Archives September 2019

اسلام آباد(ایمرا نیوز آن لائن)مسلم لیگ ن نے جمعیت علمائے اسلام (ف) کے سربراہ مولانا فضل الرحمان کو حکومت کے خلاف آزادی مارچ کو مؤخر کرنے کا مشورہ دینے کا فیصلہ کیا ہے۔مسلم لیگ ن کی سینٹرل ایگزیکٹو کمیٹی کے اجلاس کے بعد میڈیا سے گفتو کرتے ہوئے احسن اقبال نے بتایا کہ سی ای سی اجلاس میں ملکی سیاسی صورتحال اور وزیراعظم کے یو این اجلاس میں خطاب کا جائزہ لیا گیا۔انہوں نے کہا کہ بھارتی غاصبانہ اقدامات کی سخت مذمت کرتے ہیں اور کشمیری عوام کو مکمل حمایت کا یقین دلاتے ہیں، مسئلہ کشمیر پر سیاسی تقسیم سے بالاتر ہو کر پوری قوم ایک ہے۔

مقبوضہ کشمیر کی صورت حال پر بات کرتے ہوئے احسن اقبال نے کہا کہ حکومت نے 50 دن ضائع کیے، وزیراعظم نے کسی ملک کا دورہ تک نہیں کیا۔رہنما ن لیگ نے کہا کہ حکومت کو انسانی حقوق کونسل میں بدترین سفارتی ناکامی کا سامنا کرنا پڑا، قوم کو 58 ممالک کی حمایت کا کہا گیا لیکن 16 ووٹ نہ حاصل کیے جا سکے۔حکومتی پالیسیوں پر تحفظات کا اظہار کرتے ہوئے احسن اقبال کا کہنا تھا کہ حکومت سوشل میڈیا کے ذریعے چلانے کی کوشش کی جا رہی ہے، اتفاق رائے پیدا کرنے کے لیے سیاسی قیادت کو فوری بلانا چاہیے تھا۔

احسن اقبال نے کہا کہ مطالبہ کرتے ہیں وزیراعظم قومی اسمبلی کو اپنے دورے پر اعتماد میں لیں، جو تقریر کی گئی اس پر عمل درآمد کا روڈ میپ بتایا جائے۔ان کا کہنا تھا بتایا جائے او آئی سی کا سربراہی اجلاس بلانے کے لئے کیا اقدامات کیے گئے، عالمی اداروں کے ساتھ مسئلہ کشمیر کو کیسے اٹھایا جائے گا، ٹرمپ سے ملاقات کے بارے میں بھی اعتماد میں لیا جائے۔انہوں نے کہا کہ ملک کی بگڑتی اقتصادی صورتحال پر سخت تحفظات ہیں، کاروبار بند ہو رہا ہے اور 10 لاکھ افراد بے روزگار ہوچکے ہیں، حکومت کے پاس اقتصادی ترقی کا کوئی روڈ میپ نہیں ہے، ایسی صورت ایک سال رہی تو ایسا نہ ہو کہ بعد میں کوئی معیشت نہیں سنبھال سکے۔

پنجاب میں ڈینگی کے بڑھتے ہوئے کیسز کے حوالے سے ان کا کہنا تھا کہ ڈینگی کو کنٹرول کرنے میں حکومت ناکام ہو چکی ہے، مقامی حکومتوں کا نظام معطل کرنے سے ڈینگی پھیلا، پنجاب دوبارہ ڈینگی زدہ ہو گیا ہے، سیاسی ڈینگی کا بھی شکار ہو چکا ہے۔رہنما ن لیگ نے اپوزیشن کی آل پارٹیز کانفرنس بلانے کا مطالبہ کرتے ہوئے کہا کہ تمام سیاسی جماعتوں سے مکالمہ کیا جائے اور جلد ازجلد عام انتخابات کی راہ ہموار کی جائے۔احسن اقبال نے کہا کہ پارٹی قیادت بالخصوص نواز شریف کے خلاف انتقامی کاروائیاں جاری ہیں، نواز شریف سیاسی قیدی ہیں، قائد اور دیگر کارکنوں کی رہائی اور حکومت سے نجات کے لیے باقاعدہ مہم چلائی جائے گی۔

