Archives June 2021

امریکی ٹینس اسٹار سرینا ولیمز ومبلڈن ٹینس چیمپئن شپ کے پہلے ہی راؤند میں باہر ہو گئیں۔

سرینا ولیمز ومبلڈن کے پہلے راؤنڈ کے میچ کے دوران انجری کا شکار ہو گئیں جس کے باعث انہیں میچ ادھورا چھوڑنا پڑ گیا۔

سرینا ولیمز اس وقت انجری کا شکار ہوئیں جب پہلے سیٹ میں مقابلہ تین، تین سے برابر تھا۔

امریکی ٹینس اسٹار ومبلڈن کے پہلے ہی راؤنڈ میں باہر ہونے پر رو پڑیں اور ان کا کہنا تھا کہ میرا دل ٹوٹ گیا ہے، دائیں ٹانگ میں انجری کے باعث مجھے باہر ہونا پڑا۔

یاد رہے کہ 20 برسوں میں یہ پہلا موقع ہے کہ سرینا ولیمز چیمپئن شپ کے پہلے راؤنڈ سے آگے نہ جا سکیں۔

لاہور: پاکستان ہاکی فیڈریشن نے بیس کھلاڑیوں کو سینٹرل کنٹریکٹ دینے کا اعلان کردیا۔ ہر ماہ کے آخر میں فٹنس ٹیسٹ کے بعد کنٹریکٹ لسٹ اپ ڈیٹ ہوا کرے گی۔

نیشنل ہاکی اسٹیڈیم میں سلیکشن کمیٹی کے سربراہ منظور جونئیر اور ہیڈ کوچ خواجہ محمد جنید نے پریس کانفرنس کرتے ہوئے سینٹرل کنٹریکٹ کے طریقہ کار کے بارے میں روشنی ڈالی۔

منظور جونئیر اور خواجہ جنید نے بتایا کہ فٹنس کا معیار برقرار رکھنے والوں کو ہی ماہانہ اعزازیہ دیا جائے گا۔ لیگ کھیلنے والے جو کنٹریکٹ کے خواہشمند ہوں گے، انہیں بھی ہر ماہ فٹنس ٹیسٹ دینا ہوں گے۔جو لڑکے کنٹریکٹ نہیں لینا چاہتے، انہیں بھی کیمپ میں مدعو کیا جاسکتا ہے، وہ بھی ٹیم کے لیے زیر غور ہوں گے۔ ٹرائلز میں تیس کھلاڑیوں کو مدعو کیا جائے گا، ان میں سے بیس کھلاڑیوں کو کنٹریکٹ ملے گا۔

پاکستان میں فٹبال کے حوالے سےایک اچھی خبر سامنے آگئی، پی ایس ایل کی طرز پر ملک میں فٹبال لیگ کا انعقاد ہوگا، معروف غیرملکی فٹبالرزبھی پاکستان پہنچ کر ایکشن میں نظر آئیں گے۔

مشہورپروفیشنل فٹبالر اورسابق قومی کپتان کلیم اللہ خان نے تصدیق کی ہے کہ اپنی طرزکی پہلی فٹبال لیگ کے انعقاد کے لیے انتظامات اور اقدامات کیے جا رہے ہیں، نمائندہ ایکسپریس سے گفتگو کرتے ہوئے کلیم اللہ نے بتایا کہ لیگ کا انعقاد کراچی میں ہوگا، لیگ کے مقابلے پیپلزاسپورٹس کمپلیکس کے فٹبال اسٹیڈیم میں ہوں گے۔

انگلش پریمیئر فٹبال لیگ میں فلہم کلب کی نمائندگی کرنے والے انگلش فٹبالر چارلس کائے بنیا سیمت دیگر مشہورغیرملکی کھلاڑیوں نے پاکستان آنے کی حامی بھرلی ہے، لیگ میں حصہ لینے کے لیے مزید غیرملکی فٹبالرز سے رابطوں کا سلسلہ جاری ہے اور اس ضمن میں مثبت پیش رفت متوقع ہے۔
ایک سوال کے جواب میں کلیم اللہ نے کہاکہ انٹرنیشنل فٹبال لیگ کے حوالے سے جلد ہی کراچی میں پریس کانفرنس میں تفصیلات سامنے لائی جائیں گی،سابق قومی کپتان کا کہنا ہے کہ امید ہے کہ ملک میں فٹبال کے معاملات لیگ کے انعقاد میں رکاوٹ نہیں بنیں گے جبکہ عوامی کھیل کی بقا اور ترقی کے لیے بھرپور تعاون کی امید ہے۔

