Archives February 2020

ریاض (ایمرا نیوز آن لائن)
ملائیشیا سے تعلق رکھنے والے خواجہ سرا اور سوشل میڈیا نور سجات کو سعودی عرب میں خواتین کا احرام پہننے کی وجہ سے حراست میں لے لیا گیا۔33 سالہ نور سجات کو عمرے کے لیےسعودی عرب جانے اور وہاں خواتین کا احرام پہننے پر تنقید کا نشانہ بنایا جا رہا ہے یہاں تک کہ وفاقی وزیر برائے مذہبی امور نے بھی اس معاملے پر اپنا رد عمل دے دیا۔
ملائیشیا کی مشہور شخصیت نور سجات طویل عرصے سے اپنی شناخت کے حوالے سے تنازعے کا شکار رہی ہیں، انہوں نے عمرہ ادا کرنے کے لیے تو خود کو مرد کے طور پر ظاہر کیا لیکن حرم شریف اور مسجد نبوی میں انہوں نے خواتین جیسا لباس پہنا اور سوشل میڈیا پر اس کی تائید و تشہیر بھی کی۔یاد رہے کہ نور سجات کے انسٹاگرام پر 15 لاکھ سے زائد فالوورز ہیں جو ان کی روز مرہ کی پوسٹ دیکھتے ہیں۔نور سجات کے اس عمل سے ملائیشیا کے مذہبی امور کے وزیر نے بھی اپنے غم و غصے کا اظہار کیا ہے۔انہوں نے اپنے ایک بیان میں سجات کی جانب سے اٹھائے گئے اقدام پر افسوس کا اظہار کرتے ہوئے کہا کہ انہوں نے سوشل میڈیا پر اس چیز کی تشہیر بھی کی جس سے ملائیشیا اور سعودی عرب کے تعلقات بھی خراب ہوسکتے ہیں۔
غیر ملکی میڈیا رپورٹس کے مطابق وفاقی وزیر کا کہنا تھا کہ سجات کو سعودی پولیس نے اپنی حراست میں لے لیا ہے، انہوں نے مزید کہا کہ اپنی فطرت کی طرف لوٹ آئیں ، دوسروں کا احترام کریں ، مذہب کا احترام کریں اور براہ کرم جس ملک میں آپ جا رہے ہیں ان کے قوانین کا احترام کریں۔پاسپورٹ میں نور سجات کا نام محمد سجاد قمرالزماں تحریر ہے لیکن ان کی جانب سے اٹھائے گئے ایسے قدم سے ملائیشیا کو نقصان پہنچا ہے۔

راولپنڈی(ایمرا نیوز آن لائن)
آرمی چیف جنرل قمر جاوید باجوہ کی زیر صدارت کور کمانڈرز کانفرنس ہوئی جس میں ملکی سلامتی اور سرحدوں کی صورتحال پر غور کیا گیا۔ پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ کی زیر صدارت کور کمانڈرز کانفرنس ہوئی جس میں ملکی سلامتی اور سرحدوں کی صورتحال پر غور کیا گیا، اس کے علاوہ کورکمانڈرز کانفرنس میں عسکری قیادت نے آپریشن ردالفساد کا بھی جائزہ لیا۔

آئی ایس پی آر کے مطابق کانفرنس میں عسکری قیادت نے کہا کہ بھارتی قیادت کے اشتعال انگیز بیانات کے خطے پر منفی اثرات پڑیں گے اور ایسے بیانات خطے کے امن وامان کے لیے بھی نقصان دہ ہیں جب کہ افواج پاکستان کسی بھی مہم جوئی کا جواب دینے کے لیے ہمہ وقت تیارہیں۔

آئی ایس پی آر کے مطابق کور کمانڈرز کانفرنس میں بھارتی ظلم و جبر کا بہادری سے سامنا کرنے پر کشمیریوں کو خراج تحسین پیش کیا گیا۔ اس موقع پر آرمی چیف جنرل قمر جاوید باجوہ نے کہا کہ کشمیریوں کی جدوجہدکامیاب ہوگی، بھارت ظلم و جبر سے کشمیریوں کے حق خودارادیت کو نہیں دباسکتا اور قابض بھارتی فوج کشمیریوں کو حق خودارادیت سے نہیں روک سکتی، کشمیری اقوام متحدہ کی قراردادوں کے مطابق حق خودارادیت لے کررہیں گے۔

