Category بزنس

اسلام آباد(میڈیا پاکستان) وفاقی حکومت کی جانب سے مجوزہ پاکستان بڑھانے پر اتفاق کیا ہے۔ وزیراعظم شاہد خاقان عباسی کی صدارت میں وزیراعظم آفس میں گیس سیکٹر لیڈر شپ کمیٹی کا پانچواں اجلاس ہوا جس میں وزیراعلیٰ سندھ مرادعلی شاہ، وزیراعلیٰ بلوچستان ثناء اللہ زہری، وزیرمملکت برائے توانائی جام کمال خان، خیبرپختونخوا کے وزیر توانائی عاطف خان، پنجاب کی وزیر خزانہ عائشہ غوث پاشا، چیئرمین اوگرا عظمیٰ عادل خان اور دیگر حکام کے علاوہ عالمی بینک کے پاکستان میں مشن لیڈر ڈیفنی جینسر بھی سینئر حکام کیساتھ شریک ہوئے۔
وزیراعظم نے ملک میں توانائی کی ضروریات اور اصلاحات لانے کیلیے حکمت عملی پر روشنی ڈالی۔ انھوں نے کہا دستیابی، کارکردگی، پائیداری اور قابل خرید ہونا گیس سیکٹر میں اصلاحات کی اہم ترجیحات ہیں۔ وزیراعظم نے کہا رواں سال 100 کے قریب گیس ذخائر دریافت ہونا موجودہ طلب پورا کرنے کیلئے کافی نہیں اس لیے مقامی پیداوار میں اضافے کے باوجود گیس کی دریافت کی ضرورت پڑ رہی ہے۔ وزیراعظم نے اجلاس کو یقین دلایا کہ گیس کے شعبے سے متعلقہ تمام آئینی معاملات مشترکہ مفادات کونسل کی سطح پر حل کیے جارہے ہیں۔ آپریشنل معاملات اور اصلاحات کا عمل جاری رہنا چاہیے۔ گیس سیکٹر میں اصلاحات کے ٹیم لیڈر، ایم ڈی سوئی سدرن گیس کمپنی خالد رحمان نے اصلاحات کے حوالے سے اجلاس کو بریفنگ دی۔
عالمی بینک کے کنسلٹنٹ نے بھی اجلاس کو بریفنگ دی۔ وزیراعظم نے اصلاحات کیلئے متحرک کردار ادا کرنے پر صوبائی حکومتوں اور عالمی بینک کا شکریہ ادا کیا۔ انہوں نے کہا یہ اصلاحات گیس کی پائیدار سپلائی کے نظام کیلیے انتہائی اہم ہیں۔ ان اصلاحات کا بنیادی مقصد صوبوں اور دیگر شراکت داروں کے حقوق متاثر کئے بغیر صارفین کو آسانی فراہم کرنا ہے۔
وزیراعلیٰ بلوچستان نے کہا بلوچستان کے لوگوں کو گیس کی قابل خرید رسائی ضروری ہونی چاہیے۔ وزیراعلیٰ سندھ نے اصلاحات کی حمایت کرتے ہوئے مجوزہ ریگولیٹری باڈیز میں تمام صوبوں کی یکساں نمائندگی پر زور دیا۔ انھوں نے اصلاحات کیلئے آئینی تقاضوں کو پورا کرنے پر بھی زور دیا۔ پختونخوا کے وزیر توانائی نے وزیراعلیٰ سندھ کے موقف کی تائید کی۔ وزیر خزانہ پنجاب نے بتایا پنجاب حکومت نے اصلاحات پر غور کیلئے پہلے ہی ایک کمیٹی تشکیل دیدی ہے۔ اجلاس نے اصولی فیصلہ کیا کہ اصلاحات کے عمل کو آگے بڑھایا جائیگا اور اپنے تعاون کا اعادہ کیا۔

