Archives July 2017

مری (میڈیا پاکستان آن لائن ) سابق وزیر اعظم نوازشریف کی صاحبزادی مریم نواز نے کہا ہے کہ پھر محبتوں کا وہی سمند ر،عہدے اہمیت نہیں رکھتے، نواز شریف عوام کے دلوں میں بستے ہیں۔ویڈیوبنانے میں اچھی نہیں ہوں اس کے لئے مداحوں سے معذرت خواہ ہوں
مریم نواز کے سوشل میڈیا اکاﺅنٹ اور نجی ٹی وی جیو نیوز کے مطابق انہوں نے کہا ہے کہ نوازشریف کا مری رہائش گاہ پر منتقلی کا کوئی اعلان نہیں کیا گیا تھا تاہم نتھیاگلی کے راستے پر عوام کی بڑی تعداد امڈ آئی اور انہوں نے نواز شریف کو روک لیا ہے اور اس میں صرف مری کے شہر ی ہی نہیں بلکہ کے پی کے ، پنجاب سمیت ملک بھر سے آئے ہوئے سیاح بھی اپنے قائد کی محبت میں پہنچے ہوئے ہیں ۔انہوں نے کہا کہ ایک طرف تو پورے ملک سے اکٹھا کر نے کی کوششیں کی جارہی ہیں جبکہ نواز شریف کے دیوانے اطلاع ملتے ہی بڑی تعداد میں جمع ہو کر اپنی محبت کا اظہار کر رہے ہیں ۔ مری کی زندہ دل عوام اپنے قائدکے استقبال محبتوں کا پیغام لئے امڈ آئے ہیں ۔نواز شریف عوام کے دلوں میں بستے ہیں اس کے لئے انہیں عہدوں کی ضرورت نہیں ہے ۔ انہوں نے اپنے ٹویٹر اکاﺅنٹ پر ایک ویڈیو بھی جاری کی جس میں نواز شریف گاڑی میں لوگوں کی بڑی تعداد کے نعروں کا ہاتھ ہلا کر جواب دے رہے ہیں جبکہ سکیورٹی حصار نے عوام کی بڑی تعداد کو آگے بڑھنے سے روک رکھا ہے ۔

کراچی (میڈیا پاکستان) کراچی کے زیرزمین لائن سے تیل کی چوری کا تہلکہ خیز انکشاف سامنے آگیا۔ تفصیلات کے مطابق شاہ لطیف ٹائون پولیس نے تیل کی چوری میں ملوث گینگ کے چار کارندے گرفتار کر لیے، ملزمان کا گروپ آٹھ افراد پر مشتمل ہے۔ پولیس کے مطابق ملزمان نے ایک ماہ میں 52 فٹ کھدائی کر کے کراچی سے ملتان جانے والی ڈیزل کی مین لائن سے لاکھوں روپے کا تیل چوری کیا۔پولیس نے ملیر ندی سے چار ملزمان دھر لیے، ملزمان چار سو فٹ پائپ کی مدد سے آئل ٹینکر بھرتے تھے۔ملزمان کے مطابق ایک ٹینکر دو گھنٹے میں بھرتے جسے کاٹھور پر بختار نامی شخص کو پانچ لاکھ روپے میں فروخت کرتے، مارکیٹ میں تیل کے ٹینکر کی مالیت چودہ لاکھ روپے سے زائد ہے۔

ماسکو(میڈیا پاکستان)روسی صدر ولادی میرپیوٹن نے 755 امریکی سفارت کاروں کو روس سے نکالنے کا اعلان کر دیا۔ امریکا کی شدید مذمت، امر یکی نائب صدر نے کہا ہے کہ روس کی جانب سے عدم استحکام کسی صورت قبول نہیں کریں گے۔امریکا اور روس ایک بار پھر سرد جنگ کے دہانے پر، نئی امریکی پابندیوں پر روس نے اینٹ کا جواب پتھر سے دیدیا۔

