Archives October 2018

ممبئی: (شوبز ڈیسک/ایمرا نیوز) ارجن کپور اور ملائیکہ اروڑا کے درمیان عمر میں کافی فرق کے باوجود تعلقات بڑھ رہے ہیں اور دونوں ایک سال کے اندر شادی کرنے کے خواہاں بھی ہیں تاہم اب خبر سامنے آئی ہے کہ دونوں کا فوری طور پر شادی کرنے کا کوئی ارادہ نہیں۔

جوڑے کے قریبی ذرائع نے بتایا اگرچہ دونوں کے ذہن میں شادی کا منصوبہ ہے تاہم دونوں جلد شادی کرنے کا ارادہ نہیں رکھتے۔ رپورٹ کے مطابق ارجن کپور پہلے اپنی بڑی بہن کی شادی کرنے کے خواہاں ہیں جس کے بعد ہی وہ اپنی شادی سے متعلق کوئی پروگرام بنائیں گے۔
ساتھ ہی رپورٹ میں بتایا گیا کہ اگرچہ ملائیکہ اروڑا نے ارجن کپور کو اپنی قریبی سہیلیوں سے بھی ملوایا ہے تاہم وہ خود ابھی ان کے حوالے سے بہت کچھ جاننا چاہتی ہیں۔ دونوں شادی کرنے سے قبل ایک دوسرے کو ٹھیک طرح سے آزمانا چاہتے ہیں جسکی وجہ سے ان کا فوری طور پر شادی کا کوئی ارادہ نہیں ہے۔

ممبئی: (شوبز ڈیسک/ایمرا نیوز) بالی وڈ اداکارہ کاجول ہیئر ڈائی بنانے والی کمپنی ’’سپر وسمول‘‘ کی برانڈ ایمبیسیڈر بن گئیں۔ بھارتی ذرائع ابلاغ کے مطابق اداکارہ کاجول کا کہنا تھا ان کو خوشی ہے کہ وہ اس کمپنی کا حصہ ہیں۔

بالی وڈ کی یادگار فلموں میں مرکزی کردار ادا کرنے والی اداکارہ کاجول ان دنوں کاسمیٹکس فرمز کے ساتھ کام میں مصروف ہیں۔ اب وہ بالوں کو مختلف رنگ دینے والی ایک کاسمیٹکس کمپنی کی برانڈ ایمبیسیڈر بن گئی ہیں جس پر ان کا کہنا ہے کہ انھیں خوشی ہے کہ وہ اُس کمپنی کا حصہ ہیں۔

لاہور: (نیٹ نیوز/ایمرا نیوز) ذہن کو الجھا دینے والی اس تصویر نے ایک بار پھر انٹرنیٹ صارفین کو پریشان کر دیا ہے۔ سوشل میڈیا پر سامنے آنیوالی تصویر میں ایک سیاہ جانور کو دکھا کر پوچھا گیا کہ وہ کیا ہے ، اس سوال نے لوگوں کو گھما کر رکھ دیا ہے۔
کچھ لوگوں کو تصویر میں سیاہ کوا نظر آرہا ہے جبکہ دیگر کو یہ ایک کالی بلی دکھائی دے رہی ہے۔ پہلی نظر میں کوئی بھی آسانی سے یہ مان سکتا ہے کہ یہ کوے کی تصویر ہے تاہم اگر آپ غور سے جائزہ لیں تو آپکو ایک بلی نظر آئیگی جس نے اپنا سر دائیں جانب جھکایا ہوا ہے اور کیمرے کی جانب دیکھ رہی ہے اگر آپ کو بلی ڈھونڈنے میں کچھ منٹ لگیں تو کوئی مسئلہ نہیں کیونکہ اس تصویر نے تو گوگل کو بھی الجھن میں ڈال دیا تھا۔

لاہور: (نیٹ نیوز/ایمرا نیوز) چین میں ایشیا کے سب سے بڑے سب وے سٹیشن کی تعمیر تیزی سے جاری ہے جسے 2020 میں عوام کیلئے کھول دیا جائیگارپورٹ کے مطابق چینی شہر شینژین میں زیرِ تعمیر اس سب وے کا زیادہ تر کام مکمل ہو چکا ہے جہاں لگ بھگ 2لاکھ 70ہزار مسافر روزانہ سفر کر سکیں گے۔20میٹر سے زیادہ چوڑا سب وے سٹیشن 24میٹر گہرا ہے جبکہ اس کی لمبائی 710میٹر ہے جو مصروف ترین مقام پر تعمیر کیا جا رہا ہے۔ ماہر انجینئرز دن رات اسکی تعمیر میں مصروف ہیں جسکا بڑا اور اہم حصہ مکمل کر لیا گیا ہے۔

