Archives October 2017

اسلام آباد(میڈیا پاکستان) الیکشن کمیشن نے کہا ہے کہ موجودہ اسمبلیوں کی مدت 5 جون 2018 کو مکمل ہوگی اور عام انتخابات جولائی 2018 تک ہونے کا امکان ہے۔ منگل کو الیکشن کمیشن کے زیر اہتمام عام انتخابات 2018 کی تیاریوں سے متعلق میڈیا ورکشاپ کا انعقاد ہوا جس میں حکام الیکشن کمیشن نے کہا کہ الیکشن ایکٹ 2017 سے مالی اور انتظامی خودمختاری ملی ہے، آئندہ عام انتخابات کے لیے انتخابی مواد کی خریداریکا عمل جاری ہے اور آئندہ عام انتخابات میں اضافی بیلٹ پیپرز نہیں چھاپے جائیں گے۔الیکشن کمیشن حکام کا کہنا تھا کہ شفافیت کے لیے واٹر مارک بیلٹ پیپرز چھاپے جائیں گے، آئندہ عام انتخابات میں ریٹرننگ آفیسر عدلیہ سے بھی لئے جاسکتے ہیں، سنجیدہ امیدواروں کو سامنے لانے کے لیے کاغذات نامزدگی کی فیس بڑھا دی ہے، قومی اسمبلی کے امیدوار 30 ہزار جب کہ صوبائی اسمبلی اور سینیٹ کے امیدوار 20،20 ہزار فیس جمع کرائیں گے، قومی اسمبلی امیدوار 40 لاکھ، صوبائی اسمبلی 20 لاکھ اور سینیٹ امیدوار 15 لاکھ تک انتخابی اخراجات کر سکیں گے۔الیکشن کمیشن کے مطابق ایک پولنگ اسٹیشن میں زیادہ سے زیادہ بارہ سو ووٹرز ہوں گے، ریٹرننگ اور اسسٹنٹ ریٹرننگ افسر کی تعیناتی 2 ماہ قبل عمل میں آئے گی، ایک پولنگ اسٹیشن میں زیادہ سے زیادہ 4 پولنگ بوتھ بنائے جائیں گے، انتخابات کے لیے انتخابی مواد کی خریداری کا عمل شروع ہو گیا ہے جب کہ صوبوں نے انتخابات کے لیے اپنی ضروریات سے آگاہ کر دیا ہے۔ عام انتخابات میں 10 کروڑ سے زائد ووٹرز حق رائے دہی استعمال کریں گے۔ امیدوار، پولنگ ایجنٹس، مشاہدہ کاروں، سیکورٹی اہلکاروں کے لیے ضابطہ اخلاق بنایا جائے گا۔حکام الیکشن کمیشن کے مطابق موجودہ اسمبلیوں کی مدت 5 جون 2018 کو مکمل ہوگیاور عام انتخابات جولائی 2018 تک ہونے کا امکان ہے جبکہ آئین کے تحت اسمبلیوں کی مدت ختم ہونے کے بعد 2 ماہ کے اندر انتخابات کرانا ہیں، 5 مئی 2018 کو انتخابی فہرستیں منجمد کردی جائیں گی تاہم 5 مئی کے بعد انتخابی فہرستوں میں کسی ووٹر کو شامل نہیں کیا جائے گا۔میڈیا ورک شاپ میں الیکشن کمیشن کے مطابق نومبر سے عام انتخابات کے لیے انتخابی فہرستوں کی نظرثانی کا منصوبہ بنایا ہے جبکہ دسمبر سے گھر گھرووٹرز کی تصدیقی مہم شروع کریں گے، جنوری سے انتخابی فہرستوں کے ڈسپلے سنٹرز بنائے جائیں گے۔ انتخابی فہرستوں پر اعتراضات فروری میں دائر ہوں گے،مارچ اور اپریل میں عام انتخابات کے لیے ووٹرز فہرستیں چھاپی جائیں گی۔میڈیا ورکشاپ میں اظہار خیال کرتے ہوئے سیکرٹری الیکشن کمیشن نے کہاکہ میڈیا سے کوئی چیز خفیہ نہیں رکھی، الیکشن ایکٹ سے الیکشن کمیشن کی خودمختاری میں خاطر خواہ اضافہ ہواجبکہ الیکشن کمیشن کو رولز بنانے کا اختیار پہلی دفعہ دیاگیا تاہم اب رولز کے لئے صدر یا وزیر اعظم کی منظوری درکار نہیں۔ انہوںنے کہاکہ انتخابی عملہ پر اب الیکشن کمیشن کا مکمل کنٹرول ہوگا ٗ بھارت کی طرح پاکستان میں بھی انتخابی عملہ الیکشن کمیشن کے ماتحت ہوگا، مس کنڈکٹ پر انتخابی عملہ کے خلاف الیکشن کمیشن انضباطی کارروائی کرسکے گا۔سیکرٹری الیکشن کمیشن نے کہا کہ الیکشن کمیشن نئے ایکٹ سے زیادہ قابل احتساب بنا دیا گیا جو خوش آئند ہے، الیکشن کمیشن کو زیادہ خودمختاری دینے پر پارلیمنٹ کے شکرگذار ہیں۔