صدر پیوٹن نے کہا ہے کہ 755 امریکی سفارت کاروں کو اب جانا ہو گا۔ روسی ٹی وی کو انٹرویو دیتے ہوئے انہوں نے مزید کہا کہ امریکا نے روس پر بلا اشتعال پابندیاں لگائیں اور ہمارے دوست ممالک پر اثرا انداز ہونے کی کوشش کی۔ 755 ارکان کے نکلنے کے بعد ماسکو میں امریکی عملے کے ارکان کی تعداد 455 ہو جائے گی اور اتنی ہی تعداد میں روسی عملہ اس وقت واشنگٹن میں تعینات ہے۔روسی صدر نے امریکی عملے کی ملک سے بے دخلی کی تصدیق کے ساتھ مصالحتی بیان بھی دیتے ہوئے کہا کہ’ وہ مزید اقدامات اٹھانا نہیں چاہتے لیکن تعلقات میں عنقریب کسی تبدیلی کو نہیں دیکھ رہے ہیں۔’ پیوٹن نے کہا کہ امریکی سفارت خانے اور قونصل خانوں میں ایک ہزار سے زیادہ افراد کام کر رہے تھے اور 775 لوگوں کو روس میں اپنی لازمی اپنی سرگرمیاں ترک کرنا ہوں گی۔

خیال رہے کہ گذشتہ ہفتے امریکی ایوانِ نمائندگان نے صدر ڈونلڈ ٹرمپ کی جانب سے تنقید کے باوجود روس پر نئی پابندیاں لگانے کے حق میں ووٹ دیا تھا جبکہ گذشتہ دسمبر میں اس وقت کے صدر براک اوباما نے الیکشن میں ہیکنگ کے الزام پر 35 روسی سفارتکاروں کو ملک چھوڑ دینے کا حکم دیا تھا اور دو روسی کمپاؤنڈ بند کر دیے گئے تھے۔دوسری جانب امریکی نائب صدر مائیک پینس نے کہا ہے کہ روس کا امریکی سفارت کاروں کو نکالنے کا اقدام بلاجواز ہے۔ روس کی جانب سے عدم استحکام کی سرگرمیاں کسی صورت قبول نہیں کریں گے۔

اسلام آباد(میڈیا پاکستان) خبررساں ایجنسی نے دعویٰ کیا ہے کہ نئے آنیوالے وزیر اعظم شہباز شریف کے لیے وزیراعظم ہاﺅس میں تہمینہ دورانی کو بطور خاتون اول رکھنے کے حوالے سے مریم نواز،بیگم کلثوم نواز دو ٹوک مخالفت کر دی ہے۔حمزہ شہباز نے بھی انا کا مسئلہ بناتے ہوئے اپنی سوتیلی والدہ تہمینہ کو ہی وزیر اعظم ہاﺅس لانے اور خاتون اول بنانے پر بضد ہو گئے ہیں۔

آن لائن نیوز ایجنسی کے مطابق مسلم لیگ ن کے ذرائع سے معلوم ہوا ہے کہ شریف برادران کے درمیان گزشتہ شب سے خاتون اول کے حوالے سے کافی بحث کی جارہی ہے ،بیگم کلثوم نواز نے اپنی بیٹی مریم کے مشورہ پر میاں محمد نواز شریف کو دوٹوک الفاظ میں کہ دیا ہے کہ وہ اپنی دیوارانی تہمینہ کو بطور خاتون اول برداشت نہیں کر سکتی ہیں ،لہذا شہباز شریف سے کہ دیا جائے کہ وزیراعظم منتخب ہونے کے بعد وہ کسی صورت تہمینہ دورانی کو وزیراعظم ہاﺅس نہ لائیں۔حمزہ شہباز نے اپنے والدہ سے وعدہ کر لیا ہے کہ وزیر اعظم ہاﺅس میں بطور خاتون اول ہی قیام کریں گی،حمزہ کا کہنا ہے کہ فیملی کے اندر ہم کسی صورت برداشت نہیں کر سکیں گے کہ ہمیں ڈکٹیٹ کیا جائے۔

