Category بزنس

اسلام آباد(میڈیا پاکستان) چین کے ساتھ پاکستان کا تجارتی خسارہ تین گنا اضافے کے ساتھ 12 ارب ڈالر تک پہنچ گیا۔قومی اسمبلی کے اجلاس میں وقفہ سوالات کے دوران چین کے ساتھ گزشتہ 5 سال کے تجارتی خسارے کی تفصیلات ایوان میں پیش کی گئیں۔ وفاقی وزیر تجارت محمد پرویز ملک نے تحریری جواب جمع کراتے ہوئے انکشاف کیا کہ 5 سال میں چین کیساتھ تجارتی خسارے میں 3 گنا اضافہ ہوگیا جس کے نتیجے میں خسارہ 12 ارب ڈالر تک پہنچ گیا ہے۔وزیر تجارت پرویز ملک نے بتایا کہ 2016-17 میں چین کے ساتھ تجارتی خسارہ 12 ارب 67 کروڑ ڈالر ہوگیا جو ایک سال پہلے 16-2015 میں 10 ارب 43 کروڑ ڈالر تھا۔ تحریری جواب میں بتایا گیا کہ 15-2014 میں چین کے ساتھ پاکستان کا تجارتی خسارہ 8 ارب ڈالر اور 14-2013 میں 5 ارب 35 کروڑ ڈالر رہا جبکہ 13-2012 میں یہ خسارہ 4 ارب ڈالر تھا۔
وزیر تجارت کے مطابق بھارت کے ساتھ تجارت میں بھی پاکستان مسلسل خسارے میں جارہا ہے۔ چار سال میں بھارت سے 7 ارب 34 کروڑ ڈالر کا سامان منگوایا گیا اور اس کے ساتھ تجارتی خسارہ 5 ارب 94 کروڑ ڈالر رہا۔

کراچی(میڈیا پاکستان) اسٹیٹ بینک آف پاکستان نے بینک آف چائنا کو پاکستان میں کاروبار شروع کرنے کی اجازت دے دی۔مرکزی بینک کی جانب سے جاری بیان میں کہا گیا کہ بینک آف چائنا سی پیک منصوبوں کی سرمایہ کاری کے لیے اسپیشلائزڈ بینکاری خدمات فراہم کرنا چاہتا ہے، بینک آف چائنا کے پاکستان میں آپریشنز شروع ہونے کے بعد دونوں ممالک کے روابط مزید مضبوط ہوں گے۔اسٹیٹ بینک کے مطابق بینک آف چائنا کا کاروبار دنیا کے 50 ممالک میں پھیلا ہوا ہے اور یہ سرمائے کے لحاظ سے دنیا کا چوتھا اور مجموعی اثاثوں کے اعتبار سے دنیا کا پانچواں بڑا بینک ہے۔ اسٹیٹ بینک کے مطابق بینک آف چائنا نے اہم ضوابط اور آپریشنل تقاضوں کو پورا کر دیا جس کے بعد اسے اپنا آپریشن شروع کرنے کی اجازت دی گئی ہے۔ بینک آف چائنا کو مئی 2017 میں بینکاری لائسنس جاری کیا گیا تھا۔
واضح رہے کہ بینک آف چائنا پاکستان میں اپنی شاخیں کھولنے والا دوسرا چینی بینک ہو گا، اس سے قبل کمرشل بینک آف چائنا 2011 سے پاکستان میں کاروبار کر رہا ہے۔

