Tag islamabad

لاہور(نیٹ نیوز/ایمرا نیوز) عالمی مالیاتی فنڈ (آئی ایم ایف) کا کہنا ہے کہ پاکستان نے معاشی ڈیٹا اکھٹا کرنے کے لیے آئی ایم ایف کے طریقہ کار کو اپنایا ہے، اس سے پاکستان میں معاشی ڈیٹا مزید شفاف ہوسکے گا۔آئی ایم ایف کا کہنا ہے کہ درست معاشی ڈیٹا سے پاکستان کو اقتصادی ترقی میں مدد ملے گی، یہ درست معاشی ڈیٹا لوگوں کو بہتر سہولتیں فراہم کر سکتا ہے۔عالمی مالیاتی فنڈ کا مزید کہنا ہے کہ آئی ایم ایف کے طریقہ کار کو اپنانا پاکستان کا اہم سنگ میل ہے، درست ڈیٹا سے پاکستان میں انسانی وسائل کی ترقی میں مدد ملے گی۔آئی ایم ایف کی جانب سے یہ بھی کہا گیا ہے کہ درست معاشی ڈیٹا سے اسٹیٹ بینک، وزارت خزانہ اور ادارہ شماریات کے درمیان رابطہ بہتر ہوگا۔

اسلام آباد(نیٹ نیوز/ایمرا نیوز) اٹھارہویں ترمیم سے متعلق سندھ حکومت کی درخواست سپریم کورٹ نے مسترد کردی۔چیف جسٹس نے اٹھارہویں ترمیم کے حوالے سے فیصلہ سناتے ہوئے کہاکہ سندھ حکومت کی درخواست مسترد کرنے کی وجوہات سپریم کورٹ کے تفصیلی فیصلے میں دی جائیں گی۔واضح رہے سندھ حکومت نے صوبائی اختیارات سے متعلق سپریم کورٹ میں درخواست دائر کر رکھی تھی،سپریم کورٹ نے سندھ حکومت کی درخواست مسترد کرتے ہوئے کیس نمٹادیا۔یاد رہے کہ پاکستان کے آئین میں اٹھارویں ترمیم 8 اپریل 2010 کو قومی اسمبلی نے منظور کی گئی جس کے تحت صدر کے پاس موجود تمام ایگزیکٹو اختیارات پارلیمان کو منتقل ہوئے۔اس ترمیم کے ذریعے پاکستان کے شمالی مغربی سرحدی صوبے (سرحد) کا نام تبدیل کر کے خیبر پختونخوا رکھا گیا اور وفاق سے زیادہ تر اختیارات صوبوں کو منتقل ہوئے۔

لاہور(نیٹ نیوز/ایمرا نیوز) گوگل نے راتوں رات پاکستانی کرنسی کی قدر بڑھا دی، گوگل سرچ انجن ڈالر اور یورو سمیت غیر ملکی کرنسی کے غلط ریٹس دکھانے لگا، میڈیا پر خبر نشر ہوئی تو چند گھنٹوں بعد غلطی درست کرلی گئی۔مارکیٹ میں ڈالر کی قیمت بھلے 139 روپے ہی کیوں نہ ہو، مگر سرچ انجن میں ایک امریکی ڈالر کی قدر 76 روپے 25 پیسے دکھائی گئی۔گوگل کرنسی کنورٹر پر امارتی درہم 20 روپے 76 پیسے نظر آیا جبکہ گوگل کے مطابق ایک یورو 87 روپے 3 پیسے کا خریدا جاسکتا تھا۔گوگل نے اسی طرح ہر کرنسی کے مقابلے میں پاکستانی کرنسی کی شرح بڑھا دی، نومبر میں ایک ہی دن میں ڈالر کی قدر میں ریکارڈ اضافہ ہوا تھا، مگر گوگل نے ڈالر کی قدر میں کمی کے سب ریکارڈ توڑ ڈالے۔گوگل کے کرنسی کنورٹر پر پاکستانی روپے اور دیگر کرنسیوں کے شرح مبادلہ کے غلط نتائج پروگرامنگ کی غلطی کا نتیجہ ہوسکتے ہیں، لیکن یہ کارنامہ سوشل میڈیا پر وائرل ہونے سے لوگ ضرور تجسس میں مبتلا ہوگئے ہیں۔

