Archives September 2022

اسلام آباد(ایمرا نیوز) مردان میں خودکش حملہ آور ٹارگٹ تک پہنچے سے قبل ہی دھماکے سے ہلاک ہوگیا، واقعہ جمعہ کی نماز سے قبل پیش آیا۔
مردان کے تھانہ چورہ کی حدود میں کھیتوں میں خودکش حملہ آور ٹارگٹ سے پہلے دھماکے سے ہلاک ہوگیا، دھماکے کے بعد کھیت سے ایک شخص کے جسم کے اعضا ملے جس کے بعد پولیس نے واقعے کی تحقیقات شروع کردی ہیں۔
پولیس اور سی ٹی ڈی ٹیموں نے جائے وقوع سے شواہد جمع کرلیے۔ ریجنل پولیس آفیسر محمد علی خان نے جائے وقوعہ کا دورہ کیا۔ دھماکے کے حوالے سے معلومات حاصل کیں۔
واقعے پر ڈی آئی جی مردان محمد علی گنڈاپور نے کہا ہے کہ دھماکے سے خودکش بمبار ہلاک ہوا، دھماکا پولیس تھانہ چورہ کے نزدیک کھیتوں میں ہوا ہے، ریجن میں سیکورٹی ہائی الرٹ کردی گئی ہے۔
پولیس کے مطابق واقعے میں مزید کوئی جانی نقصان نہیں ہوا، واقعے کی جدید سائنس خطوط پر تحقیقات کی جارہی ہیں۔

اسلام آباد (ایمرا نیوز)وزیراعظم شہباز شریف نے وزیر خزانہ اسحاق ڈار کو سینٹ میں قائد ایوان نامزد کردیا، سینیٹر اعظم نذیر تارڑ سے قائد ایوان کا منصب واپس لے لیا گیا۔
لندن سے واپسی پر پہلے سینیٹر پھر وفاقی وزیر اور اب اسحاق ڈار کو ایک اور اہم عہدہ مل گیا، وزیراعظم شہباز شریف نے سینٹ میں قائد ایوان سینیٹر اعظم نذیر تارڑ کو تبدیل کرنے کا فیصلہ کرلیا اور اس ضمن میں وزیر خزانہ سینٹراسحاق ڈار کو سینٹ میں قائد ایوان نامزد کردیا۔
ذرائع کے مطابق قائد مسلم لیگ ن نواز شریف نے اسحاق ڈار کو قائد ایوان نامزد کرنے کی منظوری دی، وزیراعظم شہباز شریف نے اہم نامزدگی سے متعلق چئیرمین سینٹ کو بھی آگاہ کردیا ہے جس پر سینٹ سیکرٹریٹ نے ضروری کارروائی کا آغاز کردیا ہے اورسینٹ سیکرٹریٹ جلد اسحاق ڈار کا بطور قائد ایوان نوٹیفکیشن جاری کرے گا۔
ذرائع کا کہنا ہے کہ قائد ایوان اعظم نذیر تارڑ آج قائد ایوان سے عہدے سے الگ ہو جائیں گے تاہم وہ وفاقی وزیر قانون کے طور پر اپنے فرائض سرانجام دیتے رہیں گے۔

