Archives December 2019

لاہور(ایمرا نیوز آن لائن)پاکستان ویمن کرکٹ ٹیم کی آل راؤنڈر ندا ڈار نے انٹرنیشنل کرکٹ کونسل (آئی سی سی) کی خصوصی کیپ وصول کر لی۔پاکستان کرکٹ بورڈ (پی سی بی) نے ٹوئٹر پر ندا ڈار کی دو تصاویر شیئر کیں ہیں جن میں وہ آئی سی سی ویمن ٹی20 کی ٹیم آف دی ایئر 2019 کی کیپ وصول کر رہی ہیں۔

ندا ڈار کو کیپ پی سی بی چیئرمین احسان مانی نے دی۔ندا کا شمار پاکستان کی تجربہ کار ویمن کرکٹرز میں ہوتا ہے اور آسٹریلیا کی بگ بیش لیگ کھیلنے والی پہلی پاکستانی خاتون کرکٹر ہونے کا اعزاز بھی رکھتی ہیں۔

آف اسپنر ندا ڈار 96 ٹی ٹوئنٹی اور 71 ون ڈے میچز میں پاکستان کی نمائندگی کرچکی ہیں۔ وہ ٹی ٹوئنٹی کرکٹ میں پاکستان کی جانب سے سب سے زیادہ 88 وکٹیں لینے والی کھلاڑی ہیں۔

اسلام آباد(ایمرا نیوز آن لائن) وزیراعظم عمران خان کی معاون خصوصی برائے اطلاعات و نشریات فردوس عاشق اعوان کا کہنا ہے کہ اقتدار کی خواہش بلاول بھٹو زرداری کی زبان پر آہی گئی ہے۔پی پی پی کے چیئرمین بلاول بھٹو زرداری نے متحدہ قومی موومنٹ پاکستان (ایم کیو ایم) کو وزیراعظم عمران خان کی حکومت گرانے میں ساتھ دینے کے بدلے سندھ میں وزارتیں دینے کی پیشکش کی تھی۔

اس پر ردعمل دیتے ہوئے فردوس عاشق اعوان نے کہا کہ حکومت گرانے کے لیے ایم کیو ایم کو آفر کرنا ظاہر کرتا ہے کہ بلاول بھٹو کی اقتدار کی خواہش زبان پر آہی گئی ہے۔فردوس عاشق اعوان کا کہنا تھا کہ سیاست کے میدان میں ناکامی پرمخالفین چور دروازہ ڈھونڈ رہے ہیں، ان کی سیاہ حرکتوں کی وجہ سے عوام نے ان سے سیاسی اتحاد توڑا ہے جب کہ وزیراعظم نے قوم کو جوڑ توڑ اور لین دین کی سیاست سے پاک کردیا ہے۔یاد رہے کہ ایم کیو ایم پاکستان کے رہنما خواجہ اظہار الحسن نے بلاول کے بیان پر کہا کہ یہ شمولیت کی پیشکش نہیں، محض جلسے میں تقریر کی گئی ہے۔

فردوس عاشق نے کہا کہ بلاول بھٹو کی پیشکش کو ایم کیو ایم نے جس بے رحمی سے ٹھکرایا ہے اس پر انہیں بلاول سے ہمدردی ہے۔معاون خصوصی نے بلاول پر تنقید کرتے ہوئے کہاکہ کراچی کے مسائل سیاسی جماعت کا اتحاد توڑنے سے حل نہیں ہوں گے بلکہ کرپشن، لوٹ مارسے اتحاد توڑنے پر حل ہوں گے۔ان کا کہنا تھا کہ کراچی کا اصل مسئلہ ایک دہائی سے سندھ پر مسلط کرپٹ ٹولہ ہے، ہم اتحادیوں کے ساتھ مل کر عوامی مسائل حل کریں گے۔

کراچی (ایمرا نیوز آن لائن)سندھ کے اسکولوں میں موسم سرما کی تعطیلات میں اضافہ نہ کرنے کا فیصلہ کیا گیا ہے۔سیکریٹری تعلیم سندھ احسن منگی کا کہنا ہے کہ سندھ کے اسکولوں میں موسم سرما کی تعطیلات میں اضافہ نہیں کیا جائے گا۔انہوں نے کہا کہ شیڈول کے مطابق تعطیلات آج تک ہی تھیں اور کل سے اسکول معمول کے مطابق کھلیں گے۔

کراچی سمیت سندھ کے بیشتر حصوں میں سردی میں اچانک اضافے کے بعد یہ امید کی جا رہی تھی کہ سندھ کے اسکولوں میں موسم سرما کی تعطیلات میں ایک ہفتے کا اضافہ کیا جائے گا۔