اسلام آباد(میڈیا پاکستان) اوگرا نے پیٹرولیم مصنوعات کی قیمتوں میں اضافے کی سمری وزارت پیٹرولیم کو بھیج دی ہے۔ذرائع کے مطابق اوگرا نے عوام پر پیٹرول بم گرانے کی تیاری کرلی ہے اور وزارت پیٹرولیم کو یکم اکتوبر سے پیٹرولیم مصنوعات کی قیمتوں میں اضافے کی سمری بھی بھیج دی ہے۔اوگرا کی جانب سے بھیجی گئی سمری میں پیٹرول کی قیمت میں 2 روپے 36 پیسے فی لیٹر اضافے کی سفارش کی ہے جس کے بعد پیٹرول کی قیمت 71.50 روپے سے بڑھ کر 73.86 روپے ہوجائے گی۔ سمری میں مٹی کے تیل کی قیمت میں 19 روپے 33 پیسے فی لیٹر بڑھانے کی سفارش ہے جس کے بعد مٹی کے تیل کی قیمت 44 روپے سے بڑھ کر 63.33 روپے فی لیٹر ہوجائے گی جب کہ لائٹ ڈیزل کی قیمت میں 14 روپے 10 پیسے فی لیٹر کے بعد 44 روپے سے بڑھا کر 58.10 روپے کرنے کی تجویز دی گئی ہے۔

اسلام آباد(میڈیا پاکستان) وفاقی حکومت کی جانب سے ملک میں تیل وگیس ذخائرکی تلاش کی سرگرمیوں اور مارکیٹنگ میں صوبوں کا کردار ختم کیے جانے کا امکان ہے۔وفاقی حکومت کی جانب سے ملک میں تیل وگیس ذخائرکی تلاش کی سرگرمیوں اور مارکیٹنگ میں صوبوں کا کردار ختم کیے جانے کا امکان ہے تاہم حتمی فیصلہ گیس کے شعبہ میں اصلاحات کیلئے قائم کمیٹی کی منظوری کی صورت ہوگا جس کیلیے تیارمنصوبہ آج وزیر اعظم شاہدخاقان عباسی کی زیر صدارت ہونے والے گیس کے شعبے میں اصلاحات کمیٹی کے اجلاس میں پیش کیا جائے گا۔
’’ایکسپریس‘‘ کو دستیاب دستاویز کے مطابق آج ہونیوالے اجلاس میں پیش کیے جانیوالے مجوزہ منصوبے کے میں تیل و گیس کے شعبہ میں تیل و گیس کی تلاش کی تمام سرگرمیوں (اپ اسٹریم) اورریفائننگ کے شعبے (ڈاؤن اسٹریم) اور مارکیٹنگ میں صوبوں کا کردار ختم کرنیکی سفارش کی گئی علاوہ ازیں اس مجوزہ منصوبے کے تحت نئی تجویزکردہ پاکستان پٹرولیم ایکسپلوریشن اینڈ پروڈکشن ریگولیٹری اتھارٹی میں صوبوں کی نمائندگی کو بھی شامل نہیں کیا گیا۔
دستیاب دستاویزکے مطابق گیس کے شعبے میں اصلاحات کی کمیٹی کااجلاس وزیراعظم کی زیر صدارت آج دن دو بجے ہو گا، پاکستان پٹرولیم ایکسپلوریشن اینڈ پروڈکشن اتھارٹی تیل و گیس کی تلاش کیلیے قومی سطح پر بننے والی پالیسیوں قوانین اور معاہدوں کاجائزہ لے گی اوروقتاً فوقتاً وفاقی حکومت کو سفارشات فراہم کرتی رہیگی تیل وگیس کے ذرائع اور تیل وگیس کی تلاش کے حوالے سے ایک رپورٹ مرتب کرکے شائع کریگی نوتشکیل شدہ اتھارٹی تیل و گیس کی تلاش کے لیے کاروائیوں کے تمام انتظامی امور اور ریگولیشن کی ذمے دار ہو گی۔

کراچی(میڈیا پاکستان) اسٹیٹ بینک آف پاکستان نے ہفتہ 30 ستمبر اور اتوار یکم اکتوبر کو عاشورہ کے موقع پر بینکوں کی تعطیل کا اعلان کردیا ہے۔اسٹیٹ بینک آف پاکستان کے اعلامیے کے مطابق 9 اور 10محرم الحرام 1439 ہجری کو عاشورہ تعطیل کے موقع پر اسٹیٹ بینک آف پاکستان کے تمام دفاتر بند رہیں گے۔

