Archives June 2019

لاہور (میڈیا 92 نیوز آن لائن ) وزیراعظم عمران خان سے ملاقات کرنے والے مسلم لیگ (ن) کے اراکین کے نام سامنے آگئے جب کہ سابق لیگی رکن اسمبلی یونس انصاری نے دعویٰ کیا ہے کہ اُن کی قیادت میں 15 ایم پی ایز اور 5 ایم این ایز نے وزیراعظم عمران خان سے ملاقات کی ہے۔

ذرائع کے مطابق وزیراعظم عمران خان سے ملاقات کرنے والے 11 لیگی اراکین میں غیاث الدین، شعیب اویسی، چوہدری اشرف انصاری، فیصل خان نیازی، غلام قاسم ہنجرا، محمد ارشد، اظہر چانڈیہ، غضنفر لنگاہ، جلیل احمد شرقپور، نشاط احمد خان ڈاہا شامل تھے۔

سابق لیگی رہنما اور آزاد حیثیت سے انتخابات میں کامیاب ہونے والے رکن صوبائی اسمبلی یونس انصاری نے کہا کہ مسلم لیگ (ن) کے ممبران اسمبلی نے میری قیادت میں عمران خان سے ملاقات کی اور جلد ہی پارٹی کے سندھ کے بڑے گروپ کی وزیر اعظم سے ملاقات کرائی جائے گی۔

یونس انصاری کا کہنا تھا کہ شہباز شریف نااہل سیاستدان ہیں، جنھیں اپنے گھر کی خبر نہیں، اقبال گوجر نے انہیں مسلم لیگ (ن) میں واپسی کی دعوت دی جو ٹھکرا دی تھی۔

ذرائع کے مطابق وزیراعظم عمران خان سے ملنے والوں میں سابق لیگی رکن اسمبلی یونس انصاری کے بھائی ایم پی اے اشرف انصاری بھی شامل تھے۔

دوسری جانب لیگی رکن صوبائی اسمبلی مولانا غیاث الدین کا کہنا ہے کہ عمران خان سے میں اور جلیل شرقپوری اپنے حلقے کے مسائل بارے ملے تھے تاہم میں مسلم لیگ (ن) میں ہی ہوں۔

x

ٹامیوالی (میڈیا 92 نیوز آن لائن ) مسلم لیگ ن کے ممبر قومی اسمبلی ریاض پیرزاد نے پارٹی چھوڑنے کی افواہوں کی تردید کر دی۔

سرائیکی زبان میں جاری کیے گئے اپنے ویڈیو پیغام میں انہوں نے کہا کہ میرا قائد اور رہبر نواز شریف جیل میں ہے، میں ایسے وقت میں انہیں کیسے چھوڑ سکتا ہوں؟

انہوں نے کہا کہ میں عزت دار آدمی ہوں، میری پارٹی چھوڑنے کی افواہیں مکمل طور پر غلط ہیں۔

ن لیگی رکن اسمبلی نے میڈیا سے درخواست کی کہ وہ افواہیں پھیلانے سے گریز کرے۔

ویڈیو میں ان کا کہنا تھا کہ میں اپنے پورے جذبے اور ایمان کے ساتھ ن لیگ کے ساتھ ہوں اور میرا قائد نواز شریف ہے۔

گزشتہ روز وزیر اعظم کے معاون خصوصی برائے سیاسی امور نعیم الحق نے اپنے ایک ٹویٹ کے ذریعے دعویٰ کیا تھا کہ مسلم لیگ ن کے 15 ارکان اسمبلی نے بنی گالہ میں وزیراعظم سے ملاقات کی ہے۔

ان کے اس ٹویٹ کے بعد ایسے ارکان کے بارے میں قیاس آرائیاں شروع ہو گئیں جنہوں نے عمران خان سے ملاقات کی تھی۔

اس حوالے سے ریاض پیرزادہ کا نام بھی افواہوں کی زد میں رہا جس کی انہیں ویڈیو پیغام کے ذریعے کھل کر تردید کرنا پڑی۔

آج ہی وفاقی وزیر ریلوے شیخ رشید احمد نے دعوی کیا ہے کہ حزب اختلاف کے 9 ارکان قومی اسمبلی پاکستان تحریک انصاف میں شمولیت کے لیے تیار بیٹھے ہیں۔

