Category بزنس

اسلام آباد(کامرس رپورٹر/ایمرا نیوز)بجلی کے صارفین کے لیے خوشخبری ہے کہ جنوری کے فیول ایڈجسٹمنٹ کی مد میں بجلی کی قیمت میں 2 روپے 97 پیسے فی یونٹ کمی کا امکان ہے۔

سینٹرل پاور پرچیزنگ ایجنسی نے جنوری کی فیول ایڈجسٹمنٹ کی مد میں بجلی کی قیمت میں 2 روپے 97 پیسے فی یونٹ کمی کی درخواست دائرکردی ہے۔

سی پی پی اے کی درخواست کے مطابق جنوری کے دوران 7ہزار 982 گیگا واٹ بجلی پیدا کی گئی اور7 ہزار 698 گیگاواٹ بجلی تقسیم کار کمپنیوں کو فراہم کی گئی، بجلی کی فی یونٹ قیمت 6 روپے 88 پیسے فی یونٹ رہی جنوری کے دوران ریفرنس فیول چارجز 9 روپے 86 روپے رہے۔

اسلام آباد(کامرس رپورٹر/ایمرا نیوز)برطانوی اخبار نے انکشاف کیا ہے کہ چین اور بلوچ علیحدگی پسندوں کے درمیان پانچ سال سے خفیہ مذاکرات جاری ہیں۔

برطانوی اخبار فنانشل ٹائمز کی رپورٹ کے مطابق چین 5 سال سے بھی زائد عرصے سے بلوچ باغیوں کے ساتھ خفیہ مذاکرات کر رہا ہے تاکہ پاک چین اقتصادی راہداری (سی پیک) منصوبوں کا تحفظ کیا جاسکا۔

فنانشل ٹائمز کو تین باخبر ذرائع نے بتایا کہ چینی حکومت بلوچستان میں باغیوں سے براہ راست مذاکرات کررہی ہے۔ ایک پاکستانی افسر نے بتایا کہ چین نے اس حوالے سے خاموشی سے بہت پیش رفت کرلی ہے، اگرچہ بلوچ علیحدگی پسند کبھی کبھار حملے کرنے کی کوشش کرتے رہتے ہیں تاہم ان کی جانب سے کوئی بھرپور اور بڑی کارروائی نہیں کی جارہی۔

اگرچہ پاکستانی حکام ان مذاکرات کی تفصیلات سے لاعلم ہیں لیکن انہوں نے چینی سفارتکاروں اور بلوچ باغیوں کے درمیان بات چیت کا خیرمقدم کیا ہے۔ اسلام آباد میں ایک افسر نے کہا کہ آخرکار بلوچستان میں امن قائم ہونے کا فائدہ دونوں کو ہی ہوگا۔ ایک اور افسر نے کہا کہ امریکا کی جانب سے پاکستان کی فوجی امداد معطل ہونے کی وجہ سے حکام بالا اس نتیجے میں پہنچے ہیں کہ چین زیادہ قابل بھروسہ ساتھی ہے۔ چینی ہمارے مدد کے لیے یہاں موجود ہیں جب کہ امریکا ناقابل بھروسہ ہے۔

فنانشل ٹائمز کے مطابق امریکا پاکستان کشیدگی کی وجہ سے جو خلا پیدا ہوا اسے چین پر کر رہا ہے۔ پاکستان، نیپال، میانمار اور سری لنکا میں چین کے بڑھتے ہوئے اثر و رسوخ پر بھارت تشویش کا شکار ہے۔ سی پیک کے تحت چین پاکستان میں انفراسٹرکچر منصوبوں میں 60 ارب ڈالر کی سرمایہ کاری کررہا ہے اور زیادہ تر سی پیک پروجیکٹس صوبہ بلوچستان میں ہیں۔

بعض تجزیہ کاروں نے کہا ہے کہ اگرچہ چین نے پاکستان میں فوج تعینات نہ کرنے کے وعدے کیے ہیں لیکن بھاری سرمایہ کاری کے نتیجے میں ممکن ہے کہ چین پاکستان کے ساتھ ماتحت ریاست جیسا سلوک شروع کردے۔

چینی حکام نے مذاکرات پر موقف دینے سے انکار کردیا تاہم پاکستان میں چینی سفیر نے حال ہی میں بی بی سی کو انٹرویو میں یہ بات کہی تھی کہ بلوچ جنگجو سی پیک کے لیے اب خطرہ نہیں رہے۔

