Archives December 2020

شاہ رکن عالم میں 55 سالہ شخص نے 9 سالہ بچی کو اغواءکر کے زیادتی کا نشانہ بنا ڈالا ‘بچی تشویشناک حالت میں نشتر ہسپتال منتقل کردی گئی ، پولیس نے کارروائی کرتے ہوئے ملزم گرفتار کر لیا گیا۔
روزنامہ جنگ کے مطابق شاہ رکن عالم میں9 سالہ بچی کو 55 سالہ شخص “ر”نے اغواءکر کے ایک مکان میں لے جا کر زیادتی کا نشانہ بنایا اور فرار ہو گیا ، ملزم زیادتی کا نشانہ بننے والی بچی کے نانا کا قریبی دوست بتایا جاتا ہے۔
پولیس تھانہ شاہ رکن عالم کے مطابق بچی کو نشتر ہسپتال منتقل کر دیا گیا ہے جبکہ بچی کے والد کی درخواست پر مقدمہ درج کر کے ملزم کو گرفتارکر لیا گیا ہے۔ادھر پولیس تھانہ الپہ نے ایک لڑکی کو زیادتی کا نشانہ بنانے کے الزام میں دو افراد کے خلاف مقدمہ درج کر لیا۔
کوٹ ماہرا کے رہائشی ” آ “نے پولیس کو درخواست دی کہ اسکی 15 سالہ ہمشیرہ سودا سلف لینے دکان پر گئی جہاں “ع ف ” اسکو زبردستی لے گیاجہاں نور نامی شخص پہلے سے موجود تھا جس نے اس کی ہمشیرہ کو زبردستی زیادتی کا نشانہ بنایا جبکہ عمر پہرہ دیتا رہا۔پولیس نے درخواست پر “ع “اور”ن” کے خلاف مقدمہ درج کرکے کارروائی شروع کر دی۔

راکھی ساونت بھارتی رئیلٹی شو بگ باس میں راہول مہاجن کی تنقید پر رو پڑیں جس پر اداکارہ کے شوہر طیش میں آگئے۔
راہول مہاجن نے بگ باس کی حالیہ قسط میں راکھی ساونت پر طعنہ کستے ہوئے انہیں چھوٹی ذہنیت کی مالک شخصیت قرار دیتے ہوئے کہا کہ راکھی کے مداح بھی ان ہی کی طرح ہیں۔راہول مہاجن کے تبصرے پر راکھی نے رونا شروع کردیا۔
راہول مہاجن کے راکھی پر تبصرے کے بعداداکارہ کے شوہر رتیش نے ایک انٹرویو میں کہا کہ راہول کے برعکس راکھی نے اپنا مقام اپنی محنت اور جدوجہد سے حاصل کیا ہے جب کہ راہول اپنے نسب سے جانا جاتا ہے، وہ مرحوم بی جے پی رہنما پرامود مہاجن کا بیٹا اور بی جے پی کے ایم پی پونم مہاجن کا بھائی ہے۔
رتیش کا کہنا تھا کہ بالی وڈ انڈسٹری میں راکھی کا کوئی گاڈ فادر موجود نہیں، نہ ہی راکھی تعلیم یافتہ ہے اس کے باوجود انہوں نے اپنی محنت اور کوششوں سے بالی وڈ انڈسٹری میں ایک مقام حاصل کیا وہ ایک سیلف میڈ شخصیت ہے۔
راکھی ساونت کے شوہر نے کہا کہ راہول خود کیا ہے ؟ اگر آپ راہول کی زندگی سے اس کے والد اور بھائی کا نام نکال دیں تو راہول کو کوئی نہیں جانتا۔
رتیش کا کہنا تھا کہ اگر بگ باس ایک گیم شو نہ ہوتا وہ راہول کی زبان کاٹ دیتے۔

