Category کالم

تحریر: طاہر کلاسرا
خیر سے اب پاکستانی حکمرانوں سے کرپشن کا کیا گلہ کرنا پوری دنیا ہی اس کام پر لگ گئی ہے۔ اور اپنے آپ کو مہذب ملک کے دعویدار بھی کرپٹ ثابت ہو رہے ہیں اور میڈیا کے ذریعہ بے نقاب بھی۔ ہاں لیکن پتہ نہیں کہاں سے لیکس ہوتی ہیں لیکن، تمام لوگوں کا کٹھہ جٹھہ کھول کر رکھ جاتی ہیں۔ جونہی لیکس آئیں تو وہاں پر پتا چلا کہ تمام پاکستانی سیاستدان اور بڑے بڑے افسروں نے اربوں ڈالر غیر قانونی طریقہ سے ملک سے باہر بھیجے اور دبئی میں جائیدادیں بنالیں اور خود کو محفوظ بھی کرلیا۔ اتنے بڑے سیکنڈل کے باوجود بھی ان مافیا لوگوں پر کسی نے ہاتھ نہ ڈالا اور نہ ہی کوئی قانون حرکت میں آیا ان لوگوں کے نام سامنے آئے میڈیا میں تذکرہ چلا ہے لیکن اس ملک کا قانون حرکت میں نہ آیا، نیب، ایف آئی اے اور دیگر حکومتی ادارہ سب خاموش اور بات ختم اور کام پھر سے شروع، یوں عام عادمی کو بھی یقین ہوگیا کہ بڑا آدمی کچھ بھی کرے اس کے خلاف کچھ بھی نہیں ہوتا، سب لوگ کچھ دنوں بعد بھول جاتے ہیں کہ کیا ہواتھا، ابھی دوبئی لیکس کے بعد کہیں سے پاناما لیکس آگیا جس میں مغربی ممالک سمیت کئی ممالک اس کی زد میں آئے اور وہاں کے حکمرانوں کو استعفیٰ دینا پڑا، یہ کیسے ہوسکتا ہے دنیا میں کچھ ہو اور ہمارے ملک کا نام نہ آئے۔
پاناما لیکس میں بھی پاکستان کے حکمرانوں کا نام آیا اور شور شرابا شروع ہوگیا ۔ عمران خان کے شور شرابہ پر پارلیمنٹ میں بحث ہوئی، معاملہ عدالت میں گیا، جی آئی ٹی بنی اورپنڈورا باکس کھلا جس کے نتیجہ میں وزیراعظم نوازشریف کو ہٹایا گیا اور ان کے خلاف نیب میں کیس شروع ہوگئے۔ سب پاناما کیس کی بدولت ہوا پھر عام آدمی کو پوچھنا پڑا کہ یار یہ پاناما لیکس کیا ہے۔ پتہ چلا کہ ٹیکس چوری کرنے اور کالا دھن سفید کرنے کا طریقہ ہے جس میں نام بھی نہ آئے اورکام بھی ہوجائے، جس کا پتہ لگا کہ جی آف شور کمپنی ہے اس کے ذریعے سب کام چل رہا ہے۔ سو یہ سب کچھ مہذب ممالک میں ہورہا تھا جہاں پر قانون کی پکڑ تھی لیکن ان کو فائدہ نہ ہے کہ باہر سے رقم ان ممالک میں آرہی تھی اور موج لگی ہوئی تھی اس طرح مافیا اپنا کام کرتا رہا۔ ان لیکس کے ذریعہ جس طرح ساری دنیا کے لوگ بے نقاب ہوئے ہیں یہ بھی کسی کامیابی سے کم نہیں۔ لیکن سوال پھر وہی پر ہے کیا یہ لوگ قانون کی گرفت میں آئیں گے یا پھر کام ویسے کا ویسے ہی چلتا رہے گا۔
ابھی پاناما کی دھول تھمی نہیں کہ پیراڈئیز لیکس سامنے آگئی اور اس میں دنیا بھر کے سیاسی، کاروباری لوگوں اور اہم شخصیات کے نام سامنے آگئے۔ ایک کروڑ 34لاکھ دستاویزات میں پرنس آغا خان، ملکہ برطانیہ،ملکہ اردن، امریکہ کے خارجہ اور تجارت کے وزیر ترک وزیراعظم کے صاحبزادوں ، سعودی اور قطری رہنماؤں کے نام پاکستان سے شوکت عزیز، ایاز خان نیازی، صدر الدین ہاشوانی، میاں منشاء سونیری بینک کے مالک کا نام بھی شامل دستاویزات ہیں ۔ 135سوئس اکاؤنٹس کا نام بھی شامل، دستاویزات کے ایک بڑے مجموعے نے دنیا بھر میں پھیلے ہوئے ٹیکس بچانے کے محفوظ مقامات کا انکشافات ہوا۔ جس سے دولت اور طاقت کا نظام واضح ہوجاتا ہے اور اس میں پاکستانیوں کے آف شور اکاؤنٹس میں بھی وسعت آگئی ۔
نئی دستاویزات میں شوکت عزیز سابق وزیراعظم پاکستان کا نام بھی شامل ہے۔ نئی لیکس ہونے والی دستاویزات کو پیراڈائیز لیکس کا نام دیا گیا ہے اور ان کی وجہ سے دنیا کے کئی دارالحکومت ہل گئے ہیں۔ ان نئے دستاویزات میں ڈونلڈ ٹرمپ امریکی صدر کے وزیر بھی زد میں آگئے ہیں ان دستاویزات میں سوشل میڈیا کی معروف سائٹس ٹوئیٹر وفیس بک کو بھی اسکرونٹی کے دائرہ کار میں لایا گیا ہے۔ جنہوں نے روس کی سرکاری کمپنیوں میں بھاری سرمایہ کاری کی ہوئی ہے، ان دستاویزات کے ذریعہ عوام کو یہ معلومات بھی مل سکیں گی کس طرح ایپل، نائیکی اور بین الاقوامی کمپنیوں کو یہ سہولت دی گئی کہ وہ ٹیکس سے بچ سکیں نئی جاری ہونیوالی دستاویزات جرمن اخبار نے حاصل کیں اور انہیں (آئی سی آئی جی) کے ساتھ اور دنیا کے 67ممالک کے 38صحافیوں کے ساتھ شیئرکیا۔ اور انہیں پوری دنیا میں بے نقاب کیا کہ کیسے آف شور کمپنیاں بناکر یہ لوگ لوٹ مار کرکے پیسہ بچاتے ہیں اورٹیکس بھی ادا نہیں کرتے بڑے بڑے پاکستانیوں کے برج اب اپنے آپ کو بچائے کیسے؟ ہاتھ پاؤں مار رہے ہیں اور جواز گھڑرہے ہیں کیونکہ انہیں یہ بھی یقین ہے کہ ریاست ان کاکچھ بھی نہیں بگاڑ سکتی، اس لیے یہ نہایت آرام اور سکون بیٹھے ہیں۔
لیکس آنے کے بعد کم ازکم ایک بات تو طے ہے کہ دنیا میں یہ لوگ بے نقاب تو ہوگئے ہیں اور شاید ان پر عوامی دباؤ بھی بڑھے ، وقت کے ساتھ ساتھ عوام کے اندر شعور بڑھتا جارہا ہے، اب لوگ کم ازکم ان سے نفرت تو کرتے ہیں۔ میری تو یہ دعا ہے کہ ایسی لیکس آتی رہیں اور لوگوں کو پتہ چلے کہ یہ لوگ ملک کو دیمک کی طرح چاٹ کرکھاگئے ہیں کیسے ایک آمر نے ہم پر اس شخص کو ملک کا وزیراعظم مسلط کیا جس کا شناختی کارڈ بھی ہمارے ملک کا نہیں تھا، اوروہ ملک کولوٹ گیا کمی تو کسی نے نہیں چھوڑی، اب دیکھنا یہ ہے کہ اس پیراڈائیز لیکس کی لپیٹ میں بھی اب کوئی آتا ہے یا یہ سرمایہ دار لوگ بڑے معزز ہوکر بچ نکلتے ہی۔ بحرحال ہلچل تو مچی ہے ان کے اصلی چہرے تو عوام کے سامنے آئے ہیں یہی کافی ہے آئیے دیکھتے ہیں کہ کیا ہوتا ہے خبر تو یہ بھی ہے کہ سعودی عرب میں بھی کرپشن کے خلاف جنگ ہے جس میں شہزادے لپیٹ میں آئے ہیں اب اللہ جانے اقتدار کی جنگ ہے یا کرپشن کی۔لیکن پکڑ دھکڑ جاری ہے۔ ہمارے ملک میں بھی پکڑ دھکڑ ہوتی ہے مگر ہوتا کچھ نہیں۔ سب پتلی گلی سے نکل جاتے ہیں صرف اللہ کی لاٹھی ہی ان سے حساب لے سکتی ہے۔ اس کام کیلئے لیکس کافی نہیں ہے لیکس آتی رہیں گی اور ہمارے ملک کے حکمرانوں کے نام بھی آتے رہیں گے ایک بات تو طے ہے کہ ان لیکس سے یہ بات تو ثابت ہے کہ اس حما م میں سب ننگے ہیں۔
***

مہمان کالم
جنگ ختم ہوگئی لیکن جنگ کے اثرات ابھی باقی تھے‘ فرانس کے ہر شہری نے جنگ میں زخم کھائے تھے‘ لوگ بے روزگار ہوئے‘ عمارتیں ڈھے گئیں‘ لاشیں بھی گریں اور ہزاروں لاکھوں لوگ اپنے جسمانی اعضاء سے بھی محروم ہوئے‘ پورا فرانس زخمی تھا‘ میتھیو ریکرڈ نے اس فضا میں آنکھ کھولی‘ وہ 15 فروری 1946ء کو مشرقی فرانس کے قصبے ”ایکس لے بینز“میں پیدا ہوا‘ والد فلاسفر بھی تھا اور حساس بھی‘ والد کے دماغ پر جنگ نے گہرے اثرات چھوڑے‘ وہ ہر وقت اداس رہتا تھا‘ فرانس میں اس وقت شاید ہی کوئی شخص خوش ہو‘ لوگ اداسی کی چادر تلے زندگی گزار رہے تھے‘ میتھیو ریکرڈ کا پورا بچپن اس اداسی میں گزرا‘ وہ سکول جاتا تھا‘ ماں کے ساتھ بازار میں خریداری کرتا تھا‘ وہ لائبریری اور تھیٹرز میں بھی جاتا تھا اور وہ کافی شاپس اور ریستورانوں میں بھی بیٹھتا تھا مگر اسے کسی جگہ خوشی دکھائی نہیں دیتی تھی‘ لوگ اس وقت یوں چلتے تھے جیسے اندھے دھند میں ٹامک ٹوئیاں مار رہے ہوں‘ فرانس کے دس بڑے شہر قہقہے کو ترس گئے تھے‘ موسیقی سے بھی شوخی اڑ گئی تھی‘ میتھیو اس ماحول میں پروان چڑھتا رہا یہاں تک کہ اس نے 1972ء میں ”مالیکیولر جینیٹکس“ میں پی ایچ ڈی کر لی‘ وہ اس کے بعد عملی زندگی میں آ گیا‘ وہ فوٹو گرافی کے جنون میں مبتلا تھا‘ وہ فری لانس فوٹو گرافر بن گیا‘ وہ اداس چہرے اور غم زدہ فضا کو کیمرے کی فلم پر منتقل کرتا تھا‘ اس نے اس دوران دوست بھی بنائے‘ گرل فرینڈز بھی بنائیں‘ روپیہ پیسہ بھی اکٹھا کیا‘ گھر بھی بنایااور گاڑی بھی خریدی‘ وہ ایک نارمل زندگی گزار رہا تھا‘ اس کے پاس سب کچھ تھا‘ گھر‘ گاڑی‘ روپیہ‘ گرل فرینڈز‘ کام اور دوست احباب لیکن میتھیو ریکرڈ کی زندگی میں اس کے باوجود کسی چیز کی کمی تھی‘ وہ اپنی ذات میں ایک مہیب خلاء محسوس کرتا تھا‘ وہ خوش نہیں تھا‘ وہ محسوس کرتا تھا وہ کسی قیمتی چیز سے محروم ہے‘ کوئی ہے جو اس کی ذات میں شامل نہیں‘ کوئی چیز ہے جو وہاں نہیں جہاں اسے ہونا چاہیے‘ میتھیو وہ چیز تلاش کر رہا تھا‘ وہ اس تلاش میں چرچ بھی گیا‘ سینا گوگا بھی‘ مسجد بھی اور مندر بھی‘ وہ نفسیات دانوں کے زیر علاج بھی رہا اور اس نے جادو ٹونے بھی کئے‘ وہ جوگیوں سے بھی ملا اور وہ جنگلوں‘ ویرانوں اور صحراؤں میں بھی مارا مارا پھرتا رہا لیکن اس کے اندر کا خلاء‘ اندر کی کمی پوری نہ ہوئی‘ میتھیو نے تنگ آ کر فوٹو گرافی چھوڑی اور ”بودھ ازم“ جوائن کر لیا‘ وہ بھکشوؤں کے ساتھ گھومنے پھرنے لگا‘اس نے شروع میں سادگی اختیار کی‘ پھر یوگا کلاسز سٹارٹ کیں اور آخر میں اس نے بھکشوؤں کے کپڑے اور لکڑی کے جوتے پہننا شروع کر دیئے‘ وہ بھکشوؤں کے ساتھ بھارت بھی چلا گیا‘ وہ ہمالیہ کے غاروں میں بھی رہا اور وہ بودھ راہبوں کی درس گاہوں میں بھی داخل رہا‘ یہ تپسیا کام آئی اور میتھیو ریکرڈ آہستہ آہستہ پرسکون ہوتا گیا‘ وہ اندر سے بھرتا چلا گیا‘ وہ اس زمانے میں بنگال کے قصبے دارجیلنگ پہنچ گیا‘اس نے مضافات میں ایک پہاڑی گاؤں تلاش کیا اور وہ وہاں گوشہ نشین ہو گیا‘ وہ پانچ سال جدید معاشرے سے کٹا رہا‘ وہ صرف ضروریات زندگی کیلئے باہر نکلتا تھا اور جلد واپس آ جاتا تھا‘ وہ اپنی ضروریات بھی کم کرتا چلا گیا یہاں تک کہ وہ دو دو‘ تین تین دن بغیر کچھ کھائے پئے گزار دیتا تھا‘ وہ ہمہ وقت مراقبے میں رہتا تھا‘ وہ سانس روکتا اور اپنے من کی دنیا میں چھلانگ لگا دیتا تھا‘ مراقبہ اسے اندر سے نہال کرتا چلا گیا یہاں تک کہ وہ پانچ سال بعد باہر نکلا تو وہ مکمل طور پر ایک مختلف انسان تھا‘مطمئن‘ مسرور اور صحت مند۔میتھیو ریکرڈ نے تپسیا کے ان برسوں میں محسوس کیا وہ دراصل خوش نہیں تھا‘ خوشی وہ کھوئی ہوئی میراث تھی جسے وہ برسوں سے تلاش کر رہا تھا‘ یہ میراث سماجی آلودگی‘ مفادات کے نہ ختم ہوتے کھیل اور مادیت کے گدلے پانیوں میں گم تھی‘ وہ جب سب کچھ چھوڑ چھاڑ کر جنگلوں میں نکل کھڑا ہوا‘ وہ جب بدن سے نکل کر من کی دنیا میں اتر گیا تو وہ خوشی تک پہنچ گیا‘ اس نے نروان پا لیا۔میتھیو ریکرڈ نے اس کے بعد کتابیں لکھنا شروع کر دیں‘ وہ اس وقت نوکتابوں کا مصنف ہے‘
