاری کیے جائیں گے۔

جیل میں نواز شریف کا بلڈ پریشر اور شوگر سمیت دیگر ٹیسٹ کیے گئے، ذرائع
لاہور(ایمرا نیوز آن لائن)سابق وزیراعظم نواز شریف کا جناح اسپتال منتقل کرنے سے قبل کوٹ لکھپت جیل میں طبی معائنہ کیا گیا۔جیل ذرائع کا کہنا ہے کہ جیل کے ڈاکٹرز نے سابق وزیراعظم نواز شریف کا طبی معائنہ کیا، نواز شریف کا بلڈ پریشر اور شوگر سمیت دیگر ٹیسٹ کیے گئے، نواز شریف کوہلکا بخار ہے۔دوسری جانب ذرائع کے مطابق نواز شریف کو جیل سے جناح اسپتال منتقل کرنے کے لیے سکیورٹی پلان تیار کرلیا گیا ہے، اسپتال میں تین شفٹوں میں اہلکار تعینات کیے جائیں گے، ایلیٹ فورس اور سادہ لباس میں الگ الگ نفری تعینات ہوگی
جب کہ نواز شریف کے کمرے کو سب جیل ڈیکلییر کردیا جائے گا۔۔پولیس کے مطابق نواز شریف کے وارڈ کے باہر جیل عملہ تعینات ہوگا، صرف حکومت کے تشکیل کردہ ڈاکٹرز کے بورڈ کو کمرہ تک رسائی ہوگی، نواز شریف کے کمرے کو جانے والے راستے پر تمام ڈاکٹرز اور رشتہ داروں کی 3 جگہ چیکنگ کی جائے گی۔واضح رہے کہ گزشتہ روز سابق وزیراعظم نواز شریف کی طبیعت خراب ہونے پر کوٹ لکھپت جیل سے جناح اسپتال منتقل کرنے کا فیصلہ کیا گیا تھا، نواز شریف کی ناسازی طبیعت کے سبب میڈیکل بورڈ نے انہیں جناح اسپتال منتقل کرنے کی سفارش کی تھی۔

ملزم نے 9 روز کے ریمانڈ کے دوران کوئی تعاون نہیں کیا، نیب پراسیکیوٹر
لاہور(ایمرا نیوز آن لائن)احتساب عدالت نے علیم خان کو دس روزہ جسمانی ریمانڈ ہر نیب کے حوالے کردیا۔پاکستان تحریک انصاف کے رہنما علیم خان کو احتساب عدالت میں پیش کیا گیا۔ احتساب عدالت کے جج نجم الحسن نے کیس کی سماعت کی۔ نیب پراسیکوٹر وارث علی جنجوعہ نے علیم خان کے جسمانی ریمانڈ میں 15 روز کی توسیع کی درخواست کی۔نیب پراسیکیوٹر نے دلائل دیتے ہوئے کہا کہ ملزم نے 9 روز کے ریمانڈ میں کوئی تعاون نہیں کیا، 2003 میں یہ عام آدمی تھے اور 2007 میں 871 ملین کے اثاثوں کی مالک بن گئے، انہوں نے 35 کمپنیاں بنائیں اور 100 اکاو¿نٹ کھلوائے، ملزم یہ نہیں بتاسکا کہ اس نے 900 کنال ارااضی کیسے خریدی، ان کے ملازم عمیر کے اکاو¿نٹ میں بھی بھاری رقم موجود ہے۔عبدالعلیم خان کے وکیل نے دلائل دیے کہ اس کیس میں نیب کی انکوائری حقیقت پر مبنی نہیں ہے، انہوں نے بیرون ملک جائیدادوں سمیت تمام اثاثوں کی دستاویزات جمع کرائی ہیں،33 کمپنیوں میں سے صرف دو کمپنیاں ہی کام کر رہی ہیں، 900 کنال زمین میں علیم خان 50 فیصد کے پارٹنر ہیں جبکہ باقی 50 فیصد زمین کے مالک میاں عامر محمود ہیں۔عدالت نے سماعت کے بعد علیم خان کے جسمانی ریمانڈ میں 10 روز کی توسیع کردی۔واضح رہے کہ نیب نے علیم خان کو پاناما لیکس میں سامنے آنے والی آف شور کمپنیوں اور آمدن سے زائد اثاثوں کے کیس میں گرفتار کررکھا ہے۔ نیب لاہور علیم خان کے ساتھ ساتھ ان کی اہلیہ، والد اور والدہ کے اثاثوں کی بھی چھان بین کررہا ہے۔

