Archives November 2017

لاہور (میڈیا نائن ٹو ڈاٹ ٹی وی)لاہور ہائیکورٹ نے ڈی جی پارکس اینڈ ہارٹیکلچرل اتھارٹی میاں شکیل کو عدالت کے روبرو ذاتی حییثیت میں طلبی کے لیے متفرق درخواست پر فیصلہ محفوظ کر لیا.تفصیلات کے مطابق آئینی درخواست پاکستان تحریک انصاف کی رہنما عندلیب عباس نے ایڈووکیٹ شیراز ذکا کی وساطت سے دائر کی.. درخواستگزار کی جانب سے موقف اختیار کیا گیا کہ لاہور شہر میں کینال روڈ توسیعی منصوبے اور دیگر ترقیاتی منصوبوں کے لیے درخت کاٹے گئے.. درختوں کی کٹائی اور متبادل درخت لگانے سے متعلق  تفصیلات کے لیے ہائیکورٹ سے رجوع کیا.. 
درختوں کی کٹائی سے متعلق درخواست دائر کیے 10 ماہ گزر گئے. درخواست گزار کے وکیل نے دلائل دیتے ہوئے کہا کہ عدالتی حکم کے باوجود ڈائریکٹر جنرل پارک اینڈ ہارٹیکلچرل اتھارٹی نے جواب داخل نہیں کروایا…. ڈائریکٹر جنرل پارک اینڈ ہارٹیکلچرل اتھارٹی جواب داخل نہ کروا کر عدالت کا وقت ضائع کر رہے ہیں…. لہذا عدالت ڈائریکٹر جنرل پارک اینڈ ہارٹیکلچرل اتھارٹی کو ریکارڈ سمیت ذاتی حیثیت میں طلب کرے..عدالت نے دلائل مکمل ہونے پر ڈی جی پارکس اینڈ ہارٹیکلچرل اتھارٹی میاں شکیل کو عدالت کے روبرو ذاتی حییثیت میں طلبی کے لیے متفرق درخواست پر فیصلہ محفوظ کر لیا..

لاہور( میڈیا نائن ٹو ڈاٹ ٹی وی) لاہورہائیکورٹ نے چیف سیکرٹری پنجاب کے خلاف توہین عدالت درخواست پر چیف سیکرٹری پنجاب کو نوٹس جاری کرتے ہوئے جواب طلب کر لیا. تفصیلات کے مطابق لاہور ہائی کورٹ کی جسٹس عائشہ اے ملک نے مختار احمد کی درخواست پر سماعت کی. درخواستگزار کی جانب سے موقف اختیار کیا گیا کہ محکمہ ہیلتھ میں جونیر کلرک کے طور پر فرائض سر انجام دے رہا تھا..غیر قانونی طور پر ایگزیکٹو ڈسٹرکٹ آفیسر ہیلتھ نے نوکری سے برطرف کر دیا..درخواستگزار کی جانب سے نشاندہی کی گئی کہ نوکری سے برطرف کرنے سے پہلے کوئی شوکاز نوٹس نہیں دیا گیا. دوران سماعت درخواست گزار کے وکیل نے دلائل دیتے ہوئے کہا کہ عدالت نے چیف سیکرٹری کو موقف سن کر فیصلہ کرنے کا حکم دیا تھا.لیکن عدالتی حکم کے باوجود درخواست پر فیصلہ نہیں کیا گیا. درخواست گزار کی جانب سے عدالت عالیہ سے استدعا کی گئی کہ عدالت چیف سیکرٹری پنجاب کے خلاف توہین کے تحت کارروائی کا حکم دے.. عدالت نے چیف سیکرٹری پنجاب کو نوٹس جاری کرتے ہوئے جواب طلب کر لیا.