ایک قبائلی سربراہ نے بتایا کہ بہت سے نوجوانوں کو مالی مراعات دے کر ہتھیار ڈالنے پر آمادہ کیا جارہا ہے، اب علیحدگی پسند تحریک میں شمولیت کی 10 سال پہلے جیسی کشش نہیں رہی، بہت سے لوگ سی پیک کو خوشحالی کا زینہ سمجھنے لگے ہیں۔

پاکستانی حکومت چین سے ڈرونز کے پرزہ جات اور فوجی ہیلی کاپٹر بھی خریدنے پر غور کررہی ہے جنہیں افغان سرحد پر نگرانی کے لیے استعمال کیا جائے گا۔

چین نے اربوں ڈالر کی لاگت سے ’ایک پٹی ایک شاہراہ منصوبہ‘ شروع کیا ہے۔ یہ منصوبہ دنیا بھر سے گزرے گا جس کی وجہ سے عدم مداخلت کی پالیسی اب تبدیل ہوتی نظر آرہی ہے۔ معیشت کو ترقی دینے کے منصوبے کے تحت چین کو دنیا کے چند انتہائی متنازع خطوں میں بھی کام کرنا پڑ رہا ہے۔ جنوبی سوڈان میں بھی چینی امن فوج تعینات ہے جہاں بیجنگ حکومت تیل کے شعبے اور ریلوے لائن کی تعمیر میں سرمایہ کاری کررہی ہے۔ افریقی ملک مالی میں بھی چین کی امن فوج تعینات ہے اور اس نے عراق میں داعش کے خلاف آپریشن کا بھی عندیہ دیا ہے۔ عراق میں تیل کے شعبہ میں چین سب سے بڑا غیر ملکی سرمایہ کار ملک ہے۔

کراچی(کامرس رپورٹر/ایمرا نیوز)چیئر پر سن سندھ بو ر ڈ آف انوسٹمنٹ نا ہید میمن نے بلجیم کے سفیر ویرہائیڈن فریڈرک سے بلجیم کے سفارتخا نے میں ملا قا ت کی ،اس مو قع پر با ہمی دلچسپی کے امور پر تبا دلہ خیال کیا گیا ،ملا قا ت میں چیئر پر سن نا ہید میمن نے کہا کہ پا کستا ن بلجیم کے ساتھ اپنے تعلقا ت کو بہت اہمیت دیتا ہے اور ہم انر جی سیکٹر کے ما ئیکرو سولو شنز میں بلجیم کے تجر با ت سے استفا دہ کر نا چا ہتے ہیں ،اس کے علا وہ ویمن امپا ورمنٹ کے شعبے میں بھی بلجیم میں کیے گئے نا م سے استفا دہ چا ہتے ہیں ۔

انہو ں نے کہا کہ یو ر پی پا ر لیمنٹ کا صدر دفتر بھی بلجیم میں ہے اور ادا رو ں کی استطا عت کو بڑ ھا نے کے حوالے سے بھی بلجیم سے ٹیکنیکل اور اسٹرٹیجک سائیڈ پر تعا ون کے خواہا ں ہیں، بلجیم کے سفیر نے اس سلسلے میں چیئر پر سن ایس بی آئی کو اپنے ہر ممکن تعا ون کا یقین د لا یا ۔

لاہور(کامرس رپورٹر/ایمرا نیوز)صوبائی وزیر خزانہ ڈاکٹر عائشہ غوث پاشا نے کہا ہے کہ مالیاتی ضروریات کی تکمیل اور غربت کے خاتمے کے لیے ڈومیسٹک ریونیو موبلائزیشن ہی واحد قابل اعتماد ذریعہ ہے ۔گزشتہ کئی سالوں میں عالمگیر سطح پر پھیلنے والے مالی بحران، امدادی بہاؤ میں کمی اور عدم مساوات نے دُنیا کو ٹیکس کی اہمیت سے روشناس کرانے میں اہم کردار ادا کیا ۔ ٹیکس وصولیوں کا شفاف اور ترقی یافتہ نظام ہی دولت کی منصفانہ تقسیم اور معاشی ترقی کی ضمانت ہے ۔