یہ آج بھی فوٹو گرافی کرتا ہے‘ اس نے بودھوں کی قدیم تحریروں کا ترجمہ بھی کیا‘ اس نے1998ء میں اپنے والد کے ساتھ مکالمے پر ”دی مونک اینڈدی فلاسفر“ کے نام سے ایک معرکۃالآراء کتاب لکھی‘ یہ کتاب بیسٹ سیلر رہی‘ یہ اب تک 21 زبانوں میں ترجمہ ہو چکی ہے اور یورپ میں اس کی ریکارڈ سیل ہوئی‘ میتھیو ریکرڈ کتابوں سے حاصل ہونے والی آمدنی سے فری میڈیکل کلینکس‘ سکول اور یتیم خانے بنا رہا ہے‘ یہ ”مائینڈ لائف انسٹی ٹیوٹ“ کا بورڈ ممبر بھی ہے‘یہ ادارہ بودھ مت کے روحانی پیشوا دلائی لامہ لہاموڈون ڈرب نے 1991ء میں قائم کیا تھا‘ یہ 26برسوں سے انسانی دماغ کو سائنسی بنیادوں پر پرکھ رہا ہے‘ میتھیو نے اس ادارے کو اپنے اوپر ہر قسم کے تجربے کی اجازت دے رکھی ہے‘ یہ ”ورلڈ ہیپی نیس فورم“ کے ساتھ بھی منسلک ہے‘ یہ فورم آسٹریلین بزنس مین ٹونی سٹیل نے 2006ء میں تخلیق کیا تھا‘ یہ فورم لوگوں کو خوشی کی ٹریننگ دیتا ہے‘ میتھیو فورم کی سڈنی‘ لندن‘ سان فرانسسکو اور سنگا پور میں ہونے والی کانفرنسوں میں گیسٹ سپیکر کی حیثیت سے شریک ہوتا ہے‘یہ لوگوں کو خوشی کی اہمیت بھی بتاتا ہے اور لوگوں کو خوش ہونے کے طریقے بھی سکھاتا ہے۔ ہم یہاں چند لمحوں کیلئے میتھیو ریکرڈ کی سٹوری روکتے ہیں اور یونیورسٹی آف وسکانسن کے ایک دلچسپ تجربے کی طرف آتے ہیں‘یونیورسٹی آف وسکانسن امریکی ریاست وسکانسن کے شہرمیڈیسن میں واقع ہے‘ یہ یونیورسٹی 1848ء میں قائم ہوئی‘ یونیورسٹی کا نیورو سرجری ڈیپارٹمنٹ انوکھے تجربات کی وجہ سے دنیا بھر میں مشہور ہے۔
یونیورسٹی کے نیوروسرجری ڈیپارٹمنٹ نے دنیا کے نامور اعصابی سائنس دان ڈاکٹر رچرڈ ڈیوڈ سن کی قیادت میں ایک ٹیم بنائی اور اس ٹیم نے بارہ سال قبل انسانی دماغ پر ریسرچ شروع کر دی‘ یہ ریسرچ خوشی اور خوشی کے دوران دماغ سے نکلنے والے کیمیکلز پر مبنی تھی‘ نیورو سرجنز کے یونٹ نے ان بارہ برسوں میں ہزاروں لوگوں پر تجربات کئے‘ تجربات کے نتائج حیران کن تھے‘ مثلاً ڈاکٹروں کو معلوم ہوا مراقبہ کرنے والے لوگ عام لوگوں کی نسبت زیادہ مطمئن‘ خوش اور صحت مند ہوتے ہیں‘یہ بھی معلوم ہوا ہم میں سے جو لوگ دوسروں کیلئے ”ہیلپ فل“ ہوتے ہیں وہ زیادہ اچھی زندگی گزارتے ہیں اور یہ بھی معلوم ہوا وسیع القلب لوگ زیادہ خوش‘ زیادہ مسرور ہوتے ہیں۔ ہم اب واپس میتھیو ریکرڈ کی طرف آتے ہیں‘ میتھیو ریکرڈ بھی یونیورسٹی آف وسکانسن کے اس تجربے میں شامل تھا‘ یہ بارہ سال نیورو سرجنز کے تجربات کا حصہ رہا‘ ڈاکٹروں نے ہزاروں بار اس کے خون کے نمونے لئے‘ اس کے دماغ کی ہزاروں فلمیں بنائیں اور اس کے سینکڑوں جسمانی ٹیسٹ کئے‘یہ ان تمام تجربات کے دوران خوش‘ مطمئن اور مسرور پایا گیا‘ ڈاکٹروں کو بارہ برسوں کے دوران میتھیو ریکرڈ کے جسم اور دماغ میں دکھ‘ اداسی‘ غصے اور رنج کا کوئی کیمیکل نہیں ملا‘ وہ سو فیصد مطمئن اور خوش انسان تھا‘ یہ ایک حیران کن بات تھی‘ ڈاکٹروں نے بارہ سال بعد یہ حقیقت تسلیم کر لی اور میتھیو ریکرڈ کو دنیا کا خوش ترین انسان ڈکلیئر کر دیا‘ یہ خوشی کا ٹائٹل حاصل کرنے والا تاریخ کا پہلا انسان ہے‘ یہ اعزاز آج تک کسی انسان کو حاصل نہیں ہوا۔دنیا بھر کے لوگ میتھیو ریکرڈ سے خوشی کا راز معلوم کرنا چاہتے ہیں‘ میتھیو سے جب بھی خوشی کا راز پوچھا جاتا ہے وہ مسکرا کر جواب دیتا ہے ”خوشی تک پہنچنا زیادہ مشکل نہیں‘ ہم جب بھی اپنی ذات کے گرد گھومتے ہیں‘ ہمارے اندر موجود منفی کیمیکلز ایکٹو ہو جاتے ہیں‘ یہ کیمیکلز خون میں پھیل جاتے ہیں اور ہم غم زدہ ہو جاتے ہیں“ وہ کہتا ہے ”آپ اگر خوش رہنا چاہتے ہیں تو آپ اپنی ذات کے خول سے باہر آ جائیں‘ آپ اپنے بجائے لوگوں کے بارے میں سوچنا شروع کر دیں‘آپ کے اندر خوشی کے کیمیکل پیدا ہونے لگیں گے“ میتھیو کا کہنا ہے ”آپ اپنے اندر دوسروں کیلئے ہمدردی اور خیر خواہی کے جذبات پیدا کر لیں تو آپ اندر سے خوشی سے بھر جائیں گے“ لوگ میتھیو ریکرڈ سے پوچھتے ہیں ”کیا یہ آسان کام ہے“ وہ جواب دیتا ہے ”کام کا فارمولہ آسان لیکن کام مشکل ہے“ میتھیو کا کہنا ہے ”میں نے بھی آہستہ آہستہ یہ گُر سیکھا تھا‘ میں شروع میں مراقبہ کرتا تھا‘ میں پندرہ منٹ تک اپنے آپ کو تمام منفی خیالات سے پاک کر دیتا تھا‘ میں اپنا من خالی کر کے اس میں مثبت خیالات بھر تا رہتا تھا‘میں نے دیکھا میں شروع میں پریشانیوں‘ دکھوں اور تاسف سے آزاد ہوا اور پھر میں حسد‘ لالچ‘ غصے اور خوف کے چنگل سے آزاد ہوتا چلا گیا‘ میں جوں جوں خود کو ہلکا پھلکا محسوس کرتا گیا میں توں توں مراقبے میں اضافہ کرتا چلا گیا یہاں تک کہ میرے جسم میں منفی کیمیکلز ختم ہو گئے اور میں دنیا کا خوش ترین انسان ڈکلیئر ہو گیا“ میتھیو ریکرڈ کا کہنا ہے ”میں تین قسم کے مراقبے کرتا ہوں‘ کمپیشن‘ اوپن ائیر نیس اور اینا لیٹک‘ میں اپنے دل میں پوری دنیا کیلئے ہمدردی پیدا کرتا ہوں‘پھر اپنا دل پوری دنیا کیلئے کھول دیتا ہوں اور آخر میں پرسکون ہو جاتا ہوں‘ یہ تینوں مراقبے میرا دل خوشی سے بھر دیتے ہیں“ میتھیو ریکرڈ کا کہنا ہے غم اور خوشی کبھی اکٹھے نہیں رہ سکتے‘ آپ غم کو دل سے نکال دیں‘ خوشی فوراً وہاں آ بیٹھے گی اور غم کو بھگانے کا بہترین طریقہ دوسروں کے ساتھ ہمدردی ہے‘ آپ انسانیت کے ہمدرد بن جائیں‘ آپ اپنا سب کچھ لوگوں کیلئے وقف کر دیں‘ غم آپ کے دل سے بھاگ جائے گا اور خوشی وہاں آباد ہو جائے گی“۔میتھیو ریکرڈ اس وقت نیپال میں رہائش پذیر ہیں۔

مہمان کالم
پائلٹ کے منہ سے خدا حافظ نیویارک نکلا اور تاریخ کا ایک پورا باب بند ہوگیا‘ پاکستان اور امریکا کے درمیان فضائی تعلقات منقطع ہو گئے۔پی آئی اے نے امریکا کےلئے پہلی فلائیٹ17 جون 1961ءکو چلائی تھی‘ امریکا اس وقت تک دنیا کےلئے دور دیس ہوتا تھا‘ سوویت یونین سے کوئی فلائیٹ امریکا نہیں جاتی تھی‘ چین‘ جاپان‘ تھائی لینڈ‘ ملائشیا‘ گلف کی تمام ریاستوں‘ مشرقی یورپ اور افریقائی ممالک سے بھی نیویارک کےلئے کوئی فلائیٹ نہیں چلتی تھی‘ پی آئی اے ایشیا اور امریکا کے درمیان پل بن گئی‘ ایشیا کے نوے فیصد مسافر کراچی آتے‘ پی آئی اے میں بیٹھتے اور نیویارک روانہ ہو جاتے‘ گلف اور افریقہ کے مسافر بھی پی آئی اے کو فوقیت دیتے تھے‘ پی آئی اے نے 1970ءاور1980 کی دہائی میں بھی لاہور اور اسلام آباد سے براہ راست فلائیٹس شروع کر دیں‘ یہ فلائیٹس نیویارک اور شکاگو جاتی تھیں‘ یہ سلسلہ 56 سال جاری رہا‘ اس دوران دنیا بدل گئی‘ ایشیا‘ گلف‘ مشرقی یورپ اور افریقہ میں دھڑا دھڑ ائیر لائینز بنیں‘ پی آئی اے کا سٹاف ان ائیر لائینز میں جمپ کرتا رہا‘ پی آئی اے میں سیاسی بھرتیوں کا سلسلہ شروع ہوا‘ جہازوں کا معیار پست ہوا‘ سٹاف کے رویئے خراب ہوئے اور ائیر پورٹس گندے‘ امیگریشن کا عملہ بدتمیز اور فلائیٹس میں تاخیر ہونے لگی‘ ہمارے جہاز بھی گرنے لگے اورفلائیٹس سے ہیروئن بھی برآمد ہونے لگی‘ آخری کسر یونینز نے پوری کر دی‘ پائلٹس نے جہاز اڑانے اور ائیر ہوسٹسز نے ڈیوٹی دینے سے انکار کر دیا یہاں تک کہ دنیا کا بہترین ادارہ زوال کی خوفناک مثال بن گیا‘ پی آئی اے کے بین الاقوامی روٹس بند ہوتے چلے گئے‘ آخر میں امریکا بچا تھا‘ 29 اکتوبر 2017ءکو یہ روٹ بھی بند ہو گیا‘ پی آئی اے کی آخری فلائیٹ پی کے 711 اکتوبر کی 27تاریخ کو لاہور سے اڑی‘ 29 اکتوبر کو نیویارک سے واپس آئی اور پی آئی اے نے امریکا کے آپریشنز بند کرنے کا اعلان کر دیا‘ پی آئی اے کا کہنا ہے یہ روٹ دس سال سے خسارے میں جا رہا تھا‘ کارپوریشن کو سالانہ ڈیڑھ ارب روپے نقصان ہوتا تھا‘ پی آئی اے کو گزشتہ سال 40 ارب روپے گھاٹا پڑا جس کے بعد کل قرضہ 400 ارب روپے ہوگیا‘ کارپوریشن اب بارسلونا‘ میلان اور پیرس کے روٹس بھی بند کرنے کا منصوبہ بنا رہی ہے‘ یہ روٹس بھی بند ہو گئے تو پاکستان کا یورپ سے بھی رابطہ ٹوٹ جائے گا یوں پاکستان کا ایک اور سنہری باب بند ہو جائے گا۔
وزیراعظم شاہد خاقان عباسی نے دو نومبر کو پی آئی اے کی انتظامیہ کو کابینہ میں بریفنگ دینے کی دعوت دی‘ پی آئی اے کی ساری انتظامیہ پہنچ گئی‘ چیئرمین عرفان الٰہی بھی بریفنگ میں موجود تھے اور سول ایوی ایشن کے مشیر مہتاب عباسی بھی‘ پی آئی اے کے چار اعلیٰ عہدیداروں نے بریفنگ دی‘ کابینہ کے سامنے 58 سلائیڈز چلائی گئیں‘ پی آئی اے کا سارا عروج وزوال کابینہ کے سامنے رکھا گیا اور آخر میں کابینہ سے ”بیل آؤٹ پیکج“ مانگ لیا گیا‘وزیراعظم اطمینان سے بریفنگ سنتے رہے۔
بریفنگ کے آخر میں وزیراعظم نے پی آئی اے کے چاروں عہدیداروں سے پوچھا ”حکومت اگر یہ رقم دے دے تو کیا پی آئی اے چل جائے گی“ چاروں کا جواب ناں تھا‘ وزیراعظم نے پوچھا ”پھر یہ رقم آپ کو کیوں دی جائے“ دوسری طرف خاموشی چھا گئی‘ وزیراعظم نے کہا ”پی آئی اے 400 ارب روپے کی مقروض ہے‘ حکومت اس قرضے کی ضامن ہے‘ یہ قرض بالآخر عوام کو ادا کرنا پڑے گا‘ اس کا ذمہ دار کون ہے؟“ دوسری طرف خاموشی چھائی رہی‘ وزیراعظم نے اس کے بعد چاروں عہدیداروں سے کہا ”آپ چاروں پی آئی اے کا کوئی ایک اور اصلی مسئلہ بتائیں“ پہلی باری چیئرمین کی تھی‘ چیئرمین نے تقریر کرنے کی کوشش کی‘ وزیراعظم نے انہیں روک کر کہا ”آپ نے صرف ایک مسئلہ بتانا ہے“ چیئرمین پھنس گیا‘ وزیراعظم نے اس کے بعد باقی تینوں اعلیٰ عہدیداروں سے بھی یہ سوال کیا‘ چاروں کا جواب مختلف تھا‘ بتایا گیا سٹاف زیادہ اور جہاز کم ہیں‘ وزیراعظم نے پوچھا‘ سٹاف کی کل تنخواہیں کتنی ہیں‘ جواب ملا 18 ارب روپے‘ وزیراعظم نے کہا یہ کل ریونیو کا 19 فیصد بنتا ہے‘ یہ رقم زیادہ نہیں‘ دنیا کی بے شمار کمپنیاں اور کارپوریشنز اپنے ریونیو کا 21 فیصد تک ”ایچ آر“ پر خرچ کرتی ہیں‘ آپ کا یہ خیال غلط ہے کہ پی آئی اے میں سٹاف زیادہ ہے‘ بتایا گیا بے شمار روٹس پر گھاٹا پڑ رہا ہے‘ وزیراعظم نے کہا آپ نقصان والے روٹس پر فلائیٹس کیوں اڑاتے ہیں‘ آپ یہ بند کر دیں‘ بتایا گیا‘ پی آئی اے ”نیشنل فلیگ کیریئر“ ہے‘ ملک کی بدنامی ہوتی ہے‘ وزیراعظم نے جواب دیا‘ ہمیں اس الوژن سے بھی نکلنا ہوگا‘ ملک کی بے عزتی روٹس بند کرنے سے نہیں ہوتی روٹس پر خراب سروسز سے ہوتی ہے‘ آپ دوسرے ملکوں کے اداروں کے مسائل میں اضافہ کریں گے یا آپ مسافروں کو تنگ کریں گے تو اس سے ملک کی خاک نیک نامی ہو گی‘ بتایا گیا مینجمنٹ ایشوز ہیں‘ یونین کا دباؤ ہے‘ سیاسی بھرتیاں اور سیاسی مداخلت ہے‘ یہ تمام ایشوز مل کر ائیر لائین کو چلنے نہیں دے رہے‘ وزیراعظم نے جواب دیا‘ یہ تمام ایشوز قابل حل ہیں‘ دنیا کے بے شمار ادارے ان مسائل سے گزرتے ہیں‘یہ ان مسائل کو حل بھی کر لیتے ہیں لیکن پی آئی اے 12 سال سے خوفناک خسارے کا شکار ہے‘ ہم جانتے بوجھتے ہوئے بھی آج تک یہ مسائل حل نہیں کر سکے‘ کیوں؟ انتظامیہ کے پاس کوئی جواب نہیں تھا‘ وزیراعظم نے کہا ”آپ چار لوگ ہیں‘ آپ چاروں مل کر پی آئی اے کے ایک اور حتمی مسئلے کا تعین نہیں کر سکے‘ آپ یہ ادارہ کیسے چلائیں گے‘ آپ پی آئی اے کو کیسے بحال کریں گے“ وزیراعظم نے اس کے بعد کہا ”میں پی آئی اے کا وہ مسئلہ جانتا ہوں‘ یہ ادارہ صرف ایک مسئلے کا شکار ہے‘وہ مسئلہ حل ہو جائے تو یہ ادارہ بحال ہو جائے گا‘ میں آپ کو وقت دیتا ہوں‘ آپ واپس جائیں‘ وہ مسئلہ ڈھونڈیں‘ ہم دوبارہ بیٹھیں گے اور اگلی میٹنگ میں پی آئی اے کی بحالی کا پلان بنا ئیں گے“ وزیراعظم اس کے بعد اپنی نشست سے اٹھ گئے‘ پوری کابینہ اس گفتگو پر حیران رہ گئی۔وزیراعظم شاہد خاقان عباسی یقینا پی آئی اے کے بنیادی مسئلے سے واقف ہوں گے‘ یہ خود سول ایوی ایشن سے تعلق رکھتے ہیں‘ پائلٹ بھی ہیں‘ پی آئی اے کے چیئرمین بھی رہے ہیں اور یہ ملک میں کامیابی سے ایک پرائیویٹ ائیر لائین بھی چلا رہے ہیں چنانچہ یہ نیشنل فلیگ کیریئر کے اصل ایشو سے آگاہ ہوں گے‘میں ان کی رہنمائی نہیں کر سکتا لیکن کیونکہ میں ایک دائمی مسافر ہوں‘ میں ملک کے اندر اور باہر سینکڑوں مرتبہ سفر کر چکا ہوں‘ میں دنیا کی آدھی بڑی ائیر لائینز کا مہمان بھی رہ چکا ہوں چنانچہ میں اپنے وسیع تر تجربے کی بنیاد پر پی آئی اے کے واحد مسئلے کی نشاندہی کر سکتا ہوں اور وہ مسئلہ ”سینس آف اونر شپ“ ہے‘ پی آئی اے ملک کے ان سرکاری اداروں میں شامل ہے جس کا کوئی مائی باپ نہیں‘ چپڑاسی سے لے کر چیئرمین تک کوئی شخص اس کی اونر شپ لینے‘اس کو اپنا ادارہ ماننے کےلئے تیار نہیں‘ یہ ایک ایسی بھینس ہے جس کی بوٹیاں ہر شخص نوچتا رہا اور ہر شخص نوچتا رہنا چاہتا ہے چنانچہ یہ ادارہ اپنی ہی قبر کا سنگ عبرت بن کر رہ گیاہے‘ ہم اگر پی آئی اے کو ٹھیک کرنا چاہتے ہیں تو ہمیں اس کی ”اونر شپ“ لینا ہو گی‘ ہمیں اسے چودھری شوگر مل‘ انہار ڈیری پراڈکٹس اور ائیر بلیو کی طرح چلانا ہوگا‘ آپ آپریشنز کم کر دیں‘ شیڈول کی پابندی کریں‘ غیر ضروری ملازمین کو فارغ کر دیں‘ فلائیٹ کے دوران سہولتوں میں اضافہ کریں‘بکنگ آن لائین کر دیں‘ پی آئی اے کی جائیدادیں بیچ کر قرضے ادا کر دیں‘ پروفیشنل مینجمنٹ لے آئیں‘ آپ مختلف ائیر لائینز کے ساتھ روٹس شیئرنگ کرلیں اور آپ پی آئی اے کو جلد سے جلد پرائیویٹائز کر دیں ‘پی آئی اے بحال ہو جائے گی‘ ہم ان ایشوز پر توجہ دینے کی بجائے دس ماہ سے پی آئی اے کا ایک جہاز تلاش کر رہے ہیں‘ ہم اس جہاز کا ماتم کرتے نہیں تھک رہے لیکن کسی نے آج تک اصل ایشو سمجھنے کی کوشش نہیں کی‘ پی آئی اے کے 4 اے 310 جہاز 25 سال کی مدت پوری کر چکے ہیں‘یہ جہاز اب اڑنے کے قابل نہیں ہیں‘ پی آئی اے کے سابق جرمن سی ای او برنڈ ہلڈن برانڈ نے ان میں سے ایک جہاز فلم سازی کےلئے کرائے پر دے دیا‘ کار پوریشن کو دو لاکھ 10 ہزار یوروز کرایہ مل گیا‘ یہ جہاز بعد ازاں جرمنی کے شہرلیپزگ بھجوا دیا گیا‘ پی آئی اے لیپزگ سے فلائیٹس شروع کرنا چاہتی تھی‘ یہ جہازلیپزگ ائیرپورٹ پر پی آئی اے کا نشان بن کر کھڑا ہونا تھا لیکن ایشو بن گیا‘ ڈیل میں یقینا کوئی نہ کوئی خرابی ہو گی‘ کوئی نہ کوئی غلطی‘ کوئی نہ کوئی کوتاہی بھی ہو گی لیکن آپ کمال ملاحظہ کیجئے اس دوران مزید تین اے 310 جہاز گراؤنڈ ہو گئے‘ یہ تینوں جہاز پچھلے چھ ماہ سے کراچی ائیر پورٹ پر کھڑے ہیں‘ ان کے بارے میں آج تک کسی نے سوچا اور نہ ہی پوچھا‘ کراچی ائیرپورٹ پر دو سیون فور سیون بھی موجود ہیں‘ ایک کھڑا کھڑا گل رہا ہے اور دوسرے میں کافی شاپ بن چکی ہے‘ کیا یہ جہاز ‘ جہازنہیں ہیں اور کیا ان کا کوئی والی وارث نہیں؟ ہم جرمنی میں کھڑا جہاز واپس لانا چاہتے ہیں ‘ لانا چاہیے لیکن ائیر پورٹ پر سڑتے ہوئے جہاز بیچنے کےلئے تیار نہیں ہیں‘کیوں؟ یہ وہ بے وقوفیاں ہیں جنہوں نے پی آئی اے کو تابوت بنا دیا لہٰذا میں سمجھتا ہوں پی آئی اے کا اصل مسئلہ حماقت ہے‘ ہم جب تک حماقتوں سے نہیں نکلیں گے ہم پی آئی اے سمیت ملک کا کوئی ادارہ نہیں چلا سکیں گے‘ ہمیں یہ بات پلے باندھ لینی چاہیے۔

مہمان کالم
پائلٹ کے منہ سے خدا حافظ نیویارک نکلا اور تاریخ کا ایک پورا باب بند ہوگیا‘ پاکستان اور امریکا کے درمیان فضائی تعلقات منقطع ہو گئے۔پاکستان ائیر لائین (پی آئی اے) نے امریکا کےلئے پہلی فلائیٹ17 جون 1961ءکو چلائی تھی‘ امریکا اس وقت تک دنیا کےلئے دور دیس ہوتا تھا‘ سوویت یونین سے کوئی فلائیٹ امریکا نہیں جاتی تھی‘ چین‘ جاپان‘ تھائی لینڈ‘ ملائشیا‘ گلف کی تمام ریاستوں‘ مشرقی یورپ اور افریقائی ممالک سے بھی نیویارک کےلئے کوئی فلائیٹ نہیں چلتی تھی‘ پی آئی اے ایشیا اور امریکا کے درمیان پل بن گئی‘ ایشیا کے نوے فیصد مسافر کراچی آتے‘ پی آئی اے میں بیٹھتے اور نیویارک روانہ ہو جاتے‘ گلف اور افریقہ کے مسافر بھی پی آئی اے کو فوقیت دیتے تھے‘ پی آئی اے نے 1970ءاور1980 کی دہائی میں بھی لاہور اور اسلام آباد سے براہ راست فلائیٹس شروع کر دیں‘ یہ فلائیٹس نیویارک اور شکاگو جاتی تھیں‘ یہ سلسلہ 56 سال جاری رہا‘ اس دوران دنیا بدل گئی‘ ایشیا‘ گلف‘ مشرقی یورپ اور افریقہ میں دھڑا دھڑ ائیر لائینز بنیں‘ پی آئی اے کا سٹاف ان ائیر لائینز میں جمپ کرتا رہا‘ پی آئی اے میں سیاسی بھرتیوں کا سلسلہ شروع ہوا‘ جہازوں کا معیار پست ہوا‘ سٹاف کے رویئے خراب ہوئے اور ائیر پورٹس گندے‘ امیگریشن کا عملہ بدتمیز اور فلائیٹس میں تاخیر ہونے لگی‘ ہمارے جہاز بھی گرنے لگے اورفلائیٹس سے ہیروئن بھی برآمد ہونے لگی‘ آخری کسر یونینز نے پوری کر دی‘ پائلٹس نے جہاز اڑانے اور ائیر ہوسٹسز نے ڈیوٹی دینے سے انکار کر دیا یہاں تک کہ دنیا کا بہترین ادارہ زوال کی خوفناک مثال بن گیا‘ پی آئی اے کے بین الاقوامی روٹس بند ہوتے چلے گئے‘ آخر میں امریکا بچا تھا‘ 29 اکتوبر 2017ءکو یہ روٹ بھی بند ہو گیا‘ پی آئی اے کی آخری فلائیٹ پی کے 711 اکتوبر کی 27تاریخ کو لاہور سے اڑی‘ 29 اکتوبر کو نیویارک سے واپس آئی اور پی آئی اے نے امریکا کے آپریشنز بند کرنے کا اعلان کر دیا‘ پی آئی اے کا کہنا ہے یہ روٹ دس سال سے خسارے میں جا رہا تھا‘ کارپوریشن کو سالانہ ڈیڑھ ارب روپے نقصان ہوتا تھا‘ پی آئی اے کو گزشتہ سال 40 ارب روپے گھاٹا پڑا جس کے بعد کل قرضہ 400 ارب روپے ہوگیا‘ کارپوریشن اب بارسلونا‘ میلان اور پیرس کے روٹس بھی بند کرنے کا منصوبہ بنا رہی ہے‘ یہ روٹس بھی بند ہو گئے تو پاکستان کا یورپ سے بھی رابطہ ٹوٹ جائے گا یوں پاکستان کا ایک اور سنہری باب بند ہو جائے گا۔
وزیراعظم شاہد خاقان عباسی نے دو نومبر کو پی آئی اے کی انتظامیہ کو کابینہ میں بریفنگ دینے کی دعوت دی‘ پی آئی اے کی ساری انتظامیہ پہنچ گئی‘ چیئرمین عرفان الٰہی بھی بریفنگ میں موجود تھے اور سول ایوی ایشن کے مشیر مہتاب عباسی بھی‘ پی آئی اے کے چار اعلیٰ عہدیداروں نے بریفنگ دی‘ کابینہ کے سامنے 58 سلائیڈز چلائی گئیں‘ پی آئی اے کا سارا عروج وزوال کابینہ کے سامنے رکھا گیا اور آخر میں کابینہ سے ”بیل آؤٹ پیکج“ مانگ لیا گیا‘وزیراعظم اطمینان سے بریفنگ سنتے رہے‘ بریفنگ کے آخر میں وزیراعظم نے پی آئی اے کے چاروں عہدیداروں سے پوچھا ”حکومت اگر یہ رقم دے دے تو کیا پی آئی اے چل جائے گی“ چاروں کا جواب ناں تھا‘ وزیراعظم نے پوچھا ”پھر یہ رقم آپ کو کیوں دی جائے“ دوسری طرف خاموشی چھا گئی‘ وزیراعظم نے کہا ”پی آئی اے 400 ارب روپے کی مقروض ہے‘ حکومت اس قرضے کی ضامن ہے‘ یہ قرض بالآخر عوام کو ادا کرنا پڑے گا‘ اس کا ذمہ دار کون ہے؟“ دوسری طرف خاموشی چھائی رہی‘ وزیراعظم نے اس کے بعد چاروں عہدیداروں سے کہا ”آپ چاروں پی آئی اے کا کوئی ایک اور اصلی مسئلہ بتائیں“ پہلی باری چیئرمین کی تھی‘ چیئرمین نے تقریر کرنے کی کوشش کی‘ وزیراعظم نے انہیں روک کر کہا ”آپ نے صرف ایک مسئلہ بتانا ہے“ چیئرمین پھنس گیا‘ وزیراعظم نے اس کے بعد باقی تینوں اعلیٰ عہدیداروں سے بھی یہ سوال کیا‘ چاروں کا جواب مختلف تھا‘ بتایا گیا سٹاف زیادہ اور جہاز کم ہیں‘ وزیراعظم نے پوچھا‘ سٹاف کی کل تنخواہیں کتنی ہیں‘ جواب ملا 18 ارب روپے‘ وزیراعظم نے کہا یہ کل ریونیو کا 19 فیصد بنتا ہے‘ یہ رقم زیادہ نہیں‘ دنیا کی بے شمار کمپنیاں اور کارپوریشنز اپنے ریونیو کا 21 فیصد تک ”ایچ آر“ پر خرچ کرتی ہیں‘ آپ کا یہ خیال غلط ہے کہ پی آئی اے میں سٹاف زیادہ ہے‘ بتایا گیا بے شمار روٹس پر گھاٹا پڑ رہا ہے‘ وزیراعظم نے کہا آپ نقصان والے روٹس پر فلائیٹس کیوں اڑاتے ہیں‘ آپ یہ بند کر دیں‘ بتایا گیا‘ پی آئی اے ”نیشنل فلیگ کیریئر“ ہے‘ ملک کی بدنامی ہوتی ہے‘ وزیراعظم نے جواب دیا‘ ہمیں اس الوژن سے بھی نکلنا ہوگا‘ ملک کی بے عزتی روٹس بند کرنے سے نہیں ہوتی روٹس پر خراب سروسز سے ہوتی ہے‘ آپ دوسرے ملکوں کے اداروں کے مسائل میں اضافہ کریں گے یا آپ مسافروں کو تنگ کریں گے تو اس سے ملک کی خاک نیک نامی ہو گی‘ بتایا گیا مینجمنٹ ایشوز ہیں‘ یونین کا دباؤ ہے‘ سیاسی بھرتیاں اور سیاسی مداخلت ہے‘ یہ تمام ایشوز مل کر ائیر لائین کو چلنے نہیں دے رہے‘ وزیراعظم نے جواب دیا‘ یہ تمام ایشوز قابل حل ہیں‘ دنیا کے بے شمار ادارے ان مسائل سے گزرتے ہیں، یہ ان مسائل کو حل بھی کر لیتے ہیں لیکن پی آئی اے 12 سال سے خوفناک خسارے کا شکار ہے‘ ہم جانتے بوجھتے ہوئے بھی آج تک یہ مسائل حل نہیں کر سکے‘ کیوں؟ انتظامیہ کے پاس کوئی جواب نہیں تھا‘ وزیراعظم نے کہا ”آپ چار لوگ ہیں‘ آپ چاروں مل کر پی آئی اے کے ایک اور حتمی مسئلے کا تعین نہیں کر سکے‘ آپ یہ ادارہ کیسے چلائیں گے‘ آپ پی آئی اے کو کیسے بحال کریں گے“ وزیراعظم نے اس کے بعد کہا ”میں پی آئی اے کا وہ مسئلہ جانتا ہوں‘ یہ ادارہ صرف ایک مسئلے کا شکار ہے‘ وہ مسئلہ حل ہو جائے تو یہ ادارہ بحال ہو جائے گا‘ میں آپ کو وقت دیتا ہوں‘ آپ واپس جائیں‘ وہ مسئلہ ڈھونڈیں‘ ہم دوبارہ بیٹھیں گے اور اگلی میٹنگ میں پی آئی اے کی بحالی کا پلان بنا ئیں گے“ وزیراعظم اس کے بعد اپنی نشست سے اٹھ گئے‘ پوری کابینہ اس گفتگو پر حیران رہ گئی۔وزیراعظم شاہد خاقان عباسی یقینا پی آئی اے کے بنیادی مسئلے سے واقف ہوں گے‘ یہ خود سول ایوی ایشن سے تعلق رکھتے ہیں‘ پائلٹ بھی ہیں‘ پی آئی اے کے چیئرمین بھی رہے ہیں اور یہ ملک میں کامیابی سے ایک پرائیویٹ ائیر لائین بھی چلا رہے ہیں چنانچہ یہ نیشنل فلیگ کیریئر کے اصل ایشو سے آگاہ ہوں گے‘ میں ان کی رہنمائی نہیں کر سکتا لیکن کیونکہ میں ایک دائمی مسافر ہوں‘ میں ملک کے اندر اور باہر سینکڑوں مرتبہ سفر کر چکا ہوں‘ میں دنیا کی آدھی بڑی ائیر لائینز کا مہمان بھی رہ چکا ہوں چنانچہ میں اپنے وسیع تر تجربے کی بنیاد پر پی آئی اے کے واحد مسئلے کی نشاندہی کر سکتا ہوں اور وہ مسئلہ ”سینس آف اونر شپ“ ہے‘ پی آئی اے ملک کے ان سرکاری اداروں میں شامل ہے جس کا کوئی مائی باپ نہیں‘ چپڑاسی سے لے کر چیئرمین تک کوئی شخص اس کی اونر شپ لینے‘اس کو اپنا ادارہ ماننے کےلئے تیار نہیں‘ یہ ایک ایسی بھینس ہے جس کی بوٹیاں ہر شخص نوچتا رہا اور ہر شخص نوچتا رہنا چاہتا ہے چنانچہ یہ ادارہ اپنی ہی قبر کا سنگ عبرت بن کر رہ گیاہے‘ ہم اگر پی آئی اے کو ٹھیک کرنا چاہتے ہیں تو ہمیں اس کی ”اونر شپ“ لینا ہو گی‘ ہمیں اسے چودھری شوگر مل‘ انہار ڈیری پراڈکٹس اور ائیر بلیو کی طرح چلانا ہوگا‘ آپ آپریشنز کم کر دیں‘ شیڈول کی پابندی کریں‘ غیر ضروری ملازمین کو فارغ کر دیں‘ فلائیٹ کے دوران سہولتوں میں اضافہ کریں‘بکنگ آن لائین کر دیں‘ پی آئی اے کی جائیدادیں بیچ کر قرضے ادا کر دیں‘ پروفیشنل مینجمنٹ لے آئیں‘ آپ مختلف ائیر لائینز کے ساتھ روٹس شیئرنگ کرلیں اور آپ پی آئی اے کو جلد سے جلد پرائیویٹائز کر دیں ‘پی آئی اے بحال ہو جائے گی‘ ہم ان ایشوز پر توجہ دینے کی بجائے دس ماہ سے پی آئی اے کا ایک جہاز تلاش کر رہے ہیں‘ ہم اس جہاز کا ماتم کرتے نہیں تھک رہے لیکن کسی نے آج تک اصل ایشو سمجھنے کی کوشش نہیں کی‘ پی آئی اے کے 4 اے 310 جہاز 25 سال کی مدت پوری کر چکے ہیں‘ یہ جہاز اب اڑنے کے قابل نہیں ہیں‘ پی آئی اے کے سابق جرمن سی ای او برنڈ ہلڈن برانڈ نے ان میں سے ایک جہاز فلم سازی کےلئے کرائے پر دے دیا‘ کار پوریشن کو دو لاکھ 10 ہزار یوروز کرایہ مل گیا‘ یہ جہاز بعد ازاں جرمنی کے شہرلیپزگ بھجوا دیا گیا‘ پی آئی اے لیپزگ سے فلائیٹس شروع کرنا چاہتی تھی‘ یہ جہازلیپزگ ائیرپورٹ پر پی آئی اے کا نشان بن کر کھڑا ہونا تھا لیکن ایشو بن گیا‘ ڈیل میں یقینا کوئی نہ کوئی خرابی ہو گی‘ کوئی نہ کوئی غلطی‘ کوئی نہ کوئی کوتاہی بھی ہو گی لیکن آپ کمال ملاحظہ کیجئے اس دوران مزید تین اے 310 جہاز گراؤنڈ ہو گئے‘ یہ تینوں جہاز پچھلے چھ ماہ سے کراچی ائیر پورٹ پر کھڑے ہیں‘ ان کے بارے میں آج تک کسی نے سوچا اور نہ ہی پوچھا‘ کراچی ائیرپورٹ پر دو سیون فور سیون بھی موجود ہیں‘ ایک کھڑا کھڑا گل رہا ہے اور دوسرے میں کافی شاپ بن چکی ہے‘ کیا یہ جہاز ‘ جہازنہیں ہیں اور کیا ان کا کوئی والی وارث نہیں؟ ہم جرمنی میں کھڑا جہاز واپس لانا چاہتے ہیں ‘ لانا چاہیے لیکن ائیر پورٹ پر سڑتے ہوئے جہاز بیچنے کےلئے تیار نہیں ہیں‘کیوں؟ یہ وہ بے وقوفیاں ہیں جنہوں نے پی آئی اے کو تابوت بنا دیا لہٰذا میں سمجھتا ہوں پی آئی اے کا اصل مسئلہ حماقت ہے‘ ہم جب تک حماقتوں سے نہیں نکلیں گے ہم پی آئی اے سمیت ملک کا کوئی ادارہ نہیں چلا سکیں گے‘ ہمیں یہ بات پلے باندھ لینی چاہیے۔

مہمان کالم
ہمیں ایک بار پھر پیچھے جانا پڑے گا‘ 12 اکتوبر 1999ءہو گیا‘ میاں نواز شریف خاندان سمیت گرفتار ہو گئے‘ یہ اٹک قلعہ پہنچے‘ اسمبلیاں معطل تھیں‘پاکستان مسلم لیگ ن اپنی دو تہائی اکثریت کے ساتھ بوکھلائی پھر رہی تھی اور شاہد خاقان عباسی کی ہمشیرہ بیرسٹر سعدیہ عباسی میاں نواز شریف کی وکیل تھیں‘ جنرل پرویز مشرف نے تعلقات بہتر بنانے کےلئے سیاستدانوں کے ساتھ ملاقاتیں شروع کر دیں‘ یہ سب سے پہلے اے این پی کے رہنما اجمل خٹک سے ملے اور ان کے بعد راجہ ظفر الحق سے ملاقات کی‘ جنرل مشرف نے راجہ ظفرالحق کو پارٹی قائد بننے کا اشارہ دے دیا‘ راجہ صاحب نے وقت مانگ لیا‘ جنرل مشرف اس کے بعد اعجاز الحق سے ملے‘ ملاقات میں جنرل اکرم اورجنرل محمود بھی شامل تھے‘ اعجاز الحق نے جنرل مشرف کو اسمبلیاں بحال کرنے کےلئے راضی کر لیا‘ جنرل مشرف نے اعجاز الحق سے وعدہ کیا آپ لوگ اگر نواز شریف کو پارٹی کی قیادت سے ہٹا دیں تو میں اسمبلیاں بحال کر دوں گا‘ آپ کسی بھی ایم این اے کو وزیراعظم بنا دیں‘ مجھے کوئی اعتراض نہیں ہو گا‘اعجازالحق اور جنرل اکرم نے مل کر پریس ریلیز تیار کی اور یہ خبر اگلے دن اخبارات میں ”اسمبلیاں بحال ہو سکتی ہیں“ کی سرخی کے ساتھ ہیڈ لائن لگ گئی‘ اعجاز الحق بعد ازاں رائے ونڈ میں میاں شریف مرحوم سے ملے‘ ملاقات میں مجیب الرحمن شامی اور الطاف حسن قریشی بھی شامل تھے‘ اعجاز الحق نے میاں شریف سے عرض کیا ”آپ اسمبلیاں بحال ہونے دیں‘ نیا وزیراعظم آنے دیں‘ ہم میاں نواز شریف کو بچا لیں گے“ میاں شریف نے بڑا دلچسپ جواب دیا‘ وہ بولے ”جنرل پرویز مشرف نے 1999ءکے شروع میں میاں شہباز شریف کو پیش کش کی تھی آپ میاں نواز شریف کو پچھلی نشست پر بٹھا کر خود ڈرائیونگ سیٹ پر بیٹھ جائیں‘ ہم آپ کو سپورٹ کریں گے‘ میاں شہباز شریف یہ آفر لے کر میرے پاس آئے‘ میں نے شہباز شریف سے کہا‘ یہ لوگ اس شخص کو برداشت نہیں کر رہے جس کے پاس دو تہائی اکثریت ہے‘ یہ تمہیں کیسے برداشت کریں گے“ میاں شریف نے اس کے بعد اعجاز الحق سے کہا ”یہ اگر نواز شریف کو گنجائش نہیں دے رہے تو یہ اس کی پارٹی اور پارٹی کے نئے وزیراعظم کوبھی موقع نہیں دیں گے‘ میرا مشورہ ہے آپ لوگ نواز شریف کا ساتھ دیں‘ آپ ایک بار کٹا کٹی نکلنے دیں“ اعجاز الحق کا جواب تھا ”میاں صاحب اسمبلیاں معطل ہیں اور شریف فیملی پر ہائی جیکنگ اور کرپشن کے مقدمے چل رہے ہیں‘ ہمیں آخری کوشش کر لینی چاہیے‘ میں گارنٹی دیتا ہوں ہمیں خواہ قانون بدلنا پڑا ہم نواز شریف کو بچا لیں گے“ بڑے میاں صاحب مان گئے‘ فیصلہ ہوا اعجاز الحق اٹک قلعے میں میاں نواز شریف سے ملاقات کر کے انہیں قائل کریں گے‘ جنرل مشرف کو میاں صاحب کی رضا مندی کی اطلاع دے دی گئی‘پنجاب کے ہوم ڈیپارٹمنٹ نے اٹک قلعے میں اعجاز الحق اور میاں نواز شریف کی ملاقات طے کر دی لیکن میٹنگ سے ایک دن پہلے نواز شریف کی وکیل سعدیہ عباسی اعجاز الحق سے ملیں اور انہیں میٹنگ کی منسوخی کا پیغام دے دیا‘ خاقان فیملی کے ضیاءالحق کے خاندان سے پرانے مراسم تھے‘ سعدیہ عباسی اور اعجاز الحق ایک دوسرے کو بچپن سے جانتے تھے‘ اعجاز الحق نے وجہ پوچھی تو سعدیہ عباسی نے محتاط الفاظ میں بتایا ”نواز شریف کو آپ کی پیش کش قبول نہیں“ یوں یہ ڈیل ختم ہو گئی‘ اسمبلیاں بحال نہ ہو سکیں‘ شریف فیملی کو جلاوطنی دیکھنا پڑی اور ن لیگ بری طرح ٹوٹ پھوٹ کا شکار ہو گئی‘ پاکستان مسلم لیگ ن کے سنجیدہ رہنماؤں کا آج بھی یہ خیال ہے اگر میاں نواز شریف اس وقت اپنی قربانی دے دیتے‘ یہ سائیڈ پر ہو جاتے تو پارٹی بھی بچ جاتی‘ جمہوریت بھی اور ملک بھی اور میاں نواز شریف کی جلد واپسی بھی ممکن ہو جاتی۔ہم اب 2017ءمیں واپس آتے ہیں‘ آج بھی صورتحال 1999ءسے مختلف نہیں‘ میاں نواز شریف اقتدار سے فارغ ہو چکے ہیں‘ یہ مقدمات بھی فیس کر رہے ہیں اور یہ بظاہر اس شکنجے سے نکلتے بھی نظر نہیں آتے‘ میاں نواز شریف کو 1999ءمیں چودھری شجاعت حسین‘ خورشید محمود قصوری‘ راجہ ظفر الحق‘ ہمایوں اختر اور اعجاز الحق یہ سمجھا رہے تھے ”میاں صاحب آپ تھوڑی دیر کےلئے ڈرائیونگ سیٹ چھوڑ دیں‘ ہم سب بچ جائیں گے“ لیکن میاں صاحب نہیں مانے اور یوں سارا نظام دس سال کےلئے ”وائینڈ اپ“ ہو گیا‘ آج یہ بات انہیں چودھری نثار‘ شاہد خاقان عباسی‘ خواجہ آصف اور میاں شہباز شریف سمجھا رہے ہیں‘ یہ انہیں بتا رہے ہیں آپ وقتی طور پر پیٹرن انچیف بن جائیں‘ آپ میاں شہباز شریف کو پارٹی کا صدر اور مریم نواز کو ان کا اسسٹنٹ بنا دیں‘ شاہد خاقان عباسی کو آزادی کے ساتھ حکومت کرنے دیں اور پاکستان آ کر مقدمات فیس کریں‘ ہم سات ماہ نکال جائیں گے‘ ہم اگلا الیکشن بھی جیت جائیں گے لیکن میاں صاحب نہیں مان رہے۔