 لاہور (میڈیا نائن ٹو ڈاٹ ٹی وی) لاہورہائیکورٹ نے جائیداد منتقلی پر شیڈول ٹیکس کے علاوہ کنسٹرکشن ٹیکس کے خلاف انٹرا کورٹ اپیل پر ڈی سی لاہور اور کمشنر ان لینڈ ریونیو کو نوٹس جاری کرتے ہوئے جواب طلب کر لیا. تفصیلات کے مطابق لاہورہائیکورٹ کے جسٹس مرزا وقاص روف کی سربراہی میں دو رکنی بنچ نے ایڈوکیٹ الیاس مغل کی اپیل پر سماعت کی.ایڈوکیٹ الیاس مغل کی جانب سے موقف اختیار کیا گیا کہ ڈسٹرکٹ کلکٹر کی جانب سے شیڈول ٹیکس کے علاقہ کنسٹرکشن ٹیکس بھی عائد کر دیا گیا ہے.کنسٹرکشن ٹیکس عائد کرنا قانون کی خلاف ورزی ہے.درخواستگزار وکیل نے دلائل دیتے ہوئے کہا کہ ایک ٹیکس کی موجودگی میں دوسرا ٹیکس عائد نہیں کیا جا سکتا..لہذا عدالت اضافی ٹیکس وصولی کالعدم قرار دے. عدالت نے ڈپٹی کمشنر لاہور سمیر احمد سعید اور کمشنر ان لینڈ ریونیو کو نوٹس جاری کرتے ہوئے جواب طلب کر لیا اور اپیل پر مزید کاروائی دو ہفتوں کے لیے ملتوی کر دی

 لاہور (کورٹ رپورٹر)لاہور ہائیکورٹ نے پنجاب ریونیو اتھارٹی کی تشکیل کے خلاف درخواستوں پر  6 دسمبر تک فریقین کے وکلا کو دلائل مکمل کرنے کی ہدایت کرتے ہوئے سماعت ملتوی کردی. تفصیلات کے مطابق لاہور ہائی کورٹ کے جسٹس شاہد جمیل خان نے سو سے زائد درخواستوں پر سماعت کی. درخواستگزاران کے وکلا نے موقف اختیار کیا کہ پنجاب ریونیو اتھارٹی کے قانون بہت خامیاں ہیں.. جب قانون ہی درست نہیں بنایا گیا تو اتھارٹی کے اقدامات بھی درست نہیں.. وکلا کی جانب سے موقف اختیار کیا گیا کہ پنجاب ریونیو اتھارٹی بلاجواز سیلز ٹیکس اور دیگر ٹیکسز کے نوٹس جاری کررہی ہے.. اتھارٹی کے حکام کی تقرریاں بھی خلاف ضابطہ کی گئی ہیں، تاہم عدالتی  وقت ختم ہونے پر سماعت ملتوی کردی گئی عدالت نے آئندہ سماعت پر فریقین کے وکلا دلائل مکمل کرنے کا حکم دے دیا

