Archives November 2018

(نیٹ نیوز/ایمرا نیوز)
پاکستان کے دیہی علاقوں کی خوبصورتی دیکھنی ہے تو اس امریکی سیاح کی یہ دلچسپ ویڈیو دیکھیں جس نے پاکستان کے دیہی علاقوں سے سیر کا ارادہ کیا اور نہ صرف ان علاقوں کی خوبصورتی سے بیحد متاثر ہوا بلکہ مقامی افرا دکی مہمان نوازی نے بھی سیاح کو حیران کر دیا۔ مارک ویئن نامی یہ سیاح جب ایک مقامی گاؤں پہنچا تو وہاں کے لوگوں نے مارک کی خوب آؤ بھگت کی۔سرسوں کا ساگ، مولی کے پراٹھے،آلو پوری، چھولے ،مکئی کے روٹی ، لسی،بادام،سبزمرچوں کا اچار، سوجی کا مزیدار حلوہ اور دیگر مزے مزے کے کھانوں کی دعوت کی گئی۔جس میں مارک نے ایک ایک لقمہ نہایت لطف اندوز ہو کر کھایا اور اپنی انگلیاں چاٹنے پر مجبور ہو گیا۔بعد ازاں سیاح نے ٹریکٹر بھی چلایا اور دیہی علاقوں میں سیر کو اپنی زندگی کا بہترین تجربہ قرار دیا۔اس دلچسپ ویڈیو نے سوشل میڈیا پر بھی خوب دھوم مچائی اور جس نے پاکستانی دیہی علاقوں کی سیر پر مبنی یہ دلچسپ ویڈیو دیکھی سراہے بغیر نہ رہ پایا۔

(نیٹ نیوز/ایمرا نیوز)
ویڈیو میں دیکھا جا سکتا ہے کہ دوران پرواز جب پائلٹ کو معلوم ہوا کہ اسی پرواز میں ان کے استاد بھی سفر کر رہے ہیں تو اس نے اپنے ٹیچر کا شکریہ ادا کرنے اور انہیں خراج تحسین پیش کرنے کا اہتمام کیا۔ترکش ایئرلائن کے ایک پائلٹ نے دوران پرواز اپنے استاد کو انوکھے انداز میں خراج تحسین پیش کیا۔

Turkish Airlines pilot thanks his school teacher who was on board the flight. Very moving and shows the ultimate respect to the educators who shape our lives. pic.twitter.com/loEvkLQh3m

— Ihtisham Ul Haq (@iihtishamm) November 28, 2018

پائلٹ نے جہاز کے عملے کو گلدستہ دے کر استاد کی نشست پر بھیجا اور خود کاک پٹ سے مائیک پر ان کو مخاطب کرکے شکریہ ادا کیا اور ساتھ ہی اپنی کامیابی کا سارا کریڈٹ بھی انہیں دیا۔اپنے طالب علم کی جانب سے تشکر کا اظہار سن کر استاد تو آب دیدہ ہوئے ہی، جہاز میں موجود دیگر مسافر بھی جذباتی نظر آئے جس کے بعد جہاز کے عملے نے پائلٹ کے استاد کو گلدستہ پیش کرکے ان کا ہاتھ چوم کر مصافحہ کیا۔ پائلٹ خود استاد کے پاس آئے اور ان سے اپنی محبت کا اظہار کیا۔

لاہور(ایمرا نیوز) یاکٹاس شہر روس میں واقع ہے اور یہ شہر خطرے کے پرستاروں کے نام سے بھی مشہور ہے جو ملک سائبیریا اور کامچٹکا کے درمیان واقع ہے. یہ دنیا کے سب سے سرد شہر کے طور پر بھی جانا جاتا ہے. علاقے میں 200،000 سے زائد افراد علاقے میں رہتے ہیں اور خطے کی کان کنی کی صنعت میں ایک زندہ رہتی ہیں، اور اس انتہائی سرد شہر میں متعدد تھیٹر، عجائب گھروں اور یہاں تک کہ ایک چڑیا واقع ہے.