یہ 1999ءکی ضد پر قائم ہیں‘ یہ کہہ رہے ہیں میں ہوں تو سب ہیں‘ میں نہیں تو کوئی بھی نہیں اور یہ وہ نقطہ ہے جس کی وجہ سے معاملات خراب ہو رہے ہیں۔ملک میں آنے والے دنوں میں تین اہم واقعات ہوں گے‘ پاکستان مسلم لیگ ن کے اندر ایک مفاہمتی گروپ بن جائے گا‘ یہ گروپ اداروں سے ٹکراؤ کے خلاف بنے گا‘ یہ حکومت اور فوج کے درمیان مفاہمت کی کوشش کرے گا‘ مفاہمت ہو گئی تو ٹھیک ورنہ یہ گروپ اپنا راستہ الگ کر لے گا‘ یہ گروپ شہباز شریف کی حمایت بھی کرے گا‘گروپ کی قیادت ایک بزرگ مسلم لیگی کریں گے‘ دو‘ عدلیہ حکومت کو حسن نواز اور حسین نواز کو زبردستی پیش کرنے کا حکم دے گی‘ یہ میاں نواز شریف کا نام ای سی ایل پر ڈالنے کا حکم بھی دے سکتی ہے‘ حکومت کےلئے ان دونوں احکامات کی پیروی مشکل ہو جائے گی اور یوں عدلیہ اور حکومت آمنے سامنے کھڑی ہو جائیں گی‘ تاریخ اپنے آپ کو دہرائے گی‘ یوسف رضا گیلانی کی جگہ شاہد خاقان عباسی ہوں گے اور آصف علی زرداری کی جگہ نواز شریف مگر اس بار کالے کوٹ پاکستان پیپلزپارٹی پہنے گی اور تین احتساب کا عمل آصف علی زرداری تک وسیع ہو جائے گا‘ نیب نے دو دن قبل چودھری شجاعت حسین‘ چودھری پرویز الٰہی اور عبدالعلیم خان کے خلاف نوٹس جاری کر دیئے ہیں‘ یہ نیٹ پریکٹس ہو رہی ہے‘ یہ ”سب کے احتساب“ کا نقطہ آغاز ہے‘ اگلی باری آصف علی زرداری کی ہو گی‘ سپریم کورٹ نے 16 دسمبر 2009ءکو این آر او کالعدم قرار دے دیاتھا جس کے بعد سرے محل اور سوئس اکاؤنٹس میں موجود60 ملین ڈالر کا ایشو دوبارہ زندہ ہو گیا تھا‘ یہ ایشو اس وقت بھی نیب کی فائلوں میں سلگ رہا ہے‘ بس عمران خان کے سپریم کورٹ جانے کی دیر ہے اور آصف علی زرداری کی ”منی ٹریل“ بھی کھل جائے گی‘ ان سے بھی پانچ سوال پوچھ لئے جائیں گے‘ ایک‘ سرے محل آپ کا تھا یا نہیں‘ اگر ہاں تو یہ کیسے خریدا گیا‘ منی ٹریل کہاں ہے اور اگر نہیں تو آپ نے یہ فروخت کیسے کیا‘ دو‘ سوئس اکاؤنٹس میں موجود 60 ملین ڈالرز آپ کے تھے یا نہیں‘ آپ کے تھے تو یہ کہاں سے آئے اور اگر آپ کے نہیں تھے تو آپ نے یہ رقم ان اکاؤنٹس سے کیوں نکلوائی‘ تین‘ آپ کے پاس سندھ میں ایک لاکھ ایکڑ زمین کہاں سے آئی‘ چار‘ آپ کے پاس 19 شوگر ملیں کہاں سے آئیں اور پانچ آپ کے ذرائع آمدن کیا کیا ہیں اور دنیا میں آپ کی جائیدادیں کتنی اور کہاں کہاں ہیں‘ یہ سوال آصف علی زرداری کو بھی میاں نواز شریف کے ساتھ لا کھڑا کریں گے اور یوں وہ وقت آ جائے گا جب ایک عدالت میں میاں نواز شریف پیش ہو رہے ہوں گے‘ دوسری میں آصف علی زرداری کھڑے ہوں گے اور تیسری عدالت میں چودھری برادران‘ جہانگیر ترین اور علیم خان اپنی باری کا انتظار کر رہے ہوں گے، اور یہ وہ حقائق ہیں جو چودھری نثار میاں نواز شریف کو سمجھانے کی کوشش کر رہے ہیں اور شاہد خاقان عباسی یہ بتانے کےلئے 30اکتوبر کو ”نجی دورے“ پر لندن گئے لیکن میاں نواز شریف وقتی طور پر بھی مائنس ہونے کےلئے تیار نہیں ہیں‘ یہ واپس آرہے ہیں‘ یہ واپس آ کر لڑیں گے بھی اور یہ قومی اسمبلی سے ”نااہلی کے باوجود قائد“ کا بل بھی پاس کرائیں گے‘ سینٹ نے 23 اکتوبرکو ”نااہلی کے بعد کوئی شخص کسی سیاسی جماعت کا سربراہ نہیں رہ سکتا“ کی ترمیم پاس کر دی‘یہ ترمیم اب حتمی منظوری کےلئے قومی اسمبلی میں پیش ہو گی‘ حکومت کا خیال ہے ن لیگ کے 70 ارکان اس دن قومی اسمبلی نہیں آئیں گے‘ میاں نواز شریف ان 70 ارکان کےلئے بھی واپس آ رہے ہیں‘ یہ پنجاب ہاؤس میں بیٹھ کر قومی اسمبلی میں اپنے ارکان پورے کریں گے اور یہ بل کو دوبارہ پاس کرائیں گے‘ یہ نیب کا بستر بھی گول کرائیں گے۔شاہد خاقان عباسی کو ملٹری اسٹیبلشمنٹ کی تائید حاصل تھی‘ یہ جنرل باجوہ کے قریب ہیں لیکن وزیراعظم نے 30 اکتوبرکو ”نجی دورے“ پر لندن جا کر‘ انڈر گراؤنڈ ٹرین میں سفر کر کے اور پرنسپل سیکرٹری فواد حسن فواد کو ساتھ لے جا کر غلطی کی‘فوج میں اس قدم کو اچھا نہیں سمجھا جا رہا‘ یہ لوگ اسے پاکستان کی بے عزتی سمجھ رہے ہیں‘ یہ بے عزتی بھی مستقبل میں مسائل پیدا کرے گی‘ شاید اب شاہد خاقان عباسی میاں نواز شریف کی ڈیل نہ کرا سکیں تاہم میاں نواز شریف نے مریم نواز‘ کیپٹن صفدر اور حمزہ شہباز کی تقریروں‘ انٹرویوز اور سیاسی ٹویٹس پر پابندی لگا دی ہے لیکن یہ پابندی زیادہ دیر تک قائم نہیں رہ سکے گی چنانچہ مجھے حکومت کے حالات اچھے دکھائی نہیں دے رہے‘ میاں صاحب حالات کو ایک بار پھر 1999ءکی طرف لے جارہے ہیں‘ یہ اگر نہ رکے اور یہ اگر ”بھائی پربھی اعتبار نہ کرو“ کی پالیسی پر قائم رہے تو پھر یہ اس بار بھی اندر ہو جائیں گے اور ان کی پارٹی بھی تتر بتر ہو جائے گی‘ ملک دوبارہ ٹریک سے اتر جائے گا۔

دنیا میں سات بڑی اسلامی فوجی طاقتیں تھیں‘ ترکی‘ پاکستان‘ ایران‘ عراق‘ لیبیا‘ شام اور مصر۔ یہ ساتوں افواج اسرائیلی عزائم کے راستے میں رکاوٹ تھیں‘ یہودی روایات کے مطابق دنیا کا یہ فیز چھ ہزار سال پر مشتمل ہے‘ یہودی کیلنڈر 3766 قبل مسیح میں شروع ہوا‘ یہ اب تک 5778 سال پورے کر چکا ہے‘ یہودیوں کا خیال ہے قیامت کو صرف 222 سال باقی ہیں‘ یہودیوں نے ان برسوں میں بیت المقدس کی جگہ دوبارہ ہیکل سلیمانی بھی تعمیر کرنا ہے اور آخری جنگ بھی لڑنی ہے‘ یہ ہیکل سلیمانی کو ”تھرڈ ٹمپل“ بھی کہتے ہیں‘ روایات کے مطابق ہیکل سلیمانی کی تعمیر کے بعد دجال آئے گا‘ یہ دنیا کی آخری عالمی جنگ چھیڑدے گا‘ عیسائی عقائد کے مطابق حضرت عیسیٰ ؑدجال کو قتل کر دیں گے جبکہ اسلامی عقیدے کے مطابق حضرت عیسیٰ ؑ امام مہدی کے ساتھ مل کر اسے قتل کریں گے‘ یہ جنگ کے بعد مدینہ تشریف لے جائیں گے‘ 45 سال حیات رہیں گے‘ ان کے بعد حضرت معقد کی حکومت آئے گی‘ یہ 30 سال حکومت کریں گے‘ پھر سینوں سے اچانک قرآن اڑ جائے گا اور پھر دنیا کے اختتام کا سلسلہ شروع ہو جائے گا‘ یہودی عقائد کے مطابق ہیکل سلیمانی اگلے تیس سال کے اندر مکمل ہونا چاہیے‘ پچاس سال کے اندر دجال کو ظاہر ہونا چاہیے اور پھر ایک لمبی جنگ شروع ہو جانی چاہیے‘ یہودی‘ عیسائی اور مسلمان تینوں کے مطابق آخری جنگ کا میدان شام ہو گا‘ یہ جنگ ”لد“ کے مقام پر ہو گی اور ”لد“ شام میں واقع ہے‘ حضرت امام مہدی خراسان میں پیدا ہوں گے‘ جنگ کا ایک حصہ عراق اور ترکی میں بھی لڑا جائے گا اور ایک میدان بلوچستان میں بھی سجے گا‘ یہودی اس جنگ کی تیاری کر رہے ہیں‘ یہ جلد سے جلد یہ تمام علاقے اپنے قبضے میں لینا چاہتے ہیں‘ یہ ہیکل سلیمانی بھی بنانا چاہتے ہیں چنانچہ یہ مسجد اقصیٰ کے نیچے سرنگیں کھودتے چلے جا رہے ہیں‘ یہ سمجھتے ہیں یوں یہ مسجد کسی دن گر جائے گی اور یہ اس کی جگہ تھرڈ ٹمپل یا ہیکل سلیمانی تعمیر کر لیں گے‘ یہ اسلامی دنیا کی ساتوں افواج اور پاکستان کے ایٹم بم کو اپنے عزائم کے راستے میں رکاوٹ سمجھتے ہیں‘ یہ اپنے اتحادیوں کے ذریعے ساتوں اسلامی افواج کو تباہ کرتے چلے جا رہے ہیں‘ عراق اپنی فوج کے ساتھ تباہ ہو گیا‘ لیبیا کی فوج بھی ختم ہو گئی‘ مصری فوج بتدریج کمزور ہوتی جا رہی ہے‘ ترک فوج بھی مشکل دور سے گزر رہی ہے‘ شام خانہ جنگی کا شکار ہے‘ یہ خانہ جنگی اس کی فوج کو کھا جائے گی‘یہ پانچ سات برسوں میں اپنے دفاع کےلئے روس کا محتاج ہو جائے گا اور پیچھے رہ گئے ایران اور پاکستان ‘یہ دونوں اس وقت عالمی ٹارگٹ ہیں‘ یہ لوگ کوشش کر رہے ہیں پاکستان اور ایران بھی کسی نہ کسی طرح گلف کی جنگ کا حصہ بن جائیں‘ یہ لوگ پاکستان کا ایٹمی پروگرام بھی ختم کرنا چاہتے ہیں‘ شام اسرائیل کی سرحد پر واقع ہے‘ یہ ایک مضبوط فوج کا مالک بھی تھا لہٰذا شام کو خانہ جنگی میں دھکیل دیا گیا چنانچہ مضبوط فوج شام کا پہلا گناہ‘ اس کا پہلا ایشو تھا۔
شام کا دوسرا ایشو گیس پائپ لائین تھا‘ روس یورپ کےلئے گیس کا سب سے بڑا سپلائر ہے‘ روسی پائپ لائین ترکی آتی ہے اور یہ ترکی سے یورپ میں داخل ہو جاتی ہے‘ قطرکے شمال مشرق میں 1971ءمیں گیس کا دنیا کاسب سے بڑا ذخیرہ دریافت ہوا‘ قطر بھی یورپ کو گیس سپلائی کرنا چاہتا ہے‘ قطر کی پائپ لائین سعودی عرب ‘ اردن‘ شام اور ترکی سے یورپ جائے گی‘ امریکا اس معاملے میں قطر اور سعودی کے ساتھ کھڑا ہے‘ یہ یورپ کو قطری گیس سپلائی کر کے روس کی مناپلی بھی توڑنا چاہتا ہے اور اپنی گیس کمپنیوں کو بھی فائدہ پہنچانا چاہتا ہے‘روس شامی صدر بشارالاسد کے قریب ہے‘ شامی صدر روس کی خواہش پر قطری پائپ لائین کو راستہ نہیں دے رہے تھے چنانچہ امریکا‘ سعودی عرب اور قطر نے بشارالاسد کا تختہ الٹنے کا فیصلہ کر لیا اور یہ فیصلہ شام کی تباہی کا باعث بن گیا‘ شام میں بھاری ”سرمایہ کاری“ ہوئی‘ فوج کے اعلیٰ عہدیدار خریدے گئے‘ ریٹائر فوجی بھی اکٹھے کئے گئے‘ اپوزیشن کو بھی سرمایہ اور ہتھیار دیئے گئے اور میڈیا بھی بشار الاسد کے خلاف کھڑا کر دیا گیا‘ امریکی اشارے پر اپوزیشن نے شام میں انسانی حقوق‘ مساوات اور آزادی رائے کی تحریکیں شروع کر دیں‘اپوزیشن نے 15 مارچ 2011ءکو درعا شہر میں حکومت کے خلاف مظاہرہ کیا‘ حکومت نے مظاہرہ روکنے کی کوشش کی‘ تصادم ہوا اور پورے ملک میں مظاہروں کا سلسلہ شروع ہو گیا‘ فوج کے اندر سے ایک گروپ الگ ہوا اور اس نے ”فری سیرین آرمی“ کے نام سے اپنا گروپ بنا لیا‘ یہ گروپ حکومتی فورسز سے گتھم گتھا ہو گیا‘ امریکا نے ترکی کے ساتھ مل کر شام کی سرکاری فورسز پر حملہ کر دیا‘ سعودی عرب بھی میدان میں کود پڑا‘ یہ القاعدہ اور داعش کو شام لے آیا‘کرد بھی اٹھ کھڑے ہوئے‘ امریکا نے ان کو بھی ہتھیار دے دیئے اور یوں دیکھتے ہی دیکھتے شام میں خوفناک خانہ جنگی شروع ہو گئی‘ خانہ جنگی میں روس اور ایران بشار الاسد کے ساتھ کھڑے ہو گئے‘ ایران مقدس مقامات اور مزارات بچانے کےلئے بھی میدان میں آیا اور یہ ہم عقیدہ ہونے کی وجہ سے بھی بشار الاسد کی مدد کر رہا ہے جبکہ روس قطر کی پائپ لائین سے بچنے کےلئے شام کے ساتھ کھڑا ہے‘ ترکی نے شروع میں کھل کر امریکا اور سعودی عرب کا ساتھ دیا لیکن جب15 جولائی 2016ءکو طیب اردگان کے خلاف فوجی بغاوت ہوئی اور اس بغاوت کے ڈانڈے امریکا میں جا ملے تو یہ امریکا کی سازش بھی سمجھ گیا اور یہ اس سے دور بھی ہو گیا‘ترکی اس وقت شام کی جنگ کو اپنی سرحدوں سے دور دھکیلنے کی کوشش کر رہا ہے‘ یہ بڑی حد تک بشار الاسد کی مدد بھی کر رہا ہے۔شام تقریباً سات سال سے خانہ جنگی کا شکار ہے‘ یہ خانہ جنگی حلب‘ درعا‘ حمال‘ حمص‘ ادلب اور لداقیہ جیسے شہروں کو بھی نگل گئی اور اس نے پورے شام کے تارپور بھی ہلا دیئے ہیں‘ حلب اور حمص دنیا کے قدیم ترین شہروں میں شمار ہوتے ہیں‘ یہ ثقافت‘ آرٹ اور آثار قدیمہ کے مراکز ہیں‘ حلب کو یونیسکو نے عالمی ورثہ بھی قرار دے رکھا ہے‘دہشت گردوں نے یہ دونوں شہر تباہ کر دیئے‘ حمص کی حالت بھی پتلی ہے‘ ادلب کیمیائی ہتھیاروں کا نشانہ بن چکا ہے‘ رقہ شہر ملبے کا ڈھیر ہے اور لداقیہ اپنے ہی مزار کا چراغ بنتا جا رہا ہے‘ شام میں اس وقت سینکڑوں جتھے‘ گروپ اور لشکر برسرپیکار ہیں‘ القاعدہ النصر فرنٹ کے نام سے شیعہ کمیونٹی کو قتل کر رہی ہے‘ داعش سنی اور شیعہ دونوں کا قتل عام کر رہی ہے ‘ کرد قوم پرست سب کے ساتھ لڑ رہے ہیں‘ فری سیرین آرمی سرکاری فوج کے ساتھ جنگ میں مصروف ہے‘