 لاہور (میڈیا نائن ٹو ڈاٹ ٹی وی)لاہور ہائیکورٹ نے درآمدی اشیاء پر عائد 45 فیصد ریگولیٹری ڈیوٹی کے خلاف درخواست پر وفاقی حکومت کو نوٹس جاری کرتے ہوئے 29 دسمبر تک جواب طلب کر لیا. تفصیلات کے مطابق لاہور ہائی کورٹ کے جسٹس شاہد کریم نے میسرز آدم ٹریڈرز کی آئینی درخواست پر سماعت کی عدالت نے اسی نوعیت کی دیگر درخواستیں بھی یکجا کرنے کا حکم دے دیا. درخواستگزار کی جانب سے موقف اختیار کیا گیا کہ فنانس ایکٹ 2017ء کے تحت وفاقی وزیر خزانہ نے 700 سے زائد درآمدی اشیاء پر ریگولیٹری ڈیوٹی عائد کی ہے. دوران سماعت درخواستگزار کے وکیل نے دلائل دیتے ہوئے کہا کہ درآمدی اشیاء پر ریگولیٹری ڈیوٹی عائد کرنے سے پہلے پارلیمنٹ سے منظوری نہیں لی گئی. وکیل نے قانونی نقطہ بیان کیا کہ وفاقی وزیر خزانہ کو فنانس ایکٹ 2017ء کے سیکشن 18 کی ضمنی دفعہ 3 کے تحت ریگولیٹری ڈیوٹی عائد کرنے کا اختیار دیا گیا ہے.. ریگولیٹری ڈیوٹی عائد کرنے کا اختیار فرد واحد کو دینا پارلیمنٹ کی بالادستی سے منکر ہونے کے مترادف ہے، درخواست گزار کے وکیل نے عدالت کو آگاہ کیا کہ درآمدی اشیاء پر ریگولیٹری ڈیوٹی کا نفاذ رولز آف بزنس 1973ء کی خلاف ورزی ہے، ریگولیٹری ڈیوٹی کا نفاذ ل آئین کے آرٹیکل 3، 9، 18، 23، 24، 77، 90، 91، 92، 97، 99، 142 اور 189 کیخلاف ورزی ہے.  درخواستگزار کے وکیل نے عدالت سے استدعا کی کہ عدالت فیڈرل بورڈ اف ریونیو کا ریگولیٹری ڈیوٹی عائد کرنے کا ایس آر او کالعدم کیا جائے. فنانس ایکٹ 2017ء  کی دفعہ (3) 18 کو آئین پاکستان سے متصادم قرار دے کر کالعدم کیا جائے. عدالت نے درخواست سماعت کے لیے منظور کرتے ہوئے وفاقی حکومت کو نوٹس جاری کرتے ہوئے جواب طلب کر لیا اور درخواست پر مزید کاروائی 29 دسمبر تک ملتوی کردی.

لاہور( میڈیا نائن ٹو ڈاٹ ٹی وی) لاہور ہائیکورٹ نے  پنجاب میں گونگے بہرے بچوں پر تشدد  کے خلاف درخواست  میں سپیشل ایجوکیشن فار سٹاف ایسوسی ایشن کے فریق بننے کی درخواست پر نوٹس جاری کر دیئے ہیں.تفصیلات کے مطابق چیف جسٹس سید منصور علی شاہ نے گونگے بہرے بچوں پر تشدد کے واقعہ کیخلاف درخواست پر سماعت کی. سماعت کے دوران سپیشل ایجوکیشن فار سٹاف ایسوسی ایشن نے فریقین بننے کیلئے درخواست دی اور استدعا کی کہ ایسوسی ایشن کو بھی اس معاملے پر فریق بنا کر ان کا موقف سنا جائے. ہائیکورٹ نے درخواست پر نوٹس جاری کر دیئے. چیف جسٹس لاہور ہائیکورٹ نے ڈسکہ میں گورنمنٹ اسپیشل ایجوکیشن سنٹر کے طلباء وطالبات پر سرکاری بس میں تشدد کے واقعہ کا نوٹس لیا تھا اور  مستقبل میں ایسے واقعات کی روکُ تھام کے لئے سپیشل بچوں کی بسوں میں پولیس اہلکار تعینات کرنے کا حکمُ دیا تھا

لاہور( کورٹ رپورٹر) لاہور ہائیکورٹ نے احمد پور شرقیہ میں آئل ٹینکر آلٹنے سے  ہلاکتوں کے خلاف درخواست پر متعلقہ اداروں اور کمپنیوں  سے جواب طلب کر لیا….. تفصیلات کے مطابق چیف جسٹس لاہور ہائیکورٹ جسٹس منصور علی شاہ نے سانحہ شرقیہ پور کے بارے میں درخواست پر سماعت کی. اوگرا نے عدالتی حکم پر پانچ صفحات پر مشتمل جواب داخل کیا جس میں بتایا گیا کہ چار ماہ کے دوران 22 آئل ٹینکرز الٹنے کے واقعات ہوئے ہیں. جواب میں اوگرا نے واضح کیا کہ اوگرا نے کسی ٹینکر کو لائسنسن جاری  نہیں کیا بلکہ لائسنس جاری کرنے کا اختیار چیف انسپکٹر محکمہ ایکسپلوسیو کے پاس ہے۔اوگرا نے عدالت کو بتایا کہ قانون کے تحت آئل کمپنیوں کو حادثات سے بچاو کے اقدامات کی ہدایات جاری کی گئیں ہیں اور آئل کمپنیوں کو پابند بنایا گیا کہ کسی حادثے کی صورت میں اڑتالیس گھنٹوں اوگرا کو رپورٹ جمع کرائی جائے۔اوگرا  کے جواب کا جائزہ لینے کے بعد چیف جسٹس لاہور ہائیکورٹ نے متعلقہ اداروں کو نوٹس جاری کر دیئے. درخواست پر مزید کارروائی 13 دسمبر کو ہوگی. 

