Archives October 2019

(وقت نیوزآن لائن) مقبوضہ جموں و کشمیر اور لداخ کو تقسیم کرنے کے بھارتی قوانین پر عمل درآمد شروع ہونے کے بعد بھارتی شہریوں کو مقبوضہ وادی میں جائیداد کی خرید و فروخت کا حق حاصل ہو گیا۔

بھارت نے 5 اگست کو مقبوضہ جموں و کشمیر کی خصوصی حیثیت ختم کر کے مقبوضہ کشمیر اور لداخ کو دو حصوں میں تقسیم کرتے ہوئے زبردستی بھارتی یونین کا حصہ بنا دیا تھا۔ مقبوضہ کشمیر کی آئینی حیثیت ختم کرنے کی بھارتی فیصلے کو باضابطہ شکل دے دی گئی ہے اور آج سے بھارتی شہریوں کو مقبوضہ کشمیر میں جائیدادیں خریدنے اور رہنے کا حق حاصل ہو گیا ہے۔

بھارتی اقدام کے باعث مقبوضہ جموں کشمیر کا پرچم اور آئین بھی ختم کر دیا گیا ہے اور یکم نومبر تک مقبوضہ کشمیر میں دفعہ 144 نافذ کر دی گئی ہے۔ بھارتی میڈیا کے مطابق نئے یونٹس میں زیادہ اختیارات نئی دلی کے پاس موجود ہوں گے، جموں و کشمیر کے لیے گریش چندر مرمو کو اور لداخ کے لیے آر کے ماتھر کو گورنر مقرر کیا گیا ہے۔

بھارتی میڈیا کے مطابق مقبوضہ جموں کشمیر یونٹ کے نئے لیفٹیننٹ، گورنر ہوں گے اور لداخ یونٹ کو بھی لیفٹیننٹ گورنر کے ذریعے چلایا جائے گا۔ پہلے سے جموں کشمیر میں تعینات گورنر ستیا پال ملک کو گواکا نیا گورنر مقرر کر دیا گیا ہے۔ دوسر یجانب بھارتی اقدام کے بعد لداخ کے بُدھ باشندوں کے لیے تشویش شدت اختیار کر گئی ہے۔

لاہور:(ایمرا نیوزآن لائن) مسلم لیگ (ن) کی ترجمان مریم اورنگزیب کے جلسہ منسوخ ہونے کے بیان نے اپوزیشن کو تقسیم کردیا۔

لیگی ترجمان مریم اورنگزیب نے اپنے ایک بیان میں کہا کہ آزادی مارچ آج اسلام آباد میں جلسہ گاہ پہنچے گا لیکن سانحہ تیز گام ایکسپریس کی وجہ سے آج کا جلسہ کل تک ملتوی کر دیا گیا ہے۔ انہوں نے کہا کہ آج کا جلسہ ملتوی کرنے کا فیصلہ مشترکہ اپوزیشن نے کیا ہے اور اب آزادی مارچ کا جلسہ کل جمعے کے بعد کیا جائے گا۔

اسی حوالے سے مسلم لیگ (ن) کے سینئر رہنما احسن اقبال کا کہنا تھا کہ سانحہ تیز گام کے متاثرین سےاظہار یکجہتی کے لیے اپوزیشن جماعتوں نے فیصلہ کیا کہ کل جمعہ کے بعد جلسہ کیا جائیگا جو بہت بے مثال ہوگا، حادثے کے پیش نظر اپوزیشن اور جے یو آئی (ف) نے محسوس کیا کہ جلسہ ملتوی کرنا چاہیے جو اب بعد نماز جمعہ ہوگا۔

جے یو آئی (ف) کی تردید: دوسری جانب جمعیت علما اسلام کے سربراہ مولانا فضل الرحمان نے جلسہ ملتوی ہونے کی تردید کرتے ہوئے کہا کہ آزادی مارچ بھی ہوگا اور جلسہ بھی ہوگا، مارچ اسلام آباد پہنچ کر بھی مارچ ہی رہے گا، مارچ میں جلسہ بھی ہوتا ہے۔ جب کہ مولانا عبدالغفور حیدری نے بھی مریم اورنگزیب کے بیان کی تردید کرتے ہوئے ان کے بیان سے لاعلمی کا اظہار کیا۔

