Archives May 2021

کراچی: ترکی کے مقبول ڈرامے ’’ارطغرل غازی‘‘ کی مرکزی اداکارہ حلیمہ سلطان کو آواز دینے والی پاکستانی وائس اوور آرٹسٹ ربیعہ راجپوت کی خواہش ہے کہ خود ترک اداکارہ ان کے کام کی تعریف کریں۔

ربیعہ راجپوت وہ پاکستانی آرٹسٹ ہیں جنہوں نے ترک ڈرامے ’’ارطغرل غازی‘‘ کے اردو ورژن میں حلیمہ سلطان کی وائس اوور کی ہے تاہم ان کا کہنا ہے کہ انہوں نے پہلے یہ کام کرنے سے انکار رکردیا تھا۔

انڈیپنڈنٹ اردو کو دئیے گئے انٹرویو میں ربیعہ راجپوت نے بتایا کہ پاکستان میں ’’ارطغرل غازی‘‘ جب اردو ترجمے کے ساتھ شروع ہوا اور پروڈکشن ہاؤسز نے آڈیشن لینا شروع کیے تو مجھے بھی آفر ہوئی لیکن میں نے وقت کی کمی کے باعث انکار کردیا تھا۔ لیکن بعد میں ڈرامے کی نوعیت اور اہمیت کو سمجھتے ہوئے میں نے آڈیشن کے لیے ہاں کردی۔

ربیعہ راجپوت نے کہا جب وہ حلیمہ سلطان کی وائس اوور کررہی ہوتی ہیں تو وہ ربیعہ راجپوت نہیں رہتیں بلکہ وہ خود کو مکمل طور پر حلیمہ سلطان کے روپ میں ڈھال لیتی ہیں اور اس کردار میں ڈوب جاتی ہیں۔ اور جب ڈرامے میں رونے کا سین آتا ہے تو وہ اسٹوڈیو میں رو رہی ہوتی ہیں اور جب ہنسنے کا سین آتا ہے تو وہ ہنس رہی ہوتی ہیں۔

وائس اوور آرٹسٹ ربیعہ راجپوت نے بتایا کہ ان کا ڈرامے میں سب سے پسندیدہ سین وہ ہے جب حلیمہ کے بچے کی ولادت ہوتی ہے اس کے علاوہ جب چوتھے سیزن میں ارطغرل مرکر دوبارہ واپس آتا ہے تو وہ سین بھی ان کے دل کے بہت قریب ہے۔

ربیعہ راجپوت نے بتایا ان کی خواہش ہے کہ جس کردار کو وہ نبھا رہی ہیں اس کردار کی جانب سے ان کے لیے تعریف ہو۔ یعنی وہ حلیمہ سلطان کے کردار کے لیے وائس اوور کرتی ہیں اس لیے ان کی خواہش ہے کہ حلیمہ سلطان (اسرا بلگیچ) ان کے کام کی تعریف کریں اور ان کے کام سراہیں۔ اس کے علاوہ ربیعہ نے ترکی جانے اور وہاں کے فنکاروں سے ملنےکی خواہش کا بھی اظہار کیا۔

ڈراما سیریل ‘نند’ میں منفی کردار ادا کرنے کے بعد جویریہ سعود نے ویب سیریز ‘عورت گردی’ میں بھی منفی کردار ادا کیا ہے جس کی ریلیز سے قبل ہی انہیں شدید تنقید کا سامناہے۔

ویب سیریز ‘عورت گردی’ 4 جون کو پاکستان کے پہلے او ٹی ٹی پلیٹ فارم ‘اردو فلکس’ پر ریلیز ہوگی۔

اس ویب سیریز میں اداکارہ جویریہ سعود اور علی خان مرکزی کردار ادا کررہے ہیں اور دونوں کو ایک دوسرے کے حریف کے طور پر دکھایا گیا ہے۔

ویب سیریز ‘عورت گردی’ کی کہانی رابعہ بصری شیخ نے تحریر کی ہے، اس کی ہدایات ایان حسین نے دی ہیں جبکہ فرحان گوہر اس کے ایگزیکٹو پروڈیوسر ہیں۔