ممبئی:(شوبز ڈیسک/ایمرا نیوز) ’ریس3‘ کی ناکامی کے بعد ’ریس4‘ کے لیے سلمان خان کی جگہ ایک بار پھر سیف علی خان کو کاسٹ کیے جانے پر غور کیا جارہا ہے۔گزشتہ برس ریلیز ہونے والی فلم’ریس3‘ پر کمزور کہانی اور بیکار اسکرپٹ کی وجہ سے شائقین اور تجزیہ نگاروں کی جانب سے شدید تنقید کی گئی تھی، عید الفطر پر ریلیز ہونے کی وجہ سے فلم کو فائدہ پہنچا اور فلم نے اپنی لاگت پوری کرلی لیکن فلم شائقین کے معیار پر پوری اترنے میں مکمل ناکام ہوگئی، یہاں تک کہ ’ریس 3‘ گزشتہ برس دنیا بھر میں ریلیز ہونے والی 100 بدترین فلموں میں سے ایک قرار دے دی گئی۔

ریس 3‘کی ریلیز کے وقت سلمان خان فلم کی کامیابی کے حوالے سے اتنے پُر امید تھے کہ انہوں نے ’ریس4‘ بنانے کا بھی اعلان کردیا تھا لیکن فلم پر ہونے والی تنقید کے بعد ’ریس4‘ کے لیے سلمان خان کی جگہ ایک بار پھر سیف علی خان کو کاسٹ کیے جانے پر غور کیا جارہا ہے۔ میڈیا رپورٹس کے مطابق فلم پروڈیوسر رمیش تورانی کوشش کررہے ہیں کہ سیف علی خان دوبارہ ’ریس فرنچائز‘ میں شامل ہوجائیں۔واضح رہے کہ سیف علی خان ’ریس ‘اور’ریس2‘ میں اداکاری کے جوہر دکھاچکے ہیں یہ دونوں فلمیں باکس آفس پر کامیاب رہی تھیں۔

واشنگٹن:(نیٹ نیوز/ایمرا نیوز) امریکا میں پاکستان کے نئے تعینات ہونے والے سفیر ڈاکٹر اسد مجید خان کی امریکی صدر ڈونلڈٹرمپ سے ملاقات ہوئی۔امریکا میں پاکستان کے نئے تعینات ہونے والے سفیر ڈاکٹر اسد مجید خان کی امریکی صدر ڈونلڈٹرمپ سے ملاقات ہوئی۔ملاقات میں نئے پاکستانی سفیر ڈاکٹر اسد مجید خان نے اپنی سفارتی اسناد صدرڈونلڈ ٹرمپ کو پیش کیں اورسفیر ڈاکٹر اسد مجید خان نے پاکستانی قیادت کی جانب سے صدر ٹرمپ کو نیک خواہشات کا پیغام پہنچایا۔