لاہور(میڈیا نائن ٹو ڈاٹ ٹی وی) پانی کی کمی کے پیش نظرارسا نے جنوبی پنجاب کی نہریں دو ماہ کیلئے بند کرنے کا فیصلہ کرلیا، یکم دسمبر سے ڈیرہ غازی خان اور مظفر گڑھ کی نہریں بند کردی جائیں گی۔ترجمان ارسا کی جانب سے بتایا گیا ہے کہ نہروں کی بندش کا فیصلہ تربیلا اور منگلا ڈیم میں پانی کا اخراج کم ہونے کے باعث کیا گیا ہے۔ تربیلا سے پانی کا اخراج بتیس ہزار جبکہ منگلا ڈیم سے تیس ہزار کیوسک رہ گیا۔ پانی کی کمی کے باعث جنوبی پنجاب کو پانچ ہزار کیوسک پانی کی کمی کا سامنا ہوگا۔ نہریں بند ہونے سے کاشتکاروں کیلئے نہ صرف ربیع سیزن میں مشکلات ہوں گی بلکہ پینے کے پانی کی بھی قلت کا خدشہ ہے۔

اسلام آباد(میڈیا نائن ٹو ڈاٹ ٹی وی) اوگرا نے آئندہ ماہ کے لیے پٹرولیم مصنوعات کی قیمتوں میں اضافے کی سمری حکومت وزارت پیٹرولیم کو بھجوادی۔ذرائع کے مطابق اوگرا نے پٹرولیم مصنوعات کی قیمتوں میں اضافے کی سمری وزارت پٹرولیم کو بھیج دی ہے، جس میں پٹرول کی قیمت میں 1.48 روپے، مٹی کے تیل کی قیمت میں 15.35 روپے جب کہ ہائی اسپیڈ ڈیزل 1.20 روپے اور لائٹ اسپیڈ ڈیزل کی قیمت میں 13.15 روپے اضافے کی تجویز دی گئی ہے۔
واضح رہے کہ اقتصادی رابطہ کمیٹی نے ہائی اسپیڈ ڈیزل کی قیمت ڈی ریگولیٹ کرنے کی منظوری دی تھی، ہائی اسپیڈ ڈیزل کا آئی مارکیٹنگ کمپنی اورڈیلر مارجن کا تعین آئل مارکیٹنگ کمپنی کرے گی۔اوگرا کی سفارشات کا جائزہ لیتے ہوئے حکومت پیٹرولیم مصنوعات کی قیمتوں میں ردوبدل کاحتمی فیصلہ کرے گی۔

لاہور(میڈیا نائن ٹو ڈاٹ ٹٰ وی) عید میلاد النبیﷺ کے موقع پر عام تعطیل کے باعث جمعہ یکم دسمبر کو بینک، مالیاتی ادارے، اسٹاک مارکیٹ، تجارتی مراکز اور دیگر منڈیاں بند رہیں گی۔ذرائع کے مطابق عید میلاد النبیﷺ کے موقع پر حکومت کی جانب سے عام تعطیل دی گئی ہے جس کے باعث جمعہ یکم دسمبر کو بینک، مالیاتی ادارے، اسٹاک مارکیٹ، تجارتی مراکز اور دیگر منڈیاں بند رہیں گی۔
اسی سلسلے میں اسٹیٹ بینک پاکستان کی جانب سے جاری اعلامیے کے مطابق بینک دولت پاکستان بھی جمعہ یکم دسمبر 2017 کو عید میلاد النبیﷺ کے موقع پر بند رہے گا۔