فٹبال کے کھیل کا مشہور ایونٹ یورو 2020 اب فیصلہ کن مرحلے میں داخل ہو چکا ہے۔ 8 ٹیمیں کوارٹر فائنل میں پہنچ چکی ہیں، پہلا مقابلہ سپین اور سوئٹزرلینڈ کے درمیان ہوگا۔

غیر ملکی میڈیا کے مطابق بروز جمعہ مورخہ 2 جولائی کو سینٹ پیٹرزبرگ میں دونوں ٹیموں سوئٹزرلینڈ اور سپین کے درمیان میدان سجے گا جبکہ میونخ میں بیلجیئم اور اٹلی کی ٹیمیں میدان میں اتریں گی۔

ہفتے کے روز آذربائیجان کے دارالحکومت باکو میں چیک ری پبلک اور ڈنمارک کی ٹیموں کے درمیان تیسرا کوارٹر فائنل میچ ہوگا جبکہ چوتھا میچ روم میں یوکرین اور انگلینڈ کے درمیان کھیلا جائے گا۔

یورو کپ 2020 کے دونوں سیمی فائنلز بالترتیب 6 اور 7 جولائی کے روز لندن میں کھیلے جائیں گے جبکہ فائنل مقابلہ بھی اسی تاریخی شہر میں منعقد ہوگا۔ خیال رہے کہ یورو کپ کا شمار ورلڈ کپ کے بعد فٹبال کا دوسرا بڑا ایونٹ سمجھا جاتا ہے۔

سپین 3 مرتبہ یورو کپ کا فائنل جیت چکی ہے جبکہ ڈنمارک، چیک ری پبلک اور اٹلی دوسری مرتبہ یہ ٹائٹل اپنے نام کرنے کی کوشش کریں گی۔ کوارٹر فائنل میں پہنچنے والی ٹیمیں یوکرین، بیلجئیم، انگلینڈ اور سوئٹرزلینڈ آج تک ٹرافی نہیں جیت سکی ہیں۔

’آسکر اور ایمی ایوارڈز‘ یافتہ فلم ساز شرمین عبید چنائے کی صنفی بنیادی حقوق پر بنائی گئی دستاویزی فلم سیریز نے امریکا کے ’ڈے ٹائم ایمی ایوارڈز‘ میں دو نامزدگیاں حاصل کرلیں۔

’ڈے ٹائم ایمی ایوارڈز‘ امریکا کی ٹیلی وژنز سمیت وہاں پر ڈیجیٹل پلیٹ فارم پر ریلیز ہونے والے ڈراموں، فلموں اور دستاویزی فلموں سمیت شوز کو دیے جانے والا سب سے بڑا ایوارڈ ہے۔

’ڈے ٹائم ایمی ایوارڈز‘ کی رواں برس 48 ویں تقریب منعقد کی جائے گی، جس کے لیے امریکا میں ریلیز ہونے والے ڈراموں، فلموں، دستاویزی فلموں اور شوز کی نامزدگیوں کا اعلان کردیا گیا۔

اہم ترین ایوارڈ کے لیے جہاں امریکا سمیت دنیا کے دیگر ممالک کے فلم سازوں کی ڈاکیومینٹریز، فلمیں اور سیریز نامزد ہوئیں، وہیں پاکستانی فلم ساز شرمین عبید چنائے کی بھی عالمی سیریز دو ایوارڈز کے لیے نامزد کی گئی ہے۔