جے یو آئی (ف) کے آزادی مارچ کے حوالے سے بات کرتے ہوئے رہنما ن لیگ کا کہنا تھا کہ مولانا صاحب قریب ترین حلیف ہیں، ان کے ساتھ ہیں، آزادی مارچ میں تعاون کا پہلے کہہ چلے ہیں، ایک کمیٹی قائم کی ہے جو جے یو آئی ف سے مشاورت کرے گی۔ان کا کہنا تھا کہ تقریبا اتفاق رائے ہے کہ نومبر تک آزادی مارچ کو مؤخر کیا جائے، اس وقت تک ن لیگ بھی مکمل فعال ہو جائے گی، جے یو آئی ف کو اے پی سی کا مشورہ بھی دیا جائے گا۔

انہوں نے مزید کہا کہ کمیٹی دیگر اپوزیشن جماعتوں سے بھی مشاورت کرے گی، جے یو آئی ف کے ساتھ آزادی مارچ کے لیے تاریخ کے تعین پر بھی مشاورت کی جائے گی۔احسن اقبال نے کہا کہ عوام کو پتہ چل گیا ہے کہ ان کے ساتھ تبدیلی کے نام پر دھوکا ہوا، مسلم لیگ ن حکومت کو گرانے کی ہر تحریک میں ہر اول دستے کا کردار ادا کرے گی۔

استنبول (ایمرا نیوز آن لائن) ترکی نے شام کی سرحد پر ڈرون مار گرانے کا دعویٰ کیا ہے۔عرب خبر رساں ادارے کے مطابق ترک فضائیہ نے شام سے ملنے والی اپنی سرحد پر فضائی حدود کی خلاف ورزی کرنے پر نامعلوم ڈرون مار گرایا۔

ترک وزارت دفاع کا کہنا ہےکہ ڈرون نے مختلف اوقات میں 6 مرتبہ فضائی حدود کی خلاف ورزی کی جس کا فوج نے بارڈر کے نزدیک سراغ لگایا اور اسے ایف 16 طیارے سے نشانہ بنایا گیا۔وزارت دفاع نے مزید بتایا کہ خودکار ڈرون کو گرانے کے لیے دو ایف سولہ طیاروں نے کارروائی کی جسے جنوبی ترکی کے ائیربیس پر گرایا گیا جب کہ اس کا ملبہ قبضے میں لے لیا گیا ہے۔

لاہور (ایمرا نیوز آن لائن) وزیر خارجہ شاہ محمود قریشی نے کہا ہے کہ پاکستان نے کرتارپور راہداری کی افتتاحی تقریب میں ہندوستان کے سابق وزیر اعظم من موہن سنگھ کو مدعو کرنے کا فیصلہ کیا ہے۔اپنے ایک ویڈیو پیغام میں شاہ محمود قریشی نے کہا کہ کرتار پور راہداری ایک اہم منصوبہ ہے اور وزیر اعظم عمران خان کی اس میں ذاتی دلچسپی ہے چنانچہ پاکستان نے مشاورت کے بعد یہ فیصلہ کیا ہے کہ ہم اس کرتارپور راہداری کی افتتاحی تقریب میں ہندوستان کے سابق وزیر اعظم من موہن سنگھ کو اس میں مدعو کریں گے۔

وزیرخارجہ کے مطابق یہ من موہن سنگھ کا دھرم بھی ہے وہ سکھ کمیونٹی کی نمائندگی بھی کرتے ہیں۔”میں بطور وزیر خارجہ پاکستان سردار من موہن سنگھ صاحب کو دعوت دیتا ہوں کہ وہ اس افتتاحی تقریب میں تشریف لائیں۔”’کرتار پور راہداری پر پاکستان کی جانب سے تیاریاں مکمل‘انہوں نے کہا کہ من موہن سنگھ کو تحریری طور پر بھی دعوت نامہ بھجوا یا جا رہا ہے ۔شاہ محمود قریشی نے سکھ کمیونٹی کو بھی دعوت دی کہ وہ بھی اس تقریب میں شرکت کیلئے تشریف لائیں اور بابا گرو ناننک کے 550 ویں دن کی خوشیوں میں شامل ہوں۔یاد رہے کہ پاکستان بابا گرونانک کے 550 ویں یوم پیدائش کے موقع پر نومبر میں کرتارپور راہداری کھولنے کے لیے پُرعزم ہے