لاہور میں میڈیا سے بات کرتے ہوئے انہوں نے یہ بھی کہا ان ارکان کی تعداد بیس تک بھی پہنچ سکتی ہے۔

لاہور (اپنے رپورٹرسے ) وفاقی وزیر ریلوے شیخ رشید احمد نے انکشاف کیا ہے کہ 9 ارکان قومی اسمبلی تحریک انصاف کا حصہ بننے کے لیے تیار ہیں اور یہ تعداد بیس تک جا سکتی ہے۔

ایکسپو سنٹر لاہور میں میڈیا سے گفتگو کرتے ہوئے انہوں نے کہا کہ حزب اختلاف والے کہتے تھے کہ بجٹ منظور نہیں ہو گا، اب وہ پچیس ووٹوں سے ہو چکا ہے، مرکز میں اس وقت نو ممبر جوگر پہن کر پی ٹی آئی میں شامل ہونے کو تیار بیٹھے ہیں۔

وفاقی وزیر کا کہنا تھا کہ کل سے عمران خان کی سیاست شروع ہو گئی ہے، ہم کرپٹ مافیا اور کمیشن خوروں کے لئے ملک کو سیاسی قبرستان بنا دیں گے۔

انہوں نے کہا کہ مولانا فضل الرحمن اپوزیشن کے ساتھ ہاتھ کرنا چاہتے تھے لیکن ان کے اپنے ساتھ ہاتھ ہو گیا۔

انہوں نے قبضہ گروپ کو تنبیہ کی کہ وہ نوے دن کے اندر ریلوے میں پیسے جمع کرا دیں۔

چیئرمین سینیٹ کی تبدیلی کو سیاسی سودے بازی قرار دیتے ہوئے انہوں نے کہا کہ آصف زرداری کو چیئرمین بننا اور بنانا آتا ہے۔

ان کا کہنا تھا کہ شہباز لیگ اور نواز لیگ الگ الگ پارٹی ہیں، شہباز شریف کی بھتیجی نے نون لیگ پر قبضہ کر لیا ہے، اب میثاق جمہوریت نہیں مذاق جمہوریت بن گیا ہے۔

شیخ رشید نے اعلان کیا کہ رائل پام کیس جیتنے کی خوشی میں وہ 11 اپریل کو تمام صحافیوں کو ڈنر دیں گے۔

ان کا کہنا تھا کہ فریٹ کی 6 ٹرینیں شروع کی جائیں گی اور فریٹ کا شعبہ کراچی منتقل کر دیا جائے گا۔

انہوں نے کہا کہ کسی کو الٹا کر کچھ نہیں نکلےگا، پیار سے پیسے نکالنا چاہئیں۔

کھانے کی اشیا میں ملاوٹ، دودھ کے نام پر نقلی پاؤڈر کی فروخت اور دیگر جعلی اشیائے ضروریہ کی خبریں آئے روز ذرائع ابلاغ کی زینت بنتی رہتی ہیں لیکن کیا آپ کو معلوم ہے کہ پیزے میں نقلی گوشت بھی استعمال کیا جارہا ہے۔

نیوزی لینڈ کی ایک معروف فوڈ کمپنی پر اپنی مصنوعات میں نقلی گوشت استعمال کرنے کا الزام لگایا گیا ہے۔

نیوزی لینڈ کی ’ہیل پیزا‘ نامی کمپنی کو نوٹس بھیجا گیا ہے کہ آپ گاہکوں کو نقلی گوشت پیش کر کے قانون کی خلاف ورزی کر رہے ہیں۔

کمپنی نے اس الزام کے جواب میں کہا ہے کہ وہ اپنے گاہکوں کو بتا کر اور ان کی مرضی سے گوشت کا متبادل استعمال کرتے ہیں۔

پیزا اور دیگر مصنوعات میں امریکی کمپنی ’بیونڈ میٹ‘ کی تیار کردہ پیٹیز استعمال کی جاتی ہیں جو مٹر، پروٹین، ناریل کا تیل اور آلو کے اسٹارچ سے تیار کی جاتی ہیں۔

مختلف اجزا کے استعمال سے ایسا مادہ تیار کیا جاتا ہے جو پکانے اور کھانے میں بالکل گوشت کی طرح لگتا ہے۔

