Archives December 2020

شدید دھند کے باعث موٹروے کو ہر قسم کی ٹریفک کیلئے بند کردیا گیا۔

ترجمان موٹروے پولیس کے مطابق حد نگاہ کم ہونے کے باعث موٹروے ایم تھری کو لاہور سے رجانہ تک بند کردیا گیا ہے۔ ایم تھری پر حد نگاہ 200 سے 300 میٹر تک ہے۔ ترجمان نے مزید بتایا کہ دھند کی وجہ سے موٹروے ایم ٹو شیخوپورہ سے پنڈی بھٹیاں تک بند کردی گئی ہے۔

ترجمان موٹروے پولیس نے ہدایت کی ہے کہ لوگ غیر ضروری سفر سے گریز کریں اور سفر کے دوران گاڑیوں پر فوگ لائٹس کے استعمال کو یقینی بنائیں۔

خیال رہے کہ اتوار کے روز ہونے والی بارش کی وجہ سے دھند میں کمی آئی تھی اور پیر کو مطلع صاف رہا لیکن رات ہوتے ہی ایک بار پھر دھند نے ڈیرے ڈال لیے۔

کراچی کے علاقے کشمیر کالونی میں واقع گھر میں آگ لگنے سے جھلس کر 3 بچے جاں بحق ہو گئے جبکہ 3 افراد زخمی ہوئے ہیں۔
پولیس کے مطابق فائر بریگیڈ نے پہنچ کر گھر میں لگی ہوئی آگ پر قابو پا لیا ہے، آگ لگنے کے وقت گھر میں میاں بیوی اور ان کے 4 بچے تھے۔آگ سے جھلس کر 3 بچے جاں بحق، جبکہ ایک بچہ اور اس کے والدین زخمی ہو گئے۔
جاں بحق ہونے والے بچوں کی لاشوں اور زخمیوں کوہسپتال منتقل کر دیا گیا ہے جہاں برنس وارڈ میں زخمیوں کو طبی امداد دی جا رہی ہے۔علاقہ پولیس کا کہنا ہے کہ گھر میں آگ لگنے کی وجوہات معلوم نہیں ہو سکی ہیں جنہیں جاننے کیلئے تحقیقات کی جا رہی ہیں۔

اداکار فیروز خان نے شوبز انڈسٹری چھوڑکر واپس آنے کی وجہ بتاتے ہوئے کہا ہے کہ کچھ مختلف کام کرنے ہیں اسی لیے انڈسٹری میں واپس آیا ہوں۔
ویب سائٹ کو دیئے گئے انٹرویو کے مطابق فیروز خان نے کہا کہ میرے شیخ حضرت سلطان محمد علی صاحب ہیں جوکہ حضرت سلطان باہوؒ کی دسویں اولاد ہیں، انہوں نے مجھے حکم دیا تھا کہ میں یہ انڈسٹری نہ چھوڑوں۔
فیروز خان نے یہ بھی کہا کہ شیخ صاحب نے مجھے کہا ہے کہ میرے لیے ضروری ہے کہ میں شوبز انڈسٹری سے جڑا رہوں۔ یہی وجہ ہے کہ مجھے یہاں رہتے ہوئے کچھ مختلف کرنا ہے اس لیے میں انڈسٹری میں واپس آیا، آج کل نئے ڈراموں پر کام کر رہا ہوں اور بہت جلد اپنا پروڈکشن ہاو¿س بھی شروع کرنے والا ہوں۔
واضح رہے کہ فیروز خان نے رواں سال کی ابتداءمیں ٹویٹر پر اعلان کرتے ہوئے کہا تھا کہ میں شوبز انڈسٹری کو خیرباد کہہ رہا ہوں اور اگر ضرورت پڑی تو اداکاری محض اسلام کی تعلیمات کے لیے ہی کروں گا۔