اسلام آباد (ایمر ا نیوز) وزیراعظم شہباز شریف نے ایک بار پھر چیئرمین پی ٹی آئی عمران خان کو تنقید کا نشانہ بنایا ہے۔اسلام آباد میں بھارہ کہو منصوبے کے سنگ بنیاد رکھنے کی تقریب سے خطاب کےدوران شہباز شریف کا کہنا تھا کہ منصوبے تب مکمل ہوتے ہیں جب دل میں درد اور عوام کے لیے تڑپ ہو ، 40 سال کے سیاسی کیرئیر کے دوران بہت اونچ نیچ دیکھی اور حالات بدلتے دیکھے۔
وزیراعظم شہباز شریف نے عمران خان پر تنقید کرتے ہوئے کہا کہ عمران خان کی پرسوں کی آڈیو لیک پوری دنیا نے سنی، پرسوں جو آڈیو لیک ہوئی اس نے میری اس بات پر مہر لگا دی کہ وہ دنیا کا جھوٹا ترین شخص ہے، کسی کو اب یہ کہنے کی ضرورت نہیں کہ یہ پاکستان کے خلاف بدترین سازش تھی، عمران خان کا بیانیہ کل چُور چُور ہو گیا۔
ان کا کہنا تھا کہ عمران نیازی دنیا کا جھوٹا ترین شخص نکلا، اس نے پاکستان کو شرمسار کیا، عمران نیازی نے لوگوں کو ورغلانے کا مشغلہ ڈھونڈا، دن رات جھوٹ بولتے رہے، میں نے اپنی زندگی میں اتنا غیر ذمہ دار اور جھوٹا شخص نہیں دیکھا، عمران خان کی حرکت پر پوری قوم کے سر شرم سے جھک گئے ہیں۔
شہباز شریف کا کہنا تھاکہ میں نے قومی اسمبلی میں کہا تھا کہ کسی رکن پر ثابت ہو جائےکہ ہم نے سازش کے ذریعے حکومت حاصل کی ہے تو ہمیں سولی پر لٹکا دیں، ہماری مخلوط حکومت آئینی طریقے سے آئی، پارلیمان کے ووٹ کے ذریعے آئی، اس میں کوئی دو رائے نہیں کہ آج یہ بات روز روشن کی طرح عیاں ہوگئی، آپ کسی کی پاکستانیت پر سوال نہیں اٹھا سکتے، آپ نے پوری پارلیمان کو غدار کہہ دیا اور قوم کو تقسیم کر دیا، عمران خان کی وجہ سے آج قوم تقسیم ہو چکی، اس شخص نے اداروں کو تقسیم کرنے کی کوشش کی، زہریلا پروپیگنڈا کیاگیا، پاکستانیوں کے ساتھ سب سے بدترین سازش اس شخص نے کی۔
وزیراعظم نے کہا کہ عمران خان نے قوم کے وقار کو داؤ پر لگایا ،اس طرح کی گھناؤنی سازش میں نے دنیاکی تاریخ میں بہت کم دیکھی ہے، برادر ممالک کو ناراض کیاگیا، برادر ممالک نے بتایا کہ کس طرح اس شخص نے تکبر سےتعلقات کو خراب کیا، اللہ تعالیٰ نے اس کو وزیراعظم بنوا دیا، یہ جعلی ووٹوں سے وزیراعظم بنا، چاہیے تھاکہ محنت کرتا، غربت ختم کرتا لیکن اس نے نوکریاں دینے کا کہہ کر لوگوں سے روزگار چھین لیے، گھر دینے کا کہا لیکن ایک گھر نہیں دیا۔
شہباز شریف کا کہنا تھا کہ اس شخص نے مہنگائی میں اضافہ کیا، ہمیں اس کا بوجھ اٹھانا پڑا، ہم نے مہنگائی آپ سے لی، ہماری مجبوری تھی کیونکہ آئی ایم ایف کہہ رہا تھا کہ یہ شرائط مانو ورنہ گھر جاؤ، ہم نے سر توڑ کوشش کی اور ملک کو دیوالیہ ہونے سے بچایا، اگر یہ ہوتے تو خدانخواستہ پاکستان کا دیوالیہ ہو چکاہوتا، کیا لیڈرز اس طرح بنتے ہیں؟ اس شخص کے دل میں خواہش تھی کہ ملک کا دیوالیہ ہو جائے۔