(ن) لیگ پراپیگنڈا کررہی ہے: اے این پی ادھر عوامی نیشنل پارٹی کے ترجمان زاہد خان نے بھی مریم اورنگزیب کے بیان پر شدید رد عمل دیتے ہوئے کہا ہےکہ ایک بڑے قافلے کی قیادت کرتے ہوئے اسفند یار ولی اسلام آباد پہنچ رہے ہیں، جلسہ منسوخی کی بات (ن) لیگ کا پروپیگنڈا ہے، (ن) لیگ بے شک نہ آئے، جلسہ آج ہی ہوگا اور اسفند یار ولی آج ہی جلسے سے خطاب کریں گے۔

روس (ایمرا نیوزآن لائن) بحیرہ ابیض میں بین البراعظمی بیلسٹک میزائل کا تجربہ کیا ہے۔
روسی وزارت دفاع کے مطابق یہ میزائل ایک آبدوز سے داغا گیا اور اس نے ہزاروں میل دور ہدف کو کامیابی سے نشانہ بنایا۔
میزائل شمالی روس میں واقع بحیرہ ابیض (White Sea) میں موجود ایک اپ گریڈ کی گئی آبدوز سے فائر کیا گیا تھا۔ ذرائع کے مطابق بیلسٹک میزائل کا ٹارگٹ مشرق بعید میں واقع روسی علاقے کاماچٹکا میں تھا۔

پشاور(ایمرا نیوزآن لائن) ہائی کورٹ نے جمعیت علمائے اسلام ف کے گرفتار رہنما مفتی کفایت اللّٰہ کی ضمانت منظور کر لی۔

ضمانت کی منظوری کے بعد مفتی کفایت اللّٰہ کی جلد رہائی کا امکان ہے۔ جمعیت علمائے اسلام ف کے رہنما مفتی کفایت اللّٰہ کو26 اور 27 اکتوبر کے درمیانی شب گرفتار کیا گیا تھا جس کے اگلے روز جے یو آئی ف نے کراچی سے مولانا فضل الرحمٰن کی قیادت میں آزادی مارچ شروع کیا۔

جے یو آئی رہنما مفتی کفایت اللّٰہ گرفتار: ڈپٹی سیکریٹری اطلاعات جے یو آئی ف اسلم غوری نے بتایا تھا کہ مفتی کفایت اللّٰہ کی گرفتاری اسلام آباد کے سیکٹر ای الیون سے عمل میں آئی۔

ڈی آئی جی آپریشنز اسلام آباد کی جانب سے اسلام آباد پولیس کے ہاتھوں مفتی کفایت اللّٰہ کی گرفتاری کی سختی سے تردید کی گئی تھی۔اس کے ساتھ ہی یہ بات بھی سامنے آئی تھی کہ مفتی کفایت اللّٰہ کو مانسہرہ پولیس نے تھری ایم پی او کے تحت اسلام آباد سے گرفتار کر کے ہری پور جیل منتقل کیا تھا۔

مفتی کفایت کی گرفتاری ڈپٹی کمشنر مانسہرہ کیپٹن ریٹائرڈ اورنگزیب حیدر کے حکم پر عمل میں لائی گئی تھی، جن کی جانب سے جاری کیے گئے حکم نامے میں کہا گیا تھا کہ مفتی کفایت اللّٰہ آزادی مارچ کے لیے چندہ اکٹھا کر رہے تھے اور کارنر میٹنگز بھی کر رہے تھے۔
اس سے قبل اپوزیشن کی رہبر کمیٹی کے کنوینر اکرم خان درانی نے جمعیت علمائے اسلام (ف) کے رہنما مفتی کفایت اللّٰہ کی فوری رہائی کا مطالبہ کیا تھا۔

چیئرمین(ایمرا نیوزآن لائن) نیب جسٹس ریٹائرڈ جاوید اقبال کا کہنا ہے کہ کسی کے پیچھے ہمالیہ بھی کھڑا ہے تو اس کی کوئی حیثیت نہیں، اگر کیس بنتا ہو گا تو ضرور کیس بنائیں گے۔