وزیراعظم عمران خان نے اپوزیشن کی بلیک میلنگ یا دباﺅ برداشت نہ کرنے کا فیصلہ کیاہے اور استعفوں سے متعلق حکومتی پالیسی پر قومی اسمبلی کے سپیکر اسد قیصر کو بھی آگاہی فراہم کر دی ہے ۔
تفصیلات کے مطابق قومی اسمبلی کے سپیکر اسد قیصر نے وزیراعظم عمران خان سے ملاقات کی جس دوران عمران خان نے استعفے فوری منظور کرنے کی ہدایت کرتے ہوئے اسد قیصر کو پالیسی سے آگاہ کر دیاہے ۔ عمران خان نے ہدایت کرتے ہوئے کہا کہ استعفے دینے والوں کو تصدیق کیلئے بلایا جائے ، تصدیق ہونے کی صورت میں استعفیٰ تیس منٹ کے اندر اندر قبول کر لیا جائے گا ۔
ملاقات میں فیصلہ کیا گیا کہ جن دو اراکین اسمبلی کے استعفے موصول ہو ئے ہیں ابتداءان سے کی جائے گی ، سپیکر سیکریٹریٹ نے دونوں اراکین اسمبلی کو تصدیق کیلئے خط لکھ دیاہے ، وزیراعظم عمران خان نے پارٹی ترجمانوں کو بھی واضح ہدایات جاری کر دی ہیں۔
عمران خان کا ملاقات کے دوران کہناتھا کہ این آر او کیلئے اپوزیشن نے اپنے سارے کارڈ کھیل لیے ، اپوزیشن والے اب معاملہ الجھا رہے ہیں ، پی ڈی ایم نے تو استعفوں کی بات کی تھی ، کہاں ہیں استعفے ، بلیک میلنگ کرنے کیلئے اداروں پر دباﺅ نہیں ڈالنے دیں گے ۔

بھارتی کرکٹ ٹیم نے میلبورن ٹیسٹ میچ میں آسٹریلیا کو 8 وکٹوں سے شکست دے کر چار میچوں کی سیریز 1-1 سے برابر کر دی ہے۔

تفصیلات کے مطابق میلبورن کرکٹ گراﺅنڈ میں کھیلے گئے میچ میں بھارتی ٹیم نے آسٹریلیا کی جانب سے ملنے والا 69 رنز کا ہدف 16 ویں اوور میں محض 2 وکٹوں کے نقصان پر حاصل کر لیا۔ بھارت کی جانب سے شوبمان گل نے 35 رنز کی ناقابل شکست اننگز کھیلی جبکہ کپتان اجنکیا ریحانے 27 رنز بنا کر آﺅٹ رہے۔
آسٹریلیا کی جانب سے فاسٹ باﺅلر مچل سٹارک اور فاسٹ باﺅلر پیٹ کومنز نے ایک، ایک کھلاڑی کو پویلین کی راہ دکھائی جبکہ جوش ہیزل ووڈ، نتھن لیون اور مارنوش لابوشین کوئی بھی وکٹ حاصل کرنے میں کامیاب نہ ہو سکے۔
قبل ازیں آسٹریلیا نے ٹاس جیت کر بیٹنگ کرنے کا فیصلہ کیا تو پوری ٹیم پہلی اننگز میں 195 رنز بنا کر ہی ڈھیر ہو گئی۔ مارنوس لابوشین سب سے زیادہ 48 رنز بنا سکے جبکہ ٹریویس ہیڈ نے 38 رنز بنائے۔
بھارت کی جانب سے جسپریت بمرا نے تباہ کن باﺅلنگ کرتے ہوئے 16 اوورز میں 56 رنز کے عوض 4 وکٹیں حاصل کیں جبکہ روی چندرن ایشوین نے 3 کھلاڑیوں کو پویلین کی راہ دکھائی۔
آسٹریلیا کی پہلی اننگز کے جواب میں بھارتی ٹیم کپتان اجنکیا ریحانے کی سنچری کی بدولت 326 رنز بنانے میں کامیاب ہوئی اور یوں آسٹریلیا کو 131 رنز کے خسارے کا سامنا کرنا پڑا جس کے جواب میں آسٹریلین ٹیم دوسری اننگز میں بھی صرف 200 رنز بنا سکی اور یوں بھارت کو جیت کیلئے 69 رنز کا ہدف ملا جو اس نے باآسانی 2 وکٹوں کے نقصان پر حاصل کر کے میچ جیت لیا۔