‘عورت گردی’ کا پہلا ٹریلر ریلیز ہونے کے بعد سے ہی اسے شدید تنقید کا سامنا ہے جس کا سلوگن ہے ‘نہیں چلے گی مرد کی مرضی، اب چلے گی عورت گردی’۔

ویب سیریز کی ریلیز سے قبل اس میں اداکاری سے متعلق پاکستان کی معروف اداکارہ و ٹی وی شو میزبان جویریہ سعود نے کہا ہے کہ ‘عورت گردی ‘ میں میرا ایک کردار ہے اور فنکار ہر طرح کا کردار کرتا ہے۔

انڈیپینڈنٹ اردو کو دیے گئے انٹرویو میں جویریہ سعود نے منفی کردار ادا کرنے سے متعلق سوال کے جواب میں ہنستے ہوئے کہا کہ’ سیدھے سادے کام سے لوگوں کو بات سمجھ میں نہیں آ رہی اس لیے سوچا کہ عورت گردی شروع کرتے ہیں’۔

جویریہ سعود نے او ٹی ٹی پلیٹ فارم اردو فلکس کا حوالہ دیتے ہوئے کہا کہ اردو فلکس والوں کو محسوس ہوا کہ ‘میں ہی یہ عورت گردی کر سکتی ہوں اور اس میں جو عورت گردی مچائی ہے وہ آپ دیکھ سکتے ہیں’۔

سوشل میڈیا صارفین کی جانب سے ‘عورت گردی’ کے خلاف بڑے پیمانے پر تنقید سے متعلق جویریہ سعود نے کہا کہ ‘ہم فنکار ہیں اور ہمیں تو ہر بات پر یہ نکتہ چینی سہنی پڑتی ہے’۔

جویریہ سعود نے کہا کہ ‘ہر انسان کی اپنی ایک سوچ ہوتی ہے لیکن میرے لیے وہ لوگ کافی ہیں جو مجھے دعائیں دیتے ہیں’۔

ویب سیریز میں اداکاری سے متعلق جویریہ سعود نے کہا کہ عورت گردی میں میرا ایک کردار ہے اور فن کار ہر طرح کا کردار کرتا ہے مگر اس کا مطلب یہ نہیں کہ میں ایسی ہی ہوں۔

جویریہ سعود نے بتایا کہ ویب سیریز میں وہ شبنم بی بی نامی خاتون کا منفی کردار ادا کررہی ہے۔

اپنے کردار سے متعلق انہوں نے کہا کہ شبنم بی بی ایک مثبت جگہ پر بیٹھی ہوئی ہے، جو برے حالات سے نکل کر اب ایک منفی شخصیت بن چکی ہے۔

سوشل میڈیا صارفین کی جانب سے ‘عورت گردی ‘ کو عورت مارچ پر مبنی اور سماجی کارکن ماروی سرمد سے متاثر قرار دینے کے سوال پر جویریہ سعود نے کہا کہ انہوں نے ایسا کچھ سنا نہیں۔

اداکارہ کا کہنا تھا کہ انہوں نے مصنف کے لکھے کردار کو نبھانے کی کوشش کی ہے اور یہ کردار کسی شخصیت سے منسلک نہیں ہے۔

جویریہ سعود نے کہا کہ وہ ویب سیریز ‘عورت گردی’ کو صرف ایک کہانی کے طور پر ہی لیتی ہیں۔

اس کے ساتھ ہی جویریہ سعود نے شکوہ کیا کہ پاکستان میں لوگ کھیل کو کھیل نہیں سمجھتے، ٹیم ہار جائے تو کرکٹرز پر تنقید شروع ہوجاتی ہے، اسی طرح فلم کو فلم نہیں سمجھتے، ڈرامے کو ڈراما نہیں سمجھتے۔

جویریہ سعود نے کہا کہ میرے خیال میں ہر جگہ اچھے اور برے لوگ ہوتے ہیں، ہم نے کچھ منفی پہلو دکھایا ہے۔

‘عورت گردی’ کے حوالے سے جاری مختلف قیاس آرائیوں کو مسترد کرتے ہوئے جویریہ سعود نے کہا کہ ان کا خیال ہے کہ ملک میں جتنے لوگ اس کے حق میں ہیں اس سے زیادہ اس کے خلاف بھی ہیں تو اسے صرف ایک عورت کی کہانی کے طور پر دیکھنا چاہیے۔