سکھر میں ایک تقریب سے خطاب کرتے ہوئے چیئرمین نیب کا کہنا تھا کہ ہمارا کام کسی حکومت کو عدم استحکام سے دوچار کرنا نہیں، سکھر میں چند آئی اوز پر بددیانتی اور ناقص کارکردگی کی شکایات موجود ہیں۔ انہوں نے کہا کہ اگر کسی پر کیس بنتا ہے تو ہم ضرور بنائیں گے، کسی کے پیچھے ہمالیہ بھی کھڑا ہو تو اس کی کوئی حیثیت نہیں ہے۔

چیئرمین نیب کا کہنا تھا نیب نے دو سال میں 600 سے زائد ریفرنس فائل کیے ہیں، کوشش ہے 900 ارب روپے جلد ریکور کر کے قومی خزانے میں جمع کرائے جائیں۔ انہوں نے کہا کہ نیب نے خود کو آزاد اور خودمختار ادارہ ثابت کیا ہے، ہم کسی بھی شخص کو گرفتار کرنے کے بعد احتساب کا عمل شروع کر دیتے ہیں، کسی بھی شخص کو گرفتار کرنے کے بعد ایک دن کے اندر ہی عدالت میں پیش کیا جا تا ہے۔

ان کا کہنا تھا لوگ کہتے ہیں نیب کسیز کو منطقی انجام تک نہیں پہنچا رہا، ریفرنس عدالت میں فائل کرنے کے بعد یہ منطقی انجام ہے۔ جسٹس ریٹائرڈ جاوید اقبال نے کہا کہ جج صاحبان کی تعداد کم ہے، ہر دور میں تعداد بڑھانے کی درخواست کی ہے، جج صاحبان کی تعداد بڑھنے سے ریفرنسز کا فیصلہ اور 900 ارب قومی خزانے میں جمع ہوسکیں گے۔

انہوں نے کہا کہ کہاجاتا ہے نیب کیس کو طول دیتا ہے، بہت سے جاندار کیس میں ملزم اس لیے بری ہوئے کہ دستاویزی لوازمات نہیں تھے، انتہائی محنت سے بنا کیس تفتیشی افسر کی نا اہلی سے مسترد ہونا برداشت نہیں ہے۔ چیئرمین نیب نے کہا لوگ کہتے ہیں کہ نیب کا احتساب نہیں ہوتا، یہ منفی سوچ ہے، عدالتیں موجود ہیں اور قدم قدم پر نیب کا احتساب ہوتا ہے۔

(ایمرا نیوزآن لائن) مولانا فضل الرحمان کا آزادی مارچ رات بھر جی ٹی روڈ پر سفر کرتا ہوا گوجر خان پہنچ گیا جو آج اپنی منزل اسلام آباد پہنچے گا۔

جے یو آئی (ف) کے سربراہ مولانا فضل الرحمٰن اورآزادی مارچ کے شرکا گوجرہ پہنچنے کے بعد آرام کر رہےہیں اور مارچ کے شرکا کا دوپہر 12 بجے کے بعد اسلام آباد کی جانب مارچ کا امکان ہے جہاں وفاقی دارالحکومت کے پشاور موڑ پر مسلم لیگ (ن) اور پیپلز پارٹی سمیت دیگر اپوزیشن جماعتوں کے ساتھ جے یو آئی کا جلسہ ہونا تھا جسے اب ملتوی کر دیا گیا ہے۔

ترجمان مسلم لیگ ن مریم اورنگزیب کا کہنا ہے کہ آزادی مارچ آج اسلام آباد میں جلسہ گاہ پہنچے گا لیکن سانحہ تیز گام ایکسپریس کی وجہ سے آج کا جلسہ کل تک ملتوی کر دیا گیا ہے۔آزادی مارچ کے پیش نظر اسلام آباد میں نجی اسکولز آج بند .آزادی مارچ کےجلسے کے لیے ایچ نائن میں میٹر و ڈپو گراؤنڈ میں تیاریاں کی گئی ہیں اور مختلف شہروں سے کارکنان کی آمد کا سلسلہ جاری ہے۔