اسلام آباد(میڈیا پاکستان) فیڈرل بورڈ آف ریونیو(ایف بی آر) نے ٹیکس چوروں کا سراغ لگانے کے لیے آٹومیٹڈ رسک مینجمنٹ سسٹم تیار کرلیا ہے جس کی عالمی بینک کے وفد کی پاکستان آمد کے بعد جائزہ لے کر حتمی منظوری دیے جانے کا امکان ہے۔ایف بی آر کے سینئر افسر نے ’’ایکسپریس‘‘ کو بتایا کہ پاکستان میں رسک مینجمنٹ سسٹم عالمی بینک کے ساتھ جوائنٹ وینچر کے تحت متعارف کرایا جارہا ہے، اس جدید رسک مینجمنٹ سسٹم کے ذریعے ٹیکس دہندگان کی جانب سے ان کے ظاہر کردہ اخراجات و آمدنی میں فرق کے علاوہ دیگر اعدادوشمار میں بڑے پیمانے پر فرق کی نشاندہی کرکے ان کا رسک بیسڈ آڈٹ کیا جاسکے گا۔
ذرائع نے بتایا کہ عالمی بینک کے تعاون سے یہ سسٹم تیار کرنے کے لیے ایف بی آر ٹیم نے جون 2017 میں آسٹریلیا کا دورہ کیا تھا اور وہاں نافذالعمل رسک مینجمنٹ سسٹم کے ماڈل کا تفصیلی جائزہ لینے کے بعداس ٹیم نے واپس آکر رسک مینجمنٹ سسٹم کے پائلٹ پروجیکٹ پر کام شروع کیا اور اب یہ نظام تیار کرلیا گیا ہے، ٹیم نے سسٹم کا سافٹ ویئر بھی تیار کر لیا ہے اور اب پائلٹ پروجیکٹ کو نافذ کرنا ہے جس کے لیے عالمی بینک کے مشن کے دورے کا انتظار ہے، یہ دوران رواں ماہ ہی متوقع ہے۔
منصوبے کے پائلٹ پروجیکٹ کے بعد بتدریج اس کا دائرہ کار بڑھایا جائے گا، نظام کے متعارف کرانا کے بعد نئے لوگوں کو ٹیکس نیٹ میں لانے اور ٹیکس ٹو جی ڈی پی کی شرح بڑھانے کے ساتھ ساتھ ٹیکس وصولیوں میں اضافہ کرنے میں بھی مدد ملے گی۔

کراچی(میڈیا پاکستان) بینک دولت پاکستان کے گورنر طارق باجوہ نے کہا ہے کہ مالی سال 2016-17 کی دوسری ششماہی کے دوران برآمدات میں بحالی کا جو عمل شروع ہوا تھا رواں مالی سال میں اس کا تسلسل معیشت کے لیے خوش آئند ہے۔گورنر اسٹیٹ بینک نے کہا کہ رواں مالی سال کے ابتدائی 2 ماہ کا ڈیٹا اہم بیرونی اشاریوں خاص طور پر ترسیلات زر، برآمدات اور بیرونی براہ راست سرمایہ کاری میں بحالی کو ظاہر کرتا ہے، کارکنوں کی ترسیلات زر جولائی تا اگست 2017 کے دوران 13.2 فیصد اضافے کے ساتھ بڑھ کر 3.5 ارب ڈالر تک پہنچ گئیں اور تمام اہم راہداریوں سے رقوم کی آمد جولائی تا اگست 2016 کے مقابلے میں بلند رہی ہے۔
طارق باجوہ نے کہا کہ معاون اقتصادی پالیسیوں کے تسلسل کے ساتھ سرمایہ کاری کے لیے ملکی معیشت کی کشش بڑھ رہی ہے، مجھے یقین ہے کہ ایسے سازگار حالات میں کاروباری اداروں کے لیے ترقی اور توسیع کے بے شمار مواقع موجود ہیں۔ انہوں نے کہا کہ امن و امان کی بہتر ہوتی صورت حال اور توانائی کی رسدمیں بہتری کی بدولت 2016-17میں مسلسل تیسرے سال معیشت میں توسیع کی رفتار میں اضافہ ہوا ہے، اس دوران 5.3 فیصد معاشی نمو ہوئی جبکہ گزشتہ برس یہ 4.6 فیصد تھی، یہ معاشی نمو نہ صرف گزشتہ 10 برسوں کی بلند ترین سطح ہے بلکہ وسیع البنیاد بھی ہے، معیشت کے تینوں اہم شعبوں زراعت، صنعت اور خدمات نے اس ترقی میں اہم کردار ادا کیا ہے۔