کمپنی کے جنرل منیجر کا کہنا تھا کہ اگر گاہک پوچھتے ہیں تو انہیں صاف صاف بتا دیا جا تا ہے کہ یہ درختوں اور پودوں سے تیارکردہ گوشت سے پاک مادہ ہے جس سے ظاہر ہوتا ہے کہ ہم کسی کو گمراہ کرنے کی کوشش نہیں کر رہے۔

اسلام آباد (میڈیا 92 نیوز آن لائن ) متحدہ قومی موومنٹ(ایم کیو ایم) کے رہنما ڈاکٹرعمران فاروق قتل کیس کے ٹرائل میں مسلسل تاخیر کے سبب ملزمان نے خود ہائی کورٹ سے رجوع کرلیا ہے۔

عدالت کی جانب سے 2018 میں معظم علی، خالد شمیم اور محسن علی پر مذکورہ کیس میں فرد جرم عائد کی گئی تھی تاہم تینوں ملزمان نے صحت جرم سے انکار کردیا تھا۔

گرفتار ملزمان نے ایک سال بعد اسلام آباد ہائی کورٹ میں درخواست دائر کی ہے کہ ٹرائل جلد از جلد مکمل کیا جائے۔

درخواست کے متن میں درج ہے کہ وفاقی تحقیقاتی ایجنسی پانچ سال سے تفتیش کر رہی ہے اور مہلت پر مہلت لے کر ملزمان کا استحصال کیا جا رہا ہے۔ ملزمان نے استدعا کی ہے کہ فیصلہ سنانے کی تاریخ جلد مقرر جائے۔

خیال رہے کہ ایف آئی نے انسداد دہشتگردی عدالت(اے ٹی سی) سے درخواست کی تھی کہ برطانیہ سے شواہد اکٹھے کرنے کے لیے مزید مہلت دی جائے، جسے مسترد کردیا گیا تھا۔

ایف آئی اے نے انسداد دہشتگردی عدالت کے مذکورہ فیصلے کیخلاف ہائی کورٹ سے رجوع کیا۔ اسلام آباد ہائی کورٹ نے فریقین کو نوٹسز جاری کر کے اے ٹی سی کو کارروائی مزید آگے بڑھانے سے روک رکھا ہے۔

واضح رہے کہ ڈاکٹر عمران فارق قتل کیس میں مجسٹریٹ کے رو برو اعتراف جرم کرنے والے دو ملزمان اپنے بیان سے منحرف ہو گئے ہیں۔

ملزم خالد شمیم نے رواں سال اپریل میں عدالت کو دیے گئے بیان میں کہا تھا کہ بیان قلمبند کرنے سے پہلے اسے خوف کے سائے میں رکھا، تشدد کا نشانہ بنایا گیا اورمرضی کے خلاف تفتیشی افسر کی ہدایت پر بیان ریکارڈ کیا۔

کیس کا دوسرے اور اہم ملزم محسن علی بھی اپنے اعترافی بیان منحرف ہوچکا ہے۔ ملزم محسن علی نے کہا کہ اس نے مجسٹریٹ کو کوئی اعترافی بیان نہیں دیا جب کہ پہلے سے تیار اعترافی بیان پر مجسٹریٹ نے دستخط کیے اور مہر لگائی۔

اسلام آباد (میڈیا 92 نیوز آن لائن ) وزیراعظم عمران خان کی زیرصدارت چھٹی والے دن بھی ایک اہم اجلاس طلب کیا گیا ہے جس میں ایمنسٹی اسکیم سے متعلق مشاورت ہوگی۔

ذرائع کا کہنا ہے کہ اسکیم کی آخری تاریخ میں دو دن کی توسیع کی جاسکتی ہے جس کی حتمی منظوری عمران خان ہی دیں گے۔

توسیع کی صورت میں امکان ہے کہ وزیراعظم آج شام قوم سے اہم خطاب بھی کریں گے۔

خیال رہے کہ اثاثہ جات ظاہر کرنے کے حوالے سے ایمنسٹی اسکیم کا آج آخری دن ہے اور فیڈرل بورڈ آف ریونیو(ایف بی آر) نے بھی اپنے دفاتر رات 11 بجے تک کھلے رکھنے کا اعلان کیا ہے تاکہ زیادہ سے زیادہ لوگ فائدہ اٹھا سکیں۔