اسلام آباد(ایمرا نیوز)پاکستان تحریک انصاف (پی ٹی آئی) کے رہنما اور سابق وزیر اطلاعات فواد چوہدری نے کہا ہے کہ اسلام آباد ہائی کورٹ سے ایون فیلڈ ریفرنس میں مریم نواز کی بریت کے خلاف پاکستان تحریک انصاف سپریم کورٹ سے رجوع کرے گی۔
اسلام آباد میں نیوز کانفرنس کرتے ہوئے ان کا کہنا تھا کہ ہم نے یہ فیصلہ کیا ہے کہ اس کیس کی اپیل نیب نہیں کرسکتا، کیوں کہ انہوں نے خود اپنا چیئرمین لگایا ہوا ہے، یہ کیس ہم خود سپریم کورٹ میں لے کر جائیں گے۔
انہوں نے کہا کہ بہت ضروری ہے کہ کل جو مقدمہ سامنے آیا ضروری ہے اس کے حقائق عوام کو بتائے جائیں۔
ان کا کہنا تھا کہ وزیراعظم شہباز شریف کہتے ہیں کہ میرے والد ایک محنت کش آدمی تھے یہ بات بالکل ٹھیک تھی، 1947 میں شریف فیملی جاتی امرا سے لاہور آئی تو وہ مزدور تھے لیکن ان 7 بھائیوں نے محنت کر کے اتفاق فاؤنڈری کی بنیاد رکھی جسے 70 کی دہائی میں ذوالفقار علی بھٹو سے قومیا لیا تھا۔
بات کو جاری رکھتے ہوئے انہوں نے کہا کہ 80 کی دہائی تک ان 7 بھائی کی ایک ہی فیکٹری تھی اس کے علاوہ کچھ نہیں تھا، جسے ضیاالحق نے شریف فیملی کو واپس کیا اور 50 کروڑ روپے کا قرض اسے چلانے کے لیے دیا۔
انہوں نے مزید کہا کہ یہاں سے ایک نئی کہانی کی ابتدا ہوئی، جنرل ضیاالحق اور دیگر جرنیلوں سے شریف خاندان کے تعلقات قائم ہوئے اور نواز شریف وزیراعلیٰ بن گئے۔
فواد چوہدری کا کہنا تھا کہ 1985 سے 1988 تک وزارت اعلیٰ جبکہ 1990 اور 1997 میں وزارت عظمیٰ کے دوران صرف شریف خاندان کی کمپنیوں کی تعداد 27 ہوگئی۔
ان کا کہنا تھا کہ شریف خاندان اور زرداری خاندان کا جو اصل پیشہ بیرونِ ملک موجود ہے پاکستان کے عوام کو اس کی بھنک بھی نہیں، ہمیں تو صرف اس پیسے کا معلوم ہے جو پانامہ پیپر اور انٹرنیشنل اسکینڈل کے نتیجے میں ہمارے سامنے آیا۔
ساتھ ہی ان کا کہنا تھا کہ ہمارا نظام ایسا ہے کہ اس چھوٹے سے پیسے کو بھی نہیں سنبھال پارہا اور مریم اور ان کے خاندان پر نوازشات جاری ہیں، جس کا بالآخر نقصان پاکستان کے عوام کا ہے۔
ان کا کہنا تھا کہ پاکستان کے جیلوں میں قید لوگوں کی چوری کتنی بڑی ہوگی؟ اصل چور تو یہ لوگ ہیں کہ جو ملک میں کرپشن کر کے پیسہ باہر لے گئے اور اب ہمارا نظام انہی کو سپورٹ کررہا ہے۔