انہوں نے مزید کہا کہ یہ ویب سیریز ایسے لوگوں کی کہانی ہے جو بظاہر تو مثبت نظر آتے ہیں مگر منفی ہوتے ہیں۔

ویب سیریز میں اداکاری کرنے سے متعلق جویریہ سعود نے کہا کہ انہیں یہ نام اچھا لگا تھا اور اس سے پہلے انہوں نے ’نند‘ ڈرامے میں بھی منفی کردار کیا تھا اور انہیں اس میں بھی بہت مزہ آیا تھا لہذا انہوں نے اس میں اداکاری کا فیصلہ کیا۔

خیال رہے کہ ‘نند ‘ ڈرامے میں جویریہ سعود نے پہلی مرتبہ منفی کردار ادا کیا تھا، اس حوالے سے انہوں نے کہا کہ انہیںمزید منفی کرداروں کی پیشکش بھی ہوئی ہے

جویریہ سعود نے بتایا کہ’ لوگ مجھے کہتے ہیں آپ کا تو چہرہ ہی معصوم ہے آپ نے ایسا کردار کیوں کیا، مگر میں اب اس جانب چل پڑی ہوں اور مجھے مزہ آرہا ہے۔

‘می ٹو’ تحریک کے حوالے سے جویریہ سعود نے کہا کہ ان کے خیال میں یہ کسی کی جان لینے جیسا مسئلہ ہے اور خواتین کو اس معاملے پر کھل کر بولنا چاہیے۔

انہوں نے مزید کہا کہ ‘جیسا کہ عورت گردی میں ان کا کردار ہے کہ منفی عورت اہم جگہ پر آ گئی، اسی طرح ہم لوگوں کو روک ہی نہیں سکتے کیونکہ ہر جگہ اچھے برے لوگ ہوتے ہیں اور گیہوں کے ساتھ گھن پستا ہے۔

جویریہ سعود نے مزید کہا کہ جو خواتین سچی ہیں، انہیں آگے آنا چاہیے اور ثبوت کے ساتھ آنا چاہیے، ان خواتین کو جو سچی ہیں کیونکہ اس دنیا میں کسی کو دھوکا دے بھی دیا تو اللہ کے سامنے تو جواب دینا ہوگا۔

پاکستان کی شوبز انڈسٹری سے وابستہ معروف جوڑی عروسہ بلال اور بلال قریشی کے ہاں دوسرے بیٹے کی پیدائش ہوئی ہے۔

اداکار بلال قریشی نے فوٹو شیئرنگ ایپ انسٹاگرام پر شیئر کی گئی ایک پوسٹ میں مداحوں کو اپنے بیٹے کی پیدائش سے متعلق بتایا۔

انسٹاگرام پر شیئر کی گئی تصویر میں اداکار بلال قریشی اپنے نومولود بیٹے کو گود میں اٹھائے نظر آرہے ہیں۔

اپنی پوسٹ میں بلال قریشی نے مداحوں کو بیٹے کے نام سے بھی آگاہ کیا اور لکھا کہ ‘میرا بیٹا رومان الحمداللہ’۔

بلال قریشی کی مذکورہ پوسٹ کے بعد مداحوں اور شوبز ستاروں کی جانب سے انہیں بیٹے کی پیدائش پر مبارکباد دینے اور نیک تمناؤں کا اظہار کرنے کا سلسلہ جاری ہے۔

خیال رہے کہ بلال قریشی پاکستان کی انٹرٹینمنٹ انڈسٹری سے وابستہ ہیں اور مختلف ڈراموں میں اداکاری کرتے رہے ہیں۔

دوسری جانب ان کی اہلیہ عروسہ قریشی اداکارہ اور ماڈل ہیں اور وہ ‘مینو کا سسرال’ اور ‘داغ’ جیسے ڈراموں میں اداکاری کے باعث جانی جاتی ہیں۔

دونوں اداکاروں نے 6 برس قبل فروری 2015 میں شادی کی تھی اور ان کے بڑے بیٹے کی پیدائش 2016 میں ہوئی تھی۔