کراچی(نیٹ نیوز/ایمرا نیوز) وفاقی وزیر خزانہ اسد عمر کہتے ہیں کہ 23 جنوری کو منی بجٹ پیش کیا جائے گا۔وزیر خزانہ اسد عمر نے کراچی چیمبر آف کامرس میں صنعت کاروں سے ملاقات کی، اس موقع پر خطاب کرتے ہوئے انہوں نے کہا کہ ایف بی آر کے ایس آر او کے اجراء کا اختیار ختم کر دیا گیا ہے۔ان کا مزید کہنا ہے کہ وزیر اعظم عمران خان نے بیرون ملک جانا ہے تو اب 23 جنوری کو فنانس بل پیش کیا جائے گا، منی بجٹ میں ٹیکس ایناملیز کو دور کیا جائے گا۔اسد عمر نے مزید کہا کہ ٹیکسوں کے حوالے سے ہر قسم کی تبدیلی پارلیمنٹ کی منظوری سے ہو گی۔اس موقع پر تاجروں نے وزیرخزانہ اسد عمر سے کڑے سوالات کیے، ایک تاجر نے کہا کہ کراچی میں 16دن انڈسٹری کو گیس نہ مل سکی، حالانکہ دسمبروہ مہینہ ہوتا ہے جب شپمنٹس جاتی ہیں۔اسدعمرنے کہا کہ تاجر برادری اپنی ٹیم اسلام آباد بھیج دیں، وہاں مسائل پر مزید بات کریں گے،ٹیکسز پر کوئی تبدیلی چاہتے ہیں تو یہ فیصلے فوری نہیں ہونے چاہئیں،ٹیکسز کوپارلیمنٹ میں بحث کےبعد تبدیل ہونا چاہیے، میں کراچی چیمبر کا رکن رہ چکا ہوں، اکیسویں ویں صدی میں معیشت کا پہیہ پرائیویٹ سیکٹر چلاتا ہے۔انہوں نے کہا کہ ہمارے منشور میں یہ لکھا تھا کہ کاروبار کی آسانی کے لیے مواقع پیدا کریں گے، کراچی پاکستانی معیشت کا دل ہے، نئے مالیاتی بل میں کاروباری طبقے کے لیے آسانیاں نظر آئیں، سرمایہ کاری ہوگی تومعیشت آگے بڑھے گی، سرمایہ کاری بڑھے گی تو نوکریاں پیدا ہوں گی، سرمایہ کاری کے لیے سہولتیں دی جائیں گی۔وزیر خزانہ نے کہا کہ ریاست کی بنیادی ذمہ داری ہے کہ ایسی معاشی پالیسی بنائے جس سے کمزورطبقے کی مشکلات دور ہوں، ہمیں ترجیحات کے مطابق فیصلے کرنا چاہئیں، اکیسویں صدی میں نجی شعبہ معیشت چلاتا ہے، کاروبار کرنے کے لیے مشکل پیدا کی جاتی رہی ہے،جسے آسان کرنے کے لیے ہر مہینے اجلاس کیا جا رہا ہے ۔انہوں نے کہا کہ پاکستان میں مقامی بچت اور سرمایا کاری کم ترین سطح تک آگئی ہے،منی بجٹ میں کھپت کو کم اور سرمایہ کاری بڑھانے کے اقدامات ہوں گے، ترکی سے ہمارے تعلقات اچھے ہیں لیکن تجارت نہ ہونے کے برابر ہے،اپریل میں پاک ترکی سرمایہ کاری سے متعلق معاہدے پر دستخط ہوں گے۔اسد عمر نے کہا کہ قائد اعظم ملک کے اندر بھی اور خطے میں بھی امن چاہتے تھے، اسی لیے وزیراعظم عمران خان نے اپنی پہلی تقریرمیں مذاکرات کی بات کی تھی، بھارت سے کشمیر اور تجارت بڑھانے پر بات کرنا چاہتے ہیں، پاکستانی فوج اس بات پر یقین رکھتی ہے کہ بھارت سے تمام معاملات بات چیت کے ذریعے طے کیے جائیں۔انہوں نے مزید کہا کہ افسوس کی بات ہے کہ بھارت نے پاکستانی اعلان کا مثبت جواب نہیں دیا، وزارت خارجہ نےتمام سفیروں کومعاشی سفارتکاری کے فروغ دینےکے لیے اقدامات کیے ہیں، آرمی چیف بھی چاہتے ہیں کہ پاکستان اور بھارت کے مسائل بات چیت سے حل ہوں، گیس کا مسئلہ منصوبہ بندی کی کمی سے پیدا ہوا، منصوبہ بندی کی کمی اور فوری ایکشن نہ لینے پرہی کارروائی کی گئی، جوگیس کےمسائل سامنے آئے وہ بلکل نہیں آنے چاہیے تھے۔وزیر خزانہ نے یہ بھی کہا کہ روزانہ مختلف اداروں کے وفود آتے ہیں کہ ہمارے اتنے پیسے پھنسے ہوئے ہیں، پرانے پاکستان کے قرضے آسمان سے باہرنکل رہے ہیں، آئندہ مالیاتی بل میں اسٹاک ایکسچینج کے لیے اچھی خبر ہوگی، پاکستان پیپلز پارٹی کی حکومت جے آئی ڈی سی لے کر آئی، تاجر ایسی تجاویز لے کر آئیں جس سے حکومت کا کاروبار بھی چلتا رہے اور مسئلہ بھی حل ہو جائے۔اس موقع پر تاجر رہنما سراج قاسم تیلی نے کہا کہ ایف بی آر میں نچلے درجے کے افسروں تک طاقت منتقل کی گئی، ایف بی آر افسروں نے طاقت رشوت لینے کے لیے استعمال کی۔انہوں نے یہ بھی کہا کہ ایف بی آر کو تالہ لگا دیں، شرطیہ 15 فیصد ریونیو بڑھ جائے گا۔