اسلام آباد(میڈیا پاکستان) ایشیائی ترقیاتی بینک نے پاکستان میںسیاسی عدم استحکام کو معیشت کیلیے خطرناک قرار دیتے ہوئے کہاہے کہ اگرچہ پاکستانی معیشت نے مثبت ترقی کی ہے تاہم مسائل کا سامنا موجود ہے۔اے ڈی بی کی جانب سے جاری بیان کے مطابق پاکستان میں گزشتہ مالی سال کے دوران ترقی کی شرح5.3 فیصد رہی، زرعی ترقی کی شرح 0.3 فیصد سے بڑھ کر 3.5 فیصد، مینوفیکچرنگ گروتھ 0.7فیصدسے بڑھ کر 5.3 فیصد اور حکومتی سروسز بڑھ کر 5.5 سے 6.0فیصدہوگئی ہے۔ مالی سال 2018ء میں پاکستان کی ابھرتی معیشت کے باعث بہترگروتھ کی توقع ہے جبکہ سیکیورٹی اور کاروباری ماحول میں بھی بہتری کی امید ظاہرکی گئی ہے۔
ایشیائی ترقیاتی بینک کے کنٹری ڈائریکٹرژی ہوآنگ یانگ نے بتایا پاکستان کی مثبت ترقی کرتی معیشت خوش آئند ہے تاہم پاکستان کو درپیش خطرات سے نمٹنے اورمقابلہ سازی کی فضا بہتر کرنیکی ضرورت ہے۔

لاہور(میڈیا پاکستان) ترجمان محکمہ زراعت شعبہ مارکیٹنگ پنجاب نے کہا ہے کہ ٹماٹر کی قیمت میں اضافے کی بڑی وجہ بلوچستان میں فصل کا خراب ہونا ہے۔ترجمان محکمہ زراعت کا کہنا ہے کہ گزشتہ کئی سال سے پاکستان کو ٹماٹر کی کمی کا سامنا رہا جس پر حکومت کو اپنا قیمتی زرمبادلہ خرچ کرنا پڑتا رہا اور صارف کو مہنگی قیمت پر خریدنا پڑتا رہا جس کی وجہ سے ہمارے ٹماٹر کے کاشت کار کی حوصلہ شکنی ہوتی رہی، ملک کو ٹماٹر میں خود کفیل بنانے کیلیے جامع حکمت عملی مرتب کی جس کے تحت دوسرے صوبوں کے محکمہ زراعت کو اس منصوبہ بندی کے بارے آگاہ کیا گیا۔
اس پالیسی پر دوسرے صوبوں نے جامع انداز میں عمل کیا، عید الاضحی تک ٹماٹر کی قیمت مستحکم رہی لیکن بارشوں کی وجہ سے بلوچستان اور سندھ میں فصل خراب ہو گئی، خیبرپختونخوا میں موسم کی تبدیلی کی وجہ سے فصل بروقت نہ آسکی، عید پر ٹماٹر کی ضرورت میں اضافہ ہوگیا جس سے اس کی قیمت بھی بڑھ گئی ، حکومت نے صورت حال کا جائزہ لیتے ہوئے نجی طور پر افغانستان اور ایران سے ٹماٹرمنگوائے ہیں۔
ترجمان کے مطابق پیاز کی قیمت کنٹرول میں ہے، پیاز بلوچستان اور سندھ سے آرہی ہے، پیاز کی قیمت میں مزید کمی متوقع ہے، جب سے قیمتیں بڑھی ہیں منافع خوروں نے بھی سر اٹھا لیا ہے اور ضلعی حکومتیں ڈپٹی کمشنر کی زیرنگرانی منافع خوروں کے خلاف کارروائی میں مصروف ہیں، سبزیوں اور پھلوں کی رسد کو مناسب قیمتوں پرمہیا کرنا حکومت کی اولین ترجیح ہے۔