آزادی مارچ کے پیش نظر اسلام آباد میں نجی اسکولز آج بند رہیں گے اور اسلام آباد کی قائد اعظم یونیورسٹی بھی دو دن بند کرنے کا اعلان کرتے ہوئے شیڈولڈ امتحانات ملتوی کر دیے گئے ہیں۔ اس کے علاوہ راولپنڈی کے تمام سرکاری و نجی اسکولز، کالجز اور یونیورسٹیز بھی آج بند رہیں گی جب کہ جڑواں شہروں کے درمیان آج میٹرو بس سروس بھی بند رہے گی۔

آزادی مارچ سے متعلق حکومت کی حکمت عملی بھی تیار
آزادی مارچ سے متعلق حکومت نے حکمت عملی بھی تیار کرلی ہے جس کے تحت مارچ کے جلسہ گاہ پہنچنے تک کوئی رکاوٹ نہیں کھڑی کی جائے گی، دھرنے کی کوشش کی گئی تو حکومت کی مذاکراتی کمیٹی اپوزیشن رہنماؤں سے بات کرے گی اور معاہدے کی خلاف ورزی پر سخت ایکشن ہو گا۔

گزشتہ روز کارکنان سے خطاب کرتے ہوئے مولانا فضل الرحمان نے کہا کہ آج پورا پاکستان اپنا فیصلہ منوائے گا،جس امانت کو لوٹا گیا تھا ہم اس کے لیے نکلے ہیں، عوام دوبارہ ووٹ دے کر صحیح حق دار کا انتخاب کریں گے، موجودہ نااہل حکومت ملک کو معاشی بحران سے نہیں نکال سکتی، اب بھی موقع ہے ناجائز حکومت اقتدار سے دست بردار ہوجائے۔

آزادی مارچ کے شرکاء کے بیچ میں میٹرو بس رواں دواں گزشتہ روز مینار پاکستان لاہور سے اسلام آباد روانگی کے موقع پر بڑا جلسہ عام کیا گیا جس میں ہزاروں افراد نے شرکت کی.مینار پاکستان پر دلچسپ مناظر دیکھنے میں آئے کہ مارچ کے شرکاء قائدین کا خطاب سنتے رہے اور اس دوران میٹرو بس سروس بھی چلتی رہی۔ مارچ کے شرکاء میٹرو بس کی سڑک کے کنارے بیٹھے رہے اور درمیان سے بسوں کے لیے راستہ خالی رکھا جس کے باعث بسیں مسافروں کو لاتی اور لیجاتی رہیں۔

وزیراعظم نے وزرا کو اسلام آباد سے باہر جانے سے روک دیا
وزیراعظم عمران خان نے وفاقی وزرا کو دھرنے کے دنوں میں اسلام آباد سے باہر جانے سے روک دیا اور ہدایت کی ہےکہ آزادی مارچ کے پس پردہ مقاصد میڈیا پر بے نقاب کیے جائیں۔

اسلام آباد کئی شاہراہیں بن: آزادی مارچ کے پیش نظر اسلام آباد کی مختلف شاہراہوں کو کنٹینر لگا کر بند کردیا گیا ہے جب کہ سیکیورٹی کے بھی سخت انتظامات ہیں۔وفاقی دارالحکومت کی انتظامیہ نے شہر میں دفعہ 144 نافذ کررکھی ہے جس کے تحت شہر میں ڈرون استعمال کرنے پر بھی پابندی ہے۔

اسلام آباد(ایمرا نیوزآن لائن) آزادی مارچ کے لیے حکومت کی مذاکراتی ٹیم نے خبردار کیا ہے کہ مارچ والوں نے معاہدہ توڑا تو نتائج کی ذمہ داری ہم پر نہ ہو گی۔

جمعیت علمائے اسلام (ف) کے آزادی مارچ کے لیے حکومتی مذاکراتی ٹیم کے سربراہ و وزیر دفاع پرویز خٹک سمیت دیگر رہنماؤں نے میڈیا سے گفتگو کی۔ وزیر داخلہ پرویز خٹک نے کہا کہ ہم نےجلسےکی اجازت دے کررسک لیا ہے لیکن معاہدہ توڑا گیا تونتائج کی ذمہ داری ہم پرنہ ہوگی۔