لاہور(ایمرا نیوز) دنیا میں آپ بہت عجیب وغریب انسانوں اور واقعات کو دیکھتے ہیں لیکن کیا آپ جانتے ہیں کہ دنیا میں ایک ایسی لڑکی بھی ہے جو 500 سال سے جمی ہوئی ہے،جی اس لڑکی کو ارجنٹان سے 1999 میں دریافت کیا تھا.اس کا مجسمہ ارجنٹان میں ایک عجیب گھر میں رکھا گیا ہے، اس لڑکی کا نام لا دوسیلا ہے.اس لڑکی کا جسم بلکل ایک ممی کی طرح بن گیا ہے،یہ لڑکی غلطی سے ایک ایسے مقام پر چلی گئی تھی جہاں بہت زیادہ سردی تھی جس کی وجہ سے اس کا جسم جم گیااور کئی سالوں تک وہیں جما رہا،جس کی وجہ سے یہ لڑکی جم گئی اور آج تک جمی ہوئی ہے.

اسلام آباد: (نیٹ نیوز/ایمرا نیوز) فواد چودھری کا کہنا ہے امن کیلئے راستے کھولنے چاہیں، لہولہان کشمیریوں کی تصاویر آتی ہیں تو یہ راستہ کٹھن ہوجاتا ہے، خطے کا مفاد پاکستان اور بھارت کے اچھے تعلقات میں ہیں۔وفاقی وزیر اطلاعات فواد چودھری نے تقریب سے خطاب کرتے ہوئے کہا کشمیر میں پاکستان کی حمایت بہت زیادہ ہے، ہندوستان کشمیر پر اپنا تسلط رکھنا چاہتا ہے، کشمیریوں کو جب تکلیف ہوتی ہے تو ہمیں درد محسوس ہوتا ہے۔ انہوں نے کہا واحد راستہ امن ہے، دروازے امن کیلئے بنائے ہیں، کشمیریوں سے ہمارا دل کا رشتہ ہے، کشمیر کا معاملہ انسانیت کی نظر سے دیکھتے ہیں۔فواد چودھری کا کہنا تھا بھارت یہ باور کر لے کہ کشمیر کو فوج فتح نہیں کرسکتی، کشمیر میں مظالم سے امن کا راستہ کٹھن ہو جاتا ہے۔

ممبئی:(شوبز ڈیسک/ایمرا نیوز) بھارت میں فلموں کو آن لائن لیک کرنے والی غیرقانونی ویب سائٹ ’تمل روکرز‘ نے فلم 2.0 کو ریلیز کے چند گھنٹوں بعد ہی لیک کرکے اپنی دھمکی پر عمل کردکھایا۔گزشتہ ماہ غیر قانونی ویب سائٹ ’تمل روکرز‘ نے سپراسٹار رجنی کانت اوراکشے کمار کی فلم ’2.0‘ کو آن لائن لیک کرنے کی دھمکی دی تھی۔ غیرقانونی ویب سائٹ کی انتظامیہ کی دھمکی کو سنجیدگی سے لیتے ہوئے بھارتی عدالت نے انٹرنیٹ سروس مہیا کرنے والی کمپنیوں کو فلموں کو آن لائن لیک کرنے والی ویب سائٹس کے خلاف کارروائی کا حکم دیا تھا تاہم ’تمل روکرز‘ کو کسی کا خوف نہیں، عدالتی احکام کے باوجود اس نے اپنی دھمکی پر عمل کردکھایا اور فلم ریلیز کے چند گھنٹوں بعد ہی 2 ڈی ورژن میں لیک کردی۔فلم آن لائن لیک ہونے پرآسکرایوارڈ یافتہ موسیقارریسول پوکوٹی نے غصے کا اظہار کرتے ہوئے رجنی کانت کے مداحوں سے فلم لیک کرنے والوں کو سبق سیکھانے کا مطالبہ کیا ہے۔ دوسری جانب فلم لیک ہونے سے اس کا اثرفلم کے بزنس پر پڑے گا جس سے فلم کوکروڑوں کو دھچکا لگے گا۔واضح رہے کہ تقریباً ساڑھے 5 سو کروڑکے بجٹ سے بننے والی فلم ’2.0‘ اب تک کی بھارت کی مہنگی ترین فلم ہے جو گزشتہ روز ریلیزکی گئی ہے۔ بھارتی تجزیہ نگار رامیش بالا کے مطابق فلم نے ریلیز کے پہلے روز’ٹھگ آف ہندوستان‘کا ریکارڈ توڑتے ہوئے تقریباً 58 کروڑ کی کمائی کی ہے جب کہ عامر خان کی فلم نے 52 کروڑ کمائے تھے۔