اسلام آباد(میڈیا پاکستان) فیڈرل بورڈ آف ریونیو (ایف بی آر) نے 43 ہزارسے زائد ٹیکس دہندگان کو 44 ارب روپے سے زائد کے ٹیکس واجبات کی ادائیگی کے نوٹس جاری کر دیے ہیں جن میں سے 8 ارب روپے کی ریکوری ہوئی ہے۔اس ضمن میں ایف بی آر کے سینئر افسر نے گزشتہ روز ’’ایکسپریس‘‘ کو بتایا کہ فیڈرل بورڈ آف ریونیو کی جانب سے مجموعی طور پر75 ہزار ٹیکس دہندگان کو قرعہ اندازی کے ذریعے آڈٹ کے لیے منتخب کیا تھا مگر ٹیکس دہندگان کی جانب سے مقدمہ بازی کی وجہ سے آڈٹ رکا رہا جس سے آڈٹ زیادہ نہیں ہوسکا مگرعدالت کی جانب سے کچھ عرصہ قبل فیصلہ دیا جاچکا ہے۔
جس میں آڈٹ کے کیس 30 دسمبر تک مکمل کرنے کے احکام جاری کیے گئے ہیں۔ مذکورہ افسر نے بتایا کہ عدالت کا فیصلہ آنے کے بعد فیڈرل بورڈ آف ریونیو نے تمام ماتحت اداروں کو ٹیکس دہندگان کا آڈٹ تیز کرنے کی ہدایت کی تھی جس کے نتیجے میں فیڈرل بورڈ آف ریونیو کے ماتحت اداروں نے 75 ہزار میں سے 43 ہزار سے زائد ٹیکس دہندگان کا آڈٹ مکمل کرلیا ہے۔ ذرائع کا کہنا ہے کہ جن ٹیکس دہندگان کا آڈٹ مکمل کیا گیا ہے ان سے 44 ارب روپے کے ٹیکس واجبات کی ادائیگی کی ڈیمانڈ کی گئی ہے جس کے لیے انہیں نوٹس جاری کیے گئے ہیں۔ مذکورہ افسر نے بتایا کہ ایف بی آر کے فیلڈ فارمشنز کی جانب سے آڈٹ کے ذریعے ٹیکس دہندگان کے ذمے واجب الادا ٹیکسوں کی پیدا کی جانے والی ڈیمانڈ میں سے اب تک مجموعی طور پر 8 ارب روپے کی ریکوری کی جاچکی ہے جبکہ باقی واجبات کی ریکوری کے لیے کوششیں جاری ہیں۔
ذرائع نے بتایا کہ فیڈرل بورڈ آف ریونیو کے نئے چیئرمین طارق پاشا نے زیر التوا ٹیکس کیس جلد نمٹانے اور پھنسے ہوئے ٹیکس ریونیو کی زیادہ سے زیادہ ریکوری کے لیے سخت ہدایات جاری کی ہیں جس پر عملدرآمد کے لیے ایف بی آر کی جانب سے تمام فیلڈ فارمشنز کو نہ صرف باقاعدہ طور پر ہدایات جاری کی جاچکی ہیں بلکہ ایف بی آر کے ممبر ٹیکس پیئر آڈٹ خود فیلڈ فارمشنز کے دورے بھی کررہے ہیں اور چیف کمشنرز ان لینڈ ریونیو سمیت دیگر متعلقہ و مجاز افسران کو آڈٹ کیسز جلد سے جلد نمٹانے کے لیے پالیسی کے مطابق عملدرآمد کو یقینی بنانے کی ہدایات جاری کررہے ہیں۔
ذرائع کا کہنا ہے کہ فیلڈ فارمشنز کو اس بارے میں سخت پیغام دیا گیا ہے اور ان پر واضح کیا گیا ہے کہ جو فیلڈ فارمشن ٹیکس دہندگان کے زیر التوا آڈٹ کیسوں میں سے 50فیصد 30 ستمبر تک نمٹانے میں ناکام رہے گا ان کے خلاف کارروائی بھی عمل میں لائی جاسکتی ہے اور ان کی ترقی کے ساتھ ساتھ تقرریوں و تبادلے بھی ان کی کارکردگی کی بنیاد پر کیے جائیں گے اور جو مجاز ادارے و افسران ہدف پورا نہیں کرسکیں گے انہیں ٹھوس وجوہ دینا ہوں گی اور ٹھوس وجوہ و جواز فراہم نہ کرنے والے افسران کے خلاف کارروائی ہوگی۔ ذرائع کا کہنا ہے کہ ایف بی آر کی کوشش ہے کہ عدالت کی جانب سے دی جانے والی ڈیڈ لائن تک زیادہ سے زیادہ آڈٹ کیس مکمل کرلیے جائیں۔

کراچی: بین الاقوامی بلین مارکیٹ میں فی اونس سونے کی قیمت21 ڈالر کی کمی سے 1294ڈالر کی سطح پر پہنچنے کے باعث مقامی صرافہ مارکیٹوں میں بھی جمعرات کو فی تولہ اور فی 10 گرام سونے کی قیمتوں میں بھی بالترتیب550 روپے اور471 روپے کی کمی واقع ہوئی۔جس کے نتیجے میں فی تولہ سونے کی قیمت گھٹ کر52050 روپے اور فی 10 گرام سونے کی قیمت گھٹ کر44614 روپے ہوگئی اسی طرح فی تولہ چاندی کی قیمت10 روپے کی کمی سے750 روپے اور فی 10 گرام سونے کی قیمت8.57 روپے کی کمی سے 642.85 روپے ہوگئی۔