انہوں نے کہا کہ جلسے کی جگہ کا انتخاب بھی جے یو آئی نے کیا، ایچ نائن ریڈ لائن ہے۔ پرویز خٹک نے بتایا کہ پشاور، سوات میں بسیں روکی جا رہی ہیں تویہ ہماری مرضی سے نہیں ہورہا، خیبرپختونخوا کے کچھ علاقوں میں انتظامیہ اپنے طور پر کارروائی کررہی ہے مگر امید ہے رہبر کمیٹی وعدہ نہیں توڑے گی۔

رہنما شفقت محمود: مذاکراتی کمیٹی کے رکن شفقت محمود نے کہا کہ ہم نے پریڈ گراؤنڈ تجویزکیا تھا لیکن انہوں نے پشاور موڑ پر آمادگی ظاہر کی، ڈی چوک میں کسی کو نہیں آنے دیں گے، رہبر کمیٹی کی جانب سے معاہدہ توڑا گیا تو عدالتی حکم کی خلاف ورزی ہو گی۔

قومی اسمبلی کے اسپیکر اسد قیصر کا کہنا تھا کہ رہبرکمیٹی نے کہا تھا کہ ہم ہر وعدہ پورا کریں گے، ہمیں امید ہے معا ملات نہیں بگڑیں گے۔ میڈیا سے گفتگو کرتے ہوئے حکومتی مذاکراتی ٹیم کے ایک اور رکن اسد عمر نے کہا کہ جے یو آئی والے جب تک چاہیں اسلام آباد میں بیٹھیں بس کوئی قانون نہ توڑیں۔

انہوں نے کہا کہ اسلام آباد انتظامیہ کو قانون پر عمل درآمد کا مکمل اختیار دے دیا گیا ہے، ہم نے یہ شق ڈالی کہ ملک میں کہیں بھی خلاف ورزی ہوئی تومعاہدہ ٹوٹ جائے گا۔ یاد رہے کہ آزادی مارچ کے حوالے سے حکومت اور جے یو آئی (ف) کےدرمیان معاہدے طے پایا ہے جس کے تحت جمعیت علمائے اسلام (ف) ایچ 9 کے اتوار بازار کے قریب گراؤنڈ میں جلسہ کرے گی۔

اسلام آباد(ایمرا نیوزآن لائن) ہائیکورٹ میں اب دفتری اوقات کے علاوہ بھی ایمرجنسی کیسز سنے جائیں گے۔

اسلام آباد ہائی کورٹ کے ڈپٹی رجسٹرار جوڈیشل کی جانب سے جاری نوٹیفکیشن کے مطابق دفتری اوقات کے بعد عام سائلین کے فوری نوعیت کے کیسز کے لیے 6 افسران کا تقرر کیا گیا ہے۔

اعلامیے میں کہا گیا ہے کہ مجاز افسران دفتری اوقات کے بعد بھی عام سائلین کی سہولت کے لیے دستیاب ہوں گے اور ہنگامی صورت میں ایڈیشنل رجسٹرار نوٹیفکیشن پر دیئے نمبر پر ہر وقت دستیاب ہوں گے۔

مجاز افسران میں ڈپٹی رجسٹرار سلطان محمود، اسسٹنٹ رجسٹرار محمد اسد، اسٹنٹ رجسٹرار شیخ روہان، اسسٹنٹ رجسٹرار محمد عرفان، اسسٹنٹ رجسٹرار شاہد ندیم اور ارباب محمد امجد شامل ہیں۔ نوٹیفکیشن میں کہا گیا ہے کہ قیدی کی جان کو شدید خطرہ ہونے پر دفتری اوقات کے علاوہ بھی سماعت کی جائے گی۔

اعلامیے میں کہا گیا ہے کہ ایسا کیس جس پر چیف جسٹس مطمئن ہوں کہ فوری نوعیت کا ہے وہ بھی چھٹی کے روز سنا جائے گا۔ عدالت کی جانب سے جاری اعلامیے کے مطابق آئی ٹی ڈپارٹمنٹ کو نوٹیفکیشن کی کاپی ہائیکورٹ کی آفیشل ویب سائٹ پر جاری کرنے کی ہدایت کر دی گئی ہے۔