امریکا اور روس دونوں نے شام میں اپنے فوجی اڈے بنا رکھے ہیں‘ ترک فوجیں‘ ادلب‘ لداقیہ اور حلب تک پہنچ چکی ہیں جبکہ سعودی عرب نے اپنی سرحدوں کے ساتھ کیمپ بنا رکھے ہیں‘ یہ جنگی لشکروں کو سرمایہ بھی دے رہا ہے‘ ہتھیار بھی اور خوراک بھی لیکن شام خانہ جنگی کے باوجود تیزی سے سنبھل رہا ہے‘ ملک کے نوے فیصد شورش زدہ علاقے دوبارہ حکومت کے قبضے میں آ چکے ہیں‘ القاعدہ اور داعش شام سے افغانستان منتقل ہو رہی ہےں‘ یہ اب پاکستان اور ایران کو ٹارگٹ کریں گے‘فری سیرین آرمی دم توڑتی جا رہی ہے اور کرد علیحدگی پسند بھی پسپائی اختیار کر رہے ہیں‘ شام کے بہتر ہوتے حالات دنیا بھر کے لئے حیران کن واقعہ ہے‘ امریکا اور اس کے اتحادی اس صورتحال سے پریشان ہیں‘ اسرائیل کے دکھ میں بھی اضافہ ہوتا جا رہا ہے‘ سوال یہ ہے شام نے یہ کامیابی کیسے حاصل کی؟ اس کی دو بڑی وجوہات ہیں‘ پہلی وجہ صدر بشار الاسد ہیں‘ یہ جنگ کے دوران دمشق میں ڈٹے رہے‘ یہ اور ان کا خاندان اس وقت بھی دمشق کی سڑکوں پر پھرتا رہا جب دہشت گرد دمشق کی پہاڑیوں تک پہنچ چکے تھے اور انہوں نے شہر کا پانی تک بند کر دیا تھا‘بشار الاسد اس وقت بھی ملک سے باہر گئے اور نہ ہی انہوں نے اپنا خاندان باہر بھجوایا‘ یہ اگر ایک بار ملک سے باہر چلے جاتے تو آج شام چھوٹے چھوٹے ٹکڑوں میں تقسیم ہو چکا ہوتا ‘دمشق شہر پر اسرائیل کا جھنڈا لہرا رہا ہوتا‘ یہ اس شخص کی استقامت اور بہادری تھی جس نے شام کو بچا لیا‘ دوسرا حکومت نے جنگ کے زمانے میں بھی سرکاری نظام نہیں ٹوٹنے دیا‘ حکومت کے تمام محکمے بھی کام کرتے رہے اور ملک میں کسی چیز کی قلت بھی پیدا نہیں ہوئی جبکہ دوسری طرف باغیوں کے علاقوں میں قتل وغارت گری بھی ہوئی‘ آبروریزیاں بھی ہوئیں‘قاضی عدالتیں بھی بنیں اور اشیائے صرف کی قلت بھی پیدا ہوئی چنانچہ لوگوں نے سوچا غاصب بشار الاسد ان نام نہاد انقلابیوں سے سو درجے بہتر ہیں اور یہ باغیوں سے کٹ کر حکومتی فورسز کے ساتھ شامل ہوتے چلے گئے اور یوں باغی ملک سے فرار ہونے پر مجبور ہو گئے۔ہم شام سے دو چیزیں سیکھ سکتے ہیں‘ میاں نواز شریف بشار الاسد بنیں‘ یہ خود بھی واپس آئیں اور اپنے خاندان کو بھی واپس لے کر آئیں‘ یہ اپنے مقدمات مردانہ وار فیس کریں‘ یہ جلد یا بدیر کامیاب ہو جائیں گے اور دوسرا وہ لوگ جنہوں نے عراق اور شام کو تباہ کر دیا وہ اب ہماری سرحد پر اکٹھے ہو رہے ہیں‘ یہ لوگ ہماری فوج اور ایٹمی پروگرام کو بھی تباہ کرنا چاہتے ہیں اور یہ ملک میں شیعہ سنی جنگ بھی چھیڑنا چاہتے ہیں چنانچہ ہمیں چوکنا ہونا ہوگا ورنہ ہم دوسری صورت میں اٹھنے کے قابل نہیں رہیں گے۔

”میں سات سال سے بے روزگار ہوں‘ سیاحت ختم ہو چکی ہے‘ ہوٹل انڈسٹری دم توڑ چکی ہے اور دست کار ہاتھ پر ہاتھ رکھے بیٹھے ہیں“ ولید کی آنکھوں میں اداسی تھی‘ ہم دمشق کی پاکستان سٹریٹ کے ایک ریستوران میں بیٹھے تھے‘ ہماری میز کھانوں سے بھری تھی‘ ولید ہمارا گائیڈ تھا‘ وہ ہمیں اداس لہجے میں جنگ کے اثرات بتا رہا تھا‘ اس کا کہنا تھا شام کا ہر خاندان جنگ سے متاثر ہوا‘ پورے ملک میں کوئی ایسا خاندان نہیں جسے اس جنگ نے نقصان نہ پہنچایا ہو‘ لوگوں کی جائیداد یںچلی گئیں‘ لوگ بے گھر ہو گئے‘ لوگ بے روزگار ہو گئے اور لوگ لاشیں اور زخمی اٹھانے پر مجبور ہو گئے‘ میں نے ولید سے پوچھا ”آپ پڑھے لکھے ہو‘ انگریزی لکھنا‘ پڑھنا اور بولنا جانتے ہو‘ آپ کسی دوسرے ملک میں پناہ لے لیتے“ وہ مسکرایا اور بولا ”دمشق اور برداشت ہم لوگوں کی عادتیں ہیں‘ ہم دمشق چھوڑ سکتے ہیں اور نہ ہی صبر“ میں بھی مسکرانے پر مجبور ہو گیا۔میں نے دو راتیں اور تین دن دمشق میں گزارے‘ میں ان تین دنوں میں شام اور شامیوں کی قوت برداشت‘ زندگی سے بھرپور محبت اور ملک سے وفاداری سے متاثر ہوئے بغیر نہ رہ سکا‘ یہ سات سال سے خوفناک جنگ بھگت رہے ہیں‘ یہ ان سات برسوں میں اپنوں کے ہاتھوں بھی مرتے رہے اور انہیں غیر بھی مارتے رہے ‘ ملک کے اندر ایک درجن گروپ برسر پیکار رہے‘ عمارتیں ڈھا دی گئیں‘ سڑکیں اور پل اڑا دیئے گئے‘ پانی اور بجلی بھی بند کر دی گئی‘ فلائیٹس اور ٹرین سروس بھی معطل ہے‘ شام عالمی پابندیوں کی زد میں بھی ہے‘ آسمان سے بھی بم برستے رہے اور یہ خودکش حملوں میں مارے جاتے رہے لیکن یہ اس کے باوجود پسپا نہیں ہوئے‘ان کا پیمانہ صبر لبریز نہیں ہوا‘ ان کی برداشت نے دم نہیں توڑا‘ آپ یقین کیجئے میں نے تین دنوں میں دمشق کی کسی سڑک‘ کسی بازار میں کسی قسم کی افراتفری نہیں دیکھی‘ ہر چیز معمول کے مطابق تھی‘ ٹریفک پولیس ٹریفک کنٹرول کر رہی تھی‘ بازار میں کھوے سے کھوا چل رہا تھا‘ دکانیں اشیاءسے بھری تھیں اور خریدارجی بھر کر خریداری کر رہے تھے‘شام میں جنگ کے ایام میں بھی کرائم ریٹ صفر تھا‘ اشیائے صرف کی فراوانی تھی اور یہ پاکستان سے ارزاں بھی تھیں‘ بالخصوص کھانے کی کسی چیز کی قلت نہیں تھی‘ خواتین مطمئن اور مسرور نظر آ رہی تھیں‘ یہ پورے اعتماد کے ساتھ بازاروں اور گلیوں میں گھوم رہی تھیں‘ سرکاری دفتر‘ سکول‘ کالج اور یونیورسٹیاں کھلی تھیں اور مسجدیں آباد تھیں‘دمشق میں ہزاروں کی تعداد میں قہوہ خانے اور ریستوران ہیں‘ آپ کسی گلی میں نکل جائیں آپ کو وہاں قہوہ خانے اور ریستوران ملیں گے اور یہ تمام گلی تک مصروف ہوں گے‘ شہر میں دریا کے دونوں کناروں پر ربوہ کا علاقہ ہے‘ اس علاقے میں بڑے بڑے ریستوران ہیں‘ یہ ریستوران ہر شام آباد ہو جاتے ہیں‘ ہزاروں لوگ شام کے وقت ان ریستورانوں کا رخ کرتے ہیں‘ کھانا کھاتے ہیں اور جی بھر کر ناچتے ہیں‘ ہر ریستوران میں لائیو میوزک چلتا ہے اور لوگ خاندان سمیت موسیقی کی دھنوں پر رقص کرتے ہیں‘ پرانے شہر کے پرانے گھروں میں بھی ریستوران ہیں‘ یہ ریستوران بھی بارہ بجے تک آباد رہتے ہیں‘ موسیقی اور رقص لوگوں کے مزاج میں شامل ہے‘ قہوہ خانے صبح تک آباد رہتے ہیں‘ لوگ عموماً ناشتہ بھی باہر کرتے ہیں یا پھر باہر سے منگوا کر کھاتے ہیں‘ آٹا اور روٹی حکومت کے کنٹرول میں ہے‘ گھر میں روٹی پکانے کی اجازت نہیں‘ حکومت نے ملک بھر میں سرکاری تندور بنا دیئے ہیں‘ ملک میں کوئی بھی شخص 50 پاؤنڈ ادا کر کے روٹیوں کا پیکٹ حاصل کر سکتا ہے‘یہ رقم پاکستانی روپوں میں دس روپے بنتی ہے اور پیکٹ میں آٹھ دس روٹیاں ہوتی ہیں گویا پورا خاندان دس روپے میں پیٹ بھر لیتا ہے‘ سبزیاں‘ پھل اور گوشت وافر اور سستے ہیں‘ بجلی‘ گیس اور پانی پاکستان کے مقابلے میں بہت سستے ہیں‘ پاکستانی قونصل جنرل عبدالجبارترین دو ماہ میں صرف دو ہزار روپے پاکستانی بل دیتے ہیں‘ یہ اس بل میں تین اے سی بھی چلاتے ہیں‘ گیس اور پانی بھی اتنے ہی سستے ہیں‘ آپ حکومت کا نظام بھی ملاحظہ کیجئے‘جنگ کے دوران بے شمار علاقے حکومت کے کنٹرول سے نکل گئے لیکن حکومت اس دوران بھی متاثرہ علاقوں کے سرکاری ملازموں کو تنخواہیں دیتی رہی‘ حکومت کے اہلکار ہر مہینے صندوقوں میں نوٹ بھر کر متاثرہ علاقوں میں جاتے تھے‘ باغی انہیں راستہ دیتے تھے‘ یہ ملازمین کو تنخواہ دیتے تھے اور دمشق واپس آ جاتے تھے‘ جنگ کے سات برسوں میں باغیوں اور حکومت کے دوران یہ معاہدہ رہا‘ باغی سرکاری ملازمین کو تنگ نہیں کریں گے اور یہ تنخواہوں کی فراہمی بھی نہیں روکیں گے‘ یہ معاہدہ آخر تک قائم رہا‘ حکومت 90 فیصد علاقوں پر دوبارہ کنٹرول حاصل کر چکی ہے‘ صرف دس فیصد علاقوں میں جنگ جاری ہے لیکن سرکاری ملازمین کو ان علاقوں میں بھی باقاعدگی سے تنخواہ ملتی ہے اور یہ اپنی سرکاری ڈیوٹی بھی دے رہے ہیں‘ شام میں فوجی ٹریننگ لازم ہے‘ ملک کا ہر اٹھارہ سال کا نوجوان فوج میں خدمات سرانجام دیتا ہے‘ صرف ان نوجوانوں کو استثنیٰ حاصل ہے جو ماں باپ کے اکیلے بیٹے ہیں یا پھر وہ یونیورسٹی میں داخلہ لے لیتے ہیں‘ ایف اے تک تعلیم لازم بھی ہے اور مفت بھی‘ سکول جنگ کے دوران بھی کھلے رہے‘ دمشق میں ایک پاکستانی سکول بھی ہے‘ یہ ملک کا واحد کیمبرج سکول ہے‘ سفارتکاروں کے بچے بھی یہاں پڑھتے ہیں اور شام کے بزنس مینوں‘ بیوروکریٹس اور سیاستدانوں کے بچے بھی۔ صدربشار الاسد کے بیٹے نے بھی پاکستانی سکول سے امتحان دیا تھا‘مرتضیٰ بھٹو مرحوم کی بیگم غنویٰ بھٹو اس پاکستانی سکول میں استاد تھیں‘ فاطمہ بھٹو پاکستانی سکول کی طالبہ تھیں‘ مرتضیٰ بھٹو بیٹی کو سکول چھوڑنے اور لینے آتے تھے۔یہ اس دوران غنویٰ بھٹو سے ملے اور دونوں نے شادی کر لی۔ دمشق یونیورسٹی عرب دنیا کی جدید اور بڑی یونیورسٹی کہلاتی ہے‘ یہ بھی جنگ کے دوران کھلی رہی‘ گاڑیاں سستی ہیں اور بڑی تعداد میں ہیں‘ لوگ اپنی گاڑیاں گلیوں میں کھڑی کر کے گھر چلے جاتے ہیں لیکن کسی قسم کی چوری چکاری اور واردات نہیں ہوتی‘ بھکاری بہت کم ہیں‘ لوگ صابر اور شاکر ہیں‘ یہ غربت میں بھی عزت سے گزارہ کر لیتے ہیں‘ خواتین حسن اور جمال کا مجسمہ ہیں۔
شام کی عورت حسن اور وفاداری میں دنیا میں پہلے نمبر پر آتی ہے‘ فرعون بھی اپنے لئے ملکاؤں‘ خادماؤں اور کنیزوں کا انتخاب شام سے کیا کرتے تھے‘ آج بھی عرب تاجروں‘ شہزادوں اور رؤساءکی کم از کم ایک بیوی شامی ہوتی ہے‘ خواتین مردوں کے شانہ بشانہ کام کرتی ہیں‘ آپ دکانوں پر جائیں‘ ریستورانوں‘ کافی شاپس یا پھر سرکاری دفتروں کا دورہ کریں آپ کو وہاں خواتین ملیں گی‘ شامی عورت بااعتماد بھی ہے اور بے خوف بھی‘ یہ دن ہو یا رات بے خوف ہو کر باہر نکلتی ہے‘یہ چیز ثابت کرتی ہے شام میں خواتین محفوظ ہیں‘ خواتین کو لباس میں بھی آزادی حاصل ہے‘ میں نے وہاں برقع بھی دیکھا‘ سکارف بھی‘ جینز بھی اور سکرٹ بھی‘ کسی کو کسی پر کوئی اعتراض نہیں تھا‘ معاشرے میں مساوات بھی ہے‘ کھانے کے وقت ڈرائیور اور صاحب دونوں اکٹھے میز پر بیٹھتے ہیں‘ میں نے تین دنوں میں کسی کو کسی کے ساتھ جھگڑتے‘ لڑتے‘ تکرار کرتے یا پھر اونچی آواز میں بات کرتے نہیں دیکھا‘لوگ ایک دوسرے سے محبت سے ملتے ہیں‘اختلاف بھی نرم لہجے میں کرتے ہیں‘ یہ چیز ثابت کرتی ہے تہذیب اور شائستگی ان کے جینز میں شامل ہے اور سات سال کی خوفناک جنگ اور خانہ جنگی بھی ان جینز کو متاثر نہیں کر سکی‘ یہ لوگ عربی کے علاوہ فرنچ بھی جانتے ہیں اور انگریزی بھی‘ یہ لوگ جذبے سے لبالب بھرے ہوئے ہیں‘ آپ کسی اجنبی کو سلام کریں وہ نہ صرف پورے جذبے کے ساتھ جواب دے گا بلکہ رک کر آپ کا حال احوال بھی پوچھے گا‘ یہ چند لمحوں میں آپ کے میزبان بھی بن جاتے ہیں‘میں نے حنانیا چرچ سے واپسی پر گلی میں ایک خوبصورت قدیم گھر دیکھا‘ گھر کا دروازہ کھلا تھا‘ صحن میں ایک نوجوان بیٹھ کر کمپیوٹر پر کام کر رہا تھا‘ میں نے سلام کیا‘ اس نے ہمیں اندر بلا لیا‘ وہ جارج تھا‘ کرسچین تھا‘ نسلوں سے دمشق میں رہ رہا تھا‘ گھر تین سو سال پرانا لیکن انتہائی خوبصورت تھا‘ جارج نے ہمیں قہوہ پلایا اور ہم پانچ منٹ میں ایک دوسرے کے دوست بن گئے‘ میں اگلی بار اس کے گھر میں رہوں گا اور وہ پاکستان آئے گا‘ شام کے گھر دلچسپ ہوتے ہیں‘گھر کے چاروں اطراف کمرے ہوتے ہیں‘ درمیان میں صحن ہوتا ہے اور صحن میں پتھر کا گول فوارہ اور انگور کی بیلیں ہوتی ہیں‘ گھر کی ساری کھڑکیاں‘ سارے دروازے صحن میں کھلتے ہیں‘ شام کا یہ آرکیٹکچر مراکش گیا اور پھر وہاں سے سپین اور پرتگال چلا گیا‘ آپ کو یہ آرکیٹکچر سسلی اور فرانس کے جنوبی علاقوں میں بھی ملتا ہے اور لاہور کی قدیم حویلیوں میں بھی‘ یہ تمام شہر دمشق سے متاثر لگتے ہیں۔میں نے دمشق میں تین اور دلچسپ چیزیں بھی دیکھیں۔