بیجنگ(میڈیا پاکستان) چین کی وزارت تجارت کے وائس منسٹر وانگ شووین نے کہا ہے کہ چین پاکستان آزاد تجارتی معاہدے کا دوسرے مرحلہ مذاکرات مکمل ہو کر نافذ ہونے سے پاکستان ٹیرف کی کم شرح کے باعث نہ صرف چین کو اپنی برآمدات میں توسیع دینے کے قابل ہوگا بلکہ وہ آئندہ 5سال کے دوران چین سے زیادہ سرمایہ کاری بھی حاصل کر سکے گا۔چینی وزارت تجارت میں چین پاکستان آزاد تجارتی معاہدے کے دوسرے مرحلے پرمذاکرات کے آٹھویں اجلاس کے افتتاحی سیشن سے خطاب کرتے ہوئے انہوں نے کہا کہ آئندہ 5سال کے دوران چین 80 کھرب ڈالر کی اشیا درآمد کرے گا اورآزاد تجارتی معاہدے کے تحت ٹیرف کی شرح کم ہونے سے پاکستان نہ صرف چین کو اپنی برآمدات میں اضافہ کرسکتا ہے بلکہ وہ زیادہ چینی سرمایہ کاری حاصل کرنے کے قابل بھی ہوجائے گا۔ انہوں نے کہا کہ چین 1ارب 30 کروڑ آبادی کے ساتھ دنیا کی بڑی منڈی ہے اور اس کی مقامی طلب میں تیزی سے اضافہ ہورہا ہے۔
انہوں نے کہا کہ اقتصادی اورتجارتی تعاون چین اور پاکستان کے درمیان تعلقات کا اہم نکتہ اور بڑا محرک ہے، حالیہ برسوں کے دوران ہمارے باہمی تعاون میں نمایاں ترقی ہوئی ہے جس سے دونوں ممالک کے عوام اورادارے مستفید ہوئے ہیں، اس عمل میں آزادانہ تجارت کے معاہدے کو بنیادی اہمیت حاصل ہے۔ انہوں نے کہا کہ پاکستان کے ساتھ آزاد تجارت کا معاہدہ چین کے مختلف ممالک کے ساتھ ایف ٹی ایز میں اہم مقام رکھتا ہے، اس معاہدے نے چین پاکستان تعاون کے فروغ میں اہم کردار ادا کیا۔سرکاری اعدادوشمارکے مطابق چین اور پاکستان اب بڑے تجارتی شراکت دار ہیں اور دونوں ممالک کی باہمی تجارت کے حجم میں نمایاں اضافہ ہوا ہے، آزاد تجارتی معاہدے کے پہلے مرحلے میں دونوں ممالک کے درمیان اقتصادی اور تجارتی تعلقات کو تیزی سے بہتر بنایا ہے تاہم اس معاہدے کے تحت باہمی تعلقات کو مزید بلندیوں تک لے جانے کی گنجائش موجود ہے۔اس موقع پر پاکستان کے سیکریٹری تجارت یونس ڈھاگہ نے وانگ شو وین کا شکریہ ادا کرتے ہوئے کہا کہ پاکستان اپنے دوست ملک چین کے ساتھ گہرے تعلقات اور بڑھتے ہوئے اقتصادی تعاون کو بے حد اہمیت دیتا ہے۔
چین پاکستان کا بڑا تجارتی شراکت دار ہے اور دونوں ممالک کی باہمی تجارت کا حجم گزشتہ 4 سال بڑھا ہے، دونوں ممالک کی معیشتوں کے حجم کو سامنے رکھتے ہوئے باہمی تجارت کے فوائد بھی دونوں ممالک کے لیے اسی مناسبت سے ہونے چاہئیں، گزشتہ سال پاکستان کی درآمدات میں 18.5 جبکہ برآمدات میں 1.6 فیصد اضافہ ہوا ہے، چین سے ہماری برآمدات تیل کے علاوہ مجموعی برآمدات کا 36 فیصد ہیں اور دونوں ممالک کے درمیان تجارتی توازن میں پایا جانے والا فرق کم کرنے کے لیے اقدامات تجویزکیے گئے ہیں۔
یونس ڈھاگہ نے اس بات کا اعادہ کیا کہ دونوں ممالک کے عوام کو یہ پیغام دینے کی ضرورت ہے کہ سی پیک اور آزاد تجارتی معاہدے کے فوائد نہ صرف دونوں ممالک میں مساوی طور پر تقسیم ہونگے بلکہ پاکستانی معیشت ان سے بہت زیادہ فائدہ اٹھانے والوں میں شامل ہوگی، آزاد تجارتی معاہدہ دونوں ملکوں کے مساوی مفاد میں ہوگااور ہمیں ایک دوسرے کو زیادہ سے زیادہ رعایتیں دینے پر توجہ مرکوز کرنا ہو گی۔ انہوں نے کہا کہ چین اپنے وفود پاکستان بھیج کر پاکستانی اشیا کی خریداری میں اضافہ کرسکتا ہے،برآمدی صنعت خصوصاً ویلیو ایڈڈ سیکٹرمیں چینی سرمایہ کاری میں اضافے کے لیے معاون پالیسی سے پاکستان نہ صرف اپنی برآمدی صلاحیت میں اضافہ کرسکتا ہے بلکہ وہ درآمدات میں استعمال ہونے والے زرمبادلہ کے حجم کو کم کر سکتا ہے ۔انہوں نے پاکستان کی صنعتی ترقی اور زرعی پیداوارمیں اضافے کے لیے چین سے تکنیکی امداد کی درخواست بھی کی۔ اس موقع پر دونوں ممالک کے شہریوں کیلیے ویزی کے حصول کے طریقہ کار کو مزید آسان بنانے پربھی تبادلہ خیال کیا گیا۔چین میں پاکستان کے سفیر مسعود خالد نے دونوں ممالک کے درمیان آزاد تجارتی معاہدے کے دوسرے مرحلے کوجلد مکمل کرنے کی ضرورت پر زوردیا اور کہاکہ باہمی اعتماد پاکستان اورچین کے درمیان دوستانہ تعلقات کی بنیاد ہے ۔ یاد رہے کہ دونوں ممالک کے درمیان آزاد تجارتی معاہدے پر2006 میں دستخط کیے گئے تھے۔