ممبئی (میڈیا پاکستان) بھارت 2027تک مسلم ملک کے طور پر جانا جائے گا، مسلمان سازش کے تحت بھارت پر قابض ہونا چاہتے ہیں، بھارت کے میڈیا کے مطابق بھارتی علاقے اتر پردیش میں بی جے پی کی حمایتی جماعت ہندو انتہا پسند جماعت ہندو یووا کے رہنما ناگیندر پرتاب نے کارکنوں سے خطاب کرتے ہوئے کہا ہے کہ بھارت میں مسلمان قوم جس تیزی سے اپنی آبادی میں اضافہ کر رہی ہے اس سے اندازہ لگایا جا سکتا ہے کہ بھارت 2027تک مسلم ملک کے طور پر جانا جائے گا۔ مسلمقوم ایک سازش کے تحت اپنی آبادی میں تیز رفتار اضافہ کر رہی ہیں۔ اپنی۹ آبادی کو بڑھا کر مسلم قوم بھارت پر قابض ہونے کا سوچ رہی ہے۔ واضح رہے کہ وزیراعلیٰ اترپردیش یوگی ادتیا شدت پسند تنظیم ہندو یووا واہنی کے سربراہ ہیں جوپہلے بھی مسلمانوں کے خلاف متعدد اشتعال انگیز اور متنازع بیانات جاری کرچکے ہیں۔ جس پر ہندوستان کے لبرل،سیکولر،عوام اور میڈیا کی جانب سے شدید تنقید کا نشانہ بنایا گیا تھا ۔ یوگی ناتھ ادتیا بھارت میں ایک متنازع سیاستدان کے طورپربھی جانے جاتے ہیں۔

اسلام آباد(میڈیا پاکستان) سینئرصحافی چوہدری غلام حسین نے نجی ٹی وی چینل کے پروگرام میں بات کرتے ہوئے کہا کہ لندن میں حسن یا حسین نواز کے دفتر میں نواز شریف کی زیر صدارت ایک اعلیٰ سطحی اجلاس ہوا۔وزیر اعلیٰ پنجاب ۔شہباز شریف اوروزیر اعظم شاہد خاقان عباسی نواز شریف کے پاس یہ ایجنڈا لے کر گئے تھے کہ آپ محاذ آرائی بند کر دیں اور کچھ عرصہ کے لیے سیاست سے کنارہ کشی اختیار کر لیں ،ان کا کہنا تھا کہ نواز شریف کچھ عرصہ کے لیے پارٹی کی صدارت بھی چھوڑ دیں۔ انہوں نے موقف اختیار کیا کہ ہم آئندہ الیکشن میں اکثریت حاصل کر لیں تب تک آپ مریم نواز کو بھی واپس لے لیں ۔ان دونوں نے یہ نقطہ بنایا تھا کہ کہ اگر آپ کی فوج اور عدلیہ کے خلاف محاذ آرائی کی پالیسی ہے اور آپ سمجھتے ہیں کہ یہ ٹھیک ہے اور اسی کو فالو کرنا ہے تو ہم وفاقی وزرا حکومت ختم کر دیتے ہیں، میں اور تمام وفاقی وزرا استعفے دے دیتے ہیں اور میں بھی وزارت عظمیٰ چھوڑ دیتا ہوں جس کے بعد ہم یکسو ہو کر آپ کے پیچھے کھڑے ہو جائیں گے۔ چوہدری غلام حسین نے بتایا کہ اس کے بعد مصدقہ اطلاعات کے مطابق میاں نواز شریف نے مفاہمت کرنے سے صاف انکار کر دیا ۔ انہوں نے ان کو کہا ہے کہ تم سب کے سب نکمے ہو ، میں دو نومبر کو پاکستان پہنچ رہا ہوں اور میں عدالتوں میں جا کر کیسز کا سامنا کروں گا۔واضح رہے کہ نوازشریف نے گزشتہ روز پاکستان واپس کا اعلان کیا تھا۔

(میڈیا پاکستان) جنوں اور پریوں سے منسوب تہوار ہیلووین مغربی ممالک میں زوروشور سے منایا گیا۔ امریکی صدرکی رہائشگاہ پربھی ہیلو وین کو بھرپورجوش و خروش سے منایا گیا۔ وائٹ ہاؤس میں بچوں کو مدعو کیا گیا تھا جن کا استقبال صدر ڈونلڈ ٹرمپ اور ان کی اہلیہ میلانیا ٹررمپ نے کیا۔ ہیلو وین پر وائٹ ہاؤس ایک بھوت بنگلے کا سا منظرپیش کررہا تھا۔