ان خیالات کا اظہار صوبائی وزیر نے ٹیکس اور پائیدار ترقیاتی اہداف کے عنوان سے نیویارک میں جاری پہلی تین روزہ گلوبل کانفرنس کے تیسرے سیشن ـ”سمارٹ ٹیکسیشن اور صنفی مساوات” سے خطاب کے دوران کیا۔ انہوں نے کہا کہ یونائیٹڈ نیشن کے تخمینے کے مطابق ملینیم ڈویلپمنٹ گولز کے حصول کے لیے ٹیکس کی شرح گراس ڈویلپمنٹ پراڈکٹ کا 20فیصد ہونی چاہیے ۔ پاکستان میں یہ ٹیکس GDPکے تناسب سے 2012سے لے کر اب تک 8.7% سے بڑھ کر 10.5% تک پہنچ چکا ہے ۔

صوبائی وزیر نے کہا کہ محصولات میں کمی کی مختلف وجوہات میں صنفی مضمرات خصوصی اہمیت کے حامل ہیں تاہم بہت کم لوگ اس بات کو سمجھتے ہیں کہ مالی پالیسیاں بالخصوص ٹیکس میں اضافہ مردوں کی نسبت خواتین کو زیادہ متاثر کرتا ہے ۔

کراچی(کامرس رپورٹر/میڈیا 92نیوز) پاکستان میں براہ راست بیرونی سرمایہ کاری (ایف ڈی آئی) میں گزشتہ 7ماہ کے دوران 2.9 فیصد کی کمی ریکارڈ کی گئی جس کے نتیجے میں رواں مالی سال جولائی سے جنوری 2018 تک ایف ڈی آئی1ارب53کروڑ21لاکھ ڈالر سے گھٹ کر1ارب48کروڑ79لاکھ ڈالر تک محدود ہوگئی۔

اسٹیٹ بینک آف پاکستان سے جاری اعدادوشمار کے مطابق رواں مالی سال کے ابتدائی 7ماہ میں پورٹ فولیو انویسٹمنٹ سے انخلا سست پڑ گیا، اس دوران ایکویٹی سیکیورٹیز سے 3 کروڑ40 لاکھ ڈالر نکالے گئے جبکہ گزشتہ سال کی اسی مدت میں انخلا35کروڑ33لاکھ ڈالر رہاتھا، جولائی سے جنوری 2018 میں فارن پبلک انویسٹمنٹ 2ارب 45کروڑ12لاکھ ڈالر رہی جو گزشتہ مالی سال کی اسی مدت میں 1ارب2 کروڑ40 لاکھ ڈالر تھی، گزشتہ سال کی طرح اس سال بھی یہ ساری فارن پبلک ایویسٹمنٹ قرض سیکیورٹیز میں بطور پورٹ فولیو انویسٹمنٹ ریکارڈ کی گئی۔

اعدادوشمار کے مطابق جولائی سے جنوری 2018 کے دوران 1ارب45 کروڑ 38 لاکھ ڈالر کی براہ راست بیرونی سرمایہ کاری میں سے65 فیصد یا 1 ارب 33 لاکھ ڈالر چین کی جانب سے انویسٹ کیے گئے، ملائیشیا نے 11 کروڑ 80لاکھ کی سرمایہ کاری کی، برطانیہ نے 9 کروڑ 43 لاکھ اور امریکا نے 7 کروڑ 35 لاکھ ڈالر کی انویسٹمنٹ کی، سعودی عرب اور متحدہ عرب امارات کی سرمایہ کاری معمولی رہی جبکہ ناروے نے 12 کروڑ48 لاکھ ڈالر نکال لیے۔

اعدادوشمار کے مطابق رواں مالی سال کے پہلے 7 ماہ کے دوران سب سے زیادہ براہ راست غیرملکی سرمایہ کاری 54کروڑ 19لاکھ ڈالر توانائی کے شعبے میں کی گئی، تعمیرات کے شعبے میں 38 کروڑ 51لاکھ ڈالر کی سرمایہ کاری کی گئی، فنانشل بزنس میں 17کروڑ 80 لاکھ ڈالر اور تیل و گیس کی تلاش کے شعبے میں 12کروڑ ڈالر کی سرمایہ کاری کی گئی۔