اس سے قبل 10 جون کو بھی وزیر اعظم نے قوم سے اہم خطاب کیا تھا جس میں 30 جون تک اثاثے ظاہر کرنے کی ہدایت کرتے ہوئے کہا تھا کہ پھر موقع نہیں ملے گا۔

وزیر اعظم کا کہنا تھا کہ گزشتہ 10 سال میں پاکستان کا قرضہ 6 ہزار ارب روپے سے 30 ہزار ارب روپے تک پہنچ گیا اور ٹیکس ادائیگی کے بغیر قوم ترقی نہیں کر سکتی۔

اپنے خطاب میں انہوں نے کہا کہ عوام ایمنسٹی اسکیم کا فائندہ اٹھائیں اور اپنے بچوں اور ملک کا مستقبل ٹھیک کریں۔

عمران خان نے کہ 30 جون تک تمام افراد اپنے بے نامی اکاؤنٹس کی تفصیلات فراہم کریں اور ہمیں موقع دیں کہ قوم کو پیروں پر کھڑا کر کے لوگوں کو غربت سے نکالیں۔

اسلام آباد (میڈیا 92 نیوز آن لائن ) قومی احتساب بیورو(نیب) نے نندی پور پاور پروجیکٹ کیس میں پاکستان تحریک انصاف کے رہنما بابر اعوان اور جسٹس ریٹائرڈ ریاض کیانی کی بریت چیلنج کرنے کا فیصلہ کیا ہے۔

احتساب عدالت کے 25 جون 2019 والے فیصلے کو اسلام آباد ہائی کورٹ میں چینلج کیا جائے گا۔

نیب کا موقف ہے کہ احتساب عدالت نے شواہد کو نظر انداز کرتے ہوئے جلدی بازی میں قانون کے منافی بابر اعوان کی بریت کا فیصلہ کیا۔
میڈیا رپوٹس کے مطابق عدالت کی جانب سے تحریری فیصلہ ملنے پر اپیل تیار کی جائے گی۔

خیال رہے کہ 25 جون کو اسلام آباد کی احتساب عدالت نے نندی پور پاور پراجیکٹ ریفرنس میں سابق وزیراعظم راجہ پرویز اشرف اور دیگر چار ملزمان کو سزا سنائی جب کہ بابر اعوان اور ریاض کیانی کو بری کردیا تھا۔

کیس میں نامزد سات ملزمان نے بریت کی پانچ درخواستیں دائر کی تھیں۔ سابق وزیر اعظم راجہ پرویز اشرف، سابق وزیر قانون و انصاف بابر اعوان، شمائلہ محمود، جسٹس ریٹائرڈ ریاض کیانی اور ڈاکٹر ریاض نے بھی بریت کی درخواستیں دائر کی تھی۔

پشاور (میڈیا 92 نیوز آن لائن ) پشاور ہائی کورٹ نے تعلیمی نصاب کی اسلامیات کی کتابوں میں مال غنیمت کو لوٹ کا مال لکھنے سے متعلق کیس کی سماعت کی۔

میڈیا رپورٹس کے مطابق عدالتی حکم پر صوبائی سیکرٹری تعلیم عدالت کے روبرو پیش ہوئے۔

عدالت نے قرآنی آیات کا فوری طور پر ترجمہ درست کرنے اور طلباء کے پاس پہلے سے موجود اسلامیات کی کتابیں واپس لینے کا حکم دے دیا۔

سماعت کے دوران جسٹس قیصر رشید نے سیکرٹری تعلیم سے استفسار کیا کہ آپ لوگ نئی نسل کو تباہ کررہے ہیں اور ان کے ذہنوں کو آلودہ کررہے ہیں، آپ کس کے ایجنڈے پر کام کررہے ہیں؟

انہوں نے کہا کہ کیوں نہ عدالت اس جرم کے مرتکب افراد کے خلاف مقدمہ درج کرنے کا حکم دے۔