کراچی: (نیٹ نیوز/ایمرا نیوز) پاکستانی روپے کے مقابلے ڈالر 21 پیسے سستا ہو گیا۔ انٹر بینک میں ڈالر کی قیمت کم ہو کر 132 روپے 40 پیسے پر آ گئی۔پاکستانی روپیہ تگڑا ہونے لگا، انٹر بینک مارکیٹ میں ڈالر 21 پیسے سستا ہو کر 132 روپے 40 پیسے کی سطح پر آ گیا۔ ڈالر کی قدر میں کمی ایک جانب سرمایہ کاروں کیلئے حوصلہ افزا خبر ہے تو دوسری جانب ادائیگیوں کا توازن پاکستانی معیشیت کے حق میں بہتر اور بیرونی قرضوں کا بوجھ کم ہو جائے گا۔

پیرس: (سپورٹس ڈیسک/ایمرا نیوز) سرب ٹینس سٹار نواک جوکووچ نے پیرس ماسٹرز کا کوارٹر فائنل جیت کر دوبارہ ٹاپ رینک پوزیشن پر نظریں جما لیں۔پیرس میں اے ٹی پی ورلڈ ٹور کا ایونٹ جاری، ورلڈ رینکنگ نمبر ٹو نواک جوکووچ اور پرتگالی کوالیفائر جواسوسا کے درمیان کوارٹر فائنل مقابلہ ہوا۔ سرب سٹار نے برتری دکھاتے ہوئے سات پانچ اور چھ ایک کی فتح سمیٹی، پیرس ماسٹرز کی فتح سے جوکووچ دوبارہ بطور نمبر ون ٹینس سیزن کا اختتام کرنے کے خواہشمند ہیں۔دوسرے میچ میں کینیڈا کے مارین چیلچ نے جرمن حریف کو ہرا دیا، نمبر پانچ کینیڈین کھلاڑی کی جیت کا سکور چھ تین اور چھ چار رہا۔

اسلام آباد: (نیٹ نیوز/ایمرا نیوز) وزیراعظم نے وفاقی کابینہ کا اجلاس کل طلب کر لیا، عمران خان دورہ چین پر کابینہ ارکان کو اعتماد میں لیں گے، ریڈیو پاکستان بورڈ کی تنظیم نو سمیت 8 نکاتی ایجنڈے پر غور کا امکان ہے۔
وفاقی کابینہ کا اجلاس کل ساڑھے 11 بجے وزیراعظم آفس میں ہو گا، کابینہ کے اجلاس میں 8 نکاتی ایجنڈے پر غور کیا جائے گا، ملک کی سیاسی اور اقتصادی صورتحال کا جائزہ لیا جائے گا، وزیراعظم عمران خان دورہ چین پر کابینہ ارکان کو اعتماد میں لیں گے۔
ذرائع کے مطابق، میجر جنرل فیاض حسین شاہ کی بطور آئی جی ایف سی بلوچستان تقرر کی منظوری متوقع ہے جبکہ میجر جنرل راحت حسین احمد کا بطور آئی جی ایف سی کے پی تقرر ہو گا۔ وفاقی کابینہ ریڈیو پاکستان بورڈ کی تنظیم نو کی منظوری دے گی، اقوام متحدہ امن مشن کے لیے پاک چین معاہدے کی منظوری بھی ایجنڈے میں شامل ہے، وفاقی کابینہ چیئرمین ویج بورڈ کے استعفے کی منظوری دے گی۔
اجلاس میں آٹھویں ویج بورڈ کے چیئرمین کا تقرر بھی کیا جائے گا، کابینہ پاکستان ایل این جی ٹرمینلز کے ڈائرکٹرز کے تقرر کی منظوری دے گی، ایشیاء میں اعتماد سازی کے لیے کانفرنس کے کنونشن پر دستخط کی منظوری ایجنڈے میں شامل ہے۔