اسٹیٹ بینک کے مطابق جنوری میں ایف ڈی آئی سال بہ سال 11کروڑ6 لاکھ ڈالر کے مقابل10 کروڑ61 لاکھ ڈالر، پورٹ فولیو انویسٹمنٹ منفی 9 کروڑ 84لاکھ ڈالر سے 9 کروڑ44لاکھ ڈالر اور فارن پبلک انویسٹمنٹ2کروڑ59 لاکھ ڈالر سے گھٹ کر 9 لاکھ ڈالررہی جبکہ گزشتہ ماہ مجموعی غیرملکی سرمایہ کاری 20 کروڑ15 لاکھ ڈالر رہی جو جنوری 2017 میں صرف 3 کروڑ76لاکھ ڈالر تھی۔

کراچی(کامرس رپورٹر/میڈیا 92نیوز) عالمی بینک کے کنٹری ڈائریکٹر پیچاموتھو آئیلانگو نے کہا ہے کہ پاکستان کو سالانہ 20 سے30 لاکھ افراد کے لیے روزگار کے نئے مواقع پیداکرنے کی ضرورت ہے جس کے لیے نجی شعبے کی جانب سے ملک میں بڑی سرمایہ کاری کے ساتھ پاکستان کوسالانہ 8 فیصد کی شرح سے ترقی کرنا ہوگی۔

سندھ بورڈ آف انویسٹمنٹ اور عالمی بینک کے تکنیکی تعاون سے ’’سندھ میں کاروباری اصلاحات‘‘ کے عنوان سے کراچی میں منعقدہ کانفرنس ونمائش سے خطاب میں انہوں نے کہا کہ پاکستان میں معاشی نمو کے لیے سرمایہ کاری کے فروغ اور ماحول کو سازگاربنانے کے لیے اقدامات کیے جارہے ہیں جبکہ عالمی بینک پاکستان کی ترقی کے لیے ہمہ وقت تعاون کے لیے تیارہے۔

عالمی بینک کے سینئراکنامسٹ امجد بشیر نے کہا کہ سست رفتار سرگرمیوں سے ملک متاثر ہوگا لہٰذا سرگرمیوں کی رفتار کو تیزتر کرنے کے لیے ہمیں نجی شعبے کی حوصلہ افزائی کرنی ہوگی اور اصلاحی عمل کے ذریعے انہیں تیزرفتار سہولتیں فراہم کرنی ہوں گی۔ انہوں نے کہا کہ ٹیکنالوجی سلوشنز کے استعمال کو فروغ دیا جائے، صرف100 دن کے بجائے مستقل بنیادوں پر کارکردگی کو بہتر کرنے کا میکنزم ترتیب دیا جائے۔

سندھ بورڈ آف انویسٹمنٹ کی چیئرپرسن ناہید میمن نے کہا کہ حکومت سندھ بالخصوص وزیراعلیٰ کی دلچسپی کے بعد سندھ میں تجارت میں نمایاں بہتری آئی ہے، ایس بی آئی کی سرگرمیاںصرف 100دنوںتک محدود نہیں بلکہ یہ عمل تسلسل سے جاری رکھا جائے گا، ایس بی آئی نہ صرف تجارتی شعبے میں اصلاحات کر رہا ہے بلکہ اہداف بھی تیزی سے مکمل کیے جارہے ہیں، ہم پرامید ہیں کہ پاکستان بڑا صنعتی ملک بننے والاہے، ایس بی آئی صوبے میں کاروباری ماحول کوسازگار بنانے کے لیے عالمی بینک کے ساتھ سرگرم عمل ہے، سندھ کے4 محکموں سندھ بورڈ آف ریونیو، ایس بی سی اے، واٹربورڈ اورسندھ انوائرمینٹل پروٹیکشن ایجنسی کے طریقہ کارکو آسان کر دیا گیا ہے جبکہ مزید8 محکموں میں طریقہ کارکو سہل بنایا جارہا ہے، اس کے ساتھ محکموں کے عملے کو بھی تربیت فراہم کرنا ہوگی کیونکہ کاروباری طبقے کو سرکاری محکموں کے ملازمین اور افسران سے بہت شکایات ہیں۔

اس موقع پر متعلقہ صوبائی محکموں نے سندھ میں تجارت کی آسانی کے لیے متعارف کرائی گئی اصلاحات کی معلومات فراہم کیں، یہ اصلاحات سندھ کو خطے کا بزنس پاور ہارس بنانے کی کوششوں کا حصہ ہے، اس سلسلے کی ایک کڑی سندھ انویسٹمنٹ کلائیمٹ امپرومنٹ سیل کاقیام ہے۔