قومی ٹیم کے بیٹنگ کوچ یونس خان نے کہا ہے کہ محمد رضوان کی جتنی تعریف کی جائے کم ہے اور فہیم اشرف ایک آل راؤنڈر کا کردار ادا کر رہے ہیں۔
تفصیلات کے مطابق ماﺅنٹ منگنوئی ٹیسٹ کے تیسرے روز کا کھیل ختم ہونے کے بعد میڈیا سے بات کرتے ہوئے سابق کپتان اور قومی ٹیم کے بیٹنگ کوچ یونس خان نے کہا کہ ٹاپ آرڈر سے رنز نہیں ہوئے لیکن انہوں نے کریز پر وقت ضرور گزارا، فہیم اشرف کیلئے سٹیج تیار تھا کیونکہ جب وہ کریز پر پہنچے تو 50 اوورز ہو چکے تھے، ٹاپ آرڈر میں ایک اچھی پارٹنر شپ ہو جاتی تو صورتحال مختلف ہوتی۔
سابق کپتان نے کہا کہ کھیل کے دوسرے روز شان مسعود کا آؤٹ ہونا پاکستان ٹیم کی بدقسمتی رہی، میچ کے تیسرے روز ناٹ آؤٹ سیٹ بیٹسمین کھیل رہے ہوتے تو بہت فائدہ ہوتا اور پارٹنر شپ لگنے سے دوسری ٹیم پر دباؤ ہوتا ہے، اگر اننگز میں 100 رنز کی 2سے 3 پارٹنر شپ ہو جائیں تو بہت فائدہ ہوجاتا ہے، نیوزی لینڈ کی اننگز میں بھی اسی طرح ہوا، انہوں نے ایک لمبی اور دو چھوٹی چھوٹی پارٹنر شپ لگائیں اور 400 سے زائد رنز بنا لئے۔
یونس خان نے کہا کہ محمد رضوان کی جتنی تعریف کی جائے کم ہے، وکٹ کیپر بیٹسمین انگلینڈ میں بھی اچھا کھیلے، ان کی آج کی اننگز بالکل مختلف تھی، محمد رضوان ایک میچور اور سینئر کھلاڑی کے روپ میں نظر آ رہے ہیں، اسی طرح کھیلتے رہے تو پاکستان کو بہت فائدہ ہوگا، کپتان کی اپنی کارکردگی بہت اہمیت رکھتی ہے، ذاتی پرفارمنس اچھی ہو تو فیلڈ میں فیصلے بھی بہتر ہوتے ہیں۔
اس موقع پر انہوں نے آل راﺅنڈر فہیم اشرف کی بھی تعریف کی اور کہا کہ وہ ایک آل راؤنڈر کا کردار ادا کر رہے ہیں، امید ہے کہ عمدہ کارکردگی کا سلسلہ جاری رکھیں گے، ان کے کھیل میں بہتری آرہی ہے، وہ اچھے باؤٔلنگ آل راؤنڈر بننے کی صلاحیت رکھتے ہیں۔

ملک بھر میں کورونا کے وار جاری ہیں۔ گذشتہ چوبیس گھنٹوں کے دوران کورونا سے 63 اموات ہوئیں جبکہ کورونا کے 2260 نئے کیسز رپورٹ ہوئے۔ ، جس کے بعد اموات کی تعداد 9 ہزار 816 ہوگئی۔ پاکستان میں کورونا کے تصدیق شدہ کیسز کی تعداد 4 لاکھ 69 ہزار 482 ہوگئی۔ نیشنل کمانڈ اینڈ آپریشن سینٹر کے تازہ ترین اعدادوشمار کے مطابق گذشتہ 24 گھنٹوں کے دوران 2 ہزار 260 نئے کیسز رپورٹ ہوئے، پنجاب میں ایک لاکھ 35 ہزار 141، سندھ میں 2 لاکھ 9 ہزار 429، خیبر پختونخوا میں 56 ہزار 875، بلوچستان میں 18 ہزار 61، گلگت بلتستان میں 4 ہزار 847، اسلام آباد میں 36 ہزار 981 جبکہ آزاد کشمیر میں 8 ہزار 148 کیسز رپورٹ ہوئے۔

دوسری جانب عالمی وبا کورونا وائرس کے سبب دنیا میں 8 کروڑ 20 لاکھ 7 ہزار سے زائد افراد متاثر اور 17 لاکھ 57 ہزار 640 اموات ہو چکی ہیں۔

دنیا میں کورونا کے 5 کروڑ 64 لاکھ 71 ہزار سے زائد مریض صحتیاب ہو چکے اور 2 کروڑ 19 لاکھ 78 ہزار سے زائد زیر علاج ہیں۔یاد رہے کہ دنیا بھر میں پہلے 50 لاکھ کیسز کا سفر 186 دنوں میں طے ہوا۔ ایک کروڑ سے دو کروڑ کیسز ہونے میں 43 دن لگے۔

اگلے 38 دنوں میں مزید ایک کروڑ کیسز رپورٹ ہوئے۔ 3 کروڑ سے چار کروڑ کا سفر31 دنوں میں طے ہوا۔ چار کروڑ سے پانچ کروڑ کیسز رپورٹ ہونے میں21 دن لگے۔ آخری ایک کروڑ کیسز صرف اٹھارہ دنوں میں سامنے آئے۔ پہلی ایک لاکھ اموات 89 روز میں رپورٹ ہوئیں۔ 5 جون کواموات 4 لاکھ کا ہندسہ عبور کرگئیں۔ 20اگست کو اموات کی تعداد 8 لاکھ ہوگئی۔ چار لاکھ سے آٹھ لاکھ اموات ہونے میں 76 دن لگے۔ 8 لاکھ سے 10 لاکھ اموات 37 دنوں میں سامنے آئیں۔ اگلی دو لاکھ اموات 35 دنوں میں رپورٹ ہوئیں۔ آخری دو لاکھ اموات صرف 24 دنوں میں سامنے آئیں۔