اسلام آباد(میڈیا پاکستان) آٹو پالیسی 2016-21 کے تحت 4 نئی کمپنیوں نے کار مینوفیکچرنگ پلانٹ لگانے کے لیے انجینئرنگ ڈیولپمنٹ (ای ڈی بی) کو درخواستیں دے دی ہیں جبکہ 4 کمپنیوں نے ای ڈی بی کی اجازت ملنے کے ساتھ ہی پلانٹ کی تیاری کا سلسلہ شروع کر دیا ہے۔نئی آٹو کمپنیوں کے قیام سے ملک میں کاروں کی مینوفیکچرنگ کی تعداد4 لاکھ سالانہ سے تجاوز کر جائے گی۔ تفصیلات کے مطابق وفاقی حکومت کی جانب سے آٹو پالیسی 2016-21 متعارف کروائے جانے کے بعد ملک میں کار مینوفیکچرنگ کے نئے پلانٹ لگانے کے لیے مختلف کمپنیوں کی جانب سے درخواستیں دی جا رہی ہیں۔ چار کمپنیوں کو انجینئرنگ ڈیولپمنٹ بورڈ کی جانب سے اب تک پلانٹ لگانے کی اجازت دی جا چکی ہے جس میں یونائیٹڈ موٹرز لاہور کا چائنا کی کمپنی کے ساتھ جوائنٹ وینچر، ہونڈائی کوریا کا نشاط گروپ، کیا کوریا کا لگی گروپ اور ریگل آٹو موبائل لاہور کا چائنا کی آٹو کمپنی کے ساتھ جوائنٹ وینچر کے طور پر کار مینوفیکچر پلانٹ لگانے کا سلسلہ جاری ہے۔مذکورہ کمپنیوں میں سے ریگل آٹو زکی جانب سے وین اور سو زوکی گاڑیاں تیارکی جائیں گی۔
اسی طرح چار نئی آٹو کمپنیوں نے بھی پاکستان میں اپنے پلانٹ لگانے کا فیصلہ کیا ہے جس میں خالد مشتاق موٹر کراچی کی جانب سے انجینئرنگ ڈیولپمنٹ بورڈ کو آٹو مینوفیکچرنگ پلانٹ لگانے کے لیے درخواست دی گئی ہے۔ اسی طرح پاک چائنا موٹرز، حبیب رفیق موٹرز اور سازگار موٹرز کی جانب سے بھی انجینئرنگ ڈیولپمنٹ بورڈ کو کار مینوفیکچرنگ پلانٹ لگانے کی درخواستیں دی گئی ہے ۔
تاہم ای ڈی بی ذرائع کا کہنا ہے کہ ان نئی کمپنیوں کی درخواستوں اور بزنس پلان پر ای ڈی بی غور کر رہا ہے جس کے بعد ان کمپنیوں کو پلانٹ لگانے کی اجازت دینے سے متعلق فیصلہ کیا جا ئے گا اس وقت ملک میںتقریبا2لاکھ کے قریب کاروں کی مینوفیکچرنگ ہے اورنئی کار مینوفیکچرنگ کمپنیوں کی جانب سے مینوفیکچرنگ کا عمل شروع کرنے کے ساتھ ہی ملک میں کاروں کی سالانہ مینوفیکچرنگ 4لاکھ سے تجاوز ہونا متوقع ہے۔

کراچی(میڈیا پاکستان) بین الاقوامی بلین مارکیٹ میں فی اونس سونے کی قیمت7 ڈالر کے اضافے سے 1315 ڈالر کی سطح پر پہنچنے کے باعث مقامی صرافہ مارکیٹوں میں بھی بدھ کو فی تولہ اور فی دس گرام سونے کی قیمتوں میں بالترتیب350 روپے اور300 روپے کااضافہ ہوگیا ہے۔
جس کے نتیجے میں فی تولہ سونے کی قیمت بڑھ کر 52600 روپے اور فی دس گرام سونے کی قیمت بڑھ کر 45085 روپے ہوگئی۔