کرتارپور گردوارا سکھوں کیلئے اہم کیوں؟ کرتار پور کہاں واقع ہے؟ کرتارپور گوردوارہ ضلع نارووال کی تحصیل شکر گڑھ میں واقع ہے جو بھارتی سرحد سے کچھ دوری پر ہے، گوردوارہ دربار صاحب 1539 میں قائم کیا گیا۔بابا گرونانک نے وفات سے قبل 18 برس اس جگہ قیام کیا اور گرونانک کا انتقال بھی کرتارپور میں اسی جگہ پر ہوا۔کرتار پور کی تاریخی اہمیت
لاہور سے تقریباً 120 کلومیٹر کی مسافت پر ضلع نارووال میں دریائے راوی کے کنارے ایک بستی ہے جسے کرتارپور کہا جاتا ہے، یہ وہ بستی ہے جسے بابا گرونانک نے 1521ء میں بسایا اور یہ گاؤں پاک بھارت سرحد سے صرف تین چار کلومیٹر کے فاصلے پر ہے۔

نارووال شکر گڑھ روڈ سے کچے راستے پر اتریں تو گوردوارہ کرتار پور کا سفید گنبد نظر آنے لگتا ہے، یہ گوردوارہ مہاراجہ پٹیالہ بھوپندر سنگھ بہادر نے 1921 سے 1929 کے درمیان تعمیر کروایا تھا۔گرو نانک مہاراج نے اپنی زندگی کے آخری ایام یہیں بسر کیے اور اُن کی سمادھی اور قبر بھی یہیں ہے، یہی وجہ ہے کہ کرتارپور سکھوں کے لیے مقدس مقام ہے۔

اسلام آباد(ایمرا نیوز آن لائن)مہوش حیات کا کشمیر پر بات کرنے سے انکارمعروف اداکارہ و تمغۂ امتیاز مہوش حیات کی مسئلہ کشمیر پر بات کرنے سے انکار کی ویڈیو سوشل میڈیا پر وائرل ہوگئی۔گزشتہ روز سوشل میڈیا پر اداکارہ مہوش حیات کی ایک ویڈیو لیک ہوئی جس میں ایک نجی ٹی وی چینل کے صحافی نے اُن سے مسئلہ کشمیر پر بات کرنے کا کہا تو مہوش حیات نے کشمیر پر اپنی رائے دینے سے صاف انکار کردیا۔

صحافی نے سوال کیا کہ آپ نے یتیم بچوں کی کفالت کا ذمہ لیا ہے، مقبوضہ کشمیر میں ہزاروں یتیم بچے ہیں کیا آپ نے اُن کے لیے کچھ سوچا ہے؟ اِس سوال کے جواب میں مہوش حیات نے کہا کہ مجھے مسئلہ کشمیر پر بات سے منع کیا گیا ہے۔

اداکارہ کی یہ ویڈیو لیک ہونےکے بعد سوشل میڈیا صارفین اُن کو شدید تنقید کا نشانہ بنا رہے ہیں اور یہ سوال اُٹھا رہے کہ مہوش حیات کو کس نے مسئلہ کشمیر پر بات کرنے سے منع کیا ہے؟
خوشی شاہ صارف نے سماجی رابطے کی ویب سائٹ ٹوئٹر پر ٹوئٹ کرتے ہوئے لکھاکہ ’اِن کی اِس بات کی وجہ سے اِن سے تمغہ امتیاز واپس لے لینا چاہیے، یہ اس کی مستحق ہی نہیں ہیں۔‘عامر رضا نامی صارف نےمہوش حیات پر طنز کرتے ہوئے ٹوئٹ کیا کہ ’آپ مسئلہ کشمیر پر بات نہیں کر سکتی ہیں لیکن پریانکا چوپڑا کے بارے میں بات کر سکتی ہیں، کس نے اِن کو تمغہ امتیاز دیا ہے؟ یہ پاکستان کے ایوارڈ کی بدنامی کر رہی ہیں، کم از کم پریانکا چوپڑا اپنے ملک کے ساتھ تو کھڑی ہوئی ہیں۔‘