شرمین عبید چنائے نے اپنی سوشل میڈیا پوسٹس میں بتایا کہ ان کے اداروں کی جانب سے ان کی ہدایت کاری میں تیار کی گئی عالمی سیریز ’فنڈامینٹل، جینڈر جسٹس: نو ایکسیپشن‘ کو ’ڈے ٹائم ایمی ایوارڈز‘ کی دو کیٹیگریز میں نامزد کیا گیا ہے۔

فلم ساز نے بتایا کہ ان کی جانب سے تیار کی گئی عالمی سیریز کو ایوارڈز کی دو کیٹیگریز ’بیسٹ ڈائریکٹنگ ٹیم، سنگل کیمرہ: نان فکشن‘ اور ’بیسٹ شارٹ فلم، نان فکشن‘ کے لیے نامزد کیا گیا ہے۔

مذکورہ دونوں کیٹیگریز میں شرمین عبید چنائے کی سیریز کا مقابلہ 4 دیگر نان فکشن سیریز سے ہوگا۔

’ڈے ٹائم ایمی ایوارڈز‘ فکشن، نان فکشن، چلڈرن، اینیمیشن اور اسپینش زبان‘ کی کیٹیگریز میں مجموعی طور پر 56 کیٹیگریز میں ڈراموں، فلموں اور ڈاکیومینٹریز سمیت سیریز کو نامزد کیا ہے۔

مذکورہ ایوارڈز کی ہر کیٹیگری میں پانچ فلموں، ڈراموں یا دستاویزی فلموں کو نامزد کیا گیا ہے، جس میں سے کسی ایک کو ایوارڈ کے لیے منتخب کیا جائے گا اور فاتحین کا اعلان آئندہ ماہ جولائی میں کیا جائے گا۔

شرمین عبید چنائے کی سیریز ’فنڈامینٹل، جینڈر جسٹس: نو ایکسیپشن‘ کو پانچ حصوں میں گزشتہ برس ’یوٹیوب اوریجنل‘ پر ریلیز کیا گیا تھا۔

مذکورہ سیریز کو شرمین عبید چنائے فلمز نے عالمی فنڈ ’گلوبل فنڈ فار وویمن‘ کے تعاون سے تیار کیا تھا اور سیریز میں پاکستان سمیت پانچ مختلف ممالک کی خواتین کی حقیقی کہانیاں دکھائی گئی تھیں۔

مذکورہ سیریز کو پاکستان، برازیل، امریکا، کینیا اور جارجیا میں شوٹ کیا گیا تھا اور سیریز کی تمام پانچ ہی ڈاکیومینٹریز کی ہدایات شرمین عبید چنائے نے دی تھیں۔

’شہنشاہ جذبات‘ کہلائے جانے والے لیجنڈری بولی وڈ اداکار یوسف خان المعروف دلیپ کمار کو سانس لینے میں مشکلات کے باعث ایک ہی مہینے میں دوسری مرتبہ ہسپتال منتقل کردیا گیا۔

دلیپ کمار کو رواں برس 6 جون کو بھی سانس لینے میں مشکلات کے باعث ہسپتال منتقل کیا گیا تھا، جہاں انہیں ایک ہفتے تک انتہائی نگہداشت کے وارڈ (آئی سی یو) میں رکھا گیا تھا۔

دلیپ کو ایک ہفتے تک ہسپتال میں رکھے جانے کے بعد ان کے پھیپھڑوں سے پانی نکال کر انہیں 11 جون کو گھر جانے کی اجازت دی گئی تھی۔

تاہم اب ایک مرتبہ پھر انہیں سانس لینے میں تکلیف کے باعث ہسپتال منتقل کرکے آئی سی یو میں داخل کردیا گیا۔

’انڈین ایکسپریس‘ کے مطابق دلیپ کمار کو 30 جون کو دوبارہ سانس میں تکلیف کے باعث ممبئی کے ہندوجا ہسپتال منتقل کیا گیا۔

رپورٹ کے مطابق دلیپ کمار کو آئی سی یو میں رکھا گیا ہے مگر ان کی حالت خطرے سے باہر ہے اور ان کی طبیعت کو مانیٹر کیا جا رہا ہے۔