کراچی(میڈیا پاکستان) پاکستان کے غیرملکی زرمبادلہ ذخائر کی مالیت ایک ہفتے کے دوران 19کروڑ 82 لاکھ ڈالر کے اضافے سے 20ارب 58 کروڑ 52 لاکھ ڈالر تک پہنچ گئی۔اسٹیٹ بینک آف پاکستان کے جاری کردہ اعدادوشمار کے مطابق 8ستمبر کو ہفتے کے اختتام پر زرمبادلہ کے مجموعی ذخائر کی مالیت 20ارب 58کروڑ 52لاکھ ڈالر ریکارڈ کی گئی جو 31 اگست کو 20 ارب 38 کروڑ 70 لاکھ ڈالرتھی۔
ایک ہفتے کے دوران اسٹیٹ بینک آف پاکستان کے ذخائر 7کروڑ 70لاکھ ڈالر اضافے کے بعد 14 ارب 75کروڑ 84لاکھ ڈالر تک پہنچ گئے جبکہ کمرشل بینکوں کے ذخائر کی مالیت 12 کروڑ 11لاکھ ڈالر کے اضافے سے 5ارب 82کروڑ 68لاکھ ڈالر تک پہنچ گئی۔

لاہور (ویب ڈیسک) آزادی کپ کے سکیورٹی انتظامات کیلئے لبرٹی و ملحقہ مارکیٹوں کی 9 ہزار سے زائد دکانیں بند ہونے سے تاجروں کو روزانہ 6 ارب روپے سے زائد کا نقصان ہورہا ہے۔ سکیورٹی انتظامات کے نام پر دکانوں کی بندش پر تاجر حکومت کے خلاف سراپا احتجاج بن گئے۔ ذرائع کے مطابق قذافی سٹیڈیم میں ہونے والے آزادی کپ کے دوران سکیورٹی کے ا نتظامات کے لئے سٹیڈیم اور کھلاڑیوں کے روٹ پر مارکیٹیں بند کرائی گئی ہیں۔ تاجر تنظیموں کے مطابق لاہور کی لبرٹی مارکیٹ ، مین بلیوارڈ گلبرگ، قذافی سٹیڈیم اور اس کے اطراف میں واقع کمرشل سینٹرز میں ہزاروں دکانیں ہیں جہاں روزانہ 6 ارب روپے سے زائد کا کاروبار ہوتا ہے۔ یہ مارکیٹیں اور دکانیں گزشتہ دو دن سے بند ہیں، سٹیڈیم کے اطراف اور اس سے ملحقہ مارکیٹوں کو بند کرکے یہاں عارضی پارکنگ سٹینڈز بنائے گئے ہیں، اس طرح سٹیڈیم کے ساتھ ساتھ اس سے 2 کلومیٹر دور تک بھی کاروبار بند ہے۔