چیئرمین پی اینڈ ڈی بورڈ محمد وسیم نے کہا کہ تجارتی اصلاحی اقدامات کے تحت سندھ بلڈنگ کنٹرول اتھار ٹی نے رہائشی اور ویئر ہائوسز کی تعمیر کے اجازت نامے کی منظوری کا طریقہ کار سہل بنا کراس کا دورانیہ کم کردیا ہے، کراچی واٹر اینڈ سیوریج بورڈ، سندھ انوائرمنٹ پروٹیکشن ایجنسی، محکمہ ایکسائز اینڈ ٹیکسیشن کے این او سی کی شرائط ختم کر دی گئی ہیں،کے الیکٹرک نے نئے کنکشنز کے لیے ون ونڈو آپریشن کا آغازکرا چی کے 29 مقامات پرکردیا ہے، انوائرمینٹل چیک لسٹ کی منظوری 30 کے بجائے اب صرف 15یوم میں مل جائے گی، جا ئیداد رجسٹریشن کا مکمل وقت 208 سے کم کر کے صرف 17دن کر دیا گیا ہے، مائیکرو فلمنگ ٹیکنالوجی کو مکمل طور پر ڈیجیٹل آن لائن کر دیا گیا ہے۔

تقریب سے آئی ایف سی پرنسپل کنٹری آفیسر شبانہ خاور،کراچی چیمبر آف کامرس کے صدر مفسرعطا ملک نے بھی خطاب کیا۔

اسلام آباد(کامرس رپورٹر/میڈیا 92نیوز) وفاقی حکومت نے چین پاکستان اقتصادی راہداری منصوبے (سی پیک) کے روٹس پرسیکیورٹی کویقینی بنانے کے لیے انٹیلی جنس بیوروکے دفاتر قائم کرنے کا فیصلہ کیاہے۔

سی پیک منصوبے پرکام آئندہ مالی سال میں 47 کروڑ روپے مالیت سے شروع کیاجائیگا، چین کی مالی معاونت سے پاکستان میں شروع ہونے والے سی پیک منصوبے کے تحت مختلف منصوبوں پرکام کرنے والے چینی باشندوں کو سیکیورٹی خدشات کے باعث وزارت داخلہ کے ماتحت اسپیشل سیکیورٹی ڈویژن بنایاگیاہے جس میں تقریباً15ہزار اہلکارچینی باشندوں کی سیکیورٹی پر مامورہیں۔

اس کے علاوہ سی پیک منصوبوں کی سیکیورٹی کیلیے صوبائی حکومتوں نے بھی اسپیشل پروٹیکیشن یونٹ تشکیل دیے ہیں۔ سی پیک مشترکہ تعاون کمیٹی میں پاکستان اورچین نے منصوبوں پرسیکیورٹی بڑھانے پراتفاق کیاتھا۔
ذرائع نے بتایا منصوبے پرآئندہ مالی سال میں عملدرآمد ہو گا جس کیلیے ترقیاتی پروگرام میں فنڈزمختص کیے جانے کا امکان ہے۔

کراچی(کامرس رپورٹر/میڈیا 92نیوز) پاکستان اسٹیل کی انتظامیہ 18 سال گزرنے کے باوجود اپنے ڈیلرز کے ہاتھوں غیرقانونی کمیشن اور ڈسکاؤنٹ کے نام پر لوٹی گئی کروڑوں روپے مالیت کی رقوم واپس نہ لے سکی۔

پاکستان اسٹیل کے 1997میں سیاسی بنیادوں پر تعینات کیے گئے چیئرمین نے پاکستان اسٹیل کی مصنوعات کی فروخت پر ڈیلرز کو 5 سے 8 فیصد ڈسکاؤنٹ اور رعایت فراہم کی جس سے درجنوں ڈیلرز نے خوب فائدہ اٹھایا اور قومی خزانے کو 28کروڑ روپے کا نقصان پہنچا، آڈیٹر جنرل کی 1994 تا 1997 کی آڈٹ رپورٹ کی روشنی میں پاکستان اسٹیل کی انتظامیہ نے 1997میں ڈیلرز سے لوٹی گئی رقوم کی ریکوری کے لیے ڈیلرز کو ریکوری نوٹس جاری کیے۔