لاہور:(سپورٹس ڈیسک/ایمرا نیوز) پاکستان سپر لیگ کے چوتھے ایڈیشن کے لیے ایونٹ میں شامل چھٹی ٹیم کے لیے پیشکشیں طلب کرلی گئیں۔ پاکستان کرکٹ بورڈ کے مطابق پی ایس ایل کی چھٹی ٹیم کی نیلامی میں حصہ لینے کے لیے فارم 14 دسمبر تک لیے جاسکتے ہیں جسے 18 دسمبر تک جمع کرایا جاسکے گا۔پی سی بی کا کہنا ہے کہ نیلامی کے نتائج کا اعلان 18 دسمبر کی سہہ پہر کیا جائے گا۔یاد رہے کہ پاکستان سپر لیگ کے تیسرے ایڈیشن میں شامل ہونے والی چھٹی ٹیم ‘ملتان سلطان’ 52 کروڑ میں فروخت ہوئی تھی، اس سال ڈرافٹ سے قبل پی سی بی کو بینک گارنٹی اور فرنچائز فیس نہ دینے کے باعث مالکانہ حقوق سے دست بردار ہو گئی تھی۔تحریک انصاف کے رہنما جہانگیر ترین کے صاحبزادے علی ترین نے چھٹی ٹیم کی خریداری میں دلچسپی ظاہر کی ہے اور اس حوالے سے وہ پرامید ہیں کہ اگر وہ ٹیم کے مالکانہ حقوق حاصل کرنے میں کامیاب رہے تو اس کا نام ملتان سلطان برقرار رہے گا۔