عدالت نے معاملے پر 10 جولائی کو وفاقی سیکرٹری تعلیم کو بھی طلب کرلیا۔

کراچی (میڈیا 92 نیوز آن لائن ) سندھ حکومت نے کراچی سمیت سندھ بھر کے طلبا کو بسوں کے کرایوں میں 50 فیصد کی رعایت دینے کا اعلان کر دیا۔

سندھ کے وزیر ٹرانسپورٹ اویس شاہ نے سندھ بھر کے طلبا کو بڑی خوشخبری سنا دی۔ اویس شاہ نے سندھ بھر کے ٹرانسپورٹرز کو تمام طلبا سے 50 فیصد کرایہ لینے کی ہدایت کر دی۔

اویس شاہ نے اعلان کرتے ہوئے کہا کہ سندھ بھر کے ٹرانسپورٹرز اب طلبا سے 50 فیصد یعنی آدھا کرایہ وصول کریں گے اور احکامات پر عمل نہ کرنے والے ڈرائیورز کے خلاف کارروائی کی جائے گی جبکہ گاڑیوں کی روٹ پرمٹ بھی منسوخ کر دیے جائیں گی۔ حکم پر عملدرآمد کے لیے ریجنل سیکریٹریز خود نگرانی کریں گے۔

انہوں نے سندھ کے دارلحکومت کراچی میں بھی ٹرانسپورٹرز کو طلبا سے 50 فیصد کرایہ لینے کی ہدایت کر دی۔

وزارت سائنس اینڈ ٹیکنالوجی کے ماتحت کامسیٹس یونیورسٹی میں انتظامی بحران شدت اختیار کرگیا، یونیورسٹی کے ساتوں کیمپسز میں فیکلٹی کی طرف سے امتحانات کے بائیکاٹ باعث 40 ہزار طلبہ کا مستقبل داؤ پر لگ گیا۔ 18 جون کو احتجاجی اساتذہ کی طرف سے یونیورسٹی کے اسلام آباد مین کیمپس کے مرکزی گیٹ کو تالے لگا کر بند کردیا گیا تھا۔

سکھر: پاکستان کی پہلی آرٹس اینڈ ڈیزائن یونیورسٹی مقررہ وقت میں مکمل نہیں ہوسکی کیونکہ سیاسی مداخلت، فنڈز کی بندش اور انتظامی عدم دلچسپی سےتعمیراتی کام کو بریک لگ گئی ہے۔

سکھر کے بلند وبالا پہاڑوں کے درمیان وسیع وعریض رقبے پر پھیلی خوبصورت یونیورسٹی کا کام مقررہ مدت گزر جانے کے باوجود مکمل نہیں ہوسکا۔

سکھر میں اروڑ آرٹس، ڈیزائن اینڈ آرکیٹیچکر یونیورسٹی کا سنگ بنیاد 2015 میں رکھا گیا اور چار سال میں یونیورسٹی کو مکمل کرنے کا دعوی کیا گیا۔

مقررہ وقت گزر جانے کے باوجود منصوبہ مکمل نہ ہو سکا ۔ پراجیکٹ ڈائریکٹر مصطفی مومنائی کے مطابق فنڈز کی کمی کے باعث منصوبہ التوا کا شکار ہے۔

60 ایکڑ اراضی پر بننے والی یونیورسٹی میں آرکیٹیکچر، ، انٹیریئر ڈیزائن،فائن آرٹس، پینٹنگ، کیلی گرافی، مجسمہ سازی، سرامکس ڈیزائن، فیشن ڈیزائن، فرنیچر ڈیزائن سمیت دیگر جدید فنون کے کورسز کرائے جائیں گے۔

منصوبے میں شامل جمنازیم، اسٹاف کی رہائش گاہ، بجلی اور فرنیچر سمیت رنگ سازی کا کام شروع ہی نہیں ہو سکا۔ شہریوں کو سیر و تفریح کے لیے یونیورسٹی میں ہی 260 فٹ بلند مینار بھی زیر تعمیر ہے اس مینار پر چڑھ کر شہری خوبصورت نظاروں سے لطف اندوز ہو سکیں گے۔

شہریوں کا کہنا ہے کہ سکھر میں ملک کی اعلی معیار کی یونیورسٹی کے منصوبے کو پایہ تکمیل تک پہنچا کر طلبا کو جدید فنون سے روشناس کرایا جاسکتا ہے۔