دوحہ(میڈیا پاکستان)قطری میڈیا ذرائع نے حج کے مقامات کو بین الاقوامی نگرانی میں دینے کا شوشا چھوڑا ہے۔قطری میڈیا نے منامہ میں چار عرب ممالک کے وزرائے خارجہ کے اجلاس سے قبل ہی الحرمین الشریفین کو سیاست سے الگ کرنے کی مہم برپا کردی اور یہ بھی بے پر کی اڑائی کہ اگر قطری حج کے لیے سعودی عرب جاتے ہیں تو انھیں وہاں قتل کیا جاسکتا ہے۔واضح رہے کہ قطر سے قبل اس کا نیا نیا اتحادی ایران بھی گذشتہ تین عشروں کے دوران میں وقتاً فوقتاً حج کو بین الاقوامی بنانے اور مکہ مکرمہ اور مدینہ منورہ میں الحرمین الشریفین کو تمام مسلم ممالک کے زیر نگرانی دینے کے مطالبات داغتا رہا ہے۔تاہم کسی بھی مسلم ملک یا لیڈر نے ایران کے اس مطالبے کی حمایت نہیں کی تھی۔

اسلام آباد (میڈیا پاکستان)پانامہ لیکس کیس میں نا اہلی کے بعد اب نواز شریف کو ماہانہ ایک لاکھ روپیہ پنشن ، ایک گاڑی ، چار ملازم اور سکیورٹی ملے گی ۔ قومی اخبار کے مطابق نواز شریف کو سابق وزیر اعظم ہونے پر تمام مراعات اور سکیورٹی فراہم کی جائے گی۔ پارلیمنٹ کی جانب سے منظور کردہ قانون کے تحت مستقل اور نگران وزیر اعظم رہنے والے ممبر قومی اسمبلی کو تاحیات پنشن ، سرکاری گاڑی ، ڈرائیور، پرسنل اسٹاف آفیسر، نائب قاصد، خانساماں اور سکیورٹی مہیا کی جائے گی ۔
وزارت قانون اور الیکشن کمیشن کے مطابق سابق وزیر اعظم کو پنشن و مراعات کا حق ملے گا۔ ماہرین کے مطابق نواز شریف تین مرتبہ وزیراعظم رہ چکے ہیں۔ اور وہ قانونی طور پر تین پنشن لینے کے حقدار ہیں۔

لاہور (میڈیا پاکستان آن لائن) پاکستان مسلم لیگ ن کے نامزد امیدوار برائے وزیر اعظم شاہد خاقان عباسی کی نامزدگی عدالت میں چیلنج کردی گئی ہے۔
تفصیلات کے مطابق سپریم کورٹ رجسٹری میں شاہد خاقان عباسی کی نامزدگی کے خلاف درخواست جمع کرادی گئی ہے۔ درخواست لاہور کے رہائشی سید محمود اختر نقوی کی جانب سے دائر کی گئی ہے۔ درخواست گزار نے درخواست میں موقف اپنایا ہے کہ شاہد خاقان عباسی ہوائی کمپنی ایئر بلو کے مالک اور کاروباری شخص ہیں جبکہ ان کے خلاف نیب اور ایف آئی اے میں مقدمات درج ہیں ۔ مقدمے میں ملوث شخص کی نامزدگی غیر قانونی ہے لہٰذا ان کی نامزدگی کالعدم قرار دی جائے۔

اسلام آباد(میڈیا پاکستان آن لائن )سابق وزیراعظم نوازشریف نے باضابطہ اعلان کرتے ہوئے کہا کہ وزیراعلیٰ شہبازشریف مستقل وزیراعظم ہوں گے جبکہ عبور ی طور پر شاہد خاقان عباسی کو وزیراعظم بنایا جائے گا ۔
تفصیلات کے مطابق اسلام آباد میں پنجاب ہاوس میں پاکستان مسلم لیگ ن کی پارلیمانی پارٹی کا اجلاس ہوا جس دوران مستقل وزیراعظم کیلئے وزیراعلیٰ پنجاب شہبازشریف کے نام کی توثیق کر دی گئی جبکہ عبوری وزیراعظم شاہد خاقان عباسی کا نام فائنل کیا گیا اور تمام لیگی رہنماوں نے نوازشریف پر بھر پور اعتماد کا اظہار کیا ۔