بلال قریشی سوشل میڈیا پر کافی فعال ہیں، جہاں وہ اپنی فیملی کے ساتھ بنائی گئی تصاویر اور ویڈیوز بھی شیئر کرتے رہتے ہیں۔

بالی وڈ فلم انڈسٹری سے منسلک دو سپر اسٹار اداکارائیں مادھوری ڈکشٹ اور جوہی چاؤلہ کے مداحوں کی تعداد لاکھوں میں ہے ، لیکن کیا آپ جانتے ہیں کہ وہ ایسی کیا وجہ تھی کہ بالی وڈ انڈسٹری کا بڑے سے بڑا سپر اسٹار بھی ان دونوں اداکاراؤں کا انتخاب نہ بن سکا۔

بالی وڈ سپر اسٹارمادھوری ڈکشٹ نے 1999میں ڈاکٹر شریام سے شادی کی جبکہ اداکارہ جوہی چاؤلہ نے 1995میں صنعتکار جے مہتا سے شادی کی۔

دونوں اداکارائیں ماضی میں بھارتی شو کافی ود کرن میں جلوہ گر ہوئیں تھیں اور دوران شو اداکاراؤں نے بھارتی فلم اسٹاروں سے شادی نہ کرنے کی وجوہات سے متعلق انکشاف کیا۔

مادھوری ڈکشٹ کا کہناتھا کہ شاہ رخ خان اور سلمان خان کے ساتھ میں نے کافی کام کیا ہے جبکہ عامر کے ساتھ میں نے صرف دو فلمیں کی لیکن شادی کسی سے بھی اس لیے نہیں کی کیوں کہ شاید میں اس حوالے سے کسی کو پسند ہی نہیں کرتی میرے شوہر ہی میرے ہیرو ہیں ۔

دوسری جانب اداکارہ جوہی چاؤلہ کا کہنا تھا انہیں جے مہتا کے دیے گئے پھول، کارڈزاور تحائف نے خاصا متاثر کیا اس کے علاوہ ان کا خیال ہے کہ اگر ان کے شوہر بھی بطور اداکار ان کی طرح بناؤ سنگھار میں مصروف رہتے تو وہ ہوسکتا ہے انھیں ہینڈل نہ کرپاتی۔

پاکستان کرکٹ ٹیم کے سابق کپتان راشد لطیف نے دعویٰ کیا ہے کہ کرکٹ بورڈ کے سرابرہ احسان مانی نے اپنا استعفیٰ وزیراعظم عمران خان کوبجھوادیا ہے جو پی سی بی کے پیٹرن ان چیف بھی ہیں۔

ایک نجی ٹی وی چینل سے گفتگو میں راشد لطیف نے دعوی کیا ہے کہ کرکٹ بورڈ کے چیئرمین احسان مانی نے چند روز قبل ہی اپنا استعفیٰ وزیراعظم عمران خان کے حوالے کیا ہے، اورمیری یہ اطلاع بالکل درست ہے۔

احسان مانی کے عہدے کی مدت رواں سال چارستمبر کو پوری ہورہی ہے، تاہم پی سی بی نے اپنے سربراہ کے مستعفی ہونے کی اطلاعات پرفی الحال چپ سادھ رکھی ہے

پاکستان کرکٹ بورڈ (پی سی بی) نے پاکستان سپر لیگ (پی ایس ایل) میں شرکت کیلئے سرفراز احمد سمیت دیگر کھلاڑیوں کو ابوظبی پہنچانے کا نیا منصوبہ تیار کرلیا۔

کوئٹہ گلیڈی ایٹرز کے کپتان سرفراز احمد اور دیگر کھلاڑیوں کو اب براستہ بحرین دبئی روانہ کیا جائے گا۔

پی سی بی کے مطابق اب صرف ابوظبی اسپورٹس کونسل کا انتظار ہے تاہم کلیئرنس ملتے ہی سرفراز سمیت دیگر 12 کھلاڑی آج ہی ابوظبی روانہ ہوجائیں گے۔

خیال رہے اس سے قبل سرفراز احمد کو کراچی ائیرپورٹ سے جبکہ ديگر 10افراد کو لاہور ائیرپورٹ سے واپس لوٹا دیا گیا تھا۔