لندن(ایمرا نیوز آن لائن)
اسکاٹ لینڈ کے بزرگ اداکار73 سالہ بریان کوکس نے ای ایس میگزین سے بات کرتے ہوئے دعویٰ کیا ہے کہ ہیری اور میگھن خود نہیں گئے انھیں برطانیہ سے نکالا گیا ہے۔بریان کوکس نے کہا کہ میڈیا نے ہیری اور میگھن کو ملک چھوڑنے پر مجبور کیا اور جب وہ ملک چھوڑ چکے ہیں تو ہمیں بے کار میں افسوس نہیں کرنا چاہیے۔ لیکن مجھے اس میں ذرہ بھی شک نہیں کہ ان کو ملک سے نکالاگیا اوران کو نکالنے والوں میں کچھ نسل پرست ہیں۔ ہیری اور میگھن کے ساتھ جو کچھ ہوا یہ انتہائی خوفناک ہے۔

کاکس نے کہا کہ ملکہ الزبتھ ایک حیران کن خاتون ہیں لیکن اس نے جو کیا وہ ناقابل یقین ہے۔ ہم اپنے معاشرے اور نظام سے جاگیردارانہ گرفت کو ختم نہیں کرسکتے۔ دوسری جانب ہیری اور میگھن نے کینیڈا میں اپنی نئی رہائش گاہ میں سیکیورٹی کو مزید سخت کر دیا ہے۔سابق شاہی جوڑے نے وین کوور میں واقع گھر کی بیرونی دیواروں پر جدید کیمرے نصب کرنے کے علاوہ دیواروں پر خاردار تاریں لگا دی ہیں تاکہ وہ برطانوی بادشاہی سے باہر اپنی پرائیویسی اور تحفظ کو مزید بہتر بنا سکیں۔

ادھر امریکی گلوکارہ میڈونا نے ہیری اور میگھن مارکل کو نیو یارک سٹی میں موجود اپارٹمنٹ کی پیش کش کردی۔ میڈونا نے انسٹاگرام پر ایک وڈیو شیئر کی جس میں انہوں نے ہیری، میگھن مارکل اور ان کے بیٹے آرچی کو مین ہیٹن میں موجود دو کمروں پر مشتمل اپارٹمنٹ میں عارضی قیام کی پیش کش کر دی۔ انہوں نے کہا کہ اس اپارٹمنٹ سے وہ مین ہیٹن کے دلکش نظارے دیکھ سکیں گے۔

منیلا(ایمرا نیوز آن لائن)
ایشیائی ترقیاتی بینک نے کورونا وائرس کی روک تھام کئے 20 لاکھ ڈالرکے نئے فنڈ کی منظوری دے دی۔ایشیائی ترقیاتی بینک نے کورونا وائرس کی روک تھام کئے 20 لاکھ ڈالرکے نئے فنڈ کی منظوری دے دی۔ فنڈزسے کمبوڈیا، چین، میانمار، تھائی لینڈ اورویت نام میں جاری علاقائی ٹیکنیکل اسسٹنس میں معاونت ملے گی۔

اے ڈی بی کے مطابق یہ رقم کورونا وائرس کی روک تھام کیلئے انویسٹی گیشن، سرویلیئنس اورہیلتھ سسٹم کو مضبوط بنانے کیلئے سفارشات کی تیاری پراستعمال ہوگی جب کہ کرورونا وائرس کی تشخیص سے متعلق فوری ٹیسٹ اورتجربہ گاہ میں استعمال ہونے والے آلات بھی حاصل کئے جائیں گے۔

صنعا(ایمرا نیوز آن لائن)
امریکی فورسزنے آپریشن میں القاعدہ کے اہم رہنما قاسم الریمی کوہلاک کردیا۔غیرملکی میڈیا کے مطابق امریکی فورسزنے ایک آپریشن میں القاعدہ کے اہم رہنما قاسم الریمی کوہلاک کردیا، جس کی تصدیق امریکی صدرڈونلڈ ٹرمپ کی جانب سے بھی کردی گئی ہے۔قاسم الریمی 2015 سے القاعدہ جزیرہ نما عرب کی سربراہی کررہے تھے جس کا مقصد خطے میں مغربی اثرورسوخ کوختم کرنا اورامریکا کی حمایت یافتہ حکومتوں کوگرانا ہے۔