رپورٹ میں بتایا گیا کہ زائد العری کے باعث اداکار کو گھر میں سانس لینے میں مشکلات پیش آ رہی تھیں، جس کی وجہ سے ان کے اہل خانہ نے انہیں گھر کے بجائے ہسپتال منتقل کرنے کا فیصلہ کیا۔

رپورٹ کے مطابق دلیپ کمار کو وہی پرانا طبی مسئلہ درپیش ہے اور گھبرانے کی کوئی بات نہیں، ان کی صحت کی مانیٹرنگ کے بعد ان کا علاج شروع کردیا گیا۔

اسی حوالے سے ’ٹائمز آف انڈیا‘ نے بتایا کہ دلیپ کمار کو گزشتہ شب ہی ہندوجا ہسپتال منتقل کیا گیا تھا، انہیں ایک مرتبہ پھر سانس لینے میں مشکلات کی شکایت تھی۔

رپورٹ کے مطابق لیجنڈری اداکار کو کورونا فری آئی سی یو وارڈ میں رکھا گیا ہے، جہاں ان کی طبیعت بہتر بتائی جا رہی ہے۔

دلیپ کمار کی تازہ صحت سے متعلق ان کے ٹوئٹر اکاؤنٹ سے 30 جون کی صبح تک کوئی ٹوئٹ نہیں کی گئی تھی۔

لیجنڈری بولی وڈ اداکار رواں ماہ ہسپتال میں داخل ہونے سے قبل بھی متعدد مرتبہ ہسپتال میں داخل ہو چکے ہیں لیکن ایک سے دو ہفتوں میں طبیعت بہتر ہونے پر انہیں گھر منتقل کیا جاتا رہا ہے۔

طویل العمری کی وجہ سے دلیپ کمار کو چند سال سے سانس لینے میں مشکلات سینے میں تکلیف، پھیپھڑوں اور گردوں کے مسائل کی وجہ سے ہسپتال داخل کرایا جاتا رہا ہے۔

دلیپ کمار ایک دہائی سے ہر طرح کی تقریبات سے دور ہیں اور زائد العمری و بیماری کی وجہ سے گھر پر ہی رہتے ہیں۔

پشاور میں 11 دسمبر 1922 کو پیدا ہونے والے دلیپ کمار کا اصل نام یوسف خان ہے اور انہوں نے 1944 میں 22 سال کی عمر میں فلم ‘جوار بھاٹا’ سے فلمی دنیا میں قدم رکھا۔

وہ ‘انداز’، ‘داغ’، ‘رام اور شام’، ‘نیا دور’، ‘مدھومتی’ ’دیوداس‘ اور ‘آدمی’ جیسی کئی سپر ہٹ فلموں کا حصہ رہے ہیں۔

انہوں نے بہت سی فلموں میں مختلف قسم کے کردار ادا کیے لیکن ‘مغل اعظم’ میں ان کی رومانوی اداکاری اور ‘رام اور شام’ میں ان کے کردار کو آج بھی بہت پسند کیا جاتا ہے۔

ان کی آخری فلم ‘قلعہ’ 1998 میں ریلیز ہوئی تھی, دلیپ کمار کو 1991 میں پدمابھوشن، 1994 میں دادا صاحب پھالکے اور 2015 میں پدماوی بھوشن ایوارڈ سے نوازا جا چکا ہے۔

معروف بولی وڈ اداکار 70 سالہ نصیر الدین شاہ کو طبیعت میں خرابی کے باعث ممبئی کے نجی ہسپتال منتقل کردیا گیا۔

ٹائمز آف انڈیا کے مطابق نصیر الدین شاہ کو 29 جون کو پھیپھڑوں میں تکلیف کے باعث ہندوجا ہسپتال منتقل کیا گیا تھا، جہاں ان کا علاج جاری ہے۔

رپورٹ میں اداکار کے منیجر کا حوالہ دیتے ہوئے تصدیق کی گئی کہ نصیر الدین شاہ میں ’نمونیہ‘ کی تشخیص ہوئی ہے.