پشاور(ایمرا نیوز) چیئرمین تحریک انصاف عمران خان کا کہنا ہے کہ ملک کو لوٹا جا رہا ہو تو کیا محافظ کہہ سکتا ہے کہ میں نیوٹرل ہوں۔
پشاور میں تقریب سے خطاب کرتے ہوئے عمران خان کا کہنا تھا انسانوں کے معاشرے میں کوئی قانون سے اوپر نہیں ہوتا اور جانوروں کے معاشرے میں انصاف و قانون نہیں ہوتا۔
ان کا کہنا تھا کہ بڑے ڈاکو پیسا چوری کرکے باہر لے گئے اور ان کو این آر او دیا گیا، مریم سے پوچھا گیا تو کہا کہ لندن میں کیا پاکستان میں بھی پراپرٹی نہیں، 1100 ارب روپے جو اس قوم کا چوری ہوا وہ معاف ہو رہا ہے، یہ پیسہ چند لوگوں کی جیبوں میں جائے گا، قوم آج بدترین مہنگائی اور قرضوں میں ڈوب رہی ہے۔
انہوں نے کہا کہ آج اس ملک کے محافظ سے سوال پوچھتا ہوں کہ اگر ڈاکو ملک کو لوٹ رہا ہو تو چوکیدار کہہ سکتا ہے کہ میں نیوٹرل ہوں، پاکستان لوٹا جا رہا ہے اور وہاں سے کہتے ہیں کہ ہم نیوٹرل ہیں، نیوٹرل کا یہ کام ہے کہ میڈیا کو بند کریں تو ملک کی حفاظت کون کرے گا، جب بھی کوئی کہے کہ میں غیرسیاسی ہوں تو سمجھ لیں کہ اس میں اور جانور میں کوئی فرق نہیں۔
عمران خان نے کہا کہ ساری قوم کو کال دوں گا تو واپسی نہیں ہو گی، مجھے اکیلے بھی نکلنا پڑے تو ان کے خلاف نکلوں گا لیکن ان چوروں کا ڈاکہ قبول نہیں کروں گا، مجھے جیل کا خوف نہیں ہے۔

اسلام آباد (ایمرا نیوز) سابق وزیراعظم عمران خان کی مبینہ نئی آڈیو لیک ہو گئی جس میں عمران خان، اعظم خان، اسد عمر اور شاہ محمود قریشی سے سائفر سے متعلق بات کر رہے ہیں۔
مبینہ آڈیو میں عمران خان، شاہ محمود قریشی کو مخاطب کرتے ہوئے کہہ رہے ہیں “اچھا شاہ جی، کل ہم تینوں (عمران خان، اعظم خان اور شاہ محمود قریشی) نے اور وہ ایک فارن سیکرٹری نے میٹنگ کرنی ہے، ہم نے کہنا ہے کہ وہ جو لیٹر ہے نا اس کے چپ کر کے مرضی کے منٹس لکھ دے، اعظم خان کہہ رہے ہیں کہ اس کے منٹس بنا لیتے ہیں، اسے فوٹو اسٹیٹ کر کے رکھ لیتے ہیں۔
عمران خان مبینہ آڈیو میں کہہ رہے ہیں کہ ہم نے امریکنزکا نام کسی صورت نہیں لینا، پلیزکسی کے منہ سے نام نہ نکلے، یہ بہت اہم ہے ہم سب کیلئے کہ کس ملک سے لیٹرآیا ہے، میں کسی کے منہ سے اسکا نام نہ سنوں۔
مبینہ آڈیو لیک میں سابق وفاقی وزیر اسد عمر نے کہا کہ آپ جان کر لیٹر کہہ رہے ہیں یہ لیٹر نہیں میٹنگ کی ٹرانسکرپٹ ہے، عمران خان اس پر کہتے ہیں کہ وہی نا میٹنگ کی ٹرانسکرپٹ یا لیٹر ایک ہی چیز ہے، لوگوں کو ٹرانسکرپٹ کی تو سمجھ نہیں آنی تھی، آپ پبلک جلسے میں ایسے ہی کہتے ہیں۔

اسلام آباد (ایمرا نیوز) کسانوں کا دھرنا اسلام آباد میں تیسرے روز بھی جاری ہے، بجلی کے بلوں میں اضافہ، کھاد کی بلیک میں فروخت کے خلاف کسان ڈٹ گئے۔
اسلام آباد میں کسانوں کا دھرنا تیسرے روز بھی جاری ہے، کسان اتحاد یونین اپنے مطالبات کے حق میں سراپا احتجاج ہیں، خیابان چوک میں کسان دھرنے کے چاروں اطراف کنٹینرز رکھ دیئے گئے۔
رہنما کسان اتحاد کا مطالبہ ہے کہ وفاقی حکومت ہمیں فی یونٹ کی قیمت مختص کرکے دے تب ہم احتجاج ختم کریں گے، ہمارا احتجاج پرامن ہے، ہمیں کوئی جلدی نہیں، اپنا حق لے کر یہاں سے اٹھیں گے۔