اجلاس کے دوران گفتگو کرتے ہوئے نوازشریف کا کہناتھا کہ آپ کو فخر ہوناچاہیے آپ کے پارٹی سربراہ کا دامن صاف ہے، قوم کو پتا چل رہاہے کہ ڈس کوالیفیکیشن کیوں ہوئی،کہتے ہیں تنخواہ کیوں نہیں لی؟اثاثہ ہے،اس لیے ڈکلیئرکرناچاہیے تھا،جب تنخواہ وصول ہی نہیں کی تو ڈکلیئر کیوں کرنا تھا؟۔انہوں نے کہا کہ یہاں جیبیں بھری ہوئی ہیں اور یہ ڈکلیئر نہیں کرتے ، یہ کیا ہورہاہے؟ عوام کو فیصلہ کرنا ہے۔نوازشریف کا کہناتھا کہ ملک کو واپس کس سمت میں لےجایاجارہاہے؟ ،ہراثاثے اورذرائع آمدن کو ڈکلیئر کیا ہوا ہے، میں اپنے ہر اثاثے پر ٹیکس دیتا ہوں،تین نسلوں کے احتساب سے ملاکیا؟ایک اقامہ جو ذرائع آمدن ہی نہیں ہے۔

اسلام آباد (میڈیا پاکستان آن لائن )مریم نواز شریف نے سابق وزیر اعظم نواز شریف کو پنجاب ہاﺅس میں ملنے والی زبردست پذیرائی ملنے کی ویڈیو اپنے سوشل میڈیا اکاﺅنٹ پر شیئر کی ہے جس میں دیکھا جا سکتا ہے کہ لوگ کھڑے ہو کر اپنے لیڈر کا استقبال کر رہے ہیں اور پورا ہال شیر آیا،شیر آیا کے نعرو ں سے گونج اٹھا۔ٹویئڑ اکاﺅنٹ پر مریم نواز نے لکھا کہ”” آپ وزیراعظم رہے یا نہ رہیں آپ کی محبت دلوں میں رہے گی””۔

بغداد(میڈیا پاکستان) گھر سے بھاگ کر داعش میں شمولیت اختیار کرنے کے لیے عراق جانے والی لڑکی نے کہاہے کہ میں جلد ازجلد گھر واپس جانا چاہتی ہوں۔

غیر ملکی میڈیا کے مطابق ایک جرمن صحافی کو دیے گئے انٹرویو میں داعش میں شامل ہونے والی لِنڈا نامی لڑکی کا کہنا تھاکہ میں اپنے گھر،خاندان کے پاس واپس جانا چاہتی ہوں۔ میں جنگ، اسلحے اور اس شور سے دورجانا چاہتی ہوں۔ادھرجرمنی کے وفاقی پبلک پراسیکیوٹر نے بتایا کہ حکومت عراق میں گرفتار ہونے والی لنڈا اور تین دیگر جرمن جہادی خواتین کے بارے میں ابتدائی تحقیقات کر رہی ہے۔ان چاروں جرمن خواتین پر شبہ ہے کہ انہوں نے غیر ملکی دہشت گرد تنظیم میں شمولیت اختیار کی تھی۔ لنڈا کا کہنا ہے کہ اگر جرمن حکومت اسے وطن واپسی کی اجازت دے تو وہ حکام سے تعاون کے لیے تیار ہے۔واضح رہے کہ لنڈا نے ایک سال قبل گھر سے راہ فرار اختیار کرکے داعش میں شمولیت اختیار کر لی تھی