سرفراز احمد کو ٹکٹ کنفرم نہ ہونے پر ائیرپورٹ سے واپس بھیج دیا گیا تھا جس پر وہ نالاں نظر آئے تھے۔

کراچی: پی سی بی نے پی ایس ایل کیلیے سخت بائیو سیکیور قوائد تیار کر لیے، خلاف ورزی پر ایک سے 4 میچز کی پابندی جبکہ 25 سے 100 فیصد میچ فیس کے جرمانے کی سزائیں دی جائیں گی۔

پی ایس ایل 6 کو مثبت کورونا کیسز کی وجہ سے درمیان میں ہی روکنا پڑ گیا تھا، اب ابوظبی میں آئندہ ماہ بقیہ میچز کھیلے جا رہے ہیں، کراچی میں کھلاڑیوں اور آفیشلز کی جانب سے بائیو ببل قوانین توڑنے کے کئی واقعات سامنے آئے تھے،کرکٹ بورڈ نے اب اس مسئلے سے بچنے کیلیے سخت سزائیں مقرر کی ہیں۔

بائیو سیکیور ماڈل کی خلاف ورزی کو تین کیٹیگریز میں رکھا گیا ہے،ان میں ببل کے اندر معمولی خلاف ورزیاں، سنگین خلاف ورزیاں اور ببل سے باہر جانے یا اس کا ماحول خراب کرنا شامل ہیں، پی سی بی کی بس یا گاڑی میں آمدورفت کے وقت ماسک نہ لگانا، فضائی سفر سے قبل لاؤنج میں دیگر افراد کے قریب بیٹھنا، میچ یا پریکٹس کے وقت گراؤنڈ میں داخل ہوتے وقت ہاتھ نہ دھونا یا سینیٹائز نہ کرنا، گیند پر تھوک لگانا۔

لیئرٹو کے افراد سے گراؤنڈ میں سوشل ڈسٹینس نہ رکھنا،ڈرنک، پانی کی بوتل، سامان، کپڑے، تولیہ یا کٹس کسی کے ساتھ شیئر کرنا،علامات کی ٹریکنگ ایپ میں تفصیلات نہ دینا، بولر کی جانب سے کیپ، ہیٹ، جمپر یا گلاسز گراؤنڈ کے باہر رکھنے کی جگہ امپائر کو دینا، فیلڈ میں تھوکنا اور دیگر بعض باتیں معمولی خلاف ورزیوں میں شمار ہوں گی۔

ڈاکٹر کی ایڈوائس کے بغیر آئسولیشن روم جانا، فزیو اور مساجر کا ٹریٹمنٹ کے دوران ماسک نہ پہننا، بوتل شیئر کرنا یا بغیر نشان والی ڈرنک بوتل و تولیہ کا پلیئرز کی جانب سے استعمال،فضائی سفر کے دوران ماسک یا گلوز پھینکنا،علامات چھپانے کیلیے کوئی دوائی لینا یا ٹیسٹ کے نتائج میں ردوبدل کرنا یا علامات ظاہر ہونے کی معلومات چھپانا سنگین خلاف ورزیاں شمار ہوں گی۔

اس کے علاوہ بھی کئی صفحات پر مشتمل تفصیلات دی گئی ہیں، پہلی معمولی خلاف ورزی پر انتباہ اور سرزنش کے بعد چھوڑ دیا جائے گا یا25 فیصد میچ فیس کا جرمانہ عائد ہوگا، غلطی دہرانے یا سنگین خلاف ورزی پر50 سے 75 فیصد میچ فیس کا جرمانہ یا اور ایک سے 3میچز کی پابندی عائد ہو گی۔

بائیو سیکیور ببل کی خلاف ورزی پر فوری آئسولیشن، قرنطینہ اور پی سی آر ٹیسٹ ہوگا، میچ فیس کا 100فیصد جرمانہ اور2 سے 4 میچز کی پابندی بھی عائد ہو سکے گی۔

پی ایس ایل ٹیکنیکل کمیٹی سے سزا یافتہ کرکٹر فیصلے کیخلاف 24 گھنٹے کے اندر سی ای او پی سی بی سے اپیل کر سکے گا جو تین دن میں کوئی فیصلہ کریں گے