نئی دہلی(سپورٹس ڈیسک/ایمرا نیوز) بھارتی کپتان ویرات کوہلی کا پانڈیا اور راہول سے متعلق کہنا ہے کہ بھارتی ٹیم اس طرح کے بیانات کے حق میں نہیں ہے ، جو باتیں دونوں نے کیں وہ نامناسب تھیں۔کوہلی نے کہا کہ ٹیم انڈیا راہول اور پانڈیا کے ٹی وی شو کے دوران خواتین پر نامناسب تبصرہ کرنے کی حمایت نہیں کرتی۔انہوں نے کہا کہ اس تنازع سے ڈریسنگ روم کا ماحول متاثر نہیں ہوگا، دونوں کھلاڑیو ں کا یہ نظریہ پوری طرح سے ذاتی ہے اور ٹیم انڈیا اس کی حمایت نہیں کرتی۔واضح رہے کہ بھارتی کرکٹ بورڈ نے بھی دونوں کرکٹرز ہاردک پانڈیا اور کے ایل راہول کو خواتین کے بارے میں نازیبا ریمارکس دینے پر معطل کردیا ہے، جس کے بعد وہ آسٹریلیا کے خلاف شروع ہونے والی ون ڈے سیریز سے باہر ہوگئے ہیں۔

ممبئی(نیٹ نیوز/ایمرا نیوز) بالی ووڈ فلم انڈسٹری پر ولن کے کردار میں کئی برسوں تک راج کرنے والے عظیم فنکارامریش پوری کو اپنے مداحوں سے بچھڑے14سال بیت گئے ۔لیکن ان کی بے مثال اداکاری کاجادو آج بھی مداحوں کے دلوں میں گھر کئے ہوئے ہے۔

1932 میں بھارتی پنجاب کے علاقے جالندھر میں پیدا ہونے والے امریش پوری نے بالی وڈ میں منفی کردار سے اپنے فلمی کیریئر کا آغاز کیا اور جلد ہی بھارتی فلم انڈسٹری پر چھا گئے۔بالی وڈ میں ولن کے طور پر انہوں نے اپنی صلاحیتوں کا لوہا کئی سالوں تک منوایا لیکن فلم مسٹر انڈیا کے کردار موگیمبو نے انہیں راتوں رات شہرت کی بلندیوں پر پہنچا دیا۔