اسلام آباد: (نیٹ نیوز/ایمرا نیوز) شہباز شریف نے بجلی کے منصوبوں پر حکومت کو مناظرے کا چیلنج دے دیا۔ انہوں نے کہا جب میں آزاد پاکستان میں آیا تو الزامات کا پتہ لگا، ہمارے دور میں لگے بجلی منصوبوں کو مہنگے ترین کہا گیا، وزیر صاحب بجلی منصوبوں پر مناظرہ کرلیں، ن لیگ نے سستے ترین بجلی منصوبے لگائے۔ اپوزیشن لیڈر شہباز شریف نے قومی اسمبلی میں اظہار خیال کرتے ہوئے کہا کہ لیڈر آف دی ہاؤس این آر او کا الزام ثابت کر دیں، سیاست چھوڑ دوں گا، الزام ثابت نہ ہو تو اسکی معافی تلافی کا فیصلہ لیڈر آف دی ہاؤس خود کرلیں۔ انہوں نے این آر او پر لعنت بھیجتا ہوں، عمران خان بھی ہیلی کاپٹر کیس میں مطلوب ہیں، کیا عمران خان کو بھی ملزم کہہ کر پکارا جاتا تھا، چیئرمین نیب عمران خان کو ملزم ہوتے ہوئے ملے۔ ان کا کہنا تھا سعودی عرب کا جو پیکج آیا اس میں خواجہ آصف کی کوششیں ہیں، آج خواجہ آصف کو نوٹسز آ رہے ہیں، سعدرفیق نے ریلوے میں بہترین کام کیا، مگر آج انکو بھی نیب کے نوٹسز آ رہے ہیں۔ شہباز شریف کا کہنا تھا پی ٹی آئی کو من مانی نہیں کرنے دیں گے، ان کے راستے میں آہنی دیوار بنیں گے، انتقامی کارروائیاں پہلے بھی دیکھیں۔ انہوں نے کہا نیب حراست میں مجھے اخبارات بھی میسر نہیں، جھوٹے مقدمات کا پہلے بھی سامنا کیا، آج بھی کر رہے ہیں، یہی بتا دیں وہ گواہ کون تھا جس نے این آراو کی سفارش کی ؟ انہوں نے کہا لیڈر آف دی ہاؤس نے کہا شہباز شریف نیلسن منڈیلانہ بنیں، انہیں خواب آیا کہ میں نیلسن منڈیلا کی نقل کر رہا ہوں، میں عوام کا خادم ہوں، یوٹرن نہیں لوں گا، نیلسن منڈیلا عظیم شخص تھا جس نے اپنی قربانیوں سے ملک کو آزادی دلوائی۔اپوزیشن لیڈر کا کہنا تھا قومی اسمبلی آنے پر بھارتی فوج کی کشمیریوں پر بربریت کا علم ہوا، کشمیری بھائیوں کے حقوق کیلئے اقوام متحدہ کا دروازہ جھنجوڑنا چاہیئے، بھارتی افواج کی کشمیر میں چیرہ دستیوں کو بے نقاب کیا جائے۔ انہوں نے کہا قومی اسمبلی میں مقبوضہ کشمیر سے متعلق متفقہ قرارداد منظور کرنا کافی نہیں، مقبوضہ کشمیر میں مظالم پر بھارت کو کٹہرے میں کھڑا کیا جائے۔