اسلام آباد:(نیٹ نیوز/ایمرا نیوز) سپریم کورٹ آف پاکستان نے گلگت بلتستان کے وزیر سیاحت فدا حسین کو اسلام آباد ایئرپورٹ کے عملے سے بدتمیزی کرنے کے معاملے پر تحریری معافی نامہ جمع کروانے کا حکم دے دیا۔خیال رہے کہ خراب موسم کے باعث پرواز منسوخ ہونے پر گلگت بلتستان کے وزیر سیاحت فدا حسین نے گذشتہ دنوں اسلام آباد ایئرپورٹ پر احتجاجاً اپنی جیکٹ جلائی تھی اور پی آئی اے حکام کے ساتھ بدتمیزی بھی کی تھی۔واقعے کی ویڈیو سوشل میڈیا پر وائرل ہونے کے بعد 16 نومبر کو چیف جسٹس نے ازخود نوٹس لیا تھا، تاہم 17 نومبر کو ہونے والی گذشتہ سماعت پر صوبائی وزیر فدا حسین کی عدم موجودگی کی بناء پر سماعت ملتوی کردی گئی تھی۔چیف جسٹس آف پاکستان جسٹس ثاقب نثار کی سربراہی میں سپریم کورٹ کے 3 رکنی بینچ نے آج ازخود نوٹس کیس کی سماعت کی۔سماعت کے دوران عدالت میں واقعے کی موبائل ویڈیو کو اسکرین پر چلایا گیا۔چیف جسٹس نے گلگت بلتستان کے وزیر سیاحت فدا حسین سے استفسار کیا کہ ‘آپ پڑھے لکھے آدمی ہیں؟کیا آپ نے دھکے مارے؟’فدا حسین نے جواب دیا کہ ‘جی میں نے دھکے مارے’۔جس پر چیف جسٹس نے استفسار کیا کہ ‘کیا آپ اُس وقت ہوش میں تھے؟’جسٹس ثاقب نثار نے ریمارکس دیئے کہ ‘آپ نے کار سرکار میں مداخلت کی، ایئرپورٹ پر ایک غریب آدمی کی تضحیک کی گئی، آئی جی پولیس کو بلا کر آپ پر پرچہ درج کرائیں گے’۔ساتھ ہی چیف جسٹس نے کہا کہ ‘پنجاب پولیس وزیر پر مقدمہ درج کرے اور تفتیش کرے’۔جس پر وزیر سیاحت گلگت بلتستان نے موقف اختیار کیا کہ ‘میرا دھکے دینے کا مقصد بد نیتی پر مبنی نہیں تھا، میں نے دھکا دیا لیکن اس کے پیچھے ایک کہانی ہے’۔وزیر سیاحت فدا حسین نے مزید کہا کہ ‘دو دن سے پرواز گلگت نہیں بھیجی جا رہی تھی، میں اپنے رویے پر معذرت خواہ ہوں’۔سماعت کے بعد چیف جسٹس پاکستان نے گلگت بلتستان کے وزیر سیاحت فدا حسین کو تحریری معافی جمع کرانے کا حکم دے دیا۔

برسبین:(نیٹ نیوز/ایمرا نیوز) آسٹریلوی سائنسدانوں نے دریافت کیا ہے کہ ڈپریشن کے علاج میں عام استعمال ہونے والی دوائیں بھی جرثوموں میں اینٹی بایوٹکس کے خلاف مزاحمت بڑھا کر انہیں غیرمعمولی طور پر مضبوط بنا رہی ہیں۔ اگرچہ ماضی میں ڈپریشن کی دواؤں (اینٹی ڈپریسینٹس) کے مختلف منفی اثرات سامنے آتے رہے ہیں مگر اِن کا تعلق انسان کی دماغی اور جسمانی صحت ہی سے تھا۔ لیکن یہ پہلا موقعہ ہے کہ جب ان کا تعلق جرثوموں (بیکٹیریا) میں اینٹی بایوٹکس کے خلاف مزاحمت سے بھی دیکھنے میں آیا ہے۔