صارف نے مہوش حیات سے سوال کیاکہ ’کیا آپ کشمیر ی خواتین کے بارے میں سنجیدگی سے بات نہیں کر سکتیں ؟سوشل میڈیا صارفین کی تنقید کا شکار مہوش حیات بھی خاموش نہ رہیں اور اُنہوں نے اپنی ’لیک ویڈیو‘ کے بارے میں ٹوئٹ کردیا۔مہوش حیات نے ٹوئٹ کرتے ہوئے لکھا کہ ’میری لیک ہونے والی ویڈیو کو سیاق و سباق سے ہٹایا جا رہا ہے، میں نے عالمی سطح پر مسئلہ کشمیر پر بات کی ہے اورآگے بھی کرتی رہوں گی اور اگلے اقدامات کے لیے میرے بڑے منصوبے ہیں۔‘

اُنہوں نے لکھا کہ ’یہ ایک خیراتی پروگرام تھا اور مجھے پی آر کی جانب سے درخواست کی گئی تھی کہ کوئی سیاسی بات نہیں کرنی اور نہ ہی اُس بارے میں بات کرنی ہے جو گزشتہ دِنوں میں نے یتیم بچوں کی مدد کی تھی۔‘

اداکارہ کے اِس ٹوئٹ پر وقار ملک نامی صارف نے اُن سے سوال کیا کہ ’یہ کون سی خیراتی تنظیم ہے جہاں انسانیت کے لیے آواز اُٹھانے سے منع کیا جا رہا ہے ؟ شاید آپ غلط خیراتی تنظیم کی حمایت کر رہی ہیں۔‘ایک صارف نےاداکارہ سے سوال کیا کہ’آپ یتیم بچوں کی کفالت کررہی ہیں کیا اِن میں کشمیر کے یتیم بچے شامل نہیں ہیں؟‘

محترمہ آپ یتم بچوں کی کفالت کرتی ہیں کیا اس میں کشمیر کے بچے شامل نہیں ہیں خان یوف زئی نامی صارف نے لکھا کہ ’مسئلہ کشمیر سیاسی نہیں ہے بلکہ یہ پاکستان کے لیے زندگی اور موت کا مسئلہ ہے۔‘دوسری جانب پاکستانی فنکار بھی مہوش حیات کا ساتھ دینے میدان میں آگئے اور اداکارہ کے حق میں ٹوئٹ کردیے ۔گلوکار و سماجی کارکن شہزاد رائے نے مہوش حیات کا ساتھ دیتے ہوئے ٹوئٹ کیا کہ ’آپ نے پاکستان کی نمائندگی کرتے ہوئے مسئلہ کشمیر پر جس طرح بین القوامی میڈیا پر بات کی مجھے اس پر اور اپنے پاکستانی ہونے پر فخر ہے‘

شہزاد رائے نے مہوش حیات کا ساتھ دیتے ہوئے لکھا کہ ’ایک انڈسٹری میں کام کرنے کی حیثیت سے ہم آپ کے ساتھ ہیں، آپ کو کسی بھی لیک ویڈیو کی وضاحت دینے کی ضرورت نہیں ہے۔‘نجی ٹی وی چینل کے اینکر پرسن اقرارالحسن نے مہوش حیات کی حمایت میں ٹوئٹ کرتے ہوئے لکھا کہ ’بالی ووڈ میں کام کرنا ہر پاکستانی آرٹسٹ کا خواب ہے لیکن مہوش حیات ایک ایسی آرٹسٹ ہیں جنہوں نے حال ہی میں بھارتی پالیسیوں پر تنقید کرتے ہوئے یہ ثابت کردیا کہ اُن کو اپنے کریئر سے زیادہ اپنے مُلک سے پیار ہے اور وہ ہمیشہ کشمیر کے لیے آواز بُلند کرتی رہی ہیں۔‘