اداکار فیصل قریشی نے کہا ہے کہ لوگوں کو مضبوط آدمی کا کردار بہت پسند ہے کیونکہ انہیں لگتا ہے کہ یہ بندہ سنبھال سکتا ہے اور کچھ کر سکتا ہے۔

برطانوی نشریاتی ادارے کو انٹرویو دیتے ہوئے فیصل قریشی نے کہا کہ مجھے ڈراموں میں منفی کردار کرنے پر تنقید کا سامنا کرنا پڑا تاہم یہ سچ ہے کہ مضبوط مرد کے کردار کو سراہا جاتا ہے۔

انہوں نے کہا کہ عورت میں اتنی طاقت ہے کہ وہ مرد کی پوری شخصیت تبدیل کر سکتی ہے۔ مرد کے 10 دوست، باپ اور ماں لاکھ بار کہیں سگریٹ چھوڑ دو لیکن وہ نہیں چھوڑے گا لیکن جہاں کوئی لڑکی دل کو لگی تو فوری سگریٹ بجھا کر سیدھا ہو جاتا ہے۔

چین کے سرد ترین شہر ہربن میں ہر سال آئس اینڈ سنو فیسٹیول منعقد ہوتا ہے جہاں چینی سالِ نو کی خوشی میں ہزاروں افراد برف کی دنیا سے لطف اندوز ہوتے ہیں۔

آج کل ہربن کے سنگہوا ہوا نامی دریا پر 300 مزدور کام میں مصروف ہیں جو لمبی لمبی چھینیاں اٹھائے دریا کی جمی ہوئی سطح کو کریٹ کے سائز کے برابر بلاکس میں توڑتے ہیں۔ ان مزدوروں نے ربڑ کے بوٹ، لمبی جیکٹسں، موٹے دستانے اور ہیٹ پہنے ہوتے ہیں۔

برف کے بلاکس کو ٹرکوں پر لاد کر قریبی ہربن ونٹر فیسٹیول کی سائٹ پر منتقل کیا جا رہا ہے جہاں ان سے قلعے ، بت، پل اور ریسٹورنٹ بنائے جا رہے ہیں۔

وزیراعلیٰ عثمان بزدار نے یوم قائدؒ اور کرسمس کی تقریبات کے موقع پر بہترین سکیورٹی انتظامات پر پولیس، انتظامیہ اور قانون نافذ کرنیوالے اداروں کو شاباش دی۔ انہوں نے کہا کہ قیام امن سے متعلقہ تمام ادارے بہترین کارکردگی پر مبارکباد کے مستحق ہیں۔

وزیراعلیٰ عثمان بزدار نے اپنے بیان میں کہا کہ عوام کے جان و مال کے تحفظ کیلئے متعلقہ اداروں اور حکام نے بہترین طریقے سے فرائض سرانجام دیئے، پنجاب حکومت کے موثر اقدامات کے باعث صوبے بھر میں یوم قائدؒ اور کرسمس کی تقریبات پرامن ماحول میں منعقد ہوئیں، نئے پاکستان میں مسیحی برادری نے محفوظ اور بہترین ماحول میں کرسمس کی تقریبات منائیں، یوم قائدؒ کی تقریبات کیلئے بھی شاندار انتظامات کئے گئے، جس پر میں متعلقہ اداروں کو مبارکباد دیتا ہوں۔

عثمان بزدار کا کہنا تھا کہ تقریبات کے دوران ایس او پیز پر عمل کرنے پر مسیحی برادری کو خراج تحسین پیش کرتا ہوں، کابینہ کمیٹی کے تمام اراکین نے دن رات محنت کر کے امن و عامہ کے قیام کا قومی فریضہ بطریق احسن سرانجام دیا، صوبائی اداروں اور محکموں کے ساتھ متعلقہ ایجنسیوں کی کوآرڈینیشن بہترین رہی، متعلقہ محکموں اور اداروں نے ٹیم ورک کے طور پر کام کیا، عوام کے جان و مال کے تحفظ کیلئے متعلقہ اداروں اور حکام نے فعال انداز میں فرائض سرانجام دیئے، اسی جذبے، محنت اور عزم کے ساتھ آئندہ بھی قیام امن کیلئے کام کرنا ہے۔

پاکستان اور نیوزی لینڈ کے درمیان دو ٹیسٹ میچوں کی سیریز کے پہلے میچ کے پہلے دن کے اختتام پر کیویز نے 3 وکٹوں کے نقصان پر 222 رنز بنا لیے۔