جس میں سے 11ڈیلرز نے 1کروڑ 70لاکھ روپے کی رقوم واپس کردیں تاہم نوٹس کے اجرا کے باوجود 60 ڈیلرز سے 26کروڑ 30لاکھ روپے کی رقوم وصول نہ کی جاسکیں، 1999کے بعد آنے والے بورڈ کے چیئرمین، سی ای او اور بورڈ کے اراکین نے بھی نامعلوم وجوہ کی بنا پر ڈیلرز سے بھاری رقوم کی ریکوری پر کوئی توجہ نہیں دی اور موجودہ حکومت میں گیس کی فراہمی منقطع ہونے کو جواز بناکر پاکستان اسٹیل جیسے اہم فولاد ساز ادارے کو تباہی کے دہانے تک پہنچا دیا گیا۔
پاکستان اسٹیل انصاف لیبر یونین کی جانب سے موجودہ چیف ایگزیکٹو آفیسر اور بورڈ کے چیئرمین کے نام ایک مراسلے میں اس جانب توجہ مبذول کراتے ہوئے 26کروڑ 30لاکھ روپے بمع سود وصول کرنے کا مطالبہ کیا گیا تاہم موجودہ انتظامیہ نے کوئی توجہ نہیں دی، پاکستان اسٹیل کے ملازمین 5 ماہ کی تنخواہوں سے محروم ہیں، اسٹیل ٹاؤن کی گیس واجبات کی عدم ادائیگی کی وجہ سے منقطع ہوچکی ہے جبکہ ٹرانسپورٹ اور میڈیکل کی سہولتیں بھی بند پڑی ہیں۔

ریٹائراور فوت ہونے والے ملازمین کے اہل خانہ واجبات کیلیے دھکے کھارہے ہیں، ڈیلرز سے لوٹی گئی رقوم واپس لے کر پریشان ملازمین کے آنسو پونچھے جاسکتے ہیں۔ ملازمین نے انتظامیہ سے مطالبہ کیا ہے کہ ڈیلرز سے لوٹی گئی رقوم کی واپسی کے لیے فی الفور ایف آئی اے اور قومی احتساب بیورو سے رجوع کیا جائے۔

کراچی(کامرس رپورٹر/میڈیا 92نیوز)بین الاقوامی بلین مارکیٹ میں فی اونس سونے کی قیمت8 ڈالربڑھنے کے باعث مقامی صرافہ مارکیٹوں میں بھی منگل کو فی تولہ اور فی دس گرام سونے کی قیمتوں میں بالترتیب350 اور300 روپے کا اضافہ ہوگیا ہے۔

سوبے کی قیمت میں اضافے سے فی تولہ سونے کی قیمت بڑھ کر 56 ہزار 250 اور فی دس گرام سونے کی قیمت بڑھ کر 48 ہزار 214 روپے ہوگئی تاہم چاندی کی قیمتیں برقرار رہیں۔

لاہور(کامرس رپورٹر/ایمرا نیوز)صوبے میں سرمایہ کاری کو فروغ دینے کے لیے پنجاب انویسٹمنٹ اینڈ ٹریڈر بورڈ کا اجلاس مشیر وزیر اعلیٰ خواجہ احمد حسان کی صدارت ہوا، برطانوی تاجر برادری کے وفد نے خصوصی شرکت کی۔

تفصیلات کے مطابق اجلاس کا مقصد صوبے میں بیرون ممالک کی ملٹی نیشنل کمپنیز کی سرمایہ کاری کو فروغ دینا تھا، اس موقع پرممبر پارلیمنٹ رحمٰن چشتی ،مشیر وزیر اعلیٰ خواجہ احمد حسان، صوبائی وزیر انڈسٹری شیخ علاوالدین،سیکرٹری ٹرانسپورٹ کیپٹن ریٹائرڈ نسیم نواز سمیت برطانوی کمپنیوں کے مالکان سٹیفن ہیری،مائیکل ڈریئرر، مارک گل اور دیگر برطانوی تاجران نے شرکت کی۔

مائیکل ڈریئرر کا کہنا تھا کہ پاکستان بڑی انڈسٹری ہے جس کو رد نہیں کیا جا سکتا، پاکستان میں سرمایہ کاری کو مزید فروغ دیا جائے گا