جکارتہ (میڈیا پاکستان) دنیا کے واحد سورج مکھی بن مانس کوبچا لیا گیا ہے جس کی صحت اب بہترہے اورجلد قدرتی ماحول کے حوالے کردیا جائےگا۔تیزی سے جنگلات کی کٹائی، موسمی تبدیلی اورغیرقانونی شکار کے باعث بن مانس کی نسل معدومی کی جانب تیزی سے گامزن ہے دوسری جانب دنیا کے پہلے نایاب ترین سورج مکھی بن مانس کو بچانے کےلئے جنگلی حیاتیات کے حکام مصروف عمل ہیں۔حکام کا کہنا ہے کہ یہ دنیا کا پہلا نایاب ترین سورج مکھی بن مانس ہے جو بیماری کے باعث بہت بری حالت میں تھا، پیراسائیٹیکل انفکیشن سے بری طرح متاثر ہونے کے ساتھ ساتھ وزن بھی انتہائی کم تھا،اگر فوری طور پرطبی امداد نہیں ملتی تو ممکن تھا کہ قدرت کےنایاب ترین تحفے سے محروم ہوجاتے۔ بی او ایس حکام کاکہنا ہے کہ اگرچہ البا اب صحت یاب ہورہی ہے لیکن اس میں جلد کے سرطان کے امکانات بہت بڑھ گئے ہیں۔بی او ایس کا کہنا ہے کہ البا میں جلد کے سرطان کے امکانات ہیں اس لئے اس کو جنگل کے حوالے کرنا خطرناک ہوسکتا، اس خطرے کے پیش نظر بی او اس نے پانچ ایکڑ پر قدرتی طرز پرمصنوعی جنگل بنانے کا فیصلہ کیا ہے جس میں البا محفوظ زندگی گزار سکے گی جبکہ ماہرین کی نظرمیں بھی رہے گی تاکہ کسی بھی بیماری کی صورت میں فوری طبی امداد فراہم کی جاسکے۔بی آوایس کےمطابق البا کے لئے قدرتی ماحول فراہم کرنے کےلئے80 ہزار ڈالرزکی ضرورت ہے جس کے لئے عطیات جمع کرنے کا سلسلہ شروع کردیا گیا ہے۔

کپڑے کے جوتوں کو پرانا سمجھ کر پھینکنے کے بجائے انہیں انتہائی کم خرچ اور کسی مشقت کے بغیر نیا بنائیں۔ اگر آپ کے اسنیکرز پرانے ہوگئے ہیں اور گندگی کی وجہ سے ان کا رنگ خراب ہوگیا ہے تو فکر کی بات نہیں کیونکہ آپ آسان گھریلو نسخے سے اپنے پرانے جوتوں کو نیا اور پہلے جیسا چمکدار بنا سکتے ہیں۔اپنے پرانے جوتے کو پہلے پانی سے دھو لیں۔ پھر ایک چمچہ کپڑے دھونے کے سوڈے میں ڈیڑھ چمچہ میٹھا سوڈا ملا کراسے ٹوتھ برش کے ساتھ جوتوں پر رگڑیں۔ چند منٹ بعد اسے پھر سے پانی کے ساتھ دھولیں اور پھر جوتوں کو واشنگ مشین میں ڈال دیں۔ مشین میں دھلنے کے بعد جب جوتوں کو باہر نکالیں گے تو ان پر بے بی پاوڈر کا چھڑکاؤ کریں اور سوکھنے کےلیے چھوڑ دیں، اس طرح چند منٹ بعد حیران کن نتیجہ آپ کے سامنے ہوگا اور پرانے جوتے پھر سے نئے نظر آئیں گے۔یہ طریقہ سوشل میڈیا پر اس وقت وائرل ہوا جب ٹیکساس کی رہائشی سارہ نامی لڑکی نے گھر پر اس کا تجربہ کیا اور تصاویر ٹوئٹر پر ڈال دیں، اس آسان اور کم خرچ گھریلو ٹوٹکے کو سوشل میڈیا پر خوب پذیرائی ملی ہے۔

دنیا میں سات بڑی اسلامی فوجی طاقتیں تھیں‘ ترکی‘ پاکستان‘ ایران‘ عراق‘ لیبیا‘ شام اور مصر۔ یہ ساتوں افواج اسرائیلی عزائم کے راستے میں رکاوٹ تھیں‘ یہودی روایات کے مطابق دنیا کا یہ فیز چھ ہزار سال پر مشتمل ہے‘ یہودی کیلنڈر 3766 قبل مسیح میں شروع ہوا‘ یہ اب تک 5778 سال پورے کر چکا ہے‘ یہودیوں کا خیال ہے قیامت کو صرف 222 سال باقی ہیں‘ یہودیوں نے ان برسوں میں بیت المقدس کی جگہ دوبارہ ہیکل سلیمانی بھی تعمیر کرنا ہے اور آخری جنگ بھی لڑنی ہے‘ یہ ہیکل سلیمانی کو ”تھرڈ ٹمپل“ بھی کہتے ہیں‘ روایات کے مطابق ہیکل سلیمانی کی تعمیر کے بعد دجال آئے گا‘ یہ دنیا کی آخری عالمی جنگ چھیڑدے گا‘ عیسائی عقائد کے مطابق حضرت عیسیٰ ؑدجال کو قتل کر دیں گے جبکہ اسلامی عقیدے کے مطابق حضرت عیسیٰ ؑ امام مہدی