ماؤنٹ مونگا نوئی میں کھیلے گئے ٹیسٹ میں پاکستان کے کپتان محمد رضوان نے ٹاس جیت کر پہلے فیلڈنگ کا فیصلہ کیا۔ نیوزی لینڈ کی جانب سے اننگز کا آغاز ٹام لیتھم اور ٹام بلنڈل نے کیا لیکن شاہین شاہ آفریدی نے دونوں کھلاڑیوں کو 13 رنز پر پویلین بھیج دیا۔ کیویز بلے باز ٹام لیتھم 4 جبکہ ٹام بلنڈل صرف 5 رنز بناسکے۔

کیویز اوپنرز کے جلد آؤٹ ہونے کے بعد کپتان کین ولیمسن اور راس ٹیلر نے وکٹ پر جم گئے اور دونوں کھلاڑیوں کے درمیان 100 سے زائد رنز کی شراکت قائم ہوئی۔ شاہین شاہ آفریدی نے 133 رنز پر راس ٹیلر کو بھی اپنا شکار بنایا، راس ٹیلر 70 رنز بنا کر آؤٹ ہوئے اور ان کی اننگز میں 10 چوکے اور ایک چھکا شامل تھا۔ کپتان کین ولیمسن 94 اور ہنری نکولس 42 رنز بنا کر کریز پر موجود ہیں۔

کپتان محمد رضوان کا کہنا تھا کہ بابر اعظم کی کمی ہو گی لیکن کھلاڑی اچھا کھیل پیش کرنے کے لیے پراعتماد ہیں۔ کیوی کپتان کین ولیمسن نے کہا کہ اگر ہم ٹاس جیت جاتے تو ہم بھی پہلے بیٹنگ کا ہی فیصلہ کرتے۔

قومی سکواڈ میں کپتان محمد رضوان، عابد علی، شان مسعود، اظہر علی اور حارث سہیل شامل ہیں۔ فواد عالم، فہیم اشرف، یاسر شاہ اور محمد عباس بھی ٹٰم کا حصہ ہیں۔

امریکی ریاست کیلیفورنیا میں سانتا کلاز کا روپ دھارنے والا شخص بجلی کے ہائی وولٹیج تاروں میں پھنس گیا۔
شہری نے کرسمس کی آمد کے پیش نظر سانتا کلاز کے کپڑے زیب تن کئے اور بچوں میں ٹافیاں تقسیم کرنے کیلئے نکلا۔ سانتا کلاز نے فضا سے ٹافیاں تقسیم کرنے کا ارادہ کیا جس کیلئے اُس نے اپنا ذاتی ایئر کرافٹ استعمال کیا۔
سانتا کلاز نے ہزاروں فٹ بلندی سے چھلانگ لگائی اور پیرا شوٹ کی مدد سے ہوا میں اڑتے ہوئے بچوں کیلئے ٹافیاں پھینکیں کہ اسی دوران اُس کا پیرا شوٹ بجلی کے تاروں میں پھنس گیا۔

محکمہ فائر بریگیڈ کے رضاکاروں نے کرین اور سیڑھی کی مدد سے تاروں میں پھنسے سانتا کلاز کو ریسکیو کیا اور پھر اُسے ہسپتال منتقل کیا۔ خوش قسمتی سے سانتا کلاز کو حادثے میں معمولی چوٹیں آئیں۔

نیوزی لینڈ کی مقامی حکومت نے نایاب پرندوں کی حفاظت اور انہیں الجھن سے بچانے کیلئے شاہراہوں پر نصب سٹریٹ لائٹس بند کرنے کا فیصلہ کرلیا۔

نیوزی لینڈ کے گاؤں پناکائیکی کی مقامی حکومت کی جانب سے جاری اعلامیے میں بتایا گیا ہے کہ سٹریٹ لائٹس کی وجہ سے جنوبی امریکا سے سردیوں میں آنے والے پرندے تذبذب کا شکار ہوتے ہیں جس کی وجہ سے اُن کی اموات ہوتی ہیں۔

ماہرین کے مطابق یہ پرندے بیولومائین سینٹ نامی مچھلی کھاتے ہیں جو سطح آب پر آکر روشن ہوتی ہے، رات کے وقت یہ پرندے سمندر پر اڑتے ہیں اور جیسے ہی مچھلی اوپر آتی ہے اُسے اپنی خوراک بنالیتے ہیں۔ وائلڈ لائف کے حکام نے بتایا کہ یہ پرندے سٹریٹ لائٹس کو اپنا شکار سمجھ کر اُس کی طرف لپکتے ہیں جس کی وجہ سے وہ کھمبوں سے ٹکرا کر زخمی ہوتے اور پھر گاڑیوں کے نیچے آجاتے ہیں۔