لاہور (ایمرا نیوز آن لائن) مریم نواز نے نیب کے ذریعے گرفتاری کو لاہور ہائیکورٹ میں چیلنج کر دیا۔مریم نواز کی طرف سے لاہور ہائیکورٹ میں ضمانت کی درخواست دائر کی گئی۔ درخواست میں موقف اپنایا کہ نیب نے سیاسی انتقام کا نشانہ بنانے کیلئے گرفتار کیا ہے،

نیب کو اب تک کی تحقیقات میں ایک بهی ثبوت نہیں ملا، بغیر کسی ثبوت کے کسی پاکستانی کو قید رکهنا غیر آئینی ہے۔درخواست میں استدعا کی گئی کہ لاہور ہائیکورٹ میری گرفتاری غیر قانونی قرار دے کر رہائی کا حکم دے، عدالت ضمانت کی درخواست منظور کرنے کا حکم جاری کرے۔

کشمیر (ایمرا نیوز آن لائن) کشمیر پر حکومت اور اپوزیشن میں کوئی تقسیم نہیں، مسلم لیگ نون کے صدر اور قائد حزب اختلاف محمد شہباز شریف کا کہنا ہے کہ کشمیر پر حکومت اور اپوزیشن میں کوئی تقسیم نہیں، ہم سب ایک ہیں، نریندر مودی کسی غلط فہمی میں نہ رہیں۔اپنے ایک بیان میں شہباز شریف نے کہا کہ اقوام متحدہ کی امن کوششوں میں پاکستان کا سب سے بڑا حصہ ہے، ہماری مسلح افواج نے دہشت گردی کےخلاف بہادری کے لازوال باب لکھے ہیں۔

شہباز شریف نے کہا کہ بھارتی ظلم و جبر کے خلاف بہادر کشمیریوں کی سیاسی، سفارتی اور اخلاقی حمایت جاری رکھیں گے۔مقبوضہ کشمیر پر پورا پاکستان ایک ہے، عالمی امن کے لئے پاکستان کی کاوشیں عالمی ریکارڈ کا حصہ ہیں۔ان کا کہنا تھا کہ بدقسمتی سے خطے کی تقدیر بدلنے والا سی پیک آئی سی یو میں ہے، عمران نیازی کی قیادت میں ملکی معیشت ڈوب گئی ہے، معاشی تباہی کے سونامی نے لاکھوں افراد کو بےروزگار کر دیا ہے۔اپوزیشن لیڈر کا مزید کہنا تھا کہ مہنگائی کےہاتھوں لوگ پریشان ہیں اور نجات کی دعائیں مانگ رہے ہیں۔

جمیکا (ایمرا نیوز آن لائن) جمیکن ایتھلیٹ فتح کے بعد بیٹا گود میں لے کر ٹریک پر آگئیں جمیکا کی شیلی این فریزر نے ورلڈ ایتھلیٹکس میں سو میٹر ریس جیتنے کے بعد اپنے 2 سالہ بیٹے کو گود میں لے کر ٹریک کا چکر لگایا اور کہا کہ بیٹے کی پیدائش کے بعد یہاں بطور عالمی چیمپئن کھڑا ہونا میرے لیے باعث فخر ہے۔

دوحا میں جاری عالمی مقابلوں میں جمیکا اور برطانیہ کی ایتھلیٹس میں زبردست مقابلہ ہوا جس میں 32 سالہ جمیکن شیلی این فریزر نے سب کو پیچھے چھوڑتے ہوئے گولڈ میڈل اپنے نام کر لیا۔شیلی نے مقررہ فاصلہ 10 اعشاریہ 71 سیکنڈ میں طے کیا اور کیریئر کا آٹھواں عالمی اعزاز اپنے نام کیا۔برطانیہ کی ڈینا ایشر اسمتھ دوسرے نمبر پر رہیں، ان کا ٹائم 10 اعشاریہ 83 سیکنڈ رہا، جبکہ تیسری پوزیشن آئیوری کوسٹ کی میری جوزے تالو نے حاصل کی۔فتح کے بعد اپنے بیٹے کو گود میں لیے ٹریک کا چکر لگاتی شیلی فریزر کا کہنا تھا کہ ’بیٹے کی پیدائش کے بعد یہاں بطور عالمی چیمپئن کھڑا ہونا ان کے لیے باعثِ فخر ہے۔