امریش پوری نے رام لکھن ، سوداگر، کرن ارجن ،کوئلہ ، ودھاتا ، ہیرو ، پھول اور کانٹے ،پردیس،میری جنگ اور دل والے دلہنیا لے جائیں گے جیسی یادگار فلموں میں لازوال کردار ادا کئے۔وہ ہالی وڈ فلموں میں بھی جلوہ ہوئے جہاں انڈیانا جونز اینڈ دی ٹیمپل آف ڈوم جیسی بلاک بسٹر فلم میں اداکاری کے جوہر بھی دکھائے اور فلمی دنیا میں بطور ولن کئی ایوارڈ حاصل کئے۔12 جنوری 2005 کو فلمی دنیا کا یہ نامور ستارہ ممبئی کے اسپتال میں دماغ کی شریان پھٹ جانے کی وجہ سے موت کی اندھیری وادی میں کھو گیا ۔

منگلہ(نیٹ نیوز/ایمرا نیوز) وزیراطلاعات فواد چوہدری نے کہا ہے کہ سات مہینے ہوگئے،خزانہ پریشان ہے کہ اب تک کسی نے لوٹاہی نہیں، احتساب منطقی انجام تک پہنچےگا،چیخیں آسمان تک جارہی ہیں۔وزیراطلاعات فواد چوہدری نےمنگلہ میں میڈیا سے بات کرتے ہوئے کہا کہ پاکستان بھر میں عمران خان کی قیادت میں ایک مافیا کو شکست دی،ان کی قیادت میں ایسی تبدیلی آئی ہے جوکوئی سوچ نہیں سکتا تھا۔انہوں نے کہا کہ نوازشریف کی ملیں پیپرملیں تھیں کوئی کام نہیں کررہی تھیں،آصف زرداری کی کمپنیاں بھی صرف کاغذوں پرتھیں،ان لوگوں کی سات نسلوں نے کبھی کوئی کام نہیں کیا۔انہوں نے مزید کہا کہ نوازشریف سے اظہار یکجہتی کےلیے پندرہ لوگ بھی کوٹ لکھپت نہیں پہنچے،یہ مطالبے کررہے ہیں کہ عوام ہمارے پیسے بچانےکےلیےباہرنکلیں،انہوں نے عوام کو بے وقوف ہی سمجھ لیا ہے،اگرہم نے لے دے کی پالیسی ہی بنانی تھی توعمران خان کو وزیراعظم ہی کیوں بنایا۔وفاقی وزیر نے کہا کہ ہم نے مسلم امہ کی بات کی ،ہم نے کشمیر کی بات کی ،پانچ سال بعد ایک کروڑ سے بھی زائد نوکریاں دیں گے،پاکستان میں وہ لوگ شور مچارہے ہیں جوپیسے والے ہیں، غریب لوگوں کوہم نے بچایا ہے چاہےوہ گیس کے نرخ ہوں یا بجلی کے۔فواد چوہدری نے کہا کہ بیرون ملک مقیم پاکستانی پیسے بھیجنےکےلیےبینکنگ ذرائع کو استعمال کریں،دوہزارانیس پاکستان کی معاشی تکمیل کا سال ہوگا۔

اسلام آباد(نیٹ نیوز/ایمرا نیوز) وفاقی وزیرمواصلات و پوسٹل سروسز مراد سعید کہتے ہیں کہ ایسا کام کرنا چاہیے کہ قوم پاکستان پوسٹ پر فخر کرے۔وفاقی وزیر مواصلات مراد سعید نے اسلام آباد میں پریس کانفرنس کرتے ہوئے اعلان کیا کہ پاکستان پوسٹ 72 گھنٹے کی گارنٹڈ پوسٹل سروس دے گی۔انہوں نے مزید کہا کہ خصوصی بکنگ پوائنٹس بنا دیے گئے ہیں، ایکسپورٹ پارسل کے چارجز دیگر نجی کمپنیوں سے 5 گنا کم ہوں گے۔وفاقی وزیر مواصلات کا مزید کہنا ہے کہ کچھ شہروں میں پارسل ایک دن میں ہی پہنچایا جائے گا۔مراد سعید نے یہ بھی کہا کہ پاکستان پوسٹ خسارے میں تھا اب اپنے وسائل سے پروجیکٹ شروع کر رہا ہے۔