کراچی(میڈیا پاکستان) بین الاقوامی بلین مارکیٹ میں فی اونس سونے کی قیمت10 ڈالر کے اضافے سے 1334 ڈالر کی سطح پر پہنچنے کے باعث مقامی صرافہ مارکیٹوں میں بھی بدھ کو فی تولہ اور فی دس گرام سونے کی قیمتوں میں بالترتیب250 اور214 روپے کا اضافہ ہوگیا۔جس کے نتیجے میں کراچی، حیدرآباد، سکھر، ملتان، فیصل آباد، لاہور، اسلام آباد، راولپنڈی، پشاور اور کوئٹہ کی صرافہ مارکیٹوں میں فی تولہ سونے کی قیمت بڑھ کر 52 ہزار530 اور فی دس گرام سونے کی قیمت بڑھ کر45 ہزار 42 روپے ہوگئی تاہم فی تولہ چاندی کی قیمت بغیرکسی تبدیلی کے770اور دس گرام 660 روپے پرمستحکم رہی ہے۔

(میڈیا پاکستان) پنجاب حکومت کے پاس فنڈز کم پڑنے لگے، مالی سال 2016-17 کے باونس چیکس کی تاحال ادائیگیاں نہ کی جا سکیں، محکمہ زراعت کی آٹھ ترقیاتی سکیموں کے بھی 36 کروڑ روپے پھنس گئے۔ذرائع کے مطابق پنجاب حکومت کی جانب سے مالی سال 2016-17 میں اپنے من پسند ترقیاتی منصوبوں کے لئے ترجیحی بنیادوں پر فنڈز جاری کرنے کے باعث بیشتر محکموں کے ترقیاتی فنڈز جاری نہیں کئے گئے،جس کے باعث مذکورہ محکمے ترقیاتی سکیموں کے لئے ٹھیکیداروں کو ادائیگیاں کرنے سے قاصر ہیں، ذرائع کے مطابق محکمہ زراعت کی مالی سال 2016-17 کی آٹھ ترقیاتی سکیموں کے چیک بھی باونس ہو گئے ہیں، جس کے باعث محکمہ زراعت کے 36 کروڑ پھنس گئے ہیں، فنڈز نہ ہونے کے باعث محکمہ زراعت گزشتہ مالی سال کے کام کی ادائیگیاں بھی نہیں کرسکا ہے۔ذرائع کے مطابق محکمہ زراعت کی جانب سے زیرالتواء چیکس کی ادائیگی کے لئے محکمہ خزانہ کو ریکوزیشن بھیجی گئی تھی تاہم اس پر کوئی عملدرآمد نہیں ہو سکا، جس کے بعد اب ازسر نو متعلقہ سکیموں کی تفصیلات محکمہ خزانہ کو بھجوانے کے لئے کیس تیا رکرلیا گیا ہے۔

کراچی(میڈیا پاکستان) گاڑیوں کی فروخت رواں مالی سال کے دوسرے مہینے اگست کے دوران مزید تیز ہوگئی۔آٹو انڈسٹری کے اعدادوشمار کے مطابق اگست 2017 کے دوران مقامی سطح پر تیار کردہ گاڑیوں کی فروخت اگست 2016کے مقابلے میں 25 فیصد کے اضافے سے 22ہزار 95یونٹس رہی، اگست 2016کے دوران 17ہزار 653 گاڑیاں فروخت کی گئی تھیں۔گاڑیوں کی فروخت جولائی 2017کے مقابلے میں 13 فیصد زائد رہی، گاڑیوں کی فروخت میں نمایاں اضافہ بینکوں کی جانب سے آٹو فنانسنگ کی فراہمی، گاڑیاں بنانے والی کمپنیوں کی جانب سے نئے ماڈلز مارکیٹ میں لانے کا نتیجہ ہے۔ جولائی 2017کے مقابلے میں اگست 2017کے دوران پاک سوزوکی موٹرز کی فروخت 14فیصد اضافے سے 11ہزار 888یونٹس، انڈس موٹرز کی فروخت 20 فیصد اضافے سے 5541یونٹس جبکہ ہونڈا کارز کی فروخت 3فیصد اضافے سے 4666 یونٹس رہی، ٹریکٹرز پر سیلز ٹیکس میں کمی، بڑی فصلوں کی پیداوار میں اضافے اور پنجاب حکومت کی کسان پیکیج اسکیم سمیت کسانوں کے لیے کھاد پر سبسڈی کے نتیجے میں ٹریکٹرز کی فروخت میں نمایاں اضافے کا رجحان رہا، اگست کے مہینے میں ٹریکٹرز کی فروخت 5138یونٹس رہی جو اگست 2016کے مقابلے میں 115 فیصد جبکہ جولائی 2017کے مقابلے میں 11فیصد زائد ہے۔