رپورٹ میں بتایا گیا کہ اداکار کی چند دن سے طبیعت خراب تھی اور انہیں ایک روز قبل ہی ہسپتال داخل کرایا گیا۔

اسی حوالے سے انڈین ایکسپریس نے اپنی رپورٹ میں بتایا کہ نصیر الدین شاہ کی اہلیہ اداکارہ رتنا پھاٹک شاہ نے بھی اداکار کو ہسپتال میں داخل کروانے کی تصدیق کی۔

اداکارہ کے مطابق ان کے شوہر کے پھیپھڑوں میں انفیکشن ہوا ہے لیکن ان کی طبیعت بدستور بہتر ہو رہی ہے۔

رتنا پھاٹک شاہ کے مطابق انہیں اُمید ہے کہ ڈاکٹرز انہیں اگلے دو روز میں گھر جانے کی اجازت دے دیں گے، کیوں کہ نصیر الدین شاہ کی طبیعت تیزی سے بہتر ہو رہی ہے۔

ہندوستان ٹائمز کے مطابق نصیر الدین شاہ کے ہسپتال میں داخل ہونے پر ان کی اہلی اور بچے بھی ان کے ساتھ ہسپتال میں موجود ہیں اور اداکار کی صحت پہلے سے بہتر ہے۔

رپورٹ میں بتایا گیا کہ گزشتہ برس اپریل میں بھی نصیر الدین شاہ کی طبیعت خراب ہونے کی خبریں تھیں مگر ان کے بچوں نے دعویٰ کیا تھا کہ ان کے والد کی صحت بہتر ہے۔

نصیر الدین شاہ زائد العمری کے باوجود شوبز منصوبوں میں مصروف دکھائی دیتے ہیں، جہاں وہ فلموں میں دکھائی دیتے ہیں، وہیں وہ ویب سیریز میں بھی نظر آتے ہیں۔

خیال رہے کہ 70 سالہ نصیر الدین شاہ کے 3 بچے ہیں، انہوں نے 2 شادیاں کیں۔

نصیر الدین شاہ نے پہلی شادی مراد پروین نامی خاتون سے کی جو فوت ہوگئیں، انہوں نے دوسری شادی اداکارہ رتنا پھاٹک شاہ سے 1982 میں کی اور دونوں متعدد مرتبہ ایک ساتھ کام بھی کر چکے ہیں۔

بھارتی اداکارہ مندرا بیدی کے شوہر فلمساز اور پروڈیوسر راج کوشل چل بسے۔

بھارتی میڈیا کے مطابق 49 سالہ راج کوشل کے قریبی ساتھی جیتو ساولانی نے انکی موت کی خبر میڈیا کو دی۔ راج کوشل کو دل کا دورہ پڑا جس کے باعث وہ جانبر نہ ہوسکے۔

راج کوشل کی ہدایتکاری میں بننے والی فلموں میں اینتھنی کون ہے، پیار میں کبھی کبھی اور شادی کا لڈو سمیت دیگر شامل ہیں۔

خیال رہے کہ مندرا بیدی اور راج کوشل کی شادی 1999 میں ہوئی تھی، ان کے دو بچے تارا اور ویر بھی ہیں۔ انہوں نے 4 سالہ بیٹی تارا کو گزشتہ برس جولائی میں گود لیا تھا۔

جوہر ٹاؤن دھماکے کی تحقیقات میں نیا انکشاف، دھماکے کا مرکزی کردار پیٹر پال ڈیوڈ دبئی میں نائٹ کلب کے کاروبار سے منسلک نکلا، بھارتی خفیہ ایجنسی را کے افسران سے بحرین کے ایک نائٹ کلب میں ملاقات ہوئی۔

انٹیلی جنس ذرائع کے مطابق جوہر ٹاؤن دھماکے کے مرکزی کردار پیٹر پال ڈیوڈ کو بھارتی ایجنسی را کے افسران بحرین کے ایک نائٹ کلب میں ملے، مذکورہ نائٹ کلب کو دبئی میں چلنے والے بھارتی نائٹ کلب کی پشت پناہی حاصل ہے،پیٹر پال ڈیوڈ بھی دبئی میں نائٹ کلب کے کاروبار سے منسلک تھا، اس کے پاس جسم فروش خواتین کی کثیر تعداد موجود ہے۔