کے ساتھ مل کر اسے قتل کریں گے‘ یہ جنگ کے بعد مدینہ تشریف لے جائیں گے‘ 45 سال حیات رہیں گے‘ ان کے بعد حضرت معقد کی حکومت آئے گی‘ یہ 30 سال حکومت کریں گے‘ پھر سینوں سے اچانک قرآن اڑ جائے گا اور پھر دنیا کے اختتام کا سلسلہ شروع ہو جائے گا‘ یہودی عقائد کے مطابق ہیکل سلیمانی اگلے تیس سال کے اندر مکمل ہونا چاہیے‘ پچاس سال کے اندر دجال کو ظاہر ہونا چاہیے اور پھر ایک لمبی جنگ شروع ہو جانی چاہیے‘ یہودی‘ عیسائی اور مسلمان تینوں کے مطابق آخری جنگ کا میدان شام ہو گا‘ یہ جنگ ”لد“ کے مقام پر ہو گی اور ”لد“ شام میں واقع ہے‘ حضرت امام مہدی خراسان میں پیدا ہوں گے‘ جنگ کا ایک حصہ عراق اور ترکی میں بھی لڑا جائے گا اور ایک میدان بلوچستان میں بھی سجے گا‘ یہودی اس جنگ کی تیاری کر رہے ہیں‘ یہ جلد سے جلد یہ تمام علاقے اپنے قبضے میں لینا چاہتے ہیں‘ یہ ہیکل سلیمانی بھی بنانا چاہتے ہیں چنانچہ یہ مسجد اقصیٰ کے نیچے سرنگیں کھودتے چلے جا رہے ہیں‘ یہ سمجھتے ہیں یوں یہ مسجد کسی دن گر جائے گی اور یہ اس کی جگہ تھرڈ ٹمپل یا ہیکل سلیمانی تعمیر کر لیں گے‘ یہ اسلامی دنیا کی ساتوں افواج اور پاکستان کے ایٹم بم کو اپنے عزائم کے راستے میں رکاوٹ سمجھتے ہیں‘ یہ اپنے اتحادیوں کے ذریعے ساتوں اسلامی افواج کو تباہ کرتے چلے جا رہے ہیں‘ عراق اپنی فوج کے ساتھ تباہ ہو گیا‘ لیبیا کی فوج بھی ختم ہو گئی‘ مصری فوج بتدریج کمزور ہوتی جا رہی ہے‘ ترک فوج بھی مشکل دور سے گزر رہی ہے‘ شام خانہ جنگی کا شکار ہے‘ یہ خانہ جنگی اس کی فوج کو کھا جائے گی‘یہ پانچ سات برسوں میں اپنے دفاع کےلئے روس کا محتاج ہو جائے گا اور پیچھے رہ گئے ایران اور پاکستان ‘یہ دونوں اس وقت عالمی ٹارگٹ ہیں‘ یہ لوگ کوشش کر رہے ہیں پاکستان اور ایران بھی کسی نہ کسی طرح گلف کی جنگ کا حصہ بن جائیں‘ یہ لوگ پاکستان کا ایٹمی پروگرام بھی ختم کرنا چاہتے ہیں‘ شام اسرائیل کی سرحد پر واقع ہے‘ یہ ایک مضبوط فوج کا مالک بھی تھا لہٰذا شام کو خانہ جنگی میں دھکیل دیا گیا چنانچہ مضبوط فوج شام کا پہلا گناہ‘ اس کا پہلا ایشو تھا۔
شام کا دوسرا ایشو گیس پائپ لائین تھا‘ روس یورپ کےلئے گیس کا سب سے بڑا سپلائر ہے‘ روسی پائپ لائین ترکی آتی ہے اور یہ ترکی سے یورپ میں داخل ہو جاتی ہے‘ قطرکے شمال مشرق میں 1971ءمیں گیس کا دنیا کاسب سے بڑا ذخیرہ دریافت ہوا‘ قطر بھی یورپ کو گیس سپلائی کرنا چاہتا ہے‘ قطر کی پائپ لائین سعودی عرب ‘ اردن‘ شام اور ترکی سے یورپ جائے گی‘ امریکا اس معاملے میں قطر اور سعودی کے ساتھ کھڑا ہے‘ یہ یورپ کو قطری گیس سپلائی کر کے روس کی مناپلی بھی توڑنا چاہتا ہے اور اپنی گیس کمپنیوں کو بھی فائدہ پہنچانا چاہتا ہے‘روس شامی صدر بشارالاسد کے قریب ہے‘ شامی صدر روس کی خواہش پر قطری پائپ لائین کو راستہ نہیں دے رہے تھے چنانچہ امریکا‘ سعودی عرب اور قطر نے بشارالاسد کا تختہ الٹنے کا فیصلہ کر لیا اور یہ فیصلہ شام کی تباہی کا باعث بن گیا‘ شام میں بھاری ”سرمایہ کاری“ ہوئی‘ فوج کے اعلیٰ عہدیدار خریدے گئے‘ ریٹائر فوجی بھی اکٹھے کئے گئے‘ اپوزیشن کو بھی سرمایہ اور ہتھیار دیئے گئے اور میڈیا بھی بشار الاسد کے خلاف کھڑا کر دیا گیا‘ امریکی