برسبین، آسٹریلیا کی یونیورسٹی آف کوینزلینڈ میں ’’ایڈوانسڈ واٹر مینیجمنٹ سینٹر‘‘ سے وابستہ جیانہوا گوو اور ان کے ساتھیوں نے ’’ای کولائی‘‘ نامی جرثومے پر تحقیق کے دوران یہ تشویشناک دریافت کی ہے۔ کئی ماہ تک جاری رہنے والی اس تحقیق سے معلوم ہوا کہ ڈپریشن کی عام اور مقبول دواؤں میں شامل ایک اہم مرکب ’’فلوکسیٹائن‘‘ (fluoxetine) سے صرف تیس دن تک سامنا ہونے پر جرثوموں میں انتہائی مؤثر اینٹی بایوٹکس کے خلاف مزاحمت میں 5 کروڑ گنا تک اضافہ ہوسکتا ہے۔ یقیناً یہ بہت خطرے کی بات ہے۔البتہ، تجربہ گاہ کے ماحول میں یہ تحقیق صرف ای کولائی بیکٹیریا پر کی گئی ہے جبکہ ابھی اسے دیگر اقسام کے جرثوموں پر، خاص کر بیماریاں پھیلانے والے جراثیم پر آزمایا جانا باقی ہے۔واضح رہے کہ قبل ازیں ماہرین کی یہی ٹیم ہینڈ واش اور ٹوتھ پیسٹ کے ایک عام جزو ’’ٹرائی کلوسان‘‘ پر تحقیق کرکے ثابت کرچکی ہے کہ اس کے باقاعدہ استعمال سے جراثیم میں اینٹی بایوٹکس کے خلاف مزاحمت بڑھ جاتی ہے۔ البتہ، تازہ تحقیق کہیں زیادہ تشویشناک ہے کیونکہ اس سے ایک طرف تو یہ پتا چلتا ہے کہ فلوکسیٹائن کی حامل 11 فیصد دوائیں ہمارے جسم میں پہنچنے کے بعد بالکل بھی تبدیل نہیں ہوتیں تو دوسری جانب یہ بھی معلوم ہوا ہے کہ جتنے لمبے عرصے تک جرثوموں کا سامنا فلوکسیٹائن سے رہے گا، جرثوموں میں اینٹی بایوٹکس کے خلاف مزاحمت بھی اسی قدر بڑھتی جائے گی۔اس تحقیق کی تفصیلات ریسرچ جرنل ’’اینوائرونمنٹ انٹرنیشنل‘‘ کے تازہ شمارے میں شائع ہوئی ہیں۔

ممبئی(شوبز ڈیسک/ایمرا نیوز) بالی ووڈ اداکارہ پریانکا چوپڑا اور گلوکار نک جونس اپنی شادی کی تیاریوں میں دپیکا اور نویر کے نقش قدم پر چلتے دکھائی دے رہے ہیں کیونکہ اب انہوں نے دیپ ویر کی طرح اپنی شادی میں بھی موبائل فون کے استعمال پر پابندی لگادی ہے۔ٹائمز آف انڈیا کی رپورٹ کے مطابق چند روز قبل شادی کے بندھن میں بندھنے والے اداکار رنویر سنگھ اور اداکارہ دپیکا پڈوکون نے اپنی شادی پر موبائل فون کے استعمال پر پابندی عائد کی تھی تاکہ شادی کی تصاویر سوشل میڈیا پر لیک نہ ہوجائیں اور اب دیسی گرل پریانکا نے بھی تصاویر لیک ہوجانے کے ڈر سے یہی طریقہ اپنایا ہے۔

بھارتی میڈیا کا کہنا ہے دونوں اسٹارز نے اپنی شادی کی تصاویر کے حقوق ایک بین الاقوامی میگزین کوتقریباً 33 کروڑ روپے میں فروخت کیے ہیں۔ لہٰذا شادی کی تقریب میں اس بات کا سختی سے خیال رکھاجائے گا کہ کوئی بھی مہمان اپنے موبائل سے تصاویر نہ کھینچ سکے۔اس سے قبل پریانکا چوپڑا اور نک جونس دپیکا اور رنویر کے ہی نقشے قدم پر چلتے ہوئے دو شادیاں کرنے کا اعلان بھی کر چکے ہیں۔ میڈیا رپورٹس کے مطابق یہ جوڑا 2 دسمبر کو ’ہندو‘ رسم و رواج کے مطابق شادی کرے گا اور اگلے ہی دن یعنی 3 دسمبر کو ان کی شادی ’عیسائی‘ رسم و رواج کے تحت ہوگی جبکہ دونوں شادیاں ایک ہی مقام پر منعقد کی جائیں گی۔واضح رہے پریانکا چوپڑا اورنک جونس کی شادی کی تقریبات کا آغاز آج سے ہوگیا ہے جوکہ 3 دسمبر تک جاری رہے گا جبکہ ان کی شادی بھارت کے شہر جودھ پور کے تاریخی مقام ’امید بھون‘ پیلس میں ہوگی۔