جنس مخالف کی عمر اور تعلقات پر لوگ طرح طرح کی باتیں کرتے ہیں اور اب اس بارے میں اداکارہ ودیا بالن نے کہا ہے کہ یہ سچ ہے کہ خواتین 40 سال کے بعد تعلقات استوار کرنے سے نہیں گھبراتیں، دراصل بڑھتی عمر کے ساتھ ساتھ خواتین میں جہاں اعتماد آتا ہے، وہیں ان سے خوف بھی ختم ہوتا جاتا ہے۔
فلم فیئر سے خصوصی بات کرتے ہوئے ودیا بالن نے پہلی بار خواتین کی جانب سے محبت کرنے، اور خواتین کی جانب سے ادھیڑ عمری میں پرکشش دکھائی دینے جیسے موضوعات پر کھل کر بات کی۔ڈرٹی پکچر جیسی فلموں کی 40 سالہ اداکارہ نے ایک سوال کے جواب میں کہا کہ حقیقت یہ ہے کہ خواتین نوجوانی سے زیادہ ادھیڑ عمری میں پرکشش اور بے خوف دکھائی دیتی ہیں، زیادہ تر خواتین خود کو 40 سال کی عمر کے بعد بااعتماد، پرسکون اور پرکشش سمجھتی ہیں اور اسی عمر میں ہی خواتین تعلقات استوار کرنے سے بھی نہیں گھبراتیں۔
ودیا بالن کا کہنا تھا کہ کچھ خواتین کا مسئلہ یہ ہے کہ وہ بڑھتی عمر سے خوف کھاتی ہیں اور وہ محبت کرنے سے کترانے لگتی ہیں، ان کے خیال میں اس کے لیے خواتین کا 35 سال کا ہونا نہیں بلکہ 40 سال کا ہونا اچھا ہے، خواتین 40 سال کی عمر کو پہنچتے ہی بااعتماد ہوجاتی ہیں اور انہیں تعلقات استوار کرنے میں بھی کوئی دشواری نہیں ہوتی۔

خیال رہے کہ ودیا بالن کا شمار بولی وڈ کی ان اداکاراؤں میں ہوتا ہے جو ادھیڑ عمری میں بھی پرکشش دکھائی دیتی ہیں،ودیا بالن کو اکثر اپنے اضافی وزن کی وجہ سے بھی تنقید کا نشانہ بنایا جاتاہے، تاہم وہ خود سمجھتی ہیں کہ ان کے بڑھے ہوئے وزن میں ہی ان کی خوبصورتی ہے، وہ ان دنوں آنے والی تیلگو سیاسی فلم ’این ٹی آر‘ کی شوٹنگ میں مصروف ہیں۔ودیا بالن نے 2012 میں فلم ساز سدھارتھ رائے کپور سے شادی کی اور کچھ عرصہ قبل انہوں نے کہا تھا کہ فی الحال ان کے پاس بچے پیدا کرنے کا وقت نہیں۔

کاروباری ہفتے کے پہلے ہی روز ڈالر پھر مہنگا ہوگیا تاہم سٹاک ایکس چینج میں 208 پوائنٹس کا اضافہ دیکھنے کو ملا۔
مارکیٹ ذرائع کے مطابق روپے کے مقابلے میں امریکی ڈالر کی قدر میں 18 پیسے کا اضافہ ریکارڈ کیا گیا جس کے بعد انٹربینک میں ڈالر160 روپے 32 سے بڑھ کر160 روپے 50 روپے کاہوگیا۔ ادھر 200 پوائنٹس کے اضافے کے بعد 100 انڈیکس 43600 کی سطح عبور کر کے 43 ہزار 625 پوائنٹس کی سطح پرپہنچ گیا۔

گزشتہ روز سے لاپتہ سات سالہ بچی کی لاش پانی کے جوہڑ سے مل گئی ہے ، پولیس نے دو مبینہ ملزمان کو گرفتار کرلیا جن کی تصاویر بھی وزیراعلیٰ پنجاب کے میڈیا سیل نے جاری کردیں۔
ڈی جی انویسٹی گیشن شارق جمال کے حوالے سے جیونیوز نے بتایا کہ بچی کی لاش موہلنوال کے علاقے سے تالاب سے ملی تھی اور دونوں ملزمان قانون کی گرفت میں آچکے ہیں۔ پولیس کے مطابق “ع” گزشتہ روز سے لاپتہ تھی جس کا مقدمہ تھانہ سندر میں درج تھا۔اس سے پہلے وزیراعلیٰ پنجاب سردارعثمان بزدار نے سندرمیں اغواء کے بعد بچی کے قتل کے واقعہ کا نوٹس لیتے ہوئے سی سی پی اولاہور سے رپورٹ طلب کی تھی ۔ انہوں نےگرفتار ملزمان کے خلاف سخت قانونی کارروائی کا حکم دیا اور کہاکہ ملزمان قرارواقعی سزا سے نہیں بچ پائیں گے، بچی کے لواحقین کو ہر صورت انصاف فراہم کیا جائے گا۔ عثمان بزدار
وزیراعلیٰ عثمان بزدار نے بچی کے لواحقین سے دلی ہمدردی اور اظہار تعزیت بھی کیا اور متاثرہ خاندان کو ہر قیمت پر انصاف فراہم کرنے کی یقین دہانی کرائی تھی ۔ بعدازاں وزیراعلیٰ کے میڈیا سیل نے دونوں ملزمان رضوان اور اللہ دتہ کی تصاویر بھی جاری کردیں۔