اشارے پر اپوزیشن نے شام میں انسانی حقوق‘ مساوات اور آزادی رائے کی تحریکیں شروع کر دیں‘اپوزیشن نے 15 مارچ 2011ءکو درعا شہر میں حکومت کے خلاف مظاہرہ کیا‘ حکومت نے مظاہرہ روکنے کی کوشش کی‘ تصادم ہوا اور پورے ملک میں مظاہروں کا سلسلہ شروع ہو گیا‘ فوج کے اندر سے ایک گروپ الگ ہوا اور اس نے ”فری سیرین آرمی“ کے نام سے اپنا گروپ بنا لیا‘ یہ گروپ حکومتی فورسز سے گتھم گتھا ہو گیا‘ امریکا نے ترکی کے ساتھ مل کر شام کی سرکاری فورسز پر حملہ کر دیا‘ سعودی عرب بھی میدان میں کود پڑا‘ یہ القاعدہ اور داعش کو شام لے آیا‘کرد بھی اٹھ کھڑے ہوئے‘ امریکا نے ان کو بھی ہتھیار دے دیئے اور یوں دیکھتے ہی دیکھتے شام میں خوفناک خانہ جنگی شروع ہو گئی‘ خانہ جنگی میں روس اور ایران بشار الاسد کے ساتھ کھڑے ہو گئے‘ ایران مقدس مقامات اور مزارات بچانے کےلئے بھی میدان میں آیا اور یہ ہم عقیدہ ہونے کی وجہ سے بھی بشار الاسد کی مدد کر رہا ہے جبکہ روس قطر کی پائپ لائین سے بچنے کےلئے شام کے ساتھ کھڑا ہے‘ ترکی نے شروع میں کھل کر امریکا اور سعودی عرب کا ساتھ دیا لیکن جب15 جولائی 2016ءکو طیب اردگان کے خلاف فوجی بغاوت ہوئی اور اس بغاوت کے ڈانڈے امریکا میں جا ملے تو یہ امریکا کی سازش بھی سمجھ گیا اور یہ اس سے دور بھی ہو گیا‘ترکی اس وقت شام کی جنگ کو اپنی سرحدوں سے دور دھکیلنے کی کوشش کر رہا ہے‘ یہ بڑی حد تک بشار الاسد کی مدد بھی کر رہا ہے۔شام تقریباً سات سال سے خانہ جنگی کا شکار ہے‘ یہ خانہ جنگی حلب‘ درعا‘ حمال‘ حمص‘ ادلب اور لداقیہ جیسے شہروں کو بھی نگل گئی اور اس نے پورے شام کے تارپور بھی ہلا دیئے ہیں‘ حلب اور حمص دنیا کے قدیم ترین شہروں میں شمار ہوتے ہیں‘ یہ ثقافت‘ آرٹ اور آثار قدیمہ کے مراکز ہیں‘ حلب کو یونیسکو نے عالمی ورثہ بھی قرار دے رکھا ہے‘دہشت گردوں نے یہ دونوں شہر تباہ کر دیئے‘ حمص کی حالت بھی پتلی ہے‘ ادلب کیمیائی ہتھیاروں کا نشانہ بن چکا ہے‘ رقہ شہر ملبے کا ڈھیر ہے اور لداقیہ اپنے ہی مزار کا چراغ بنتا جا رہا ہے‘ شام میں اس وقت سینکڑوں جتھے‘ گروپ اور لشکر برسرپیکار ہیں‘ القاعدہ النصر فرنٹ کے نام سے شیعہ کمیونٹی کو قتل کر رہی ہے‘ داعش سنی اور شیعہ دونوں کا قتل عام کر رہی ہے ‘ کرد قوم پرست سب کے ساتھ لڑ رہے ہیں‘ فری سیرین آرمی سرکاری فوج کے ساتھ جنگ میں مصروف ہے‘
امریکا اور روس دونوں نے شام میں اپنے فوجی اڈے بنا رکھے ہیں‘ ترک فوجیں‘ ادلب‘ لداقیہ اور حلب تک پہنچ چکی ہیں جبکہ سعودی عرب نے اپنی سرحدوں کے ساتھ کیمپ بنا رکھے ہیں‘ یہ جنگی لشکروں کو سرمایہ بھی دے رہا ہے‘ ہتھیار بھی اور خوراک بھی لیکن شام خانہ جنگی کے باوجود تیزی سے سنبھل رہا ہے‘ ملک کے نوے فیصد شورش زدہ علاقے دوبارہ حکومت کے قبضے میں آ چکے ہیں‘ القاعدہ اور داعش شام سے افغانستان منتقل ہو رہی ہےں‘ یہ اب پاکستان اور ایران کو ٹارگٹ کریں گے‘فری سیرین آرمی دم توڑتی جا رہی ہے اور کرد علیحدگی پسند بھی پسپائی اختیار کر رہے ہیں‘ شام کے بہتر ہوتے حالات دنیا بھر کے لئے حیران کن واقعہ ہے‘ امریکا اور اس کے اتحادی اس صورتحال سے پریشان ہیں‘ اسرائیل کے دکھ میں بھی اضافہ ہوتا جا رہا ہے‘ سوال یہ ہے شام نے یہ کامیابی کیسے حاصل کی؟ اس کی دو بڑی وجوہات ہیں‘ پہلی وجہ صدر بشار الاسد ہیں‘ یہ جنگ کے دوران دمشق میں ڈٹے رہے‘ یہ اور ان کا خاندان اس وقت بھی دمشق کی سڑکوں پر پھرتا رہا جب دہشت گرد دمشق کی پہاڑیوں تک پہنچ چکے تھے اور انہوں نے شہر کا پانی تک بند کر دیا تھا‘بشار الاسد اس وقت بھی ملک سے باہر گئے اور نہ ہی انہوں نے اپنا خاندان باہر بھجوایا‘ یہ اگر ایک بار ملک سے باہر چلے جاتے تو آج شام چھوٹے چھوٹے ٹکڑوں میں تقسیم ہو چکا ہوتا ‘دمشق شہر پر اسرائیل کا جھنڈا لہرا رہا ہوتا‘ یہ اس شخص کی استقامت اور بہادری تھی جس نے شام کو بچا لیا‘ دوسرا حکومت نے جنگ کے زمانے میں بھی سرکاری نظام نہیں ٹوٹنے دیا‘ حکومت کے تمام محکمے بھی کام کرتے رہے اور ملک میں کسی چیز کی قلت بھی پیدا نہیں ہوئی جبکہ دوسری طرف باغیوں کے علاقوں میں قتل وغارت گری بھی ہوئی‘ آبروریزیاں بھی ہوئیں‘قاضی عدالتیں بھی بنیں اور اشیائے صرف کی قلت بھی پیدا ہوئی چنانچہ لوگوں نے سوچا غاصب بشار الاسد ان نام نہاد انقلابیوں سے سو درجے بہتر ہیں اور یہ باغیوں سے کٹ کر حکومتی فورسز کے ساتھ شامل ہوتے چلے گئے اور یوں باغی ملک سے فرار ہونے پر مجبور ہو گئے۔ہم شام سے دو چیزیں سیکھ سکتے ہیں‘ میاں نواز شریف بشار الاسد بنیں‘ یہ خود بھی واپس آئیں اور اپنے خاندان کو بھی واپس لے کر آئیں‘ یہ اپنے مقدمات مردانہ وار فیس کریں‘ یہ جلد یا بدیر کامیاب ہو جائیں گے اور دوسرا وہ لوگ جنہوں نے عراق اور شام کو تباہ کر دیا وہ اب ہماری سرحد پر اکٹھے ہو رہے ہیں‘ یہ لوگ ہماری فوج اور ایٹمی پروگرام کو بھی تباہ کرنا چاہتے ہیں اور یہ ملک میں شیعہ سنی جنگ بھی چھیڑنا چاہتے ہیں چنانچہ ہمیں چوکنا ہونا ہوگا ورنہ ہم دوسری صورت میں اٹھنے کے قابل نہیں رہیں گے۔

اسلام آباد(میڈیا پاکستان) سینئر صحافی چوہدری غلام حسین نے نجی ٹی وی چینل 24نیوز کے پروگرام میں گفتگوکرتے ہوئے کہا ہے کہ مسلم لیگ(ن) کے باغی ارکان قومی اسمبلی کی تعداد 100تک پہنچ گئی ہے ۔ ان ارکان نے واضح طور پر کہہ دیا ہے کہ وہ سیاست میں رہیں یا نہ رہیں وہ عدلیہ اور فوج کیخلاف محاذ آرائی میں کسی قسم کا حصہ نہیں بنیں گے۔چوہدری غلام حسین نے کہا کہ نوازشریف نے آصف کرمانی ،رانا تنویر وغیرہ کوان ارکان اسمبلی کو منانے کا ٹاسک دے رکھا ہے ۔لندن میں ہونے والے اجلاس کے دوران بھی نوازشریف نے وزیر اعظم شاہد خاقان عباسی کو کہا ہے کہ وہ ناراض ارکان اسمبلی کو منائیں ۔نوازشریف نے پارٹی رہنمائوں کو کہا کہ وہ پارلیمانی پارٹی کا اجلاس بلائیں جس کی وہ صدارت کرینگے،چوہدری غلام حسین نے کہا کہ اب حالات یہاں تک پہنچ گئے ہیں کہ ایک نااہل وزیر اعظم پارٹی اجلاس کی صدارت کریگا۔

اسلام آباد(میڈیا پاکستان) بی بی سی کے لیے لکھے جانے والے ایک مضمون میں نوبیل انعام یافتہ سائنس دان اور برطانیہ کی رائل سوسائٹی کے صدر سر وینکی رام کرشنن نے سائنسی دریافت کے موضوع پر روشنی ڈالی ہےکہ اس نے کیسے ایک مختصر دورانیے میں ہمارا تصورِ کائنات بدل کر رکھ دیا ہے۔ وہ یہ کہتے ہیں کہ ہمیں کیوں آج بھی اپنی تحقیق کے استعمال کے بارے میں محتاط رہنا چاہیے۔