دوسری جانب سرد موسم میں اضافے کے باعث خیبر پختونخوا (کے پی کے) کے اسکولوں میں سردیوں کی چھٹیاں 7 جنوری تک بڑھا دی گئیں۔

لاہور(ایمرا نیوز آن لائن)’نیب آرڈنیس سمجھنے کیلئے دوبارہ ڈگری لینا پڑے گی’نیب ترمیمی آرڈیننس پر تبصرہ کرتے ہوئے جسٹس (ر) وجیہ الدین احمد نے کہا ہے کہ نیب آرڈنیس کو سمجھنے کے لیے انہیں قانون کی تعلیم دوبارہ حاصل کرنا پڑے گی۔

اپنے ایک بیان میں چیئرمین عام لوگ اتحادجسٹس (ر) وجیہہ الدین احمد نے کہا کہ حکمرانی کا عجیب و غریب انداز اپنایا جا رہا ہے، ابتدائی نیب آرڈیننس 1999 عملاً ختم کر دیا گیا ہے اور اب نااہلی سے قومی خزانے کو پہنچنے والا نقصان کرپشن کے ذمرے میں نہیں آئے گا۔

وجیہ الدین احمد نے کہا کہ آرڈیننس کے ذریعے بدعنوانوں کو کھلی چھوٹ دیدی گئی،خود حکومت اور حزب اختلاف کے لوگوں کو بھی فائدہ پہنچے گا۔انہوں نے مزید کہا کہ حکمرانوں نے اپنے موجودہ حالات کو تحفظ دیا ہے، آنے والے وقتوں کے لیے بھی حکمرانوں نے خلاصی حاصل کر لی ہے۔

جسٹس (ر) وجیہہ الدین کے مطابق احتساب کے نعرے سے ہوا نکل گئی ہے، یہ ایک بہت وسیع پیمانے پر پھیلا ہوا این آر او ہے ۔

لاہور(ایمرا نیوز آن لائن)سی این جی اسٹیشن آج 24 گھنٹے کے لیے بند ہیں، سوئی سدرن کراچی میں شیڈول کے باوجود آج سی این جی اسٹیشن نہیں کھل سکے ہیں۔گیس اسٹیشن کے مالکان کا کہنا ہے کہ پیغام آیا ہے کہ سی این جی اسٹیشن نہیں کھلیں گے، گیس پریشر نہیں اس لیے سی این جی اسٹیشن بند رہیں گے۔

دوسری جانب سوئی سدرن گیس کمپنی کے ترجمان کا کہنا ہے کہ ہماری پہلی ترجیح گھریلو صارفین کو گیس کی فراہمی ہے۔ترجمان سوئی سدرن گیس کمپنی کا یہ بھی کہنا ہے کہ سی این جی اسٹیشن آج 24 گھنٹے کے لیے بند کیے گئے ہیں، جبکہ کل شیڈول کے مطابق سی این جی بند رہے گی۔ادھر پنجاب میں انڈسٹریز کو گیس کی فراہمی 10 روز بعد بحال ہوگئی، گیس کی فراہمی کے بعد صنعتی پہیہ بھی چل پڑا۔

سوئی ناردن گیس کے نوٹی فکیشن کے بعد آج صبح سے پنجاب کی صنعتوں کو گیس کی سپلائی بحال کر دی گئی ہے، 10 روز تک معطل رہنے والی گیس کی سپلائی بھی شروع ہوئی توصنعتی پہیہ بھی چل پڑا۔کراچی: CNG بندش کا تیسرا دن، رکشہ، ٹیکسی ڈرائیور رل گئے

فیصل آباد، گوجرانوالہ، سیالکوٹ میں انڈسٹریز کو 10 روز سے گیس کی فراہمی معطل تھی اور صنعت کار مہنگے متبادل ذرائع سے پیدواری عمل جاری رکھے ہوئے تھے۔

نوٹیفکیشن کے مطابق سی این جی سیکٹرز کواب بھی گیس کی بندش کا سامنا رہے گا، دوسری طرف فیصل آباد،گوجرانوالہ ،ملتان، بہاولپور، جھنگ، سرگودھا سمیت پنجاب کے کئی اضلاع میں گھریلو صارفین گیس کی عدم فراہمی پر سخت پریشان ہیں۔

یہ بھی پڑھیئے: کراچی، 3 دن کی بندش کے بعد CNG اسٹیشن کھل گئے

ان شہروں میں گھروں میں صبح ہوتے ہی گیس کی بندش سے معمولاتِ زندگی متاثر رہتے ہیں۔

ادھر سندھ کے کئی شہروں میں بھی گیس بحران سے گھریلو صارفین کو سخت مشکلات کاسامناہے۔