اسلام آباد: (نیٹ نیوز/ایمرا نیوز) چیف جسٹس ثاقب نثار نے آئی جی اسلام آباد کے معاملے پر فواد چودھری کے بیان کیخلاف نوٹس واپس لے لیا۔
سپریم کورٹ میں چیف جسٹس ثاقب نثار کی سربراہی میں تین رکنی بنچ نے آئی جی اسلام آباد کے تبادلے پر ازخود نوٹس کیس کی سماعت کی۔ چیف جسٹس نے وزیر اطلاعات فواد چودھری کے گزشتہ روز کے بیان کا نوٹس لیتے ہوئے انہیں عدالت طلب کیا۔
چیف جسٹس میاں ثاقب نثار نے ریمارکس دیئے کہ فواد چودھری نے کہا بیورو کریٹس سے حکومت چلالیں، پتہ کرائیں گے پردے کے پیچھے کون ہے ؟ بادی النظر میں فواد چودھری نے عدالتی کارروائی پر بات کی، کل ایک وزیر نے کہا کہ ملک میں الیکشن کرانے کا کیا ضرورت ہے، میں بتائوں گا کہ ملک میں الیکشن کرانے کی کیا ضرورت ہے، وزیراطلاعات نے غیر ذمہ دارانہ بیان دیا، کیا اس طرح بیان دیا جاتا ہے، ایسا ہم سوچ بھی نہیں سکتے۔وفاقی وزیر اطلاعات فواد چوہدری نے سپریم کورٹ کے باہر میڈیا سے گفتگو کرتے ہوئے کہا سپریم کورٹ جو فیصلہ کرے گی اس پر عملدرآمد ہوگا، میرا بیان سپریم کورٹ کے متعلق نہیں تھا، وزیراعظم پالیسی بنائیں گے، اس پر ملک چلے گا۔ انہوں نے کہا مولانا صاحب کو دن میں تارے، رات میں اسرائیلی طیارے نظر آتے ہیں، مولانا لگے رہیں، دس پندرہ سال میں کامیابی مل جائے گی، مولانا صاحب کی اے پی سی سے ہوا نکل گئی، مزہ نہیں آیا۔یاد رہے گزشتہ روز فواد چودھری کا میڈیا سے گفتگو کرتے ہوئے کہنا تھا ک بیوروکریٹس سے حکومت چلانا ناقابل قبول ہے، تعلیمی اداروں میں منشیات بک رہی تھی، شہریار آفریدی نے بھی وزیراعظم سے آئی جی اسلام آباد کی شکایت کی تھی۔ انہوں نے کہا یہ کیسے ہو سکتا ہے کوئی آئی جی وفاقی وزیر کا ٹیلیفون نہ اٹھائے ؟ آئی جی اسلام آباد کوئی کارروائی نہیں کر رہے، چیف ایگزیکٹو آئی جی نہیں، وزیراعظم ہیں۔وزیر اطلاعات نے مزید کہا وزیراعظم آئی جی کو معطل نہیں کر سکتا تو پھر الیکشن کا کیا فائدہ ؟ آئی جی نے فون نہیں سننا تو پھر بیوروکریٹس کی حکومت قائم کر دیں، بیورو کریسی حکومتی پالیسی پر عملدرآمد نہیں کرتی۔

لاہور(اپنے نمائندے سے) تحصیل سٹی کے پٹوار سرکل نیاز بیگ کی حدود میں لیکوڈیشن بورڈ کی سینکڑوں کنال سرکاری اراضی پر بندر بانٹ کا سلسلہ زور شور سے جاری ہو گیا، نیاز بیگ، ہنجر وال کے با اثر افراد، پٹوار خانے سے دریا کی اراضی کی فردیں لیکر لیکوڈیشن بورڈ کی سرکاری اراضی پر قبضے کر وا رہے ہیں جبکہ لیکوڈیشن بورڈ کے ملازمین سرکاری اراضی پر خود قبضے کروانے میں مصروف ہیں وقت کے نمائندے نے نیاز بیگ میں واقع لیکوڈیشن بورڈ کی اراضی ہونے والی پختہ تعمیرات کی فوٹیج حاصل کر لی ہے ایک طرف توڈپٹی کمشنر لاہور کی جانب سے اینٹی انکروچمنٹ مہم کا آغاز بھی ہو چکا ہے اور دوسری جانب دن رات کی بنیاد پر نیاز بیگ کا لینڈ مافیا بھی خوف و خطر سرکاری اراضی پر قبضے کرتے ہوئے سادہ لوح شہریوں کو لوٹنے میں مصروف ہے ، ذرائع کا کہنا ہے کہ جب شہری اپنی زندگی بھر کی جمع پونجی سے محروم ہو جائیں گے نیاز بیگ کا ریونیو سٹاف فردیں جاری کرتا رہے گا اور موقع کی بابت تسلیاںبھی دیتا رہے گا تو اچانک محکمہ حرکت میں آ جائے گا اور موقع پر انوسٹمنٹ کرنے والے متاثرین کے گھر گرانے کا سلسلہ جاری ہو جائے گا اس وقت انتظامیہ غیر قانونی تعمیرات کو کیوں نہیں روک پا رہی یا اس سرکاری اراضی کے قبضے کروانے میں انتظامیہ کے چند افسران بھی شامل ہیں یہ تو آنیوالا وقت ہی بتائے گا۔