کسانوں کا کہنا ہے کہ بجلی کے بلوں میں اضافہ واپس لیا جائے، کھاد کی قیمتوں میں کمی اور بلیک میں فروخت کرنیوالوں کے خلاف کارروائی کی جائے۔

کسانوں نے گزشتہ روز ہونے والے مذاکرات پر حکومتی نوٹیفکیشن کو بھی مسترد کرتے ہوئے مطالبہ کیا ہے کہ بجلی کے یونٹ پر فکس ریٹ دیا جائے۔

اسلام آباد(ایمرا نیوز)وزیراعظم شہباز شریف نے اسلام آباد میں بھارہ کہو بائی پاس منصوبے کا سنگ بنیاد رکھ دیا۔بھارہ کہو بائی پاس منصوبے کا سنگِ بنیاد رکھنے کی تقریب سے خطاب کرتے ہوئے وزیراعظم شہباز شریف کا کہنا تھا کہ بھارہ کہو مری روڈ پر گھنٹوں ٹریفک جام رہتا ہے لیکن اس منصوبے سے شہر میں ٹریفک کا رش ختم ہوگا۔
وزیراعظم کا کہنا تھا کہ 5 اعشایہ 4 کلو میٹر طویل منصوبےکو 4 ماہ کی ریکارڈ مدت میں مکمل کرنے کا ہدف ہے، بھارہ کہو بائی پاس منصوبے کا کنٹریکٹ شفاف بولی کے ذریعے دیا گیا اور کمپنی کو منصوبے کی کوالٹی انتہائی معیاری رکھنے کا کہا گیا ہے۔
شہباز شریف کا کہنا تھا کہ منصوبہ تیار کرنے والی کمپنی کو ہدایت دی گئی ہیں کہ وہ اس منصوبے کو 3 ماہ میں مکمل کرے، ایسے منصوبے 3 ماہ کے بجائے ڈیرھ میں ماہ مکمل ہوتے رہے ہیں۔

اسلام آباد( ایمرانیوز) ملک بھر میں کورونا کے وار جاری ہیں، گزشتہ چوبیس گھنٹے کے دوران موذی مرض سے مزید 3 مریض دم توڑ گئے ہیں۔
قومی ادارہ صحت (این آئی ایچ) کے مطابق گزشتہ چوبیس گھنٹے کے دوران 11 ہزار 970 ٹیسٹ کئے گئے جس میں 43 نئے کیسز رپورٹ ہوئے۔
این آئی اے رپورٹ میں کہا گیا کہ ملک بھر میں کورونا مثبت کیسز کی شرح 0.36 فیصد ریکارڈ کی گئی جبکہ مزید تین مریض جاں بحق ہوگئے ہیں، 47 مریضوں کی حالت تشویشناک ہے۔

کوئٹہ(ایمرا نیوز) کوہلو کے مرکزی بازار میں بم دھماکے کے باعث متعدد افراد زخمی ہوگئے جب کہ دو افراد جان کی بازی ہار گئے۔
دھماکہ بلوچستان کے شہر کوہلو کے مرکزی بازار میں مٹھائی کی دکان پر ہوا جس کے باعث دو افراد جاں بحق جب کہ 20 زخمی ہوگئے۔
پولیس حکام کا کہنا ہے کہ دھماکے کے بعد دکان زمین بوس ہوگئی، کئی لوگ ملبے تلے دبے ہوئے ہیں۔
ریسکیو اہلکاروں نے زخمیوں کو اسپتال منتقل کردیا جہاں انہیں طبی امداد فراہم کی جارہی ہے، اسپتال ذرائع کا کہنا ہے کہ 12 زخمیوں کی حالت تشویشناک بتائی جارہی ہے۔
دھماکے کی اطلاع ملتے ہی پولیس، لیویز اور ایف سی نے علاقے کو گھیرے میں لے لیا جب کہ ڈی ایچ کیو میں ایمرجنسی نافذ کردی گئی ہے۔
رپورٹ کے مطابق تاحال دھماکے کی نوعیت معلوم نہیں ہوسکی ہے، پولیس واقعے کی تحقیقات کررہی ہے۔