وائٹ ہاؤس کی جانب سے جاری بیان میں کہا گیا ہے کہ الریمی کی ہلاکت القاعدہ تحریک کو عالمی سطح اورجزیرہ نما عرب میں مزید کمزورکردے گی۔ اس ہلاکت کے بعد ہم اپنے قومی سلامتی کولاحق خطرات کو ختم کرنے کے قریب ہوئے ہیں۔

لاہور(ایمرا نیوز آن لائن)
ابوظہبی سے نجی ایئرلائن کے ذریعے لاہور ائیرپورٹ پر اترنے والے 4 مسافروں میں کرونا وائرس کی تشخیص پائی گئی ہے۔ذرائع کے مطابق ابوظہبی سے نجی ایئرلائن کے ذریعے لاہور آنے والے 4 مسافروں میں کرونا وائرس کی تشخیص پائی گئی ہے، مسافروں میں دو چینی اور دو پاکستانی طالب علم شامل ہیں، فیڈرل ہیلتھ ڈیپارٹمنٹ اور سی ایم ایچ لاہور کے ڈاکٹرز کی ٹیم کی جانب سے مسافروں کی چیکنگ کی گئی جس کے بعد چاروں مسافروں کو سروس ہسپتال منتقل کر دیا گیا جہاں ان کے مزید ٹیسٹ کیے جائیں گے۔

ذرائع نے بتایا ہے کہ ابوظہبی سے اتحاد ائیر کی پرواز ای وائے 243 سے لاہور پہنچنے والے مسافروں میں دوران چیکنگ کرونا وائرس کی تشخیص ہوئی، مسافروں میں چینی شہری نئے وانگ، ہیو لیٹونگ اور پاکستانی طالب علم حارث ستار اور وقار یاسین شامل ہیں۔

اسلام آباد(ایمرا نیوز آن لائن)
وفاقی وزیر فوادچودھری نے وزیرمملکت علی محمد خان کی جانب سے پیش کی گئی اس قرارداد کی شدید مذمت کی ہے جس میں بچوں سے زیادتی کے مجرم کو سرعام پھانسی کی تجویز دی گئی تھی ۔ علی محمد خان نے کہا ہے کہ وزیراعظم عمران خان بھی بچوں سے زیادتی کے مجرموں کو سزائے موت دینے کے حق میں ہیں۔

فواد چودھری نے سماجی رابطے کی ویب سائٹ ٹویٹر پر دیئے گئے بیان میں کہا کہ ’سرعام پھانسی سے متعلق پیش کی گئی قرارداد کی سختی سے مذمت کرتا ہوں ،اس طرح کے قوانین تشدد پسند کرنے والے معاشروں میں بنتے ہیں، معاشرے کو متوازن رہنا چاہئے،بربریت سے آپ جرائم کے خلاف نہیں لڑ سکتے۔یہ انتہاپسندانہ سوچ کاعکاس ہے۔’

واضح رہے کہ آج قومی اسمبلی میں بچوں سے زیادتی کے مجرموں کو پھانسی دینے کی قرارداد کثرت رائے سے منظور کرلی گئی ہے۔قومی اسمبلی میں وزیر مملکت علی محمد خان کی جانب سے بچوں سے زیادتی کے حوالے سے قرارداد پیش کی گئی جس میں مطالبہ کیاگیاکہ بچوں سے زیادتی کے مجرموں کو پھانسی دی جائے۔

قومی اسمبلی نے علی محمد خان کی قرارداد کو کثرت رائے سے منظور کرلیا جبکہ اپوزیشن جماعت پیپلز پارٹی نے قرارداد کی مخالفت کی ہے۔قرارداد کی منظوری کے بعد قومی اسمبلی میں اپنے خیالات کااظہار کرتے ہوئے علی محمد خان نے کہاآج اس قرارداد کو پیش کرنے میں اللہ تعالیٰ نے مدد کی ہے،اللہ تعالیٰ چاہتا کہ ہے کہ ہم اس ملک کو قرآن اور سنت کے مطابق چلائیں۔

علی محمد خان نے کہازینب الرٹ بل پیش ہوا تو قومی اسمبلی کی انسانی حقوق کی کمیٹی نے سزائے موت کی مخالفت کی، اس کمیٹی کے چیئرمین بلاول بھٹو ہیں ۔حکومت اب بھی بچوں سے زیادتی کے مجرموں کو سزائے موت کا قانون بنانا چاہتی ہے۔انہوں نے کہا کہ وزیراعظم عمران خان بھی بچوں سے زیادتی کے مجرموں کی سزائے موت چاہتے ہیں۔