یہ لوگ اپنے صحن کو فولڈنگ چھتوں اور پردوں سے ڈھانپ لیتے ہیں‘ یہ پردے سردیوں میں فولڈ کر دیئے جاتے ہیں اور گرمیوں اور بارشوں میں کھول دیئے جاتے ہیں ‘ دو‘ یہ لوگ مصروف وقت میں مصروف بازاروں اور مصروف شاہراؤں پر کسی بھی جگہ کسی بھی گاڑی کے پیچھے اپنی گاڑی پارک کر دیتے ہیں لیکن اپنا موبائل فون ”ڈیش بورڈ“ پر چھوڑ جاتے ہیں‘ اگلی گاڑی کا مالک آتا ہے‘ پچھلی گاڑی کے ڈرائیور کو فون کرتا ہے اور وہ آ کر اپنی گاڑی ہٹا لیتا ہے اور یوں دونوں کا مسئلہ حل ہو جاتا ہے اور سوم آپ دمشق کے کسی بھی شخص سے ملیں‘ آپ جنگ کے سات برسوں بعد بھی اس سے اس کا حال پوچھیں‘ وہ مسکرائے گا‘ آسمان کی طرف دیکھے گا‘ الحمد للہ کہے گا اور پھرپورے جذبے کے ساتھ جواب دے گا ”اللہ کا بہت بہت کرم ہے“ آپ کو شام کے کسی شہری کے ہونٹوں پر شکوہ یا شکایت نہیں ملے گی۔

’’میرا شجرۂ نسب اور میر اشجرۂ کسب‘‘ کے عنوان سے چھپنے والے چار کالم میری یادوں کی زیر تصنیف کتاب ’’میں تے منوبھائی‘‘ کے اوراق ہیں۔ ایک مشہور اردو شاعر کو جب میری طرح کچھ لکھنے کی تکلیف ہوتی تو اپنے ایک ملازم سے کہتے’’غنچے!لائو تو میرا قلم دان‘‘ میرے غنچے کا یہ کردار میرا بھانجا، فرخندہ اختر اور خالد قریشی کا بیٹا ڈاکٹر احمد بلال قریشی ادا کررہے ہیں جنہوں نے حال ہی میں برطانیہ کی ناٹنگھم ٹرینٹ یونیورسٹی سے فلم پر تحقیقی تھیسس لکھا اور پی ایچ ڈی کی ڈگری حاصل کی۔ان کی تحقیق فلم، ڈیزائن اور پرفارمنگ آرٹس کے شعبے کو مضبوط بناسکتی ہے، جو آج کے دور کی اہم ترین ضرورت ہے۔ میرا یہ غنچہ قلم دان کی بجائے کمپیوٹر استعمال کرتا ہے۔ میرے پاس یادوں کا ایک بڑا انبار ہے اور غنچے کے پاس تیز رفتار کمپیوٹر ہے۔میری یادوں کی مجوزہ کتاب’’میں تے منو بھائی‘‘ ان لوگوں اور ان سے جڑے واقعات کے بارے میں ہے جو میرے بچپن ، نوجوانی اور بڑھاپے میں میری زندگی میں آئے اور اپنی خوشگوار یادیں چھوڑ گئے۔ ان لوگوں میں ذوالفقار علی بھٹو، مصطفیٰ کھر، معراج خالد، بیگم نصرت بھٹو، میر مرتضیٰ بھٹو، فاطمہ بھٹو، شہید بینظیر بھٹو اور آصف علی زرداری سے لے کر فیض احمد فیض، احمد ندیم قاسمی، ظہیر بابر، انتظار حسین، احمد بشیر، بشریٰ انصاری، خدیجہ مستور، حاجرہ مسرور، جنگ اخبار کے بانی میر خلیل الرحمن اور ان کی بیگم جہاں آرا صاحبہ اور بیگم صاحبہ کا چھوٹا بھائی اور میرا دوست قمر میر ولد سلطان میر، میرے بے تکلف یار وارث میر اور حامد میر جیسے روشن دماغ دکھائی دیں گے۔ اس فہرست میں اکثر جگہوں پر اور کہیں کہیں منیر احمد شیخ، منیر نیازی، اداکار اور میرے دوست سلطان راہی، مصطفیٰ قریشی، شبنم اور پاکستان ٹیلی ویژن کے اسلم اظہر، آغا ناصر، فضل کمال، یاور حیات اور روحی بانو جیسے فنکار بھی دکھائی دیں گے۔ میرے دوستوں میں صحافی عباس اطہر، شفقت تنویرمرزا، جاوید شاہین ا ور کشور ناہید جیسے دوست اپنی خوبیوں کے ساتھ واضح طور پر نظر آئیں گے۔فیلڈ مارشل ایوب خان، جنرل یحییٰ خان، ضیاء الحق اور جنرل مشرف کا ذکر بھی ہوگا۔بیگم نصرت بھٹو کی ایک شاندار انفرادیت انہیں دنیا بھر کی عورتوں میں ممتاز حیثیت دیتی ہے کہ وہ جونا گڑھ کے وزیر اعظم سرشاہنواز بھٹو کی بہو، ذوالفقار علی بھٹو کی بیوی اور وزیر اعظم پاکستان بینظیر بھٹو کی ماں تھیں۔اپنی کتاب میں صادقین، نصرت چودھری، عابد علی شاہ اور ان کی بیگم نازی آپا کا ذکر کیسے بھولنے کی جسارت کرسکتا ہوں، بقول شاعر؎ آشنا ایسے بھی ان آنکھوں نے کم دیکھے ہیں اور ایسی آنکھیں بھی تو ان آنکھوں نے کم دیکھی ہیں۔

ایک بار پھرپھر سےتھوڑی زحمت کریں اور بیس بائیس برس پیچھے چل کر دیکھیں کہ حالات جوں کے توں ہیں، بد سے بدتر ہوئے ہیں یا ان میں کوئی مثبت تبدیلی بھی آئی ہے؟ پڑھتا جا شرماتا جا۔ونڈ کھائو تے کھنڈ کھائو۔ یہی دراصل میاں نوازشریف کی ’’معاشی پالیسی‘‘ تھی کہ ان کے نزدیک قرضے منظور کرانا اور پھر انہیں ہڑپ کر جانا صرف بڑے بڑوں کا ’’استحقاق‘‘ ہی نہیں۔ ان کی ’’معاشی حکمت عملی‘‘ ہی یہ تھی کہ ہر آدمی کو اس کی اوقات، بساط، معدے اور منہ کے سائز کے مطابق حصہ بقدر جثہ کے اصول کے تحت قرضے لینے اور ہڑپ کر جانے کی آزادی ہونی چاہئے۔ پیلی ٹیکسی اسکیم اسی سوچی سمجھی اسکیم کا ایک عملی اور نادر نمونہ تھا۔ اس اسکیم سے ایک اور مقصد بھی حاصل کیا جاسکتا تھا اور کیا بھی گیا کہ عوام کو بھی ’’کانا‘‘ کردیا جائے کہ جو آدمی قرضہ لیکر اس کی ادائیگی نہ کرسکے یا کرنا ہی نہ چاہے، وہ اپنے دل میں ان مگرمچھوں کے بارے میں کینہ، نفرت اور کدورت کیسے پالے گا جو کروڑوں اور اربوں روپے کے قرضے لے کر ڈکار جاتے ہیں‘‘۔’’چوراہا‘‘ 22اگست 1995ءاب ایک اور اقتباس’’جمہوریت کی چیمپئن ان نام نہاد پارٹیوں میں جمہوریت کا نام و نشان تک نہیں۔ یہ ’’نامزدگی‘‘ کرتے ہیں جبکہ جمہوری عمل میں ’’نامزدگی‘‘ عام زندگی میں ’’حرامزدگی‘‘ کے برابر ہے۔ ان کے عہدیدار دراصل ان کے پالتو اور ذاتی خدمت گار ہوتے ہیں۔ میں نے خود اپنی آنکھوں سے ایک بڑی جمہوری سیاسی جماعت کے ایک سابق صدر پنجاب کو اپنی قیادت کے کپڑے ڈرائی کلینر سے لاتے دیکھا ہے۔ یہ بے عزتیوں، خوشامدوں، ذلتوں اور اہانتوں کی ’’سنوبالنگ‘‘ یا ’’چین ری ایکشن‘‘ ہے۔ بہت بڑے اپنے سے بڑوں کے ہاتھوں ذلیل و خوار ہوتے ہیں اور اپنا غصہ اپنے سے چھوٹوں پر اتارتے ہیں۔ چھوٹے اپنوں سے چھوٹوں کی تذلیل سے اپنی زخمی انا کی مرہم پٹی کرتے ہیں اور یوں اوپر سے شروع ہونے والا تضحیک کا یہ سلسلہ نیچے تک سرایت کرجاتا ہے۔سپر پاور کا سربراہ ہمارے وزیراعظم کیلئے فرعونوزیراعظم وزیروں کیلئے فرعونوزیرایم این اے کیلئے فرعونایم ین اے، ایم پی اے کیلئے فرعوناور ایم پی اے عرف ’’استحقاقیا‘‘ عوام کیلئے فرعونیہ عجیب جمہوریئے ہیں جن کا وجود ہی غیر جمہوری ہے‘‘’’چوراہا‘‘ 15مئی 1996تیسرا اقتباس پیش خدمت ہے’’محنت ہماری اجرت تمہاری، ذلت ہماری دولت تمہاری، ووٹ ہمارے نوٹ تمہارے، بار ہمارا اقتدار تمہارا، جھنڈا تمہارا ڈنڈا ہمارا، ترانہ تمہارا آنہ ہمارا، منشور تمہارے مزدور ہمارے، آن تمہاری کسان ہمارا ….. ’’بل کلنٹن شیرا ے ایہہ بی بی ہیر پھیر اے‘‘…..’’بل کلنٹن شیرا ے ایہہ بابو ہیر پھیر اے‘‘دما دم مست قلندر، اساں قرضے دے اندرسی ٹی بی ٹی….. سی ٹی بی ٹیبابو، بابو ….. بی بی، بی بیتوں وی ذلیل….. میں وی ذلیلرابن رافیل، رابن رافیل’’چوراہا‘‘ 2اگست 1996ءنوٹ: 90کی دہائی میں میں بے نظیر کو ’’بی بی‘‘ اور نواز شریف کو ’’بابو‘‘ لکھتا تھاقارئین! مندرجہ ذیل اقتباس جس کالم سے ہے اس کا عنوان تھا’’وطن کی مٹی گواہ رہنا‘‘ ….. نوش فرمایئے’’اے غاصبوں کے نرغے میں گھری میرے ’’مقبوضہ‘‘ وطن کی مٹی!گواہ رہنا …. گواہ رہناکہ آج میرے پاس آٹے کے پیسے نہیں ہیں۔ پریذیڈنٹ ہائوس، پی ایم ہائوس اور سی ایم ہائوس وغیرہ قائم و دائم ہیں جبکہ میری جھگی پانی کے ریلے میں بہہ گئی ہے جس کے ساتھ ہی میری بیٹی کا مختصر سا جہیز بھی بہہ گیا ہے اور اب اگر اس کے ہاتھ پیلے ہونے کی بجائے اس کا منہ کالا ہو جائے تو برا نہ منانا …. وطن کی مٹی گواہ رہنا کہ مجھے اپنے سات سالہ بیٹے کو ورکشاپ میں مزدوری کیلئے بھیجنا پڑا، دوسرا بچہ مارکیٹ میں کلیوں کے ہار بیچتا ہے اور تیسرا پلاسٹک کے تھال میں خطائیاں سجا کر بیچتا ہے۔ وطن کی مٹی! گواہ رہنا تونے ان بچوں کے ساتھ سوتیلی ماں سے بھی بدتر سلوک کیا…. بلکہ تجھے ایسا کرنے پر مجبور کردیا گیا۔ وطن کی مٹی! گواہ رہنا۔ ملکی وسائل کو دونوں ہاتھوں سے لوٹنے والوں کی سانسیں پھولنا شروع ہوگئی ہیں۔ان کاکھایا پیا پھٹ کر سامنے آنے کو ہے لیکن اس کے باوجود یہ اپنی لوٹ مار کی نشریات میں ’’شارٹ بریک‘‘ تک دینے کوتیار نہیں۔ گواہ رہنا کہ اس ’’منرل واٹر‘‘ اور ’’انٹرکولر‘‘ جمہوریت نے پوری قوم کو ’’سوکڑے‘‘ کی بیماری میں مبتلا کردیا ہے۔ سب کچھ بغیر پرمٹ کے کھانے والوں اور خود کو ’’ایپلائیڈ فار‘‘ اور ’’زیرو میٹر‘‘ کہلانے والوں کو سمجھائو میرے وطن کی مٹی! بھوکے کو دو وقت کی روٹی اور ننگے کو تن بھر کپڑا نہ ملے تو وہ بھونکے گانہیں تو کیا برگر کھائے گا اور پھر جب بھونکتے بھونکتے کاٹنےپراترآیا تو پھر کیا ہوگا۔ بے روزگار کو بکواس بھرا بھاشن نہیں راشن چاہئے۔وطن کی مٹی! گواہ رہنا ’’آئے گا، آئے گا، آئے گا آنے والا‘‘ اور آنےآنے سے ارب ارب تک کا حساب لے گا۔ ان سب پتھر دلوں کی ای سی جی ہوگی، پھر ان کا بائی پاس ہوگا۔ داخلہ خارجہ اور خزانہ بلکہ ہر قسم کی VIPخارش کا علاج ہوگا‘‘۔’’چوراہا‘‘ 30اگست 1996اس کالم کا عنوان تھا ’’پھٹی ہوئی قمیص کٹی ہوئی بجلی‘‘۔ اقتباس حاضر’’اقتدار کا مجرب نسخہ ملاحظہ فرمایئےتخم خود غرضی 17تولے، گل دغا بازی 50تولے، عرق بے غیرتی 1لٹر، روغن منافقت 10تولہ، برگ خیانت 16عدد، معجون رشوت 15چمچ، تخم کنجر کلچر 18عدد، شربت خوشامد و چمچہ گیری دو میگنم سائزبوتلیں،تخم بدی 24عدد، آب جہالت دو گلاس، تھوڑا سا نمک حرام اور شرمناک قسم کا خاندانی شجرہ۔ ان سب کو اچھی طرح مکس کر کے ضمیر فروشی کی دھیمی آنچ پر چڑھا دیں اور ناشکری کی شکر ڈال کرعوام دشمنی یا وطن دشمنی کی ڈوئی میں ڈال کر بھنگ پینے کے بعد پئیں اور VIPبن کر جیئیں۔ مراعات کے کباب کھائیں، استحقاق کے تکے اڑائیں، صوابدیدی اختیارات کا رائتہ اور شورا پئیں، بیٹے کو حرام خور پوسٹنگ دلائیں۔ تھانیدار آپ کو سلام کرے گا۔ تحصیلدار آپ کا حقہ بھرے گا، اے سی آپ کی خوشامد کرے گا،ٹھیکے دار مٹھیاں اور جیبیں بھرے گا، زمانہ آپ سے ڈرے گا، ملک کی ایسی تیسی، عوام کا بیڑا غرق، آپ کی کشتی پار‘‘’’چوراہا‘‘ 6دسمبر 1996