بھارت میں ایک گھریلو ملازمہ کو چوری کیے گئے زیور پہن کر واٹس ایپ پر اپنی تصویر لگانا مہنگا پڑ گیا۔
بھارتی ریاست آندرا پردیش کے ضلع گنٹور کے ایک علاقے میں مسروقہ زیورات پہن کر واٹس اپ سٹیٹس پر تصویر لگانے والی گھریلو ملازمہ گرفتار کر لی گئی۔
پولیس کے بیان کے مطابق 29 نومبر کو امود نامی شخص کے فلیٹ میں چوری کی واردات ہوئی تھی، جس میں 4 طلائی چوڑیاں، ایک نیکلس، کان کی 2 بالیاں، بے بی چین اور دیگر قیمتی چیزیں اڑائی گئی تھیں۔
پولیس نے مالک مکان کی شکایت پر چوری کا مقدمہ درج کر کے تفتیش شروع کی، تاہم امود کی بیوی نے ملزمہ سنیتا کو مسروقہ ساڑی اور زیورات پہن کر شوہر کے ساتھ لی گئی تصویر کو واٹس اپ اسٹیٹس میں لگا ہوا دیکھا تو حیران رہ گئی۔
امود کی بیوی نے فوری طور پر اس کی اطلاع اپنے شوہر کو دی، جنھوں نے پولیس کو خبردار کر دیا، پولیس نے بعد ازاں علاقے کے ایک بس سٹینڈ کے قریب سے سنیتا کو حراست میں لے لیا۔

دنیا میں کووڈ۔19کے مصدقہ کیسوں کی تعداد میں تیزی سے اضافہ جاری ہے اور تاحال مریضوں کی تعداد آٹھ کروڑ کی خطرناک حد پار کر چکی ہے۔عالمی وبا کے باعث دنیا بھر میں سترہ لاکھ سے زائد افراد اپنی جانیں گنوا چکے ہیں جبکہ برطانیہ میں وائرس کی ایک نئی قسم سامنے آنے کے بعد عوام میں مزید تشویش پائی جاتی ہے۔اس صورتحال میں امید کی واحد کرن ویکسین کی عام دستیابی ہے اور خوش آئند بات یہ ہے کہ اکثر مغربی ممالک میں ویکسی نیشن کا عمل شروع بھی کر دیا گیا ہے۔

اس پیش رفت کے بعد لوگوں کے ذہنوں میں یہ سوالات ابھر رہے ہیں کہ کیا دنیا میں ویکسین کی عام دستیابی ممکن ہو سکے گی یا پھر ترقی یافتہ اور وسائل سے مالامال ممالک پیسے کے بل بوتے پر ویکسین کو صرف اپنے عوام تک ہی محدود کر دیں گے۔اس حوالے سے تشویشناک بات اکثر ترقی یافتہ ممالک کے رویے ہیں جو ویکسین کو زخیرہ کرنے کے لیے تمام وسائل استعمال میں لا رہے ہیں۔ایسے اقدامات سے وبا کے حوالے سے عالمی تعاون کو شدید نقصان پہنچ رہا ہے اور کمزور ممالک کے عوام میں احساس محرومی پیدا ہو رہا ہے۔