بھارت (ایمرا نیوز آن لائن) بھارت میں متنازع شہریت بل پر احتجا ج کرنے والوں کی حمایت میں کانگریس کی رہنما پریانکا گاندھی کھل کر سامنے آگئیں۔ کانگریسی رہنما پریانکا گاندھی نے متنازع شہریت بل پر احتجاج کرنے والوں کی کھل کر حمایت کی اور مظاہرین کے خلاف پولیس ایکشن کو غیر قانونی قرار دے دیا۔

ایک پریس کانفرنس میں پریانکا کا کہنا تھا کہ یوپی پولیس مظاہرین کیخلاف طاقت کا ناجائز استعمال کر رہی ہے، پہلے تحقیقات ہونی چاہئیں کہ املاک کو نقصان کس نے پہنچایا۔ تحقیقات سے پہلے پولیس کارروائیاں غیر قانونی ہیں۔

انہوں نے کہا کہ کانگریس کسی صوبے میں شہریت بل نافذ نہیں ہونے دے گی۔ اور یہ بل نافذ ہو ہی نہیں سکتا کیونکہ بھارتی عوام ایسا نہیں چاہتے۔انہوں نے کہا کہ اتر پردیش میں متنازع قانون کیخلاف احتجاج کرنے والوں پر یوپی پولیس نے بدترین تشدد اور طاقت کا ناجائز استعمال کیا۔

انہوں نے کہا کہ مختلف ریاستوں میں کانگریس کے وزرائے اعلیٰ متنازع قانون کو نافذ نہیں کر یں گے۔ ان کا کہنا تھا کہ یہ پتہ چلایا جائے کہ املاک کو کس نے نقصان پہنچایا ہے۔

چین (ایمرا نیوز آن لائن) چین میں آئس تھیم پارک عوام کے لیے کھول دیا گیا چین میں آئس تھیم پارک عوام کے لیے کھول دیا گیا، لوگوں کی بڑی تعداد ونڈر لینڈ کی سیر کے لیے پہنچ گئی۔

چین میں آئس تھیم پارک عوام کے لیے کھول دیا گیا ہے۔ چین کے سرد ترین شہر ہربن میں آئس تھیم پارک 21ویں سالانہ ونٹر سیزن کے لیے کھول دیا گیا ہے جس میں لوگوں کی بڑی تعداد ونڈر لینڈ کی سیر کرنے پہنچ گئی ہے۔

2 لاکھ کیوبک میٹرز برف سے بنے اس ونڈر لینڈ میں برف کا قلعہ، برف سے بنی عمارتیں جہاں لوگوں کی توجہ کا مرکز بنی ہوئی ہیں وہیں برف سے بنی سلائیڈز پر بچے بڑے خوب انجوائے کر رہے ہیں جبکہ برف سے بنے دیوہیکل مجسموں کو ایل ای ڈی لائٹس سے روشن کیا گیا ہے جس نے تھیم پارک کو چار چاند لگا دیئے ہیں۔

واضح رہےکہ آئس تھیم میں پارک 3 ماہ تک کُھلا رہے گا جس میں مختلف سرگرمیوں کا بھی انعقاد کیا جائے گا۔

لندن(ایمرا نیوز آن لائن)برطانیہ کے 48 سالہ گیری مک فیرلین نامی شہری پیدائشی طور پر معذور ہیں، ان کا کہنا ہے کہ ان کی ماں کا دورانِ حمل ایک ٹیسٹ کیا گیاجس کی وجہ سے وہ زندگی بھر کے لئے معذور ہوگئے۔معروف غیر ملکی ویب سائٹ کے مطابق گیری کی پیدائش 1971 میں ہوئی تھی۔ ان کی والدہ نے ان دنوں رائج ’ہارمون پریگنینسی ٹیسٹ‘ کروایا تھا۔

’والدہ کا دوران حمل ٹیسٹ کے باعث میں معذور پیدا ہوا‘ گیری والدہ اور چھوٹے بھائی کے ہمراہ رپورٹ کے مطابق گیری جب پیدا ہوئے تو ان کے بازو اکڑے ہوئے تھے۔ ان کے دونوں ہاتھوں کی صرف ایک ایک انگلی اور ایک انگوٹھا حرکت کرتا تھا۔ باقی انگلیاں ناکارہ تھیں۔ اس کے علاوہ ان کے بازوؤں اور ٹانگوں کے کئی پٹھے مردہ تھے۔

بچپن اور لڑکپن میں گیری کے 100 سے زائد آپریشن ہوئے، جن کے نتیجے میں ان کی ٹانگوں اور بازوؤں میں کچھ لچک آئی۔ اس سے وہ چلنے پھرنے کے قابل ہو گئے اور ان کے بازوؤں کی اکڑن بھی کسی حد تک ختم ہوگئی لیکن ہاتھ معذور ہی رہے۔