روم: موٹر سائیکل ریس اٹالین موٹو جی پی میں حادثے کا شکار انیس سالہ سوئس رائیڈر جیسن زندگی کی بازی ہار گئے ہیں جبکہ عالمی چیمپئن فیبیو نے مسلسل چوتھی بار پول پوزیشن جیت کر تاریخ رقم کر دی ہے۔

اطالوی موٹر ٹریک پر بائیک ریس ہوئی جہاں پول پوزیشن میں دنیا بھر کے رائیڈرز اِن ایکشن ہوئے۔ اس ریس کے دوران افسوسناک حادثہ پیش آیا۔ حادثے کا شکار انیس سالہ سوئس رائیڈر جیسن زندگی کی بازی ہار گئے۔

نوجوان جیسن کو ابتدائی طبی امداد کے بعد ائیر لفٹ کے ذریعے ہسپتال پہنچایا گیا تھا۔ ڈاکٹروں کا کہنا تھا کہ چھاتی اور دماغ پر شدید چوٹیں جان لیوا ثابت ہوئیں۔

سماجی رابطوں کی ویب ساٹ ٹویٹر کے ذریعے انتقال کی خبر اور تعزیتی پیغام کے بعد ایونٹ پر خوف سائے اور سب سوگوار ہوگئے۔

کویت سٹی: کویت کے وزیراعظم شیخ صباح خالدالحامدالصباح نے وزیرداخلہ شیخ رشید احمد سے ملاقات کی، اس دو طرفہ ملاقات میں پاکستانی شہریوں کے لیے 2011 سے بند کویتی ویزے کی بحالی پر اہم پیش رفت ہوئی ہے۔

اس دوطرفہ ملاقات میں پاکستان و کویت تعلقات سمیت باہمی دلچسپی کےامور پر گفتگو کی گئی۔ وزیرداخلہ شیخ رشید احمد نے کویتی وزیراعظم سے ویزے کی بحالی پر بات چیت کی اورانہیں وزیراعظم عمران خان کا خصوصی مراسلہ بھی پیش کیا۔

ملاقات میں کویت کے وزیرداخلہ اور پاکستانی سفیر بھی موجود تھے، کویتی وزیر اعظم اور وزیر داخلہ شیخ رشید احمد کی ملاقات میں اہم معاملات پرفیصلے بھی کیے گئے۔ کویت نے پاکستانی شہریوں کے لیے 2011 سے بند فیملی اور بزنس ویزے فوری بحال کرنے کا فیصلہ کرلیا ہے اورپاکستانی ورکرز کو بھی معاہدے کے مطابق کویتی ویزے جاری کیے جائیں گے۔
اس موقع پر کویتی وزیراعظم کا کہنا تھا کہ میڈیکل اورآئل فیلڈ میں ٹیکنیکل ویزے پر کوئی پابندی نہیں ہوگی، خلیجی ممالک میں رہنے والے پاکستانی اب آن لائن ویزا لے کر کویت آسکیں گے۔ انہوں نےمزید کہا کہ پاکستان اور کویت کے درمیان تعلقات سات دہائیوں پر محیط ہیں۔ اوردونوں ملکوں کی عوام کے درمیان پیاراوراعتماد کا رشتہ ہے۔

وزیر داخلہ شیخ رشید احمد نے کہا کہ پاکستان اور کویت کے درمیان انتہائی دیرینہ تعلقات ہیں۔ باہمی تعلقات کی بنیاد باہمی بھائی چارہ اور محبت ہے۔ تمام پاکستانی کویت کو اپنا دوسرا گھرسمجھتے ہیں۔ پاکستانی خاندانوں اور کاروباری طبقے کو کویتی ویزا بندش سے بے پناہ مسائل درپیش تھے۔

انہوں نے کہا کہ پاکستانی لیبر کا کویت کی اولین ترقی میں بہت اہم کردار ہے۔ ورکرز ویزا بحال ہونے سے پاکستانیوں کے لیے روزگار کے نئے مواقع پیدا ہونگے۔ اور کاروباری ویزے بحال ہونے سے دونوں ملکوں کے درمیان تجارت کو فروغ حاصل ہوگا۔