اسلام آباد(ایمرا نیوزآن لائن) وفاقی وزیر داخلہ اعجاز شاہ نے کہا ہے کہ وہ آزادی مارچ پر بالکل نہیں گھبرائے ہوئے کیونکہ جو ڈر گرگیا وہ مر گیا۔

اسلام آباد میں پریس کانفرنس کرتے ہوئے اعجاز شاہ نے کہا کہ جو بھی قانون توڑے گا اس کے خلاف قانون کے مطابق ایکشن ہوگا، جو ڈر گیا وہ مرگیا، میں اس اچھے ماحول کو خراب نہیں کرنا چاہتا لیکن جو کوڈ آف کنڈکٹ کی خلاف ورزی کرے گا قانون کی عملداری کے لیے ایکشن ہوگا۔ وفاقی وزیر داخلہ نے کہا کہ وزیراعظم کے استعفے کا سوال ہی پیدا نہیں ہوتا، اگر تصادم ہوا تب بھی دوبارہ وزیراعظم عمران خان ہی ہوں گے۔

کیا میں یہاں ڈانس کروں: وزیر داخلہ
ایک صحافی سوال کے جواب اعجاز شاہ کا کہنا تھا کہ میں ایسا کیا کروں کہ آپ کو یقین آئے کہ ہم گھبرائے ہوئے نہیں، کیا میں یہاں ڈانس کرکے دکھاؤں کہ آپ کو یقین آئے کہ میں گھبرایا ہوا نہیں۔

وفاقی وزیرداخلہ نے مزید کہا کہ وزیراعظم کی ہدایت ہےکہ کوئی بھی شخص نوازشریف سمیت کسی کی بھی صحت پربات نا کرے، نوازشریف کو 8 ہفتوں کا ریلیف مل گیا، کبھی ایسا پہلے سنا ہے؟ سیاست اس وقت تک ہوتی ہے جب تک زندگی ہوتی ہے، نوازشریف کا نام ای سی ایل پر نہیں۔

اعجاز شاہ نے کہا کہ اسلام آباد میں پہلی مرتبہ مارچ نہیں ہورہا ہے یہ سب سکندر مرزا کے وقت سے ہورہا ہے، کمیٹی میں صرف دھرنے کی جگہ پر بات کی گئی، مارچ کراچی سے گوجر خان پہنچ گیا، ہم نے اسے کہیں نہیں روکا، مولانا کے کنٹینر کے لیے علیحدہ روٹ دیا ہے، دعا ہے وہ خیرخیریت سے ادھر پہنچ جائیں، ہم مکمل سیکیورٹی دیں گے۔

انہون نے کہا کہ احتجاجی مارچ کے باعث حکومت اوراپوزیشن کے درمیان سیاسی تناؤ میں اضافہ ہوا تھا، وزیراعظم نے فیصلہ کیا کہ وہ جمہوری روایات کے تحت احتجاجی مارچ کو نہیں روکیں گے، کچھ عناصر مولانا فضل الرحمان کا کندھا استعمال کرکے حکومت کو ہدف بنانا چاہتے تھے، مولانا احتجاجی مارچ کو اپوزیشن کا مارچ بنانے میں ناکام رہے۔

وزیر مملکت (وقت نیوزآن لائن) برائے ماحولیاتی تبدیلی زرتاج گل نے کہا ہے کہ لاہور کے دنیا کے آلودہ ترین شہروں میں آنے کی اطلاعات بالکل غلط ہیں۔

سماجی رابطے کی ویب سائٹ ٹوئٹر پر انہوں نے اپنے ایک ویڈیو پیغام میں عوام سے اپیل کی ہے کہ وہ غیرمستند اطلاعات پر کان نہ دھریں اور صرف مستند ذرائع پر یقین کریں۔

سوشل میڈیا پر جاری پیغام میں زرتاج گل وزیر کا کہنا تھا کہ چند لوگ اپنے ذاتی مفاد کے لئے عوام کو گمراہ کررہے ہیں۔ وزارت ماحولیات اپنا کام کررہی ہے، اسموگ کی وجوہات پر کافی حد تک قابو پایا جاچکا ہے۔