ذرائع کے مطابق دھماکے سے قبل لاہور کے مقامی ہوٹل میں پیٹر پال ڈیوڈ سے ملنے والی کرن بھی اس کی کاروباری ساتھی ہے،دونوں نے عامر ہوٹل میں قیام کیا تھا، کرن کے بھائی نے ہی پیٹر پال ڈیوڈ کو کرولا گاڑی خریدنے میں مدد کی، پیٹر ڈیوڈ کی ساتھی خاتون اس وقت پولیس کی حراست میں ہے۔

انٹیلی جنس ذرائع کا کہنا ہے کہ دبئی کے بیشتر نائٹ کلبز کے پس پردہ بھارتی ایجنسی را اپنے مقاصد حاصل کرنے کے لئے جرائم پیشہ عناصر سے رابطے کرتی ہے۔

واضح رہےکہ 23 جون کو لاہور کے علاقے جوہر ٹاؤن میں زور دار دھماکہ ہوا تھا جس کے نتیجے میں 7 افراد شہید جبکہ متعدد افراد زخمی ہوئے، دھماکے سے قریبی گھروں اور 12 گاڑیوں کو بھی شدید نقصان پہنچا،قانون نافذ کرنے والے اداروں نے دھماکے کے تمام ملزمان گرفتار کرلیے، پنجاب حکومت کی جانب سے دھماکے میں شہید ہونے والوں کے لواحقین اور زخمیوں کیلئے مالی امداد کا بھی اعلان کیا گیا۔

ٹریفک پولیس ای چلان ٹیم نے 266 بار ٹریفک قوانین کی خلاف ورزی کرنے والی گاڑی کو دھر لیا،کار ڈرائیور نے 180 مرتبہ ٹریفک سگنلز، 58 مرتبہ اوورسپیڈنگ اور 25 مرتبہ لین لائن کی خلاف ورزی کی، ڈرائیور کو 1 لاکھ 27 ہزار 400 روپے جرمانہ کیا گیا.

تفصیلات کےمطابق ٹریفک قوانین کی خلاف ورزی جرم کے زمرے میں آتا ہے، متعدد بار عوام میں آگاہی مہم چلائے گئی تاکہ ان قوانین پر عملدرآمد کیاجاسکے مگر شہریوں نے مذاق سمجھا لیا، قوانین کی خلاف ورزی دھڑلے سے جاری ہے،سٹی ٹریفک پولیس نے 266 مرتبہ ٹریفک قوانین کی خلاف ورزی کرنے والی گاڑی کو پکڑ لیا۔

کار ڈرائیور نے 180 مرتبہ ٹریفک سگنلز، 58 مرتبہ اوورسپیڈنگ اور 25 مرتبہ لین لائن کی خلاف ورزی کی، ڈرائیور کو 1 لاکھ 27 ہزار 400 روپے جرمانہ کیا گیا، کار مالک نے تمام چالان جمع کروا دئیے جس پر گاڑی مالک کے حوالے کر دی گئی۔

سی ٹی او منتظر مہدی کا کہنا ہے کہ 20 ہزار سے زائد ای چالان نادہندہ گاڑیوں کے کاغذات کو قبضہ میں لیا گیا۔ سٹی ٹریفک پولیس کی 17 ٹیمیں ای چالان نادہندہ گاڑیوں کے خلاف کارروائی بھی کررہی ہیں۔

واضح رہے کہ شہر میں بڑھتے ہوئے حادثات پر کنٹرول کرنے اور ٹریفک قوانین کی پاسداری نہ کرنےوالوں کے خلاف گھیرا مزید تنگ کیا گیا، ای چالان کے طریقہ کار میں ترمیم کی گئی، جرمانہ ہونے پرایکسائز ڈیپارٹمنٹ کے ریکارڈ میں موجود موبائل نمبر پر گاڑی مالک کو ایس ایم ایس بھیجنے کا سلسلہ شروع ہے، یاد رہے کہ ابتدائی مرحلے میں 5یا 5سے زائد ای چالان نادہندہ گاڑی مالکان کو ایس ایم ایس بھیجے گئے۔