دمشق کی ایک سائیڈ پر جبل قاسیون ہے‘ یہ پہاڑ یہودیت‘ عیسائیت اور اسلام تینوں مذاہب میں مقدس مانا جاتا ہے‘ حضرت ہابیل اور قابیل کے درمیان لڑائی اسی پہاڑ پر ہوئی تھی‘ جبل قاسیون میں آج بھی وہ غار موجود ہے جس میں قابیل نے پتھر مار کر ہابیل کو قتل کر دیا تھا‘ حضرت آدم ؑ کے دونوں بیٹوں کے درمیان خاتون کےلئے لڑائی ہوئی تھی‘ دونوں ایک ہی لڑکی کے ساتھ شادی کرنا چاہتے تھے‘ اللہ تعالیٰ نے ہابیل کی منت قبول کر لی لیکن رقابت ایسا خوفناک جذبہ ہوتا ہے جو حکم الٰہی کو بھی نہیں مانتا چنانچہ حضرت ہابیل جب جبل قاسیون کے ایک غار میں آرام فرما رہے تھے تو قابیل آیا‘ پتھر اٹھایا اور حضرت ہابیل کے سر پر دے مارا‘ آپ انتقال کر گئے‘ قابیل نے اس کے بعد ہابیل کی لاش اٹھائی اور جبل قاسیون پر مارا مارا پھرنے لگا‘ کوے نے مدد کی‘ زمین کھود کر دوسرے کوے کو دفن کیا‘ قابیل کو آئیڈیا مل گیا‘ اس نے بھی زمین کھودی اور حضرت ہابیل کو دفن کر دیا‘ ہابیل اور قابیل کی لڑائی کا غار اور حضرت ہابیل کا مزار یہ دونوں آج تک سلامت ہیں‘ غار ”خونی غار“ کہلاتا ہے‘ یہ جبل قاسیون کی چوٹی پر ہے‘ غار میں آج بھی وہ پتھر موجود ہے جس سے قابیل نے ہابیل کا سر کچلا تھا‘ غار کی چھت سے قطرہ قطرہ پانی ٹپکتا رہتا ہے‘ لوگوں کا خیال ہے غار ہزاروں سال سے حضرت ہابیل کے قتل پر آنسو بہا رہا ہے‘ حضرت ہابیل کا آلہ قتل بظاہر ڈیڑھ دو کلو گرام کا چھوٹا سا پتھر ہے لیکن یہ خاصا بھاری ہے‘ آپ اسے آسانی سے اٹھا نہیںسکتے‘یہ غار انبیاءکرام اور اولیاءاللہ میں بہت مقبول رہا‘ حضرت ذکریا ؑ‘ حضرت یحییٰ ؑ‘ حضرت مریم ؑ اور حضرت عیسیٰ ؑ بھی یہاں قیام فرما چکے ہیں اور حضرت عمر بن عبدالعزیزؒ بھی۔اس غار میں چالیس اولیاءکرام اور عیسائی سینٹ بھی تشریف لا چکے ہیں‘ حضرت ہابیل کا مزار جبل قاسیون کے ایک کونے میں پہاڑ کی چوٹی پر قائم ہے‘ مزار کی دوسری طرف گہری کھائی ہے اور کھائی کے آخر میں زبدانی کا قصبہ ہے‘ دمشق کو پانی زبدانی سے سپلائی ہوتا ہے‘ یہ علاقہ مری سے ملتا جلتا ہے‘درخت بلند ہیں‘ پہاڑی چشموں کی بہتات ہے اور فضا میں ایک طراوت‘ ایک خوشبو پائی جاتی ہے‘ یہ علاقہ چند ماہ پہلے تک دہشت گردوں کے قبضے میں تھا‘ باغیوں نے چند دنوں کےلئے دمشق کا پانی بھی بند کر دیا تھا لیکن یہ اب واپس حکومت کے قبضے میں آ چکا ہے‘ حضرت ہابیل کی قبر عام قبروں سے لمبی ہے‘ یہ ان کے قدآور ہونے کی نشاندہی کرتی ہے‘حکومت نے مزار کو بچانے کےلئے وہاں فوجی چوکی بنا دی ہے‘ چوکی پر دو توپین سر اٹھا کر کھڑی ہیں۔میں حضرت ابوہریرہؓ ‘ حضرت امیر معاویہؓ ‘ طارق بن زیاد‘ابن تیمیہؒ‘ ابن کثیرؒ‘ ابن عساکرؒ اور حضرت محی الدین ابن عربیؒ کے مزارات پر بھی حاضری دینا چاہتا تھا‘ مجھے حضرت ابوہریرہؓ کا مزار نہیں مل سکا‘ یہ سوق حمیدیہ کی کسی گلی میں تھا لیکن لوگ اس سے واقف نہیں ہیں‘ حضرت امیر معاویہؓ مسجد امیہ کے احاطے میں مدفون ہوئے‘ عباسیوں نے دمشق کی فتح کے بعد ان کے مزار کی تمام نشانیاں مٹا دیں‘ یہ اب مسجد کے صحن کے کسی حصے میں آرام فرما رہے ہیں‘ میں وہ حصہ تلاش نہیں کر سکا‘ باب صغیر میں بھی ان کے نام سے ایک مزار منسوب ہے‘ مزار کے تمام دروازے صدیوں سے مقفل ہیں‘ مزار کی دیواروں پر بھی بڑی بڑی زنجیریں چڑھی ہیں جبکہ ان کے نام سے ایک مزار مسجد امیہ کے مشرقی مینار کی سیدھ میں گلی میں بھی موجود ہے‘ مزار پر لکڑی کا چھوٹا سا گنبد بنا ہے‘ یہ مزار بھی ہمہ وقت بند رہتا ہے‘ مجھے یہ مقامات دیکھنے کا اتفاق ہوا۔
حافظ ابن عساکرؒ نے دمشق کی پہلی تاریخ لکھی تھی‘ یہ تاریخ 80 جلدوں پر مشتمل تھی‘ یہ اپنے دور کے عظیم عالم‘ مورخ اور محدث تھے‘ ان کا مزار سڑک کی توسیع کا شکار ہو چکا ہے‘ یہ مزار باب صغیر کے قریب کسی سڑک کے درمیان میں واقع ہے‘ میں بدقسمتی سے اسے تلاش نہیں کر سکا‘ ابن تیمیہؒ اور ابن کثیرؒ دونوں علم کے سمندر تھے‘ یہ ہزار سال سے دنیا بھر کے عالموں کو متاثر کر رہے ہیں‘ یہ دونوں استاد شاگرد تھے‘ یہ دونوں مقابر الصوفیہ میں مدفون ہوئے‘مقابر الصوفیہ کبھی دنیا کا عظیم قبرستان ہوتا تھا‘ دنیا کے بے شمار نامور صوفیاءکرام اس قبرستان میں مدفون ہوئے لیکن آپ بدقسمتی ملاحظہ کیجئے یہ قبرستان دمشق یونیورسٹی کی توسیع کا لقمہ بن گیا‘ یونیورسٹی کی توسیع ابن تیمیہؒ اور ابن کثیرؒ کی قبروں کو بھی نگل گئی‘ابن کثیرؒ انتقال کے بعد اپنے استاد ابن تیمیہؒ کے پاؤں میں دفن ہوئے تھے‘ حکومت نے ان کی قبریں بچا لیں لیکن یہ قبریں یونیورسٹی کے کسی گم نام گوشے میں گم نام ہو کر رہ گئیں‘میری اطلاع کے مطابق یہ قبریںیونیورسٹی کے کسی ہسپتال کے پچھواڑے میں ہیں‘یہ کہاں ہیں دمشق کا کوئی شخص نہیں جانتا‘ میں نے بہت کوشش کی لیکن میں ان کی قبروں تک نہیں پہنچ سکا مگر میں ڈھیٹ شخص ہوں‘ میں ان شاءاللہ دوبارہ دمشق جاؤں گا اور ابن تیمیہؒ اور ابن کثیرؒ دونوں کو تلاش کر کے رہوں گا‘ فاتح سپین طارق بن زیاد بھی دمشق میں فوت ہوئے تھے‘ یہ بادشاہ کے عتاب کا نشانہ بنے اور نہایت ابتر حالت میں انتقال فرمایا‘ ان کا مزار باب توما کے قریب تھا‘ توما حضرت عیسیٰ ؑ کے بارہ حواریوں میں شامل تھے‘ ان کا پورا نام سینٹ تھامس اور عرفیت توما تھی‘ یہ حضرت عیسیٰ ؑ کی آسمانوں پر روانگی کے بعد پہلے شخص تھے جو رومی سلطنت سے باہر نکل پائے‘ یہ دمشق آئے‘ یہاں سے ایران اور افغانستان گئے اور وہاں سے پنجاب آگئے‘ دمشق کے عیسائیوں نے شہر کا مشرقی دروازہ ان کے نام منسوب کر دیا‘ یہ اب باب توما کہلاتا ہے‘ فتح شام کے وقت حضرت خالد بن ولیدؓ بھی اسی دروازے سے دمشق میں داخل ہوئے تھے‘ حضرت خالد بن ولیدؓ نے باب توما کے باہر اپنے نام سے ایک مسجد بھی بنوائی تھی‘ مسجد کے گرد حضرت عثمان الثقفیؓ‘ حضرت شرہبیلؓ‘ حضرت ضرارؓ ‘ حضرت خولہؓ اور طارق بن زیاد کے مزارات تھے‘میں کوشش کے باوجود یہ مزارات تلاش نہ کر سکا‘ دمشق کے عیسائیوں کا خیال ہے حضرت عیسیٰ ؑ مسجد امیہ کے سفید مینار کی بجائے باب توما کے سفید مینار پر اتریں گے‘ میں نے غور سے دیکھا تو باب توما پر بھی ایک سفید مینار موجود تھا‘ مینار کی ایک سائیڈ پر تین اور دوسری سائیڈ پر دو کھڑکیاں تھیں‘ یہ مینار بھی صدیوں سے بند چلا آ رہا ہے‘ میں اس مینار پر بھی نہیں چڑھ سکا لیکن ان شاءاللہ اگلی بار سہی‘ مجھے یقین ہے میں حضرت عیسیٰ ؑ کی آمد سے سینکڑوں سال قبل دنیا سے رخصت ہو چکا ہوں گا لیکن اس کا ہرگز ہرگز یہ مطلب نہیں میں اس چبوترے کو ہاتھ لگانے اور چومنے سے بھی محروم ہو جاؤں جہاں حضرت عیسیٰ ؑ نے قدم رنجہ فرمانا ہے‘جہاں سے وہ اسلام کے اس دھاگے کو دوبارہ گرہ لگائیں گے جسے ہم جیسے عاقبت نااندیشوں نے توڑ دیا تھا‘ میں ان شاءاللہ دونوں میناروں پربھی پہنچوں گا اور حضرت عیسیٰ ؑ کے چبوترے کو ہاتھ لگاؤں گا۔مجھے ابن عربیؒ کے مزار تک پاکستان کے قونصل جنرل عبدالجبار ترین نے پہنچایا‘ یہ دو برس سے دمشق میں تعینات ہیں‘ ان کے بھائی ستار ترین صحافی ہیں‘ یہ ایکسپریس میں کام کرتے ہیں‘ جبار ترین جب بھی پاکستان تشریف لاتے تھے یہ مجھے ملاقات کا شرف بخشتے تھے۔یہ دمشق کے متحرک سفارت کاروں میں شمار ہوتے ہیں‘ شامی حکومت اور زیادہ تر سفارت کار انہیں جانتے ہیں‘ ٹھیک ٹھاک عربی بول لیتے ہیں‘ یہ مجھے ہفتے کے دن حضرت ابن عربیؒ کے مزار پر لے گئے‘ یہ علاقہ جبل قاسیون کے دامن میں ہے اور یہ ابن عربیؒ کی مناسبت سے محلہ ابن عربی کہلاتا ہے‘ اسلامی تاریخ نے آج تک ابن عربیؒ جیسا دوسرا شخص پیدا نہیں کیا‘ یہ پیدائشی صوفی اور عالم تھے‘ یہ حاتم طائی کے قبیلے سے تعلق رکھتے تھے‘ سپین کے شہر مرسیا میں پیدا ہوئے، اشبیلہ میں تعلیم حاصل کی اور اس کے بعد علم اور سلوک کی راہوں پر نکل کھڑے ہوئے‘ یہ بغداد‘ قاہرہ‘ دمشق اور ترکی گئے‘ یہ مکہ اور مدینہ کی گلیوں میں بھی پھرتے رہے‘ یہ دنیا کے واحد صوفی ہیں جنہیں صوفیاءکرام شیخ اکبر کہتے ہیں‘ شیخ نے پانچ سو کے قریب کتابیں تحریر کیں‘ مولانا رومؒ تک ان سے متاثر ہوئے‘ ابن رشد ان کے ہاتھ چومتا تھا‘ یہ واحد عالم ہیں جنہوں نے قرآن مجید کے حروف مقطعات کو ”ڈی کوڈ“ کیا‘ یہ صاحب کشف اور صاحب کرامات تھے۔
یہ تاریخ اسلام کے واحد کردار ہیں جنہیں آج تک کوئی شخص مکمل طور پر نہیں سمجھ سکا‘ آپ ان کی کتب پڑھیں یہ آپ کو ہر بار نئے معانی‘ نئے مفاہیم کی سوغات لگیں گی‘ یہ 36 سال مغرب اور 36 سال مشرق میں گھومتے رہے‘ حضرت خضر ؑ سے ملاقات بھی ہوئی اور اللہ تعالیٰ کی تجلیوں سے بھی بہرہ مند ہوئے‘ یہ 620ءہجری میں دمشق آئے اور آخری سانس تک اسی شہر میں مقیم رہے‘ انتقال سے پہلے پیش گوئی کی ”میری قبر گم ہو جائے گی‘ یہ اس وقت دوبارہ ظاہر ہوگی جب س ش میں داخل ہو گا“حضرت ابن عربیؒ کی قبر واقعی گم ہوگئی‘ ترک سلطان سلیم اول نے 1516ءمیں شام فتح کیا‘ یہ جوں ہی دمشق میں داخل ہوا‘ ایک پرانے گھر کی دیوار گری اور حضرت ابن عربیؒ کا مزار ظاہر ہو گیا۔میں تنگ بازار سے ہوتا ہوا مزار تک پہنچا‘ احاطے میں داخل ہوا‘ درود پڑھتا ہوا سیڑھیوں سے اترا‘سامنے حضرت محی الدین ابن عربیؒ سبز غلاف اوڑھ کر آرام فرما رہے تھے‘ میں نے شیخ اکبر کو سلام کیا‘ ان کی قبرمبارک کا بوسہ لیا اور آہستہ سے عرض کیا ”یا شیخ میں بالآخر آپ تک پہنچ گیا “۔مجھے اچانک اپنے کندھے پرایک شفقت بھرا گرم ہاتھ محسوس ہوا۔