اگر ہم معجزاتی طور پر سنہ 1900 سے ذہین ترین افراد کو آج کی دنیا میں لے آئیں تو وہ یہ دیکھ کر حیرت زدہ رہ جائیں گے کہ جن مسائل نے انسان کو صدیوں سے پریشان کر رکھا تھا ہم نے ان کا حل بڑی حد تک تلاش کر لیا ہے۔صرف ایک سو سال پہلے لوگوں کو یہ معلوم نہیں تھا کہ وراثت اگلی نسلوں کو کیسے منتقل ہوتی ہے یا ایک خلیہ کیسے تقسیم ہو کر پورا جاندار بن جاتا ہے۔انھیں یہ معلوم نہیں تھا کہ ایٹم کی اندرونی ساخت بھی ہوتی ہے، حالانکہ خود لفظ ایٹم کا مطلب ‘ناقابلِ تقسیم ہے۔ انھیں معلوم نہیں تھا کہ کائنات یا زندگی کا آغاز کیسے ہوا۔آج بنیادی دریافتوں کی بدولت ہم ان سوالوں کے جواب دے سکتے ہیں یا کم از کم کوشش کر سکتے ہیں۔ ان جوابات نے ہمارا کائنات کے بارے میں اور خود اپنی روزمرہ زندگیکے بارے میں تصور بدل کر رکھ دیا ہے۔ آج ہم جن چیزوں کو زیادہ اہمیت نہیں دیتے وہ بھی بنیادی سائنس اور ٹیکنالوجی کی وجہ سے وجود میں آئی ہیں اور یہ دونوں ایک دوسرے کو آگے بڑھاتی ہیں۔تقریباً ہر ایجاد کے پیچھے ایک یا ایک سے زیادہ بنیادی دریافتیں ہوتی ہیں۔ بعض اوقات بنیادی دریافت صدیوں پرانی ہوتی ہے۔ نیوٹن کے قوانینِ حرکت سمجھے بغیر جیٹ انجن یا راکٹ ایجاد کرنا ممکن نہیں تھا۔ان سو سالوں میں سائنس میں کئی بڑے لمحے آئے۔ جیسے ڈی این اے کی ساخت کی دریافت۔ لیکن خود یہ دریافت بھی ڈارون اور مینڈل کی وجہ سے ممکن ہو سکی اور اس نے بعد میں بائیو ٹیکنالوجی کے دروازے کھول دیے۔ آج ہم انسان کے مکمل ڈی این اے (جسے ‘جینوم’ کہتے ہیں) کا آسانی سے جائزہ لے سکتے ہیں۔اس سے ہمیں یہ سمجھنے میں مدد ملی ہے کہ جینیاتی بیماریاں کیسے لاحق ہوتی ہیں اور انھیں کیسے ٹھیک کیا جا سکتا ہے۔ حال ہی میں سائنس دانوں نے ایک بچی کے جینز میں تبدیلی لا کر اسے لاحقکینسر کا مرض دور کر دیا۔تاہم انسانی جینوم اس قدر پیچیدہ ہے کہ ہم نے یہ سمجھنا ابھی حال ہی میں شروع کیا ہے کہ جین کیسے ماحول کے ساتھ مل کر ہمارے جسم کا نظام چلاتے ہیں۔بگ بینگ تھیوری نے ہمیں بتایا کہ کائنات کیسے وجود میں آئی۔ سو سال قبل اس سوال کا جواب صرف مذہب ہی دے سکتا تھا۔جب ہمیں پتہ چلا کہ کائنات جامد نہیں ہے بلکہ مسلسل پھیل رہی ہے اور کہکشائیں ایک دوسرے سے دور ہٹتی جا رہی ہیں، تو اس سے یہ اندازہ لگایا گیا کہ آغاز میں تمام مادہ ایک ہی جگہ پر مرکوز تھا اور کائنات ایک عظیم دھماکے کے نتیجے میں وجود میں آئی۔اس علم نے ہمیں سب سے بڑے سوال کا جواب دینے کے لیے مواد فراہم کیا ہے۔ اور وہ سوال ہے، ہر چیز کہاں سے آئی؟ اس سے ہمارا ننھا سا سیارہ مزید چھوٹا لگنے لگا ہے، تاہم ہمارے اندر جو علم کی تڑپ ہے، اس نے ہمیں احساسِ کمتری کا شکار ہونے سے بچائے رکھا ہے۔اپالو مشن سے لے کر کیسینی خلائی جہاز تک اور ہبل خلائی دوربین سےلے کر ثقلی موجوں کی دریافت تک، یہ تمام انکشافات ہمیں خلا کے بارے میں مزید سوالوں کے جواب ڈھونڈے پر اکساتے ہیں۔آج ہم دنیا کو بڑی حد تک ایک الیکٹرانک سکرین پر دیکھتے ہیں۔ کمپیوٹر مختلف شکلوں میں علم کا ماخذ ہیں، لیکن وہ اس بات کا بھی تعین کرتے جا رہے ہیں کہ ہم بقیہ دنیا اور دوسرے انسانوں کے ساتھ کس طرح سے پیش آتے ہیں۔آج کے دور کی ایک انتہائی عام چیز یعنی سمارٹ فون بھی کئی بنیادی دریافتوں کی مرہونِ منت ہے۔ اس کے اندر موجود کمپیوٹر انٹی گریٹڈ چپ کی مدد سے کام کرتا ہے۔ خود انٹی گریٹڈ چپ ٹرانزسٹروں سے بنی ہوتی ہے، جن کی دریافت کوانٹم مکینکس کی تفہیم کے بغیر ممکن نہیں تھیفون کے اندر موجود جی پی ایس آئن سٹائن کے نظریۂ اضافیت میں وقت کے تصور کی تفہیم پر کام کرتا ہے۔ حالانکہ ایک زمانے میں لوگوں کا خیال تھا کہ یہ نظریہ عام زندگی پر کوئی اثر نہیں ڈال سکے گا۔اس وقت کمپیوٹر نئی دریافتوں میں مدد دے رہے جن کی وجہ سے ہمارا دنیا کےبارے میں تصور بدلتا جا رہا ہے۔ اس وقت ہمارے درمیان ایسی مشینیں موجود ہیں جو خود سیکھ سکتی ہیں اور وہ ہماری دنیا کو تبدیل کر رہی ہیں۔کمپیوٹر صحت اور سماجی میدانوں میں پیش رفت کے وسیع امکانات رکھتے ہیں، اور ہم جلد ہی اپنے درمیان بغیر ڈرائیور والی کاریں اور جدید روبوٹ دیکھ سکیں گے، لیکن ہمیں اس بارے میں بہت سوچ سمجھ کر فیصلے کرنے ہوں گے کہ ہمیں ذہین مشینوں کو کس تک دخل اندازی کی اجازت دینی چاہیے۔ایجادات اخلاقی طور پر نہ بری نہ اچھی ہوتی ہیں، ہمارا استعمال انھیں اچھا یا برا بنا دیتا ہے۔ ایک دریافت جس نے ہمیں دو حصوں میں تقسیم کر دیا وہ ایٹم کی تقسیم تھی۔ اس دریافت نے دنیا کے خطرناک ترین ہتھیار ایجاد کرنے کی راہ ہموار کی۔بعض لوگ کہتے ہیں کہ مکمل تباہی کا خوف امن جاری رکھنے کی ضمانت ہے۔ لیکن یہ کوئی پائیدار حل نہیں ہے جس کا ایک ثبوت شمالی کوریا کی شکل میں ہمارے سامنے ہے۔ دوسری طرف ایٹم کی تقسیم نے ہمیں توانائیکا ایک سستا ذریعہ بھی فراہم کیا ہے۔سائنس خود ہمارے بارے میں اور ہمارے ارد گرد کی دنیا کے بارے میں جاننے کی جستجو کا نام ہے۔ اسی جستجو نے ہمارے دنیا کے بارے میں تصورات بھی بدلے ہیں اور ہماری زندگیوں کو بھی بدل دیا ہے۔ آج ہماری عمریں 1900 کے مقابلے پر دگنی ہیں اور معیارِ زندگیبھی پہلے سے کہیں بہتر ہے۔لیکن سائنس اور ٹیکنالوجی کے استعمال نے صرف سائنس دانوں ہی پر اثر نہیں ڈالا۔ ان کا انحصار ثقافتی، معاشی اور سیاسی عوامل پر ہے۔ سائنس انسانی علم کی فتح ہے، اور اس کی تفہیم اور استعمال سے ہمیں دور رس فیصلے کرنے میں مدد مل سکتی ہے۔

کولمبو (میڈیا پاکستان) سری لنکا کو وائٹ واش کرنے کے بعد پاکستان کا ٹی20 رینکنگ میں پہلی پوزیشن پر آنے کاامکان روشن ہو گیا ہے۔لاہور میں سری لنکا کے خلاف تیسرے ٹی20 میچ میںفتح کے ساتھ ہی قومی ٹیم نے سری لنکا کے خلاف ٹی20 سیریز میں کلین سوئپ مکمل کر لیا تھا۔کلین سوئپ کی بدولت پاکستانی ٹیم کو اہم پوائنٹس مل گئےاور قومی ٹیم کے پوائنٹس کی تعداد 124 ہو گئی ہے جس کیساتھ ہی پاکستان کے ٹی20 میں نمبر ون بننیکے امکانات بڑھ گئے۔آئی سی سی کی ٹی20 درجہ بندی میں نیوزی لینڈ کی ٹیم 125 پوائنٹس کے ساتھ پہلے نمبر پر براجمان ہے اور اسے اپنی یہ پوزیشن برقرار رکھنے کیلئے بھارت کے خلاف تین میچوں کی سیریز لازمی جیتنا ہو گی۔تاہم اگر کیویز بھارت کے خلاف ٹی20 سیریز 2-1 سے ہارا تو پاکستان نمبر ون ٹی ٹوئنٹی بن جائے گی البتہ اگر نیوزی لینڈ نے سیریز میں کامیابی حاصل کی تو پاکستان دوسرے نمبر پر ہی رہے گا۔پاکستان نے سرفراز احمد کی قیادت میں اب تک چودہ میں سے بارہ ٹی ٹوئنٹی جیتے جبکہ اسے صرف دو میں شکست ہوئی۔