بہاولپور (ایمرا نیوز آن لائن) بہاولپور میں شادی کی تقریب میں ہوائی فائرنگ نےخوشیوں کے رنگ ماتم میں بدل دیئے، دولہے کی بہن فائرنگ کی زد میں آکرجاں بحق ہو گئی۔بہاول پور میں تھاناعنایتی کی بستی چاہ رکرانی میں گزشتہ شب شادی کی تقریب میں ہوائی فائرنگ کے نتیجے میں دولہے کی بہن شدیدزخمی ہوگئی ، بعد ازاں زخموں کی تاب نہ لاتے ہوئے دم توڑ گئی ۔

پولیس ترجمان کے مطابق لاش پوسٹ مارٹم کے لیے تحصیل ہیڈ کوارٹر اسپتال خیر پورٹامیوالی منتقل کی گئی جس پر ورثاء نے قانونی کارروائی اور پوسٹمارٹم کے خلاف احتجاج کیا اورلاش زبردستی اپنے ساتھ گھر لے گئے۔

پولیس ترجمان کے مطابق خاتون کی ہلاکت اور ہنگامہ آرائی کے بعد تین مختلف مقدمات درج کر لیےگئے ہیں۔پولیس کے مطابق تھانا عنایتی میں قتل سمیت دیگر دفعات کی2 الگ الگ ایف آئی آردرج کی گئی ہیں جبکہ تھانا خیر پور ٹامیوالی نے ہنگامہ آرائی اور روڈ بلاک کی ایف آئی درج کرلی ہے۔

دہلی (ایمرا نیوز آن لائن)شہرہ آفاق بھارتی فلم شعلے میں گبر سنگھ کے ساتھ کالیا کا کردار نبھانے والے اداکار وجو کھوٹے چل بسے۔بھارتی میڈیا کے مطابق وجو کھوٹے کی صحت کچھ دنوں سے خراب تھی اور ان کے کئی اعضا نے کام کرنا بھی چھوڑ دیا تھا، اداکار پیر کے روز اپنی رہائش گاہ پر سونے کےبعد دوبارہ نہیں اٹھے جس کے بعد ان کے مرنے کی تصدیق کی گئی۔

شعلے کے کئی کردار اب اس دنیا میں نہیں رہے جن میں ٹھاکر یعنی سنجیو کمار،گبر یعنی امجد خان، رحیم چاچا یعنی اے کے ہنگل، ماسی یعنی لیلےٰ مشری اور سامبا یعنی میک موہن شامل ہیں اور اب اس شعلے کے ”کالیا“ یعنی وجو کھوٹے نے بھی اس دنیا کو الوداع کہہ دیا۔بالی وڈ کی تاریخ شعلے اور شعلے کے ہر کردار اور مکالمے کے بغیر ادھوری ہے ۔گبر ،ٹھاکر، جے ویرو، بسنتی، سورما بھوپالی ، جیلر، سامبا، رام لال اور کالیا سمیت کئی لازوال کردار بالی وڈ کی سب سے بڑی فلم نے اس انڈسڑی کو دیے۔

بلا شبہ شعلے کا گبر سنگھ بالی وڈ کی تاریخ کا سب سے بڑا اور مشہور کردار ہے اور شاید یہ گبر بھی وہ گبر نہیں ہوتا اگر اس کے ساتھ سامبا اور کالیا نہیں ہوتے۔وجو کھوٹے نے کیا قسمت پائی ہے کہ انہیں سائیڈ رول میں بھی وہ کردار، مکالمے اور پہچان مل گئی جس کیلئے بالی وڈ میں بڑے بڑے ہیرو اور ہیروئنز ترستے ہی رہے۔فلم شعلے تو سب کو ”رٹی“ ہوئی ہے اور اگر کوئی کچھ بھولا بھی ہوگا تو کم سے کم اسے کالیا کے بولے گئے یا کالیا کیلئے بولے گئے مکالمے ضرور یاد ہوں گے۔