طلباءکو شرپسندوں اور انتہا پسندوں کی جانب سے ڈرایا دھمکایا جا رہا ہے ، بیان
سرینگر(ایمرا نیوز آن لائن) کل جماعتی حریت کانفرنس”ع“ گروپ کے چیئرمین میرواعظ عمر فاروق نے بھارت کی ریاست چھتیس گڑھ میں زیر تربیت کشمیری طلباءپر چند شرپسند اور فرقہ پرست عناصر کی جانب سے جان لیوا حملہ اور انہیں شدید زخمی کئے ۔ جانے کی مذمت کرتے ہوئے کہا ہے کہ اس سے قبل بھی بھارت کے مختلف اداروں میں زیر تعلیم طلباءاور تجارت سے وابستہ افراد کو معاشی شرپسند عناصر اور انتہا پسند قوتوں کی جانب سے ڈرایا دھمکایا جاتا رہا اور کئی تو کالج چھوڑنے پر مجبور ہو گئے ۔حریت چیئرمین نے کاکہ پورہ پلوامہ کے ایک ٹیوشن سینٹر میں ہونے والے پراسرار دھماکے کے دوران شدید زخمی ہوئے طالب علم کی ہسپتال میں عیادت کی ۔ اس موقع پر میرواعظ نے کہا کہ بھارت کی ریاست چھتیس گڑھ میں زیر تعلیم طلباءاور تجارت سے وابستہ افراد کو مقامی شرپسند عناصر اور انتہا پسند قوتوں کی جانب سے ڈرایا دھمکایا جاتا رہا ہے اور کئی بار تو انہیں کالج چھوڑنے پر بھی مجبور کیا جاتا رہا۔ انہوں نے کہا کہ بھارت الیکٹرانک میڈیا کا ای ک حصہ آئے روز کشمیر اور کشمیریوں کے خلاف جوزہر افشانی کر رہا ہے اور جموں وکشمیر کے حالات کے بارے میں بھارتی عوام کے سامنے منفی پروپیگنڈہ جاری رکھے ہوئے ہے وہ نہ صرف حدود افسوسناک بلکہ اس پروپیگنڈے کے نتیجے میں بھارت کی مختلف زر ہے کشمیریوں کی زندگیوں کو شدید خطرات لاحق ہوتے جا رہے ہیں ۔( جاوید)

لاہور، ہنگو سے 1 ، 1 پولیو کیس سامنے آ گیا ، رواں سال میں 4 پولیو کیسز کی تصدیق ، حکومت کا برتھ سرٹیفیکیٹ کو انسداد پولیو سرٹیفیکیٹ سے مشروط کرنے کا فیصلہ
اسلام آباد (ایمرا نیوز آن لائن) لاہور اور ہنگو سے مزید ایک ، ایک پولیو کیس سامنے آ گیا ۔ حکومت نے لاہور کے 8 ماہ کے بچے اور ہنگو کی 4 ماہ کی بچی فاطمہ میں پولیو وائرس کی تصدیق کر دی ۔ تفصیلات کے مطابق محکمہ صحت کے مطابق پنجاب کے ضلع لاہور اور خیبرپختونخوا کے ضلع ہنگو سے پولیو کے مزید ایک ، ایک کیس سامنے آ گیا ہے لاہور کی شالیمار ٹاؤن یوسی 22 کے رہائشی 8 ماہ کے بچے میں پولیو وائرس کی تصدیق ہوئی ہے اور پنجاب میں 2 سال بعد یہ پہلا پولیو کیس رپورٹ ہوا جبکہ دوسری جانب خیبرپختونخوا کے ضلع ہنگو کے علاقے ٹل میں 4 ماہ کی بچی فاطمہ میں پولیو وائرس کی تصدیق ہوئی ہے جس کو والدین نے پولیو کے قطرے پلانے سے انکار کیا تھا اس سے قبل بھی رواں سال میں بنوں ، باجوڑ سے پولیو کیسز سامنے آ چکے ہیں جس کے بعد خیبرپختونخوا سے رواں سال 3 اور پنجاب سے ایک پولیو کیس سامنے آیا ہے ۔ حکومت نے بھی 21 اَضلاع میں 18 فروری سے ایمرجنسی 3 روزہ انسداد پولیو مہم چلانے کا فیصلہ کیا ہے اور برتھ سرٹیفیکیٹ کو بھی انسداد پولیو مہم کے سرٹیفیکیٹ سے مشروط کیا ہے تاکہ کوئی بھی بچہ یا ان کے والدین انسداد پولیو قطرے پلانے سے انکار نہ کر سکیں ۔ ( جاوید/ اشفاق)