اگرچہ عالمی ادارہ صحت نے ویکسین کی تحقیق و ترقی اور اس کی عام رسائی کے حوالے سے کووایکس تعاون منصوبہ لانچ کیا تھا، جس کے تحت ویکسین کی تقریباً دو ارب خوراکیں خریدنے کے معاہدے طے پا چکے ہیں مگر اصل سوال یہ ہے کہ کیا ویکسین تیار کرنے والے ممالک اس بات کی اجازت دیں گے کہ منصوبے کے مطابق دیگر دنیا کو ویکسین فراہم کی جائے ،کیونکہ موجودہ صورتحال کو دیکھ کر لگتا نہیں کہ مستقبل قریب میں متوسط اور کم آمدنی والے ممالک کی ویکسین تک رسائی ممکن ہو پائےگی۔ سنگین عالمی وبائی صورتحال میں ایک جانب ترقی یافتہ ممالک وسیع پیمانے پر ویکسین زخیرہ کرنے کے اقدامات کر رہے ہیں ، تو دوسری جانب محدود وسائل کے حامل غریب ممالک شدت سے ویکسین کے منتظر ہیں۔اعداد و شمار پر روشنی ڈالی جائے تو بلند آمدنی والے ممالک دنیا کی کل آبادی کا صرف چودہ فیصد ہیں، لیکن انہوں نے دنیا کی نصف آبادی کے مساوی ویکسین پہلے ہی خرید لی ہے ۔چند ممالک تو ایسے بھی ہیں جنہوں نے مالیاتی وسائل کے بل بوتے پر اپنی مجموعی آبادی سے کئی گنا زائد ویکسین پہلے ہی خرید رکھی ہے۔دوسری جانب متوسط اور کم آمدنی والے درجنوں ممالک ایسے ہیں جہاں اندازوں کے مطابق اوسطاً دس میں سے ایک فرد کو ویکسین لگانے کی توقع ہے جبکہ تشویشناک بات یہ ہے کہ ترقی یافتہ ممالک کے برعکس ایسے ممالک میں آئندہ برس کے اواخرتک ویکسی نیشن کا عمل شروع ہو سکتا ہے۔ماہرین کے نزدیک ایک ایسے وقت میں جب دنیا میں وبا کی سنگینی جاری ہے، وہاں ترقی یافتہ ممالک کی جانب سے ویکسین زخیرہ اندوزی غیر منصفانہ قدم ہے، جس سے انسداد وبا کے عالمی تعاون کو بھی نقصان پہنچ رہا ہے۔ترقی یافتہ ممالک کے ایسے رویے انسانی حقوق کی بھی خلاف ورزی ہے ۔
ترقی یافتہ ممالک کے برعکس ویکسین تیاری کے حوالے سے صف اول میں موجود چین، ویکسین کی عالمی سطح پر منصفانہ تقسیم کے لیے اپنے تمام وسائل بروئےکار لا رہا ہے۔چین نے ہمیشہ اس عزم کا اعادہ کیا ہے کہ ویکسین کی تیاری کے بعد تقسیم کے مرحلے میں اسے ایک عالمی عوامی پروڈکٹ کا درجہ دیا جائے گا۔ویکسین تیاری کے عالمی تعاون کے تحت چین نے ویکسین ٹرائل کے مراحل میں برازیل ،انڈونیشیا ،مصر اور دیگر ممالک کو شامل رکھا ہے اور ابھی حال ہی میں برازیل نے چینی اداروں کی تیارکردہ ویکسین کو انتہائی موئثر اور محفوظ قرار دیا ہے۔عالمی اداروں نے چین کے سیاسی عزم اور پیداواری صلاحیت کو دیکھتے ہوئے امید ظاہر کی ہے کہ چین ویکسین کی گلوبل سپلائی میں انتہائی اہم کردار ادا کرے گا۔یہاں اس حقیقت کو سمجھنے کی ضرورت ہے کہ کوئی بھی ملک اُس وقت تک محفوظ تصور نہیں ہو گا جب تک دنیا بھر سے وائرس کا مکمل خاتمہ نہیں کر دیا جاتا۔ویکسین کے حوالے سے تحفظ پسندی بھی وبا سے بچاو میں کارگر ثابت نہیں ہو گی۔
ویکسین کے حوالے سے قوم پرستی اور تحفظ پسندی عالمی سطح پر اقتصادی بحالی کی کوششوں کے لیے بھی تباہ کن ثابت ہوگی۔چین اس سے قبل بھی اپنے عملی اقدامات سے ثابت کر چکا ہے کہ وہ دنیا کے وسیع ترمفاد کو ہمیشہ عزیز رکھتا ہے۔چاہے انسداد وبا کے لیےدرکار ساز وسامان ہو یا پھر اب ویکسین کی تیاری و فراہمی ،چین نے ہمیشہ ترقی پزیر اور پسماندہ ممالک کو ترجیح دی ہے۔
عالمی وبا نے دنیا کو یہ ضرور باور کروایا ہے کہ وائرس کی کوئی سرحد نہیں ہے لہذا ویکسین کی تقسیم میں بھی سرحدوں کو بالائے طاق رکھتے ہوئے اقدامات ناگزیر ہیں۔مغربی ترقی یافتہ ممالک کو سمجھنے کی ضرورت ہے کہ کووڈ۔19کے خلاف حتمی فتح صرف اُسی صورت میں ممکن ہے جب ویکسین کی تیاری اور تقسیم منصفانہ طور پر کی جائےگی وگرنہ عارضی طور پر خود کا تحفظ تو ممکن ہے لیکن دیرپا بنیادوں پر یہ کوئی پائیدار حل نہیں ہے اور وبا کے دوبارہ پھیلاو کا خطرہ ہروقت موجود رہے گا۔عالمی رہنماوں کو دانشمندی ،کھلے پن اور قوم پرستی کو یکسر نظرانداز کرتے ہوئےدنیا کے ایک محفوظ اور روشن مشترکہ مستقبل کے لیے فیصلے کرناہوں گی، تب ہی وائرس کو شکست دی جا سکےگی۔