بالی وڈ کی کلاسک کامیڈی ”انداز اپنا اپنا“ باکس آفس پر تو سپر ہٹ نہیں ہوئی لیکن بعد میں ٹی وی، ڈی وی ڈی اور انٹر نیٹ پر اسے بالی وڈ کی ٹاپ ٹین فلموں میں سے ایک کا درجہ ملا۔فلم میں سلمان عامر، پاریش راول کی موجودگی میں جس کردار کا نام سب سے زیادہ مشہور ہوا وہ وجو کھوٹے کا ”رابرٹ“ ہی تھا۔ یہ رابرٹ ”غلطی سے ایسے مسٹیک“ کرتا تھا کہ شکتی کپور کا ”کرائم ماسٹر گوگو“ بھی کرداروں میں اس رابرٹ کے بعد ہی آیا۔یہ کردار تھوڑا تھوڑا پھر عجب پریم کی گجب کہانی میں بھی دہرایا گیا تھا۔

78 برس عمر پانے والے وجو کھوٹے کا فلمی کیریئر60 سالوں پر محیط رہا۔انہوں نے 300 کے قریب فلموں میں اداکاری کی۔ مشہور اداکارہ شوبھا کھوٹے وجو کھوٹے کی بڑی بہن اور مغل اعظم میں دلیپ کمار کی والدہ اور مغل اعظم کی ملکہ کا کردار ادا کرنے والی درگا کھوٹے ان کی آنٹی تھی۔وجو کھوٹے ہدایتکار راج کمار سنتوشی کی تقریباً ہر فلم میں ہوتے تھے اور یہی وجہ ہے کہ فلم ”چائنا گیٹ “ میں وجو کھوٹے اس فوج کے ہیرو ہوتے ہیں جس فوج میں امریش پوری، اوم پوری، ڈینی اور نصیر الدین شاہ سمیت سینئر اداکار شامل تھے۔

شعلے کے” کالیا“ کی مقبولیت کا اندازہ اس بات سے بھی لگایا جاسکتا ہے کہ بالی وڈ کے شہنشاہ امیتابھ بچن نے اپنے عروج کے دور میں 1981 میں فلم ”کالیا“ میں ٹائٹل کردار ادا کیا اور یہ فلم سپر ڈوپر ہٹ ہوئی۔پھر بھی اگر آج بھی بالی وڈ کے ”کالیا“ کی بات ہوتی ہے تو امیتابھ بچن سب کو بعد میں یاد آتے ہیں کیونکہ کالیا مطلب ”وجوکھوٹے“۔

کراچی (ایمرا نیوز آن لائن) خواجہ سراؤں نے پولیس اسٹیشن پر حملہ کردیا ساتھیوں کی گرفتاری پر خواجہ سراؤں نے درخشان تھانے پر حملہ کردیا جس پر پولیس نے 21 خواجہ سراؤں کو گرفتار کرلیا۔کراچی میں ڈیفنس، بدر کمرشل میں درخشاں پولیس نے شہریوں کی شکایت پر خواجہ سراؤں کے خلاف کریک ڈاؤن کرتے ہوئے 13 کو گرفتار کرکے تھانہ منتقل کردیا۔

گرفتار خواجہ سراؤں کے ساتھیوں نے گرفتاری کے خلاف درخشاں تھانے میں احتجاج کیا،تھانے میں اپنے کپڑے اتاردیے اور توڑ پھوڑ کی جب کہ ہنگامہ آرائی کرنے والے خواجہ سراؤں نے تھانے کی کھڑکیوں، دروازوں کو توڑ دیا اور شدید ہنگامہ آرائی کی۔

پولیس نے درخشان پولیس اسٹیشن میں ہنگا مہ آرائی کرنے والے 8 خواجہ سراؤں کو گرفتار کرکے مقدمہ درج کردیا۔شہری قیصر مسعود ملک نے 2 روز قبل مقدمہ درج کرایا تھا کہ خواجہ سرا بدر کمرشل پر فحاشی پھیلارہے ہیں اور جب انہیں منع کیا گیا تو انہوں نے ڈنڈوں اور اسلحہ سے ان پر حملہ کرنے اور جان سے مارنے کی کی کوشش بھی کی۔