2 سال کی عمر تک گیری کے 100 سے زائد آپریشنز ہوئے گیری کا کہنا ہے کہ مجھے بچپن سے بتایا گیا میرے ساتھ جو ہوا وہ خدا کی مرضی تھی لیکن میں سوچتا ہوں کہ اگر میری ماں نے وہ ٹیسٹ نہ کروایا ہوتا تو شاید میری یہ حالت نہ ہوتی۔واضح رہے کہ 1978ء میں اس ٹیسٹ کو نقصان دہ قرار دے کر ختم کر دیا گیا تھا اور اس دوا کا اسٹاک مارکیٹ سے اٹھالیا گیا تھا۔

لاہور(ایمرا نیوز آن لائن)عدنان سمیع بھارت میں معین اختر کو یاد کرنے لگے سابق پاکستانی گلوکار عدنان سمیع بھارت میں معین اختر کو یاد کرنے لگے۔

سماجی رابطے کی ویب سائٹ ٹوئٹر پر انہوں نے اپنے ایک ٹوئٹ میں معین اختر کی تصویریں شیئر کیں ۔معین اختر کے معروف شو کی ایک تصویر میم کی صورت اختیار کر گئی ہے۔انہوں نے اپنے ٹوئٹ میں لکھا کہ ’ ایک عزیز بھائی، باصلاحیت شخصیت پیارے معین اختر کو میں بہت یاد کرتا ہوں۔‘

اپنے ٹوئٹ میں انہوں نے معین اختر کو شہرہ آفاق برطانوی اداکار و کامیڈین پیٹر سیلر سے ملاتے ہوئے کہا کہ اگر مغرب میں پیٹر سیلر تھے تو مشرق میں معین اختر تھے۔اپنے ٹوئٹ کے آخر میں انہوں نے معین اختر کو خراج عقیدت پیش کرتے ہوئے اُن کے لیے مغفرت کی دعا کی ۔

ترکی(ایمرا نیوز آن لائن) رونالڈو نے معذور مداح سے ملاقات کرکے اُس کی خواہش پوری کردی معروف فٹ بالر کرسٹیانو رونالڈو نے معذور مداح سے ملاقات کرکے اُس کی خواہش پُوری کردی۔ گزشتہ روز پرتگال سے تعلق رکھنے والے معروف فٹ بالر کرسٹیانو رونالڈو نے سماجی رابطے کی ویب سائٹ انسٹاگرام پر ایک ویڈیو شیئر کی جس میں وہ ایک معذور بچے کے ساتھ فٹ بال کھیل رہے ہیں، علی عامر نامی یہ معذور بچہ کرسٹیانو رونالڈو کا ایک خاص مداح ہے۔
رونالڈو نے اپنے اس خاص مداح کی خواہش پر اُس سے ملاقات کی اور پھر فٹ بال بھی کھیلی، رونالڈو نے ویڈیو شیئر کرتے ہوئے کیپشن میں لکھا کہ ’آپ سے ملاقات کرکے خوشی ہوئی، آپ نے مجھے بہت متاثر کیا۔‘

دوسری جانب علی عامر نے اپنے انسٹاگرام اکاؤنٹ پر رونالڈو سے ملاقات کی تصاویر شیئر کیں اور ساتھ ہی ایک ویڈیو شیئر کی جس میں رونالڈو اپنے مداح کو فٹ بال پر آٹوگراف دے رہے ہیں۔علی عامر نے اِن تصاویر اور ویڈیو کو شیئر کرتے ہوئے کیپشن میں لکھا کہ ’اُن کو یقین نہیں آرہا ہے کہ اُن کی یہ خواہش پوری ہوگئی ہے۔‘علی عامر نے لکھا کہ ’میں اِس کے لیے سب سے پہلے اللّہ تعالیٰ کا شکر ادا کرتا ہوں کہ اُس نے میری دُعا قبول کی اور رونالڈو سے ملاقات کروانے کے لیے کچھ لوگوں کو وسیلہ بنایا۔‘

اُنہوں نے اِس ملاقات کے لیے کرسٹیانو رونالڈو کا بھی شکریہ ادا کیا اور ساتھ ہی فٹ بال کھیلنے کے لیے بھی شُکریہ ادا کیا۔اُنہوں نے اِس موقع پر لکھا کہ ’میں اپنے والدین کا بھی شُکر گُزار ہوں۔‘اِس کے علاوہ علی عامر نے انسٹاگرام پر وہ ویڈیو بھی شیئر کی جس میں رونالڈو اُن کے ساتھ فٹ بال کھیل رہے ہیں۔